الكبيره ٢ بقلم / لولو_محمد

الحلقه ٦٧

(((((( الكبيره ٢))))))
#لولو_محمد
الحلقه ٦٧
نجاه / حاسه ان اول مره بابا يديني دور ما حدش ينفع يعمله غيرى
جابر / و الله فى أدوار كتير ما حدش ينفع يعملها غيرك عادى جدا و اصعب من الحوار ده كمان
نجاه / زى ايه و ما تقولش نتجوز و نخلف 
جابر / انا ما قولتش انتى اللى بتتلككى اهوه
نجاه / ايه السخافه دى انا قايمه
جابر / استنى يا بت هو لعب عيال و لا ايه بتكلم معاكى
نجاه / و انا مش عاوزه اتكلم فى الموضوع ده
جابر / انهى موضوع انا ما فتحتش اى مواضيع اصلا انتى اللى فتحتيه
نجاه / عشان انت ما بتتكلمش فى غيره
جابر / و الله !! ماشي خليني انا الكبير ما علينا نرجع لموضوع الطاقه السلبيه بتاعتك
نجاه / احسن برده
جابر / اتعدلى بدل ما اعدلك
نجاه / ما تقدرش
جابر ما يقدرش يمسك نفسه و يبتسم
جابر / ماشي يا وحش اخلى دى كمان عليا
نجاه تبتسم و تقوم تلبس الجزمه
نجاه / هقوم احضر الفطار
نجاه تروح ناحيه السرايا و جابر يفرد ضهره على النجيله و هو مبتسم و يبص للسما
............................
على السريع
عربيات كتير ورا بعض حوالين باصات مكيفه منهم عربيه سايقها ناصر و جنبه عبد العزيز و ورا نور و مامتها
نور / بجد ينفع ؟! انا طول عمرى نفسي اركب نيل كروز اوي
ناصر / هى مش زى اللى فى خيالك بس قريبه يعني رحله نيليه كدا انما كل حاجه تانيه زى ما اتفقنا
عبد العزيز / المهم بس الجو يبقي حلو
ناصر / خير بإذن الله كله خير و بعدين ما تقلقش حضرتك لو لا قدر الله حصل فى الأمور أمور نلغيها و كدا كدا برنامجنا ماشي
ام نور / لا يا ناصر بس الطريق فعلا علقه يا ابنى
ناصر / ألمرادى بس عشان العدد ما شاء الله يعني بس باذن الله الزياره الجايه ناخدها طيران مش هنحس بحاجه
عبد العزيز / ما تتكلمش بثقه اوى كدا عشان حماتك الله اكبر عليها فى الطيران قلبها حديد
ام نور / الس الس حقك
ناصر / عادى يا امى كلنا عندنا حاجه بنخاف منها و الطيران دا حاجه منتشره جدا ناس كتير كدا ممكن يتصنف مثلا كخوف من المرتفعات او خوف من الاماكن المغلقه او خوف من الزحمه او خوف من حاجات كتير جدا
عبد العزيز / يا عم دى لو شافت صرصار ما بتنامش يومين من الرعب و تفضل تحلم بكوابيس و تقلبها دراما و نكد
ام نور / انا يا عبده
نور / عادى يعني يا ماما ... هو لسه كتير يا ناصر
ناصر / يعني... بس فى استراحه قريبه
نور / يا ريت بجد محتاجه ادخل الحمام
ناصر / تمام هشد عليها شويه
......................
فى اوضه نسمه
ام عبده  / انا هروح احضر الغدا اقسم بالله اللى هيعمل دوشه و لا مشاكل ما هيدوق منى لقمه فاهمين و لا لا
نسمه تبص لحماتها و اول ما تطلع من الاوضه و تقفل الباب بالمفتاح تزوم و تقلب نفسها و تقعد على ركبها و تبص لبدر يجرى عليها
بدر / ستى قالت
نسمه تزوم و تشاور براسها على الحبل بدر يحاول يفك مربوط جامد اخوه يجرى يساعده
بدر/ جامد اوى
نسمه تبصله يكمل محاوله و يجرى يحاول يفتح الإدراج
بدر / مش لاقي مقص
نسمه تتنهد و تفضل تفرك فى ايديها بدر يساعدها لحد ما تفك ايديها تشيل الرباط من على بقها و تفك رجليها و تجرى تشيل ابنها الصغير و تحاول تفتح الباب ما تعرفش تجرى ناحيه الشباك تحاول تفتحه ما تعرفش تصرخ
نسمه / اللحقونى يا نااااااس اللحقونى يا عالم ... الحقونى يا هووووه
الباب يتفتح بسرعه نسمه تحاول تخرج ام عبده و ام محمود يشدوا منها العيال و هى بتصرخ ام محمود تضربها بفازه على دماغها نسمه تقع فى الارض اخو بدر يصرخ و يعيط بدر يحضن اخوه و يبص لسته بخوف
ام محمود / اخرس ياض بدل ما اقتلهالك.... هى فكت نفسها ازاى
ام عبده / و الله كانت مربطه على حطه ايدك من امبارح
الباب يخبط
ام محمود / اسحبيها على جوه و افتحى الباب شوفى مين و يمين بالله اللى هيفتح بقه فيكوا يا كلب منك ليه لكون شقه بطنه بالسكينه دى بالطول
بدر / ستى
ام محمود تشخط فيه
ام محمود / تحب تجرب
ام عبده و ام محمود يشدوا نسمه على الاوضه و ام عبده تعدل نفسها و تروح تفتح الباب تلاقى  محمود تتنفس
ام عبده / فزعتنى يا محمود افتكرت حد جه على صوت الصريخ
محمود / ما سمعتش حاجه و الشارع بره زحمه و ما حدش اخد باله بس صريخ ايه اللى حصل
ام عبده / عرفت تفك نفسها و فضلت ترقع بالصوت ما عرفناش نسكتها الا اما امك ضربتها على دماغها
محمود / ينهار اسوح لتكونوا قتلتوها يا عمتى
ام عبده / قبر يلمها تبقي ريحت
محمود/ ايه الكلام ده بس يا عمتى دا كلام برده ... بقولك ايه ... تاخدى الواد فايز على كتفك و تطلعى على المحطه و تسافري عند خالتى سعاد فى المنصوره هكتبلك العنوان فى ورقه
ام عبده / انت بتقول ايه
محمود / ما تقلقيش انا فكرت فى الموضوع امبارح لو عاوزه تشوف ضناها تانى هتسمع الكلام و تمشي زى ما احنا عاوزين و الجزمه فوق راسها
ام عبده/ و ان ركبت راسها
محمود / هنكسرهالها بس اسمعى منى دلوقت و خدى فايز و اطلعى على المنصوره حالا و لو حد سألك عن صوت الصريخ قولى انك اتخانقتى مع نسمه ... لا قولى ان امى اللى كنتى بتصرخ لما عرفت ان اختها تعبانه و اقفلى الموبايل بتاع نسمه و هاتيه معايا
ام عبده / ما هى ممكن تتكلم و تقول كل حاجه و يجيبونا من قفانا
محمود/ مش هتقدر تفتح بقها خدى بس الواد و امشوا
ام عبده / اما اشوف اخرتها
ام عبده تدخل اوضه نسمه تلاقى ام محمود بتربطها جامد اوى
بدر / ابوس ايدك يا ستى ما تزعليش من امى هى بتحبك
ام محمود / اخرس يا وله
ام عبده / ما تخفش يا حبيبي انا بس هاخد اخوك مشوار لحد ما امك ما تفوق و هنرجع على طول
ام محمود / فين
ام عبده/ اختك تعبانه
ام محمود / اختى !!! يا لهوي يا اختى يا خرابى يا اختى
ام محمود تطلع تجرى ام عبده تشيل الواد الصغير و تجرى وراها تعدى من قدام عربيه رجاله صابر
الراجل/ الحجه ام محمود طلعت تجرى و هى بتقول اختى اختى شكل الصريخ ده كان منها يا كبير ... الحجه ام عبده نزلت وراها ... لا لسه فوق ... حاضر حاضر هطلع اشوف بيعمل ايه لوحده حالا حاضر
الراجل ينزل من العربيه يطلع يجرى على فوق يشوف محمود واخد بدر فى ايده و بيقفل الباب و بدر بيعيط
محمود / انتوا طالعين لحد هنا يا بجاحه امك يا اخى
الراجل / خير شوفت الست الوالده بتجرى
محمود / و انت مال امك انت يا ابن الكلب يا واطى ايه شوفتوا الحريم خارجين بيصرخوا قولتوا الجوا خلي ليكوا يا ولاد الحرام يا انجاس لااااااا دا احنا صاحين ليكوا اوى
ست تنزل من فوق
الست / فى ايه يا محمود هو صوت الصريخ دا من عندكوا
محمود / ايوه يا حجه امى كانت بتصرخ جالنا اخبار مش تمام عن خالتى تسلمى لسؤالك ... انت لسه واقف مكانك بتعمل ايه يا ابن الكلب انت
الراجل / انا ساكت لك من الصبح
محمود / لا ما تسكتش و هات اخرك ... شاهده يا حجه بيتهجموا على مرات اخويا فى بيتها راكنين قصاد البيت مستنين فرصه
الست / ازاى يعني ايه الكلام ده صحيح انت ايه اللى مطلعك لحد هنا يا جدع انت اقسم بالله ان ما مشيت من هنا لاصوت و الم عليكوا خلق الله
الراجل/ جرا ايه يا حجه سمعت الصريخ طلعت اطمن
محمود / و اطمنت يا خويا غور بقي خلينى اللحق اشوف اللى ورايا
الراجل / انت واخد الواد ده و رايح على فين
محمود / و انت مال امك انت يا جدع انت ايه ناويين تخطفوه تانى يا ولاد الحرام و لا ايه
الراجل / اقسم بالله
الست / ما خلاص بقي يا جدع انت انت مطول فى الكلام كدا ليه
راجل من رجاله عباده يطلع
راجل ع / فى ايه يا حمدان خير فى ايه يا محمود
محمود/ دا ما بقاش سلم دى بقت محطه مصر ... عن اذنكوا يلا يا بدر ورانا حاجات كتير نعملها
بدر يبص على الباب
بدر / هنسيب أمى لوحدها
محمود / و الله عندك حق انا واحد غيرى ما كانش اتعتع من هنا بعد اللمه الحلوه دى بس ما يصحش هنروح نجيب الطلبات و نرجع على طول ... ممكن تهونا بقي
راجل عباده / يلا يا حمدان بلاها الوقفه دى ما تجيبلناش الكلام
حمدان ينزل و الراجل وراه
محمود / هنروح نجيب شويه طلبات للبيت يا حجه امانه عليكى لو رجاله صابر عتبوا البيت ده لتصوتى و تلمى عليهم الخلق حسبي الله و نعم الوكيل فيهم
الست / بس من امتى رجاله صابر بياذوا الناس بس يا محمود يا ابنى
محمود / نقول ايه حسبي الله و نعم الوكيل  ... عن اذنك
محمود يشيل بدر و ينزلوا يتكلموا و هم بيتمشوا
محمود / شاطر هنروح نجيب لامك الدوا و نرجع طول ما انت مؤدب امك و اخوك هيبقوا بخير
بدر يعيط
محمود / انشف ياض دا انت جزار طالع خرع لمين كدا
بدر / انا خايف
محمود/ ما تخافش هتبقي كويسه دى خناقه حريم عاديه ياما بتحصل ايه نسيت الخناقه اللى كان جدك و ستك فيها و امك اغم عليها
بدر يهز راسه
محمود / اهم حاجه انك تبقي راجل و ما تطلعش سر اهل بيتك للغرب عشان ما حدش يدخل و يكبر الموضوع
بدر يهز راسه
محمود/ شاطر ... تعال هجيبلك دلوقت كل الحلويات اللى فى الكشك
بدر / لا انا عاوز دوا لامى زى ما وعدتني
محمود / هنجيب ياض ما تخافش امك زى الفل هو انا هاذيكوا يا اهبل ما تخافش
......................
فى الجبل
صابر قاعد تليفونه يرن
صابر / السلام عليكم ... تمام خليك وراهم عينك ما تفارقش الواد ... سلام
شاكر / عيله الجزار برده
صابر / قلبي مش مرتاح يا شاكر
شاكر / انت عملت الصح انك تبقي بعيد
صابر / عارف ... و المرادى بالذات عارف ... بس مش مرتاح
شاكر يطلع التليفون و يتصل
شاكر / السلام عليكم يا عمى ... فى جديد ... تمام مستني منك تليفون ... فى حفظ الله
شاكر يقفل
شاكر / الكبير رايح ليها البيت بنفسه يتطمن عليها ما تقلقش
صمت
شاكر / هو انت كان فى حاجه بينكوا زمان بجد و لا كان من طرفك انت بس زى ما بيقولوا
صمت
شاكر / طب انت لسه بتحبها ؟
صابر يتنهد
شاكر / ساعات الانسان بيبقي فاكر ان سعادته و حياته متوقفه على حد او شخص ... بس لما بتشوفه سعيد حتى لو مع غيرك ... ما دام بتحبه هتدوس على نفسك عادى
صابر يبص لشاكر
شاكر / بتوجع بس بتستحملها بترضي و بتكون مبسوط عشانه كمان
صابر / ما بتحسش ساعات ان يمكن لو كانت معاك انت كانت هتبقي سعيده اكتر ؟
شاكر / ما يمكن دا شيطان ؟
صابر / هى مين بقي ؟
شاكر / هى مين ؟
صابر يبتسم و يبص قدامه و شاكر متابعه
.....................
فى شقه نسمه
نسمه تفوق و هى ماسكه دماغها تبص على ايدها مفيش دم تقوم تقف و هى بتتسند تلاقى ورقه جنبها
نسمه / انا اخدت بدر اجيب له حلويات على ما تصحى و امى خدت فايز معاها و راحت تزور اختها فى المنصوره ما تقلقيش عليه هيخلوه فى عنيهم و يجيبوه معاهم و هم راجعين ... ايه الكلام الاهبل ده
نسمه تفتح باب الاوضه و تطلع بره و تروح تفتح باب الشقه يفتح معاها عادى تيجي تطلع بره تبص على نفسها و تعدل هدومها و تيجي تطلع تلاقى بدر بيجرى عليها و وراه محمود شايل اكياس كتير
محمود / على فين يا ام بدر
نسمه / اوعى تفتكر انى هسكت على اللى حصل انا هوديكوا
محمود / ششششش انا معاكى مش معاهم ... انا نفسي مش موافق على كل الهبل ده
نسمه / و ساكت ليه فين ابنى
محمود / مع عمتى خدته عشان تضمن سكوتك
نسمه / و انتوا فاكرين انى هسكت بجد فاكرين ان الكبير مش هيعرف يجيبهولى
محمود / لا حول و لا قوه الا بالله دا بدل ما تلايميها و تحليها بهدوء و تحسبيها بالعقل هو انا لو كنت وسخ اوى كدا كنت رجعت لك الواد و جبت لك كل طلبات البيت ... اهدى و ارتاحى و خلينا نفكر نشوف للوحله دى حل
نسمه / الوحله دى انتوا اللى وحلتوا روحكوا فيها
محمود / بسبب صابر و رجالته انتى ما شوفتيش حاجه ... استنى ... يا حجه ام إيمان  يا حجه ام إيمان 
نسمه / انت بتناديها ليه
محمود / يا ستى اصبري هو انا يعني هناديها الا عشان اوريكى بعينك و اسمعك بودانك اللى خلاهم يعملوا كدا ... يا حجه ام إيمان  ... هى خرجت و لا ايه ؟!
عباده يدخل
عباده / السلام عليكم ... خير واقفين على السلم كدا ليه
ام إيمان  تنزل من فوق
ام إيمان  / خير يا محمود يا ابنى كنت بصلى بتنادي ليه ... اهلا يا كبير
عباده / اهلا يا ست الكل
محمود / اهو الكبير بنفسه جه اهو عشان نحكيله كلنا كل حاجه و اولنا الست الطيبه الطاهره دى اللى لسه قايمه من على سجاده الصلاه دى ... يا ست الكل ممكن تقولى للكبير رجاله صابر عملوا ايه النهرده
عباده / بيقول سمع صريخ و طلع يطمن
محمود / لا يا كبير ما حصلش ... اسمحلى ... الجدع ده ما عتبش عتبه البيت الا اما اشاف امى و عمتى خارجين من البيت بيجروا لا جرى وراهم و لا وقفهم و سالهم
عباده / كان عارف انك فوق لوحدك مع نسمه طلع
محمود/ و انا كنت هعمل ايه هنا يعني كنت بقفل الشقه و اخد بدر و نزلنا جبنا طلبات للبيت ... يا بدر واد يا بدر
نسمه/ خلى ابنى بره حكايتك دى ... انا عاوزه عيالى فى حضنى يا كبير
عباده / هى الست ام عبده ما قالتلكيش انها هتاخد فايز معاها
محمود / قالت لها و اتخانقوا يا كبير بس سعادتك عارف كلام مين بيمشي فى الاخر مش كدا يا ام بدر
نسمه / انا عاوزه ابنى فى حضنى يا كبير لو سمحت و حضرتك كنت عرضت عليا عرض قبل كدا انك توديني انا و عيالى مكان بعيد عن هنا انا ما ليش عيش فى البلد دى تانى
ام إيمان  / ليه بس يا نسمه يا بنتى احنا زعلناكى فى حاجه
محمود/ مفيش امان يا ست الكل رجاله صابر مش راضيين يفرقوا البيت و النهرده شوفتى بعينك
نسمه / رجع لى ابنى يا كبير ابوس ايدك و خدنا من هنا
عباده / تمام يا بنتى ادخلى بيتك و اقفلى عليكي الباب و ساعتين زمن و ابنك هيبقي فى حضنك
نسمه / لا يا كبير ... بعد اذنك انا عاوزه ابقي فى بيتك انت لحد ما ابنى يبقي فى حضنى
محمود / انتى بتقولى ايه يا نسمه
عباده / و ماله لمى حاجتك و حاجه الواد ... او ناديه و تعالى و احنا هنتصرف فى اللى تحتاجيه
محمود / انت بتقول ايه يا كبير بس دى فى العده يعنى ما ينفعش تخرج من بيتها اساسا و بعدين ما تاخذنيش تقعد فى بيتك بتاع ايه
نسمه / بناء انى خايفه افضل لوحدى فى وجود رجاله صابر تحت البيت و امى مش موجوده يا محمود
محمود / و هو حد يستجرى يهوب منك دا انا كنت قطعت له رجله
نسمه / انا عاوزه ابنى يا كبير ابوس ايدك قبل ما اطق
محمود يبص لنسمه عباده يطلع الموبايل و يعمل تليفون و محمود و نسمه بيبصوا لبعض
.......................
فى الجيم
نجاه واقفه قصاد خمس بنات بيهزروا و يتمرقعوا تحط ايدها فى وسطها و تنفخ
نجاه / انتوا جايين ليه؟
بنت ١ / و الله ابويا قال الكبير قال اللى عاوزه تتعلم تدافع عن نفسها قولت و ماله
نجاه / يعني انتى عاوزه تتعلمي فعلا
بنت ١ / ايوه يعني و بعدين بصراحه بيبقي شكلهم حلو اوى فى السيما لما بيتشقلبوا كدا و يضربوا و يعملوا الحركات بتاعتهم و شعرهم يفضل يطير كدا فالبدله الجلد الضيقه دى
البنات تضحك الا نجاه
نجاه / بس انتى محجبه يعني لا شعر هيطير و لا هتلبسي بدله جلد ضيقه
بنت ٢ / انا بقي جايه عشان لو اى واد عره بسبسلى بس اطير له صف سنانه الفوقانى
البنات تضحك من ضمنهم نجاه
نجاه/ و التحتاني هتخليهوله؟!
بنت ٢ / اطيرهوله بالمره خساره فى امه
نجاه / ممتاز .. و انتى
بنت ٣ / ورد قالت هتيجي استأذنت من ابويا و قالى روحى
نجاه / اصلا !! و ماله ... و انتى يا ورد جايه ليه
ورد / و الله انا اخويا رايح فين رايح الملعب اتمرن جاى منين جاى من التمرين و كل يومين يجي يطبق اللى اتعلمه فيا لما قفايا ورم قولت ما بدهاش بقي عاد لينتقم
الكل يضحك
نجاه / و انتى يا إيناس جايه ليه
إيناس/ احسن من قعده البيت
نجاه / دا انتى غلبتى تقى
بنت ٣ تضحك
نجاه / بصوا بقي ... انا شخصيا مبسوطه جدا انكوا جيتوا اى كان السبب و اللى واضح انكوا جايين تنبسطوا فى التكييف شويه و تغيروا جو و تخرجوا من البيت فعلا بس مجيتكوا لوحدها بدايه ما اقدرش اقول عليها لا ... بس خلونى بقي اقولكوا معلومه مهمه جدا فى التمرين ... اول يوم تمرين جسمك بيوجعك شويه او كتير لو انتوا بقالكوا كتير ما بتتمرنوش او عمركوا ما اتمرنتوا ... و عاوزه اقولكوا انى اقسم بالله ساعات كتير جدا بتعب برده لو فى تمرينه جديده او حاجه لان العضلات اللى فى جسمنا مش كلها شغاله طول الوقت و دا بيخليها تتعب طبيعي جدا فبالله عليكوا اى واحده تتعب النهرده تاخد باسط عضلات و انا مجدعه منى جايبه كميه احتياطي و هدى لكل واحده فيكوا شريط و هى مروحه و كريم كمان تدهنه على الحته اللى بتوجعها بس لو هتصدقونى الحاجه اللى هتجيب من الاخر مع الوجع ده انكوا تضغطوا على نفسكوا و تيجوا تانى
بنت ٢ / هو الكلام عن الوجع ده ما اتقالش قبل التمرين ليه
نجاه / هو احنا النهرده اتمرنا اصلا انا بتكلم فى العموم انما النهرده كان دلع
بنت ١ / كل ده و دلع دا انا درعاتى اتخدلت
نجاه / معلش عشان اول مره ليكي خالص قومى من قدام التليفزيون شويه ايه ما بتعجنيش مع امك خالص
بنت ١ / هو لسه فى حد بيعجن ما الافران الآلى ملت البلد... انتى بتعجنى ؟!
نجاه/ مش دايما ... بس عندنا فى البيت بيعجنوا و انتى اكيد عارفه... ما علينا ... انا كدا خلصت النهرده اغسلوا وشكوا كويس و لما تروحوا استحموا بمايه ساقعه
نجاه تروح تفتح شنطتها و تطلع علبه دوا و توزع شريط على كل واحده
نجاه / شايفين جايبه كميه قد ايه ؟!! بصراحه كنت متوقعه بنات اكتر بس مش مشكله المرادى الهديه شريط و علبه كريم المره الجايه وعد هيكون فى هدايا تانيه خالص
بنت ٢ / زى ايه يعني
نجاه / مفاجاه للى هيجي بس
البنات يضحكوا
بنت ٣ / هو احنا كدا بالويم يعني ممكن نبقي زيك كدا بعد كام تمرينه
نجاه / ايه ده ؟! انتى عاوزه تبقي زيي ؟!!
بنت ٣ / يعني مش اوى بس جسمك حلو و مشدود كدا لا بطن و لا جناب زى بتوع السيما
نجاه / ما الجسم ده بقي تانى جايزه فى حوار الرياضه و الجايزه الأولى الصحه ... ما علينا هستناكوا هنا و معاكوا المواعيد يلا عشان الرجاله زمانهم ملطوعين بره
نجاه تروح تلم حاجتها و البنات يلموا حاجتهم بمرقعه نجاه تسيبهم و تمشي تطلع بره تلاقى جابر واقف مع جوزيف و الرجاله اول ما يشوفوها الاتنين يجروا عليها و اول ما يوصلولها التلاته يبصوا لبعض باستغراب
نجاه / ايه !!
جوزيف / كنت عاوز اتكلم معاكى
جابر / فى ايه ؟
جوزيف / هتبقي تعرف ما تقلقش مش سر
جابر / و ما دام مش سر ما تقول
جوزيف / مش هنا ... جوه ... هو البنات يومهم بسنه فعلا و لا ايه الدنيا
نجاه / خلصوا خلاص هيلموا حاجتهم و يمشوا
جابر / ما ينفعش تسبيهم افرضي حد دخل و لا افرضي ما خرجوش و لا نعرف منين انهم خرجوا كلهم
جوزيف/ ما تدخل عادى هو انت داخل عليهم الحمام دا جيم و فيه كاميرات و اكيد هم عارفين انهم مفصولين كام ساعه
جابر / دول حريم اهل البلد يعني كل الكلام ده ما ياكلش معاهم
جوزيف / لكعيه يعني
نجاه/ لا بس مدلعين و مطمنين حاجه بين الاتنين دول كدا
جوزيف / طب انا جبت لك حاجه مخصوص
نجاه / خير
جوزيف يروح ناحيه العربيه و يطلع بوكس
جابر / اللهم طولك يا روح
نجاه / تفتكر ايه
جابر / يا خبر بفلوس
جوزيف يرجع
جوزيف/ ادخلى الحمام قيسيها طالبها على مقاسك و لسه واصله
جابر / انت يا ابنى حد مسلطك عليا ما هو خالى اكيد بيحبنى و مش هيجبرنى اتعامل معاك و اتجلط الا لو قدرت تقنعه انك
جوزيف / دى بدله مضاده الرصاص مدعمه بنانوشيبس لتعزيز القوه و الكفاءه... و انتى لابسه البدله دى كانك بقوه عشر رجاله
نجاه تفتح البوكس و تطلعها و تمطها كانها مطاط قوى قطعه واحده بتغطي الجسم كله ما عدا الوش بكابتشو و جوانتي و شراب 
نجاه/ ايه الخامه دى لا دى هتبقي ملزقه جدا ما اللبسش انا الكلام ده
جوزيف / تحت الهدوم و شيلى حاجتك انا ما بشتغلش عندك و لما اجيب لك حاجه تقولى شكرا ايه ما علموهالكيش
نجاه / شكرا
جابر / البتاعه دى فيها نانوشيبس
جوزيف / اه
جابر / يعني تكنولوجيا ... يعني مش بس بتعزز حركتها و قوتها دى ممكن كمان تتحكم فيها حسب البرمجه و لا انا فاهم غلط
جوزيف / لا انت فاهم صح
نجاه / و جايبهالى ؟!!
جوزيف / انتى بتثقى فيا و لا لا
جابر / لا
جوزيف / انت اسمك نجاه ... شوفي لينا يا بنتى البنات دول هيخلصوا فى سنتهم و لا اقتحم عليهم المكان
نجاه / بالراحه
نجاه ترجع الجيم
جابر / انت جبت البتاع ده منين
جوزيف / جبته من مخزن اسلحه سرى فى فنلندا عاوز واحد اعتقد مقاسك هيبقي اكس لارج او اتنين مش متأكد
جابر / و انت مقاسك كام
جوزيف / انا بحب اللعبها ملط
جوزيف يحدف لجابر بوسه جابر يبص له بقرف و يبص الناحيه التانيه و يتنهد
جوزيف/ ما تاخد تشيل شويه
جابر / رجعها العربيه و ريح نفسك
جوزيف/ ليه دى مقاسها بالظبط
جابر / بقولك ايه ... انت مش هتكسب حاجه من محاولتك المستمره لاستفزازى و انك تخسرني صدقنى هيخسرك فاهمد عنى عشان ما اتغاباش عليك ... اهمد
جوزيف / اولا انا ما بحاولش استفزك ... على الاقل دلوقت ... بس انا فعلا مش فاهم
جابر / فى ان حريمنا خط أحمر انت محتاج كام سنه عشان تفهم الجمله دى
جوزيف / انت اللى مش قادر تفهم ... انا نجاه مهمه بالنسبالى زى ما هى مهمه بالنسبالك بالظبط
جابر / دا لما تشوف حلمه ودنك
جوزيف / طظ فيك و فى ودنى دى الحقيقه انا بخاف عليها و بحاول احميها بكل الطرق اللى اقدر عليها و لو انت مش قادر تشوف ده بعنيك اكشف نظر
جابر / حمايتها مش واقفه عليك
جوزيف / ما شوفتكش فلحت مره يعني عشان تتكلم بقلب جامد اوى كدا تحب اعدهملك
راجل يدخل من بعيد
الراجل / جرا ايه يا رجاله استهدوا بالله صوتكوا على و الناس بتتفرج
البنات يطلعوا من الجيم
نجاه / تمام تعالوا فاضي... هتروحنى يا جابر
جوزيف / انا كلمت ابوكى و مختار و دياب و منصور و اخواتك و زمانهم جايين استنى
نجاه / يونس ما تقومش الدنيا علينا بالله عليك لمها
جابر / دى نصيحه حلوه اوى
جوزيف / براحتك
جوزيف يسيب البوكس يقع فى الارض يتفتح و اللى فيه يتبعتر و يمشي
جابر / تعالى اوصلك
نجاه تنزل على ركبها تلم الحاجه فى البوكس تانى جابر بسرعه ينزل و يلم معاها
جابر / انا ما بثقش فيه ذره و اى كان البتاع ده
جوزيف يرجع مع مختار
مختار / فى ايه ما اسيبكوش لوحدكوا ثوانى غير لما تتخانقوا
نجاه تقف شايله الصندوق
نجاه/ احنا ما اتخانقناش
مختار / هو ده البتاع اللى عليه الكلام
جابر / ابوس رجلك يا خالى
مختار / استنى يا جابر اما نجرب الحاجه و نحكم عليها صح
جابر / هنجرب فى نجاه يا خالى
مختار / هياذيها ليه يا جابر اديني سبب
جابر/ انا تعبت اقسم بالله
جابر يدخل الجيم نجاه تيجي تروح وراه جوزيف يمسك ايدها تبصله يسحب ايده
جوزيف / ما حدش غيره جوه و دى خلوه
مختار يبص لجوزيف بطرف عينه يلاقيه مبتسم
جوزيف / براحتك انا بس بقولك عشان ما تقوليش ما قولتش
نجاه تبص لمختار و تروح تركب العربيه و ترزع الباب و تطلع الموبايل و تتصل بحد
مختار / خف
جوزيف / اكتر من كدا ايه ما تتقوا الله بقي
مختار / اللهم اجعلنا من المتقين قول امين
جوزيف / امين
........................
فى السرايا
نسمه قاعده فى المضيفه و بدر قاعد جنبها هند تدخل ليها صينيه اكل نسمه تقوم تجرى تاخد منها
نسمه / تعبتى نفسك يا ام شاكر ما كانلوش لزوم التعب ده
هند / تعبك راحه دى حاجه كدا فى السريع
نسمه / هو الكبير فين بعد اذنك عاوزه اسأله عن ابنى ان كان فى اى اخبار عنه و لا حاجه
هند / واقف فى الجنينه بره اطلعيله
نسمه / لو جعان يا بدر كل بالادب و اللعب فى الموبايل لحد ما ارجع لا تلعب فى حاجه و لا تقرب من حاجه
هند / ما تسبيه ياخد راحته هيعمل ايه يعني و بعدين انتى حبساه هنا ليه ما تطلعيه يلعب مع العيال فى الجنينه
نسمه / ابوس ايدك يا ام شاكر انا بموت انا بلاقي واد بضيع التانى لما هاين عليا اموت نفسي و اخلص
هند / لا حول و لا قوه الا بالله ايه الكلام ده و بعدين الواد مع سته يا نسمه عيب الكلام ده
نسمه / عيب !! هو انا مسكتنى الا العيب
نسمه تقعد و تقرقض فى ضوافرها هند تقعد قصادها و تجبرها تبص لها
هند / فى ايه يا نسمه ايه اللى حصل
نسمه/ ما فيش
هند / لا فى خير ؟
بدر / امى متخانقه مع ستى و ضربوها
نسمه / بدر اخرس و إياك تفتح بقك تانى
هند / الكلام ده جد !!
نسمه / ابوس رجلك ما تقولى لحد الدنيا والعه حواليا خلقه و ما ليش لا حد و لا مكان اروحه و العيال دى ما لهمش ذنب فى كل ده فخلينا نخلص و هاتولى ابنى خلونى اغور فى داهيه
هند/ و الله ما يحصل ابدا فى ايه ايه اللى حصل
نسمه تبص الناحيه التانيه
احلام تدخل
احلام / الحج عويس و الحجه ام نسمه بره بيسالوا عليها
نسمه / اهى كملت ... كملت
هند / ايه يا بنتى فى ايه دول امك و ابوكى
ام نسمه تدخل
ام نسمه / بنتى !!! الحمد لله انك بخير فى ايه يا ضنايا ايه اللى حصل مالك ايه اللى جابك هنا ايه اللى حصل احكيلى يا ضنايا احكى لامك
نسمه / ما فيش حاجه ياما ما تقلقيش عليا انا تمام
ام نسمه / و ما دام تمام ايه اللى يسيبك بيتك و بيت ابوكى و يجيبك هنا
نسمه / انا مرتاحه هنا ياما تسلمى
ام نسمه / هو ايه اللى تسلمى و مرتاحه هو فى حد عاقل يعمل كدا فهمينا فى ايه ... و فين فايز
بدر / فايز مع ستى
نسمه تبص لبدر يبص فى الارض
نسمه / روح اللعب مع العيال فى الجنينه الورانيه
بدر يطلع يجرى
ام نسمه / لاااااا دا الحكايه دى ما يتسكتش عليها انا قولت الوليه دى مش هتجيبها لبر انتى امنتيلها تاخد الواد الصغير بعد ما ضيعت الواد الكبير فى المول جرا ايه يا نسمه اتجنيتي فى عقلك و لا ايه
نسمه / ابوس رجلك ياما تاخدى ابويا و تروحوا
ام نسمه / نروح فين و نسيبك رجلنا على رجلك ايه ما لكيش اهل و لا ايه
نسمه/ ايوه ما ليش
هند / نسمه !!!
............................