الكبيره ٢ بقلم / لولو_محمد

الحلقه ٨٢

(((((((( الكبيره ٢))))))))))
#لولو_محمد
الحلقه ٨٢
عمران يبتسم مهره تلف عشان تمشي تدوخ و تسند على الباب عمران يسندها و يقعدها على أقرب كرسي
مهره/ هو فى ايه
عمران / انتى كويسه ؟! مالك ؟! انتى ما اكلتيش برده
مهره / لا اكلت و اكلت كويس و الله بس مش فاهمه فجاه كدا الدنيا بتروح منى
عمران / طب ادخلى ارتاحى و بأذن الله بكره نروح نعمل شيك اب و نطمن عليكي عشان كدا كتير
مهره تهز راسها موافقه
مهره / انا اصلا اول مره يحصلى كدا انا عمرى ما دوخت
عمران / هتطلع حاجه بسيطه باذن الله ما تقلقيش
مهره تبص لعمران و تهز راسها
عمران / تمام انا واقف هنا جنبك لحد ما تقومى تدخلى اوضتك و لو مش جايلك نوم اقعدى فى السرير ذاكرى لحد ما تروحى فى النوم
مهره / هحاول... كل ما باجى اعملك حاجه بلخمك بيا و حاجه فى منتهى الله يعينك بصراحه
عمران / لا ما تقلقيش انتى بس المهم انك تبقي بخير و بعدين كتر خيرك برده افتكرتينى
مهره و عمران يبصوا لعمران و يبتسموا مختار يفتح باب اوضته
مختار/ هو فى حاجه و لا ايه ؟!  ايه اللى مصحيكوا دلوقت ؟!
.........................
فى المستشفي
عباده يروح اوضه واقف عليها عسكرى العسكرى يشوف عباده يوسع عباده يدخل و يقفل الباب العسكرى يرجع يقف مكانه و يتأكد ان ما حدش شايفه عباده يجر كرسي و يقعد جنب محمود نايم و ايده مربوطه بكلبش محمود يصحى على صوت جر الكرسي يبص يلاقي عباده قاعد جنبه
عباده/ جيت اخدك بكرامتك ما عجبكش فجبتك من غيرها
محمود / انت بتعمل معايا كدا ليه لمصلحه مين ده
عباده / بالظبط ... لمصلحه مين ده استفدت ايه بقي من العبط دا كله
محمود / انا كلمتك انا امى كانت فى المستشفي و لولا انى انا و ابويا على راسها كان زمانهم قتلوها زى عمتى
عباده / انا لحد دلوقت هادى و لو فاكر انك هتماطل معايا فالكاميرات مفصوله و العسكرى اللى بره حبيبي و الباشا تقل فى الاكل و نايم فى سابع نومه و انت عارف ديتك فليه؟؟ اخرج منها على رجلك بدل ما تحصل اخر واحد كدب عليا فى وشي... ابن عمك الله يرحمه
محمود / انتوا عاوزين تطبخوها عشان خاطر عيون صابر... يبلعها احنا مفيش حاجه فارقه معانا الا العيال و هناخدهم
عباده / عيال مين ..  دا انت بتخرج بالعيل بترجع من غيره عيال ايه اللى فارقين معاك... صحيح مش انا خليت الرجاله يدعبسوا وراك ... لا ما شاء الله الحظ لعبها معاك صح ... او لعبها بيك مش متأكد
محمود / انا تعبان يا كبير و مش قادر لو عاوز تسأل عن حاجه معينه قول عشان ارتاح
عباده / و الله انت اللى تاعب روحك ... اسمع يا ابن الناس احنا برده اهل و انا هبقي كريم معاك و أديك فرصه تحكيلى كل حاجه و هراعى ده فى عقابك اما بقي لو كملت فى الملاوعه... ربنا وحده اللى يعلم نهايتك هتبقي ازاى
محمود/ فى جميع الأحوال ربنا وحده اللى يعلم نهايتنا هتبقي ازاى
عباده / اللهم قوى ايمانك
محمود / انا ما عملتش حاجه و يمين بالله نسمه دى و لا فارقه معايا و لا ليا كيف فيها اصلا دى واحده كانت ماشيه مع واحد من المطاريد
عباده يقوم يقف على رأس السرير و يبص من الشباك محمود يبص له و هو بيكمل كلامه
محمود / و اتسببت فى موت جوزها و اخوه ... واحده زى دى ما استامنهاش على شرفى و بيتي و
عباده يمسك صابع ايد محمود اللى فى الكلبش و يكسره محمود يصرخ و ينزل بجسمه فى الارض و ايده متعلقه فى السرير عباده يضربه فى مناخيره تجيب دم محمود يمسك مناخيره بايده التانيه
عباده / بديك فرصه تنقذ نفسك بتضيعها فى الخوض فى الأعراض يا واطى ... انطق قول الحقيقه ايه اللى نزلكوا المحطه هناك و الفلوس دى مين اللى دلك عليها انطق
محمود / انتوا ايه مش شايفين غير نفسكوا بس انتوا صح و كلنا غلط
عباده يكسر صابع تانى محمود يصرخ و يحاول يقوم عباده يدوس على رجله برجله و يشد شعره يجبره يبص له
عباده / فاضل تلاته و فى ايد تانيه و معاك الليل بطوله بحاجات جديده هتبهرك
محمود / بنتك فين يا كبير هاه بنتك فين سايبها و بتجرى ورا نسمه ليه هاه مش خايف يخطفوها تانى
عباده يبص لمحمود و يبتسم و يطلع من جيبه قصافه صغيره يفتح من الجنب سكينه صغيره و محمود متابعه يبلع ريقه عباده ينزل على ركبته فوق ركبه محمود
عباده / الاتنين بناتى و اللى يهوب من واحده فيهم اجيب خبره
عباده يغرز السكينه فى رجل محمود و يلفها و محمود بيصرخ يحاول يضربه بالرجل التانيه عباده يشد القصافه من رجله يغرزها فى رجله التانيه محمود يصرخ العسكرى يفتح الباب
العسكرى / بالله عليك يا كبير ما تودنيش فى داهيه كدا كتير
عباده / حقك عليا
عباده يشد القصافه و يقفلها و يحطها فى كيسه و يحطها فى جيبه
عباده / فكر فى كلامى عشان لما هاجى المره الجايه مش هتخلص بخربوشين
عباده يمشي و العسكرى يساعد محمود ينام فى السرير تانى دكتور و ممرضه يدخلوا
محمود / انا هوديكوا كلكوا فى داهيه هوديكوا فى داهيه
الممرضه تعبى حقنه بينج
الدكتور / ما لهاش لزمه محمود الجزار عصب و هيستحمل الخياطه و العلاج من غير بينج
محمود يبص للعسكري العسكرى يطلع بره الدكتور يرش كحول على جروح محمود و محمود يصرخ
الدكتور / اجمد عشان تعرف تخرج من هنا تودينا فى داهيه
محمود / ما تقلقش هخرج ... هخرج
الدكتور يكمل شغل
...............................
على سطح بيت نجاه
نجاه واقفه بتتفرج على الشروق جابر يدخل
جابر / الواحد كل ما يجي مصر قلبه بيتقطع على مساجد صلاه الفجر
نجاه / كان فاضي خالص !!!
جابر / احنا و كام واحد يتعدوا على الصوابع مش زى عندنا فى البلد الناس فوق بعض و بيتخانقوا على الصفوف الأولى حاجه تحزن و المفروض ربنا يرزقنا و ينصرنا ازاى و احنا نايمين فى سرايرنا كدا
نجاه / ربنا يهدى الجميع
جابر / امين ... صليتي
نجاه / ايوه ... جعان انزل اعملك لقمه
جابر / ايه لحقت !! ما انا واكل قبل ما اروح الصلاه ... انتى كويسه ؟
نجاه / قلقانه على مهره شويه داخت تانى امبارح و عمى حجز لها شيك اب عشان يطمن عليها
جابر / كويس ... حلو جدا اعملى معاها
نجاه تبص له
جابر / ايه نطمن عليكي انتى برده لسه تعبانه
نجاه / انا زى الفل يا جابر دا كان مجرد إرهاق مش اكتر
جابر / تمام
نجاه / تفتكر ايه اللى بيحصل فى العالم دلوقت
جابر / العالم !!!
نجاه / احنا اتربينا فى البلد مقفوله علينا طلع فى عالم واسع وراها
جابر / عالم متوحش ما يعرفش ربنا يا نجاه
نجاه / بيتغير  لو حاولنا نغيره
جابر يتنهد
جابر / هتغيرى العالم كله لوحدك يعني ؟!
نجاه / هحاول
جابر / مش خايفه العالم يغيرك
نجاه تبص لجابر بابتسامه طفوليه
نجاه / تفتكر هيقدر عليا
جابر يبتسم
نجاه / انا عارفه ان الموضوع مش سهل بس مش مستحيل يعني ... مش هنبقي يوتوبيا بس
جابر / انتى عارفه ان القيامه هتقوم على شرار الخلق صح كل فتره هتبقي اصعب من اللى قبلها و كل جيل هيعانى اكتر من اللى قبله مهما حاولنا مش هنطلع لقدام هنفضل نرجع لورا دا وعد ربنا
نجاه / نبطل نحاول يعني
جابر/ ما قولتش كدا ... ان الله لا يغير ما بقوم حتى يغيروا ما بأنفسهم ... لازم هم يبقوا عاوزين يتغيروا ... و الأهم يا نجاه ان فى زمن الفتن لازم الواحد يقفل عليه بابه
نجاه / مش انت اللى تقول كدا ... دا كلام واحد جبان و متخاذل ما يطلعش منك
جابر / احنا ما بنروحش للحرب برجلينا يا نجاه ... احنا بندافع عن نفسنا لو حد حاول ياذينا لكن ما بنرميش روحنا للتهلكه
نجاه / انا نازله تحت
نجاه تسيب جابر و تمشي يسند على السور و يتنهد
………………..
فى معمل التحاليل
مروان بيستلم تقرير
مروان / انت هتسوق فيها
الفنى / يا مروان بيه انا رقبتى ليك بس انت الفتره اللى فاتت العين كانت عليك جامد اوى و كذا حد جه فعلا و سأل عنك فعشان كدا بقولك
مروان / تقوم تزودها تلات أضعاف
الفنى / مش ليا اقسم بالله بقولك العنين اتفتحت علينا و فى ابقاق لازم تنسد و الا بيتي هيتخرب و مش هقدر  اخدمك تانى
مروان / ماشي بس تعمل حسابك ان دى اخر مره و هشوف غيرك
الفنى / يا باشا انا تحت امرك فى اى وقت و حضرتك عارف انى ما اتاخرش عنك أبدا بس و الله غصب عنى المرادى
مروان / مين اللى سأل عنى
الفنى / ما اعرفهمش و بصراحه ما اعتقدش انهم تبع السيد الوالد هم كان لهجتهم صعيدي كدا
مروان يهز راسه و يطلع فلوس و يديها للفنى
الفنى / يدوم العز سعاده البيه
مروان ياخد التقرير و يطلع بره يتصل بصاحبه
مروان / انا جبت التحاليل
........................
فى المستشفي
مهره / دول صفونى يا بنتى ايه كل العينات دى
مختار / بطلى دلع يا مهره جسمك فيه ٥ لتر دم خدنا ٢٠ سم بس
نجاه/ المهم هنستلم التحاليل امتى
مختار / بكره باذن الله المعمل هيبعت لى التحاليل على الواتس و انا هبعتها للدكتوره تشوف ان كان محتاجين نروح و لا هتبعت العلاج دايركت على طول
نجاه / طب الدنيا سهله اهو مالك بقي مبوزه ليه كدا
مهره / مفيش و الله مفيش حاجه
مختار/ تحبى نروح نغير جو و ناكل حاجه حلوه فى اى حته
مهره / لو ينفع ياريت بجد
مختار / ينفع طبعا دا كفايا تؤمري يا نهار ابيض احنا عندنا كام مهره
مهره تبتسم و تمشي مع نجاه و مختار وراهم تليفونه يرن
مختار / زينه الشباب فينك
عمران / فى الكليه خلصت و مروح انتوا فين ؟ اجى لكم
مختار / احنا خلصنا المستشفي و هنشوف مكان كدا نقعد فيه
عمران/ اجي لكم يعني و لا اروح
مختار / براحتك على العموم لما نقعد فى مكان هبعت لك اللوكيشن
عمران / فى مكان حلو مجربه هبعتلك اللوكيشن انا و نتقابل هناك
مختار / عز الطلب احسن ما اقعد اللف بيهم ندور على مكان  .. يلا فى حفظ الله سلام
مختار يقفل و يطلع بره ممرضه بتابعه تروح تقعد على جهاز الكومبيوتر و تركب فلاشه فى مدخل اليو اس بى ممرضه تانيه تدخل البنت تسحب الفلاشه بسرعه و تبتسم للممرضه و تمشي الممرضه تبص على المكان و تقعد
.....................
فى شقه جوزيف
جوزيف قاعد على اللابتوب و امايا قاعده جنبه بتحط مونوكير لرجليها
جوزيف / دخلت ... كدا اول ما التحاليل تطلع هتوصلنى انا اول واحد
امايا / انت مهتم بالبت دى ليه
جوزيف / غريبه مع انك انتى شخصيا لازم تهتمي
امايا / و اهتم ليه ما كفايا كل دول مهتمين
جوزيف يبص لها و يقفل اللاب تبص له
امايا/ فى الوقت اللى انت حرفيا ما بتعملش فيه اى حاجه و قاعد على الكنبه اللى بعت رجالته الجبل يقتلوا نجاه بيشتغل و يتحرك ... أنا ... بشتغل و بتحرك ... انت بقي فاكر ان المجلس هيفضل حاميك قد ايه
جوزيف/ لو فاكره ان المجلس بيحمينا عشان سواد عنينا تبقي غلطانه هو محتاج لنا
امايا / يبقي لازم توريه انك لسه فى منك فايده
جوزيف / فى الوقت المناسب ما تقلقيش
امايا / براحتك
امايا تقفل علبه المونوكير و تفرد رجليها على الترابيزه و تلعب فى الموبايل
جوزيف / الدرجه دى مش حلوه
جوزيف يقوم امايا تبص و تحرك صوابع رجليها
امايا / ليه دى جميله اوى ... غلس
....................
فى القسم
عباده / يا باشا انت بتاع قانون و فاهم شغلك كويس لا فى تسجيل كاميره و لا فى شهود و انا عندى بدل الشاهد عشره انا كنت فين و لو طلبت من شركه الاتصالات تجيب لك خط سيرى و لو راجعت كاميرات محلات البلد و شوفت خط سيرى برده قدامك مليون طريقه تثبت بيها ان الواد ده كداب و بردك سايب كل دول و جاى تحقق معايا انا !! يا باشا احنا مش صغيرين
احمد / طبعا يا كبير بس برده انا مش ابن امبارح و عارف انك لو عاوز تعمل حاجه هتعملها و زى ما انا راجل قانون حضرتك كمان على قد علمى راجل قانون و حاسبها بالورقه و القلم و لو عاوز هتعمل
عباده / يا باشا القانون ما بيعرفش الكلام ده القانون براهين ... و ادله
احمد / معاك حق طبعا
عباده / اهوه شوفت ... بص يا باشا مش هخبى عليك انا النهرده ورايا شويه مشاور مهمه و فيها لقمه اكل عيش حلوه فلو يعني مفيهاش اساءه ادب و لا تتقيل على جنابك لو مش محتاجنى فى حاجه استأذن اشوف اكل عيشي
احمد / طبعا يا كبير
عباده / خليك فاكر انت اللى سبت القاعده الحلوه امبارح و روحت بدرى كان زمانك دلوقت انت بنفسك شاهد انى ما عملتش حاجه
احمد يبتسم عباده يقوم
عباده / بخصوص الحج عويس صحيح
........................
فى اوضه مختار
مختار توصله رساله واتس يفتحها يلاقيها ملف البى دى اف بتاع نتيجه التحاليل يعمله فورورد لعبد الله ثوانى و تليفونه يرن
مختار / السلام عليكم
عبد الله / و عليكم السلام ... بصيت على التحاليل ؟
مختار / لا بعتهالك على طول هو انا هفهم فيها ايه يعني
عبد الله / طب ... مش عارف اقولهالك ازاى بس ... مهره حامل
صمت
مختار / عنده قد ايه ؟ حامل فى الكام اقصد
عبد الله / اكيد مش هيبان فى التحليل يعني ... بس هى حامل
مختار / انت متأكد يا عبد الله ؟! طب مش يمكن فى غلطه فى التحاليل دى
عبد الله / ممكن طبعا الغلط وارد ممكن تكون النتايج اتبدلت و ممكن تكون الكيت اللى استخدموها بايظه كل شئ ممكن
مختار / اقدر اتأكد ازاى قبل ما اجيب للبت دى ازمه قلبيه لو جبت من الصيدليه اختبار و عملته فى البيت هيديني النتيجه و اطمن صح
عبد الله / ايوه بس الأفضل تعمله من الدم هتسحب عينه دم و تقفل السرنجه و تسيبها مقلوبه لحد ما تفصل و بعدين تاخد العينه من البلازما المفصوله فوق و هى دى اللى هتستخدمها على الكيت و حاول تجرب فى اكتر من كيت عشان لو فيهم واحده بايظه تطمن
مختار / تمام لو فى حاجه ما عرفتش اعملها هكلمك
عبد الله / تمام
مختار/ عبد الله عبد الله
عبد الله / معاك نعم
مختار / ما تقولش حاجه لجنس مخلوق
عبد الله / اكيد طبعا
مختار يقفل الخط و يطلع بره الكل نايم يروح اوضه عمران و يفتح الباب يلاقيه قاعد بيزاكر
عمران / خير يا بابا فى حاجه ؟
مختار يبص له و ساكت
مختار / بطمن عليك بس ... انا نازل اجيب حاجه بسرعه و راجع مش ناقصك اى حاجه ؟
عمران / طب ارتاح حضرتك و انزل انا عادى خير عاوز ايه
مختار / لا انا اللى هنزل ارتاح انت
عمران يهز راسه مختار يقفل الباب
مختار / اللهم انى لا أسألك رد القضاء و لكنى أسألك اللطف فيه... ابتلائك للبت دى شديد ... شديد اوى عليها يا رب الستر من عندك يا رب
مختار يفتح باب الشقه و ينزل
......................
فى مضيفه الجوارحه 
دياب / نقط الدخول و الخروج معروفه كلها بيوت اشترتها الشركه الامريكيه
شاهين / اللى كلنا عارفين انها تبع اللى ما يتسموش جم و اتملكوا وسطينا و ما حدش فينا قدر يفتح بقه بحرف ... و الله عيب علينا
راجل ١ / العيب على اللى باع أرضه و بيته و ساب بلده و هرب
مغاورى / فات أوانه الكلام ده هنعمل ايه
شاهين / لازم ندخل البيوت دى و نعرف بيدخلوا و يخرجوا منها ازاى
مغاورى / ما نقدرش ندخل بيوت الناس من غير اذن دى مش بيوت مهجوره دى فيها ناس و ليهم حرمه
شاهين/ نقطع المايه كام ساعه و نبعت اتنين سباكين يكشفوا على الدنيا و فى المستغطى يشيكوا على الوضع
مغاورى يبص للرجاله
شاهين / لازم نتحرك بسرعه
دياب / هم ليه كشفوا لينا المداخل و المخارج دى
شاهين / لكل جواد كبوه
دياب / استفادوا ايه او كانوا بيحاولوا يعملوا ايه
شاهين / نسيب بقي الموضوع الاصلي و نقعد نتسحل فى اسأله ايجابتها عندهم هم بس ... نمسكهم و بعدين نقرر اللى جابوهم
راجل ٢ / ما احنا ماسكين منهم و شايلينهم على روسنا اكل و شرب و خدمه خمس نجوم و لحد النهرده لا حد حقق معاهم و لا خد منهم حرف و ادى دقنى لو اساسا نطقوا بكلمه
منصور / حريم بقي
راجل ٢ / و اخرتها هنطاطى يعني عشان حريم انا شايف ان شاهين معاه حق ندخل البيوت دى بالزوق و لا بالعافيه المهم نجيب ناهيه للانجاس دول
دياب / الظابط احمد مش هيسكت لو ضايقناهم
شاهين / جرب فكرتى و هم اللى هيتصلوا بينا يطلبوا مساعدتنا و هم اللى هيدخلونا بيوتهم كمان
مغاورى / اتوكل على الله و جرب و شوف الدنيا هترسي على ايه
شاهين / تمام يابا ... عن اذنكوا
شاهين يقوم و دياب متابعه
راجل ١ / انا شايف ان شاهين اللهم بارك فاق لروحه و بقي حاجه تانيه يا ابو شاهين
مغاورى / ربنا يهدى الجميع
راجل ١ / ايوه بس انت لازم تشجعه و تكافاه عشان يفهم ان تغيره ده و مجهوده مش اى كلام و يستمر و يشتغل على نفسه اكتر و اكتر
مغاورى / و الله على قد ما بقدر
دياب / لو مش هتعوزوا حاجه منى هستاذن انا اطلع ابص على الجماعه شويه
مغاورى / اتفضل يا ابنى الله يعينك اتفضل
دياب يقوم و يطلع فوق يلاقي منصور واقف ساند على الترابزين بيبص على الهول
دياب / خير ما نزلتش ليه
منصور / تعال عاوزك
منصور يدخل اوضته دياب يقف على الباب
منصور / تعال يا عم ياسمينا عند امك فى الاوضه تعال عاوزك
دياب يدخل ورا منصور منصور يقفل الباب
دياب/ خير قلقتنى
منصور يدى لدياب جهاز تشويش
منصور / تالت جهاز يتحرق ... عندك تفسير ؟
دياب يبص على الجهاز
دياب / سليم ما فيهوش حاجه
منصور / افتحه السلوك جواه سايحه انا ما فتحتش ده فتحت الاتنين اللى قبليه قولت فى الاول يمكن التيار ما كانش مستقره ركبت استايبوليزر و برده نفس النتيجه ... و بعدين اشمعن جهاز التشويش بس اللى بيبوظ عندى و بيبوظ عندى انا بس 
دياب / غريبه اوى دى فعلا ..  بكره الصبح تخلى الجماعه يجوا يكشفولك على كل الأسلاك و الاوضه و نشوف فيها ايه
منصور / و انا مستنيهم يعني مفيش غلطه مفيش سبب
دياب / طب هديك بتاعى جربه النهرده و تابعه شوف ايه اللى هيحصل
منصور / مش هيحصل اى حاجه و انا متابعه جربتها اول ما اطمن و اقول بسم الله الجهاز هيطفى و هطق ساعتها
دياب/ ايه يعنى لبن بيغلى مثلا اول ما تشيل عينك من عليه هيفور يعني و لا ايه
منصور / هو كدا بالظبط اقسم بالله احسن تشبيه... يا ابنى انا طالع عين اهلى هنا افهم بقي
دياب يفكر شويه
دياب / لا البرانويا مش هتوصل للدرجادى  ... بقولك ايه جرب تستأذن امك تيجي تبات مكانكوا النهرده و روح اوضتها اتكررت يبقي العيب فى كهربه الاوضه
منصور/ اشمعن الجهاز ده برده
دياب / هنعرف ... اهدى بس و عدى الليله و هنعرف
منصور يبص الناحيه التانيه
دياب / الجهاز شغال فى اوضه امك بقاله سنه ما اشتكاش و جربه و لو مقلق خد جهازى النهرده معاك احتياطي و باذن الله بكره الصبح هبعتلك الجماعه يقلبوا الاوضه فوقانى تحتانى لحد ما نعرف سبب اللى بيحصل ده
منصور يهز راسه
منصور / اخبار الجماعه تحت ايه
دياب / ما تشغلش بالك ... هروح اجيب لك الجهاز و انت روح شوف امك و عدى الليله
منصور / هقول لها ايه اصلا يا دياب
دياب/ ما تقولش قولها تسلفك جهازها و تعال اوضتى انا هبدل معاك انا الليله وفاء مش هتتكلم و اهو نبص انا و هى على الاوضه يمكن نوصل للسبب و ما نحتاجش ندخل حد غريب فى الحكايه
منصور / انا هطق
دياب / متكبرش الموضوع بقي مالك كدا اهدى
منصور يتنهد و يهز راسه
.........................
فى اوضه مهره
مختار بيسحب عينه دم من مهره قاعده على السرير بالاسدال و نجاه واقفه ورا مختار و هو قاعد على ركبه على الارض
نجاه / طب فى ايه طيب نفهم يا عمى
مختار / مفيش حاجه يا نجاه اهدى انتى بس عنى دلوقت
مهره / هى نتيجه التحاليل طلعت
مختار يبص لمهره و ما يعرفش يرد
مهره / تمام شوف حضرتك عاوز ايه
مختار يديها كبايه صغيره
مختار / محتاج عينه بول هنا ... و سبيها فى الحمام لو سمحتى
نجاه / هو فى ايه بجد
مختار يزعق
مختار / ما لكيش دعوه انتى الله !!
نجاه تسيب الاوضه و تمشي تلاقي جابر و عمران خارجين من اوضهم تفتح باب الشقه جابر يجرى يقفل الباب و يمنعها
جابر / اهدى ما تسبيهاش
نجاه / ما انا لو افهم
عمران / هو فى ايه
جابر / دلوقت نعرف اهدوا دلوقت و خلينا بعيد لحد ما يبان
نجاه / انت بتجيب البرود ده منين
جابر / تسلمى
مهره تطلع من الاوضه فى ايدها الكبايه و تروح الحمام و تقفل عليها الباب مختار يطلع وراها يقلب الحقنه و يحطها معكوسه فى كبايه ازاز و الكل عينه على الحقنه و الدم اللى فيها
عمران/ هو فى حاجه يا بابا
مختار / كل واحد يدخل اوضته و يقفل عليه الباب
نجاه / هو احنا صغيرين اوى كدا يا عمى بتحبسنا فى اوضنا
مختار يبص لنجاه و يبص فى الارض
عمران / هى نتيجه التحاليل ظهرت ؟ مش خدوا منها دم هناك و هيعملوا شيك اب كامل ايه لزمته بقي الدم ده تانى
جابر / اهدوا يا جدعان مش شايفينه عامل ازاى ... واضح ان الموضوع كبير
مختار يبص لجابر
مختار / كبايه شاى يا نجاه بالله عليكي
نجاه تهز راسها و تروح المطبخ عمران يجرى يقعد جنب مختار
عمران / طمنى ... فى ايه ؟ مالها ؟
مختار / لما اتأكد هقولك كل حاجه ... بس اتأكد الاول
عمران يبص لجابر جابر يهز راسه عمران يتعدل فى قعدته اول ما مهره تفتح الباب مختار يشد الكبايه اللى فيها الحقنه و يدخل و يقفل عليه باب الحمام
مهره / انا كدا بدات اقلق هو قال ليكوا حاجه
عمران / ما قالش اى حاجه ... اقعدى ارتاحى
نجاه تطلع شايله كبايه الشاى عمران يشاور لها على الحمام تبص على الحمام مقفول ترجع تبص  لهم
……………
فى اوضه شاهين
وفاء نايمه يبص عليها و يروح يفتح الخزنه و يطلع من جيبه مايكروروبوت يبوسه و يحطه فى الخزنه و يقفلها تانى و يروح يلبس العبايه و يطلع بره يتمشي ينزل السلم يحس بحركه فى المطبخ يروح يبص يلاقي ياسمينا بتعمل يانسون يخبط على الباب
شاهين / السلام عليكم
ياسمينا / و عليكم السلام ثوانى و هخلص لو محتاج حاجه
شاهين / لا مش محتاج تسلمى انا سمعت حس فقولت اطمن ... خير السعادى
ياسمينا / مفيش حاجه ما تشغلش بالك انت
شاهين / هو انتى العين فى اوضتك باظت و لا ايه ..  لو ناقصكوا حاجه قولى عادى ساعه زمن و تبقي عندك
ياسمينا / تسلم مش ناقصنا حاجه كتر خيرك و اكيد لو ناقصنا حاجه منصور مش هيتاخر يعني
شاهين / الله يعين الراجل طول الليل و النهار ممقق عينه فى الكومبيوتر و ايام كتير بيبات بره فى الشركه و بيسيبك لوحدك ... انا بتكلم يعني لو كدا
ياسمينا / الله يعينه
ياسمينا تصب الكبايه و تيجي تطلع بره المطبخ شاهين سادد الباب
شاهين / انا عارف ان حصل بينا اكتر من سوء تفاهم بس انا مش وحش و لا المفروض تكرهيني او تتجنبيني اهو على الاقل اللى ما تحتاجش النهرده لخلقته
ياسمينا / انا لا بكرهك و لا تعاملى معاك عمره هيكون مصلحه اصل ما تاخذنيش البيت الطويل العريض ده ما وقفش عليك عشان اتحوج لك فالطبيعى اى تعامل بينا هيبقي تعامل اخت كبيره مع اخوها الصغير ..  عن اذنك عشان الكبايه سخنه على ايدى
شاهين / سلامه ايدك ... اتفضلى
شاهين يوسع ياسمينا تعدى و تطلع بالكبايه و هو عينه علي كل حركه
شاهين / مرض اقسم بالله مرض و لا له علاج و لا دوا ... مرض هيجيب اجلى و اجل اللى جابونى
شاهين يتنهد و يطلع بره السرايا يقف فى الجنينه ياخد نفس عميق
………………………..
فى الحمام عند مختار
مختار راصص قدامه سطر فيه اكتر من عشرين اختبار انواع مختلفه كلهم منورين بوزيتيف و هو ساند على الحوض بيعانى انه يتنفس طبيعي الباب يخبط
عمران / بابا انت كويس ... قلقتنا كلنا فى ايه
مختار يبص على الباب و يبص على التحاليل عمران يخبط تانى مختار يلم كل التحاليل فى كيس و يطلع يبص لعمران
عمران / فى ايه يابا وقعت قلوبنا
مختار يعديه و يطلع مهره و نجاه و جابر اول ما يشوفوه يقفوا
مختار / خد عمران و ادخلوا جوه او شوفوا ليكوا حاجه تعملوها فوق و لا تحت
عمران و جابر يبصوا لبعض
جابر / حاضر يا خالى تعال يا عمران
عمران / لا مش رايح فى حته عاوز افهم فى ايه
جابر / تعال يا عمران يا خبر بفلوس ساعه زمن و يبقي ببلاش
مهره / هو فى ايه يا عمو وقعت قلبي فى ايه
مختار / انا مش عارف فى ايه ... اقسم بالله ما عارف و لا فاهم و لا قادر استوعب حتى
نجاه / طب ما تقول و تشاركنا بدل ما كل واحد سارح فى خياله فى مصيبه اكبر من اللى قبلها
مختار / بصي يا بنتى اى حاجه هتقوليها ليكى عندى عذرها مش هلومك فى حاجه... كل اللى مريتي بيه الفتره اللى فاتت انا عاذرك فيه بس صارحيني
مهره / بايه ... انا مش مخبيه عليكوا اى حاجه اصلا
مختار يتنهد و يمد ايده فى الكيسه و يطلع تيست جابر و عمران يتفاجئوا نجاه تمد ايدها و تاخده تبص فيه
نجاه / هو ده اختبار حمل؟!!! دا منور شارطتين يعني ايه
مختار / يعني حامل
مهره / حامل ايه ؟! حامل ازاى يعني ... انا بنت انا بقولك انا بنت انا ما احملش هحمل ازاى اصلا باللاسيلكى انت بتقول ايه البتاع ده اكيد بايظ مستحيل اصلا مستحيل
مختار يفضى الكيس على الترابيزه نجاه توطى بسرعه تقلب فيهم كلهم و مهره مصدومه تصرخ فيهم
مهره / بقولك انا بنت ما حصلش اقسم بالله ما حصل انت بتقول ايه انتوا بتبصولى كدا ليه انا بنت ... اقسم بالله بنت اقسم بالله ما حد لمسنى و لا اعرف حد اصلا اقسم بالله كدب... ما تبصوليش كدا ما حدش يبص لى كدا انا بنت 
مختار / اهدى طيب و حاولى
مهره / اهدى ايه اهدى ايه و انت جاى تتهمني فى شرفى ... دا ده اللى باقيلى دا ده الحاجه الوحيده اللى حيلتى اصلا... انت ما تبصليش كدا ... انا مفيش مخلوق لمسنى
جابر / يمكن و انتى مش فى وعيك ... حد يعني
مهره / انت تخرس خالص تخرس و ما تفتحش بقك انا أشرف منكوا كلكوا انا
نجاه / اهدى يا مهره ما حدش شكك فيكي
مهره تشحور كل التيستات اللى على الترابيزه و تصرخ
مهره / امال دول ايه... دول ايه ؟!!
مختار / ده امر واقع و لازم تساعدينا نعرف مين اللى عمل كدا
مهره / هو ايه اللى امر واقع ... بقولك انا بنت انا ما اتلمستش... انا بنت انتوا ايه ما بتفهموش ... بنت اقسم بالله بنت
مختار / يعني انتى مش فاكره اى حاجه خالص مش شكه فى حد مفيش موقف حتى حسيتي ان هدومك مش مظبوطه حد بيحط ايده عليكي حلم حتى مفيش اى حاجه خالص
مهره تبص لمختار بقهره و الدموع تنزل من عنيها تقع على الكنبه و تفضل تبص لهم نجاه تروح تمسك ايدها و تاخدها فى حضنها مختار يقعد فى أقرب كرسي
مختار / لما عمران لحقك فى السخنه كان فى شباب واخدينك على اوضتهم
عمران / ما حصلش اى حاجه ما حدش فيهم لحق يلمسها حتى
مختار / موقف تانى ؟! حد تانى ؟!
جابر / ما شيلناش عينا من عليها لحظه كنا عرفنا و ادخلنا
مختار / ساعديني يا بنتى افتكرى اى حاجه اى حاجه
مهره / اقسم بالله انا بنت
نجاه تاخد مهره فى حضنها و تطبطب عليها مختار يبص لعمران و جابر و يمسح عنيه
نجاه / هو مفيش اى احتمال ان التيستات دى تكون غلط .. نروح نكشف طيب نتأكد
مختار / مش عارف اقولك ايه ... و لا اقولهالك ازاى قوموا خشوا جوه ارتاحوا قوموا قوموا
مهره / اقوم اروح فين ... انت بتتكلم عادى كدا ازاى اصلا ... انت مستوعب انت قولت لى ايه مستوعب انت بتتهمنى بايه... راحه ايه ؟! راحه ايه اللى بتتكلم عنها ... انتوا مستوعبين اللى ... انا حياتى و سمعتى و مستقبلى ادمروا و انا كنت بحاول لسه ألم نفسي و اقول مش مشكله يعني ابدء من الصفر عادى ما ... انا ... انتوا ... ده مش بجد على فكره ... كل ده مش بجد ... انا فهمت ... ايوه انا ركزت دلوقت ... دا مش حقيقي ... كل ده مش حقيقي ... انا بحلم انتوا مش بجد ... كل ده مش بجد ..  دا ده دا كابوس ده انا ... انا مش حقيقي ... دا ما حصلش ... مش بيحصل لا  .. مش بيحصل ... انا هفوق دلوقت اهو انا هصحى هصحى و مفيش الكلام ده مفيش الحاجات دى و مفيش الكلام ده مفيش
نجاه / مهره
مهره تبص لنجاه الاتنين دموعهم مغرقه وشهم
مهره / انتى مصدقانى صح
نجاه تهز راسها
مختار/ كلنا مصدقينك بس دول عشرين تيست و كلهم بيقولوا حامل
مهره تقف و تفضل تصرخ
مهره / كدب كدب كلهم غلط كلهم كدب انت ما بتفهمش حاجه انت مش دكتور انت عملتها غلط انت بتقول غلط انا بنت انت فاهم بنت غصب عنك و عنكوا كلكوا انا بنت انا شريفه انا بنت فاهم و لا لا انا بنت
مهره تدوخ و تقع الكل يجرى عليها و مختار يشيلها يدخلها اوضتها يحطها على سريرها و نجاه تجرى تجيب كبايه مايه و تحاول تفوقها
نجاه / مهره مهره ... اعمل حاجه يا عمى حد يطلب الاسعاف ... مهره حبيبتي مهره
...........................