حصاد المواسم

ح ٤٠ ((ألجزء ألثاني ))

ومنا علاوي ونهله كلساع تكبلهم عيطه...
نهله صار عدها أربع أفروخ (( رقيه،،وألتوم حوري وقسور،،وأنوب جابت رحمة))فروخها دكدك
كلهم صغار...وعدها شغل البيت حسب جدول شغلها...
وأنوب ترضع رحمة رجعت ضعفت وبينت اعظام أفجوجها...ومنا سوالف علاوي يريدها كون دوم مزوكه ومعطرة وكاشخه...ويريد منها فراش...
وهي حتى وكت ماعدها تمشط كفشتها...
يوميه ونسمع عركتهم وعياطهم بليل.

عاد أبوية لزم علاوي وشبعه رزايل...
وكله خ.... بثنين أيديه من كثر الرزايل والحجي اليوجع
لان كال لأبوية//أريدن أتزوج مره ثانيه...

أبويه كاله //مريتك ماعليها قصور...من تثني عليها
غير كون بيها سبب حتى يحكلك تعرس من جديد..
عليوي لا عبالك غافل عنك...ذيلك ألتفرفر بي يم الموظفات أكصه ألك وخليك باب الحوش ما تطلعها...
عودين أنت وليدي ألبعير وأتنومس بيك لو كعدت بديوان...تاليتك أطلعت أخرطي وهمك من ألدنيا
بس مدت ألفراش وأشباع غرايزك ألعوجه...
تهدى بسم الله،،وكول يالله وحط رجلك بالكاع
لو اطكك بجليه واشمرك للجلاب.

وهذا ألحجي كله صياح وعياط...
وأبوية سودة عليه كام يرجف من كد ألأعصاب...
وراها اتخربط...صعد ضغطه ما أعرف شبي .
وكميلة ما قصرت كابلته وتمرغ بصدره وتنعي وتبجي
كلبت محمد وألولد على علاوي...منين ما يلتفت يحصل رزاله.

ومنا باطلة كلساع تتخربط وتوكع...
وصدك هي مريضه مو جذابه...
حتى من كثر الصخونه حلكها انلضم لضم فركاس
حتى براطمها صارت كل وحده هلكبراتها
من وره اللطمة حمى...
حتى باقر حن كلبه عليها وجابلها علاج
عصاره،،،وهذا الدوة الازرك وأبد ما فاد بيها...
لأن دومها مصخنه.

كميلة كالتلها//أحلبي من الصخله كبل بحلكج
حليبها بارد...يجلي الفراكيس وطيبين بسرعه.

ألمغرب عودين مشت ويه كميلة للمراح حتى تحلب بحلكها من الصخله...ماكو دقايق وأجت كميلة عايطه وتخرمش بوجهه...تصيح//ألبنيه ماتت الحكو عليها.

ركضوا عون وسجاد بالبدايه...وأنوب طفر وراهم باقر
وأني لحكتهم ،، وأجى ورانه محمد.

من طبيت للمراح شفتها شلون الترعش بالكاع
وعيونها مكلوبه...وصامه جف ايدها بقوة
يمكن كسرت أصابعها من كد قوة صمة جفها...
وباقر لأزم وجهه ويصفك بيها راشديات يريدها تصحه.

خطية أنقهرت عليها مو بقت ترعش بالكاع...
يعني حالتها صارت شلون ألجاهل المشمور من الصخونه...بقى جسمها ينفض نفض...
وعيونها مكلوبه...وصاكه على حلكها...
بالت على روحها وما حست على نفسها.

باقر صاح//محمد دبرلي سياره هاي نوبه صرع
مو شمرة صخونه...الف مره اكلت خ... وكلت علاجها طبي مو روحاني بس محد يسمع الحجي.

عون طفر وطلع للشارع يجيب سياره ..
وسجاد ومحمد واكفين فوك روسنه...
وأني وكميلة بقينه كاعدات بصفها ما نعرف شنسويلها
هي شويه ووعت على روحها...باقر حار بيها...
هي من وعت بس دارت ركبتها وتفلت دم .