#لبوة_ولكن
للكاتبة روشان
البارت السادس والعشرون
رملاء: رفعت حاجبي مستغربة وبابتسامة خفيفة حجيت
شلون بعني ؟! شنو الي يخصج انتي وشعيب؟!!
بلعت ريكها بصعوبة وكلساع تفر عيونها وتبعدها عني ماعرف التوتر ماخذ مجال جبير بحديثها ويايه
نترت بيها بضحكة ...يلا عاااد احجي شنو الي يخصكم
سمارة: قبل لا انخطب لباسم ،اني جانت عندي علاقة بشعيب،حتى جان يجيني للمدرسة بسيارة اخوه ويوصلني ونفتر ...
رملاء: باوعتلها ببرود وبأبتسامة هادئة رديت
اي ادري بهالشي ...فتحت عيونها تباوعلي بنظرات مصدومة
سمارة: صدددك ؟!
رملاء: اييي وداعتج اصلاً شعيب حاجيلي كلشي بحياته السابقة سواء جانت الشغلات مهمة او مو مهمة مثل السالفة الحجيتيها هسه
وحتى على حبه السابق رانيا الي اكيد تعرفيها،هم حاجيلي كلشي
سمارة :تحجييين صدك ،،يعني مسولفلج على رانيييااا؟!!
رملاء: كلشييي وبالتفصيل الممل ،حجيت واني اباوعلها بأبتسامة ما فارقت شفافي ابداً
اما انتي فبوكتها كلي بت خالي صغيرة ومراهقة لا حبيتها ولا فكرت بيها ،حالها حال خواتي جنت اوصلها بالسيارة وافرها وماكو اي شي بيناتنا
واني متأكدة من كلامه والا لو بينكم شي فشلون كدرتي تاخذين اخوه ؟صح لو اني غلطانة؟
دنكت راسها متهربة من عيوني الجانت واثقة وخلت احوالها تتخربط ..وردت من ورى خشمها
سمارة: ايي طبعاً
رملاء: عفتها كاعدة وكمت رجعت لغرفتي بحجة اريد امدد واريح ضهري ،اخذتني خطواتي بثقل لحد غرفتي ،دخلت وسديت الباب ،رجفت ايدي تعلن عن رجفة واهتزاز كياني وكلشي بداخلي ،الصدمة جانت قوية بس الي زاد تأثير قوتها عليه هو تمثيلي وتجسيدي للقوة الي جنت ضاهرة بيها كدام سمارة ،،
ماعرف منين جبت هالقوة وشلون كدرت الزم نفسي واني اسمع منها هيج كلام وشلون كدرت افر الموضوع عليها واسوي نفسي اعرف بكلشي
ماعرف اذا مصدومة من كلامها لو مقهورة ،مجاي اكدر اكول عنها تكذب لان تعرفني بحكم علاقتي بشعيب اول وتالي راح اسأله فأكيد كلامها بي شي صحيح ...مجرد كلمة (علاقة )الي كالتها تكفي تخليني مهزوزة ومقهورة والف فكرة تجي ببالي
يعني معقولة جان بينهم شي ؟!! شلون شعيب يضم عليه هيج سالفة
يعني البنية الحببتها واعتبرتها اختي وصديقتي تطلع جان عدها علاقة بزوجي ؟! عقلي مجاي يستوعب
بلحظة بدأ يدخل الشك بگلبي بديت استذكر كل مواقفها وتدخلها بحياتي واسألتها الخاصة ،شلون تسأل على تقربه مني شلون تراقب اهتمامه بيه ،شلون تتحسر وتقارن بينه وبين زوجها البارد وياها ،
شلون بيه شلون هيج اني ما انتبهت وحتى من عمتي حجت ما صدكتها وما اخذت بحجايتها ،شلون جنت احجيلها كلشي وافتح عينها علية وعلى كلشي بحياتي ...
