OH...My Beloved Badass

Chapter 30

(Unicode)

"အား...အ”

အသိစိတ် ကပ်ကပ်ချင်း မျက်လုံးပင် မဖွင့်ရသေးခင်မှာပင် ခံစားလိုက်ရသော တဆစ်ဆစ် ကိုက်ခဲမှုကြောင့် ခန့်ညားရှိန် အားပါးတရ ငြီးတွားလိုက်မိသည်။

ခေါင်းတစ်ခုလုံး တင်းပုတ်နှင့် ထုခံထားရသလို ကျိန်းနေသည်။
အံကြိတ်ကာ မျက်လုံးကို ပွတ်သပ်လိုက်မိတော့ အနည်းငယ် အောင့်တောင့်တောင့် ခံစားချက်နှင့်အတူ မျက်ကပ်မှန် မချွတ်ရသေးတာကို သတိထားမိသွားသည်။

ငါ...ဘယ်လိုလုပ်....

F**k

မနေ့ညက အကြောင်းအရာအားလုံးကို တပြိုင်တည်း သတိရသွားမိတော့ ချက်ချင်း ဝုန်းခနဲ ထထိုင်လိုက်မိသည်။

သွားပြီ...သွားပြီ...
Leo ကို ဘယ်လိုတောင် ပြဿနာရှာမိသွားတာလဲ...

အား...leo ကို အမူးတိုက်ပြီး Leo ရစ်တာလေး ခံချင်လို့ပါဆို ငါက ဘယ်လို မူးသွားရတာလဲ။

ကျစ်...အရေးထဲ ဟိုကောင် ဟိန်းသူနဲ့ပါ ရန်ဖြစ်လိုက်သေးတယ်။
Leo က အခုမှ ငါ့ကို ကြည်စရှိသေးတာ...
တကယ် သွားပါပြီ...

ဟိန်းသူနှင့် သူက တစ်ခါက ကားပြိုင်မောင်းရင်း ရန်စရှိဖူးသည်။
အမှန်တော့ ခန့်ညားရှိန် နိုင်သွားခြင်းကို ဟိုကောင့်ဘက်က တမင် ရှုံးမဲ မဲခြင်းပင်။
မနေ့ကလည်း ဘာ မဟုတ်တာလေးနှင့် တမင် ပြဿနာ လုပ်ခြင်း။

ဘာပဲဖြစ်ဖြစ် Leo ရှေ့မှာ ဖြစ်တာတော့ အဆင်မ​ပြေလှပေ။

အိုက်စပ်စပ် ခံစားချက်ကြီးကြောင့် နာရီကို လှမ်းကြည့်တော့ ဆယ်နာရီခွဲ။
တစ်ကိုယ်လုံးကလည်း ချဥ်စော်နံနေလွန်းသဖြင့် ခန့်ညားရှိန် ကိုယ့်ကိုယ်ကိုပင် ရွံချင်သွားသည်။

ဘာလုပ်လို့ လုပ်ရမှန်းမသိ ဖြစ်ကာ ထရပ်မည်ကြံလိုက်တော့...ကိုယ်ပေါ်တွင် ခြုံထားသော စောင်က လွှားခနဲ အောက်ပြုတ်ကျသွားသည်။

ထိုအခါမှ သူ တစ်ခု သတိရကာ မျက်နှာကို စမ်းလိုက်မိသည်။

မျက်ခုံးထောင့်တွင် အသစ်ကပ်ထားသော ပလာစတာ...

Leo က မူးရူးနေတဲ့ ငါ့ကို အိမ်ကိုလည်း ခေါ်လာပေးတယ်။
ဒဏ်ရာလည်း ဆေးထည့်ပေးတယ်။
စောင်လည်း ခြုံထားပေးတယ်။