#لبوة_ولكن
للكاتبة روشان
البارت الرابع والثلاثون
والاخير من الجزء الاول
ملاحظة: اعذروا اخطائي الاملائية ممراجعة البارت 🖤
رملاء....
غيرك مالگيت انسان يحچيلي بأهميتي .
جهاد....
كونَ تنباع السوالِف
شَكو حچايه تحَبها
أروح آنه أشتريها
وأشتريلك كُل أحبَك
بايتَه بحلگ أخرس وماحاچيّ بيهَا
.
.
رملاء: من بعد نظراته الي حجت كلشي ،واخيراً اجه دور لسانه هو الي يحجي بس ماكدر يحجي ١٪ من كلام عيونه ،مو تردد ولا خوف ولا هو الما يعرف يعبر بس جانوا الكل محاوطينا وواكفين يمنا بالصالة من دخل لبيتنا لذلك ضل حذر بكلماته
وهو يباوع بعيوني سلم مبتسم
جهاد: شلونج اممم...
رملاء: رد عليه ابويه مكمل كلامه ،،ام غيث
حجاها وخله ايده على راس غيث الي واكف يمه ولعب بشعره
رديت السلام والكل كعدوا ،كعدت بزاوية بعيده عن نظره وبقيت ساكته بوسط الكم الواسع من نقاشهم وسوالفهم ،ماعرفت شبيه بس خايفه عليه خاصة بعد مشفت عيونه هن هن ما غيرهن لا زواجي ولا هالاطفال الي كدام عينه ،،
صار وكت العشاء ورحت ويا امي وسدن نحضره ،جهالي بقوا بالهول مرت ساعة ودزينا ليث يجيب صمون ،وابوية شفته نزل من الشقة ماعرف منو صاحه جوة ،ضل بالي عالجهال رحت بأتجاه الهول اشوفهم لان مالهم حس
وصلت باب الهول باوعت من بعيد
جهاد كاعد وهم يمه واحد كاعد بصفه والثاني واكف ،رجعت ليورا شويه وبقيت متبسمره بمكاني اباوعلهم بدون ميشوفون
بقى يلاعبهم ،يبوس ويحضن بيهم ،خله فهد بحضنه باسه من راسه وشمه بحنية فضيعة ،وكأنما يدور بريحته على شي
مكدرت اتحمل المنظر ،رجعت للمطبخ بسرعة ومنظره ملازم عقلي وعيني كمت ما اشوف كبالي ،،
ياربي فوك ضيمه مني انوب يريد يتعلق بجهالي،!! ليش هيج جاي يسوي ليش شحصل مني قبل لا اتزوج انوب هسه اني وجهال ثنين بركبتي شمتأمل بيه لو مني !!
بقيت اكل بروحي من تفكيري حسيت عقلي راح يطير ،صبينا العشاء وكملنا لليل من صار وكت النوم
حرنا بنومتنا حيل لان الشقة صغيرة والكهرباء مكطوعة وحارة الدنيا ،ابوية كال راح انطي خبر للجيران حتى نصعد اليوم ننام بالسطح
راح حجى وياهم وصعدنا اني وسدن رشينا السطح شويه حتى يبرد وينظف من التراب لان هو نظيف من الاساس دائماً نغسله ورى شوية صعدنا الفراش لكينا مرت رشيد ماخذه زاوية الهم ومحاوطتها بجراجف مسوين مثل الكُلة ونايمين هي ورشيد ،
رتبنا احنا الفراش ونزلنا جانوا الكل كاعدين بالهول يسولفون ،ومبينة السهرة مطولة ،شفت جهالي نعسوا
اخذتهم وصعدت حتى ينامون ،خليتهم بفراشهم وبقيت صافنة وحدي اباوع عالسماء ونجومها الجانت قليلة،و كل نجمة تسرح بية بعالم مختلف عن القبلها
