#لبوة_ولكن
للكاتبة روشان
البارت العاشر
نادية : وحدة منجن تبلغها بعد لا اريدها تدخل بيتي ولا توصلني ولا اريد منها مرة
هناء: شعلية اني طلعني من الموضوع ،واصلا اني وياها متخاربين
فادية : اي اني عود اخابرها شسوي خلي الي بالگلب مدفون خوما اطلعه واسوي مشاكل ...
رملاء: اباوع لامي وجها كام ينطي اللوان طول ما هي تسمع لكلام خالتي هناء ،لدرجة حسيت ضغطها راج يطك براسها من كد ما اشتعلت نار لحد ما كملت خالتي حجيها وهي انفجرت تصيح
لمياء: حسببببي الله ونعم الوكيل عليج فادييية ولج هنااااء اني اختها لو عدوتها الله اكبببر شهالحجي شهالنفاق والبلاء الي ذبته عليه،وليييش؟!! كله علمود بيت نادية لياخذون بنتي ؟! شنو قحط زلللم
وشستفادت هسه شو نادية حتى مكلبت بناتها ولا اخذت منها وهي طلعت بالوجه المصخم ،وفوكاها الي ذابحني وشاعل سلفة سلفايه شلون تجي بوجهي تضحك وتحجي وتكلي ماعرف شنو السبب الي مخبل نادية عليج ،وتالي متالي تطلع هي ام المصايب كلهااا...
بس فهميني احنا خوات لو جلاااب ؟ ولج حتى جلاب الشارع اوفى منها هم ناس تحن على تاس وهي على اختها الصغيرة ما حنت وكامت تتهم عليها عامي شامي ..
هناء: كافي تحركين بدمج لو ادري هيج راح تنقهرين فلا احجيلج شي
لمياء: شنو ما انقهر شترديني لعد اطك اصبعتين من اسمع هالحجي كله عليه ومن منو !! من اختي الي لافية ببيتها وملفيتها ببيتي !! وانتي الللخ همزين هسه يلا اتذكرتي تحجيلي ،لشوكت تردين تضمين عليه هالحجي والتهايم السودة المصخمة وابقى اني مثل الاطرش بالزفة ما ادري بالمؤامرات المحيوكة علية
هناء: ادري شنو الفايدة من الحجي غير الطلايب وحركان الدم
لمياء: والله اكلبها عاليها واطيها عليها هالأفة السودة فادية شعبالها تحفرلي من جوة لجوة وتسويني سحارة وادفن سحورة بحديقتها واني ابقى الغشيمة الي كلشي متدري !؟
لو هذيج الجبيرة الي المفروض هي العاقلة الفاهمة مالتنا بمكان ما تلزم فادية تطيح حظها وتكلها اختج متسوي هيج ،انوب تطبك وياها وتطردني وتنولها الي ببالها؟! وانتي ؟ وانتي هناء ولج انتي اقرب وحدة اليه من بعد امي ،وين ما ادير وجهي الكاج واكفتلي العمر كله تالي متالي تسكتيلهن ليش؟! هي هاي الخوة هيج الخوات يصيرن ؟!!
هناء: والله ما سكتت ولا صدكتها بس انتي متدرين بفادية شسوت (كملت كلامها ودنگت راسها خجلانة)
لمياء: شسووت بعد؟! حجتها بنبرة تعجب
هناء: من ضليت اني مصرة ان انتي متسوين هيج ونادية هم كامت تشك عاد كالت باجر اخذجن ويايه ونروح للرجال وخل الحجي يصير كدامجن
