كرونيك: و_شاءت_الاقدار

22

🎶 الحلقة 22 🎶
لقفها زيد في حملتو و هزها ... حطها عالفرش ... يفيقو فيها ماحبتش ... جابت وئام ماء و رشتها بيه على وجهها ... حلت عينيها ... دور برأسها في البيت و في دقيقة تهزت و تنفضت كاينو ضربها الضو .. مفجوعة
-جواد !!
-وراس اختي كنت تحلم ... ارجع ارقد و ارتاح (وئام) (رجعتها للفرش تمسحلها على شعرها)
-نحلم !! (رجعت تكات و حملت تصويرتو و تبكي ) نحلم ...
-ماعادش وقت على ريماس ... نمشي نركحها و نجي ... زيد هنيني عيش خويا...
- عمللها برافو باهي
-ما تجيبهاش هنا ... قلها راقدة 😢😢 (احلام)
-باهي (و خرجت)
قعدت عالفرش تغزر لتصويرة في الحيط و تبكي ... مشا زيد قعد جنبها
-أحلام. ...
-تعبت .... و الله تعبت (قصت عليه و حطت راسها على كتفو و هو زاد لزها ليه و يمسحلها على شعرها )
-احكي فرغ قلبك احكيلي الي تحب .. ألي يجي على بالك قولو .. صيح... كسر... اضرب اما ماتسكتش ... احكيلي على روحك ... على عايلتك. .. امك بوك و كان عندك خوات آخرين. ...
- (هزت يدها لزوز تصاور جنب بعضهم) بابا عماد الله يرحمو. .. و هاذم جواد و ريم مرتو الله يرحمهم زادا ههه ماقعدلي حد بعدهم ...
-و امك وين !!!
-كنا محلانا. . عيلة ماتلقاش كيفنا . نعيشو الكل مع بعضنا ... انا و بابا و جواد و امي ... بابا الله يرحمو كان عندو السكر و هاذا سبب موتو ... خلاني عمري 12 سنة ... تمنيت راني شفتو قبل ما يموت نحضنو نودعو. .. بعدو ولا جواد هو بابا و امي و خويا و كل شي في حياتي .. و امي ههه امي ماكملش عام على موتو ... عرست و مشات لفرنسا مع راجلها ... حاولت الف مرة تهزني معاها جواد ماخلاهاش و انا ماحبيتش. .. تتفكرنا مرة في العام هاذا كان تفكرت الي عندها صغار جملا .. وقتها جواد كان عمرو 25 رباني هو و ريم و هوما مازالوا مخطوبين .. كثرت عليه الخدمة .. هو عقيد في الجيش .. ماعادش ينجم يتلها بيا و بالخدمة ... عدا عامين على موت بابا و عرس ... و ريم ولات امي .. اصلا امي خلاتني و مشات هي أحسن منها ... تحبني و نحبها .. ألي يرانا يقول أنا بنتهم ... ألي نحب عليه نلقاه و حبلت ريم ... الخبر وقتها فرحني علخر و نستنا في الولادة تقول انا الحبلة هههه و ياريتو ماجا أكا النهار و ياريت ماجاتش ريماس للدنيا ... نعرف كلامي حرام اما الله غالب ... تولدت ريماس ماتت ريم ... و على قد ماكان جواد يحبها مات بعدها ... خدمة و دار ... حتى ريماس بنتو كرهها هي الي كانت السبب في موت أمها. .. اما انا خليتو يحبها .. لازمو يحبها .. هي قطعة منو ...
بعد ما ولدتها. .. صارلها نزيف .. و مانجموش يوقفوه. .. ماللحظة هاكي و انا أمها 15 سنة نربي في bébé ... نقرا و لاهية بخويا و بالدار ... أول كلمة نطقتها هي ماما .😢😢 قداش تمنيت ريم تسمعها ... موش انا .. و بعد تعلمت بابا ... و جواد فرحتو بيها مايعطيها لحد ... و انا فرحتي لفرحتو بالدنيا ... اما ربي كاتبلها العذاب مالصغرة .. جواد ... مشا ... خلط على ريم و خلانا وحدنا ... مات... عندو عام ملي مات ... خلاها امانه عندي و هي عمرها 3 سنين ... للحظة هاذي نتفكر آخر كلام قالو 《ريماس بنتك و انت بنتي حطها في عينيك و رد بالك على روحك 》و تو ريماس هي عينيا ... مات بين يديا. .. في حضني 😢😢 كان مروح بعد مدة ... و نحكيو بالتاليفون ... مافهمتش لا كيفاش و لا علاش ولا يصيح عليا باش نعلق التاليفون 《 أحلام علق علق ما نحبكش تسمع شي 》و مانعرفش علاش مانجمتش نعلق حتى هو زادا كان ينجم يعلق اما هو ما عملش و مانعرفش السبب《 يا ربي .. يا ربي احميني. . يا ربي احميني لبناتي. .. أحلام نعرفك تسمع فيا ماتتفجعش. .. لاباس .. مانجمتش نوقف بالكرهبة اما لاباس ... انا قريب مالدار حذا **** ماتخافش ........》 و بعدها مانسمع كان في حس كراهب دخلت في بعضها و ناس تصيح و قص التاليفون ... خرجت نجري للبلاصة. .. نعرفش شحسيت وقتها و انا نشوف فيهم يخرجو فيه مالكرهبة كلو دم ... مالقيت روحي كان محملتو و نفيق فيه ... الناس تبعد فيا و انا شادة فيه و ماحبيتش نسيبو. .. نغزرلو يتبسملي و يأمن فيا على ريماس و نغزر لدبشي الي كلو أحمر بدمو نبكي و نهز فيه باش يقوم ماحبش .. ماحبش يرجع معايا ... خلاني و مشا ... كمل كلامو ... و كهو وفا عمرو في حضني ... و بعدها فقت في الكلينيك .. ههه دخت ... دفنتو. . و دفنت روحي معاه....