حصاد المواسم

ح ٢٦ (( ألجزء ألثاني ))

هنا طبت نهلة للهول...خطية ما تعرف شنو ألسالفة
كالتلي//أنطينياه أرضعنه ما أدري شبي أليوم متسودن
يلكع من ألصريخ من ألصبح والهسة .

كتلها//هسة امي ومحمد ياخذونه للمضمد يشوفة.

أجتني نسمه تركض وكالت //هاج عمه هاي ألمحفظة جابتها ألية ...كتلها //أركضي حبابه أنطيها لعمج هذاك يغسل على ألمغسلة بالحوش.

كميلة طلعت من غرفتها مبدلة دشداشتها...ولابسة عبايتها...وأخذت قسور من أيدي...جابتله نهله ملحف تشيله بي...وراحت هي ومحمد للمضمد .

أني كمت طبيت للحمام بردت روحي...

نهلة خطية رجعت مسحت ألبيت مره ثانية
بلكت يبرد .

من طلعت من ألحمام كتلها //نهلة أركضي أسبحي بسرعة...مازال حوري نامت...
وقسور عد كميلة .

كالتلي //فدوة أغديلج عينج على ألتمن هدرته.

كتلها //روحي أسبحي أني أكملة .

حشمت ألبنات//كومي ألخاتونه ألحبابه نسمة جيبلنة ركية باردة من جوة ألحب ...

وانتي بتول خاتونه ألخاتونات كومي جيبي ألصينية وألسجينة ألصغيرة.

كعدت ألبنات يمي...نسمة ومسك بنات باقر
وبتول...وفشكت ألركية وكعدن يأكلن ...وأكلت وياهن

وعزلت ألنهلة خطيه ركضت للحمام.

كمت شفت ألجدورة وطفيتهن...
وطركتلي دولكة لبن...وكسرت ثلج وخليته بيها
شربت منها...وخليتها بالثلاجة .

رجعت للهول...أنجطلت
أجتي نهلة من ألحمام // يااا شبسرعة سبحتي؟؟

كالتلي //خية بس شمرت مي بارد على روحي
الصبح غسلت...هسة دبكت من فرت ألبيت وألحر

كتلها //تعاي أكليلج شكف ركيات باردات عزلتلج شويه

كالتلي //اوكفي خل أمشط...واشيل شعري
صدك راحت مشطت بغرفتها بسرعة ...
شالت شعرها هو ناعم وسرح...
وراحت غسلت...ورجعت تأكل بالركي.

رجعت حشمت ألبنات //كومي نسمة يبعد خالاتج يالنادرة شيلي ألصينية...

وأنتي بتول...كومي أمسحي ألكاع من الدبك عفية بالخاتونة .

وأنتي مسكه ألحلوة كومي غسلي أيدج بالصابون على المغسله ولا تنكعين أردانج.

أحاجيهن بسلوب كميلة ونور...فد يكفين لأن أمدحهن

صحت على نسمة //يالحلوه زتي كشور ألركي للصخول
وردي للبيت بسرعة...گبل لا يجي عمج محمد
بس يلكاج هسة برة يكتلج .

حاجيت نهله وكتلها//عليج الله نهلة مشطيلهن ...
شمالهن مكفشات.

جاوبتني //يااا غير من مشيتي للمركز ألصحي
تكافشن من الرؤس ثلاثتهن...مافكتهن خالتي إلا بالنعال وصلخت جلودهن...تعاركن على لفة حب .