لبوة ولكن

البارت الثاني والثلاثون

#لبوة_ولكن
للكاتبة روشان

اعذروني عالاخطاء الاملائية ممراجعة البارت 🖤

البارت الثاني والثلاثون

وصحت لــ إبعيد
يا نهر التعب لـ عيوني عبر إنعاس
نومني أريد أرتاح
بـ عيوني بچي
بگد الحچي المضموم عند الناس...(رملاء)
.
.
عام ٢٠٠٤ /بغداد
رملاء:اليوم جمعة كعدت من الصبح ريكت وبدلت للجهال كملت شغلي وسويت غداء من القاسمة الله ،اتغدينا اني وشعيب وجهالي
عمتي وحماتي مسافرين لسوريا يم بتها الجبيرة الي استقرت هناك بعد السقوط ،فالبيت بقى النا وحدنا هالفترة وبيت باسم وسمارة عازلين كل فترة يلا نشوف احد منهم لان اني مبتعدة عن سمارة وما انطيها وجه وما نلتقي الا ما ندر

للعصر شعيب بدل وطلع شغل سيارته حتى يروح للمعارض لان الجمعة الشغل والسوك احسن من باقي الايام ،
اني كاعده يم جهالي واباوعله من شباك المطبخ المطل عالكراج ،شوية ورجع دخل يمنا وكف بباب المطبخ

شعيب: شعندج باقية وحدج بالبيت ليش ما اخذج لاهلج اخاف اتأخر لليل يلا ارجع

رملاء: استغربت كلامه اول مرة يكلي اوديج لاهلج من كيفه ،واني هم كيفت لان اهلي جاي يحضرون ويجهزون لرشيد هالفترة وعالاساس الشهر الجاي عرسه ،،
كمت بسرعة بدلت وخليت الربطة على راسي وطلعت وياه وصلني يم اهلي وراح لشغله ،،لكيت اهلي جاي يفرغون الغرفة مالتهم حتى يتزوج بيها رشيد
لان الشقة مابيها بس غرفتين وحدة جانت لامي وابوية وهسه حتصير لرشيد والثانية لسدن واخواني الصغار
وهسه بعد امي وابوية تصير نومتهم بالصالة ،،

خليت غيث وفهد يلعبون يم اخواني وكمت اني ساعدت سدن بالتنظيف ،جانت هي وامي بالغرفة ،لاحظت امي شوية ضايجة ومو على بعضها
سالتها ..شبيج صاير شي

بقت ساكته مادري غلست على سؤالي لو مسمعتني ،رجعت باوعت لسدن اشرتلها بتساؤل ،هي فهمتني وجاوبت

سدن : خطية كرم مو قبل فترة سفروه للهند حتى يتعالج ،اليوم رجعوه كايليلهم ماله علاج ،رجعوه لبيته وكعدوا وسكتوا

رملاء:اتذكرت كرم صارله فترة حالته بدت تسوء من مرض للثاني والاطباء هنا ما وكعوا على علته لحد ما ماعرف منو اقترح عليهم يسفروه للهند وصدك سفروه وهسه هم راحع بدون علاج

واني اكول شبيها امي مقهورة ،ادري بيها كلش تحب كرم وهو طيب وخلوق ميستاهل ابد هم الله يساعد خالتي هسه شنو حالها عليه ومرته خطية واطفاله مو صار عنده ولد وبنية من مرته الاخيرة

كملنا تفريغ وتنظيف الغرفة ،ورشيد كال كم يوم واصبغها على فراغي ،عود بعدين يشتري اخشاب جدد ،لليل اجاني شعيب دخل كعد يم اهلي بينما بدلت ملابسي وطلعتله اتلكاني بابتسامته واخذ الجهال من ايدي ووكف سلم على ابوية حتى يطلع
واني واكفة بصفه انتبهت على خده وجانب راسه بي اثار لمع ملون ،اخذني الفضول ردت امد ايدي واشوفه شنو بس استحيت كدام اهلي