((((((( الكبيره ٢ )))))))))
#لولو_محمد
الحلقه ٢٠
صابر يطلع المسدس و يضرب الحبل الراجل يقع على راسه يعانى عشان يتعدل و يقعد و يرفع راسه لفوق
عباده / و هى لما تتفضح و تطلق فاكر انه هيتجوزها ازاى
الراجل / جواز ايه دا امه كانت تولع فيه دا بقاله سنين بيحاول معاها و هى تصده و يستهبل عليها و يطلعها الغلطانه لما امه كرهتها و فكراها بتوقع بين عيالها و كدا كدا هى مقاطعه اهلها فلما هتبقي فى الشارع بفضيحه مش هتلاقيلها مطرح الا حضنه اقسم بالله انا ما اعرف حاجه تانى
دياب / هى الناس جرالها ايه
صابر / هاتولى رعد
عباده / استنى ... بلاش انت يا صابر
صابر/ الموضوع ده يخصنى
عباده/ و عشان كدا بقولك خليك بعيد ... لمصلحتها
صابر / انا صبرت كتير و جيت على نفسي عشانكوا كتير
عباده/ اعتبرها اخر مره ... لجل خاطر الغاليين يا صابر
..........................
صابر يبص لعباده تعبان يغمض عينه و يهز راسه موافق
عباده / تسلم و تعيش ... انت حقنته بايه
جوزيف / بى كاى معدل اديله ساعه زمن او اقل
عباده / خمسه و اربعين ثانيه ... خده يا دياب و هاتولى رعد الجزار
دياب / امرك
صابر / و الكلب ده
عباده / لا ما تقلقش عليه هو كدا كدا خد عقابه و بزياده كمان عاوز تخليه معاك تتشفي فيه و هو بيتعذب عاوز ترميه فى الشارع ... هسيبهالك دى و لا كانى اعرف عنه حاجه
صابر يهز راسه عباده و دياب و جوزيف يمشوا و الراجل ينادى عليهم
الراجل / يا كبير اخر مره يا كبير دول فدانين ارض يا كبير اخر مره و الله يا كبير ارحمنى يا كبير
صابر يروح يحشر القماشه فى بقه تانى و الراجل يعيط
صابر / سمعت انا عن المعدل ده خلينا نشوف بيعمل ايه ... استنانى هجيب فتله و ابره اخيطلك جرحك ... مش عاوزك تموت دلوقت ... نارى مش هتبرد
صابر يزق وش الراجل يوقعه فى الارض و يدخل جوه و الرجاله واقفه تبص لبعض و هم متوترين
...........................
فى المستشفي
منصور و شاكر يدخلوا و وراهم رجاله كتير كل اللى فى المستشفي يتخض جزء يركب الاسانسير و الباقي يطلعو جرى على السلم اول ما الاسانسير يوصل
منصور / خليكوا هنا ... تعال يا شاكر
منصور و شاكر يروحوا يخبطوا على باب عبد الهادى و يفتحوا الباب و يدخلوا
الست / اهلا اهلا بزينه الشباب و الرجاله
منصور / اذيك يا امى ... ازيك يا عبد الهادى سلامتك ... ازيك يا رعد
عبد الهادى / تسلم يا سيد الناس
رعد / نورتونا تشربوا ايه
منصور يقفل الباب و يشد كرسي
منصور / الصراحه انا مش جاى اضايف ... انا جاى عاوزك فى مشوار احتمال ما ترجعش منه تانى ... و دا احتمال كبير
عبد الهادى / خير يا سيد الناس انا معاك ناديلى الدكتور بس يكتبلى خروج و انا رجلى قبل رجلك
منصور / واحد ابن حرام بيقول ان رعد كاريه على واحده كدا يخرب بيتها
الست / يا مصيبتي كداب ابن كدابه انا ابنى ما يعملش كدا ابدا
منصور / ما احنا هناخده نحطه على جهاز كشف الكدب و نراجع معاه الكاميرات بخط سيره الفتره اللى فاتت و نشوف
رعد / انا ما عملتش حاجه و ما تاخذنيش يا سي منصور انا مش عيل صغير اتفسح الفسيحه دى انا راجلكوا من سنين
منصور / ما عشان كدا احنا اللى جاينلك مش حد تانى اصل الراجل ابن الحرام التانى وقع فى ايد الخواجه اداله حقنه بى كاى من اللى هى
الست / يا مصيبتي هو لسه موجود
منصور / الخوجات ما بيغلبوش يا اما و بعدين حضرتك فاكره الراجل قر ازاى بكل حاجه دا استحمل جلد ما يستحملوش حمار فى مطلع و ما نطقش الا اما البى كاى اشتغل و زمانه دلوقت بيشد فى شعره و بيخبط راسه فى الحيط من الوجع اصلى بعيد عنكوا مجربه
الست / يا كبدى يا ابنى
عبد الهادى/ انت ليك دخل بالحكايه دى يا رعد
رعد / تعرف عن اخوك كدا مين بنت الحرام اللى اتبلت عليا
شاكر / مش هى اللى جابت سيرتك دا صاحبك
رعد / انا ما ليش اصحاب
منصور / يعني هتيجي معانا بالزوق و لا ندخل الرجاله تجرجرك قصاد امك
الست/ يا ابنى احنا مش بتوع مشاكل و انتوا عارفينا احنا رجالتكوا من سنين
منصور / كلو الا الولايا يا امى
الست / طب قولى هى مين و انا احب على ايديها و رجليها هى و اهلها استسمحها
رعد / ياما انا ما عملتش حاجه
منصور / يبقي هتيجي و يتحقق معاك
رعد / التحقيق معايا اهانه ليا والاتهام ده مش رعد الجزار اللى يتوجهله احنا فوق مستوى الشبهات
عبد الهادى / سيبونى انا و سي منصور لوحدنا
رعد / يا عبده الكلام ده كله كدب
عبد الهادى/ اطلعوا بره ما تتعبونيش
شاكر / اتفضلى يا امى ... تعال معانا يا رعد
رعد / انا مش متحرك من مكانى و لو عندكوا دليل ضدى بلغوا عنى الحكومه انا مش قليل انا مش هفيه هو فى ايه انا رعد الجزار يا بلد هو فى ايه
عبد الهادى / رعد
رعد / انت هتنصرهم عليا دا انت لسه ما وقعتش و بيتكاتروا عليا يا جدع انا ما عملتش حاجه انتوا فاكرينها سايبه انا مش هسكت انا مش هسيب حقى انتوا بتعملوا معانا كدا ليه
منصور / دخل الرجاله يا شاكر
شاكر يفتح الباب و الست بتصرخ تترجى منصور
الست / ما يعملهاش و الله ما يعملها مظلوم يا سي منصور و الله العظيم ابنى ما يعملهاش
الرجاله تسحب رعد و هو بيقاوم الست تحاول تدخل منصور يمسكها يحوشها تقع فى الارض و هى لسه بتقاوم عبد الهادى يبص للسقف و هو مستسلم لكل اللى بيحصل الرجاله يقفلوا الباب الست تقعد فى الارض تعيط و تولول
منصور / حقك عليا يا امى
الست / و الله ما عملها
عبد الهادى / عملها يا اما عملها
الست تتسند على السرير و تقوم منصور يساعدها
الست / انت تخرس خالص اخوك اشرف من الشرف اخوك دا سيد الناس ... قولى مين مين البت اللى رمت بلاها عليه قولى مين هى مين يا منصور قولى اسمها قولى هى مين
منصور / مش هى اللى جابت سيرته
الست / هى اللى كرت الواد عليه يجيب سيره ابنى تلاقيها لايده عليه و هو مش مديها وش قالت تكسر عينه و تساومه قولى يا ابنى اسمها و ريح قلبي
عبد الهادى / بس بقي ياما انتى ما شوفتيش بعينك ابنك اللى عاملها لو كان صادق كانت عينه هتبقي قويه كان هيروح و يتحقق معاه
الست / مظلوم يا عبده و الله مظلوم
عبد الهادى / ارحميني ياما و ارحمى نفسك ... مين البت يا سي منصور اخويا استوطى مع مين
منصور يروح يمسك ايد عبد الهادى الشمال و يلف الدبله فى صباعه
منصور / اهدى يا عبده اهدى كل حاجه تمام و اللى عمل حاجه غلط اكيد هيتجازا
الست / يا ناس صدقونى حرام عليكوا
عبد الهادى يعيط منصور يمشي الست تمسك فيه
الست/ هتعملوا فيه ايه يا ابنى دا يتيم و ما لوش حد
منصور / امره مش فى ايدي يا امى حقك عليا .. حقك عليا يا عبد الهادى هبعتلك مراتك و عيالك يقعدوا جنبك عشان لو الحجه محتاجه ترتاح ... عن اذنكوا
منصور يمشي الست تبص على عبد الهادى راقد بيعيط و تبص حواليها مفيش حد تقع من طولها عبد الهادى يتنطر يطير على امه يسندها و هو بيعانى ينيمها فى السرير و يضرب الجرس ممرضه و دكتور يدخلوا جرى جرح عبد الهادى يفتح و الدم يبدا يبان على قميصه و هو مش مركز غير فى خضته على امه
......................
فى المخزن عند الاسير
الدكتور بيتكلم فى التليفون
الدكتور / ايوه يا كبير السلام عليكم ... الحاله فاقت ... اديته مهدئ و نيمته لحد ما حضرتك تجيله ... لا يا كبير الحاله مستقره الحمد لله ... و الله على حسب نوع الكلام اقدر اقولك هيستحمل و لا لا ... فى انتظارك يا كبير... فى انتظارك توصل بالف سلامه مع السلامه فى حفظ الله مع السلامه مع السلامه
......................
فى الشركه
دياب و جوزيف قاعدين فى المكتب دياب بيشتغل و جوزيف واقف بيبص على البلد من الشباك
دياب / قفشتك يا ابن الكلب
جوزيف يبص و يبتسم و يرجع يبص من الشباك تانى دياب يمسك الموبايل و يتصل
دياب / ايوه يا منصور ... بعتلك فيديو شوفه و قولى رايك ... سلام ... مالك
جوزيف باصص من الشباك
دياب / يونس ... مالك
جوزيف يبصله
جوزيف / بتكلمنى ... اسف كنت فاكرك بتكلم منصور خير لقيت حاجه
دياب / تعال شوف بنفسك
جوزيف / ما ليش مزاج كمل انت
دياب يقفل اللاب و يروح يقف جنبه
دياب / انت مضايق ان الكبير رفض
جوزيف / لا عادى مش فارق معايا
دياب / امال ايه بيفرق معاك
جوزيف / صدقنى لو قولتلك ما عدتش عارف ... الناس هنا مش ملايكه يا دياب ... ما يستاهلوش تموت عشانهم انا عارفهم اكتر منك تعبك انت و مراتك و اهلك و اولادكوا من بعدكوا كل ده عشان ناس
دياب / عشان نفسنا يا يونس احنا بنعمل كل ده لنفسنا
جوزيف / و اللى حصل النهرده ده لنفسكوا
دياب / قال رسول الله صلى الله عليه وسلم .. مَنْ نَفَّسَ عَنْ مُؤْمِنٍ كُرْبَةً مِنْ كُرَبِ الدُّنْيَا، نَفَّسَ اللهُ عَنْهُ كُرْبَةً مِنْ كُرَبِ يَوْمِ الْقِيَامَةِ، وَمَنْ يَسَّرَ عَلَى مُعْسِرٍ، يَسَّرَ اللهُ عَلَيْهِ فِي الدُّنْيَا وَالْآخِرَةِ، وَمَنْ سَتَرَ مُسْلِمًا، سَتَرَهُ اللهُ فِي الدُّنْيَا وَالْآخِرَةِ، وَاللهُ فِي عَوْنِ الْعَبْدِ مَا كَانَ الْعَبْدُ فِي عَوْنِ أَخِيهِ، وَمَنْ سَلَكَ طَرِيقًا يَلْتَمِسُ فِيهِ عِلْمًا، سَهَّلَ اللهُ لَهُ بِهِ طَرِيقًا إِلَى الْجَنَّةِ، وَمَا اجْتَمَعَ قَوْمٌ فِي بَيْتٍ مِنْ بُيُوتِ اللهِ، يَتْلُونَ كِتَابَ اللهِ، وَيَتَدَارَسُونَهُ بَيْنَهُمْ، إِلَّا نَزَلَتْ عَلَيْهِمِ السَّكِينَةُ، وَغَشِيَتْهُمُ الرَّحْمَةُ، وَحَفَّتْهُمُ الْمَلَائِكَةُ، وَذَكَرَهُمُ اللهُ فِيمَنْ عِنْدَهُ، وَمَنْ بَطَّأَ بِهِ عَمَلُهُ، لَمْ يُسْرِعْ بِهِ نَسَبُه ... صدق رسول الله صلى الله عليه وسلم بالبلدى كدا قدم السبت تلاقى الحد بس الحد ده اللى هيقدمهولك مش بنادم لاااا دا ربنا سبحانه و تعالى ... فهمت حاجه
جوزيف / فاهم بس ... من اللى شوفته مفيش الكلام ده و مش قادر اقتنع بكلامكوا حلو مش هقول لا مترتب و بتقولوه بطريقه حلوه بس كلام مجرد كلام مفيش دليل واحد على صحته
دياب / هتشوف الدليل لما تقرر تدور و تفتح قلبك الدليل موجود فى كل المواقف اللى حواليك
جوزيف / تمام
دياب / و اه بخصوص الجمله اللى قولتها لمنصور لما تبقي مراتك بتتقطع من البى كاى احب افكرك ان كلنا كنا حوالين نجاه و هى بتصرخ و لما تعرف نجاه اكتر هتعرف انها جبل ما يتهزش ساعتها كلنا ما كانش فى ايدنا غير الدعا و لا لما اتصابت و دخلت العمليات وقفنا كلنا على الباب ندعى و نصلى لحد ما ربنا قومهالنا بالسلامه
جوزيف / تمام
دياب / تمام
دياب يروح يقعد على اللاب و يكمل شغل
.......................
فى اوضه خديجه
خديجه بترتب هدوم فى الدولاب نجاه تخبط و تدخل
خديجه / ابوكى لسه ما جاش
نجاه / عارفه انا جايه لحضرتك
خديجه تنتبه نجاه تروح تحضنها خديجه تتخض
نجاه / انا بحبك اوى
خديجه / و انا كمان بحبك يا نجاه فى ايه يا قلبي مالك
نجاه / مفيش مخنوقه شويه
خديجه / سمعت ... سمعت انك اتخانقتى مع اخوكى
نجاه / لا مش خناقه انا مش متخانقه مع حد و لا زعلانه مع حد انا بس محتاجاكى شويه
خديجه / تعالى
خديجه و نجاه يروحوا يقعدوا على السرير
خديجه / حكايه الملايه خضتك و لا ايه يا بت ...يا بت دا انتى راسك ما ادقش عليها طبول دا انتى اتعملك عليها فرح بصاجات يعني المفروض تكونى نحستى
نجاه / تعبت
خديجه / حقك ... فيها ايه يعني اما تتعبى نامى و ارتاحى و ارمى حمولك على اللى خلقك لا يكلف الله نفسا الا وسعها و ما دام ابتلاكى يبقي انتى قد الشيله و هتصبرى لحد ما تطلعى منها و ربنا فرجه قريب ما تحمليش هم
نجاه / عمالين يمرنوا فينا ندافع عن نفسنا بالايد مع ان الطلقه مش محتاجه عضلات عشان تنضرب و الدرون مش محتاج نشانجى عشان تستخدمه و لا حتى رجاله و الروبوتات النونو الجديده دى قادره تدخل من تحت عقب الباب يعني
خديجه / يعني الامان فى الله وحده
نجاه/ و نعم بالله بس فى دنيا تانيه احنا مش قدها
خديجه / و لا هم قدنا احنا معانا الحق احنا معانا ربنا
نجاه / و نعم بالله
خديجه/ انتى وشك اصفر اجيبلك تاكلى
نجاه / لا عاوزه انام
خديجه / عين العقل انا لسه مغيره الملايه ... رزقك نامى و ارتاحى و انا هروح
نجاه / خليكي جنبى
خديجه / و احنا فى ديك الساعه اخليني جنبك دا انا ما صدقت مره من نفسك تجيلى و ما تجريش على ابوكى ... بت يا نجاه اوعى يكون غضبان عليكي
نجاه / و انا كنت هقدر اقف على رجلى لو ابويا زعلان منى حتى مش غضبان عليا
خديجه / ربنا يباركلنا فيه و فيكي و فى اخواتك و يباركلك فينا
نجاه / امين
خديجه / يلا يلا تعالى ننام شويه و نفرد ضهرنا كدا و نرتاح ما حدش واخد منها حاجه تعالى يا بت فى حضن امك تعالى
خديجه تحضن نجاه و يناموا و يستغطوا خديجه تبوس راس نجاه و هى مبسوطه
..............................
فى مكتب
عباده / ليه كدا يا رعد
رعد / انا ما عملتش حاجه
عباده يتنهد
عباده / هتكدب عليا و تفلت منها … بتحصل وارد تحصل ... لكن هتقول ايه لربنا هتقدر تكدب عليه
رعد / يا كبير احنا رجالتك من سنين ابا عن جد بتكدبنا و تصدق ناس شمال الشمال ليه دى اخره العشره و العيش و الملح يا كبير دا انا ابويا مات و هو بيخدمكوا و اخويا اتصاب و هو بيخدمكوا هو انا لازم اموت او اتصاب عشان تصدقونى يعني
عباده / يا منصور … منصور
منصور يدخل
عباده / شوف شغلك و وصله الجهاز
منصور يروح يوصل جهاز كشف الكذب
رعد / انا ما عملتش حاجه يا كبير و ما ليش دعوه بكل اللى بيحصل ده انا اخويا فى المستشفي بين الحياه و الموت و اروح اكرى على مراته
عباده يبتسم و منصور يوقف رعد يرتبك
عباده / مين قالك ان البنت اللى اتكرى عليها تبقي مرات اخوك
رعد / هاه
عباده / تحب اسلمك لصابر و لا اعاقبك بنفسي
رعد / حقك عليا يا كبير اخر مره اخر مره اقسم بالله ما هكررها الهى ربنا يباركلك فى الست نجاه اللهى ربنا ما يوريك فيها حاجه وحشه اخر مره وزه شيطان و مش هكررها دا انا خدامك يا كبير
منصور / اللى يغدر باخوه شقه و يبص فى لحمه ما يستاهلش يعيش و لا يؤتمن يا سي رعد انت اللى زيك يتعمل منه عبره
رعد / وزه شيطان يا كبير اقسم بالله اول و اخر مره اقسم بالله ما هعيدها
عباده / كل الايمانات اللى فاتت كانت كدب تفتكر هصدق يمين جديد طالع من بقك النجس ده … ابعته لصابر
رعد / لا يا كبير لا صابر لا يا كبير صابر لا
عباده / لو كنت كبيرك ما كنتش كدبت عليا فى وشي لو كنت قولت الحقيقه كنت رحمتك بس البجح اللى زيك ما يستاهلش الرحمه داهيه تاخدك انت و اللى زيك ... ابعته لصابر يا منصور
رعد يصرخ عباده يمشي
رعد / السماح يا كبير صابر لا يا كبير اقتلنى يا كبير ارحمنى يا كبير ... سي منصور سي منصور و غلاوه عيالك يا سي منصور ترحمنى اقتلنى و لا تبعتنيش لصابر يا سي منصور ابوس رجلك ابوس رجلك ارحمنى يا سي منصور
رعد يعيط
منصور / عيط عيط مع ان لسه بدرى على العياط بس عيط
منصور يضربه فى دماغه و يمشي و رجاله تدخل تكممه و تغطى راسه و هو بيصرخ و يقاوم
……………………..
فى المستشفي
عبد الهادى قاعد على كرسي و نسمه قاعده جنبه
نسمه / ما كنتش عارفه اعمل ايه خدت العيال و جريت على الكبير ما كنتش متخيله ابدا ان رعد اللى وراها
عبد الهادى / طول السنين دى الحوارات اللى كانت بتحصل بينكوا كانت حقيقه
نسمه تبص فى الارض و تعيط و تمسح دموعها عبد الهادى يتنهد
عبد الهادى / حقك عليا ... حقك عليا فى كل حاجه
نسمه / المهم سلامتك
عبد الهادى / تسلمى
دكتور يطلع من الاوضه عبد الهادى يقف بالعافيه و نسمه تسنده
الدكتور / الحمد لله حالتها مستقره اديناها مهدئ و نايمه دلوقت ياريت انت كمان ترجع اوضتك ترتاح
عبد الهادى / ارتاح ايه بس يا دكتور دى امى اللى راقده جوه اسيبها و ارتاح ازاى بس
الدكتور / لازم انت جرحك فتح و لازمك راحه ... هى كدا كدا مش هتفوق قبل ساعتين على الاقل افرد ضهرك فيهم
نسمه / انا هبقي بينك و بينها ما تشغلش بالك
عبد الهادى / تشكر يا دكتور تاعبينك
الدكتور / تعبك راحه المهم سلامتك عن اذنكوا
الدكتور يمشي
عبد الهادى / معاكى محمول
نسمه تطلع موبايلها و تديهوله يتصل بحد
عبد الهادى/ السلام عليكم يا كبير
عباده / حمد الله على سلامتك يا عبده اخبار الحجه ايه قالولى تعبت من اللى حصل
عبد الهادى / انا عاوز اخويا يا كبير انا اولى بيه من الغريب
عباده / اخوك مش محقوقلك بس محقوق لصابر كمان
عبد الهادى / انا هتكفل بيه يا كبير و حق صابر عندى
نسمه تنتبه عبد الهادى يبصلها تهرب بعنيها
عبد الهادى / يا كبير صابر مش هيسمى عليه انت عارف اللى فيها
عباده / المرادى مش هقدر افيدك يا عبد الهادى سامحنى كان لازم يفكر فى الحكايه دى قبل ما يكدب عليا فى وشي و يحلف مليون يمين انه برئ
عبد الهادى / تمام يا كبير كتر خيرك انا هتصرف
عباده / تمام فى حفظ الله
عبد الهادى يقفل و يرجعلها الموبايل
عبد الهادى / خليكي جنب امى لحد ما ارجع
نسمه / هتروح فين
عبد الهادى / خليكى جنب امى يا نسمه
نسمه / هتطلعله الجبل ... و انت فى حالتك دى ... جرحك فتح يا عبده جرحك طازه مش هتقدر
عبد الهادى / انا قولت الكلمه مرتين مش هعيدها التالته
نسمه تبص الناحيه التانيه و تفرك و ترجع تبصله برجاء يمشي
نسمه / حسبي الله و نعم الوكيل فيك يا رعد حسبي الله و نعم الوكيل
………………..
فى شقه جوزيف
همام قاعد بيفر فى تابلت جوزيف يدخل
همام / حمد الله على السلامه فاتك الغدى بس شلتلك منابك فى التلاجه
جوزيف / تسلم
جوزيف يروح يقعد جنبه همام يستغرب
جوزيف / انا عجبانى دماغك
همام / لا يا راجل و ايه كمان
جوزيف / كنت فاكرك عضلات بس طلعت بتفكر
همام / هات من الاخر يا عمى و اوعى تنسي ان دم ابويا فى رقبتك و ان كنت حاطت الجزمه فى بقي و صابر فدا مش عشان انا مش قدك و لا عشان سواد عنيك … لا دا عشان المصلحه العامه بتقول اننا نحط ايدينا فوق ايدين بعض
جوزيف / و عشان كدا بقولك ان دماغك عجبانى
همام / تشكر يا سيدي اؤمر بقي خير عاوز ايه من دماغى
جوزيف / سمعت انك هتجيب جاردات و توزعهم وسط رجالتكوا .. فكره مش وحشه بس مجازفه كبيره
همام / مش هجيبهم من الشارع انا عارف هجيبهم منين
جوزيف / اقدر اساعدك
همام يتنهد
جوزيف / هدفنا واحد على فكره ... بقولك ايه ... تحب تخرج
همام / نروح فين
جوزيف / هنروح القاهره ... هنبات يومين و نرجع
همام يبتسم بسخريه
جوزيف / هوريك دنيا ما تعرفش عنها حاجه
همام / دنيتك غير دنيتي
جوزيف / لا ما انا عارف انها مش هتعجبك بس انا كمان متاكد انك لما هتشوفها هتتاكد اكتر قد ايه انت محتاجنى
همام / ماشي امتى
جوزيف / نتحرك الفجر
همام / تمام
جوزيف يقوم و يدخل اوضته و يقفل الباب همام يكتب رساله و يبعتها و عينه على الباب
…………………..
فى الجبل
عبد الهادى طالع راجل يقابله
الراجل / خير يا عبد الهادى جاى تسال عن اخوك و لا ايه
عبد الهادى / هو فين
الراجل / بلاش يا ابن عمى انزل و انساه دا الكبير شايط قوى
عبد الهادى / انسي اخويا ... و الكبير ده كبير عليك انت مش عليا اوعالى السكه ما تفرهدنيش
الراجل / بلاش يا ابن عمى انت متصاب و مش حمل كرباج الكبير
عبد الهادى / ما لكش فيه ما تبقاش تيجي تحوش عنى يا اخى وسع كدا
الراجل / بكيفك
عبد الهادى يطلع و الراجل وراه و كل ما يقربوا صوت صريخ يبان اكتر
عبد الهادى / اخويا !!!
الراجل / ما تقلقش اخوك دوره ما جاش دا الجدع التانى استنى اناديلك الكبير
الراجل يدخل ثوانى و صابر يطلع عبد الهادى يفرد نفسه و يدارى وجعه
صابر / كرسي يا ابنى ... و لا تحب تدخل ترتاح جوه
عبد الهادى / هرتاح لما اخد اخويا و انزل كتر خيرك
صابر / هبقي اديك جتته تدفنها
عبد الهادى / الايد اللى هتتمد على اخويا هقطعها انت فاهم
صابر / قالولك اخوك عمل ايه
عبد الهادى / انا اولى بربايته منك سلمهونى
صابر / مش هيحصل
عبد الهادى / استهدى بالله يا صابر و لم الليله
صابر / هو انت جنس ملتك ايه باقي على اخوك حتى بعد ما عرفت اللى عمله
عبد الهادى / انا اولى بربايته من اى حد
صابر / و حقى ... هو انا اللى جيت رميت بلايا عليه ... دا هو اللى نكش ورايا بمنكاش و نادانى ... و اللى يحضر العفريت يا يعرف يصرفه يا يتحمل اذاه و انت فاهمنى و لا ايه
عبد الهادى / اؤمر
صابر / هينزل معاك ملط
عبد الهادى / موافق
صابر / مش ملط هدوم ... ملط من كله
عبد الهادى / يعني ايه
صابر / يعني فدادينه اللى بيوزعها هدايا دى هاخدها هينزل من هنا ملط ما حلتوش غير الهدمه اللى عليه
عبد الهادى / موافق
صابر / تمام ... هكلم المحامى يجهز العقود على ما تدخل تطمن على اخوك و تاخد واجبك
عبد الهادى / ماشي يا صابر ... ماشي
صابر يوسع السكه لعبد الهادى يدخل يلاقي اخوه قاعد بيعيط و جنبه الراجل مربط و بيتلوى و يعض فى الارض رعد اول ما يشوف اخوه يجرى يترمى تحت رجله
رعد / اخويا حبيبي كنت عارف انك مش هتسيبني هنا حقك عليا و الله ما هعمل كدا تانى ابوس رجلك اللحقنى عشان خاطر امك يا عبد الهادى و رحمه ابوك ما تسبنيش ليهم حقنونى بحاجه و قالوا لما تشتغل هبقي زيه و انا من ساعتها بموت يا خويا
عبد الهادى يبص لصابر
صابر / قوله شرط نزوله
عبد الهادى / لو عاوز تنزل هتتنازل عن كل اللى حلتك بيع و شرا
رعد / خد كل حاجه خد كل حاجه و اللحقنى بالعلاج قبل السم ده ما يجرى فى دمى ابوس ايدك اللحقنى انا اخوك ابوس رجلك يا عبد الهادى
صابر / انا لو منك اسيبنى اخلص عليه و اورثه انت اولى بارضه منى يا عبده
عبد الهادى / انا اولى باخويا منك
صابر / تمام ... هكلم المحامى يجيب العقود
رعد / همضيلك همضيلك اى حاجه بس اديني العلاج اديني العلاج السم بدا يجرى جوايا مصاريني بتتقطع
صابر يضحك و يطلع بره
رعد / ابوس رجلك يا خويا اللحقنى اللحقنى السم هيموتنى ابوس رجلك
عبد الهادى يطلع ورا صابر
عبد الهادى / احنا ما اتفقناش على كدا قولت الارض قولت هديهالك اديله العلاج
صابر / علاج لايه دا زى القرد ما فيهوش حاجه
عبد الهادى / انت ما حقنتوش زى الجدع التانى ده
صابر / الجدع التانى الخواجه اللى حاقنه انما اخوك محقون بميه و عقله الباطن هو اللى بيصورله الوجع لما شاف حبيب قلبه ... اللى كراه على مراتك ... بيتقطع فخاف يجراله زيه ... ما تخافش ما كنتش هقتله بالبساطه دى
عبد الهادى / حقك ما احنا حارقينك ما صدقت فرصه تتشفي
صابر يبتسم
صابر / لو كنت عاوز الفرصه كنت خلقتها لو كنت عاوز ائذيك ما كانش هيحوشنى عنك غير اللى خلقك لو كنت عاوز اقتلك حتى ... صحيح اللهم لا شماته ربنا يصبرك على ما بلاك ... لا و جاى بنفسك تفديه و انت فى الحاله دى ... يا ريته يستاهل
عبد الهادى / انا اولى بيه منك
صابر/ هتقتله يعني هتضيع نفسك و مراتك و عيالك عشانه
عبد الهادى / ما يخصكش
صابر / لا كدا الكلام اختلف و هديك عرض جديد
عبد الهادى / اتفقنا و خلص الكلام يا صابر
صابر / و انا رجعت فى كلامى هتعمل ايه
عبد الهادى / اوعى يغرك عيايا و لا كتر الرجاله حواليك
صابر / و اوعى يغرك انى عامل حساب لعياك و لا الظروف اللى انت موحول فيها ... روح يا عبد الهادى ... انزل على رجلك احسن لك
عبد الهادى / مش هنزل من غير اخويا يا صابر
صابر / يبقي هتشرف جاره
صابر يزعق الرجاله تتلم
عبد الهادى / طلبت الارض هديهالك لو طلبت ارضي فوقيها هديهالك
صابر / فكر فى عيالك ... فكر فى عيالك و بس ... هتسيبهم لمين ... دا اخوك اللى من دمك اللى جوه ده اخوك اللى من لحمك و دمك ... ما بالك بالغرب هيعملوا فيهم ايه دول هياكلوا لحمهم ني فوق ... انا مش باقي عليك و لا تفرق معايا بصاغ و انت عارف انى اطيق العمى و لا اطيقكش بس لمره واحده فى حياتك تتقى الله فى اللحم اللى فى رقبتك و تغور من وشي السعادى
عبد الهادى / انا اولى بيه منك
صابر / هى كدا يعني ... تمام ... ما كنتش ناويها دلوقت بس انت اللى اخترت ... امسكوه
الرجاله تمسك عبد الهادى صابر يشد بندقيه من على دراع راجل منهم و يدخل يضرب رعد طلقه فى دماغه يموته و يرمى البندقيه و يشد رعد يسحله على الارض و يرميه تحت رجلين عبد الهادى و عبد الهادى بيصرخ
عبد الهادى / هقتلك يا صابر هقتلك يا ابن الحرام و الله لاقتلك يا صابر هقتلك
صابر يروح يمسك عبد الهادى من فكه و يضغط
صابر / ارموه قصاد المستشفي خليهم يكملوا علاجه ... و لو هوبت ناحيه الجبل تانى هدفنك فيه و دا اخر كلام عندى … غوروه من وشي
الرجاله تشد عبد الهادى و هو بيصرخ و واحد منهم يشيل رعد على كتفه و يمشي وراهم
……………………
فى اوضه عباده
عباده يدخل و هو مرهق جدا و مش قادر يصلب طوله يروح يعلق العبايه و يقلع الجزمه و يرمى نفسه على اقرب كرسي خديجه تقلق و تصحى
خديجه / انت جيت يا عباده
عباده / اه .. جيت
نجاه تقلق
نجاه / ايه ده هو احنا امتى
عباده / اتارى الاوضه منوره و ما احتجتش اقيد النور ... نايمين بدرى كدا ليه
خديجه / انا قولت هنغفل ساعه و لا حاجه ... مش عارفه هنعمل ايه دلوقت يومنا اتقلب حاله اهو
نجاه / مالك يابا شكلك تعبان ... تعال ارتاح
عباده / بقيت بخير لما شوفتكوا
نجاه / طب تعال ارتاح و انا خلاص نمت هروح اشوف اى حاجه اعملها
عباده / يونس و همام مسافرين مصر الفجر
نجاه / خير فى حاجه و لا ايه ... لوحدهم ... هيسافروا لوحدهم
......................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
