فَلوغن

الفصل الاول ( الكمين )

الفصل الأول ( الكمين )
الرواية...
٢٠٢٢/١/١
مرحبا .. اني صلاح عمري ٣٥ سنة دااكتب هاي القصة بسنة ٢٠٢٢ و راح احجيلكم عنهه .. صارت وياي قبل ٨ سنين بعمليات التحرير ...
.
الواقع ...
صاحب :: صلاح ما تنطيني اللابتوب شوية !
صلاح :: صاحب عوفني عندي شغل دااكتب .
صاحب :: بس اسحب منه كم شغلة .
صلاح :: بعدين يمعود عوفني مو وكتك .
صاحب :: هو اني هم صوجي اوك من تكمل انزل انطينيا .
صلاح :: ههه اي انزل بلمصعد عود .. بس روح .
.
الرواية
اي نرجع لموضوعنا نسيت اعرفكم هذا صديقي و اخوية صاحب من الناصرية المهم بعدين راح تعرفوه وحدكم هسة خل نكمل ...
قبل ٨ سنوات .. جنت عايش ببغداد وي امي و اخوية فلاح الازغر مني و جنت اداوم منتسب بلقوات الخاصة بلجيش العراقي برتبة نقيب بذاك الوقت و وقتي جان كله بلدوام طبعا و مجان عندي وقت راحة بس من انزل للبيت و وقت نزلتي جنت اخلصه يم بيت خطيبتي ( فرح ) أكثر شي و ب بيت اهلي و مااطلع لا منا ولا منا ..
هههه مدتشوفوني لحيت؟ انتو تدرون البطولة مو اليةة لعد ليش متكولولي ترة لحيت و انت تحجي عن نفسك فوت بلموضوع يمعووود ههههه .. تمام .. كلشي بلش
ب ٢٠١٤ ... بغداد .
جهاز الاستخبارات العراقي .. مقر القيادة ..
.
تندك باب مكتب العميد محمد ..
العميد و هو السماعة مال تليفون ب اذانه ديحجي وي شخص كلش مهم ..
:: ادخل..
يدخل ملازم فراس يلقي التحية ..
:: سيدي هاي الملفات الي طلبتهه البارحة ..
العميد :: عاشت ايدك .. تكدر تنصرف .
فراس :: حاضر سيدي .
العميد علخط وي الشخص المهم :: سيادتك اني بلشت ب إجراءات العملية و دزيت ورة النقيب رفعت .
الشخص :: برأيك رفعت مناسب لهيج عملية؟
العميد :: نعم سيدي و مراح يكون وحده اصلا .
الشخص :: منو اختاريت ويا بعد .
العميد :: سيدي نقيب صلاح من القوات الخاصة بلجيش العراقي هو راح يقود العملية و نقيب رفعت و ملازم أول مروة من جهاز الاستخبارات سيدي..
الشخص :: تمام انت تابع الملفات زين و بلغني بلتطورات اول ب اول ..
العميد :: حاضر سيدي ..
العميد يرفع السماعة :: فراس تكدر تتفضل يمي شوية ..
و ينزلهه ..
فراس يلقي التحية :: سيدي ؟
العميد :: دزلي وره نقيب رفعت و ملازم اول مروة فورا .
فراس :: حاضر سيدي .
بعد ٥ دقايق ...
.
فراس :: سيدي نقيب رفعت و ملازم اول مروة صارو هنا سيدي .
..
رفعت و مروة يدخلون و يلقون التحية :: سيدي .
العميد واكف يم المكتب و عيونه على الملفات :: استرح .. تفضلو اكعدو ..
رفعت :: العفو سيدي .
العميد :: رفعت اكعد ابني .. اكعدي مروة .
مروة :: حاضر سيدي ..
العميد :: مروة شوكت خلصتي مهمتج..
مروة :: سيدي البارحة رجعت .
العميد :: الحمدلله على سلامتج بنيتي .
مروة :: الله يسلمك سيدي
العميد يرفع السماعة :: فراس .. نقيب صلاح وصل ؟
فراس :: اي سيدي اتصل قبل شوي كال عشر دقايق و يوصل .
العميد :: بس يوصل بوجهه لغرفتي .
فراس :: حاضر سيدي .
رفعت :: سيدي دزيت علينة .
العميد :: اي دزيت . هسة راح تعرف السبب .
.
العميد يتحرك من مكانه و يصير مقابيلهم و يشغل شاشة جبيرة صايرة كبالهم ! و يوكف و يكول ..
:: شباب انتو تعرفون ب وضع العراق هسة و الازمة و الحرب الي دخلنا بيهه ضد هاي الجماعات الي دخلت كاعنا. . شباب الفتوة انطلقت قبل مدة و اخوانكم بلحشد الشعبي و الجيش حاليا على اطراف الانبار و الله يكون بعونهم ان شاء الله يردون الكاع لأهلهه.. اما انتو ف طبعا انتو صار الكم استثناء من الواجب هاي السنة .
رفعت :: سيدي!؟
العميد :: كول رفعت .
رفعت :: ليش سيدي يعني عقوبتيش هاي احنة ما علينا اي خط أحمر ولا اي جنحة .
مروة ب استغراب :: سيدي اني لحالي و وقتي كله بلدوام يعني وين تريدني اروح ؟!
العميد :: بابا خل اكمل كلامي .
مروة :: تفضل سيدي .
العميد يشغل الشاشة الي بضهره و تبدأ الصور تنعرض علشاشة و هو يكلب بيهه .. لحد ما طلعت صورة شخص معين ..
العميد و هو يأشر عليه :: هذا صهيب محمد امين الملقب هسة ب ( صهيب الوالي ) هو مو والي بس اخذ هذا اللقب بسبب قوته و بطشه بلعالم يا بنتي يا مروة انتي التقيتي بي قبل هلمرة ..
مروة :: اي سيدي هذا جان ببغداد قبل سنة و من انكشفت كل اوراقه و خسر القوة الي جانت بضهره انهزم لسوريا بس بعد آخر معلومة اجتنه عنه من عنصر استخباراتي بلانبار تكول انو هو قاد عملية تفجيرية هناك ..
رفعت :: مروة هذا شنو جان شغله ببغداد ؟
مروة :: سيدي هذا تاجر ..
العميد يقاطعهه و يكول :: جان تاجر تاجر بكلشي ممكن يخطر ببالك حتة جان يسفر شباب للخارج بحجة المستقبل الآمن هناك .. بس مو كلهم يوصلون .
شباب صهيب الوالي هو قيادي بتنظيم داعش حاليا و هسة هو بلانبار و احنة ب امس الحاجة اله لان عنده معلومات عن منبع الاموال الي تمول و تدز دعم لحضن الانبار و لازم ناخذه مناك و نجيبه لبغداد ب اسرع وقت ..
رفعت :: سيدي و احنة المطلوب من عدنا شنو غيره .
العميد يبدل الصورة :: هاي البنية اسمهه ريم و عمرهه ١٥ سنة اختفو اهلهه قبل شهرين و ليهسة ماعدنا اي معلومة اذا جانو عايشين أو ميتين ليهسة و هي محبوسة ب بيت داخل الانبار تابع لواحد من الشراذمة الي هناك الي يلقب نفسه ب الخليفة *********.
مروة :: سيدي الانبار مليانه ناس تحتاج المساعدة يعني انت تدري احنة دنشتغل ليل و نهار حتة نرجع كاعنا و نطرد الارهاب كله منهه و نحاسبه على كلشي شمعنه هاي البنية ..
العميد :: راح نساعدهه لان هي الهدف .. هي الهدف لان عمهه هو واحد من القياديين بلتنظيم.
رفعت :: شنو و!؟
العميد :: اي ابني عمهه واحد من قياديين التنظيم ..
تندك الباب فجأة ..
العميد :: ادخل ..
و يدخل نقيب صلاح و يلقي التحية :: سيدي ..
العميد :: أهلا و سهلا صلاح ..
:: شباب مهمتكم الجاية هي مهمة سرية للغاية و محد عنده علم بيهه غيري اني و اللواء******* و سيادة ال****** ..
نقيب صلاح من القوات الخاصة بلجيش العراقي وقع عليه الاختيار حتة يقود تنفيذ هاي المهمة ..
صلاح :: سيدي ..
العميد :: المطلوب منكم هو تجيبون ريم لبغداد .. و تعتقلون صهيب الوالي و انتبهو انو الاولوية للبنية و صهيب اذا ما كدرتو تعتقلو ف اقتلو هناك   
رفعت :: سيدي نقتله؟ !
العميد :: الغاية انو تشل حركة العدو و تجرده من وحدة من نقاط القوة هذا شي اولويته اكبر من انو تجيبه لبغداد ..
:: شباب راح تدخلون للانبار و راح تنضمون للتنظيم الارهابي و تقتلون صهيب الوالي و راح تاخذون ريم مناك و تجيبوهه لهنا حتة نطلع عمهه من جحره ..
صلاح :: سيدي عمهه شسمه ؟
العميد :: بعدين راح تعرف اسمه..
رفعت يسأل :: سيدي راح ندخل للانبار!؟ 
العميد :: اي ابني شنو الجديد ؟ انت مو جنت تروح لسوريا وحدك؟
رفعت :: سيدي العفو بس ذهني شرد شوية .
العميد :: مروة بنتي كملي كل التجهيزات و سوي اتصالاتج وي الشباب هناك .
مروة :: حاضر سيدي .
العميد :: شباب باقي التفاصيل موجودة بهذا الملف و راح يزودكم بيهه نقيب صلاح بعدين و عدكم يومين و بس .. حتة تتحركون منا .. ودعو اهلكم و شدو رايتكم يلله ولدي الاسباع.
م/ر/ص .. بصوت واحد :: حاضر سيدي ..
.
الواقع ...
صلاح يصيح صاحب . :: ولك صوييييحب وينك؟
صاحب :: ها يمعود دااباوع فلم .
صلاح :: تعال نزلني يمك .. ههههه يباوع فلم ابن الطركة هههه . ولك تعاااال .
صاحب مندمج :: يمعود شترييد خبصتني هااا هااا شبيك .
صلاح :: تعال يروحي انت نزلني مدااعرف اكتب شي هنا ..
صاحب صعد فوك لغرفة صلاح و اخذه كعده على الكرسي مالته و بقه يدفعه و هو يحجي ويا :: مرتك شوكت تجي ترة اني مااتحملك أكثر هههه .
صلاح :: ولك هههه لا تضحكني مرتي بلسفارة هسة انت شعليك بمرتي تريد تولي؟ ولي يلله هههه
صاحب يعوف الكرسي :: اوك راح اولي.
صلاح :: يمعود اتشاقه تعاال هههه خما تعوفني هيج غير تنزلني ههه
صاحب ب تك عين :: ههههه خادم مال ابوك اني مو .
صلاح :: شعندي غيرك انت يمناي و ريومتي مريتي يسراي يول احنة نتشاقه شبيك .
صاحب :: اعرف ياخوية .
ينزل صلاح للطابق الارضي و يرجع يخلي اللابتوب على الميز و يكمل كتابة ...
.
الرواية ...
بعد يومين ... صحراء الانبار ...
صلاح و رفعت بوحدة من السيارات المدنية و لابسين مدني و كاعدين بلبدي مال سيارة الي جانت تمشي ب اتجاه واحد من مداخل الانبار الصحراوية ..
رفعت :: سيدي ليش جانت الخطة بهلشكل.. يعني اسألك من باب الفضول .
صلاح يصد وجهه على رفعت :: علمود تحمي اضعف حلقة بلسلسلة مالتك من انو تنكسر من الجهتين .. لازم تخلي هاي الحلقة بلمقدمة؟ أو بلمؤخرة مال سلسلة نفسهه و ماتخليهه وياك ..
رفعت :: لهذا دزيت مروة كدامنه؟
صلاح :: رفعت انتو مو استخبارات؟
رفعت :: اي خوية .
صلاح :: الاستخبارات أكثر مكان تحتاجهم بي هو الاستخبارات نفسهه و انت متعرف شنو منتظرنا هنا لهذا اني دزيت مروة كدامنه ما دزيتك . و بعد لا تكلي سيدي .
رفعت :: يعني انت اكبر مني و من باب الاحترام يعني.
صلاح و هو يباوع للطريق :: براحتك ..
.
وكفت السيارة فجأة ..
صلاح :: يلله كوم وصلنا ...
رفعت :: حاضر .
السايق ينزل و ينزلون وراه رفعت و صلاح ..
السايق :: سيدي هذا آخر مكان اكدر اوصل اله .
صلاح :: تمام رحم الله والديك..
السايق و هو يأشر على الشارع :: بعد نص كيلو شمال شرق هذا الطريق هو تابع للرقعة الجغرافية الغير مأهوله حاليا ..
صلاح :: يعني تلوحه الغارات الجوية .
السايق :: اي سيدي تلوحه الغارات الجوية 
رفعت :: سيدي ( كمين ٣ ) بقرية الغرير .
صلاح :: وصلنا لهنا سلامات هسة لازم نوصل لقرية الغرير قبل ما يطلع الفجر حتة لو ما نمنا الليلة .
رفعت :: سيدي و الغارات ؟
صلاح :: راح نمشي حسب الخطة اذا انلزمنا من وكت ف نتحول للخطة ب .. اذا ما نلزمنا ف نلتزم بيهه .
رفعت :: نتوكل؟
صلاح :: نتوكل ..
.
صلاح و رفعت يودعون السايق و يكملون طريقهم مشي بنص الصحراء و همة شكلهم مال ثنين ابد ابد مو مستطرقين يعني جانو مشتغلين على نفسهم صح  ..
.
الواقع ..
زوجة صلاح تجي للبيت ..
زوجته :: حبيبي شلونك شنو وين صاحب؟
صلاح :: ها ريم الحمدلله .. صاحب طلع قبل شوي .. بشري شسويتي؟
ريم :: حبيبي اخذت (سهلة) وياي حتة تساعدني عود عدهه عرف بلسفارة بس للأسف ما خلصنا .
صلاح :: لييييش شصااار.
ريم :: لازم نرجع للعراق حتة نكملهه هناك لان هاي الشغلة متصير بدونك و انت الا ترجع للعراق يلله .
صلاح :: حبيبتي اني العراق كله يدور عليةة شلون ارجع للعراق ؟
ريم :: اني افهمك شلون ترجع بعدين هسة كلي وين وصلت بلرواية ..
صلاح يتأفف، :: هففف حبيبي بعدني بلكمين..
ريم :: ههههه اوووو بعدك بلبداية يعني .. السالفة هاي مطولة تعال خل اخذك تمدد شوي بين مااحضرلك الغدا .
صلاح :: يلله ..
.
الرواية ..
رفعت خلص الطريق كله و هو يحجي لصلاح عن حياته و شلون انجبر على بنت عمه الي هو اصلا مايطيقهه ابد و هناك و بعد ساعه من المشي
صلاح يضغط زر اللاسلكي:: كمين ٣ .. تسمعني ؟
احنة صرنة قريبين عليك الأوضاع شلونهه؟ .. تسمعني؟ اجب؟
مروة و صوتهه يكطع:: كمين ١ .. كم....ين ١ .. طريق..كم مراقب ارجع من غير طريييق.. سيدي انسحب فدو...ة..
صلاح يوكف بمكانه و بصوت ناصي و يأشر لرفعت :: رفعت اوكف .
رفعت :: سيدي!
جانت ضلمة كلش و بس الضوايات الجاي تلوح من بعيد و صلاح يباوع يمنى يسرى على الهيمة( الفراغ ) الي همة بي ..
صلاح و هو يتلفت :: رفعت دير بالك تسحب سلاحك اذا شفت احد عوفه بمكانه .
رفعت :: سيدي؟
صلاح يلاحظ حركة من بعيد :: اشمر السلاح فورا قبل ما يشوفوه لان وكعنا بلكمين .
رفعت يشمر سلاحه و بقو يتقدمون بخطواتهم على كيف لحد ما ... يتبع