حصاد المواسم

ح ٢٩ (( ألجزء ألثاني ))

جاوبتني نور//يمه هدوله ألحمد لله على سلامتج
والله هبطت عليج ودمي نشف ...
ولج أنتي لشوكت تبقين هيج جبانة وخوافة
وبسرعة تستسلمين...
ولج فكري بيه...وكولي لو صار علية شي أمي شيصير بحالها.

كتلهن //أكلجن أنتن ليش تجذبن علية
بنتي ماتت مو... ؟؟
وانتن كاعدات تصبرن علية ..؟!

كميلة ردت علية //برررد شر نطقتج
اسم الله ،، عليش مفاوله عليها
هذيج هي شحلاتها...بيضة وبرشة نسخة عنج
من عاينتها يلا صدكت ألمصروع على كولتج
شكثر يحبج بحيث طلعت ألفرخة نسخة عنج .

أنوب كالت//أكلج نويره...تراني ما أعرف هسه نغسللها لو شلون علمود الجرح...لا سامح الله خاف يلتهب

جاوبتها نور//هسة أشوف ألدكتور شيكول
نمشيها ونغسللها ،،، لو نعوفها بمكانها ...
أني هم ما أعرف والله بهاي سوالف.

هنا أجى ولد مضمد..بدلي بطل ألدم بواحد ثاني
وضربني أبرة بالكانونه ...
كميلة سألته وكالتله//أكلك يمة ألبنيه نكومها نمشيها
ونغسللها لو نعوفها متركدة... ؟

كاللها//يمة جسمها فاقد هواي دم...من تكوم هسه أدوخ
لا توكع من أديجن وتتأذة...عوفنها للصبح
وخلوها ترتاح...فد شوية تمر عليها أم غفران تشوفها
لا تلعبن بيها عوفنها متركدة .

نور سألته// أكلك خالة أوكلها أشربها شي ؟

جاوبها //خالة هسة لا توكليها شي ...
وأنا فد ساعتين وأمر عليكم ...
بس خل يخلص عدها بطل ألدم...أوراقبها خاف يصير عدها تحسس...بس انطيها شوية مي ،لو شربت

نور شربتني شوية مي ... أنوب لعبت روحي
أني منا كلش متوجعة...ألوجع ألداخلي ياكل بكلبي
بطني توجعني...
خاصرتي توجعني ...
راسي يوجعني ...
والله كل جسمي يوجعني .

هن نور...وكميلة كاعدات يمي ويسولفن وية ألنسوان
أني رجعت أغفي...فتحت عيوني
وأشوف باب ألغاووش أبوية فاضل أجى علية
فد شكلة حلو...وراجع صغير صاير شاب ...
ويمشي وياة ألمرحوم عطأ ...
وكايد بيدية منا ،، ومنا بنات صغار فد حلوات
ومن ورة عطأ طلعت بنية صغيرة ...
باوعت عليها شو هايه أني....من جنت صغيرة
وبيوم ألكتني نور...!!!
دنك علية أبوية وباسني على راسي ،
أستحيت منه،،جر زيج دشداشتي وضم سبحتة بصدري
وعطأ هم دنك علية...وباسني على راسي
وكالي//ظل بالي يمج...ما أوصيج عينج على أمي...!!
عطأ اخذ ألبنات وطلع من ألردهه ...
وأبوية فاضل...شال هاي ألبنية عودين أني من صغيرة
وهي تبوسة من عيونة...وهو يضحك بفرح
أني كمت أغار أكلة//بوية نزلها بالكاع منين هاي جبتها
اني بنتك مو هي ...
هو يضحك ويكلي//هاي ألوصية عزيزة أمي شلون أعوفها ...!!!كمت أبجي مقهورة
فزيت وأني اصيح //بوية فاضل عوفها

صوت كميله //يمة أسم ألله...سمي بسم الله لا تخترعين
جيبي أيدج لا تشلعين ألكانونه .

وعيت وصحيت أني بمكاني
وماكو لا أبوية...ولا ألمرحوم عطأ يمي
سولفت ألشفتة ألكميلة ... والنور
وهي كميلة عيد وجابة ألعباس ألها
شبعت بجي على ألمرحوم عطأ ...
وتكله//خايف علية يبعد أمي وأهلها...
من غدت روحي فدوة ألروحك ...
يمة عاين ألخواتك وباريهن...أعرفنكم شهداء ومن أهل ألجنة...وهذا ألمصبرني على فراكم.