كرونيك: و_شاءت_الاقدار

17

🎶 الحلقة 17 🎶
بعد ما كملت فرغت هم قلبها الكل في البكاء لين تعبت ديراكت مشات رقدت .... ما قامت كان غدوة ال10 على صوت تاليفونها ... هزت روحها مالفرش بالسيف .. و جاوبتك ماغير حتى ما تشوف شكون
- الو
- .....
-موش جاية اليوم و عيش اختي وئام .. ما تكلمنيش جملا اليوم لين نكلمك انا ...
- .......
-أي أكا الحيوان كالعادة ... و الله تاعبة. ..
-......
-تهنا عيش الزين باي
-..
علقت و قامت تتلاوح كالسكرانة دايخة .. تسند في روحها بالسيف ... غسلت وجهها و ركحت شعرها و تعدات للكوجينة باش تعمل قهوة فماش ما تفيق و وجيعة راسها تتنحا. .
هي طيب في قهوة و الباب دق ... مشات حلت .... خلاتو واقف في الباب و دخلت ..
-كان تعمل مزية ارجع بعد نهارين ولا 3 .. حاليا ماعنديش دموع نزيد نهبطهم. .. شاحو البارح..
-أحلام. .. ...
-لا أحلام و لا شي ... (قصت عليه و راجعة للكوجينة ) ماذابيك ترجع منين جيت ...مازلت كي قمت راو مانحبش نبكي ...
-ما نحبش نبكيك انا ... اما الله غالب تعرفني كي نتنرفز. .
-أي نعرفك ... حيوان.... (في يدها صحن طاح على ساقها ) اااه ... يا ربي هالصباح عزا فيك ... علاش جاي .....
دخللها يجري خايف عليها.... قعدها عالكرسي و هبط لرجلها. .. يشوف فيها .. و هي جبدت روحها و قامت ...
-أسد. .. نجم نداوي روحي ... برا امشي عيشك
-لا ... ما نمشي إلا ما نتهنا عليك ...
و حملها بين يديه ....و هي تفركح و تحب يهبطها. .. اما هو ما عبرهاش و ماردش عليها جملا ... كي عرفتو شادد صحيح .. سلمت أمرها لربي و ركحت حطت راسها على صدرو .. و دورت يدها على رقبتو و كبشت فيه ... هو من عند ربي متحكم في روحو بالسيف عليها ... متحكم في اعصابو الي ترخفت بقربها ليه و بلمسة يديها ... في اللحظة هاكي قادر يتحول لحيوان بالحق ... وحش ما يردعو و يرجعو على همجيتو حد ... يولي مجرم بأبشع أنواع الجرائم و الفضائع. .. شادد روحو عليها و لازمو ينجم يتغلب عالوحش الي داخلو ... هو جا باش يصلح العلاقة موش يزيد يوترها و يعقدها ... لذلك مهما عملت و مهما قالت لازم يسمع و يسكت. ..
حطها عالفرش و هي تتمنع موش حابتو يقربلها موش طايقة لمستو. .. موش متحملة تسمع صوتو ... ماتحبش ترا النظرة المقززة في عينيه .. نظرة تعيفها في روحها أصل. .. جاب الدواء و داواها رجلها ....
-عيشك أسد. .. تنجم تمشي تو
-ماكش ملاحظة الي انت من بكري شديت في تنجم تروح تنجم تروح... نعلمك مالا الي انا موش ماشي ... نحب نحكي معاك ....
-و انا ما نحبش نحكي معاك ... بالسيف !!
-دقيقة هاني جيت ... نعمل قهوة و نرجع ...
خلاها تغزل وحدها و مشا ... .. موش باش تخليه يعمل فيها كيما كل مرة ... لازمها هالمرة تتحداه. .. لازمها تكون قوية ... اقوى منو ...
قامت مالفرش ... بالرغم رجلها توجع اما تنجم تمشي عليها ... لازم تتغلب على وجيعتها ... خاتر وجيعة قلبها و جروحو أقوى. .. خرجت مالبيت ماشية لباب الشارع .. باش تخرج و تخليهالو يرتع فيها وحدو .. .. مازالت ماوصلتش و كالعادة يوقفها بصوتو الي يرعب ... قلبها رجف و رجفت معاه ساقيها و قريب تطيح ... اما لا لازمها تكون قوية .. لازمها تغلبو
-أحلام. . قتلك لازم نحكيو ... و ماعندك وين ماشية لازم تسمعني. ..
مشالها .. جا باش يحملها ... ماخلاتوش و هو ماحبش يشد صحيح ..شدها من يدها باسها و هي فيسع جبدت يدها .... لزها للحيط و حصرها بيديه و هي كيما كل مرة جمدت في بلاصتها
-حبيبتي ... نحبك تسامحني على البارح ... (شادلها راسها بين يديه ويغزرلها في عينيها) سامحني على كل شي خايب انا السبب فيه ... عمري ما كنت قاصد نجرحك .. عمري ماحبيت تهبط دمعة من عينيك الي نعشقهم. .. عمري ما قصدت نعذبك ... و كل كلمة و تهديد قلتهولك. .. راو موش من قلبي ... خاتر (هزلها يدها حطها على قلبو ) قلبي ... يعشقك ... يهواك. ... أحلام نحبك. .. انا ... نحبك ..... انسا كل شي خايب صار بيناتنا ... (حط جبينو على جبينها )
-ا.. أسد (دموعها هبطو ماغير ما تشعر )
-أششت (يمسحلها في دموعها ) عينيك ما تخلقوش للبكا. .. عيشك .. ماتبكيش. .. خلينا ننساو كل شي ..خلينا نبداو من جديد (قربلها علخر و كان باش يبوسها ... دزتو )
-أسد ... حرام ... ألي تعمل فيه حرام .... انت هكا تعصي في ربي و تحبني نشارك معاك ... علاش انا بالذات....!! علاش !! البنات ياسر .. خترتني كان انا .... انا محرمة عليك ... و حرام تخمم فيا بالطريقة هاذي
- لاا ... مازال موش حرام ... مازال الوقت ... قول لا ... و أقبل بيا .... نعيشك ملكة والله . انا نحبك
-و انا ... مان. ...
- ما تكملهاش. .. مانحبش نسمعها .... قلي نحبك .. أمنيتي تقولهالي . نعرفك ماتحبنيش. ... اما اكذب عليا ... نحب نسمعها منك ... عيشك أحلام. .. قولي نحبك.....
- ن.... نحبك
حطت راسها على صدرو تبكي و هو زادا ضمها و لصقها ليه .. عدات يديها ورا ظهرو و هو يمسحلها على شعرها .