(((((( الكبيره ٢))))))
#لولو_محمد
الحلقه ٩٧
مختار / طب اهدى
عباده / انا هادى هو بس يبقي بعيد عن بنتى و انا هبقي فى منتهى الهدوء
مختار يتنهد عباده بيفرك
مختار / انا هروح اتكلم معاه و احاول اهديه
عباده / ما يولع انت كنت خلفته و نسيته
مختار/ يا سيدي لو ما كانش عشان عضم التربه اعتبرنا محتاجين
عباده / ما شوفناش من وراه غير ال
مختار/ هقنعه يبعد عنها
عباده / تمام
مختار/ بس ما اضمنش الوضع ده هيستمر لامتى
عباده / يا اخى انت حد مسلطك عليا طب يمين بالله
مختار/ ما تحلفش انا مش مستفيد حاجه من كل ده انا اساسا تعبت مش قادر مش عارف اللمها بايظه من كل ناحيه تعبت
عباده / انت اللى تاعب روحك و بدل ما تطلع ترتاح هتجرى تراضيه و تطيب خاطره
مختار / اهدى يا عباده اهدى
مختار يقوم و يمشي عباده يتنهد
..................
فى مخزن كبير
رجاله بتفكك صيجان تريلا مستخبى وراها اسلحه و كراتين و جابر و قاسم شايل مازن على كتفه
جابر/ الهمه يا رجاله مش هنقعد اليوم كله
قاسم / اهدى يا حبيبي الناس شغالين و لا هم نفس البقين لازم حد كل مره يقولهم
جابر يبص له و يضحك
جابر / اصلى بعيد عنك جعان
مازن / و انا كمان
جابر / يا نهار ابيض يا نهار ابيض لا دا احنا نفكنا من العالم البطيئه دى و نجرى على البيت بقي
قاسم / يا عم الناس هتخلص اهى و بعدين ما هو الناس دى اكيد برده جعانه و اكيد هتاكل هنروح ناكل و نسيبهم
جابر / الواد جعان يا قاسم ما لوش دخل يستنى يلا يا ابنى يلا ... هستنى تليفون
راجل ١ / ما تقلقش كلو تحت السيطره
جابر و قاسم و مازن يركبوا عربيه
قاسم / مش مرتاح اننا سايبينهم
جابر/ يلا يا قاسم يا حبيبي يلا
جابر يسوق و يمشوا
...............................
فى شقه جوزيف
جوزيف / يعني انت جايلى دلوقت عاوز ايه
مختار / كلامى معاك كان واضح
جوزيف / و انا ما اخليتش بيه
مختار / قولتلك تقرب منه تقوم تتحداه
جوزيف / واحد غيره دخل عليا نفس دخلته ما كانش خرج على رجليه
مختار / يا ابنى ارحمنى بقي هو انا هلاقيها منين و لا منين
جوزيف / هو انا عملت ايه لكل ده
مختار / بعت الرساله ليه من الاول قولت لها عن الدرون ليه من الأصل فتحت حوار ليه بلااااش كل ده انت اساسا داخل على الدرون و بتراقبها ليه
جوزيف / الا ما حد فيكوا اهتم انها كانت زعلانه اصلا الا ما حد فيكوا سالها ايه اللى مسهرها و مطير النوم من عينها الا ما حد فيكوا اهتم بيها اساسا
مختار / اقولك كان ايه اللى مضايقها و ما تزعلش... كانت مضايقه ان جابر مش مديها اهتمام حلو الجمله دى
جوزيف يضحك باستهزاء
جوزيف / ما تمشيش معاك ان عشان كان فى حوار بيتم و هى ما تعرفش عنه حاجه
مختار / و ايه اللى جد من امتى يعني كانت بتعرف
جوزيف / مش قادر اجادلك
مختار / ايواااااه مش قادر تجادلنى لما يكون النقاش مش فى صالحك تبقي مش قادر تجادلنى ... بص يا ابنى انا قولتهالك صريحه لا هقف معاك و لا هقف مع جابر انا هقف معاها هى فى اختيارها سواء انت او هو او اى واحد تالت اى كان اللى هتختاره انا هقف معاه كل اللى طلبته منك انك تبذل شويه مجهود فى انك تكسب عباده عشان لو اختارتك مفيش قوه فى الدنيا ممكن تجمعكوا من غير موافقه عباده فوق
جوزيف يتنهد و يبص الناحيه التانيه
مختار / انا هديته و نجاه وعدته انها مش هتكلمك تانى ابعد انت خالص و سيب النصيب يجمعكوا
جوزيف / ما اوعدكش
مختار / انت ايه اللى جرالك انت ما كنتش كدا
جوزيف يبص له
مختار/ كنت اهدى و اعقل كنت عارف انت عاوز ايه بالظبط و مخطط ازاى توصل له كان اللى قاعد قدامى واحد تانى خالص
جوزيف / واحد تايه صح ... لا انا مش كدا انا واحد عارف هو عاوز ايه و يقدر يوصل له بس عامل ليكوا حساب مش اكتر
مختار / كتر خيرك
جوزيف / بس انا فعلا مش على طبيعتى ... فى حاجه غلط ... انا مش كدا
مختار / دى بدايه كويسه احيك عليها
جوزيف / فى حاجه غلط يا مختار فى حاجه غلط
مختار / ايوه انت محتاج تهدى
جوزيف يهز راسه لا
مختار / يا ابنى افهم
جوزيف / قوم روح يا مختار روح ارتاح امشي
مختار يبص لجوزيف
جوزيف / انا محتاج اقعد مع نفسي شويه و افكر طول ما انت بترغى مش هعرف افكر
مختار / تمام ... براحتك بس لو سمحت اهدى
جوزيف يهز راسه مختار يقوم و يمشي
جوزيف / فى حاجه غلط... فى زفت حاجه غلط
.................
فى اوضه نجاه
نجاه نايمه فى السرير الباب يخبط نجاه تقوم تفتح تلاقي هند
نجاه / اتفضلى يا عمتى تعالى
هند / مهره هتمشي اختها اقنعتها تروح معاها و مش راضيه تسمع لحد
نجاه / دول اهلها برده هنعمل ايه ... الحمد لله انهم عقلوا فى الوقت المناسب
هند/ ايه البرود ده
نجاه / هى محتاجاهم اكتر مننا
هند / و كانوا فين يا نجاه الفتره اللى فاتت كانوا فين
نجاه / اهلها مهما حصل اهلها
هند / و احنا ايه
نجاه / تعالى يا عمتى تعالى ادخلى
هند تدخل و تقعد نجاه تقفل الباب
هند / الناس دول مش هيصونوها
نجاه / هى محتاجاهم اكتر مننا و بعدين احنا مش هنسيبها هتفضل عينا عليها
هند / من فلاحتنا اوى ما احنا كانت عينا عليها و ما شاء الله على الحاله اللى وصلت لها
نجاه / انا فى ايدي ايه اعمله دا قرارها
هند / كلميها هى بتحبك و هتسمع لك
نجاه / اديها فرصه تجرب ما يمكن
هند / انتى ايه اللى جرالك
نجاه / هو انا مش عاجبه حد خالص كدا ... انا اسفه ... انا ما قصدتش بس انا فعلا مفيش فى ايدي اى حاجه اعملها
هند / تمام يا نجاه ... تمام
نجاه / ما تزعليش منى يا عمتى بالله عليكي
هند تبتسم و تطبطب على كتف نجاه و تمشي نجاه تقعد تعيط
....................
فى البلد
مختار سايق يعدى على عمال بيغيروا اليفط المكسوره
مختار/ يخربيت سرعه ابوكوا هو فى ايه
مختار يكمل سواقه و عربيه الناموس ماشيه عكسه تعدى من على شاب ماشي فى الشارع بيتكلم فى التليفون
الشاب / امال لو كنت بطلب منك حاجه حرام كنتى عملتى ايه ... لا ما هو الحب مش بالكلام على فكره و انا كنت صريح معاكى من الاول ... ما انا لو قادر اصبر شهرين ما كنت صبرت كنت ذليت لك نفسي بالشكل ده ليه يعني ... ما انتوا اللى طلباتكوا ما بتخلصش عاوزه مش عارف ايه و الفرح لازم يبقي ازاى و شهر الزفت يبقي ازاى و اتحرق انا بقي ... هو انا كدا بتخانق معاكى ؟! ... هو اى تلاكيك و خلاص ... اقولك حاجه اقفلى انا مش فايق لاى كلام دلوقت اقفلى ... سلام
الشاب يدخل صيدليه و فى راجل واقف بيشتري علبه دوا فى كيس اسود يحطها فى جيبه و يمشي
الصيدلى / متأخر ليه كدا يا عم
الشاب / ابوس ايدك انا مش ناقص
الصيدلى / اااه ما دام دخلت الدخله دى يبقي اتخانقتوا
الشاب / مفيش حاجه يا عم
الصيدلى / تمام براحتك هتعوز منى حاجه؟
الشاب / تسلم
الصيدلى يقلع البالطوا و يديه للشاب يلبسه و ياخد حاجته و يمشي الشاب يقعد راجل كبير يدخل
الراجل / السلام عليكم هو دكتور يحيي مش موجود و لا ايه
الشاب / لسه ماشي و الله يا حج اؤمر
الراجل يطلع من جيبه شريط دوا فاضي يديه الشاب
الراجل / ما يؤمرش عليك ظالم يا حبيبي بالله عليك يا ابنى تشوف لى الدوا ده ضرورى
الشاب يبص على الشريط و يبتسم بحرج و يروح يفتح درج و يدور و يروح يراجع على السيستم
الشاب / خلصان و الله يا حج
الراجل/ خلصان ازاى ما تكسفناش بقي
الشاب / هو له بديل كويس لو تحب
الراجل / البديل ده على ضمانتك يعني و لا هيكسفنا
الشاب / لا ان شاء الله تمام يعني
الراجل / تمام هات شريط ... لا لا لا هات علبه
الشاب يبص للراجل و يهز راسه و يديله العلبه
الراجل/ انا همشي بيها كدا ما تلفهالى بكيس اسود و لا اى حاجه
الشاب يهز راسه و يجيب كيس اسود و يحط فيها العلبه و يحاسب الراجل الراجل يمشي
الشاب / الراجل رجل بره و رجل جوه و بيشتري بالعلبة و انت خليك كدا بتعد الساعات لحد ما ربنا يفرجها و تبوس حتى
بنت تدخل لابسه عبايه سامره كباسين بتتكلم بدلع
البنت / ازيك يا دكتور هو دكتور يحيي مش موجود
الشاب / لسه ماشي اؤمرى
البنت / ما يؤمرش عليك ظالم بس هو اصل انا كان ليا حقنه كدا باخدها و دكتور يحيي ربنا يبارك له ايديه كانت خفيفه خالص و بتريحنى
الشاب / لا هو الشفت بتاعه خلص و هيجي الصبح بإذن الله لو محتاجاها اوى فى مستشفي على ناصيه الشارع
البنت / طب ما تديهالى انت و انا ادعيلك
الشاب / لا ما بديش حقن انا معلش
البنت / الله امال دكتور ازاى
الشاب / يا ست الكل المستشفي خطوتين روحى خلى اى واحده تديهالك هناك
البنت / لو خايف حد يشوفك ندخل المخزن
الشاب / المخزن!!
البنت/ ايه ما دخلتوش قبل كدا
الشاب / اتكلى على الله اللهى لا يسيئك اتكلى على الله الواحد على اخره
البنت / براحتك
البنت تمشي و الشاب يضرب كف على كف
الشاب / الله يحرقك يا يحيي دا الدكتور لو عرف هينفخك ... دا ايه العذاب اللى الواحد فيه ده بس يا ربى
...........................
فى الجنينه الورانيه
احلام واقفه بتلاعب العيال جابر يدخل و فى ايده مازن
جابر / يا مسا التماسي
احلام / الله !! رايق اوى ما شاء الله عليك
جابر / عندنا ضيف جامد اوى النهرده
احلام/ اهلا مين القمر
مازن / اسمى مازن ... مازن قاسم الزينى
احلام/ و انا احلام... قولى بقي تحب تلعب ايه
جابر / هسيبه معاكى و اروح اقعد انا مع الرجاله
احلام / ما تقلقش عليه فى عنيا
جابر / تسلم لى عنيكي
جابر يمشي و يروح ناحيه المضيفه قاسم قاعد مع عباده
قاسم / دا هو سواد الليل يعني مش اكتر
جابر / يا عم انت فى حد بيشكشكك ما تاخد نفسك كدا و تقضي يومين و لا انت واخد فكره وحشه عن بلدنا و لا ايه
قاسم / ليه هو انا اول مره اجى و لا ايه ... لا بس اللهم بارك يعني البلد كل يوم بتطور و تتغير عن اللى قبله
عباده / الحمد لله
قاسم / هو مازن
جابر / مازن فى الجنينه الورانيه مع العيال و ما تقلقش عليه امان الأمان
قاسم / اصله مش واخد على أنه يبقي بعيد عنى
عباده / ما تقلقش العيال بتلهى بعضها
قاسم يبتسم
عباده / انا هقوم اشوف الجماعه اللى مسافرين دول و ارجع لك خد راحتك انت مش ضيف
قاسم يبتسم عباده يطلع بره يلاقي محمد واقف فى جنب و مضايق عباده يروح له
عباده/ محمد
محمد ينتبه
محمد/ اؤمر يا كبير
عباده/ ابوك فين
محمد / قالى جهز العربيات و الرجاله على ماجى و ادينا جاهزين و هو لسه ما جاش
عباده/ مالك فى حاجه مضيقاك و لا ايه
محمد / لا ما فيش انا تمام الحمد لله
عباده / عليا ... فى ايه يا محمد مالك
محمد / يعني ما بحبش الطريق بس تمام يعني ما فيش مشكله
عباده / خلاص ما تروحش مش واقفه عليك يعني
محمد / ازاى يعني دول امانه و لازم يوصلوا بالسلامه
عباده / هو احنا يعني هنرميهم هبعت حد غيرك و هو هيقوم باللى انت كنت هتعمله ما تشغلش انت بالك
محمد / ابويا كدا يزعل
عباده/ ابوك مش هيعرف حاجه هقوله انى طلبت منك تخلصلى حوار و بعت حد بدالك ما تعملش حاجه مش على كيفك
محمد / من امتى
عباده / افندم
محمد / حقك عليا يعني بس اللى يسمعك دلوقت ما يشوفكوش و انتوا سالخيني فى التمرين و الشغل
عباده يطبطب على كتف محمد و يروح ناحيه السرايا يدور على خديجه يلاقيها
عباده/ ايه يا بنتى مستخبيه فين كدا
خديجه / هستخبى من ايه بس يا عباده اديني موجوده اهو بجهز مع الحريم زواده لناصر و عمران ما دام العربيات راجعه على مصر . صحيح نجاه قافله على نفسها حتى هند طلعت لها تحاول تقنع مهره ما تمشيش و نزلت من عندها مش مظبوطه بس ما قالتش اتكلموا فى ايه
عباده/ طب و انتى ما طلعتيلهاش تحاولى تتكلمى معاها ؟!
خديجه / و هى بنتك بتسمع و لا بتتكلم مع حد غيرك
عباده/ ما هى بنتك انتى كمان و محتاجه تقربى منها و دلوقت اكتر من اى وقت تانى
خديجه/ يعني انا فى الاخر بقيت اللى مقصره
عباده / ما عاش و لا كان اللى يقول كدا بس هى محتاجاكى دلوقت لا هتتكلم و لا هتقول اى حاجه عارف بس على الاقل تعرف انك جنبها
خديجه / هو فى حاجه يا عباده
عباده / مفيش حاجه ما تقلقيش بس انا شديت آنتى ارخى
خديجه / و انت شديت ليه المرادى مش طبعك
عباده يبتسم و يبوس راس خديجه و يمشي
خديجه / دا ايه اصله ده
......................
على الطريق
صوفيا / انا ما كنتش متخيله ان الطريق طويل اوى كدا
السواق / تحبى نشوف استراحه ... بنزينه يعني يكون فيها حمام نضيف و سوبر ماركت
صوفيا / يا ريت بليز ... انا بجد مش مصدقه كل اللى بيحصل لى ده ... حاسه انى فى كابوس بجد .. بجد
مهره تطبطب على كتف صوفيا
صوفيا / بس عاوزه اقولك حاجه بجد ... كان المفروض تفهمينا حوار عمران ده من الاول بالراحه
مهره تشاور لصوفيا تسكت صوفيا تبص على الرجاله و تهز راسها انها فهمت
صوفيا / بس هو شاب كويس على فكره و جدع انا اه ما اتعاملتش معاه غير مره واحده بس حسيت كدا
مهره تهز راسها
صوفيا / عرفتى ان ايلين اتجننت و اتخانقت مع عمران و اتهمته انه السبب فى فسخ خطوبتها ... مش هتصدقى عملت ايه ... بعتت بلطجيه يتخانقوا معاه و ضربوه فى راسه
الرجاله يبصوا لبعض مهره تطلع الموبايل و تحاول تتصل بعمران فيديو كول
صوفيا / هو كويس بس هى ازاى كدا بجد ... ايه اللى حصل للعيله دى انا مش مصدقه نفسي بجد ... بس لا عادى يعني اذا كان مروان كدا هى هتكون ايه يعني ... الحمد لله انك ما اتربتيش معاهم كان زمانك سايكوباث زيهم ... ايه ما بيردش ؟
مهره تبص لصوفيا عمران يرد
عمران / السلام عليكم
مهره تشاور على الرباط على دماغه
عمران / سمعت ان الانسه صوفيا قدرت تقنعك ترجعى تعيشي معاهم يا ريتها كانت جت بدرى شويه يمكن كنتى لحقتى اول ماده ... ناويه تلحقى اى حاجه و لا خلاص بقي مش مشكله خليهم كلهم مع بعض السنه الجايه ؟!
مهره تشاور على الرباط
عمران / لا دا حاجه بسيطه
صوفيا تاخد الموبايل
صوفيا / هاى ازيك عامل ايه
عمران يبتسم
صوفيا / انا اول ما هروح هكلم مامى و أوضح لها سوء التفاهم اللى حصل و اكيد هتيجي بقي و نشوفك و كدا
عمران / ربنا يقدم اللى فيه الخير
صوفيا / بتروح النادى ؟
عمران / لا و الله الفتره دى امتحانات انتى عارفه يادوب بلحق ألم اى حاجه
صوفيا / ما تفكرنيش بقي انا بحاول انسي
صوفيا تضحك
صوفيا / بس اكيد هنتقابل
عمران / باذن الله توصلوا بس بالسلامه
صوفيا / تمام... مش عاوزه اعطلك بقي و كدا
عمران / فى حفظ الله
صوفيا تقفل
صوفيا / شخصيه اوريانتال على الآخر بس باباه ظريف جدا و شكلهم كيوت اوى
مهره تبتسم بسخريه
صوفيا / مش عوزاكى تفكرى فى اى حاجه خالص ... احنا جنبك تمام
مهره تبتسم صوفيا تتنهد
صوفيا / يا ترى انت فين يا بابا
مهره تبص لها و تبص من الشباك
...................
فى اوضه نجاه
خديجه تخبط و تدخل تلاقي نجاه ماسكه تابلت
خديجه/ هتفضلى قافله على نفسك كدا كتير ؟!
نجاه / لا قافله و لا حاجه اتفضلى
خديجه تدخل تقعد قدامها
خديجه/ فى ايه يا نجاه مالك ؟
نجاه / مفيش منزله كتاب كدا اقراه شدنى بس
خديجه / اه ... كويس القرايه حلوه ... بس ... مش سكتك اوى
نجاه / ليه بتقولى كدا انا قريت كتب كتير جدا و بقضي معظم وقتى بتعلم حاجات جديده
خديجه / و الوقت التانى تنطيط من هنا لهنا
نجاه / ماشي ده له وقت و ده له وقت ... هو فى حاجه ؟
خديجه / لا بس مستغرباكى انتى حتى ما ممسكتيش فى مهره
نجاه / هى مش صغيره و بعدين هى مش لوحدها دى مع امها و اخواتها
خديجه / اه ... و ماله
نجاه / اعتقد انهم هيساعدوها هى محتاجاهم اكتر مننا و بعدين احنا مش هنسيبها يعني هنبقي جنبها باذن الله
خديجه/ انتى كويسه يعني
نجاه / اه الحمد لله
خديجه / تمام ... هنزل اشوف الجماعه تحت ليكونوا محتاجين حاجه
نجاه / تحبى اساعدك فى حاجه ؟
خديجه/ يمين بالله انتى فيكي حاجه
نجاه / لا حول و لا قوه الا بالله
خديجه / بنتى و حفظاكى صم
نجاه تضحك
خديجه / ما علينا انا عارفه كدا كدا انك بنت ابوكى ... بس يعني لو حبيتي فى يوم تفضفضي مع امك انا اوضتى مش بعيد عن هنا
نجاه تقوم و تحضن خديجه
نجاه / ربنا ما يحرمني منك يا احلى ام فى الدنيا
خديجه/ و الله ما مظبوطه
......................
فى الجنينه الورانيه
جابر يدخل يلاقي احلام قاعده على المرجيحة و مازن نايم على رجلها
جابر / ايه ده هو نام !! طب ما ناديتيش حد ياخده منك ليه؟
احلام / ما كانش مضايقينى
جابر يشيل مازن
جابر / تسلمى تعبك و لا حاجه ؟
احلام / ابدا دا نسمه حتى دمه خفيف خالص ربنا يبارك فيه و يجعله ذريه صالحه لأهله
جابر / امين تسلمى يا ست البنات ... هوديه المضيفه لابوه و ارجع لك
احلام / خير ؟
جابر/ ايه ما ارجعش ؟!
احلام / لا ما اقصدش ... بس افتكرتك عاوز منى حاجه
جابر / ما اتحرمش منك ابدا
جابر ياخد الواد و يمشي و احلام تمشي وراه جابر يقابل قاسم ياخد منه الولد
قاسم / الله مش عادته خالص ... نام من تعبه تلاقيه
جابر/ طب دخله فرشته و غطيه بدل ما يستهوى منك و لا حاجه ربنا يحفظهولك
احلام تعدى تدخل السرايا و قاسم يدخل مع ابنه المضيفه جابر يبص على بلكونه نجاه يتنهد و يروح بيته
....................
فى شقه جوزيف
جوزيف بيسرح شعره و يروح ياخد المفتاح من ورا الباب و ينزل يتمشي فى الشارع يحس ان فى حد وراه يقف و يتنهد و يطلع الموبايل
جوزيف / ايوه يا مختار ازيك
مختار / انت ما نمتش لحد دلوقت ليه
جوزيف / زهقان ... انت ممشي حد ورايا ؟
مختار / لامانك مش اكتر
جوزيف / لو كان مات دلوقت كان ذنبه هيبقي فى رقبتك لأنك ما قولتليش ما تعملهاش تانى
مختار/ انت رايح فين دلوقت
جوزيف / هتمشي اتخنقت ايه محبوس و لا حاجه
مختار / لو قادر اطلع الجبل فى رجاله عاملين سهرايه حلوه و هتلاقى شاكر و صابر برده يمكن تنبسط
جوزيف / و الله انت رايق ... شيل البتاع ده من ورايا ... و لآخر مره بقولك ما تكررهاش
مختار/ قول يا رب
جوزيف / سلام
جوزيف يتمشي يشوف يفط الإعلانات و البنات اللى بترقص فيها يضحك و يكمل مشي و بعدين يدخل بيت من البيوت
......................
فى الصيدليه
يحيي واقف بيتكلم مع البنت
يحيي / يا ستى ما لقيتينيش امشي تقولى لعاصم ليه
البنت / الحق عليا يعني انى عاوزه اخدم و بعدين براحتك لو هعملك مشاكل ما اجيش تانى
يحيي / ما تجيش فين لا ... ما اتفقناش على كدا ... انا بس لازم اشوف مكان تانى
البنت/ موجود بس هيكلفك
يحيي / كام يعني
البنت/ كلك نظر بقي انا ما بحبش اتكلم فى الماديات ما انت عارف
يحيي / ما علينا فين و امتى
البنت/ وقت ما تحب اديني رنه هبعتلك اللوكيشن
يحيي / المهم امان
البنت/ امان الأمان ما تقلقش هو انا هفضح نفسي
يحيي يبتسم و يهز راسه
البنت/ و بالنسبه لسي عاصم ده ما تشغلش بالك بيه ديته يومين و بدل ما كان بيتخانق معاك هينصص وياك
يحيي / لا انسي دا من بتوع الحلال أجمل سانتظر
البنت/ ما عدش فى حد قادر ينتظر اليومين دول اسألني انا
البنت تضحك بمياصه يحيي يغمزها و هو بيبص على الكاميره و الباب
البنت / ما تقلقش كلو فى الأمان
يحيي / شوفت شوفت
البنت تضحك تانى
....................
فى المضيفه
مازن يصحى يلاقي قاسم نايم جنبه يبص تحتيه مبلول يصحى قاسم
قاسم / ايه يا مازن ايه ؟
قاسم يحط ايده و يبان عليه الضيق يقوم يقعد و يتنهد
قاسم / مش كبرنا بقى يا مازن ليه كدا يا بابا بس
مازن / اخر مره و الله غصب عنى
قاسم / ماشي ادخل الحمام و انا هجيب لك غيار و اجى
مازن يروح الحمام و قاسم يقوم و هو بيجر رجليه يروح وراه
...................
فى التراس
احلام تطلع و فى ايدها مج نسكافيه و تقف تتفرج على النجوم و تتنهد باب المضيفه يتفتح و قاسم يطلع شايل كرسي يحطه جنب المضيفه و يجيب المرتبه يوقفها على الكرسي و يسندها على جدار المضيفه و يدخل و يسيب الباب مفتوح احلام تدخل و تنزل تفتح الاوضه اللى تحت و تنزل مرتبه السرير و تجرها و تفتح باب السرايا و تطلع واحد من الغفر يشوفها بتجر المرتبه يجرى يساعدها
الغفير / عنك يا ست احلام عنك اؤمريني عنك
احلام / وصل دى للمضيفه يا عم سلطان على ما اجيب ملايه تانيه من جوه بدل دى لحسن دى اتبهدلت منى فى الارض
سلطان يشيل ألمرتبه
سلطان / عيني يا ست الكل تؤمريني امر
سلطان يشيل المرتبه و يروح ناحيه المضيفه و يخبط على الباب قاسم يرد من جوه
قاسم / مين
سلطان / خدامك سلطان يا سي قاسم بيه الست احلام بعتت مرتبه نضيفه
قاسم يطلع من الحمام ايديه مليانه صابون
قاسم / تسلم يا سلطان اتعبك تحطها على السرير لحد ما اخلص حما الواد
مازن يطلع يجرى من الحمام و كله صابون يحاولوا يمسكوه يفلت منهم و هو بيجرى و يضحك
قاسم / تعال هنا ياض يا ابن الكلب انت ... ياض يا ابن ال ...
مازن يطلع بره المضيفه و يجرى ناحيه السرايا و هو بيبص وراه على ابوه احلام تفرد الملايه و تلفه و تشيله و هو مسخسخ ضحك
احلام / حد يعمل كدا
قاسم يحاول يلم الموقف و فى ايده هدوم مازن
قاسم / لا مؤاخذه اصله مدلع حبتين
احلام / ما يدلع هو ان ما ادلعش فى السن ده هيدلع امتى ... عنك انت انا هاخده اللبسه و
مازن / انا جعان
قاسم / ياض يا ابن ال
احلام / طب و الله و انا كمان دا انا حتى كنت عاملالى فى التراس كبايه نسكافيه تعال اعملك لقمه ... اعمل لك ... اعمل يا عم سلطان
سلطان ورا على باب المضيفه فى ايده فوطه
سلطان / عشتي يا ست الكل خيرك سابق
احلام تبص لقاسم
احلام / تاكل حاجه ؟
قاسم / عشتى تسلمى على فكره هو مش جعان هو
مازن / لا و الله جعان
احلام/ اكيد جعان دا نايم من بدرى و له حق يبقي مفوق كدا ... بيتهيألي انت ما دخلتوش الحمام لما جابر جابهولك ... على العموم تقدر ترتاح و تطمن عليه انا هاخد بالى منه لحد ما تصحى
قاسم / اخاف يتعبك
احلام / تعبه راحه ... عن اذنك
احلام تاخد مازن و هدومه و تدخل جوه قاسم يرجع المضيفه
قاسم / هى مين دى ؟
سلطان / حد ما يعرفش الست احلام الزيني
قاسم / اخت جابر
سلطان / اخر العنقود سكر معقود دى ست مفيش منها اتنين حنيه ايه و طيبه ايه و كرم ايه صحيح و هى يعني هتجيبه من بره طب دا الحجه
قاسم / حيلك يا عم قاسم دا انا بنام على روحى ... الصباح رباح
سلطان / لا مؤاخذه
قاسم / بالله عليك لو الواد مازن غفلها و نزل يجرى
سلطان / يغفل مين بس دى الست احلام
قاسم / ابوس ايدك يا عم سلطان تركز بس انا كدا كدا هسيب الباب مفتوح
سلطان / اطمن .. اطمن و حط فى بطنك بطيخه صيفي انا قاعد لك على الباب
قاسم / تشكر
قاسم يدخل يعدل المرتبه على السرير و يرمى نفسه و ينام
.....................