لبوة ولكن

البارت ٦

#لبوة_ولكن
الجزء الثاني
البارت ٦

رملاء: اعصابي انهارت من سمعته ،حسيت روحي قشمر ،رديت بعصبية
لعد ليييش خليتني اشتريها من الاول ليش هسه يلا تكلي هالحجي!!!؟ما كلت من الاول

شعيب : انتي ردتي السيارة ،لتذبيها براسي الكل لعبو بعقلج وكالو السيارة احسن الج لان تشتغل وتطلع فلوسها ،اني الي عليه جاي انصحج وافيدج
السايق الغريب يسويها الج خردة وكل تعبج يروح ومتاخذين منه حق ولا باطل

رملاء: هاااا كتلي السايق الغريب !؟ ليش اكو قريب ممكن انطي السيارة بيده
احجي واني كلش زين اعرف الي براسه
مد ايده مسح راسه ووجهه بتوتر ورجع ابتسم

شعيب: اني اشتغل بيها ،قابل الغريب احسن مني
رملاء: مو عندك سيارة !! متروح تشتغل بيها

شعيب: متشوفين سيارتي جاي ابيع واشتري واشتغل بيها بالمعارض ولازم كل مرة انتظر كم شهر يلا احصلي من البيعة كم فلس ،راح ابقى هيج اشتغل بالمعارض وسيارتج اشتغل بيها تكسي وخطوط لان جديدة وغالية والناس تحب تصعد بيها مو مثل سيارتي ،

رملاء: ماعندي اي اشكال ،بس متاخذ سويج السيارة بيدك الا بشرط

شعيب : شنو هو
رملاء: تكتب تعهد خطي ان اي خلل بالسيارة ،من عطل او حادث لا سامح الله او اي شي
انت مسؤول عنه وانت تحير بيها وتصلحها هاي اولاً
وثانياً كل شهر تنطيني مبلغ مالي ثابت من عدى مصرفك عالبيت ،،بالاضافة ان السيارة بأسمي اي زايده ناقصة منك اروح اشتكي عليك بالمركز وحتى ولدك ميوكفون بعيني

شعيب : هيج صارت !!
رملاء: اي هيج ،،اني مجبتها من نوم للظهاري ولا بحطة رجل على رجل ،اني جبتها بتعب وركض سنين

شعيب : هذا هو مثل متردين عيني

رملاء: طبعاً موافقتي ان انطي السيارة لشعيب ما اجت بدون تفكير ،بالعكس فكرت هواي ،ومن الاول جنت ادري هو راح يدكلي ناعم حتى يشتغل بيها ،والي كدام عيني احسن من البعيد ،واي زلة منه هو يروح بيها
سوالي التعهد وانطيته السيارة وبدا يشتغل بيها
ومن اول يوم رحت على وحده من جاراتي ودخلت وياها بسلفة وفلوس السلفة  كل شهر شعيب هو الي يدفعن

ومن يومها بدا يتسوك للبيت ويجيب احتياجات
جهاله ،وخف عني هواي من الحمل لان من جان كاعد اغلب مسواك جهالي عليه وحدي ،،بس الحمد لله هسه هو شاله واتحمل مسؤولية بيته ،احسن مما جان مكابلني وكاعد بلا فايدة خاصة هو عايش عالبيع والشراء مال سيارته لان من جبت اطفالي التؤام وهو بطل من العسكرية،،

وبما اني خليت كل فلوسي بالسيارة وحتى رأس مال ما بقى عندي حتى ابدي من جديد،،اقترحت عليه سدن ان هي تنطيني فلوس اشتغل بيهم والربح اني وياها يعني هي بفلوسها واني بتعبي ،هم جانت مجمعتهن من مصرفها من رجلها ورادت تستفاد وتفيدني ،واخذت منها الفلوس ورجعت اشتغل