كرونيك: و_شاءت_الاقدار

40

🎶 الحلقة 40 🎶
قدمتلهم .. وقفت جنب زيد و حطت يدها في يدو ...
-زيد !! شكون هاذي الي واقف معاها ....!!!
-(جاوبها بصوت بكلو وجيعة ) أحلام. . أحلام قرات معايا قبل 5 سنين .... أحلام هاذي أنغام .... بنت خالي ... و خطيبتي
هبطت عليها الكلمة كي الصاعقة ... خطيبتو! !! حست بالدنيا وقفت لحظتها ... حست بالدوخة لعبت عليها و رجليها ماعادش حاملينها. ... غمضت عينيها ... ترجع في دموعها ... مالازمهاش تضعف خاصة قدام هالي اسمها أنغام. .. هو شاف حياتو ... و عندو الحق ... عمل الي عملتو هي ... هي السبب ما فماش علاش تلوم فيه ولا تحاسبو
استجمعت قوتها ... كاينو ما تأثرتش. .. و تتبسم بالسيف
-نتشرفو ... مبروك عليكم الخطبة ... العقبة للعرس
-و بيك اكثر عزيزتي ... (سكتت شويا و غزرت لحملتها ) محلاه الطفل ولدك !!! ( تلعبلو بشعرو )
-أي. .. ولدي (خرجت الكلمة بالسيف)
-ما يشبهلكش جملا .....
-(قص عليها زيد) اكيد يشبه لبوه !! (بعصب و غزول)
-ههه (ضحكت بقهرة ) لا ... يشبه ل. .. (و سكتت) على كل حال معرفة طيبة مرة أخرى و ربي يهنيكم ... (دورت راسها و بعد رجعت غزرتلهم) سامحوني باش نمشي ... راجلي جاء .... (سكتت شويا و غزرت لانغام ) زيد .... ولدي أسمو زيد ....
غزرتلو في عينيه ... غزرة كلها وجيعة و لوم ... و بعد دارت ماشية
غمض عينيه تمنى يوقفها. .. يرجعها يضمها ليه يطير منها وحش السنين الي عاشهم ماغيرها ... تمنى انو الي عاشو الكل كابوس و يفيق منو يلقى روحو في آخر لحظة بيناتهم ... تحت المطر و يتعاركو على شاروخان ... 《ههه مخيبها الدنيا 》هكا قال في سرو قبل ما يحل عينيه و ياكل صدمة أخرى. .. نفس التاتو في فخذها عاملتو في ضهرها ... هاذي موش الصدمة .... صدمتو في راجلها ... !!! مشى من بالو انو أسد ممكن يكون راجلها ... ... قعد واقف في بلاصتو يتفرج فيها ... كيفاش حطت الطفل في الكرهبة و شعلت سيقارو ... و يغزر لأسد كيفاش جا فكهولها .. و هي عاودت خذاتو منو ... ركبت بنتها الي هي ريماس ...《 حتى ريماس ... بنتي الصغرونة كبرت و تبدلت 》هاذا الي كان يقول فيه قبل ما تفيقو انغام من غيبوبتو. .. يلقى روحو يغزر للفراغ و الكرهبة مشات ...
-هاذي أحلام. .. !! هاذي هي الي عذبتك و عبثت بمشاعرك! !
-اسكت أنغام. . موش ناقصك...
-هاذي الأميرة. . هاذي هي الي قتلي ملاكي ... هاذي هي ...!!!
-أنغام قتلك اسكت (ولا يصيح)
-موش ساكتة يا زيد ... هاذي هي الي قلبك كل يوم ينزف دم عليها ... ألي تروح كل يوم سكران تحب تنساها.... ألي بوك طردك من دارو على خاطرها .... !!! هاذي البريئة البسيطة .. الملائكة. . العفوية !!!هاذي .. مانيش نرا في كلامك يا زيد ... عكس الي قلتو انا شفتو تو ... حبيبتك هههه ....
هبط في القاعة منهار. .. حط راسو بين يديه ...
-انا بيدي ماعرفتهاش. ... ألي كانت قدامي موش احلام ... عمرها ماكانت هي ... موش مصدق الي ريتو والله ... متبدلة. .. ماعنديش حتى مبرر لموقفها و لقرارها المفاجئ الي قتلتني بيه قبل 5 سنين ... انا لتو ميت .. ميت يا أنغام
-(قومتو) زيد (هبطت من عينها دمعه على حالو ) ما تزيدش تعذب روحك أكثر عيشك ... هي شافت حياتها و عندها زوز صغار .. و انت لازم تأسس لحياتك ... انساها و عيش ... عيش لروحك ...
-ماكش باش تفهم يا أنغام. .. أحلام هي روحي ... قبل قتلتني ... و اليوم زادت ذبحتني بسكينة حافية (خلاها واقفة و طلع في الكرهبة)