الكبيره ٢ بقلم / لولو_محمد

الحلقه ٦٦

(((((( الكبيره ٢))))))
الحلقه ٦٦
#لولو_محمد
ام عبده ماشيه تشوف عربيه رجاله صابر و عربيه رجاله الكبير الاتنين واقفين متابعين البيت تروح تخبط على شباك عربيه رجاله صابر راجل يفتح الباب و ينزل
الراجل / اؤمرى يا ست الكل اى خدمه
ام عبده/ ربنا ما يحوجنا ... فهمنى انت واقف كدا ليه
الراجل / احنا فى ملك الحكومه يا حجه لا انا واقف فى ارضك و لا تحت بيتك خير مالك
ام عبده / و هيجي منين الخير و انتوا لابدين لينا كدا ايه ما عادش فى فى البيت غير الولايه و العيال ناويين تخلصوا على مين تانى يا رجاله صابر القط
الراجل / لا حول و لا قوه الا بالله ... احنا جينا جنبك و لا كلمناكى يا حجه لزمته ايه الكلام ده ما يصحش كدا
ام عبده / اقسم بالله لو ما لميتوا بعضيكوا و غورتوا من هنا لاصوت و ألم عليكوا الخلق
الراجل / صوتى يا حجه و لمى الخلق و اطلبى الحكومه يا حجه لو حكمت لا انا و لا الرجاله دى هنتعتع من هنا و ان حصل و الحكومه جت و لا حتى الكبير بذاته جه مشانا مسافه الطريق و هيجي غيرنا و بعدين هنروح بعيد ليه ما رجاله الكبير قاعدين فى العربيه هناك اهم روحى استنجدى بيهم خليهم يجوا يمشونا
ام عبده/ دا انت مش فارق معاك حد و لا ليك كبير بقي
الراجل/ ليا و كبيرى هو اللى موقفنى هنا لو عندك مشكله معاه حلوها بعيد عنى
ام عبده / كدا ... طب اشرب بقي
ام عبده تروح تدخل البيت الراجل يتنهد و يركب تانى و يبص على العربيه التانيه فيهم واحد بيتكلم فى الفون
..........................
فى اوضه نجاه
نجاه / و الله عارفه انهم اهلك بس لانهم اهلك المفروض انك تكونى عرفاهم من سنين و عارفه طبعهم
مهره / ما انا كنت عايشه فى حالى هم اللى خدونى من عيشتى و عشمونى
نجاه / و بعدين انتى مش شوفتى الفيديو اللى رامى بيقول فيه ان مروان كان كاريه عليكي و قال اسم الديلر اللى بيتعامل معاه و راحوله أكد فعلا ان مروان مدمن بتكلميه ليه بقي هيقولك ايه يعني
مهره / يعني اولع فى نفسي يعني
نجاه / و مش حرام عليكي نفسك يعني انتى ليه موقفه حياتك عليهم انتى مستنيه منهم ايه اصلا قدمولك ايه زمان عشان تستنى منهم حاجه دلوقت
مهره / ما اعرفش ما اعرفش
نجاه / بصي البلد هنا جنه و مفتوحه للكل و فيها فرص شغل لاى حد و فى اى مجال و سوقها شغال الله اكبر انتى بس قولى بسم الله و ان كان على السكن سهله مش عاوزه تقعدى معايا و زهقتى منى هنشوفلك بدل الشقه عشره و فى احسن حتت فيكى يا بلد و هروح و اجى عليكي ايه رايك
مهره / ما انا عندى بيتي فى مصر
نجاه / براحتك بس ... انا بحبك و عوزاكى جنبى
مهره/ و انا كمان و الله يا نجاه بحبك بس
نجاه / بصي فكيها كدا عشان احلام كمان مش فى المود خالص خلينا نروح نفك معاها كدا و نعدى يومين الفرح دول على خير و بعدين اللى انتى عوزاه هيكون حتى لو هرجع اقعد معاكى الفتره دى لحد ما تتخرجى و نشوف هنعمل ايه
مهره تهز راسها
نجاه / ربنا يبارك فى عقلك يا بنتى و الله و يهديكي كدا و يروق بالك ايوه كدا بقي فكيها
............................
فى السيرك
شاهين قاعد جنبه وفاء بتصور العرض و مبسوطه اوى و شاهين عنيه فى كل حته على المداخل و المخارج و فى عرض اكروبات على ترامبولين كبيره فى الارض و حبال رايحه جايه و بنات بتطير فى كل حته و بعدين كلهم ينزلوا فى نص العرض و بنت تاخد مايك و تتكلم
البنت / نورتونا
الكل يسقف و يصفر
وفاء/ دى بتتكلم عربى يا شاهين
البنت / مبسوطين
الكل يهلل
البنت / دلوقت معاد فقره الساحر
النور يطفى و يشتغل كشاف واحد بس على البنت
البنت / لو حد بيخاف يروح عشان من واجبى اقول ان الفقره الجايه خطيره جدا جدا جدا و محتاجه تركيز عالي جدا جدا جدا ... جاهزين
الكل يسقف و يهلل
البنت/ بس الفقره دى بتحتاج متطوع من الجمهور و عشان ما حدش يقول اننا منقينه هتختار تلت أطفال عشوائي من بينكوا و الأطفال دول كل واحد فيهم هيلف العجله دى مره
كشاف يشتغل على عجله كبيره عليها أرقام من صفر لتسعه فى تلت صفوف من الدواير
البنت / كل طفل منهم هيلف بكره من دول هيدينا رقم مكون من تلت ارقام هو فى الحقيقه رقم واحد من الكراسي اللى انتوا قاعدين عليها ...جاهزين
شاهين يفضل يبص يمين و شمال
وفاء/ انا مبسوطه اوى يا شاهين يا ترى هيطلع مين انا كان نفسي اجى من زمان
البنات يطيروا وسط الجمهور بالحبال و الاهالى تشيل عيالها ترفعهم لفوق تلت بنات يخطفوا تلت عيال و ينطوا بيهم جوه الملعب و الجمهور كله يقف على رجله اول بنت يلف اول ايد سطر من الأرقام يلف
البنت / رقم صفر دا معناه ان رقم الكرسي مكون من رقمين بس من واحد لحد تسعه و تسعين
ولد صغير يلف تانى سطر
البنت / تمانيه فى خانه العشرات يعني معانا احتمال الكرسي من تمانين لحد تسعه و تمانين
شاهين يبص على التذكره فى ايده رقمها خمسه و تمانين
وفاء / سته سته يارب سته سته
ولد تانى يلف الحلقه التالته الرقم يظهر سته
وفاء تقف شاهين يشدها
شاهين / انا اللى هروح مش انتى
وفاء / بس انا ... حاضر
البنت/ كرسي رقم سته و تمانين
شاهين يقوم و يتحرك و يشد وفاء زعلانه تقعد فى كرسيه شاهين يروح للمسرح و البنات توصله
البنت / اهلا اهلا بصديقنا جاهز تشاركنا الشو النهرده
شاهين / باذن الله
البنت / اتعرف عليك
شاهين / شاهين الجارحى
البنت /اسمك جميل يا شاهين ... صقفه كبيره لشاهين بطل العرض النهرده و نبدا معاكوا فقره الساحر
النور يشتغل على بوكس كبير فى النص و الكل بيسقف و يهلل
البنت/ ممكن تتأكد ان البوكس ده مقفول و كلو تمام و مفيش اى فتحات جواه
شاهين يخبط على بيبان الصندوق و يلف حواليه
شاهين / تمام
البنت / بتخاف من الاماكن المغلقه او المظلمه
شاهين / لا
البنت / استاذنك تدخل جوه الصندوق
شاهين يدخل و البنات يقفلوا عليه و يلفوا سلاسل حوالين الصندوق ارضيه الصندوق تتفتح و شاهين يقع ينزل على مراتب يلاقي امايا قاعده الناحيه التانيه
شاهين/ عملتيها ازاى دى
امايا / مش انت اللى كنت مستنياها
شاهين/ و انا كنت هبعتلك مراتى بالبساطه دى هبله و لا ايه
امايا / امال جبتها معاك ليه
شاهين / ما تضيعيش وقت العرض مش هيطول العمر كله
امايا / العرض هيطول لحد ما انا اقول كفايا ... طلبت تشوفني و اديني اهو
شاهين / الروبوتات بتاعتكوا دى مش عارف اسيطر عليها
امايا / مره فى مره هتتعلم مش مشكلتى انك جاهل
شاهين / احترمى نفسك احسن لك
امايا / انت هتفضل تتفرج عليها من بعيد لحد امتى
شاهين/ هى مين دى
امايا / ما هى دى مشكله الجاهل
امايا تفتح تابلت على ياسمينا بتدهن كريم على بطنها فى اوضتها
امايا / التكنولوجيا سلاح ذو حدين لو ما بتعرفش تستخدمه هيعورك انت اول واحد
شاهين يحاول يخطف التابلت منها تطفيه و تركنه
امايا / اقتل منصور و اتجوزها
شاهين / انتى بتقولى ايه انتى
امايا / ما ينفعش صح اكيد دياب مش هيسكت ان اخوه مات و لو فضل يدور اكيد هيوصل ان انت اللى قتلته الا اذا بقي ... كانت قضاء و قدر
شاهين / اسمعى يا حرمه انتى
امايا / ما تقلقش ما تقلقش انا بس بفكر معاك بصوت عالى
شاهين / انا غلطان انى جيت
امايا / السلم اللى هناك ده ينهى المقابله بس انت كنت جاى عشان مضايق من جهاز التشويش بتاع منصور اللى فى اوضته عشان بيقطع علبك متعتك ... بس انا عندى الحل
شاهين / انا كنت جاى لسبب تانى خالص
امايا / دا ميكروروبت هتساعده يوصل لجهاز التشويش و تدوس اكتيفايت الروبوت هيبوظ جهاز التشويش شوفت سهله ازاى
شاهين / و ان وقع الميكرو زفت ده فى ايد اى حد من السرايا
امايا / لو وقع فى ايد منصور او دياب سهل اوى يعرفوا الاشاره جايه منين و مش بعيد يفتحوا الكاميره اللى فى الجهاز اللى بتتحكم منه و يشوفوا وشك منور
شاهين / و العمل اكيد عندك حل
امايا / عندى ... بس مش هديهولك ببلاش
شاهين / بكام
امايا / خطوبه ناصر اللى فى البلد هتبقي فى مركب كبير فى النيل
شاهين / مين قال الكلام ده
امايا / انا بقول و انت تنفذ
شاهين / ازاى يعني ما بنعملش احنا أفراح فى مراكب احنا
امايا / وفاء بدات تقلق عليك و الجمهور بدا يتوتر
امايا تشغل شاشه الصندوق قايد نار و بيحاولوا يطفوه و وفاء واقفه مغطيه بقها بايديها
امايا / السلم يا شاهين
شاهين يطلع السلم بنت تفتحله باب يلاقي نفسه واقف ورا الجمهور البنات يجيبوا فؤس و يحاولوا يكسروا قفل القفص القفص نفسه يتكسر و ينزل فى الارض فجاه كشاف يتوجه على شاهين الناس كلها تبص عليه و تسقف وفاء تجرى عليه تحضنه و تعيط
وفاء/ خفت عليك اوى
شاهين / دا سيرك يعني لعبه و شو و كلام فى الهجايص ما تخافيش
وفاء / عاوزه امشي عاوزه اروح اعصابى تعبت مش قادره
شاهين يهز راسه و يمشوا
....................
فى المضيفه عند الزنايته
عباده و مختار قاعدين مع رجاله كتير و جابر و جوزيف واقفين على الباب
راجل ١ / يعني ايه الكلام ده يا كبير
عباده / يعني ولاد الحرام عارفين اخلاقنا و سلونا و عارفين يضربونا منين و اخرها فارس ابنى وقع فى نفس المشكله و لولا ستر ربنا كان زمانا بنترحم عليه
راجل ٢ / الف مليون بعد الشر عنه بس انى برده مش فاهم احنا دلوقت مطلوب مننا نعلم البنات كلهم شيل السلاح و الدفاع عن النفس و نقعد الرجاله فى البيوت هى الدنيا اتقلب حالها يا ناس
مختار / مين بس قال كدا احنا هنعلمهم عشان يدافعوا عن نفسهم لو حد دخلهم البيوت بس الرجاله هتتعلم حاجتين تانين مهموم اوى
راجل ١ / خير يا كبير
مختار / الأولى غض البصر و دى اهم حاجه
راجل ٣ / احنا رجالتنا متربيين احسن تربيه و يعرفوا ربنا
جوزيف يضحك و يكتمها و يبص بره و الكل يبص له
عباده/ انا مش عاوز افتح فى اللى فات بس اللى يفتكر ايام فايروس ياسمينا اجهزه كتير اتحرقت و بعديها على طول ناس كتير ... رجاله و شباب اختفوا اللى سافر يشتغل و اختفى و مرجعش و اللى كسب رحله و برده ما رجعش و اللى و اللى و اللى ... الناس دى عرفت انها كلها ماتت ... قتلوهم لانهم ما بيعرفوش يغضوا بصرهم
راجل ٢ / ايه الكلام ده يا كبير
مختار / لسه يونس قافش فى الميدان مع شويه شباب كانوا بيعاكسوا بنات و الكاميرات جابت اللقطه و هم بيبصوا و يعلقوا و سالنا البنات قالوا حصل و اتكلمنا مع اهاليهم
عباده/ ألمرادى كان فى فرصه للكلام المره الجايه الله اعلم هتخلص على ايه
راجل ٤ / مش فاهم يعني احنا طلعنا بنحارب جماعه التكفير و الهجره فى الاخر يعنى و لا ايه
عباده / لا يا سيدي الحكايه مش كدا بس ما حدش يربط على رقبته سلبه و يرجع يزعل ان فى حد جره منها امشي عدل يحتار عدوك فيك و زى ما قولنا المعركه الجايه مش هيبعتوا رجاله هيبعتوا حريم
مختار / يعني المرحله الجايه هنضرب فى الحريم عادى
راجل ٥ / لا مش للدرجادى
مختار/ العوج منهم يا حج ... تمشي عدل بادبها تتشال على الراس تمد ايدها اكسرهالها و البادى أظلم و لا ايه يا رجاله
راجل ٦ / الكلام ده جديد
عباده / و دا يخلينا نركز على دور بيوت ربنا اولا و بيوتنا جميعا احنا رجاله البلد كل واحد يحكم بيته و يربى ابنه
راجل ٢ / و بالنسبه للتمرينات الحريمي دى يا كبير
عباده / هسلمها لنجاه هى هتعلمهم اللى محتاجينه فى اسرع وقت المهم نبدا النهرده قبل بكره ... و برده الموضوع اختياري... احنا برده متكفلين بحماية الحريم اى كانوا قبل الرجاله مين ما كانوا
راجل ٤ / عشت يا كبير بس .. هى الحكومه فين من كل ده
عباده / الحكومه عامله اللى عليها فى حدود امكانياتها و احنا بنعمل اللى علينا فى حدود امكانياتنا برده و لا يكلف الله نفسا إلا وسعها
راجل ٤ / يعني لحد امتى الوضع ده
عباده/ لحد ما ربنا يفرجها يا حج فى ايدنا ايه نعمله و ما عملناهوش اهو ابتلاء من ربنا لا نعرفله سبب و لا آخر مفيش فى ايدنا حاجه الا الاستغفار و الصبر
راجل ٥ / طب و الست نجاه هتمرن بطولها حريم البلد كلهم
مختار / اللى عاوزه منهم يا حج التمرينه ساعتين بس و عدد التمرينات زى ما يحبوا و جسمهم يجيب معاهم
راجل ٣ / فين
جابر / فى الجيم تحت هنا فى السرايا هنفصل عنه الكاميرات و عربيات السرايا هتجيبهم و تروحهم لحد باب بيتهم بس بنرتب الموضوع مع بعض قبلها بس ما دام وصلوا باب السرايا بقينا مسؤلين عنهم
الرجاله تهز راسها و يبصوا لبعض
عباده / بفكركوا الموضوع اختيارى و ما تاخدوش قرار الا لما تفكروا مره و اتنين و تلاته و حتى لو اخدتوا قرار تقدروا ترجعوا فيه فى اى وقت ما فيهاش احراج ما حدش فينا له حكم و لا كلمه على حريمكوا
مختار/ شوف لينا الاكل يا ابنى
جابر يهز راسه و يمشي
جوزيف / فى حاجه كمان مهمه اوى منسيه
عباده / نورنا
جوزيف / الكلاب اللى ماليه البلد … الكلب حيوان وفى لو اكلته مره عمره ما هيعضك اتصاحبوا عليهم و اللعبوا معاهم و اهتموا بيهم اكتر
راجل ١ / دول بقوا اكتر من الهم على القلب دا عدد الكلاب فى البلد دى اكتر من عدد سكانها
جوزيف /انا قولت اللى عندى
جوزيف يمشي
راجل ٢ / هو مين ده يا كبير لا مؤاخذه
مختار / دا يونس رشيد السبع … ابن رشيد السبع الله يرحمه
الرجاله تبص لبعض مختار يتنهد و يقوم ورا جوزيف
……………………..
فى بنها
ناصر / انا نضفت الاوضه دى على قد ما قدرت بس غيرت الملايه بواحده نضيفه
شاهين / كتر خيرك تعبت نفسك دى حياله تريحه كام ساعه لحد ما نرجع .. خشي يا ام انس انا هقعد مع ناصر نتكلم شويه عشان واحشنى
وفاء تهز راسها و تدخل الاوضه
ناصر / انا طالب اكل زمانه على وصول اقعد انت كمان واحشني اوى و قولى بقي عملتوا ايه فى السيرك انبسطتوا
شاهين / شغل عبد دخلوني صندوق و بعدين زى فيلم برستيج كدا فاكره الارض اتفتحت و نزلت على مراتب و طلعوني سلم تانى لقيت نفسي وسط الجماهير و ضاحكين عليهم بقي و ايه قال القفل علق و ولعوا فى الصندوق و الطفايات ما كانتش عاوزه تشتغل و الناس اتوتر و البت قلبها كان هيقف و ضحك السنين
ناصر / بس انبسطتوا
شاهين / الشهاده لله اه انبسطنا بس ختمت بقي بروحنى اتخضيت عليك و انت عارف شغل الحريم ده ... بس الشهاده لله هى اللى بختها وقع فى القورعه بس انت عارف عيشتنا يا ابن عمى تخلى الواحد يشك فى صوابع ايديه
ناصر / حصل
شاهين / روحت انا مكانها تعرف لو كانت هى اللى راحت يمين بالله كان زمانى هادد السيرك على اللى شغالين فيه لحد ما تطلع من الصندوق
ناصر / غشيم و تعملها
شاهين / اللى ايده فى الميه مش زى اللى ايده فى النار بس الناس صارفه و مكلفه مش هقول لا
ناصر / صحيح اللى شغالين كلهم حريم
شاهين / لا فى رجاله بس الحريم كتير فعلا مش هقول لا
ناصر / اعملك شاى على ما الاكل يوصل و لا يسد نفسك المطبخ هناك اهو فيه كل حاجه
شاهين / يدوم عزك ... بقولك صحيح ... كنا بنتكلم فى الطريق انا و ام انس عن الأفراح فى البلد اللى كلها شبه بعض و فعلا نفس الفرح بنغير بس العريس و العروسه الباقي نفس المزمار و التنوره و الخيل و ضرب النار ايه يا جدعان
ناصر / اقسملك بالله افراحنا بتكرارها تضرب أفراح هنا بالجزمه قاعدين فى مكان مقفول و دى جاى و ارض بتنور و شويه فقرات بس انت متكتف فى بنطلونك و كل شويه حد يمسك ايدك يرقصك يا جدعان ما بعرفش ارقص انا ما ليش فى الجو ده ابدا ... دا غير ان الواحد هنا ما بيركبش خيل خالص
شاهين / يا عم خيل ايه انت هتعمل زى اخوك الناس ركبت صواريخ يا عم
ناصر / الكيف ليه أحكام بقي يا ابن عمى
الاتنين يضحكوا
شاهين/ على قولك انا بقي كيفي النيل و من زمان اخد مركب و اخليه يسرح بيا فى النيل و أنام على ضهرى و اسرح فى النجوم و ريحه المايه ماليه صدرى كدا و لا اقعد و المركب ماشي و انزل ايدي فى المايه بص هى المايه عموما بتاخدني من نفسي كدا بتغسلنى من جوه
ناصر / و الله ليك حق سبحان الله فعلا مجرد وصفك خلانى عاوز اول ما أنزل البلد اخد مركب و اجرب
شاهين / و احنا فيها و اقولك حاجه دى هديه من اخوك ... احنا نجيب مركب كبير من بتاعه النايل كروز داهيه السفينه دى و نعمل الخطوبه بتاعتك فى نص النيل اوبن بوفيه بقي و ناخد يا عم المزمار و التنوره معانا عشان ما نزعلش حد ... الا عمران عشان اكيد هيبقي عاوز يركب خيل يوميها
ناصر و شاهين يضحكوا
شاهين / طب و الله فكره حلوه ايه رايك
ناصر / و ماله نشور على الجماعه فى الطريق و بعدين احنا الحمد لله يعني قدامنا كذا يوم نقدر نعمل اكتر من حاجه
شاهين / و لا نعمل كل حاجه هو احنا عندنا اغلى منك دا انت الغالى يا ناصر
شاهين يخبط على ضهر ناصر
ناصر / عشت يا شاهين عشت ما اتحرمش منك
جرس الباب يضرب ناصر يقوم يفتح
ناصر/ و ادى الاكل جه اهه
ناصر ياخد الحاجه من الراجل و يحاسبه و شاهين متابعه يبص على اوضه وفاء و يرجع يبص لناصر و يبص فى الارض ناصر يحط الاكل على السفره و يطلع من اكياس
ناصر/ احط اكلك على صينيه تاكل مع مراتك و لا تأكل معايا و لا تاكلوا انتوا الاتنين معايا انا كدا كدا هاكل و هدخل افرد ضهرى لحد ما العربيات تجهز قولت ايه
شاهين يبص لناصر و يبتسم
.........................
فى اوضه نجاه
عباده / بيتهيألي كدا ما عندكيش حجه بنات يمين شمال فوق تحت و كلهم جايين عشان يبقوا زيك دورك بقي يا ست الكل تاخديهم على الهادى و ما تطفشيهمش عشان هم مش نجاه الزيني هم بنات غلابه درعاتهم اخرها ينفضوا بيها سجادتين
نجاه / هو انا تلميذه يابا ما تقلقش انا عارفه انا هعمل ايه كويس
عباده / لحقتى تعرفى هتعملى ايه دا انا لسه مفاتحك فى الموضوع حالا
نجاه / ايوه ما الموضوع مش محتاج تفكير و تخطيط يعني انا
عباده / لا محتاج ... محتاج عشان تبدئى صح و عشان مفيش وقت نجرب و نحاول احنا لحد دلوقت مش عارفين هيجي كام واحده و من ضمنهم كام واحده اصلا تنفع و كام واحده هتكمل
نجاه/ صح
عباده / انا عاوزك لو معاكى واحده تشتغلي حتى لو ما فيش برده تكونى موجوده و تشتغلي
نجاه / لوحدى ازاى بس
عباده / ما تشغلى مخك يا نوجه اعرفى ايه اللى بيشد البنات و اعمليه
نجاه / ما اعرفش انا بالنسبالى بحب الموضوع
عباده / و دا يوصلنا لايه
نجاه / اسال البنات
عباده / دى بدايه كويسه تقدرى تبداى منها و اعتقد ان جوه السرايا في بنات كتير جدا تاخدى منهم فكره عن خطتك عشان كدا بقولك ان ما ينفعش تدخلى بصدرك كدا و تقولى انا جاهزه لازم تفكرى و تدرسي و تخططى كويس قبل ما تبدأى
نجاه/ بنتعلم منك برده يا كبير
عباده يبتسم و يقوم يبوس راس نجاه
عباده / عاوز تقرير يومى بكل جديد
نجاه / هشرفك
عباده / و ايه الجديد ما دا العادى منك
نجاه تفرح عباده يسيب الاوضه و يطلع بره
......................
فى شقه جوزيف
جوزيف يطلع من اوضته يلاقى كارم قاعد على اللاب يقف وراه يشوف بيعمل ايه
جوزيف / بتحاول تعمل ايه
كارم / بحاول اهكر موبايل فارس
جوزيف / اشمعن
كارم/ آخرته يجعجع هيعملى ايه يعني
جوزيف/ بقالك قد ايه بتحاول
كارم/ بصراحه من اول ما دخلت تنام جربت كل حاجه حاجه غم
جوزيف / مش ناسي حاجه طيب
كارم / خير
جوزيف / ان موبايل فارس زي موبايلك زى كل موبايلات العيله محميه من السيستم بتاع الشركه
كارم / ايوه بس
جوزيف يسحب كرسي و يقعد
جوزيف / كل محاولاتك دى اتسجلت فى الشركه و عارفين انه انت و غالبا بيضحكوا علي هبلك ده دلوقت
كارم / امال لازمه اللى انت علمتهونى ايه لما فى الاخر هبقي مضحكه يعني
جوزيف / انا ما قدرتش اخترق سيستم الشركه لوحدى و كل ما كنت بقرب كنت بجازف انهم يكشفوا مكانى و دا اكيد كان هيعرض خطتى كلها للخطر
كارم / و دلوقت تقدر تدخل الشركه عادى
جوزيف / مش اوى كدا
كارم / اتكلم مع دياب انا متاكد انه
جوزيف يبتسم كارم يسكت جوزيف يفتح موبايله و يطلع فيديو لناصر قاعد على لاب جوزيف و بيكلم فى الموبايل
ناصر / بقولك مفيش باسورد او اى حمايه اكيد هلاقي حاجه هنا تساعدني... يعني ايه اقفله و ارجعه مكانه دى فرصه مش هتتكرر ... و انت اش عرفك ما يمكن ... تمام انت الخسران
الفيديو يطفى
كارم / ماشي دا ناصر مش دياب
جوزيف يتنهد
كارم / على فكره دياب شاطر جدا و دى حتته انا لو منك احاول اتعلم منه اكيد عنده حته نقصاك
جوزيف / نبقي نشوف الموضوع ده بعدين بس المهم دلوقت انت ... لو عاوز تجرب ابدا بحد بره السيستم على قدك و صعبها على نفسك مره فى مره لحد ما تتقن الموضوع
كارم / مين مثلا
جوزيف / لا انا مش فايقلك انا لسه صاحى ما دخلتش الحمام حتى معاك ربنا انت
جوزيف يقوم يروح الحمام
كارم / اجرب حد من الغفر طيب و لا حد من البلد؟؟ اشوف حد معايا فى الكليه ؟؟
جوزيف ما يردش و يقفل باب الحمام وراه
كارم/ ما حدش بيساعد حد فى الزمن ده
.............................
فى شقه نسمه
نسمه / لا طبعا ازاى يعني
ام عبده / مش انتى اللى رفضتى نروح نعيش هناك
ام محمود / و بعدين احنا هنا لامانك
نسمه / انا ازاى ابات فى بيت مع رجاله اغراب
ابو محمود / يا بنتى احنا هنا ضيوف هنيجي على النوم بس لامانك
نسمه / على راسي بس ما ينفعش ما يصحش يا ناس انتوا بتفكروا ازاى
ام عبده / يعني عاجبك الرجاله الغرب اللى محاوطين البيت من ساعه ما جوزك مات ... مستنين ايه ردى عليا مستنين ايه
نسمه / يا ناس انتوا هتفتحوا عليا أبواب جهنم ابويا مش هيسكت و مش هقدر ارد عليه هصحى الاقى نفسي فى بيته ... طب ما اروح بكرامتك و من غير مشاكل بقي
ام محمود / ما قولنالك الحل و انتى اللى مزرجنه راسك
محمود / و عشان ترتاحى دا كله حبر على ورق انا مسامحك فى اى حقوق ليا
نسمه / و انا ايه اللى يجبرنى على الهم ده ما تسيبونى فى حالى و انا هعرف امشيها
ابو محمود / دى اخرتها يا نسمه
نسمه / جواز بعد عبده مش هتجوز لا محمود و لا فيراس و لا غيرهم
محمود / بس هو مش هيسكت
نسمه / ما حدش يقدر يجبرنى على حاجه
محمود / اعقلى يا نسمه كفايا اللى حصل
نسمه/ اللى بتحاول تعمله ده حرام تسمع الكلمه دى قبل كدا و لا جديده على ودانك
ام عبده / ما تحترمى نفسك يا بت و تتكلمى عدل
نسمه / انا ما غلطتش
ام عبده / بقولك ايه البيت ده بيتي و اقعد فيه اللى يعجبني و امشي اللى ما يعجبنيش عاجبك الوضع اهلا و سهلا مش عاجبك الباب يقوت جمل
نسمه / هى دى اخرتها
ام عبده / و تعملى حسابك و انتى خارجه انك هتخرجى بطولك ما لكيش عيال هنا
نسمه / و دا فى انهى شرع و لا فى انهى قانون
ابو محمود / فى قانون عيله الجزار عيالنا ما يتربوش بعيد عننا
نسمه / عيالى هيتربوا فى بيتهم و فى حضنى
محمود / و احنا قدمنا الحل الوحيد اللى يخليكي تعملى كدا و لتكونى فاكره انى هتجوزك طمعان فى فلوس عيالك اعتقد انك عارفه احنا مين و عندنا فلوس و اراضي قد ايه و مش بس كدا لو فاكره انى طمعان فيكي انتى شخصيا فانا قدام الكل بقولك دا حبر على ورق
نسمه / مفيش فايده فى الجنان ده يعني
ام محمود / احنا لحد دلوقت بنكلمك بالهداوه
نسمه / ماشي ... سيبالكوا البيت بالعيال
ابو محمود / تمضي
نسمه / ايه !!
ابو محمود / عاوزه تخرجى من هنا تمضي على تنازل عن حضانه العيال
ام محمود/ و بيع نصيبك فى ورثك من عبد الهادى
ام عبده / و تنازل عن كافه شئ هتطلعى بالجلبيه اللى عليكي
محمود / ايه يا جدعان اللى وصل الدنيا لكدا نسمه عاقله و
نسمه / بلا عاقله بلا بتنجان انتوا اللى هتطلعوا بره بيتي بدل اقسم بالله اصوت و
ابو محمود يكمم نسمه و ام عبده و ام محمود يكتفوها و محمود يعمل بيحوش و نسمه بتقاوم و تحاول تصرخ
محمود / يا جدعان العيال يا جدعان ما يصحش كدا يا جدعان حرام عليكوا هى عقلت خلاص سيبوها بس ياما اوعى
نسمه ما تقدرش تقاوم يرموها فى اوضتها على الارض عيالها يجروا عليها و هم بيعيطوا ابو محمود يجيب عرقين خشب و يمسمر الشباك
ام عبده/ هتفضلى هنا انتى و عيالك لحد ما تعقلى و لا يبان ليكوا صاحب اتفو عليكي بت ناقصه
ام عبده تقفل الباب بالمفتاح
ام عبده / احنا ليه سبنا العيال معاها كنا خدناهم و جنناها عليهم
ام محمود / عشان يضغطوا عليها اول ما الجوع يقرصهم و يبداو يعيطوا و تعرف ان ما لهاش مهرب هتمضى و رجلها فوق رقبتها
ام عبده / بس العيال ما لهمش ذنب فى كل ده
ابو محمود / اجمدى احنا مشينا فى سكه و مش هينفع نرجع لو راحت عيطت لصابر هيقتلنا كلنا
ام عبده / طب ما هى ممكن تقول للكبير
ابو محمود / هنضمن انها ما تطلعش من هنا الا اما نكون مامنين نفسنا على الاخر انا دلوقت هاخد محمود و نروح عشان ما حدش ياخد باله و انتوا تخلوا بالكوا منها لو هيموتوا ما تفتحوش الباب الا اما نيجي الصبح
ام محمود / و لا يكون عندك فكر يا خويا
ابو محمود / يلا يا محمود
ابو محمود و محمود يمشوا و يطلعوا بره البيت يعدوا من جنب عربيه رجاله صابر السواق بيتكلم فى التليفون
الراجل / ايوه يا كبير نزلوا خلاص ... بس العيال لسه بتعيط على اخرهم ... نطلع ؟ ..  تمام يا كبير
الراجل ينزل من العربيه يروح ناحيه العربيه التانيه بتاعه رجاله عباده و يخبط على الازاز الراجل التانى يفتح الازاز
الراجل / العياط ده مش مريحنى
صوت العياط يسكت الكل يبص على المبنى و الراجل يرجع عربيته فوق ام محمود تبص من ورا الشيش تدخل تجرى على الاوضه تلاقى ام عبده واقفه للعيال بالسكينه
ام عبده / انا اللى بعمله ده لمصلحتكوا عشان ما حدش فيكوا يتخطف تانى و لا يتقتل زى ابوكوا الست دى انتوا مش فارقين معاها
بدر / فكيها يا ستي عشان خاطرى فكيها
ام عبده / اسكت انت صغير و ما تعرفش حاجه اقعد اللعب على المخروب بتاعك ده و لا نام شويه و مش عاوزه صوت ... و انتى اعقلى و حطى عقلك فى راسك
ام محمود / خلاص السكه دى ما عادش فيها رجوع يا تعملى اللى هنقولك عليه يا تستحملى اللى هيجرالك
نسمه تقعد و تبصلهم بتحدى و الاتنين ستات بيبصوا لبعض و يبصولها
......................
قرب الفجر فى سرايا الزنايته
نجاه تطلع من السرايا تقلع الجزمه و تقف برجليها فى النجيله تحت شجره و تقعد تربع يوجا و تغمض عينها و تتنفس ببطئ جابر يطلع من البيت يشوفها يستغرب يروح و يقف بعيد شويه يلاقيها مغمضه عنيها و شهيق زفير ببطئ
جابر / دى يوجا دى !! كنت فاكركوا بتعملوها على السطح
نجاه / بحاول افرغ شحنات سلبيه فى الارض
جابر / و شغال معاكى البتاع ده
نجاه تفتح عنيها جابر مبتسم
نجاه / انا شافطه كميه طاقه سلبيه تخليني ارمى روحى من فوق السطح
جابر يقرفص على ركبه
جابر / و ايه يعني الطاقه السلبيه دى دا احنا بنتعاطاها فاتح الشهيه و بعدين هو البتاعه دى هى اللى هتخرج منك الطاقه السلبيه امال الصلاه و القرآن ... و الساند باج قصروا معاكى فى حاجه
نجاه / الحريم مش واخدين على الوضع و مش قابلينه و دول حريم الزنايته ما بالك بأهل البلد نفسهم يا جابر
جابر / آآآآآآه  ... بصي لو عاوزه نصيحه يعني خديها تسليه لعبه استمتعى و اتسلى
نجاه / احنا داخلين على حرب واخد بالك
جابر يربع و ياخد وضع مريح
جابر / هو انهى احسن احلق الدقن دى بالموس و لا بالفتله ما دام مش شايفينا رجاله خالص كدا
نجاه / اتلهى انت عارف ان ده مش قصدى
جابر / امال يعني احنا موجودين برده مهما اتعلمتوا على فكره احنا حواليكوا ... و لا ايه
نجاه / حاسه ان اول مره بابا يديني دور ما حدش ينفع يعمله غيرى
جابر / و الله فى أدوار كتير ما حدش ينفع يعملها غيرك عادى جدا و اصعب من الحوار ده كمان
نجاه / زى ايه و ما تقولش نتجوز و نخلف 
جابر / انا ما قولتش انتى اللى بتتلككى اهوه
نجاه / ايه السخافه دى انا قايمه
جابر / استنى يا بت هو لعب عيال و لا ايه بتكلم معاكى
نجاه / و انا مش عاوزه اتكلم فى الموضوع ده
جابر / انهى موضوع انا ما فتحتش اى مواضيع اصلا انتى اللى فتحتيه
نجاه / عشان انت ما بتتكلمش فى غيره
جابر / و الله !! ماشي خليني انا الكبير ما علينا نرجع لموضوع الطاقه السلبيه بتاعتك
نجاه / احسن برده
جابر / اتعدلى بدل ما اعدلك
نجاه / ما تقدرش
جابر ما يقدرش يمسك نفسه و يبتسم
جابر / ماشي يا وحش اخلى دى كمان عليا
نجاه تبتسم و تقوم تلبس الجزمه
نجاه / هقوم احضر الفطار
نجاه تروح ناحيه السرايا و جابر يفرد ضهره على النجيله و هو مبتسم و يبص للسما
............................