(((((( الكبيره ٢)))))))
#لولو_محمد
الحلقه ٥٣
جابر/ اهو نومى اتلخبط شويه قولت اروح اشوف الدنيا ماشيه ازاى و فتحت الملفات اشتغل فيها لحد ما الموظفين جم و ظبطت معاهم الدنيا و الحمد لله يعني الشغل زى الساعه ما فيهوش اى مشاكل
عباده / كويس عقبالك
جابر يضحك بعدم فهم
عباده / لما تبقي زى الشغل ما عندكش مشاكل
جابر / الحمد لله انا زى الفل ما عنديش اى مشاكل
عباده / تمام ... هتعمل ايه دلوقت ايه دنيتك يعني
جابر / و الله انا كلت بره مع الناس فى الشركه و ممكن ادخل الجم شويه و بعدين على المران شويه و بعدين اروح انام يعني هتك على نفسي كدا عشان اظبط نومى تانى
عباده / تمام يا حبيبي لو احتجت اى حاجه انت عارف انا فين
جابر يبتسم و يروح بيته يدخل و يقفل الباب يروح الاوضه الرئيسيه يلاقي هدومه كلها محطوطه يطلع غيار و يجي يروح الحمام يلاقي موبايله على التسريحه و جنبه الشاحن ياخد نفس و يفضل واقف باصصله و متردد ياخد نفس و يروح يفتح الموبايل يلاقي سيل من الرسائل
جابر / ايه يعنى الدنيا طارت يعني لما الموبايل اتقفل كام ساعه ايه كل ده
جابر يفر فى الرسايل يلاقي رساله من نجاه يقف عندها و يدوس عليها حذف يطلعله رساله تأكيد و قبل ما يدوس اوك يدوس كنسل و يفتح الرساله
/////////////
نجاه / انا بقالى كتير متردده ان ابعت الرساله دى و لحد دلوقت مش عارفه اكتب فيها ايه بس انا مش قادره اتحمل فكره انك زعلان منى انا مش عارفه انا ضايقتكوا كلكوا ازاى كدا و يمكن انى مش عارفه ده يضايقكوا اكتر بس اقسم بالله ما عندى اغلى منكوا كلكوا و يا سيدي خليني انا الكبيره المرادى و هقولك حقك عليا ما تزعلش منى
///////////////
جابر يرمى الغيار من على كتفه و يطير يركب العربيه و يمشي و عباده متابعه من التراس و مبتسم
..............................
فى فيلا على
اكرم / هى كدا كدا لبستها بنتك و على اسمك و الموضوع عمال يوسع و مش هتعرف تلمه بعد كدا
على / انا قولت اللى عندى
اكرم / هو لما كل واحد فيكوا يعند مع التانى فاكرين مين اللى هيكسب فى الاخر ما حدش لا انت و لا هى و لا مهره يا على يا سيدي دخلها مركز تأهيل زى ما عملت مع مروان
على / انا حللت لمروان و كان زى الفل و لعلمك انا
اكرم / انت ابوها انا ما اقدرش اتصرف يا اخى افهم انت فاكر انى لو اقدر اتعامل بعيد عنك ما كنتش اتصرفت بس للاسف انت ابوها و انت المسؤل عنها
على / انا طهقت
اكرم / روح استلمها من المستشفي و وديها المركز و انا هتعامل بدالك فى اى حاجه تانيه ارتحت كدا
على / و انت فاكر ان كدا
اكرم / زى ما عملت فى مروان بالظبط الموضوع هيكون سرى لأبعد حد و ما حدش هيعرف انها هناك اصلا و من يوم ما تدخل لحد ما تخرج انا متكفل بمصاريفها
على / مش مساله فلوس يا اكرم
اكرم / عارف بس انا يا سيدي هخرجك من الصوره خالص و اريحك منها يا ابنى افهم الموضوع لو ما اتلمش دلوقت هتبقي فضيحه مش هتعرف تلمها عمرك كله انت فاهم و لا لا
على / خلاص خلاص تمام ايه المطلوب منى
اكرم / تروح تبعد الناس دول عن بنتك و تحطها فى المركز اللى فى الكرت ده
اكرم يدى لعلى كارت
اكرم / انا مرتب كل حاجه كل المطلوب منك انك تمضي على شويه ورق
على / ورق ايه ده
اكرم / انها بنتك و ان أنت الوحيد المسؤل عنها و انها فاقده للاهليه و ما ينفعش تخرج لاى سبب الا اما تكمل علاجها الا بموافقتك انت
على / لو ده هينهى القصه انا موافق
اكرم / تمام اتفضل
على يهز راسه و يمشي مع على يروحوا يركبوا عربيه و مروان متابعهم من فوق و مبتسم اول ما يخرجوا من الفيلا يدخل و هو فى منتهى السعاده
………………………..
فى شقه فى مصر
جوزيف يروح يفتح الباب يلاقى همام جوزيف يبتسم
جوزيف / جيت فى وقتك تعال بعمل صينيه بطاطس عالميه تعال
جوزيف يدخل يجرى على المطبخ و همام يدخل و هو مستغرب و يقفل الباب
همام / انت سريع اوى ما شاء الله
جوزيف من جوه / العمر ما فيهوش وقت نضيعه... ها ايه الجديد
همام / الجديد عندك انت انت اللى سبت بحرى و نزلت مصر من غير سبب
جوزيف يطلع من المطبخ
جوزيف / من غير سبب !! يعني انت ما تعرفش حاجه عن اللى بيحصل هنا ؟
همام / لا ما اعرفش انا جيت وراك عشان انا عارف ان مكان ما انت موجود بتيجي المشاكل
جوزيف / و انا جيت هنا عشان نجاه و مختار رجعوا مصر … مع العلم ان فى هجوم حصل عليهم و هم مروحين انت ما عندكش علم بكل ده
همام / اللى اعرفه ان كلهم بخير
جوزيف / ما اختلفناش بس انا مش فاهم برده انت ايه وضعك بتعرف حاجات و تسقط حاجات مش لازم تبقي متابع كدا ... ثوانى اطفى البوتجاز و اجيلك
همام/ انا ما خلفتهمش و نسيتهم و ما دام مش محتاجين منى حاجه يبقي ربنا يبارك لهم وقت ما يحتاجونى هيلاقونى
جوزيف يطلع شايل صينيه بمنتهى الفخر
جوزيف / شايف الإبداع
جوزيف يحط الصينيه على السفره
جوزيف / انا ما بقومكش عليهم عشان الشيطان بتاعك ما يلعبش فى عقلك انا بس فرحت لما شوفتك و افتكرت ان .. بص هو الموضوع بخصوص مهره اللى كانت معاهم فى تركيا
همام / اللى انقذت عمران
جوزيف / مصحصح برافو عليك واضح ان عندها مشاكل عائليه كدا و هم بيحلوهالها يعنى الحمد لله طلع حوار اهبل … انا كنت جاى فاكر ان فى حاجه بصراحه
همام / طب الحمد لله طلعت حاجه بسيطه هترجع بحرى بقي و لا العيشه هنا عجبتك
جوزيف / انت عارف انا كنت بعمل ايه فى اسكندريه
همام / بتلم رجاله انت و شحته و حريم و ناويين تنزلوا جنب البلد
جوزيف/ انت عرفت ده لوحدك و لا عباده قالك
همام / كلها منفده على بعضيها و اكيد عنينا مش هتغفل عنك يعني .. دا انت ابن عمنا و لا ايه
جوزيف يبتسم و يروح يجيب طبقين و معلقتين
جوزيف / تعال كل
همام / انت ناوى على ايه
جوزيف / بعد الأكل؟!
همام / يونس
جوزيف / مش ناوى على حاجه المرحله دى مرحله مراقبه و بس مش هتحرك و لا هعمل اى حاجه الا لما الدنيا كلها تبان
همام يسحب كرسي و يقعد جوزيف يغرف لكل واحد فى طبق و يبدا ياكل
همام / حاف كدا مفيش لقمه و لا شويه رز
جوزيف / ما تاكل و تحمد ربنا على اللقمه اللى قدامك دا اللى موجود
همام / فضل و نعمه حد لاقى .. بسم الله
همام يشمر و ياكل جوزيف يحطله زياده
...................
فى مصحه خاصه
مهره بتعيط فى اوضه و نجاه قاعده جنبها و ماسكه ايديها و بتطبطب عليهم
مهره / اقسم بالله ما مدمنه اقسم بالله ما اخدت اى حاجه و لا اعرف اساميهم و لا انواعهم و لا حتى طعمهم اقسم بالله ابدا
نجاه / انا متاكده و الله بس
مهره / انا بموت يا نجاه دماغى هتنفجر انا تعبانه جدا بموت و الله مش قادره
نجاه / باباكى بيقول ان المكان ده كويس و انا هسال عليه و مش هسيبك صدقيني مش هسيبك
مهره / انا خايفه اوى خايفه اوى و الله انا ما ليش حد و خايفه و تعبانه
نجاه / اقسم بالله ما هسيبك اقسم بالله هفضل جنبك و هجيلك كل شويه بس انتى اجمدى تمام اوعديني انك هتجمدى و تخرجى من هنا بسرعه اتفقنا قوليلى اتفقنا
مهره / انا عاوزه اخرج من هنا النهرده قبل بكره انا مستقبلى كله راح كل حياتى باظت ... انا ضعت انا مش عارفه هعمل ايه بعد كدا ... ازاى ده حصل ازاى بس حصل اقسم بالله يا نجاه انا عمرى ما اخدت اى حاجه و الله ما اخدت حاجه
دكتور يدخل هو و على و ممرضه
الدكتور / تمام بعد اذن حضرتك وقت الزياره انتهى
نجاه تطبطب على ايد مهره و تسيبها و مهره ما بتسيبش
نجاه / هاجى كل شويه
الدكتور / اتفضلى لو سمحتى
نجاه تطلع بره
مهره / انا عمرى ما اخدت اى حاجه و الله و لا سجاير و لا خمره و لا اى حاجه
الدكتور / حالات كتير بتيجي تقول نفسك الكلام و حتى لو حضرتك ما بداتيش السكه بمزاجك لكن تقدرى تنهيها بمزاجك بارادتك
مهره / بس انا تعبانه اوى جسمي واجعنى دماغى هتنفجر
الدكتور يبص للممرضه تديها حقنه
الدكتور / مع الوقت و العلاج كل ده هيروح و ترجعى لحياتك الطبيعيه تاني
مهره تهز راسها و الممرضه تفردها فى السرير
الدكتور / وارد جدا أن يكون كلام الانسه مهره صحيح و ان حد فعلا يكون كان بيدسلها المخدرات فى اى حاجه و عشان كدا اهم حاجه عندنا العزل التام للحاله يعني مفيش اى زيارات من اى نوع اى حد ممكن يدخلها اى جرعه نضيع تعبنا كله و نرجع للصفر تانى
على يبص على مهره
الدكتور / هى هتنام دلوقت و زى ما قولت لحضرتك ان الفتره الجايه مش هيكون فى اى نوع من انواع الزيارات من مين ما كان الا حضرتك
على / طب ما ينفعش ابعت والدتها او زوجها بدالى يعني عشان انا ظروف شغلى ما بتخلينيش متوافر طول الوقت
الدكتور / اى ورق رسمي حضرتك اللى لازم توقعه بنفسك او تسال فى الاداره بقي فى الموضوع ده أفضل هيفيدوك فيه اكتر منى
على يبص على مهره نامت يهز راسه
……………………….
فى الاداره
اكرم / انا اخر حاجه كنت اتوقعها انى اتحط فى موقف زى ده بعد كل اللى انا عملته عشانها دا كان على يدكوا ما تقول حاجه يا عمران
مختار / و هى هتقول حاجه زى دى ليه
اكرم / السؤال الأهم ليه دلوقت ... يعنى واحده عايشه فى بيتي السنين دى كلها لفت معايا العالم كنا بنسافر لوحدنا من بلد لبلد ايه اللى يخليني استنى لدلوقت ليه مش من بدرى ليه هنا فى مصر جنب امها و ابوها مش انا لو واحد منحرف كان اولى اسحبها فى اى بلد غريبه و اغرر بيها و هى بطولها فى الغربه مش دا منطقى و مناسب اكتر لكن هعمل كدا فى البيت عندى مثلا و امها و اخواتها و الخدامين و كل الناس دى موجودين دا كلام منطقى حد يصدقه
عمران / هنا و لا هناك ايه فى الدنيا اصلا ممكن يخليها تتهمك فى حاجه زى دى من الباب للطاق كدا
اكرم / و ايه اللى يخلى واحده عندها كل ده تدمن اصلا انا لو انسان مريض و شهواني زى ما بتتهمونى ايه اللى يجبرنى اقعد قاعده زى دى اللى يجبرنى اروح لابوها البيت و اتحايل عليه يجي يعالجها و يساعدني اساعدها انا حبيت مهره زى بناتى بالظبط و قدمت لها نفس اللى قدمته لبناتى و اكتر ما اعرفش ايه اللى جرالها يمكن المشاكل بينها و بين ابوها و امها عملت ليها مشكله نفسيه ممكن حاجات كتير جدا
مختار / و حضرتك طلقت مدام كارمن ليه
اكرم / اتخانقنا بسبب مهره و تقدر تسالها هى كارمن اصلا ... بارده شويه يعنى من النوع اللى ممكن تسيب البنات للنانى تربيهم و انا طبعا كنت بتابع و بعوض النقص اللى بتسيبه فى مهره الموضوع كان اوفر انها حتى دور الام مش قابله تلعبه حتى لو تمثيل الا لو كان فى مصلحه زى شو اعلامى مثلا
عمران / تقصد البرامج اللى كانوا بيطلعوا فيها سوا
اكرم / بالظبط البنت منهاره يلا اللبسي هنروح نلف على القنوات نصور و نطلع ندوس على مشاعرك اتكلمنا و اتخانقنا طلقتها و مع كدا
مختار / عايشين فى بيت واحد
اكرم / البيت كبير جدا و انا ضيف خفيف فيه ... و فاهم طبعا ان فى الصعيد الدنيا مختلفه بس ... انا ما اقدرش اطرد بناتى من بيتي و لا امهم و فى نفس الوقت دا بيتي انا و برده مش هقدر ابعد عن بناتى ف ... و يمكن لما كل الامور دى تهدى و تستقر يجد جديد و نحاول نصلح اللى اتكسر عشان البنات
مختار يبص لعمران
مختار / مفيش اخبار من الفندق اللى كانوا فيه اى كاميرات
عمران / جبناها كلها و باذن الله نعرف الحاجه اتحطت لها ازاى فى العصير
مختار يبص على اكرم يلاقيه متوتر
مختار / مش عاوز حضرتك تقلق انا مهره بالنسبالى زى عيالى دول و اكتر يعني لو اخر حاجه هعملها فى حياتى هى انى هوصل لأصل الحكايه و اجيب اللى بيحاول ياذيها و ادفعه التمن غالى اوى
اكرم/ و انا ايدى فى ايدك طبعا ... دى بنتى
مختار يبتسم و يقوم يطلع بره و عمران وراه و اكرم عمال يتلفت
اكرم / هو المخروبه دى ما فيهاش موظفين و لا ماشيه بالحب و لا ايه اما نشوف اخرتها مع أفكارك يا ابن الكلب انت
اكرم ينفخ
..........................
فى سرايا الجوارحه
الكل متجمع بياكلوا
سماح / حقه دى تبقي حاجه حلوه خالص
منصور / بالعكس انا مش موافق
ياسمينا / ليه يا منصور دى فرصه حلوه جدا
مغاورى / عشان يا بنتى سيرك روسي اكيد كله هيكون اجانب و ممكن يكون فى وسط الأجانب دول حد مدسوس كدا أو كدا
سماح / امال رجالتنا دورهم ايه
منصور/ رجالتكم مش مكن مستحيل هنقدر نعمل كل الشغل ده انتوا فاكرين اننا معانا عصايه سحريه و لا ايه
سماح / لا طبعا الله يعينكوا بس انا مش فاهمه يعني هو انتوا دوركوا تامنوا البلد و لا تقفلوا عليها و تخنقوا اهلها ... ادينا قافلين على روحنا بقالنا سنين و وقت ما الخواجات بيحبوا يخشوا بيخشوا و يعملوا كل اللى نفسهم فيه و انتوا الله اكبر رد فعل
مغاورى / الله يعينهم مش مقصرين فى حاجه
سماح/ ما اتكلمتش بس الناس فاض بيها ما تقولهم يا شاهين يا ابنى الرجاله بتقولك ايه
شاهين / مش عشان فضفضت معاكى بكلمتين
سماح / يا ابنى سمعهم يمكن مش واخدين بالهم الناس طهقت و اتخنقت و بيبيعوا أراضيهم و يهجوا
منصور / و احنا بنشتريها
سماح / اشتريت البلد كلها ايه مش هتحتاج فلاحين و عمال و صنايعيه يشتغلوا فيها و يشغلوهالك
منصور / اللى مش باقي عليها الباب مفتوح
ياسمينا/ ايوه بس اكيد قفل البلد بالشكل ده مضايق الناس اسمعوهم
منصور/ انا ما عنديش مشكله هطبق يومين تلاته عشره مش هتفرق فى الاخر هيجي وقت و هقع و واحد ورا التانى كلنا هنقع و بعدين
ماجده / الله يعينكوا
منصور / احنا لا بنقول اه و لا لا الوضع اللى بنتحط فيه بنشتغل على أساسه انا اخويا و مراته بيباتوا فى الشركه من كتر ضغط الشغل اللى وراهم بيبدلوا و امى اللى بتربى عيالهم اللى هم بيشوفوهم فى اوقات فراغهم اللى مش موجوده اصلا هاتوا السرك و سقفوا و انبسطوا ... عن اذنكوا انا شبعت
منصور يقوم و يسيب الاكل و يطلع بره السرايا ياسمينا تقوم تجرى وراه
شاهين / الله يعينهم طبعا
سماح/ بس احنا كدا فى سجن احنا ما بنطلعش من سور السرايا غير بمعاناه لا بنشوف لا بحر و لا مصيف و الفسح بحساب و ترتيب قبلها و غالبا بتبقي فى سجن اسكندريه دى مش عيشه ... و لا أهل البلد الغلابه حياتهم بقت كئيبه و صعبه
شاهين / بس دى مش غلطه دياب و لا منصور
سماح / انا لا كلمت دياب و لا كلمت منصور بس التكنولوجيا دى اتصرف عليها كتير عشان تسهل حياتنا مش بعد كل التعب و الفلوس دى و المهندسين راحوا و المهندسين جم حتى حته سيرك مش هنعرف ندخله البلد و لا نتفرج عليه
ماجده / طب ما تعملوه فى اى بلد جنبنا و اللى عاوز يروح يتفرج و ينبسط و يتفسح و يغير جو
سماح / و يرجع لسجنه فى البلد تانى ... الناس كلها بترتاح لما بترجع بيوتها فى بلدها الا احنا بنتخنق
شاهين / لمصلحتهم ياما
سماح / انا بتكلم لمصلحتهم برده انت سمعت الراجل بيقول ايه ما تقولهم
مغاورى / قال ايه يا شاهين
شاهين يتنهد
شاهين / مراته عوزاه يبيع أرضه و يشتري فى اى بلد جنبنا
سماح / عشنا و شوفنا بعد ما كان الناس كلها تتمنى تعيش فى بلدنا بقوا بيهجوا منها دى بقي غلطه مين يا كبير دا احنا فى زمن البى كاى بربع التكنولوجيا اللى عندنا و كان فتوح بطوله بلدنا كانت ائمن مكان فى مصر شوفوا دلوقت الشركه بكل مهندسيها و دا حالنا احنا بنطلع لقدام و لا بنرجع لورا
ماجده / الدنيا كانت غير الدنيا
سماح/ و الرجاله كانوا غير الرجاله
مغاورى / نطفح اللقمه بقي ... ابو السيرك على اللى شار بيه
سماح / و انا قولت ايه
مغاورى / الكلام للكل
ياسمينا ترجع تطلع على اوضتها فوق من غير كلام و شاهين متابع اللى بيحصل
.........................
فى عربيه مختار
نجاه / مفيش حاجه اسمها ممنوع الزياره انا وعدتها انى هروح كل شويه و أنى مش هسيبها ابدا
مختار / المدير بنفسه وراكى اللايحه بتاعتهم و فهمك القانون ده محطوط ليه
نجاه / انا مش عاجبنى الكلام ده
مختار/ المصلحه تحكم
نجاه / طب ما تكلم ابوها يا عمى قوله هناخدها عندنا و نجيب لها احسن دكاتره فى الدنيا و تفضل وسطينا
كارم / عمره ما يقبل
نجاه / ليه بقي ان شاء الله هى اصلا تفرق معاه دا راجل واطى على راى عمران انا عمرى ما شوفت اب كدا و لا امها ايه الناس دى و لا الحيوان البجح اللى اسمه اكرم ده كان بيعمل ايه هناك
مختار/ بيدافع عن نفسه
نجاه / و حضرتك صدقته
مختار / صدقته ... كلامه منطقى ... بس ما ارتحتلوش عنيه مش مظبوطه
نجاه/ لانه كداب و بجح
كارم / هو مفيش احتمال خالص ان البت دى فعلا تكون بتكدب
مختار / لا ... دايما صدق البنت
كارم / ليه ملايكه
مختار / لا بس هى الحلقه الأضعف
كارم / بس ممكن تكون بتكدب عادى ان كيدهن عظيم يعني
مختار / ماشي ممكن تكون بتكدب امشي ورا الكلام لحد ما تعرف الحقيقه لكن ما تكدبوش خالص و تقول مستحيل و مش ممكن اصل معلش يعني احنا كرجاله يعني مش ملايكه
نجاه/ بس ما تقولش رجاله
مختار / نعم يا اختى
نجاه / قصدى مش كلهم رجاله يعني اللى بيعملوا الحاجات دى مش رجاله اقصد هههه و الله ما اقصد حاجه
مختار / وحشتني ضحكتك يا بنت الكلب
نجاه / ما تشتموش
مختار / معاكى حق استغفر الله العظيم صحيح اصلا خساره فيه حسناتى
نجاه / عمى بقي الله
مختار / سكتنا
مختار يطلع الموبايل من جيبه
مختار / ايوه يا ابنى ايه الدنيا ... معقول !! خالص !! مفيش !! لا مصدقك بس حاول تانى يمكن ... كلها بره منطقه الاداره بس و الموظفين بس فهمت ... طب و الشارع .. كلو عندك ... طيب تمام فهمت تمام ... و اكرم ... تمام هعتمد عليك ... حبيبي عارف انى تاعبك و انك ما بترتاحش بس نعمل ايه ما لناش غيرك بعد ربنا انت و اخوك ... حبيبي فى حفظ الله
مختار يقفل
مختار / دياب بيقولى ما فيش و لا كاميره جوه المستشفي كلها يا على السور من بره او فى مبنى الاداره بس و خصوصا الخزنه فقط لا غير
نجاه / ليه يعني
مختار / اعتقد عشان خصوصيه العيانين زى ما قالوا قدامك كل المعلومات سريه
نجاه / مش مرتاحه للكلام ده
كارم / بصراحه و لا انا لنفرض ان حرامى و لا قتال قتله دخل يسرح كدا عادى براحته اهم حاجه ما يسرقش الفلوس يعني ايه العبط ده
مختار / طب نقدر نعمل ايه برده... ايه نخلى حد من عندنا يدمن و نزرعه فى المكان
كارم / ما هو اكيد الرجاله بيفصلوهم عن الحريم
مختار/ ايه البراءه دى يا كارم يا حبيبي ايه يا قلب عمك ايه يا ابن عباده ما سمعتش عن اسلوب سخريه قبل كدا
كارم / لا سمعت بس هى فكره كويسه فعلا ان يبقي لينا عين جوه بس لو تكون من التمريض هتتحرك اسهل و اسرع و تبلغنا بكل صغيره و كبيره
نجاه / شوفت ابن عباده دماغه شغاله ازاى
مختار / انتوا بتتكاتلوا عليا ... ماشي نعديها المرادى
التلاته يضحكوا مختار يعمل مكالمه
مختار / ايوه يا عمران انت لسه جنب المستشفي ... طب ركز معايا فى اللى هقوله ده كويس
.........................
على سطح الشركه
منصور واقف بيتفرج على البلد و فى ايده فنجان قهوه دياب يدخل
دياب / موبايلك فين يا عم ياسمينا هرياك مكالمات
منصور / تحت فى المكتب
دياب / ما انا عارف بس بقولك ان ياسمينا هارياك مكالمات و بعدين مالك كدا واخد الدنيا على صدرك ما عادى يعني انت مستني ايه اصلا ما احنا واخدين على كدا
منصور / زهقت زهقت من انى اتعب عشان ناس ما بتقدرنيش
دياب / مين دول يا ابنى دا انت اسمك بس فى البلد بيهزها
منصور يبص لدياب
منصور / بيهزها فعلا ... على واحده و نص
دياب / احنا مش فى الجنه كل مكان فيه الحلو و الوحش
منصور / بس انا تعبت يا دياب
دياب / خد ياسمينا و غيروا جو يومين
منصور / انت عرفت حكايه السيرك
دياب / عرفت و طلبت من باشمهندس فايز يسيب كل اللى فى ايده و يجيب لى قرار السرك ده و كل اللى يقدر يوصله عنه و مش بس كدا دا انا اتصلت باناتولى ريستوس و قالى انه سيرك مشهور جدا و بقاله سنين شغال و بيلف العالم و ما فيش حواليه اى شبهات و بعتلى عروض منه حلوه جدا
منصور / دا على اساس ان اناتولى ده ثقه اصلا دا يوم معانا و يوم علينا
دياب / يا سيدى هنكلم غيره و غيره و غيره و اللى تعرف ديته اقتله و اناتولى انت عارفه طول ما ايدك فى بقه بتاعك
منصور يهز راسه بلا مبالاه
دياب / هو فى حاجه تانيه غير الموضوع ده
منصور / ساعات بحس ان عمرى بيضيع هدر هنا و ان ده مش مكانى و لا مكان أربى فيه عيالى
دياب / بيجيلى كتير الاحساس ده
منصور يستغرب و ينتبه
دياب/ و بفتح الخريطه و اقعد افكر فى مكان تانى اعيش فيه بس تصدقنى لو قولتلك بفضل اللف و اشقلب فى الخريطه و لا الفطيره الشرقي انى ارتاح فى اى مكان غير هنا ... ما بلاقيش ... يا مؤمن ما احنا روحنا و عشنا فى اسكندريه و برده ما ارتاحناش الا هنا دول اهلنا و ناسنا
منصور/ ما هم المشكله يا دياب
دياب / الشيطان هو المشكله و بعدين ياض انت بتعمل شغلك ما بنستناش حد يسقفلك انت بتعمل شغلك لله عشان ما تبقاش قصاد نفسك قصرت مش اكتر ما بنستناش حاجه من مخلوق يا منصور
منصور / خنقتني و حرقت دمى ربنا يحرق دمها البعيده
دياب يطبطب على كتف اخوه
دياب / ما تروح تروق على نفسك و تخلى مراتك تعملك ماسك و تولعلك كام شمعه بريحه و تفكك من كل هذا الهرى
منصور / من كل هذا الهرى!!
دياب / بالطبع
منصور / انت مطبق بقالك قد ايه
دياب يضحك و يسيبه و يمشي و منصور واقف مبتسم
.......................
فى بيت فاروق
نجاه سانده على سور البلكونه عماله تبص على الشارع و هى قلقانه تشوف عمران بيركن الموتوسيكل و ينزل منه يدخل العماره تدخل جوه تجرى تقابله على السلم
نجاه / عملت ايه
عمران/ و لا حاجه
نجاه / يعني ايه ولا حاجه امال ايه اللى رجعك
عمران / هفضل واقف قدام المركز العمر كله يعني
نجاه / دا اخرتها يعني دا اللى عندك
عمران/ فى فى ايدي ايه طيب و ما عملتوش انا ... ادينا بنحاول نوصل لاى حد جوه المكان و ربنا يسهل و بعدين مكان ما كنت انا متزنب واقف لا شغله و لا مشغله سبت ناس تانيه قدام الباب يراقبوا الدنيا
نجاه / يعني ما قدرتش توصل لحد جوه خالص
عمران / هو انا ساحر مش لما اعرف الاول مين شغال جوه ابقي اشوف ليهم مدخل و بعدين دا مش دورى انا اهدى عليا انا راجع تعبان
مختار يفتح باب شقه و يطلع
مختار / صوتكوا عالى كدا ليه فى ايه يا عمران
عمران / زعلانه انى روحت
نجاه / انا مش قادره اسيبها هناك يا ناس طب كلموا ابوها تانى انا كفيله بيها هجيب لها احسن دكاتره ابوس ايديكوا انتوا قلوبكوا دى ايه حجر
مختار / لا مش حجر يا نجاه بس عملنا كل اللى نقدر عليه نعمل ايه اكتر من كدا كلمت ابوها و كلمت جوز امها و كلمت اداره المكان اعمل اكتر من كدا ايه و بعدين ما يمكن المكان كويس زى ما بيقولوا عنه لحد دلوقت ما حدش قال عنه حاجه
نجاه / لان ما لوش اى سجل من الأساس كل الداتا اللى فيه من كتر ما هى سريه المكان نفسه بقي سر
عمران/ و انا فى ايدي ايه اعمله و ما عملتوش طيب الله
عمران يعديها و هو عصبى و يطلع يفتح شقه و يدخلها و يرزع الباب
نجاه / و اخرتها طيب
مختار / شغالين ... بس احب افكرك يا بنت عباده ان وقفتك مع عمران على السلم او معايا خلوه ... اصل احنا مش محرم و انتى عارفه
نجاه تبص لمختار بغيظ و تطلع تدخل الشقه و ترزع الباب
مختار / و انا ايدى فى جيبي يعني
مختار يدخل و يرزع الباب و يفتح الباب
مختار/ مش صعبه يعني يا عديمي الربايه منك ليها
مختار يرزع الباب تانى
......................
فى فيلا مروان
مروان ينزل الهول يلاقى رامى مستنيه
مروان / انت بتهرج يا رامى انت جايلى هنا انت عاوز ابويا يديني كلمتين
رامى / يا عم انا مش فاهم حاجه انت بعتلي رساله قولت ان مهره مش هتيجي الشغل و
مروان / تعال الجنينه بره اتحرك امشي امشي
رامى يمشي مع مروان و هو مش فاهم حاجه
مروان / بص يا ابنى من الاخر كدا انا ابويا حاطتني تحت الحراسه المشدده و لحد الدنيا هنا ما تستقر
رامى / يا ابنى انا بتكلم عن مهره
مروان / بص يا ابنى من الاخر كدا انساها كانت مصلحه و طارت
رامى / هو ايه اللى طارت يا صاحبى دا احنا دافنينه سوا
مروان / روح طلعه ... بص يا حبيبي لا ابويا و لا امها فارقه معاهم مهره اصلا و كل اللى بنيت عليه خطتى فكس بالعكس جه على دماغى انا
رامى / لا يا راجل
مروان/ يا ابنى ما انا لو شايف ان السكه دى هنطلع من وراها بحاجه كنت ظبطتك بس صدقنى فستك
رامى/ طب و الفلوس اللى عليك
مروان / هتكون عندك الاسبوع الجاى بالكامل و فوقيهم بوسه
رامى / فجاه كدا
مروان / امال انا محبوس هنا ليه ما عشان ابويا يرضي عنى و بصراحه كدا ابويا شارط اقطع علاقتي بيكوا كلكوا و اولهم انت يعني باختصار لو عاوز فلوسك يا رامى انسانى خالص
رامى/ طب و جلال ينساك هو كمان
مروان / رامى ما تصيعش
رامى/ يا عم انا ماشي على العموم انت حبيبي يا مارو لو احتاجتنى فى اى حاجه اديني رنه
مروان / كتر خيرك يا حبيبي ما اتحرمش اتفضل بقي
رامى / معاك تموين يكفيك قد ايه يعني
مروان / قولتلك امشي يا رامى خلصنا
رامى / يبقي جلال معاه حق بقي و سحبت كميه كبيره جدا ... طب ما دام كان معاك الفلوس دى كلها مش كنت سديت اخوك بدل ما تنطره اسبوع
مروان / يا ابنى افهم
رامى/ ما افهمش انا مش بشتغل عندك فلوسي تكون عندى بكره بدل ما اروح لابوك و اوصله بجلجل و لا و ليه جلال ما انا اعرفه بعلاء بتاع المعمل ... هو مش انا برده اللى معرفك عليه و مقريك الطريقه و الحوار
مروان / بكره يا رامى حاضر الفلوس هتكون فى حسابك بكره
رامى / تمام يا صاحبى سلام
مروان/ مع السلامه يا حبيبي
.....................
فى شقه جوزيف
همام بيتكلم فى التليفون جوزيف يطلع من المطبخ شايل صينيه بسبوسه
همام / و الله انا شخصيا قلقان مش هكدب عليك ... اضحك ما انت مش شايف حاجه
جوزيف يحط الصينيه
همام / ايه دى ؟ بسبوسه !!
جوزيف يبصله و يهز راسه بفخر
جوزيف / هصب الشاى و اجى
جوزيف يروح المطبخ همام يكمل كلام فى التليفون
همام / راح يعمل شاى جنب البسبوسه ... انا اش عرفنى عرف يظبطها و لا لا لسه ما دوقتش ... بصراحه مش متخيل ازاى هتعيش من غير المعلومه دى دا انت تنقط اقفل يا اخى اقفل دا انتوا هم
همام يقفل و جوزيف يطلع من المطبخ شايل صينيه عليها كبايتين شاى
جوزيف / ما حطيتش سكر حط انت بكيفك ... دا دياب ؟
همام / هوه ... عاوز يطمن على مواهبك المطبخيه
جوزيف / فى تحسن ملحوظ الحمد لله
همام/ يمين بالله مرعوب مش قادر اخبى هو فى ايه يا عم مالك
جوزيف / يا عم شوفت الطريقه على اليوتيوب قولت اجرب ما فيهاش حاجه يعني ان شاء الله تطلع حلوه جرب ما تخافش هتخسر ايه يعني ما انا لو عاوز ائذيك مستني ايه يعني سمى و مد ايدك
همام / هاكل بايدي يعني
جوزيف / دوق بمعلقه السكر
همام / دا انت معفن
همام يقوم يروح المطبخ يجيب طبقين و معلقه و اسباتيولا و سكينه و يرزعهم على الترابيزه و يقطع و يغرف قطعه
جوزيف / هتغسلهم انا كفايا عليا مواعين كدا النهرده
همام / ولا ... لا بجد فى ايه انت ايه حكايتك
جوزيف / زهقان و قلقان و حط عليهم بقي انى مضايق
همام / طب زهقان و حقك و قلقان و افهمها مضايق ليه بقي
جوزيف يشاورله بايده ثانيه واحده و يروح يجيب تابليت و يفتحه على فيديو نجاه واقفه فى البلكونه حزينه دمعه تنزل من عنيها تمسحها و تدخل جوه
همام / انت جبت الفيديو ده منين
جوزيف / ميكروروبوت صغير فى ركن البلكونه عندها ما ياخدوش بالهم منه و لو حصل و خدوا بالهم دبانه عاديه على الحيطه هيجوا يهشوها هطيرها بعيد عادى جدا
همام / تصدق ما فيش رعب بعد كدا ... الواحد يدخل الحمام يرش مبيد حشري اى حاجه لسه واقفه مكانها تبقي كاميره داخله تصوره و هو بي ... استغفر الله العظيم... التكنولوجيا دى لعنه ... دى رفعت الستر عن الدنيا ... ما ينفعش الكلام ده
جوزيف / لعلمك فى كاميرات ممكن تكون أصغر من كدا بكتير دا انت موبايلك نفسه اختراق لخصوصيتك
همام / ما انا منزل برامج
جوزيف يبتسم
جوزيف/ كل كل
همام/ طب واحد و مراته فجاه يلاقوا نفسهم متصورين و كلو متزاع كدا عادى
جوزيف / عادى
همام / عندك انت ... عادى ايه و نيله ايه على دماغك ايه !!! ... دا انت باكس ... يا اخى دا انا ... اقولك ايه بس اقولك ايه ما انت خواجه
جوزيف / كل يا همام او اشرب الشاى و اهدى... دى اقل حاجه ممكن تحصل
همام يبص لجوزيف و يتنهد و يبص الناحيه التانيه
جوزيف يغرف لنفسه و ياكل فى هدوء
همام / بخصوص نجاه ... البتاع ده بيروح لحد فين
جوزيف يبصله بطرف عينه بابتسامه خبث همام يتعصب
.......................
YOU ARE READING
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
