((((((((((( الكبيره ٢)))))))))
#لولو_محمد
الحلقه ٢٨
مروان يركن و يطلع الموبايل مهره تطلع من البوابه و تروح تركب يسوق
مروان / اتاخرت عليكي
مهره / ابدا انا لسه نازله من فوق حالا
مروان/ ها اخبار الشغل ايه سحلوكى ؟
مهره / ابدا الشغل كويس و سهل كدا و مستر رامى
مروان/ مين !! هههههههه ماشي تمام كملى
مهره / امال اقوله ايه ما هم كلهم بينادوه كدا
مروان/ يا ستي ما علينا كملى انا بس ... اصله يا ستي صاحبى من زمان فسديهات تفاهته كلها معايا فمش بصدق انه كبر و بقي مستر مره واحده
مهره / ربنا يخليكوا لبعض
مروان/ طب ايه هسحب منك الكلام ماله مستر رامى بيه
مهره / هو كويس بس سكرتيرته جد اوى و عصبيه شويتين
مروان/ تحبى اوصله الكلام ده
مهره / اوعى و الله العظيم ما اكلمك تانى
............................
مروان / خلاص خلاص مش هقوله ... ها تحبى تتغدى فين
مهره / فى البيت انا مجهزه اكل على السوا
مروان / و انا لسه هستناه يستوى بقولك ايه تعالى نروح ناكل فى اى حته هنا
مهره / دا جاهز من كل حاجه مش هياخد وقت خالص صدقنى و بعدين ما انت هتقعد فى اى مكان هتطلب اكل و تقعد تستناهم يسووه يعني فاكل البيت اكيد انضف و اضمن و لو خايف اطمن انا اكلى حلو اوى
مروان / تمام ... نروح البيت
مهره / عندك بروفات النهرده
مروان / لا النهرده مش دورى فى الكافيه بس عندى جيم مكانه بالليل
مهره / هو انت ناوى تكمل فى موضوع الغنا ده
مروان / صوتى وحش و لا ايه
مهره / لا جميل ما شاء الله بس ... مش عارفه المهم انك مبسوط و خلاص
مروان / لا بجد اتكلمى ... فى ايه
مهره / مش حساها شغله يعني هوايه ممكن بس شغله شغله ... مش عارفه
مروان / الغنا و الموسيقي من اجمل الفنون اللى فى الدنيا و بعدين دى فلوسها حلوه جدا ... الواحد بس محتاج نطره
مهره / بس انت جربت كتير و برده النطره ما بتحصلش
مروان / عارفه ليه ؟ عشان انا ما بعملش فن هابط و شعبى انا بخاطب فئه معينه من المجتمع فئه ولاد الناس
مهره / كلنا ولاد ناس
مروان / انتى فاهمه قصدى
مهره / اوك
مروان/ انتى عارفه ... انا عمرى ما حد شجعنى ... حتى شلتى و صاحبتى لما الالبوم فشل كلهم خلعوا ... تفتكرى انا فعلا فاشل و صوتى مش حلو
مهره / لا حلو انا حبيته
مروان / ميرسي ... صدقيني فرقت معايا جدا ... مش هتصدقى مين كلمنى النهرده
مهره بحماس / مين
مروان/ اكرم بيه
الحماس يروح من مهره و يبان الضيق و الغضب
مروان/ بيطمن عليكي ارتاح جدا لما عرف انى معاكى كلمنى و وصانى جامد عليكي و عاوز يقابلك
مهره / ما بقابلش حد
مروان/ ليكي حق تزعلى فعلا من اللى عمله هو حكالى كل حاجه بس ... الراجل بيحبك ... الراجل بيحبك بجد
مهره / انت بتقول ايه انت انت ازاى تقول كدا حتى انت يا مروان اولع فى نفسي عشان ترتاحوا كلكوا ... اركن العربيه دى اركن و نزلنى بقولك نزلنى
مهره تنهار من العياط مروان يركن و هو مصدوم مهره تفتح الباب و تنزل ينزل يجرى وراها
مروان / مهره مهره انتى يا مجنونه مهره
مروان يحصلها يوقفها
مروان / فى ايه مالك انا قولت ايه لكل ده
مهره / انا مش عاوزه اكلمك و لا عاوزه اعرفك تانى
مروان / دا انتى مجنونه بجد بقي
مهره / ايوه مجنونه ابعد عنى من فضلك
شاب / بيعاكسك ده يا انسه
مروان / اخوها يا عم الحج اخوها الكبير كمان تحب اوريك البطاقه ... هتجبيلى الضرب يا بنت المجانين مش وقت قمص انطقى
مهره / اخويا ... شكرا
الشاب يهز راسه و يمشي
مروان / فرجتى علينا الشارع و انبسطتى اتفضلى قدامى
مروان يزق مهره بالراحه ترجع تركب العربيه
مروان / ممكن بقي افهم ليه كل ده انا قولت ايه فهميني
مهره تبصله مروان يرجعها العربيه و يسوق
مروان / يا شيخه دا امك اللى هى امك ما عملتش ربع اللى عملتيه ده
مهره / هو قالها ؟ هو اصلا ازاى بالبجاحه دى ازاى قدر يقولك و انت ازاى سكت
مروان / و انا مالى
مهره / هو انت مش شايفني اختك بجد و لا ايه
مروان / الراجل طلق امك ما اجرمش يعني عادى ما قتلهاش
مهره / هو طلقها فعلا
مروان/ و بالاتفاق على فكره مامتك تقبلت الموضوع عادى و اخواتك كمان انتى الوحيده اللى اوفر كدا
مهره ساكته و حزينه
مروان / انا عارف ان اللى حصل يضايق بس وارد يحصل و اهم حاجه راحتهم اكيد لو كانوا سعدا مع بعض ما كانش ده حصل
مهره تتنهد
مروان/ تمام نتكلم وقت تانى ... بس تعملى حسابك انا ماليش فى الجنان اللى عملتيه ده لو اتكرر تانى هزعل بجد
مهره ساكته دموعها تنزل غصب عنها
مروان/ يا دى النيله فى ايه بس لكل ده ... اقولك حاجه احنا مش هنروح احنا هنروح الكافيه و لا ايه رايك نروح النادى ... سمعتك سبقاكى بيقولوا الخيل بتضربلك تعظيم سلام
مهره / مش للدرجادى يعني
مروان/ طب ما تعلميني بس اوعى اقع اتكسر
مهره / ما تخافش هعلمك
مروان/ اذا فهو النادى
مروان يبص يمين و شمال و يحود
.......................
فى شركه
مختار قاعد قدام عبد العزيز بابا نور
عبد العزيز / الحقيقه حضرتك فاجاتنى انا كنت فاكر حضرتك داخل عميل و كدا
مختار / انا عارف و الله انى جاى من غير ميعاد و لا وسيط
عبد العزيز / لا لا وسيط ايه الموضوع مش محتاج و بعدين حضرتك بتقول ان نور بنتى و ناصر ابن حضرتك زمايل سيكشن واحد يعنى اكيد عارفين بعض كويس
مختار/ انا ناصر ابنى كان دايما يحكيلى عن نور و عن قد ايه هى بنت خلوقه و ما فيش زيها و ان مشاعره ناحيتها مش جديده بس هو الحقيقه ان ناصر كان خاطب بنت زمان و اتوفت و هو اتاثر اوى باللى حصل ده و كان بينكر مشاعره ناحيه نور و كان بيحس بالذنب ناحيه خطيبته و انا كنت شايف ان الحل فعلا انه يدى نفسه فرصه يكبر و ينضج و يفهم مشاعره و الحقيقه هو سمع كلامى و صبر على نفسه فعلا بس الفتره اللى فاتت كان كل كلامه انه عاوز يتقدم لنور و انه عارف هو عاوز ايه و ان هى البنت المناسبه ليه و قد ايه هتسعده لدرجه انى جيت انا و والدته من الصعيد على ملا وشنا مخصوص عشان اقابل حضرتك و نتكلم
عبد العزيز / حضرتك راجل محترم و دخول ناصر البيت من بابه يخليني احطه فوق راسي بس حضرتك عارف الاصول لازم اشاور البنت و والدتها و اسال عليكوا
مختار / طبعا حق حضرتك
عبد العزيز / على العموم عشان ده مكان شغل انا هستاذنك تسبلى رقمك و انا باذن الله هكلمك نحدد معاد مقابله تانيه فى اسرع وقت
مختار يقف و يعدل هدومه و يدى للراجل كرت
مختار / فى جميع الاحوال و اى كان ردكوا احنا كسبنا شرف اننا اتقابلنا و اتعرفنا على حضرتك
عبد العزيز / و الله حضرتك بتحرجنى بزوقك و اخلاقك حقيقي
مختار / يا راجل ما تقولش كدا باذن الله بكره نبقي اهل و نتعرف على بعض اكتر بس دلوقت اسمحلى و اسف انى جيت كدا تانى و فاجاتك كان ممكن اتكلم فى التليفون بس انا حبيت ان المقابله تكون وش لوش عشان اتعرف على حضرتك
الراجل / الشرف ليا حقيقي سعيد انى قابلت حضرتك
مختار / عن اذنك
مختار يمشي و عبد العزيز يبص فى الكارت
عبد العزيز / مختار .. عمران .. الزيني ... شكلهم ناس محترمين ... ربنا يقدم اللى فيه الخير
....................
فى النادى
مروان و مهره يدخلوا يلاقوا عمران بيتمشي بالفرسه بهدوء و باصص فى الارض
مروان / صاحبك هنا
مهره / صاحبى !!
مروان / اللى اسمه عمران ده و لا مش عارف اسمه ايه بتاع القسم ... هناك اهو
مهره تبص و تبتسم بحرج
مهره / هو انا المفروض اعتزرله على بهدلتى ليه صح
مروان / اعتقد بس لو مش فارق معاكى احلقيله عادى هو غلطان و يستاهل الصراحه
مهره / و هو هيفرق فى ايه بس اعتقد ان المفروض اعتزر
مروان / اوك ... تحبى اجى معاكى
مهره / مش عارفه ... بيتهيالي لوحدى افضل انت ايه رايك
مروان/ اوك انا هقف هناك انجزى
مهره تبتسم و تقرب بحرج عمران يحس بيها يبصلها يقف و ينزل من على الفرس
مهره / انا اسفه
عمران / انا مقدر ... انتى كويسه
مهره / الحمد لله ميرسي
عمران / انا رقمى معاكى اعتقد ... لو احتاجتى لحاجه انتى زى نجاه بالظبط
مهره / دا مروان اخويا ... جبته اعلمه يركب خيل
عمران / بتغيرى الموضوع تمام فهمت ... ما ليش دعوه
مهره/ لا ما اقصدش بس انا مش لوحدى
عمران / و لو احتجتى و ان شاء الله مش هتحتاجى انت اخر واحد هكلمه
مهره / هو مش ده الطبيعي برده و لا ايه ... انت هتتصل باهلك الاول و لا باصدقائك الاول
عمران / معاكى حق ما انا بقولك فاهم
مهره / انا قولت اجى اعتزرلك الاول و بعدين اروح اعلم مروان الخيل ... سعيده انى شوفتك ... عن اذنك
مهره تروح ناحيه مروان عمران تليفونه يرن يرد
عمران / السلام عليكم ... ايه !! مستحيل طبعا ... انت متاكد ... انا جايلك انت فين ... جايلك جايلك سلام اقفل سلام
………………….
فى شقه ناصر
هند و مختار و ناصر قاعدين بياكلوا
مختار / لازم تقولها كل حاجه
هند / لسه بدرى على الكلام ده
مختار/ بالعكس اتاخرت المفروض كنا اتفقنا على الحاجات دى قبل ما اروح احرج نفسي مع الراجل ... اول فرصه ... فى اول فرصه تقعد معاها و تحكيلها كل حاجه تقولها عن حياتنا و طباعنا و مشاكلنا تقولها عن اميره
هند / هيقول لها ايه عن اميره
مختار / كل حاجه خصوصا انها عايشه
هند / و دى هتفرق فى ايه
مختار / ما اعرفش بس الصراحه مطلوبه تفتكرى ينفع نكرر الاخطاء اللى عملناها فى سنه و لا نعدى المرحله دى و نتعلم منها ... الصراحه اهم حاجه فى اى علاقه يا ابنى ... اى حاجه اتبنت على كدب ما بتكملش او على الاقل بتخسر وقت و مجهود كبير جدا عشان تقدر تصلح و تعوض اللى اتكسر بسبب الكدبه دى
ناصر / حاضر يابا هعمل اللى حضرتك تقول عليه
مختار / انا هخطف رجلى صد رد لمصر و راجع هتعوزوا ..
ناصر / هاجى معاك
مختار / لا
ناصر / ليه هو كارم و فارس احسن منى فى ايه ما انا قاعد ما بعملش حاجه هاجى معاك اونسك على الطريق حتى ..
مختار / امك
هند/ خده معاك
مختار يبص لهند تمسك ايده
هند / خده معاك
مختار / تمام حاضر ... ما انا رايح اتفسح ... حاضر
....................
فى الفيلا
فارس طالع من سلم بيوصل للبدروم و هو بيمسح عرقه و ينهج و كارم وراه
فارس / احنا يعني ما كناش نعرف نعمل التمرينات الخطيره دى فى بلدنا
كارم / البت دى مبرشمه اقسم بالله مستحيل تكون طبيعيه
فارس / نق عليها افلقها قال وبيقولوا عليك العاقل
كارم / يا عم ما شاء الله اللهم بارك على قولك ربنا يديها الصحه بس الواحد له اخر مش كدا
فارس / وله وله ليكون زفت الطين ده بيديها بلابيع هم مش كانوا بيقولوا بيبلبع و هو اعترف
كارم / اختك مش هبله هى عارفه ان الحاجات دى غلط هى بس ما بتستسلمش بسهوله
فارس / و احنا يعني اللى بنستسلم احنا بس بنظم طاقتنا و نوفر مجهودنا لوقت عوزه انا هطلع استحمى
نجاه تطلع
نجاه / خير واقفين كدا ليه فى اخبار و لا حاجه
كارم / اخبار ايه احنا لحقنا
فارس / انا طالع استحمى
كارم / اطلع اطلع هو احنا قافلين الحمام برقم سرى ما تطلع
فارس يطلع و نجاه بتضحك
كارم / عيل غريب
نجاه / سيبك انت كنت جامد عجبتنى
كارم/ طب الحمد لله هنعوز ايه اكتر من كدا
نجاه / انا هروح اكلم جابر اشوف غطس فين اتحداك انه راح مع يونس المكان اياه
كارم / ما اعتقدش دا راح مع عمران يعسوا ورا الراجل اللى كرا على مهره
نجاه / يعني راحوا المكان اياه اطلع اتشطف و انزل هعملنا حاجه دافيه نشربها
كارم / تسلم ايدك مقدما
نجاه تبتسم كارم يطلع و نجاه تروح المطبخ تبص على اوضه جوزيف الفضول ياخدها تيجي تفتح الباب تتكهرب تصرخ و تنطر ايدها
نجاه / جزمه
........................
فى الفندق اللى فيه الرهونات
عمران و جابر ماشيين و حواليهم جاردات يوصلوهم للصالة و فى ماتش شغال عينهم عليه و هم ماشيين لحد ما يدخلوا اوضه فيها رزق و جوزيف و الراجل المدير
جوزيف / الطريق كان صعب
جابر / نهائى .. رزق كراره
رزق / باشا الصعيد كله
جوزيف / تعرفوا بعض و لا ايه
جابر / ما حصلناش الشرف نتقابل بس السيره سابقه صاحبها
جوزيف / رزق هو اللى بعت الرجاله يخوفوا مهره ... سمعهم يا وحش
رزق يشغل ريكورد
/////////////////////
صوت عصام / انا مش هوصيك البنت غاليه عندنا اوى الشعره منها تطير فيها رقاب
صوت رزق / فى رقبتى يا باشا انا بس مش هوصيك على التحويلات
صوت عصام / اعتبرها اتحولت لحسابك بس يكون فى علمك انا لا اعرفك و لا
صوت رزق / ما تقلقش يا باشا اللى بيقع مننا ربنا بيرحمه
.............
رزق يشغل ريكورد تانى
صوت عصام / جرا ايه يا رزق احنا ما اتفقناش على كدا امال الملايين اللى بتاخدها دى لازمه امها ايه
صوت رزق / ما تاخذنيش يا باشا بس البت طلعت مسنوده من واحد شديد و لا انا و لا معاليك قده
صوت عصام / و لا انتوا قد صاحب المصلحه اوعى تفتكر ان البت تخصنى انا مجرد وسيط
صوت رزق / ما الباشا الشديد بتاعنا عاوز يتعرف على الباشا الشديد بتاعك و نطلع احنا الوسطا منها بدل ما نتهرس بينهم فى الرجلين
صوت عصام / انت شايف كدا؟!!
صوت رزق / لو عاوز فلوسك احولهالك و لو عاوز فوقيهم احولك انفد بجلدك بدل ما الرياسه يحطك فى دماغه و يسلخهولك
صوت عصام / انت بتهددنى يا كلب
صوت رزق / باشااااا اهدى و افتكر انى وسيط زيي زيك و انا شخصيا سلمتك و بلغته باسمك و عنوانك و الباقي بره عنى
صمت و الكل بيبص لبعضه رزق يشاورلهم بايديه اصبروا
صوت عصام / اكرم ... اسمه اكرم ... اكرم الصردى ... يبقي جوز امها و حصل بينهم خلاف و البنت سابت البيت و امها منهاره فحب يخوفها عشان تجرى تترمى فى حضن امها مش اكتر عشان كدا كنا مستعجلين و موصيك انها ما تتلمسش
////////////
عمران / و ريكورد زى ده ما يتفبركش يعني
جوزيف / نقدر نروحله نتاكد لو تحب
رزق / او اجيبهولك ... الباشا بس يؤمر
جابر / انا رايي نواجهه
رزق / اجيبهولك برده لو تحب
جابر / تسلم نشيلك لوقت عوزه ... يلا يا عمران
جابر يجي يتحرك الرجاله ساده الباب جابر يبص لجوزيف جوزيف يقوم و يروح ناحيه الباب الرجاله توسع يطلع بره و جابر و عمران وراه
عمران / انا عارف اكرم دا كويس راجل محترم جدا و مستحيل
جوزيف يلف و يبصله
جوزيف / و انا كمان بالنسبه لناس كتير جدا افضل و انضف و اشرف رجل اعمال فى العالم و عندى مجموعه شركات ناجحه بتتحكم فى الاقتصاد العالمى فوق يا عمران الحركات دى ما بتجيش غير من الملايكه بس معلش انت لسه صغير و بكره تتعلم
عمران / فاهمك بس مش كل الناس انت
جوزيف / اجيبهولك اقرره قدامك و اخليه يقر بكل حاجه
عمران / كتر خيرك انا هتكلم معاه و اتاكد بنفسي
جوزيف يجي يمشي جابر يمسكه من كتفه يخليه يلفله تانى
جابر / ايه بقي اللى ممكن يضيف لنجاه لما تجبرها تدخل ماخور زى ده
جوزيف / ماخور !! انت جاى من سنه كام ... يعنى ايه ماخور اصلا
جابر / الخرابه دى بنسميها ماخور
جوزيف / و ماله ... نجاه محتاجه اختبار حقيقي لقدراتها
جابر يبص على الملعب و الناس بتموت بعض بوحشيه و الناس بتهلل بمرض علامات القرف تملا وشه
جوزيف / مش ناوى تجرب
جابر / يلا يا عمران
جابر يمشي و عمران وراه جوزيف يمشي وراهم بهدوء
..........................
فى سرايا الجوارحه
تيا قاعده بتلعب فى الجنينه مع عبد الرحمن و العيال و بتاخد بالها منهم شاهين يدخل يديهم حاجه حلوه و يبوسهم و يحضنهم و يشيل عبد الرحمن يقعده على رجله
عبد الرحمن / شكرا
شاهين / جرا ايه ياض يا شقي انت مش هتبطل تلعب فى ريحه امك انت بقيت راجل دلوقت ما يصحش
عبد الرحمن / تيا اللى بتحطلى
شاهين يبص لتيا واقفه مبتسمه يديها شيكولاته و يشاورلها تقعد جنبه و يلعب بايده فى شعرها و يبرطم
شاهين / و الله جبتلها نفس الريحه و برده السحنه مش عاوزه تتعدل انا اللى اتسرعت انا كنت فاكرهم كلها فى الضلمه واحد زى ما بيقولوا بس مسيره النور هيايد يعني فى الاخر و تفوق على الحقيقه المره
عبد الرحمن / هى الحقيقه ليها طعم اصلا
شاهين / هاه !!
عبد الرحمن / انا عاوز اللعب
شاهين ينزل عبد الرحمن يجرى على الارض يلعب مع الولاد و يقعد شاهين يضحك و هو بيبص لتيا
شاهين / عفريت ... و انتى بتلعبى مع الصبيان الوحشين ليه مش تطلعى كدا لياسو تعلمك حاجات البنات
تيا / قالتلى اخد بالى من عبد الرحمن لحد ما تخلص مع عمتى وفاء
شاهين / بتعمل ايه بقي مع عمتك وفاء
تيا / مش عارفه
شاهين / مش تعرفى ... تلاقيكي عارفه كل حاجه و مش عاوزه تقوليلى
تيا تضحك
شاهين / شوفتى ... عيب هو انا تلميذ ... قوليلى بقي بيعملوا ايه ... قولى و انا مش هقول انك قولتى ... بيعملوا حاجه عيب
تيا تضحك
شاهين / على فكره انا كدا كدا عارف
تيا / ازاى يعني !!
شاهين / هتشوفى ... انا اصلا بعرف كل حاجه
تيا / لو بتعرف كل حاجه قولى انت بقي بيعملوا ايه فوق
شاهين / لا مش هقولك ما دام ما بتثقيش فيا انا مش هثق فيكي
تيا / انت بتضحك عليا
شاهين / مش اول امبارح ياسو كانت بترسم لعمتوا وفاء تاتو على ضهرها
تيا / غلط
شاهين / لا حصل باماره انه كان غصن شجره واقف عليه عصفوره
تيا / و الله غلط
شاهين / يا بت ما تحلفيش حرام دا انا شايفه بعيني
تيا تتخض
تيا / احلف
شاهين / و الله شوفته
تيا / انت قليل الادب
شاهين / انتى اتجننتى انتى هتنسي نفسك يا بت و لا ايه دا احنا لامينك من الشارع
تيا تبصله و تجرى على جوه
شاهين / العيب مش عليكي العيب على اللى يفكر يجبر بخاطركوا عيال عديمه الربايه
.......................
على سطح فيلا نجاه
نجاه واقفه مع مختار بيشربوا شاى
نجاه / واخدينها عند على فكره و كل واحد داخل للتانى ند و كانها حرب مش عارفين يبقوا صف واحد
مختار / أنتى واثقتى فيه
نجاه / بيحاول يا عمى دخلت عليه فجاه لقيته بيصلى و بيحاول
مختار / بس مش راضي ينسي ماضيه
نجاه / ما يعرفلوش طريق غيرها و احنا مش مدينه فرصه... و بصراحه طريقه اسهل و اسرع و نتيجته مضمونه عن طريقنا خالص
مختار / لحق !!!
نجاه / يا عمى خلينا نتفق يونس كان دايما سابقنا بخطوه دا وقف وشه فى وشك و ضحك عليك و مشي فى البيت فى مصر عند عم فاروق
مختار يضحك و يبص الناحيه التانيه
نجاه / يا عمى احنا محتاجين نلاقى حل اكيد ربنا ما كتفناش عليهم هى مش الحرب خدعه
مختار / خدعه مش تنازل
نجاه / انا ما بتنازلش ... هو انا كدا عشان بنت و لا
مختار / كلنا مرينا بالاحساس ده ... زمان و انا قدك كدا كانت قوانينا انشف من دلوقت بكتير دا احنا كدا ملبن ... تعرفى ... ما كانش فى خوف على الحريم كنت اعاديك و بينا و بين بعض مصانع الحداد بس لو مراتى فى خطر تفاديها و اموت نفسي و لا ان شعره من حريمك بس تتمس ... كنت عشان اقتلك او اواجهك لازم ابص فى وشك و اخليك تبص فى عيني و تعرف انه انا ... لازم ارحم ضعفك و عجزك .. ما ينفعش اقل منك قدام اهل بيتك ... ما ينفعش اقتل واحد اعزل ... كان لينا قوانين كتير نمت صحيت لقيت قدامى جيش ما سمعش عنها حاجه لقيتهم بيهجموا على الحريم و الاطفال لقيتهم بيهددونى باهلى لقيتهم ما لهمش كلمه و لا عهد لقيتنى متكتف نفس تكتيفتك دى بالظبط
نجاه / و عملت ايه
مختار / ما انتى عارفه فضلنا ندافع لحد ما ايدهم اتمددت على الحريم طلعنا ما رجعناش غير و احنا مسفلتينهم بالارض
نجاه / بس الحرب المرادى اكبر مننا
مختار / و حرب عيالك هتبقي اكبر من دى ... بس انتى اقوى منى و عيالك هيبقوا اقوى منك
نجاه تبتسم
مختار / زمان كان اخرنا كام مسدس على كام بندقيه يوم ما صيعنا جبنا كام درون انما انتوا ... الله اكبر الله اكبر باب التكنولوجيا مفتوح على وسعه
نجاه / مفتوح ضدنا اكتر منه علينا
مختار / معانا الحق
نجاه تهز راسها يسمعوا صوت عربيه بتركن و ينزل منها جوزيف لوحده
مختار / خليكي هنا
نجاه / ليه عاوزه اعرف ايه اللى حصل
مختار/ تمام تعالى
مختار و نجاه ينزلوا
.....................
فى سرايا الجوارحه
دياب و مغاورى و منصور و شاهين بيتخانقوا و صوتهم عالى
شاهين / دى بت زباله و ما اتربتش
دياب / يعني بتتبلى عليك ... قولت و لا ما قولتش
شاهين / انا مالى بمراتك اصلا انا على اخر الزمن هبص لواحده قد امى دا ايه العته ده
مغاورى / امال عرفت منين حكايه التاتو دى يا شاهين انطق
شاهين / بتكلم عن مراتى وفاء مراتى كانت عملالى تاتو ارتاحتوا ...مبسوط يا سيد الرجاله مبسوط يا باشا دلوقت
منصور / و انت ايه اللى دخل مراتك فى الحوار اصلا البت بتقولك ياسمينا قاعده مع عمتها هى مراتك عمتها
شاهين / امال مرات ابوها ما تهدى كدا انت كمان هو ما فيش غير شاهين و لا ايه
منصور / اهدى ايه انا لسه ما بداتش اصلا لسه حساب الغلبانه اللى غلطت فيها
شاهين / عديمه الربايه و بتعلى صوتها على الاكبر منها واحد غيرك كان عاد ربايتها
منصور / تيا متربيه احسن تربيه الدور و الباقي اللى حاشر نفسه وسط العيال و ماسك بت قد بنته و هاتك يا تقرير
شاهين / كنت فاكرها بتتكلم عن مراتى
مغاورى / غلطان
شاهين / انا على طول غلطان انا من يوم ما جيت الدنيا و انا الغلطان انا اساسا جيت الدنيا دى غلطه باين و شكلك ندمان عليها مش كدا
مفاورى / انت ايه اللى بتقوله ده
شاهين/ رد قولى امتى نصفتنى حتى فى موقف اهبل زى ده بتغلطنى ... الحق عليا انى راضيت العيال بحلويات الحق عليا انى لاعبتهم شويه ايه قاسي انا كدا
دياب / انت حلفت
شاهين / حلفت على مراتى يا جدع انا مالى ايه ما حدش بلغكوا ان اسمها وفاء برده و لا ايه دى ما بقيتش عيشه دى
شاهين يسيب المكان و يمشي و يرزع الباب
مغاورى / انا تعبت
منصور / ما تاخذناش يا خالى بس
مغاورى / حصل خير الحمد لله سوء تفاهم و ان شاء الله يعدى على خير اهدوا و لموا الدنيا و انا هتكلم تانى مع شاهين و انت يا منصور راضي ست الكل توته و قولها عندى دى باذن الله بكره انزل اجيب ليها حاجه حلوه اراضيها بيها
منصور / تسلم يا خالى بس الموضوع مش مستاهل انا هراضيها بمعرفتى
مغاورى/ مش قادر لك انت كمان ... عن اذنكوا
مغاورى يمشي
دياب / تفتكر بيقول الحقيقه
منصور / كوم على اللى قبله مش عارف و الله اخرتها ايه الدرمغه دى
دياب يتنهد و يهز راسه
....................
فى الشركه عند اكرم
اكرم يدخل المكتب يلاقي عمران قاعد و معاه جابر
اكرم / اسف اسف جدا يا جماعه الاجتماع طول و انا اصلا ما كنتش عارف اخلع منهم فبجد اعزرونى
جابر / لا مفيش حاجه حضرتك ما اتاخرتش
اكرم / تشربوا ايه بقي
عمران / ربنا يباركلك بس احنا مش جايين نشرب احنا جايين نسال عن حاجه كدا و ماشيين على طول
اكرم / اؤمرنى خير
عمران / احنا مشينا ورا العيال اللى اتهجموا على مهره
اكرم يرتبك و يلم نفسه و جابر متابعه
عمران / قالولنا ان حضرتك اللى ورا الموضوع ده
اكرم يبص فى الارض
اكرم / انا عمرى ما هاذيها انا بس كنت عاوزها تروح ... انا و والدتها اطلقنا و اتخانقنا و من ساعتها و هى كرهانى خصوصا انها مقتنعه انها السبب فى الطلاق ده
جابر / ليه
اكرم / خلافات عائليه بتحصل بس انا و كارمن العلاقه بينا ما كانتش كويسه من فتره و انا اتكلمت مع مهره فى قرار الطلاق اكتر من مره و كانت فى كل مره بتنهار و تحاول تقنعنى اغير رايي بس مفيش فايده كان لازم ننفصل بادب قبل ما العلاقه بينا تتحول لكره و نخسر بعض
عمران / بس الرعب اللى شافته
اكرم / انا نبهت عليهم ان ما حدش يلمسها ... لو اختك تسيبها تعيش فى شقه لوحدها كدا ... انا مش عاوز اقولك انا مهره بالنسبالى زى بناتى و اكتر و فى الاخر مضطر اسيبها تضيع بين اب جاحد و ام انانيه مهمله .. دا حتى اخوها اللى رايح جاى معاها و فجاه افتكر ان له اخت ده اساسا محشش و دخل مركز علاج الإدمان مرتين
عمران يبص لجابر
اكرم / طبعا المعلومه دى مش اى حد يعرفها و ارجو انها متتسربش لان هيتعرف انها خرجت عن طريقي
جابر / هو كل الحوار اللى دار بينا كانه ما تمش بس نصيحه لوجه الله ما تكررهاش انت اصلك ما تعرفش انت كريت مين على بنتك ... زى ما سعادتك بتقول طبعا
...............................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
