الكبيره ٢ بقلم / لولو_محمد

الحلقه ٢٥

((((((( الكبيره ٢)))))))
#لولو_محمد
الحلقه ٢٥
جوزيف / اعمل ايه عشان اخليك تثق فيا
عمران / ما تعملش هتيجي لوحدها لو تستحقها
جوزيف / معاك حق ... انت مختلف عن اخواتك
عمران / و انت مختلف عن ابوك
جوزيف / ما شوفتوش ... و لا انت شوفته
عمران / نجاه كانت بتحب تسمع حكياته فكان معظم قعداتنا نحكى عن المواقف المضحكه اللى بينه و بين ابويا
جوزيف / كلها مضحكه ؟
عمران / كان شخص خطر بس دمه خفيف بايع كل حاجه... بس كان مؤمن ... كان عارف ان فى حساب و ربنا و عارف انه بيغلط ... و ابويا برده ما كانش بيسكتله كان بيحاول معاه فى كل فرصه
جوزيف / زى ما بتحاولوا معايا كدا ؟
عمران / بالظبط و لعلمك ما كانش مقبول عندنا و عمى الله يرحمه كان الكبير وقتها كان بيضايق من علاقته بابويا و مسميه النجس
جوزيف / و انا مسميني ايه ؟؟
......................
عمران / الخواجه
جوزيف / مش شتيمه ... حلو
عمران / هو انت ناوى على ايه ... بجد
جوزيف / مش عارف ... و مش هكدب عليك انا فعلا مش عارف ايه اللى عملته ده انا سبت الكفه الكسبانه و جريت ورا حاجه مش عارف ممكن اصلا كانت تفرق معايا فى ايه ... فرقت ايه ان اسمى طلع يونس مش جوزيف و ان ابويا اسمه رشيد السبع يعنى و لا الفلوس اللى اخدتها دى فرقت فى ايه انا بنوك الدنيا تحت ايدي بسحب منها اللى يكفيني و زياده
عمران / ندمان يعني
جوزيف / لا ... بس قلقان
عمران / مش فاهمك منين كل اللى بتقوله ده و منين مش ندمان
جوزيف/ لما افهم هقولك
عمران / لو عشنا و كان لينا عمر
جوزيف / بالنسبه لمهره
عمران يبصله
جوزيف / ايه الدنيا ؟؟
عمران / مش فاهم
جوزيف / لا فاهم بس انا مش هرخم عليك ... هنزل افرد ضهرى شويه لما الفجر ياذن صحيني
عمران / عيني حاضر
جوزيف ينزل و عمران يتنهد و يقعد يفكر
.........................
فى شقه مهره
مهره نايمه باب الشقه يتفتح و يدخل اربعه رجاله يتسحبوا فى الضلمه يدوروا فى الاوض لحد واحد يدخل اوضتها يشوفها يشاور للباقيين يدخلوا الاوضه و يتلموا حوالين السرير الاول يبدا يمسكها من رجلها تتفزع و تيجي تصرخ يكتفوها و يكمموها و هى بتقاوم لحد ما تفلت يسيبوها تجرى ناحيه الباب و يطلعوا يجروا وراها عربيه راكنه قاعد فيها اربع رجاله ينزل واحد منهم يمسكها و هى بتجرى
الراجل / خير خير
مهره تصرخ
مهره / ابعدوا عنى عاوزين منى ايه سيب
الراجل / انا تبع عمران ما تخافيش ... امسكوا الكلاب دول
الرجاله اللى معاه تجرى ورا البلطجيه و مهره تفلت من ايده و تطلع تجرى الراجل يجرى وراها يسمع ضرب نار يقف و يرجع يجرى على زمايله
.......................
فى اوضه عمران
عمران بيتكلم فى التليفون
عمران / يعني لا مسكتوا حد منهم و لا عارفين جريت راحت فين امال انتوا لازمتكوا ايه ... يا سيدى انا اسف حقك عليا بس حط نفسك مكانى ايه الصعب فى اللى انطلب منكوا يعني ... خلاص خلاص انا هتصرف سلام
عمران يقفل و يفتح الدولاب يطلع غيار باب الاوضه يتفتح و جابر يدخل
جابر / فى حاجه يا عمران مالك
عمران / بعدين يا جابر بالله عليك بعدين
جابر / بعدين ايه ... طب انت رايح فين دلوقت
عمران / مش عارف خارج و خلاص
جابر / احنا هنعيل و لا ايه
عمران / ناس اتهجموا على مهره فى بيتها و جريت و ما حدش عارف مكانها هنزل ادور عليها ارتحت
جابر / ناس مين دول
عمران يفتكر حاجه
عمران / اوعى كدا و ربنا لو هو لاقتله اوعى
جابر / هو مين ده ما تفهمنى
عمران ينزل يجرى على اوضه جوزيف يرزع الباب برجله جوزيف يصحى و المسدس فى ايده ناحيه عمران عمران ما يهموش يدخل يجرى يمسكه من هدومه جوزيف يزق ايده و يقف بعيد و جابر بيحوش 
عمران / انت فاكر انك هتكسرنى كدا يعني فاكر انك هتوصل للى انت عاوزه هى ما لهاش دعوه بكل ده
جوزيف / هى مين دى انت عبيط انا كنت هموتك
عمران / اقتل اقتلنى راجل لراجل يا جبان و ابعد خالص عن الحريم يا ابن الحرام انت فاهم الحريم لا
جابر / انت ليك علاقه بالموضوع ده
جوزيف / موضوع ايه انا كنت نايم
عمران / مهره يا ابن الكلب مهره اللى لسه كنا بنتكلم عنها فوق فجاه رجاله تتهجم عليها فى بيتها ليه هاه انطق عملتلك ايه هى اذتك فى ايه
جوزيف / و انا مالى بيها مهره اصلا ما كانتش هدف بالنسبالى و لا ليا اى دخل بيها و قولتلك الكلام ده
جابر / يعني مجرد صدفه يعني
جوزيف / هكدب ليه يعنى ... بص انا محافظ على ثباتى الانفعالى لحد دلوقت عشان خاطر ابوك لكن لو فاكر انى
نجاه تدخل و اخواتها وراها تشغل النور
نجاه / فى ايه فى ايه صوتكوا عالى ليه
عمران / اساليه
نجاه تبص لجوزيف
جوزيف / ما اعرفش حاجه و ما ليش دعوه ... بس لو اديتنى فرصه هعرفلك كل حاجه و هجيب لك العيال دى لحد عندك
عمران / بالبساطه دى
جوزيف / هحاول
نجاه / ممكن حد يفهمنى ايه اللى حصل
جابر / ناس اتهجموا على مهره فى بيتها
نجاه تبص لجوزيف
عمران / بالظبط بعد ما كنا بنتكلم عن مهره
جوزيف / انا ما ليش دعوه باللى حصل لو عاوز ائذيها استنيت كل ده ليه اصلا هستفيد ايه
عمران / ما اعرفش
نجاه / تقدر تساعد ؟
جوزيف / قولت هحاول
نجاه / اعمل اللى تقدر عليه ... انا هطلع اللبس ... هى فين دلوقت
عمران / ما اعرفش
نجاه تبص لجوزيف
جوزيف / على ما تلبسي هكون حددت مكانها
عمران / ازاى بقي ان شاء الله
جوزيف / يوووووه انا مش هفضل صابر عليك كتير
جوزيف يروح يفتح اللاب و يبدا يشتغل عليه
جوزيف / معاك رقم موبايلها ؟
عمران / معايا
عمران يطلع موبايله و يفتح يطلع النمره و يديهاله جوزيف يدخل الرقم ثوانى و مكان البيت يظهر على الخريطه
عمران / دا بيتها هى جريت منه هى مش هناك
جوزيف / تمام اديتي دقايق زياده هشوف لو فى كاميرات حوالين البيت
عمران / مستني
جابر / هروح اللبس انا كمان عشان نبقي جاهزين
جابر يمشي كارم و فارس وراه و جوزيف شغال و عمران واقف متابع
...........................
فى القسم
على و مروان و مهره قاعدين و مهره منهاره لابسه اسدال قديم و الظابط بياخد اقوالهم
على / عمران دا طالب مجتهد جدا عندى دا غير انه زميل مهره بنتى فى التمرين
الظابط/ و هو هيبعتلك ناس تتهجم عليكي ليه
مهره / ما اعرفش انا ما شوفتش حاجه الدنيا كانت ضلمه بس لما جريت على الشارع فى حد حاول يشدنى لعربيه و فضل يجرى ورايا كان بيقولى انه تبع عمران
الظابط / تمام ... قوليلى بعد اذنك تانى كدا كانوا كام واحد
مهره / ما اعرفش الدنيا كانت ضلمه ما شوفتش حاجه بس حسيت انهم كانوا كتير على الاقل تلاته معرفش
الظابط / و مع كدا قدرتى تهربى بسهوله
مهره / ما اعرفش ... هو ده اللى حصل
الظابط / اخر مره تواصلتى مع عمران امتى
مهره / اتصل بيا النهرده و قالى انه نزل القاهره و راح التمرين ما لقانيش
الظابط / يااااه و هو عشان ما لاقاكيش يبعتلك بلطجيه البيت يخطفوكى
مهره / انا ما اعرفش حاجه ... بس ... عمران ما يعملش كدا
مروان / مش انتى اللى لسه قايله
مهره تبص لمروان و تبص للظابط
مهره/ اقسم بالله ما فاهمه حاجه و لا مستوعبه اللى حصل انا لحد دلوقت جسمى كله بيتنفض
مهره ترفع ايديها بترتعش الظابط يضرب جرس عسكرى يدخل
الظابط / لمون هنا يا ابنى ... اهدى و باذن الله هنقبض على العيال دى فى اسرع وقت ... بس معلش سؤال اخير ... هو عمران يعرف عنوانك منين
مهره/ ما اعرفش
الظابط / طب كنتى بتعملى ايه فى الشقه هناك لوحدك البطاقه بتاعتك بتقول عنوان تانى خالص
مهره / اختلفنا فرجعت بيتي القديم دى شقتى بابا شاريهالى ... العنوان عند حضرتك دا بيت ماما
الظابط / و انتى بقي بقالك قد ايه قاعده لوحدك
مهره / النهرده اول يوم
الظابط / يعني اول يوم ترجعى فيه بيتك لوحدك هو نفس اليوم اللى عمران ينزل فيه القاهره هو نفس اليوم اللى يتهجموا عليكي فيه مش شايفه انها صدفه غريبه شويه 
مهره / ما اعرفش
الظابط / طب اهدى ... حضرتك بتقول ان عمران من تلاميذك
على / عمران من عيله كبيره من الصعيد و جالى بتوصيات عاليه جدا و الحقيقه ذكائه و مجهوده يحسبله دا غير اخلاقه و التزامه
الظابط / و ايه طبيعه علاقته ببنت حضرتك
على / زمايل فى التمرين هم الاتنين فى فريق الفروسيه و اشتركوا فى بطولات كتير على مدار السنين اللى فاتت
الظابط / و ايه طبيعه الخلاف اللى تخلى بنت حضرتك تقعد فى شقه لوحدها
على / مهره كانت عايشه لوحدها مع المربيه بتاعتها فتره طويله فى الشقه دى قبل ما المربيه تتوفى و تتنقل تعيش مع والدتها و من وقت للتانى بتحن لذكرياتها و ترجع تقعد فيها يوم او اتنين و ترجع تانى
مهره تبص لعلى و تبتسم بسخريه و تبص فى الارض
الظابط / مين كان عارف انك فى الشقه دى
مهره / بابا و ماما و زوج والدتى
الظابط / طب مبدئيا احنا هنبعت نجيب عمران نحقق معاه و هنفرغ الكاميرات اللى حوالين البيت و اول ما نمسك العيال دول هنحتاجك تتعرفى عليهم
مهره / بس انا ما شوفتش وشوشهم الدنيا كانت ضلمه
الظابط / طب و الراجل اللى كان بيحاول يركبك العربيه
مهره/ دا شوفته لا دا شوفته و اقدر اوصفه لحضرتك
الظابط / تمام ... تمام
.........................
فى فيلا اكرم
اكرم واقف فى التراس و كل شويه يبص فى الموبايل كارمن تدخل
كارمن / حبيبي انت هنا !! قلقتنى عليك
اكرم / خير يا كارمن حد اتصل بيكي و لا حاجه
كارمن / لا ما حدش انا قلقت لما ما لقيتكش جنبى
اكرم يهز راسه بخيبه امل
كارمن / فى اى مشكله فى الشغل
اكرم / لا ... انا بس قلقان على مهره ... ما كانش المفروض نسيبها تبات لوحدها كنا بعتنالها حد من الخدامين مدام انتى مش عاوزه تباتى معاها
كارمن / ابات معاها فين يا اكرم و بعدين على يدك انا روحت لها و نزلتنى من عندها منهاره قد ايه
اكرم / و روحتى نمتى بمنتهى الهدوء ما شاء الله
كارمن / ما تطلعش خلقك فيا هى كبيره كفايا انها تتحمل نتجيه افعالها
اكرم / انهى ام انتى دا انتى تشلى
كارمن / اكرم !! انت ازاى تكلمنى كدا
اكرم / انا لو عليا ما اكلمكيش خالص انتى السبب فى كل القرف اللى انا شايفه دلوقت
كارمن / انا !!
اكرم / ايوه انتى انسانه انانيه و مستهتره انا مش قادر اصدق انى حبيتك فى يوم من الايام عقلى كان فين و انا بضيع شبابى و عمرى مع واحده زيك
كارمن / انت شايف كدا ! تمام ... تقدر تطلقنى و تغور فى ستين داهيه
اكرم / و ده اللى هيحصل فعلا ...بس لما اطمن على مهره الاول
كارمن / دلوقت يا اكرم ... من فضلك و من غير ما نعلى صوتنا و نصحى البنات تطلقنى حالا
اكرم / عنيا الاتنين ... كارمن حبيبتي ... انتى طالق ... و بالتلاته
كارمن / حلو اوى اتفضل بره بيتي
اكرم / لا يا هانم الفيلا دى بتاعتى انا و كرم اخلاق منى هسيبك تعيشي فيها انتى و البنات و مصاريفكوا هتتحول لحسابك كل اول شهر اوتوماتيك انا مش على يا هانم
كارمن / ما تفرقش كتير ... عن اذنك
كارمن تسيبه و تطلع فوق و اكرم كل شويه يبص فى الموبايل
اكرم / غبى غبى يا ترى انتى فين دلوقت يا مهره... غبى
....................
فى القسم
عمران / انا ... مستحيل طبعا
الظابط / امال تفسر بايه الكلام ده
عمران يتنهد و يتكلم بهدوء
عمران / احنا كنا فى تركيا سوا فى مسابقه و هناك اتعرضنا لاكتر من هجوم و انا اتصبت و مهره يوميها انقذت حياتى و من ساعه ما رجعنا مصر و انا طلبت من مجموعه اصدقاء انهم يتابعوها و يحموها عشان خفت اللى حصل فى تركيا يتكرر معاها
الظابط / فحاميها حراميها مش كدا
عمران / لا طبعا هو اتفاجئ لما لقاها نازله تجرى بالبجامه حاول يهديها و قالها انه من طرفى
الظابط / و فين الناس دول بقي
عمران / هكلمهم بالتليفون يجوا لحضرتك حالا
الظابط / اتفضل
عمران يطلع التليفون و يتصل بحد و الظابط متابعه
....................
قدام اوضه التحقيق
مهره و على و مروان قاعدين فى جنب و نجاه واقفه مع الرجاله فى جنب نجاه تروح ناحيه مهره على يقف و يمنعها
على / اعتقد كلامنا كان واضح من الاول 
نجاه/ مهره ... من فضلك
مهره تبص لنجاه
مروان / انا ما بفهمش فى الناس كويس ... بس هى قلقانه عليكي
مهره تبص لاخوها و تبص فى الارض و تعيط
نجاه / انتى شوفتى مننا ايه طيب يخليكي تشكى اننا ممكن ناذيكي بالشكل ده طيب
مهره تعيط اكتر و تنهار نجاه تعدى على و تنزل على ركبها قدام مهره و تمسك ايدها مهره تبصلها
نجاه / انا مقدره فزعتك بس احنا عمرنا ما هناذيكي ... هو انتى لسه هتعرفى عمران النهرده ... دا انتى انقذتى حياته هيبقي ده رد الجميل يعني
مهره / انا ما عدتش عارفه حاجه
نجاه / تمام ... ربنا يصلحلك الحال ... عن اذنكوا
نجاه ترجع و على يقعد
على / انا مش فاهم الناس دى بتفكر ازاى بجد
مروان / هو برده هيعمل كدا ليه ... حضرتك نفسك قولت انه شاب كويس ... مهره انتى متاكده ان 
مهره / انا مش متاكده من اى حاجه خالص
مهره تعيط على يتنهد مروان يطبطب عليها تبصله و تقوم تروح تقف فى جنب لوحدها و تمسح دموعها و نجاه و الرجاله بيبصوا عليها
جابر / فيها حاجه متغيره
نجاه / انا عمرى ما شوفتها كدا 
جابر / و انتى يعنى كل معرفتك بيها قد ايه اصلا
نجاه / انا بفهم فى الناس يا جابر
جابر يبص على يونس قاعد بيتابع كل حاجه بتحصل بمنتهى الهدوء
جابر / طبعا
نجاه / هروح اكلمها تانى
جابر / بلاش... الافضل بلاش
مهره تبص عنيها تيجي فى عين نجاه متابعاها بحزن مهره تبص الناحيه التانيه و تتنهد و هى بتمسح دموعها تروح ناحيه مكتب الظابط الكل ينتبه و يقف
مهره / لو سمحت انا عاوزه ادخل للظابط
راجل يدخل بيجرى
الراجل / فادى ابو العلا المحامى حاضر مع السيد عمران الزيني
العسكرى ياخد من الراجل الكارت و يخبط و يدخل ثوانى و يطلع
العسكرى / الباشا بيقولكوا اتفضلوا
مهره تدخل هى و المحامى على يروح يدخل وراها العسكرى يقفل الباب نجاه تبصلهم باستغراب
نجاه / هو ايه الوضع دلوقت
جوزيف تليفونه يتهز فى جيبه ياخده و يروح بعيد
نجاه / يونس
يونس يشاورلها و يروح بعيد نجاه تيجي تحصله جابر يمنعها تقف و تهز راسها حاضر و تفضل عينها ورا جوزيف
........................
فى شقه مهجوره
عباده يدخل و وراه مختار رجاله تقف
عباده / اخبار الدنيا ايه يا رجاله
راجل ١ / كلو تمام بحسك يا كبير ... الزبون فى الاوضه دى و صحته عال العال و الدكتور مريح شويه فى الاوضه التانيه لو تحب نصحيهولك
عباده / لا لا ما لوش لازمه سيبوه مرتاح
راجل ١ يهز راسه عباده يروح يفتح باب اوضه يلاقي راجل نايم و مركب محاليل و ايديه و رجليه مربوطين بكلابشات فى سرير معدن
مختار / بقيت تخبى يا عوبد
عباده / ما انا قولتلك اهو ما تبقاش طماع وريني بقي يا حلو الملامح هتطلع منه المعلومات ازاى
مختار / اتفرج و اتعلم
عباده يضحك مختار يقفل باب الاوضه عباده يشد كرسي و يقعد و يحط رجل على رجل
.......................
فى فيلا اكرم
اكرم بيلبس و كارمن ممدده فى السرير تقوم تقعد و هى بتنفخ
كارمن / الواحد مش هيعرف يرتاح فى البيت ده
اكرم / ما عنك ما ارتاحتى ... هو انتى مريحه حد عشان تطلبى الراحه... انتى عارفه بنتك فين ... بنتك فى القسم يا هانم
كارمن / ايه !!
كارمن تقوم بسرعه تجرى على الدولاب
اكرم / بلطجيه اتهجموا عليها فى شقتها قولتلك باتى معاها انما ايه لا بتربيها
كارمن / مهره !!
اكرم يبصلها باستغراب
اكرم / ايه !! مش بنتك !! هديتي لما عرفتى انها مهره ليه
كارمن / ما هديتش
اكرم / انتى بجد هديتي لما عرفتى انها مهره ... هى مش فارقه معاكى
كارمن / انت بتقول ايه لا فارقه معايا طبعا دى بنتى
اكرم / هى باعت كل ده عشانك و انتى مش فارق معاكى اصلا
كارمن / على فكره انا مش مجبره استحملك ما تنساش اننا مطلقين
اكرم / اتاخرت كتير اوى اتاخرت كتير
اكرم يسيب المكان و يمشي و كارمن واقفه تنفخ تفتح الدولاب و تطلع طقم
………….....
قدام القسم
مهره واقفه باصه فى الارض و على و مروان واقفين قدامها
على / و ما دام هتتنازلى شحطتينا فى عز الليل ليه من الاول و لا هو لعب العيال ده مش هنخلص منه
مهره / خفت اكون بظلمه ... انا اسفه انى ... شحطت حضرتك و ازعجتك
على / تمام ... تحبى اوصلك فين دلوقت ... يا دوب اروح اغير هدومى و اخد دوش افوق قبل معاد محاضرتى ما احنا الحمد لله سهرنا الليل كله فى الاقسام عشان مهره هانم و دلعها
مروان / اعتقد يا بابا ان مهره لازم
مهره / انا ما ادلعتش
على / امال تسمى ايه انك تروحى تباتى فى شقه مهجوره لوحدك
مهره / قولت لحضرتك ان ما عادش ينفع اعيش فى الفيلا مع ماما قولت لحضرتك انى
على / ليه ما ينفعش الناس قصروا معاكى فى ايه شالوكى من على الارض شيل
مهره / فى حاجات ما ينفعش تتقال
مروان / حاجات ايه دى
على / انا ما يهمنيش اعرف انتى مش جديده عليا انا عارفك و عارف عندك و دلعك و مشاكلك اللى ما بتخلصش لازم مهره تبقي مركز الكون و الاهتمام كله عليها لقيتي الدنيا هديت بعد رجوعك من تركيا من غير بطوله تتباهى بيها قولتى تعملى اى حوار و السلام
مروان / بابا
مهره / كتر خيرك ... اسفه انى عطلتك تقدر تروح تلحق اللى وراك
على / ارجعى عند امك
مهره / اوعد حضرتك انى ... مهما حصل مش هلجالك تانى
مروان / مهره بابا يقصد ... تعالى اوصلك
مهره / هركب اى حاجه شكرا عن اذنك
مروان / تعالى يا بنتى هتركبى ايه باسدالك ده انتى معاكى فلوس اصلا و لا هتلاقى اساسا حاجه تركبيها دلوقت
على / عشان تتاكد لما قولت انها مدلعه و عاوزه الكل يجرى وراها
مروان / حضرتك تقدر تتفضل يا بابا انا هوصلها
على / هقول ايه بس ... انا ماشي
مروان / عربيتي من النحيادى
مهره واقفه بتعيط
مروان/ على فكره هو مش معاكى كدا بس هو معايا انا كمان ... هو ما بيحبش غير ايلين انا بالنسباله الابن الضال اللى تاعبه فى حياته و انتى ... انا مش عارفه انتى بالنسباله ايه بصراحه بس
مهره تبصله
مهره / و لا حاجه ... انا بالنسباله و لا حاجه
مروان / و هو كمان بالنسبالى كدا بصراحه ... انا مش مرتاح لمنظرك ده اركبى نروح اى حته نجبلك منها حاجه نضيفه تلبسيها
مهره / انا جريت من البيت بالبجامه ما كانش فى وقت اللبس
مروان / كان ممكن يجيبلك من لبس ايلين او لبس ماما ... بس على الدسوقى هيفضل على الدسوقى تعالى
مهره تروح مع مروان و نجاه تخرج مع عمران و الرجاله
نجاه / عدت على خير بس كان المفروض نبقي عارفين انك عملت حاجه زى دى
عمران / ابويا كان عارف و هو اللى جايبهم
جابر / امال يونس اختفى يعنى ما شوفناهوش
عمران / ما يفرقش معايا انا كل اللى يفرق معايا انى اروح اتكلم مع مهره و اطمن عليها
فارس / انت مش هتعدى الليله صح
عمران / مهره انقذت حياتى لولاها كان زمانى ميت
جابر / شكلها فعلا ما كانش مظبوط بس اعتقد ان مش انت اللى المفروض يتكلم معاها
الكل يبص على نجاه
نجاه/ دلوقت !!
عمران / وراكى حاجه مهمه يعني البنت كانت هتتجنن عليكي و انتى مخطوفه كانها اختك و انتى
نجاه / انا ما اتكلمتش يا عمران و لو سمحت ما تكلمنيش كدا
جابر / انت عارف عنوانها
عمران / عارف ... بس ما اعتقدش انها هتروح على هناك بعد اللى حصل اكيد راحت عند ابوها و دا راجل ناقص ما لوش تلاته لازمه
اكرم يركن عربيته و ينزل منها بيجرى
اكرم / عمران ايه اللى حصل ... مهره فين 
عمران / اعتقد روحت مع باباها ... هو ايه اللى حصل يا اكرم بيه ايه اللى يخلى مهره تسيب البيت و تروح تقعد لوحدها
اكرم / مشاكل فى البيت حاجات بتحصل فى كل البيوت بس انت عارف مهره حساسه قد ايه ... هى فين
فارس / ما قالك مشيت مع ابوها 
نجاه / فارس
فارس / لا مؤاخذه قال لحضرتك
اكرم / تمام انا هكلم على و اعرف هى راحت فين
نجاه / ممكن اجى مع حضرتك اعتقد انى ممكن اهديها شويه و اقنعها تروح مع حضرتك
اكرم / ما اعتقدش الموضوع هيبقي بالبساطه دى يا نجاه يا بنتى على العموم تسلمى
اكرم يحاول يحط ايده على كتف نجاه بشكل ابوى جابر يمسك ايده من رسغها ينزلها اكرم يسحب ايده بحرج جابر يبتسمله
اكرم / عن اذنكوا
اكرم يمشي
نجاه / الراجل صعبان عليا ... بشوف فى عنيه ناحيه مهره مشاعر ما شوفتهاش فى عنين ابوها نفسه
عمران / انا اصلا عمرى ما صدقت انه جوز امها بصراحه من كتر ما بيحبها و بيخاف عليها
فارس / الا هو احنا هنفضل واقفين هنا كتير
جابر / روح انت و اخوك و انا هاخد نجاه و عمران و نروح نبص على مهره و نتكلم معاها
فارس / حبكت دلوقت يعني
جابر / فارس اهدى و قول هديت الدنيا مش مستحملاك الصراحه
نجاه / هو يونس فين
جابر / ولع بعيد عننا احنا مالنا
نجاه تبص حواليها فى كل حته ما لوش اثر
كارم / اختفائه مريب على فكره
جابر / و لا اختفاء و لا حاجه انا عارف هو فين
نجاه / الله امال ساكت ليه من الصبح
جابر / و اتكلم ليه لو كان عاوزك معاه كان خدك لو كان عاوز اى حد مننا معاه كان قالنا رايح فين على الاقل
نجاه / على فكره اسلوبكوا معايا عنيف جدا و دى حاجه بدات تضايقني
الكل يبص لبعضه نجاه تسبقهم جابر يبص لفارس و يشاور لعمران يجروا وراها و فارس و كارم يتحركوا ببطئ
…………………..
فى عربيه مروان
مروان / تخيلى انه ما حضرليش حفله واحده لحد دلوقت ما حاولش يسمعنى مره يمكن مزيكتى تعجبه
مهره / بس انت عزفت فى عيد ميلاد ايلين
مروان/ اه و اتخانقنا اخر الحفله و بت اسبوع بره البيت لحد ما ماما ادخلت عشان ارجع فاتخانق مع ماما و سابلنا هو البيت اسبوع تانى
مهره / للدرجادى
مروان/ طبعا ... مش احرجته قدام رجاله الاعمال و زمايله فى الجامعه
مهره / بس انت غنيت حلو اوى و الفرقه بتاعتك جميله اوى و عملتوا جو
مروان / كبرى مخك المهم انا انبسطت
مهره تبتسم
مروان/ هو انتى اتخانقتى مع اكرم بيه
مهره تبصله بحزن
مروان / اكرم ... هو اكرم
مهره / انا مش عايزه اتكلم فى الموضوع ده لو سمحت ... ادخل اليمين الجاى
مروان / عنيا
مروان يدخل شارع مهره و يركن و تنزل من العربيه تروح ناحيه البيت عندها و مروان ينزل يمشي جنبها تشوف مامتها واقفه مع راجل ست عاديه تقف تسلم عليها
ست / حمد الله على سلامتك يا مهره 
مهره / الله يسلم حضرتك
الست / هو البوليس مسك العيال ولاد الحرام دول
مهره / لسه لما يمسكهم هيبعتلى اتعرف عليهم
الست / طب لو احتاجتى حاجه ابقي عدى عليا
مهره / تسلمى
الست تمشي و مهره تروح ناحيه مامتها
كارمن / اهى وصلت اهى ... اتاخرتى كدا ليه قلقت عليكي... اعرفك باشمهندس ابراهيم هيركبلك باب حديد على الباب و كلمتلك شركه حراسات خاصه هيبعتوا حراسه تقف على باب الشقه
............................