لبوة ولكن

البارت الحادي عشر

صباح الورد والياسمين ،احلى بارت مليان رومانسية لعيونكم🙈بس القفلة اتركها الكم انتو تحددون شنو نوعها🤭

#لبوة_ولكن
للكاتبة روشان

البارت الحادي عشر

رملاء:
تغيـــرت مـــو مثل الاول صاير انســى
واختلف كلشي بحياتي وجرَحي نفسه

جهاد:
خاف لــو جيتك تگلي شجابك
وخاف تطردني واضـــل ببابك
.
.
رملاء: خليت السماعة فترة على اذني وقبل لا اسده صحت مرة اخيرة

الووو ،واجاني صوته يكول

_ليش مشغلة اغاني مو جدج مصارله فترة من مات ..

رملاء: جريت نفس بقوة وزفرته بعد ما اخيراً عرفت منو صاحب هالمكالمات ورديت

ضايجة وحبيت اسمع اغاني ،وبعدين جدي راح الله يرحمه اذا شغلت اغنية او لا شراح يأثر عليه هالشي ؟ اصلاً حتى الاسود خلتني امي انزعه ورى السابع خاف ماعندك علم

جر نفس،اتنهد وحجى بهدوء
جهاد:شنو انتي تحبين تسمعين اصالة ؟

رملاء: مو شرط مرات هي ومرات كاظم حجيتها ووكفتلي الغصة بنص بلعومي واني اتذكر احمد وصوته واغاني كاظم الي جان يغنيهن الي ..فسكتت شوية وهو هم سكت

الدقايق تمشي وماكو منه صوت ، رجعت اني حجيت
ليش يومية تدك وليش بهالوقت تحديداً كل يوم

جهاد: لان ادري بيج جنتي تتابعين المسلسل ساعة ب٦ ومن تخلص اني ادك وادري عمي ورشيد طالعين وادري امج هيج وكت حايرة تسولف ويا جارتها وسدن ما تشيل التلفون الا قليل ،هيج وكت يفضالي الجو اني ومالگة گلبي واحاسيسي

رملاء: رديت بملل ،جهاد شمستفاد انت من هالمكالمة كل يوم ؟ شو حتى حجي متحجي ليش ترجع وتدك ما مليت !!

جهاد: ماكو احد يمل من روحه ،يكفيني بس اسمع صوتج ،ولچ بودي احضن السماعة مو بس اخليها على اذني ،

اني اول بشر يحضن بكلمة الو بصوت اليحبه تدرين شلون ؟

اسمعها منج واني مغمض عيوني ،وتنرسم صورتج جوة الجفن ويمر طيفج كبالي ،طولج ترافتج شعرج الي الله بلاني بيه، كلشي بيج يحضر بحضني واحضنه
عرفتي هسه شمستفاد؟ كلمة الو منج ترسملي لحظات من الجنة اعيشها واني كاعد ببيتنا ومخلي السماعة على اذني

رملاء: كافي جهاد الله عليك كافي ،كلتها الك وأرجع اعيدها ولو اعرف اكررها الف مرة ،كتلك المفرق الي بطريقنا نهائي ومابي خط وصل ابد
ليش تعلق روحك بوهم ،ليش تعذب نفسك بحب ما منه نتيجة ولا اله نهاية

جهاد: حبج هو الوهم الوحيد الي راح اسعى العمر كله حتى احوله حقيقة

رملاء: غمضت عيني بقوة واسى ،واحجي بداخلي
تعببت والله تعبت واني احاول انقذك ليش مصر تغرگ نفسك بهالحب
حسيت الكلام وياه ما منه فايده ،سديت الخط بوجهة وابتعدت عن التلفون حتى اذا دك مرة ثانية تروح سدن تشيلة