🥀زوجتي سحاقية🥀
[كذبة محتال...جعلتني موصومة بالإثم والعار]
واقفة و كتهز رجلها بتوتر مع الأرض و عينيها مفكسين جيهة حسنة....وكتنتاظر ادريس يشوف كأس الماء و يشربو لمو....
وفي خيالها كترسم وجه حسنة...ملي تتذوق الماء العذب🥛
لي صاوبات ليها بيديها بزوج👐 👐 👐
قفزات ملي سمعاات صوت ادريس المرتفع لي فيقها من سبات تفكيرها...طلعات عنييها فيه وابتسمات ليه ببلاهة
-ادريس دوز يدو على وجهو: مكتسمعيش(اشار لوذنيها)حتى هادوك عندك مغلوقين بحال عقلك¿¿ راه شي احد كيدق الباب!!
لو كان شخص عادي. كان هيدافع على راسو هيقول"انا خدامة عند مك" ولا "واش كتخلص عليا مانضة كل شهر باش نفتح لباب" الى اخره...
ولكن هادي، زينة البنات لالة غيثة...سطاج الآخر في الذل و التبوهيل....
شافت فيه و وسعات ابتسامتها:ويلي...مسمعتش🙂
هاني هنحل دابا....
ومشات كتجري ببطئ بسبب وزنها الثقيل....
فتحات الباب و هي مزال مبتاسمة نفس الإبتسامة البهلاء.
حتى تمسحات ملي شافت وجه مها...الغضبان و الغير راضي ....
-غيثة:مي الحنينة!! جيتي؟؟
حنان شافت فيها: اه جيت...وباش نديك!!
-غيثة فتحات ليها الباب باش تدخل.....
تقول الدار دارها تدخل لي بغات وتخرج لي بغات: دخلي شوفي صاحبتك راها مريضة....
حنان كمشات حجبانها ودخلات متاجهة للصالون....بحال الام بحال بنتها...بزوجهم خنشوش واحد...مايعرفو حشمة.
دخلات ونطقات بلا سلام ولا كلام و توجهات عند حسنة لي طالقة فراقشها على سداري : ويلي ا حسنة مالك؟؟ يا حبيبتي عاد خليتك صحة وسلام
ماتكون غير عوينة و صابتك....تبغي نبخر ليك؟؟
-حسنة شافت في ولدها وشافت في غيثة:مكاينش لي مرضني كثر من بنتك...
حنان ضارت شافت في بنتها: درتي شي موصيبة؟؟(شافت في صحيبتها):اش دارت ليك؟؟ غير قولي ليا؟؟
حسنة ناضت من سداري وهي شادة راسها...صحة سلام...مافيها والو غير طالقة عليهم mbc drama....
حسنة: مادارت والو.....هوما دارو(اشارت ل ادريس لي في سداري و رجعات اشارت ل غيثة لي في سداري اخر): اذا عندهم لوجه قولي ليهم يعاودو ليك....وتعرفي علاش انا فهاد الحالة....
-غيثة ناضت وهزات كأس الماء المملح وقربات لحسنة حالفة اليوم تشربو ليها: شربي ا خالتي شربي....متفقصيش راسك ا لحبيبة....
حسنة مشداتوش من عندها ومعبرتهاش كااع: حنان....انا شفت لي مخاصوش يتشاف....
حنان:اش دارت بنتي ا حسنة....
غيثة قربات الكأس لفم حسنة باغا تشربو ليها بزز:شربي ا خالتي شربي....هيهبط ليك سكر ثاني...
حسنة بعدات فمها وباغا تكمل شكوها...وخا شكوى غير لله:تفقصت وكتشوفي حالتي....كتشوفي كيف وليت واش دارو فيا ولاد الحرام
حنان فقصاتها :اشنو دارت بنتي ا حسنة متمرضينيش...وبلا ما تبقاي تعاودي الهضرة.(شافت في غيثة) اش درتي؟؟دوي ا لبلاء!! دوي.....
-غيثة رمات الكأس في الارض بالفقصة لي ركبات فيها حش
سنة وزادت عليها امها و اوامر ادريس و نفختو: ما درت والو.....والو.....هو لي جا عندي ...هو...
حنان طرح سخن وناضت حتى هي من سداري و قربات لبنتها:شكون لي جا عند شكون؟؟....واشنو درتي؟؟
بلا ماتنفخي عليا...(جبداتها من وذنها)يلاه طلقينا....ساليتي من حسنة جيتي عندي انا؟؟
حسنة طلقات المزيود...و العافية زادت عليها المازوط : لقيت ولدي مع بنتك في الحمام....(تنهدات بضيق،وهي بنفسها متقززة من لي كتقول) و بنتك كانت عريانة....
حنان طلقات من وذن غيثة .... و تبلوكات مسكينة
-حسنة: لي شفتو قلتو....والباقي تعاود ليك بنتك الموصونة...درتيها ا حنان و خاص نصفق ليك
حنان خرجات عنيها:اش درت؟؟
حسنة: زولتي عليك الهم...وهاانت ضمنتي ذهب بنتك لي هيغبر نحاسها.... كنحلف بالعنين لي هيأكلوهم الدود....انك انت لي مخططة لكلشي.....وهاد شيئ كلشي من تحت راسك
كنعرف ولدي...مهيشوفش في وحدة...ماشي من زينو
و فوق مايشوفها يسبها ويقولي انا مكنحملهاش.....
وكنعرف حتى بنتك...هبيلة ما عندها عقل...نية وخبز ربي في طبكو...مهتفكرش دير هاد شيئ
هادو فعايلك انت....
حنان: خرجتي نيابك ا لفعة؟؟ ايوا ولدك المخنث
عمرو يوصل لظفر بنتي ا لالة!! كتسمعي....
ولا يحلم يتزوج بيها....
حسنة شدات كرشها زعما كتضحك:ابيه سكتي باش ماتقتليني اليوم بالضحك...(اشارت بإستهزاء لغيثة)بنتك يحلم بيها ولدي؟؟....ولدي سيد رجاالة
حنان جرات بنتها من دراعها:زيدي ا بنتي....معندنا ما نديرو في دار الفسق....واذا نسيتي شكون انت نفكرك ا شيخة حسنة.....
قالت كلامها وخرجات بحالها متاجهة لدارها وهي مزال شادة غيثة من مرفقها....
حنان كتخاطب راسها:قالت ليك ولدها سيد رجال....الشيخة...هزات الكتاف ومن بعد هزات الرجليين...وبعدها هزات النيف حتى عياات و تزوجات ولد الخياط..... ودابا تضحك على بنتي....
اييه نسيتي راسك ا حسنة وانا لي هنفكرك بشكون انت....
بنتي انا تتزوج ولد الحرام....ولد الفاسقة لي جابتو من الحرام!! واذا مكانش قبل بيها ولد الخياط
كان هيكون ولدها المخنث بلا كنية
والله ما كانت ليها....والله ما تسواي بنتي ا حسنة
صبري نوريك....غير صبري....
فتحات باب دارها بالساروت....وشعلات الضوء....
راجلها مزال مادخل من الخدمة...اذا مزال عندها الوقت فين تتناقش مع غيثة....ولكن اذا كان كلام حسنة بصح...وبلي بين ادريس و غيثة شي حاجة....ساعتها بزز منهم كااامليين غادي يلقاو حل....مكيهمش واش هيرضيهم
المهم هو يجنبهم الشوهة...
شدات الباب بجهد حتى كان هيتهرس....هو لي لقاتو باش تخوي فيه فقصتها
و ضارت شافت في بنتها:هتفهميني كلشي...ومتنسايش حرف واحد...
يتبع.......
كنتمنى تركزو على كلام حنان في بداية البارت و في نهايتو
اجل اعزائي هاد الكلام هو نفسو لي كتقول عليكم جارتكم...
تضحك في وجهكم...وتسب في ظهركم
وفي هاد اليوم الكريم هزو كفوفكم للسماء و دعيو بجهنم لكل واحد اغتاب الاخر في ظهرو
(وليعقد لسان كل من اغتاب اخاه المؤمن واكل من لحمه)
YOU ARE READING
زوجتي سحاقية((بالدارجة))
Romanceزوجتي سحاقية. قصة بالدارجة المغربية..... الزواج الإجباري أمر ماشي غريب على شخص ضعيف الشخصية و عندو عائلة متسلطة...وهو منهم تحط امام امر الواقع لهو "الزواج الإجباري" و طيحو القدر انه يتزوج بنت حومتو. و آجي نشوفو هاد بنت حومتو...لدايرة بحال المسكة...
