((((((( الكبيره ٢)))))))
#لولو_محمد
الحلقه ١١
فى سرايا زنايته اسكندريه
الحجه / يعني ايه جبت حق ابوك و لا لا يا كبير الزنايته
همام / اللى قتل ابويا ما طلعش عليه نهار انما اللى كرى عليه دى حكايه تانيه قولت
الحجه / يبقي مفيش عزا
همام / اما ... انا من ساعه ما طلعت من البيت ده ما غفلتش و مش قادر لكلام... العزا النهرده بالليل عشان من بكره الصبح فى نظام جديد
الحجه / انا قولت
همام يوطى يمسك فى كرسي امه و يتكلم بصوت واطى
همام / لو فاكره ان الايام الجايه مش هيروح فيها ناس ياما فانا بصححلك الدنيا و اللى بيجرا فيها احنا داخلين على مرار ما لوش اول من اخر
..................................
الحجه تتخض
همام / انا هاخد عزا ابويا الليله ... عشان مش ضامن ابقي واقف على رجلى اخده فى الايام الجايه
همام يقف و الحجه بصاله و مخضوضه
همام / تصبحى على خير يا ست الكل انا طالع انام و ارتاح شويه لحد ما الناس تيجي بالليل ... بيتهيالى كل واحد عارف هيعمل ايه لو فى حاجه محتاجين فيها راى الحجه موجوده... ما حدش يصحيني ... بالاذن
الحجه / اذنك معاك يا ضنايا اذنك معاك ... مع جوزك يا بت شوفيه يمكن يحتاج حاجه
ولاء تعدى و تمشي ورا همام
الحجه / جيب العواقب سليمه يا رب
....................
فى اوضه شاهين
سماح / لا يا وفاء غلطانه و احنا مش اول مره نتكلم فى الموضوع ده يا بنتى
وفاء / ما انا عملت كل اللى حضرتك قولتيلى عليه
مغاورى / هى دى اقصي مشاكلك يا شاهين
سماح / طبعا يا ابو شاهين هو الواحد بيتجوز ليه مش عشان يعف نفسه و هى الست لزمتها ايه فى الدنيا غير انها تدلع و تتزوق لجوزها هو انا اللى هقولك
مغاورى / و اخرتها
سماح / و الله انا قولتلك ما تشغلش انت بالك و انا من بكره هفرغ نفسي لفوفا لحد ما تتودك و ان كان يا ستي على الواد اللى تاعبك انا هاخده خالص ايه رايك يا فوفا
وفاء تبص لشاهين
وفاء / انت عاوز تتجوز ؟ فى واحده تانيه ماليه عينك؟
شاهين / و انا لو عاوز اتجوز واحده تانيه كنتى هتمنعيني ؟ كنت استنيت ؟ و لعلمك انا حتى القاعده دى ما كنتش عاوزها انتى اللى جريتي تعيطيلهم و تسيحى لنفسك و ليا
مغاورى / الحوار ده ياما بيحصل خصوصا بعد الخلفه بس اللى باقيين على العشره بيعدوا من اى حاجه و الحمد لله انها حاجه بسيطه و مش هتتكرر
سماح / لا تتكرر ايه دا انا هستلمها من السعادى هو انا بس اتلخمت عنها اليومين اللى فاتوا من خضتى عليكوا و اللى كان بيحصل بس انا كنت علاطول حطاها فى عنيا ... معقول ما اتعلمتيش منى اى حاجه طول الفتره دى
وفاء / و الله و لا بيعجب
شاهين / شايفين الردود
مغاورى / الليله ما خلصتش و مش هنفرهد نفسنا فى خناقات تافهه اتراضوا و حاجى على بيتك و اياك تطردها من اوضتها تانى انت فاهم و لا لا
شاهين / امرك يا كبير
مغاورى / يلا يا سماح يلا يا ام شاهين
سماح تطبطب على كتف وفاء و تحدف بوسه لشاهين و تمشي مع مغاورى شاهين يبص لوفاء و يروح ينام وفاء تتنهد و تروح تنام الناحيه التانيه
........................
فى اوضه جابر
جابر يخبط على الباب نجاه تفتح الباب
جابر / جاى اخد غيار عشان خارج
نجاه / ادخل و خد راحتك بس تعمل حسابك لو دخلت لقيت اوضتك كدا تانى هبطحك انت فاهم
جابر / حقك علينا يا رياسه انتى اللى طبيتي فجاه و انا كنت راجع من السفر تعبان و ورايا مليون حاجه يعني اكيد كنت هرتبها مش حيوان انا يعني
نجاه / خش انا رتبتهالك .. انت عملت ايه امبارح
جابر / فى ايه
نجاه / ما تستهبلش
جابر/ لسه ما عملتش ساعه زمن بالكتير و اكون عملت باذن الله
نجاه / مش فاهمه
جابر / هقطع الشجره اللى تحت البلكونه و هركبلك حديد على باب البلكونه كدا لو هيطير حتى مش هيعرف يدخل
نجاه / خير برده
جابر / انا مش هقدر استحمل الكائن ده كتير على فكره
نجاه / تحب نخرج نتكلم فى اى حته بعيد عن هنا
جابر / اللى تشوفيه بس لو عاوزه رايي السرايا ائمن مكان ليكي دلوقت لحد ما نشوف الدنيا هترسي على ايه
نجاه / تمام تعال نروح الجنينه الورانيه نقعد هناك شويه
جابر / و ماله انزلى كلى لقمه على ما اخد غيار اتشطف و احصلك
نجاه تهز راسها و تمشي جابر يدخل الاوضه متروقه و فله
......................
فى اوضه عمران
اكرم و مهره و مختار و هند و نجاه قاعدين حوالين عمران
اكرم / لا مش هنسكت طبعا و اكيد هنتابع القضيه على المستوى الدولى انا مكلف اكتر من محامى بمتابعه التحقيقات مش هنسيب حقنا
عمران / و الله انا شخصيا فرهدت
اكرم / لا اجمد كدا و يومين تلاته و ترجع مصر تكمل التمرين بتاعك البطولات ما خلصتش و البطوله دى مش نهايه المشوار و لا ايه يا مهره
مهره / اكيد بس برده هو محتاج يرتاح دا جرح شديد يعني
مختار / الحمد لله قدر و لطف سمعت ان لولا شجاعتك كان زمانها حاجه تانيه لا قدر الله
مهره / و لا شجاعه و لا حاجه دى كانت مجرد رده فعل
اكرم / فى ناس كتير رد الفعل بتاعهم انهم يتخشبوا او حاجات اسوء انتى اتحركتى و دافعتى
مهره / الحمد لله عدت على خير
اكرم / و الله كان نفسي نقعد معاكوا فتره اطول من كدا بس للاسف انا مرتبط بمواعيد
مختار / المرادى مش محسوبه المره الجايه بإذن الله تقعدوا فتره اطول
اكرم / اكيد انا لسه ما شوفتش البلد عمران ياما حكالنا عنها
مختار / ما حضرتك اللى مستعجل انا لو منك اعتزر للناس و اخلينى اسبوعين و لا حاجه
اكرم / ههههههههههه ما تقول شهر احسن
مختار/ و انا مش هرجع كلمتك شهر بحاله
اكرم / هههههههههههه انت مسكت فى الكلمه انا بهزر
مختار / لا انا فى استغلال الفرص ما حصلتش
اكرم يبص فى الساعه و يقف و هو مبتسم الكل يقف
اكرم / حمد الله على سلامتك يا بطل و الف مليون حمد الله على سلامتك يا نجاه كان نفسنا نقضي وقت اطول معكى بس الطريق لوحده هم
مهره / هستناكى زى ما اتفقنا
نجاه / فى اقرب فرصه باذن الله
مهره و نجاه يسلموا على بعض و مختار يروح يوصلهم
هند / شكلها طيبه و بنت حلال
نجاه / و مثقفه و دمها خفيف
هند / ربنا يعملها اللى فيه الخير هقوم ابص على الاكل ابعتلك حاجه يا عمران
عمران / تسلم ايدك يا امى
نجاه و هند يمشوا عمران يقوم يقف فى الشباك يتابع مهره و اكرم بيركبوا عربيه و يمشوا و مختار بيشاورلهم باى و يدخل عمران يتنهد و يروح يمسك تابلت و يفر فيه
.......................
فى اوضه منصور
ياسمينا / يعنى يسمك و يديك البى كاى و يخطف نجاه و يديها البى كاى و يفجر و يموت كل الناس دول و هنتعامل معاه عادى دا انهى عبط ده
منصور / امر الكبير ... و مش لوحده ... دا الكبارات التلاته اتفقوا و همام راخر جاى من اسكندريه و ناوى يحط ايده فى ايد سي زفت
ياسمينا / انا مش فاهمه اى حاجه
منصور / كل اللى اعرفه ان الواد ده مش سهل ابدا و ان لو فعلا هيبقي معانا مش خازوق يبقي مكسب
ياسمينا / و ان طلع خازوق يا حبو
منصور / يبقي هو اللى جابه لروحه عشان حرفيا ما حدش فينا طايق امه
ياسمينا/ انا من زمان اسمع عن عم رشيد و اترحم عليه معاهم بس لو هو كان جامد اوى كدا زى ما بيقولوا طبيعي ابنه يبقي زيه
منصور / قصدك جينات الوراثه قصدك
ياسمينا / يعني تفتكر الواد عبد الرحمن هيطلع جامد زيك كدا
منصور / و هو كان شاهين طلع ربع خالى
ياسمينا/ ايه الفصلان ده بقولك ايه قوم روح شوف كنت رايح فين
منصور / الله مش كنت من ثوانى استنى و فهمنى و طمنى و عاوزه افهم و عاوزه اعرف
ياسمينا / طب بقولك ايه ... ما تاخدنى معاك اروح السرايا عندنا
منصور / ماشي هنزل على ما تلبسي
ياسمينا / هوا
ياسمينا تجرى على الدولاب و منصور بيتابعها و يضحك
.........................
قصاد المضيفه
جوزيف بياخد كبايه شاى من الغفير
جوزيف / تسلم ايدك لعلمك انت اجدع واحد فى السرايا دى
الغفير / عشت يا سي يونس تؤمرش باى حاجه تانيه
جوزيف / انت ليه بتقولى يونس
نجاه تدخل
نجاه / هو مش ده اسمك و لا ايه
جوزيف يبص فى الساعه
جوزيف / هو انتى فى الطبيعي بتصحى متاخر اوى كدا
نجاه/ لا بصحى بدرى بس كنت مشغوله فى حاجات تانيه جوه السرايا
جوزيف / ااااه طيب كنا متفقين نبدا تمرين
نجاه / عاوز تتمرن على ايه
جوزيف / زى ما تحبى نبدا مثلا فى الدفاع عن النفس بما ان مستواكى فيه شوارع
نجاه تتنهد
نجاه / ماشي هاخدك و ننزل الجيم تحت مجهزينه بكل حاجه ... حاجه تانى ؟؟
جوزيف / ماشي يلا
نجاه/ لا مش دلوقت
البوابه تتفتح و عربيه تدخل و عليها رجاله معاهم بلطه و منشار كهربا
جوزيف / انا ما طلعتش من على الشجره بس تمام لما تخلصوا ابقى كلميني على الموبايل هرجعلك عشان مش فاضي للهبل و اللكاعه بتاعتكوا دى
نجاه / لكاعه !!
جوزيف / انتى فاكره انى عشان هنا الحوار خلص دا لسه ما بداش تضمنى منين ان مش هتلاقى فجاه سرب من الدرونز بيحدف علينا قنابل من كل حته و دا اقل حاجه ممكن تحصل على تضيع الوقت ده
نجاه / دا على اساس ان الدرونز
جوزيف / على اساس انى عملتها اكتر من مره و لففتكوا حوالين نفسكوا و شويه الفشله اللى ماسكين الشركه ما عرفوش يمنعوا الحوار انه يحصل و بقولك اهو مش هيعرفوا يعملوه لو قرروا انه يحصل
نجاه / بس ما حصلش حاجه لحد دلوقت ... تفتكر دا له معنى
جابر يطلع و يشاور للرجاله على الشجره يبداو يقطعوها و يروح ناحيه نجاه
جوزيف / معناه وحش و وحش اوى كمان
نجاه / للاسف مش متفقه معاك فى الموضوع ده
جوزيف / تقصدى انهم مثلا فاكرين انى لسه ماشي على الخطه و انى هنا لسه بحاول اجندك ؟
نجاه / دا سؤال مهم جدا اكيد كلنا بنفكر فيه لحد دلوقت هو انت لسه ماشي على الخطه و لا ناوى علي ايه
جوزيف / تصدقى اطمنت ... حسيت براحه نفسيه رهيبه بعد الجمله دى
جابر يقف جنبهم و يبص لجوزيف
جوزيف / اصل بصراحه لو كنتى قولتى انك واثقه فيا او مؤمنه انى يونس و انى هتغير لمجرد تغير الاسم كنت خلعت اصلك ساعتها هتطلعى ساذجه و هبله اكتر من كل رجاله البلد دى خصوصا الهلف ده
جابر / زود زود عشان لما ضيافتك تخلص
جوزيف / هتعمل ايه تقدر تعمل حاجه اصلا و لا اى حاجه اخرك تقطع الشجره المسكينه اقولك حاجه انا اقدر اطلع الاوضه دلوقت قدامك و اثبتلك انى ما طلعتش على الشجره بس تؤ انا هقهرك لما تلاقيني فوق النهرده بالليل و انت نايم و برده مش عارف انا طلعت فوق ازاى هخليك تلف حوالين نفسك
نجاه / و هتستفيد ايه انك تستفذ جابر او تعاديه انت لو بجد عاوز امانى يبقي لازم تحط ايدك فى ايده
جوزيف / بصى خلينا نحط شويه نقط على الحروف انا خطتى كانت بناء على تعليمات من المجلس انى اتحكم فى العيله دى من جوه و بعد دراسه اكتشفنا ان انتى المفتاح اللى بيربط العيله ببعض و المفتاح برده اللى يقدر يفككها و بناء على كل الدراسات و التجارب اللى عشتها اكتر طريقه انى اتحكم فيكي هى ان ابنك او بنتك ما عندناش تفرقه عنصريه فى الموضوع ده يكون تحت ايدي ابنك ده منى منه من ابن عمه ابن خاله ابوكى ما يفرقش بس الصراحه انا كنت افضل يكون منى عشان حوار الجينات مش اكتر دا هيبقي واد ما حصلش
جابر / اللهم طولك يا روح
جوزيف / ما تنكروش رشيد اللى بتقولوا انه ابويا كان واد جن ما حصلش
نجاه / كان يجيبك و يوديك بربع امكانياتك
جوزيف / شوفتى .. جينات
نجاه / ما علينا بتحاول تقول ايه
جوزيف / الخطه كلها باظت لانك للاسف صحيتي حاجه المفروض انها ميته و المفروض كانت تفضل ميته بس للاسف ما قدرتش ... اعتقد انهم هيبعتوا حد تانى يكمل الخطه و الحد ده هيحاول يقرب منك و يتجوزك زى ما حاولوا يعملوا مع احلام
نجاه / و انت ما عملتش كدا ليه
صوت الشجره بيقع فى الارض نجاه تتخض تبص وراها
جوزيف / مسكينه يلا هيطلع منها شويه خشب حلوين ... نرجع لموضوعنا ... انا ما عملتش كدا ليه لان كان فى تعليمات مشدده ان وشي ما يتحرقش
جابر / و دا معناه انهم عارفين انك ابن رشيد
جوزيف / او على الاقل شبهه
نجاه / برده عشان انت بعتنا فى سكه تانيه خالص ... لو امانى مهم للخطه دى لازم تحط ايدك فى ايد جابر
جوزيف / دى صياغه صح للجمله مش لو انت عاوز امانى لان امانك ما يهمنيش امانك مهم للمجلس مش ليا
نجاه تنفخ
جوزيف / هو مش هيحط ايده فى ايدى
جابر يمد ايده جوزيف يستغرب
جابر / لو امانها مش مهم عندك فهو رقم واحد عندى و لو هتقدر بجد تحميها هعصر على نفسي محصول اللمون بتاع السنه كلها و اقبلك بس اقسم بالله لو فكرت تغدر لخليك عبره للرايح و الجاى
جوزيف / تمام ... تحبوا نبدا منين
نجاه / عاوزه اتعلم انط السور زى ما عملت يوم حفله ياسمينا
جوزيف / هتحتاجى شويه شغل بس دى مش اولويتنا دلوقت الاولويه انى احسن طريقه استخدامك للاسلحه بانواعها اللى هيضربك غالبا مش هيجيلك راجل لراجل مع العلم انك فشلتى فى دى كمان
جابر / عندنا مران افتراضي هيعجبك تعال اوديك تجربه
جوزيف / اوك يلا
جابر يروح يفتح باب العربيه الورانى لنجاه جوزيف يركب قدام و جابر جنبه و جابر يسوق و عباده واقف بيتابعهم من التراس مختار يدخل
مختار/ مش هتروح تعزى فى الشافعى
عباده / لا كلمت همام فى التليفون و هو اتفهم الوضع
مختار/ انا هروح
عباده / روح طيران و خد بالك من نفسك و ارجع معاهم
مختار / تمام
مختار يمشي و عباده يسند على السور و هو بيتفرج على الشجره اللى بيقطعوها و يحملوها على العربيه
.................................
فى الشركه
منصور يدخل يخبط على المكتب و يدخل يلاقي وفاء قاعده بتشتغل
منصور / السلام عليكم ... ايه يا ست الكل انتوا خلاص غضبتوا على السرايا و قررتوا تنقلوا مكان اقامتكوا هنا و لا ايه
وفاء / اعمل ايه فى اخوك اقسملك بالله ضهرى اتقطم من نومه الكنبه دى بس مش هاين عليا اروح و اسيبه بايت هنا
منصور / المهم بعد كل الهم ده طلعتوا بحاجه
وفاء / ايوه الشركه الامريكيه اللى جت البلد و اتملكت فيها من كام سنه فاكرها
منصور / مالها
وفاء / تبع جوزيف و المجلس
منصور / حبيب امه صغنن كل ده و احنا نايمين على ودانا
وفاء / المشكله ان الشقق اللى اشتروها متأجره لناس عايشين فيها احنا بقي من امبارح بنجيب اصل و فصل الناس دول اخوك بقي بالصلاه على النبى اخد بعضه و طلع على مران السلاح
منصور/ يعمل ايه فى المران
وفاء / يعني هيفوت فرصه يواجه فيها جو باشا وش لوش برده
منصور يسيب المكان و يجرى وفاء تكمل شغل
وفاء / على الله تكون رايح تعقله مش تعينه ... انا اعصابى تعبت والله
مهندس يدخل
المهندس / انا خلصت ... ملخص التحريات كل المستاجرين ابيض يا ورد و ما لهمش اى علاقه بالشركه الامريكيه لا من قريب و لا من بعيد
وفاء / امال اجروا من مين
المهندس / من وكيل الشركه فى مصر ماجد الشرشابى و حرمه لينا الخولى
وفاء / و الله كنت حاسه ان الاتنين دول مش تمام ... تمام تسلم انا هبلغ الباشمهندس دياب و هو يشوف هيعمل ايه بالمعلومات دى
المهندس يحط ملف قدام وفاء
المهندس / عن اذن حضرتك
المهندس يطلع بره و يقفل الباب
...........................
فى المران
جوزيف بيلبس سوت نجاه تناوله نضاره فى ار
نجاه / لو اتصابت البدله بتكهربك فى الجزء اللى اتصابت فيه و لو الاصابه خطيره الكهربه بتكون شديده شويه تخليك تقع فى الارض الاحساس هيكون واقعى
جوزيف / تمام
نجاه / لو عاوز تخليك للجوله الجايه تتعلم الدنيا ماشيه ازاى ما حدش هيلومك
جوزيف / خليني اجرب
نجاه / تمام
نجاه تروح تاخد النضاره بتاعتها وتطلع المسدس من جرابه فى بنطلونها و تستعد جوزيف يبص الناحيه التانيه جابر مستعد دياب قاعد على لوحة التحكم
دياب / غيرت رايك و لا ايه
جوزيف يبتسم و يلبس النضاره و دياب قاعد على الجهاز يرفع مستشعرات جوزيف لاعلى مستوى و يدوس انتر و تظهر قدامه على الشاشه اداء كل واحد و اللى شايفه و يبداو يتحركوا و كانهم بيضربوا نار على حد و يظهر ارقام الناس اللى بيقتلوهم على الشاشه و ارقام جوزيف بتتحرك بسرعه دياب يبلع ريقه و هو بيتابع يفصل جابر جابر يقلع النضاره و الغضب ماليه
جابر / ليه كدا
دياب يشاورله يروحله جابر يبص على جوزيف و نجاه بيتحركوا فى مكانهم كانهم بيحاربوا يروح لدياب و يبص على الشاشه
دياب / دا اعلى مستوى
جابر / انت حاطتنا على مستويات مختلفه
دياب / دا اللى انت فهمته الواد عنده عنين فى قفاه يا جابر
جابر / مبلبع
دياب يركز يلاقى ان جوزيف بيتصاب و ما بيتكهربش ثوانى و نجاه تقع فى الارض دياب يفصل اللعبه جوزيف يقلع النضاره
جوزيف / طفيت ليه كنت بدات اندمج
جوزيف يبص يلاقي نجاه فى الارض بتفك السوت
جوزيف / اخر واحد واقف و لا ايه
جابر / لا بس جامد الصنف بتاعك بى كاى ده يا جو
جوزيف يبتسم و يهز راسه لا نجاه تبصله باستغراب و يفك السوت مبوظها
جوزيف / انت بجد فاكر انى هثق فيك و اسيبك تكهربنى
جوزيف يضحك دياب يضحك
دياب / هبقي اخصم تمنها من ورثك لما يجوا يسلموهولك
جوزيف / لعبنا شويه ندخل فى الجد بقي ... اولا السلاح هنا وزنه اخف من السلاح الحقيقي المليان رصاص ... ثانيا السلاح ما بيخلصش تغير الخزنه بتحتاج جزء من الثانيه مع جزء تانى لشد الاجزاء يعني صعوبه اعلى دا غير ان اكيد الخزن نفسها هتخلص فلو اعتبرنا اننا بنتمرن فالاختبار ده صعوبته الحقيقه اتنين من عشره مقارنه بالواقع
نجاه / معاك حق احنا نطلع على المران الحقيقي و نشوفك من غير خم
جوزيف / ما اسموش خم اسمه كلهم قبل ما ياكلوك
جوزيف يحط السوت و النضاره فى جنب و يروح يبص على دياب يشوف مستشعراته اعلى حاجه يبص لدياب و يبتسم
جوزيف / شوفت بقي انكوا بالنسبالى كتاب مفتوح و انى مذاكركوا واحد واحد
دياب يبتسم بسخريه و يطفى الجهاز
دياب / طب ايه رايك لو طلعنا على الملعب اتسلينا رجاله فى بعض اعتقد انت عارف كويس ايه اللى بيحصل فى الملعب
نجاه / المران او الملعب انا جايه
جابر / نجاه
نجاه / جايه يعنى جايه
جوزيف / اسمع كلام الست
جابر / فاكرها هتحوش عنك و لا ايه انت بطولك و احنا كتير
جوزيف / ما تفتحش صدرك اوى عشان لما اعلم عليك قدامها ما تجيش على كرامتك
جابر / اخرك هاته
نجاه / جابر لو سمحت اهدى
دياب / الناس اللى فى البلد ما يعرفوش انت مين تفتكر لو عرفوا هيعملوا فيك ايه ما تنساش ان الف من له عندك تار
جوزيف / روح قول لهم قولهم انى انا اللى خطفت نوجه و ان انا اللى اتصورت معاها فى سريرى و هى لبسالى قميص نوم احمر قصير
جابر يجي يضرب جوزيف جوزيف يفاديها و يلبسه الاسوره و يكهربه يقع فى الارض
جوزيف / قولتلكوا بلاش تلعبوا معايا
جابر يجي يقوم بعنف يحاول يطول جوزيف يتكهرب يقع تانى نجاه تجرى عليه و تمسك الاسوره بأيديها و تساعد جابر يقوم يقف
نجاه / كفايا لعب العيال ده بقي الكبير مش هيعجبه اللى بيحصل ... قلعه الاسوره
جوزيف / و ان قولت لا
نجاه / انا الوحيده هنا اللى بحاول اديك فرصه لو كهربته هتكهربنى معاه و انت عاوزنى عايشه
جوزيف / مش هتتفك غير بتكه من بصمه صباعى و لعدد ثوانى محدد لو حاولتوا تلعبوا فيها هتشتغل لحد ما تموت
نجاه / انت بتقول ايه انا بقولك فكها
جوزيف / بمزاجى و للمره المليون بقولهالك انا مش فارق معايا حياتك انتوا اللى محتاجيني
دياب / ضيعنا وقت كتير فى خناق ما لوش لزمه هنروح الملعب و لا المران
جوزيف / مكان ما تحبوا انا واقف بره
جوزيف يسيب المكان و يمشي
نجاه / انت كويس
جابر يهز راسه
دياب / الواد ده مش سهل ... سايسه لحد ما نلاقى مدخله
جابر / الموت عندى اهون
نجاه / هتموت فعلا لو كملت فى عصبيتك و عندك ده انت شوفت الصور مفيش جديد قاله غير انه بيحاول يستفزك مش اكتر ما تسمحلوش خليك بارد
جابر / فكراها سهله عليا
نجاه / اهدى ... اخد الحق حرفه
جابر / خلينا ورا مجايبك اوعى
جابر يسحب ايده من ايدين نجاه و يروح يقلع السوت و يرميها جنب سوت جوزيف نجاه تروح جنبه و تفك السوت بتاعتها و الاتنين مش بيبصوا لبعض و مضايقين نجاه تبصله يسيب المكان و يمشي
........................
فى سرايا الزنايته
ياسمينا / ايوه يعني انا جايه هنا اقعد مع مين هى هترجع لشغل الفرقع لوز ده تانى مش كنا خلصنا
هند / ابوس ايدك فينا اللى مكفينا
ياسمينا / انا حالفه لو شوفت اللى اسمه جوزيف ده لابطحه و راجل اللى يقدر يمنعنى
احلام / يا اختى اتوكسي دا اسمه بس بيلبش رجاله السرايا كلها
هند / انتى بتقولى ايه يا احلام
احلام / ما بقولش حاجه سكت
هند / هو ده يجي حاجه جنب الهلف اللى كان مع فيرا تخيلوا يدخل راجل بطوله و ينزل قصاده عباده الزيني و مختار الزيني و عبد الله اخويا و التلاته ينزلوا فيه ضرب و يطلع على رجليه بعد ما يرقد التلاته فى المستشفي البلد كلها اتقلبت و فى نفس الوقت يدخل علينا السرايا ناس تضربيه بالنار ... بالرصاص و لا يحسش و يكمل مشي و لا الزومبى بتوع الافلام الناس بقت تمشي فى الشارع تكلم نفسها من الخوف حتى الرجاله هنا كانوا خايفين بس بيداروا الواد ده جنب اللى شوفناه وقتها و لا حاجه و بالمناسبه ما كانش عندنا ربع الامكانيات اللى عندنا دلوقت
احلام / و لا هم وقتها كان عندهم ربع إمكانياتهم دلوقت
ياسمينا / احنا معانا ربنا يا بت فوقى
احلام / و نعم بالله بس معلش لو ما كانش جوزيف ده طلع ابن رشيد كانت نجاه هترجع
هند / و هو مين اللى دون البشر كلهم خلى جوزيف هو اللى يخطف نجاه و اللى دون عن القصص و الصور كلها يخلى نجاه تهتم بقصص رشيد اللى خالك بيحكيها طول الوقت و سبحان الله مين اللى خلى جوزيف حته من ابوه فى الشكل لدرجه ان نجاه تتعرف عليه بمجرد ما تشوفه مفيش حاجه فى الدنيا بتحصل صدفه دا نصيب و ربنا هو اللى بيقدر المكتوب
احلام تهز راسها
هند / اتصلى بيها يا بنتى قوليلها انك هنا
ياسمينا / ما انا هعمل كدا فعلا
ياسمينا تمسك الموبايل و تتصل
...........................
فى الملعب
دياب واقف جنب جابر بيتوشوشوا و نجاه قاعده فى جنب سرحانه و جوزيف بيسخن استرتشات جنبها
دياب / مش هيلعب فاير و هيضرب فى الضهر و مش بعيد يستغل البتاعه اللى فى ايدك دى
جابر / ما يمكن معاه واحده تانيه و تلبسها انت راخر خليني اكمل معاه للاخر
دياب / هو هدفه معروف يكسرك قدامها انت مش هتركز و هى بتتفرج عليك
جابر / هى هتحمي ضهرى زى ما طول عمرها بتعمل هثبتله قد ايه انا غالى عندها
دياب / مفيش فايده يعني
جابر / يا سيدي ما تخافش فرصتك مش هتروح منك هتاخد دورك
دياب / هاخده مفرهد
جابر / يمين بالله شكله مبلبع اساسا شايف تنح ازاى و لا كانه من ذوات الدم البارد
دياب / هيبان لما تلاعبه ... ركز انت بس فى التسخين
منصور يدخل دياب يشوفه يروحله
منصور / روحتلكوا المران قالوا انكوا جيتوا هنا ما طولتوش يعني
دياب / فصل السينسورز فما كانش بيتكهرب بس مستواه عالى مش هقدر انكر
منصور / اعلى مننا ؟؟
دياب يبص على جابر
دياب / لبس لجابر الاسوره اللى بيقولوا عليها و طبعا ما نقدرش نقلعهاله لازم البيه يتكرم و يفكه زى ما ربطه
منصور / و احنا ما نقدرش يعني نتكاتل عليه و نجيبه لمس اكتاف لما يبانله صاحب
دياب / و من امتى نجاه بتلعب بالطريقه دى هتقفلنا فيها زى اللقمه فى الزور سيبها بس فى يوم نوزعها و نفوقله
منصور / هو بيكلمها بيقولها ايه دا كمان
دياب يبص يلاقى جوزيف مقرفص قدام نجاه
جوزيف / لما تقولى لواحد ان الاسوره فيها مايك و يروح يوشوش صاحبه و يتكلم عنى دا ما اسموش غباء
نجاه / ما يمكن بيحاول يوصلك رساله
منصور / منور يا سيد الرجاله اهلا و سهلا
جوزيف يبص لمنصور جوزيف يقف
جوزيف / حبيبي ازيك اوعى تكون لسه شايل منى من الحركه اياها
منصور / انهى فيهم ما حركاتك كتير
جوزيف / و جمايلى عليك اكتر و خصوصا انت
منصور / انا !! باماره ايه يا خويا
جوزيف / باماره ياسو
منصور يخبط جوزيف على كتفه بضهر ايده كذا مره و جوزيف بيبص بابتسامه مستفزه
منصور / اسمها الست ياسمينا يا حيلتها ما تنساش نفسك
نجاه / جوزيف اللى صمم الفايروس
جوزيف / و مش بس كدا انا دقه نشانى ميه فى الميه شارب ما بجليش يعني انا لما ضربت عليك النار و يا دوب خدشتك كنت قاصد اخدشك انت مش ياسو
منصور / قولتلك اسمها ياسمينا و لا ما تجيبش سيرتها على لسانك خالص
جوزيف / و لما سبت الميكروروبوت جنبها كان ممكن احقنها بس ما رضيتش و لما حددت موقع تيم و هيا و قتلتهم و لما دمرت كل الموبايلات اللى بتحاول تتفرج على جسمها و خليت الباقيين يخافوا يعملوا سيرش حتى على اسمها و مش بس كدا انا اتخلصت من ربع مليون شخص حاول يتفرج على جسم مراتك ما عدا واحد قريب منك و عايش فى بيتك تحب تعرف هو مين يا منصور
دياب / كتر خيرك مش عارفين نرد جمايلك دى ازاى خلينا فى اللى احنا جايين عشانه
جوزيف / انت مش كنت بتحاول بقالك سنين توصلى ادينى قدامك
منصور / جاى متحامى فى نجاه و بتقول قدامى دا انت بجح اوى
جوزيف / لا احب افكرك ان لولا الصدفه الغريبه دى انتوا ما كنتوش هتشموا ست نجاه دى تانى بس مش ده اللى اقصده اعرفك باسمى الامريكى انا يا سيدي ابقي دانيال برادلى
..............................
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
