#لبوة_ولكن
للكاتبة روشان
البارت الثامن عشر
رملاء: اول ما شفت منظر الورقة الملفوفة عالحجر عرفت من منو. والمن ،خاصة بعد مجان عادل موجود هنا البارحة بفرعنا يعني اكيد من نزلنا من السطح هو شمرها ،انخيلت وجه سدن بس تشوف هالورقة وفرحتها ومن يمي ضحكت فرحانة ومتحمسة اخذتها ونزلت طايرة من الدرج وهي على حالتها
جانت حجارة لا جبيرة ولا صغيرة يعني مبينة بيدي
اول منزلت واني مبتسمة شفت سدن كبالي بس ما اتوقعت راح تصير امي بوجهي والي اجت من ورى سدن
ردت انطق واكول شوفي شنو لكيت
بس عيون امي صارت على ايدي الي ماكو مكان يدفن ويضم الجان موجود بيها
والكلمة طلعت بدون قصد (شوفو شنو لكيت )
عيون امي رادت تاكلني وهي تتسأل خاصة بعد ما صرت قريبة منهم
باوعتلي بخزرة وكالت شنو هاي فتحيها واقريها
فتحت وايدي ترجف ،جانت ورقة جبيرة مشلوعة من نص الدفتر يعني اربع صفحات، اول صفحة صارت بوكهي مكتوب بخط جبير ليفوك
رسالة من عادل الى سدن ...قريتها بكلبي
عاطت امي بيه
لمياء: شنو مكتوووب ؟
رملاء: رجعت قريت المكتوب بصوت عالي ،وعيني صارت على سدن الي وجها بلحظة انخطف لونه وصار اصفر مثل الليمونة
رجعت امي تصيح وتسأل شجابها هاي هنااا؟
باوعت لسدن ورجعت جاوبتها
البارحة من جنا بالسطح شفناه واكف جوة بفرعنا احتمال من نزلنا هو شمرها شدرانا بعد
لمياء: تعالي هسه تقريلياها كلها لا اكلب الدنيا على راسجن
سدن : بقيت بالعة ضيمي وواكفة اباوع عليهن وانتظر الصاعقة تنزل عليه مشت امي للصالة واحنا وراها
بقت تصيح على رملاء حتى تقراها الها ورملاء ساكته
اخر شي كامت تغلط وتفشر وسحبت الورقة هي وبدت تقراها بصوت عالي
الرسالة مليانة حبيات ورومانسية ويشرح بيها عذابه واشتياقة
ومكتوب ....
اشتاقيتلج واشتاقيت اكعد يمج اتمنى اليوم الي كضيناه سوى ينعاد عليه بكل لحظة من يومي
تعبت واني عايش عالذكريات تعبت واني اضحك من اتذكر شلون انكسر حذائج وصرتلج اسكافي وتعبت واني ادمع واصبر بگلبي من اتذكر دموعج وخوفج
صدكيني ماكو شي يوكف بوجه حبي الج ،صارلي شهرين افتر على كل الاعدايات والمعاهد الي بالمنطقة من شفتج مختفية بس ردت اعرفلج درب وكلت يمكن اهلها نقلوها لغير مدرسة لحد ما سألت بكل المدارس والمعاهد وما لكيت اسمج
وجابتني الدنيا بالتالي لباب بيتكم حتى ارتاح ولو ذرة من الراحة ،
سدن : امي تقرا بصوت عالي وتباوع عليه بنظرات مليانة حقد واحسها تريد تثرمني بين اسنانها ،جنت ويا كل كلمة اتشاهد على روحي لان اعرف الكلام الي راح اتسمم بي خاصة ان هالرسالة فضحت طلعتي وياه من بعد ما جنت انكر وهو عادل ذاكر هواي تفاصيل عن طلعتنا خلت امي تتاكد اني جنت وياه
