لبوة ولكن

البارت ١١

#لبوة_ولكن
الجزء الثاني

البارت ١١

رملاء: بداية سنة ٢٠١٩ جانت حلوة وهادئة خاصة بعد ما خلصت غيث من سما الي اختفت من حياته بشكل نهائي ،اما فهد فجان على وجه سادس والحمد لله هو اعقل من غيث وما متعبني ،

اخر فترة خوات شعيب بدو يلحون على موضوع بيعة البيت وانباع وبدينا ندور على بيت ايجار لان حصة شعيب من بيت اهله ما تجيبلنا شي وطلع منها جزء دفع دين جان عليه ودفع رشوة علمود معاملة التقاعد مالته والي بقن عنده شويه فلوس ضافهن على شغله بالسيارات

لكينا بيت بنفس الشارع لان ماكدر اترك مكان شغلي ،بناء البيت كلش حلو وبي غرفتين وانتقلنا بي والحمد لله كلش ارتاحيت بكعدته
والرضع مستقر من ناحية ولدي ومن ناحية شغلي الي جان خير من الله
الاقساط مال بيع والاستخارة وحتى الي ما اخذ منها فلوس من تستخير عندي هم من تتبشر بخير تذكرني بهدية بدون ما اطلب منها والحمد لله خاصة الي جانو يطلبون مني اكتبلهم ادعية وياخذون مني مي مقري عليه لابطال الاعمال والرزق وغيرها من يشوفون فرق ما يدخلون مرة ثانية الا وبيدهم هدية تعبير عن امتنانهم

اقبال من اخر مكالمة ضلت فترة مختفية بسبب الحالة الي مر بيها جهاد من سمع الحجي مالتي ،وبعدها صرنا نتواصل مكالمات على فترات متقاطعة وهالشي احسن للكل حتى جهاد يبتعد

علاقتي كلها صارت محصورة بين سدن اختي وزينب الي مشكلتها ما انحلت ابد
وبالعكس بعد كلشي صار زوجها استمر بعلاقته بعشيقته وهي كامت تشوف ومتكدر كلشي تسوي بسبب التعهد الي سوته كدام العشيرة ان ما تقترب من عشيقة زوجها والي كذلك هو هم اتعهد ان يعوفها بس ما طلع كد كلامه

واصلاً حياتها وياه وعلاقتها كلش مو زينة بسبب افعاله وخيانته ،واشوفها جاي تكافح بس حتى تحافظ على بيتها وحق اطفالها من خير زوجها الي ديحاول يضيعه على عشيقته الي عاميته بسحرها ورخصها ،

واليوم الصبح اجتني زينب استغلت رجعتها من اهلها وكبل اجت عليه لان زوجها صاير يحاسبها عالطلعة يخاف لا تسوي شي يضره ،كعدت واني كمت حميت الجاي وطلعت كيك من الثلاجة جنت مسويته قبل بيوم
خليت قطع بالماعون وصبيت الجاي وخليتهن على ميز الطعام

زينب : شلج بي مو كتلج متريكة وجاية

رملاء: ميخالف انكنك بي واحنا نسولف
زينب : شلونج بهالبيت الجديد
رملاء: والله الحمد لله شوي ارتاحيت لان انفه من المشتمل مال عيالي واريح

زينب: اي حتى بناءه جديد ،لعد البيت سنطة شنو كلهم طالعين
رملاء: اي الله جابج انقاذ الي جنت ضايجة وحدي
فهد والصغار بالمدرسة وشعيب وغيث طالعين كلمن لشغله
همزين اجيتي كلت هاي جانت يم اهلها تاخذلها كم يوم استراحة يلا تجي