الكبيره ٢ بقلم / لولو_محمد

الحلقه ٣٠

(((((((( الكبيره ٢ ))))))))
#لولو_محمد
الحلقه ٣٠
مغاورى / خير فى حاجه حصلت عندك
شاهين / ليه هو جواسيسك اللى عايشين بس يراقبونى ما لحقوش يحكوا لحضرتك كل حاجه
مغاورى / اتكلم بادب
شاهين / طلبت موبايل من النت طلع مفتوح و مستعمل المندوب قالى انه ما لوش دعوه و اتواصل مع الشركه و هكلمهم يغيروه
مغاورى/ الموبايل الجديد جايلك بشريحته ؟؟
شاهين / ما قولت لحضرتك مستعمل اول ما فتحته صاحبته رنت هرجعهولها طبعا و اطلع عين الشركه بنت النصابه دى ما تشغلش بالك بيا يا كبير انا هتصرف
مغاورى / و انت بتطلب موبايل جديد ليه ما
شاهين / هو فى ايه يابا هو انا صغير على الكلام ده ... كنت هديه لتيا عشان اعتزر عن اللى حصل امبارح مبسوط كدا
مغاورى / انا مش براقبك انا بطمن عليك
شاهين / تسلم يا سيد الناس
مغاورى / خد بالك من نفسك سلام
مغاورى يقفل شاهين ينفخ و يقعد يبص حواليه يلاقى عامر بيتابعه من بعيد ينفخ و ياخد الموبايلين فى جيبه و يمشي يركب عربيته و يقفل عليه الباب و يطلع موبايل امايا و يفتحه يلاقي جواه فيديوهات كتير سوده منها واحد لوشه يشغله يلاقيه ليه  و هو بيتفرج على فيديو ياسمينا و صوت ياسمينا و ضحك البنات فى الخلفيه
///////////////
شاهين / ادلعى ادلعى يا ابن المحظوظه يا منصور يا مين يلايمني عليكي يمين بالله ما اخلي فيكي حته نافعه يخربيت جمال امك
شاهين يصرخ و الصوره تنقطع
////////////////
شاهين يتصدم و يتوتر التليفون يرن فى ايده
شاهين / عاوزه ايه يا بنت الكلب انتى
امايا / عوزاك
شاهين / بت اتعدلى
امايا / عوزاك ما تخليش فيا حته نافعه و لا ان ما كانتش ياسمينا ما تنفعش
شاهين / انتى عبيطه و لا انتى ايه حكايتك بالظبط انتى عارفه انتى لو عتبتى البلد هيجرالك ايه ساعتها بجد مش هيبقي فيكي حته جنب اختها
امايا / يعني مش عاوز على العموم انا بعتللك كام حته منى تتصبر بيهم منهم واحد مع حبيبك ... ياترى مين فيكوا اجمد انت و لا ناصر هموت و اعرف ... سلام يا شوشتى
امايا تقفل شاهين يفتح الفيديوهات السوده السواد اول ثانيه بس يروح و تظهر امايا بترقص و تضحك يقفل بسرعه
شاهين / اعقل دى بتسحبك دى بتنصبلك كمين ... بنت الكلب ... اه يا بنت الكلب
شاهين يسوق بسرعه
..................
فى النادى
نجاه / طب ما دام جيت فى وقتى و مخنوقه و هاين عليكي تولعى فى نفسك و كل الكلام ده ليه ما كلمتنيش انتى اجيلك من بدرى 
مهره تبتسم
نجاه / اللى عشناه سوا كان قليل بس كان كبير ... ايه اللى انا بقوله ده قصدى انها كانت فتره بسيطه بس عشنا فيها احداث مهمه فهمانى ؟
مهره تبتسم
نجاه / انا مش هضغط عليكي تحكيلى اى حاجه بس صدقيني مفيش حاجه تستاهل اللى انتى عملاه فى نفسك ده
مهره / و انا عامله ايه اصلا ... انا مش عامله اى حاجه ... ربنا ما يكتب عليكي اللى انا شوفته
نجاه / و لا يكتب عليكي اللى انا شوفته ... انتى عارفه انى عشت الكام سنه اللى فاتوا مشلوله
مهره تهز راسها 
نجاه / خرجت اتفسح مع اخواتى و اولاد عمى ... طلعنا نعمل سفارى فى الجبل حاجه بنعملها كتير... طلعوا علينا ولاد الحرام و خدت طلقه فى ضهرى
مهره / ايوه عمران كان حكى قدامى حاجه زى دى و انه اخترعلك بدله ساعدتك على المشي
نجاه / الحمد لله كانت فتره صعبه ... بس لو تسالينى تحبى تشيليها من حياتك اقولك ابدا
مهره / بتهزرى بقي
نجاه / ابدا انا عشت فيها ايام صعبه بس عشت كمان ايام حلوه اوى حتى اللى انتى فيه دلوقت ... دلوقت صعب بس لما تعديه و تهدى هتلاقى انك كسبتى حاجات كتير جميله تحمدى ربنا عليها و اقولك حاجه بقي انتى حتى لو مكسبتيش حاجه تحمدى ربنا برده عشان كان ممكن وضعك يكون اسوء
مهره / الحمد لله
عمران يدخل نجاه تبرقله
عمران / السلام عليكم ازيك يا مهره عامله ايه يا رب تكونى بخير
مهره / الحمد لله ازيك انت
عمران يقعد
عمران / عامله ايه
مهره / تمام الحمد لله
نجاه / انت ايه اللى جابك
عمران / جاى اتمرن عادى
نجاه / طب التمرين هناك على فكره
مهره / سبيه يقعد شويه ما تحرجيهوش
نجاه / لا معلش انا مكلماكى و عاوزه اقعد انا معاكى فى كلام كتير اوى عاوزه اقولهولك ... كلام بنات
عمران / تمام ... هقوم ... عن اذنكوا
مهره / شويه و هحصلك
عمران يهز راسه و يمشي
مهره / احرجتيه اوى
نجاه / ما تقلقيش عليه هو واخد منى على كدا من صغره ... سيبك انتى دلوقت طول بعرض دا انا كنت معلمه عليهم رايح جاى فى التمرين
مهره / و لساتك ... على ما سمعت يعني
نجاه/ لا ما عدناش بنلعب كتير زى زمان كنت بضايق اوى لما بلاعبه اصلا اصلي كبنت جسمي كبر قبلهم كانوا لسه قصيرين كدا و انا هوبا لفوق فكنت بلاعب الكبار زى جابر و ساعات صابر فلما كبروا ما كنتش بقدر اشوفهم برده انهم كبروا كنت بشوفهم لسه صغيرين اقصر منى مش عارفه امتى فردوا كدا اللهم بارك بقيت اقصر واحده فيهم
مهره / سنه الحياه ... بس انا مش فاهمه اوى ايه علاقه الفروسيه بالطول
نجاه / لا التمرين التانى ده مارشال ارتس فنون قتاليه تايكوندوا كيك بوكسينج كدا يعني مش فروسيه خالص انا الفروسيه بقي لعبتى ... صحيح احنا كان فى بينا سباق ما تمش
مهره تبتسم
نجاه / لا ما تحلميش انا هلاعبك هلاعبك و هحط عليكي عشان تسستمى نفسك من دلوقت
مهره / انت بنت جميله اوى يا نجاه
نجاه / انتى اجمل بس تعرفى ان الجمال ده لازم يجي معاه لعنه
مهره / لعنه !!
نجاه / ما حدش بياخد كل حاجه خدنا الجمال لازم نخسر حاجه تانيه
مهره تبتسم بحزن
مهره / و انتى خسرتى ايه ما انتى حواليكي اهلك كلهم بيحبوكى
نجاه / ما انا لسه حكيالك انى قضيت كذا سنه على كرسي بعجل و اتخطفت فى تركيا و حياتى على طول فى خطر
مهره / ليه
نجاه/ نصيبي ... ممكن تقولى ..  عليا تار
مهره / بس من امتى بياخدوا التار من بنات هو مش كان له اصول باين
نجاه / ولاد الحرام ما يعرفوش الاصول يا مهره ... و لا حتى دين
مهره تهز راسها
نجاه / و انتى يا مهره خسرتى ايه قصاد الجمال
مهره تبتسم بحزن بتحاول بكل طاقتها تداريه
مهره / الحمد لله انا فى فيض من النعم
نجاه / الف حمد و شكر ليك يا رب  .. انا مش هضغط عليكي تتكلمى ... بس صدقيني وقت ما تحسي انك محتاجه تتكلمى هسمعك و هساعدك... وعد
مهره / ميرسي ... انا هستاذنك اروح اللحق التمرين
نجاه/ انا بصراحه مش عامله حسابى اتمرن هنا بس ايه رايك ناجر خيل و نطلع الصحرا و نجرى شويه نتسابق و نفرح و ننسي اى حاجه تانيه انا لما ببقي مخنوقه بعمل كدا بفرد ايديا و اطير
مهره / فكره حلوه اوى بس انا للاسف عندى شغل بكره
نجاه / هتخلصي امتى
مهره / خمسه
نجاه / حلو جدا ابعتيلى عنوان الشغل بتاعك و انا هعدى عليكي نروح سوا
مهره / اتفقنا
نجاه تبتسم
مهره / هستاذنك
مهره تقوم و تمشي جوزيف يجي يقعد
جوزيف / يا لهوى على رغى الحريم كنت فاكركوا هتباتوا للصبح
نجاه / انت بتعمل ايه هنا
جوزيف / وحشتيني قولت اجى اشوفك
نجاه / و الله !! دمك مش خفيف على فكره
جوزيف / و انتى نكديه... هى البت دى مهمه اوى ؟
نجاه / كل الناس مهمه
جوزيف يهز راسه ماشي باستهزاء
نجاه / عامل ايه
جوزيف / thank you for asking
( شكرا على سؤالك )
نجاه / لسه حاسس انك تايه
جوزيف / جدا بس تمام عديت بالاسوء
نجاه / بس وقتها كنت لوحدك دلوقت احنا كلنا معاك و حواليك
جوزيف / انتوا مين بالظبط... ما تعديش نفسك ... ما حدش معايا ... وقت الجد انا اول واحد هيضحوا بيه
نجاه / وقت الجد هتتفاجئ و على العموم يا سيدي انا مش شويه
جوزيف / باشا ... حلوه الفروسيه بس ... كانت حلوه ايام السيوف انما فى عصر المسدسات و المدافع ... و لا لما تحاولى تهربى من عربيه بمحرك قوى ... الموضوع بيختلف اعتقد
نجاه / فى يوم من الايام ... كل التكنولوجيا دى هتختفى ... كل الطاقه دى هتختفى ... هنرجع نركب خيل و نبارز بالسيف تانى وقتها انا و اهلى هنبقي جاهزين بس اللى زيك ... لا
جوزيف / لنفترض انك بتتكلمى عن البترول مثلا و ان هيجي وقت و مخزونه العالمى يخلص ممكن طب الطاقه المتجدده الشمس و المايه و الرياح هيخلصوا هم كمان ... طب ازاى
نجاه / العلم نفسه هتختفى التقدم دا كله هيختفى حروب هتقوم و الناس هتخسر كل حاجه
جوزيف / المليار الذهبى ؟؟
نجاه / ما اعرفش هل هم دول بالظبط و لا حاجه تانيه بس دا اللى هيحصل فى يوم من الايام معركه كبيره هينتصر فيها المسلمين باذن الله
جوزيف / كل دين عنده نبوءه زى دى تعرفى كدا فى اليهوديه برده عندهم انهم هيكسبوا الحرب و هيبقى كل واحد منهم عنده مش عارف كام عبد و العالم كله هيدور فى خدمتهم
نجاه/ لا ما احنا ما عندناش عبيد ... القيامه هتقوم و هنتحاسب كلنا
جوزيف / طب و ليه بقي الفرهده دى كلها
نجاه/ ما انت كدا كدا هتتحاسب
جوزيف / ماشي ليه بقي معركه كبيره و المسلمين ينتصروا ما دام كدا كدا هيتحاسبوا ما بوم يلا كلو يتحاسب على طول و ليه من الاول كل اللى احنا عايشينه ده ليه ما اتخلقناش كلنا ملايكه بجناحات و خلاص
نجاه / ربنا ادرى بس احنا اتخلقنا عشان نعبد ربنا ... تسمع عن قصه سيدنا ادم
جوزيف / اه اكل من الشجره و نزل الارض كعقاب ليه ..  طب هو غلط انا مالى انا ما اكلتش حاجه
نجاه / لا اكلت انت لما اتولدت كنت كائن برئ و نقى و لما كبرت اخترت
جوزيف / انا ما اخترتش حاجه و لعلمك ما حدش من كل اللى حوالينا دول اختار كلنا اتفرضت علينا ظروف احنا لا طلبناها و لا عاوزينا كبيرنا تكيفنا معاها
نجاه / التكيف مختلف ... فى اللى بيستسلم و فى اللى لسه بيحارب و فى اللى بينجح يغير الظروف انا و انت ممكن نمر بنفس الظروف انت تطلع ظابط و انا اطلع حراميه عادى بتحصل ابويا و امى ممكن يكونوا ملايكه و انا اطلع بنت عاقه و ممكن العكس مفيش قاعده كل واحد و اختياراته
جوزيف / مش مقتنع
نجاه / انت هنا ليه
جوزيف / عشانك
نجاه / لا سيبك منى انا بتكلم عموما انت هنا معايا ليه ؟؟ انت مش اتربيت على ايد المجلس ؟ هل انا اجبرتك ترجعنى و تتحالف معايا ضدهم
جوزيف / انتوا مش بتقولوا ربنا اللى خلانى
نجاه / انت الكلام معاك صعب
جوزيف / يمكن عشان انا مش سهل يتلعب بعقلى مثلا
نجاه / لا عشان انت رافض تفهم العكس تماما من انك تكون ذكى مش غبى ..  مقفل
جوزيف / انا بحاول بكل الطرق استوعب كل كلامكوا انا اخدت قرار ... اخطر قرار فى حياتى بدون ذره تفكير و بعدين ...
نجاه / تمام ده ربنا و بعدين انت دلوقت بتتكيف مع قرارك و بتبنى عليه اختياراتك كان ممكن تتراجع فيه كان ممكن لحد دلوقت تتراجع فيه انت اللى اخترت تكمل انت اللى اخترت انك تصلى و تحاول
جوزيف / عشان انتى طلبتى منى ده
نجاه / دا على اساس انك طور مربوط بحبل و انا بسحبك انت اخترت ده من دماغك انا يا سيدي ممكن اكون وجهتك او شجعتك بس دا كان قرارك و دى حياتك انت كبير كفايا انك تعرف الصح من الغلط اه كلنا كتير بنحتاج شماعه نعلق عليها المسؤليه بس فى الاول و الاخر لازم نفهم ان كل حاجه بتحصل فى حياتنا مسؤليتنا احنا
جوزيف / انتى اللى اخترتى الرصاصه اللى دخلت فى جسمك
نجاه/ انا اللى رميت نفسي فى طريقها انا اللى ما جريتش استخبيت وقت الهجوم انا اللى اخترت اكون نجاه الزينى دى ... الحريم مكانهم البيت انا اخترت انزل الشارع و اواجه و اشيل سلاح و احارب كل دى اختيارتى انا و لعلمك امى مش راضيه عنها ابدا بس انا اللى صممت
جوزيف يفكر و يبص الناحيه التانيه
نجاه / نرجع للخيل يا سيدي
جوزيف يبصلها
نجاه / الخيل بغض النظر عن اللى هيحصل فى المستقبل متعه تانيه خالص فكره انك تتواصل مع كائن حى تعرف الفرس الاصيل بيخاف على الفارس بتاعه لو انت سايق موتوسيكل و للحظه توازنك اختل الموتوسيكل هيقع لكن الفرس الاصيل ذكى ممكن فى اقل من لحظه يعدل اتجاهه و يلحقك فى فرق كبير
جوزيف / انا ما جربتش قبل كدا بصراحه عشان اقدر احكم بس الفرس مش امان برده
نجاه / الامان فى الله سيبك انت
جوزيف يبتسم
نجاه/ ايه رايك اعلمك
جوزيف / لا شكرا ... انا مش هتنازل  عن صوره الشاب المعجزه اللى بيعرف يعمل كل حاجه و اقع و لا تقعدوا تضحكوا عليا
نجاه / مش هنعمل كدا ... وعد
جوزيف يسند خده على  كفه على الترابيزه و يبصلها و هو مبتسم
جوزيف / هو انتى علاطول كدا
نجاه / كدا ازاى يعني
جوزيف يتعدل فى قاعدته و يبص بعيد و هو بيضحك
جوزيف/ و لا حاجه
نجاه / لا بجد كدا ازاى
جوزيف / تمام انا موافق علميني
نجاه / انا لبسي مش مناسب بكره اعلمك
جوزيف / اتفقنا ... ما تيجى معايا مشوار
نجاه/ فين
جوزيف / انتى مش بتقولى واثقه فيا ... خلاص سبيني اخطفك
نجاه / لا ما تخلطش الاوراق ببعض اه انا واثقه فيك بس انا ما بمشيش مغمضه انا صحيالك اوى
جوزيف / تعرفى تتلهى
نجاه / اه بعرف
جوزيف / خلاص يبقي يلا بينا ... و بعدين مش هنصيع على بعض انتى مش هتبقي لوحدك امال اجهزه التتبع اللى مغرقاكى دى و عربيه الحراسه اللى ماشيه وراكى ... دا فى ترابيزه هناك قاعد عليه اتنين رجاله ما شالوش عينهم من علينا قوليلى بقي انهم مش تبعك عشان اروح اخلص عليهم
نجاه / انت معاك عربيه ؟
جوزيف / معايا  
نجاه / جبتها منين
جوزيف / بتاعتى
نجاه / يونس
جوزيف / استنى
جوزيف يطلع المحفظه يطلع منها رخصه عربيه باسم يوسف المصرى
جوزيف / يا ترى مين الواد المز القمر اللى فى الصوره دا ؟!! ايه ده معقول !!! دا انا
نجاه / تمام
جوزيف / ايه هتسمحيلى اخطفك
نجاه / لا هستاذنك تروحنى
جوزيف / فى ايه فى البيت اوى كدا يا بنتى سبيلى نفسك و ثقى فيا هشقلبلك حياتك دى
نجاه / انا بحبها معدوله
جوزيف / نكديه
نجاه/ اعرفك انا نكديه هتروحنى و لا اتصل بجابر
جوزيف / اتصلى هخاف منه و لا ايه
نجاه / مش محتاجه اتصل جابر جاى هناك اهو
جوزيف يبص وراه يلاقي جابر جاى يبص لنجاه مبتسمه اوى ينفخ بزهق
...........................
على القهوه
عبد الهادى و محمود قاعدين
محمود / ما انت قمت بالسلامه اهو الحمد لله بتماطل ليه بقي يا ابن عمى ما تنجز حالك
عبد الهادى / كله باوانه يا محمود
محمود / يا جدع بقي يا جدع ايه هو دم اخوك واجعنى اكتر منك و لا ايه و لا تكونش خايف
عبد الهادى / انا ما بخافش
محمود / لا خايف و انا و انت و البلد كلها عارفين خايف من ايه
عبد الهادى / اخرس يا محمود
محمود / تبقي فهمت ... و الله واحد غيرك ما كان سابه عايش يوم واحد بعد اللى حصل مش انت اللى عايش و عارف ان فى واحد
عبد الهادى / اقسم بالله حرف كمان و هطلع اللى فيا عليك ... اخد الحق حرفه و هو اكيد مستنيني
محمود / و انت ناوى تغدر بيه و لا ايه
عبد الهادى/ لا هضربه فى وشه و عيني فى عينه بس مش بطولى و هو متحامى فى رجالته
محمود / هاجى معاك و هجيب جماعه حبايبى و نعمل عوق هينزل هو و رجالته كالعاده انت تصطاده ايه قولك بقي
عبد الهادى / بقولك هقتله وش فى وش مش هغدر بيه
محمود/ كدا مش غدر يا عبده اخد الحق حرفه و هو لما قتل اخوك كان متحامى فى رجالته و انت متصاب و تعبان و بعدين ما تقتلوش يا سيدي عوره بس عجزه و انزل خلص عليك بمعرفتك
عبد الهادى / لا
محمود / طب شاركنى ... انت ايه اللى فى دماغك
عبد الهادى / انا كل اللى محتاجه انه ينزل من الجبل
محمود/ ما بينزلش غير للشديد او بامر من الكبير
عبد الهادى / ما تقلقش هلاقيلها حل
محمود / فكر فى كلامى بس و انت تكسب
عبد الهادى / سبها لله مش هتبقي انت هنا و الحريم فى البيت
محمود / ايه ده هى ام بدر كمان بتزن عليك تاخد بتار اخوك!!
عبد الهادى / طلعها من حساباتك
محمود/ يا عم انا مالى بيها ... انا بس استغربت
عبد الهادى / انا ماشي
محمود/ الخلق شافوك واقف على حيلك و بتابع شغلك يعني الحمد لله عزرك راح كل يوم بيفوت الناس هتتكلم اكتر فمن دلوقت بقولك اهو لو مش ناوى خليني انا اخلص
عبد الهادى يسيب المكان و يمشي
...................
فى النادى عند نجاه
نجاه و جابر و جوزيف قاعدين ساكتين و عمالين يبصوا لبعض
جابر / شكلنا هنتغدى هنا مش كدا
جوزيف / لو المكان مش عاجبك تقدر تقوم تمشي
جابر / و اسيبك ... يا راجل دا انا جايلك مخصوص
نجاه / يا ترى بيعملوا اكل ايه هنا حلو
جوزيف / مش هيكون احلى من اكلك
جابر / اتكلمتى مع مهره
نجاه / ايوه بس برده ما بتقولش حاجه بس شكلها مضايقه اوى
اكرم يدخل جابر و نجاه يقفوا
اكرم / ايه الصدفه السعيده دى
جابر / اهلا اكرم بيه
اكرم يبص لجوزيف ما قامش و باصصله و مبتسم بثقه تخلى الابتسامه تروح من وش اكرم و يظهر مكانها علامات القلق
اكرم / انا اسف على الازعاج ما اخدتش بالى ان معاكوا ناس
جوزيف / ناس مين يا اكرم بيه ... شكل حضرتك مش فاكرنى
اكرم / مش واخد بالى
جوزيف يقوم يقف و يسلم اكرم يبتسم
جوزيف / دانيال برادلى
الابتسامه تروح من وش اكرم و يسحب ايده بسرعه و الارتباك يبان نجاه و جابر مش مستوعبين اللى بيحصل
اكرم / مش واخد بالى
جوزيف يبتسم و يقعد
جوزيف / ماشي
جابر / انتوا تعرفوا بعض ؟
جوزيف / مش بشكل شخصي ... اعتقد يمكن مستغرب انى بتكلم عربى كويس
نجاه / انا مش فاهمه حاجه ...ايه يا جماعه
اكرم / لا دا ما فيش حاجه ... انا بس كنت بصدر بضاعه لامريكا و كان عندى مشاكل فى المينا هناك و الاستاذ برادلى مشكورا حلهالى بس احنا فعلا ما اتقابلناش الكلام كله كان بالميل ... بس فرصه سعيده اننا اتقابلنا فايس تو فايس ... انا الحقيقه بفكر انقل كل شغلى امريكا الفتره الجايه
جوزيف / لو احتاجتنى فى اى حاجه انا تحت امرك
اكرم / تمام ... تمام سعيد انى قابلت حضرتك ... عن اذنكوا ... عن اذنكوا
اكرم يبص على مهره بتتمرن و يبص لنجاه و جابر بحرج و يمشي بخطوه سريعه جدا نجاه تخبط على الترابيزه الكل يتخض
نجاه / اقسم بالله ان ما فهمتنى ايه اللى بيحصل لوريك منى وش ما انتش قده فاهم و لا لا
......................
فى المضيفه عند عباده
امين / انا بفكر ابعتله اتكلم معاه و اعقله
عباده / هتقوله ايه ما هو عارف كل الكلام اللى هتقوله بس الزن على الودان امه من ناحيه و الزفت ابن عمه ده من ناحيه ... انت تبعت للواد محمود ده تجيبهولى
امين / انا عمرى ما بلعت الواد ده ... هيجي و يعمل غلبان و مسكين و انا خدامك و انا مداسك و انا عمرى و انا ما اجرؤش و فى الاخر ... عيل سهن سحلاوى
عباده / و طبعا ما اقدرش اكلم صابر أبلغه باللى بيحصل
مغاورى يدخل
مغاورى / السلام عليكم يا رجاله ... هو مختار لسه ما رجعش و لا ايه
عباده / سي ناصر حالف عليه ما ينزل الا اما الجماعه يردوا يا اه يا لا
مغاورى/ و هو ابن الزيني يترفض و لا ايه
عباده / مالك فى حاجه مضيقاك
مغاورى / ليه يا عم ما انا بضحك و مفرفش على الاخر اهو
عباده / بس مضايق عنيك فضحاك فى ايه يا مغاورى...سماح ؟ ... قوم يا امين وصيلنا على اتنين شاي
مغاورى / يا عم اقعد ... انت هتوزعه انت كمان دا اخويا يا جدع و ما اخبيش عنه حاجه
امين / عشت يا عمهم
مغاورى / انا قلقان اوى على الواد شاهين
عباده / ليه خير ماله ... انا ما جتليش عنه شكوى واحد من اى حد من فتره طويله ... ليكون عشان سوء التفاهم بتاع اسم مراته و الباشمهندسه !! هههههههههه اما موقف ما اتمنهوش لاعدائى بس الشهاده لله هو غلطان ايه اللى نزله لتيا بس
امين / بيقولوا كان جايب حلويات و هم اللى قابلون قال رزقهم
مغاورى / حلويات ايه و تيا ايه و اسامى ايه هو ده موقف اصلا ... انتوا مين اللى قالكوا اصلا على الحوار ده
عباده / لتكون بتنسي انى الكبير يابا 
مغاورى / مش فايقلك
عباده / طب احكى ايه اللى حصل
مغاورى / و الله ما عارف بس جاله صندوق من شركه الشحن و لما فتحه اتخانق مع المندوب و لما كلمته قال الاوردر مش مظبوط و بعدين راح عربيته و اتصل بيا قالى انه مضطر ينزل مصر ضرورى عشان يشوف حكايه الموبايل ده
امين / كان بعته مع اى حد بكام يعني الموبايل ده لكل الفيلم ده
مغاورى / المشكله ان دياب اكدلى ان شاهين ما استخدمش الفيزا عشان يشترى اى حاجه اونلاين من شهر و اكتر و ان الحاجه اللى اشتراها متسجل انه استلمها فعلا 
عباده / متسجله فين
مغاورى / انا براقب شاهين زى ضله عشان كميه سوء التفاهم اللى محوطاه من سنين عشان لو لا قدر الله مر باى موقف جديد اطلع دليل برائته اخزء بيه عين الطخين
عباده / و لقيت اى حاجه عليه
مغاورى / ابدا و مع كدا المواقف ما بتخلصش ما شاء الله عليه كرياتيف دايما بيلبس بره الصندوق لما فرج علينا الخلق
عباده يضحك
مغاورى / و الله حقك ... انا هتجنن
عباده / جرب تقرب منه يا مغاورى بدل ما انت مضيع طاقتك فى انك تراقبه كدا بتاذيه مش بتساعده
مغاورى / انا مش لاقى حل تانى جربت معاه كل الطرق
امين / طب مش هو قالك رايح مصر ... خلاص نستني نشوف هيروح فين فى مصر و هيكلم مين و هيجرا ايه
مغاورى / امال انا جيت ليه ما عشان مش قادر استنى و مش هعرف انام من التفكير قولت اجيلكوا من تعبى
عباده / بيتك و مطرحك ... ما تقلقش باذن الله خير
مغلورى / ما فيش اخبار عن الخواجه
عباده / يوووووووه ما تعدش ... استنى اناديهم يجيبولنا شاى نشرب و احنا بنحكى
...........................
فى النادى
جوزيف / انا قولت كل حاجه انتوا اللى مش عاوزين تصدقوا مش معنى ان فى بيزنيس تم بينا انه راجل شمال السوق ليه احكامه برده و لا ايه يا جابر
جابر / ليه و انت شوفتنى شغال فى التهريب
جوزيف / بلاش انا يا حبيبي عشان ما تزعلوش كلكوا
نجاه / تقصد ايه بقي بالكلام ده ... جابر
جابر / ما انتى عارفه اننا ساعات كتير جدا بنضطر نشترى سلاح متهرب عشان مش سهل نجيبه من السوق
جوزيف / الحقيقه كامله يا جابر من فضلك
جابر يبصله
جوزيف / عيله الزيني و الجارحى و ثرواتهم المهوله دى اساسها فى الاصل من التهريب خصوصا السلاح
جابر / مش حقيقي
جوزيف/ لا حقيقي و ابوك نفسه مات فى واحده من العمليات دى و ما اعتقدش انك كنت صغير اوى انك تكون مش فاهم حاجه زى دى
جابر / قولتلك مش حقيقي
نجاه / بيتهيالى ما ينفعش نكمل الكلام هنا ... خلونا نروح دلوقت و نتكلم بعدين
نجاه تبص تلاقى عمران و مهره راجعين تبص لجابر و جوزيف برجاء
مهره / السلام عليكم .. انا همشي بقي يا نجاه باذن الله على تليفون زى ما اتفقنا
نجاه / باذن الله
عمران / طب على الاقل اقعدى كلى معانا لقمه
مهره / مره تانيه عن اذنكوا
مهره تمشي عمران يجي يقعد جابر يمنعه
جابر / هنروح
عمران / مش هناكل حاجه طيب
نجاه / هنطلب دليفرى على ما نروح هيكون وصل يلا بينا
عمران / هو فى حاجه حصلت و لا ايه
نجاه / لما نروح يا عمران يلا
عمران يبصلهم بتوتر
جوزيف / مفيش حاجه يا ابنى هم اللى اوفر
نجاه تبص لجوزيف و تشد شنطتها و تمشي جابر يحصلها
نجاه / الكلام اللى قاله مش حقيقي بجد
جابر / ابوكى مش موجود يدافع عن نفسه و انا كنت صغير وقتها و بعدين هو اصلا هيعرف منين هو كان عنده كام سنه اكيد بيقول الكلام اللى اتحفظله يعني
نجاه / بس احنا ساعات فعلا
جابر / نجاه ... ابوكى اللى يرد مش احنا
نجاه تهز راسها و تمشي و الكل وراها
.....................
فى شقه عبد الهادى
عبد الهادى / انا ما قولتش لا قولت هستنى الوقت المناسب مش اكتر
الست / و محمود قال انه مرتب كل حاجه و لا يكونش خاطر المحروسه اهم عندك من تار اخوك
عبد الهادى / ما تدخليش مراتى فى الكلام ... ما تاخذينيش ياما بس ابنك ما كانش يتبكى عليه
الست / ابنى كان سيد الرجاله كلها انت فاهم و لا لا
عبد الهادى / مش هنكدب على روحنا انتى عارفه هو مات ليه
الست / عشان الحيوان اللى كانت عينه فى مراتك
عبد الهادى يقاطعها بصوت عالى و قهره
عبد الهادى/ عشان ما صدقتهاش ... عشان كانت بتشتكيلى من اخويا و ما بصدقهاش لحد ما اتجرا و كرا عليها اخويا ابن امى و ابويا ابنك ياما ابنك اللى ما فكرش فيا و هونت عليه
الست / هى اللى
عبد الهادى / ارحمونى بقي ارحمونى انا فى نار فى مش قادر اعيش و لا اتنفس انا تعبت
الست / انت بتعلى صوتك عليا يا عبده هى دى اخرتها
عبد الهادى/ انا عشان ارضيكي بختار بين انى اموت او اتسجن بختار اموت او اتسجن عشان دم واحد انا كنت ناوى اقتله اصلا
الست/ تقتل اخوك يا عبده !!
.............................