صباح الخير ورداتي
اعتذر عن الانقطاع بسبب وضعي الصحي
هالبارت مكمل لاحداث سدن وهم تذكير الكم قبل لندخل بالعميق ،وان شاء الله باجر البارت القادم بأذن الله 🖤
#لبوة-ولكن
للكاتبة روشان
البارت الواحد والثلاثون
هذاك انه
غصن مكسور
ياطير اليحط فوگاي يلچمني
هذاك انه الرجع من فشلتة يغني(سدن)
.
.
سدن: ورجعت نزلت وكملت تنظيف الشقة قلها ،لحد ما كملت بديت احس بدوخة اريد اوكف على حيلي ما اكدر
اباوع امي وبيدها فراش من بعيد عيوني بدت تنسد حاولت ااشر الها واصيحها بس ايدي ما اتحركت ابد
لحد ما فقدت ومحسيت بأي شي بعد
وبعدين بديت احس اكو شي بخشمي مضايقني ،بس عيوني مقفولة وثكيلة ما اكدر افتحها ،اطرافي متبنجات وجامدات ما يتحركن واسمع صوت مرة غريبة يمي ،،
واصوات مختلفة ناس تحاول تصحيني ،اريد استجيب وافتح عيني حتى اعرف اني وين بس اول ما تنفتح عيني ترجع من وحدها تنغلق وافقد من جديد
بس احساسي بالناس الحوالية موجود ،وبديت افرزن الاصوات ،اسمع المرة تحاجي واحد وتكله دكتور
وهو يوصيها تكعدني
الدكتور: لتخلوها تنام ،لهوها بأي شي ترى مو زين تنام
سدن : كامت المرة والي هي الممرضة تخلي علج بحلكي واني عيوني تنفتح وتنسد
حسيت بطعمه علج ابو السهم ،
الممرضة: علجي ماما لتنامين ،شكد حلوة انتي باعي اني عندي بنية بكدج و....
سدن : اسمعها تحجي وتسولف ويايه اشكال حجت مرة بتها مرة جنتها كلشي ما افتهمت لان اكعد واغفى
حسيت بروحي انرفعت من الفراش وجاي يعدلون بضهري ويكعدوني وروحي ترجع تسيح واوكع عالمخدة
رجعت نمت محسيت بنفسي بعد ولا بالوقت ،وعيت على نفسي امي بالبيت ونايمة بفراشي ،امي كاعدة يم راسي ،احس بدوخة مفرطة
والخاشوكة مال اكل بحلكي ،امي جاي تشربني تشريب مكدرت اطيقه من كم الملح الي بي ،،
نفسي بدت تلعب ،بعدت ايدها ،ماريد مالح مينجرع
لمياء: اشربي ماما حتى يصعد ضغطح ،ردتي تموتين جان هسه انتي عميانة من الهبوط الصار عندج
سدن : ماعندي اي طاقة احجي شربت شوية بالغصب وعيني ونظرتي المغوشة راحت عالساعة وشباك الغرفة الي مبين صار نص الليل
واني اخر شي اتذكره جنت انظف ساعة ١١ الصبح يعني كل هالمدة اني وين وشصار بيه!!؟ اتذكرت اني جنت رايده اموت بس ما متت
حسيت بأحباط كلش جبير
رجعت راسي سندته عالمخدة صفنت وكأن بعقلي صحراء قاحلة وتارسها الظلام ،بقيت اركز ويا روحي والاصوات الجنت اسمعهن
وبدت بعد شوية تصير مقتطفات صور وصوت كبالي ..
شفت نفسي بسيارة وجاي اتقيأ ،واسمع صوت يمي يكول اييي خل تذبه
