الكبيره ٢ بقلم / لولو_محمد

الحلقه ٥٢

(((((( الكبيره ٢ )))))))
#لولو_محمد
الحلقه ٥٢
فى الفندق عند مهره
مهره ماشيه معاهم و هى بتنام و تطوح و هو بيوجهوها تمشي
مهره / انا مش فاكره الطريق ده
شاب ١ / انا لسه قافل مع مروان و مستنيكى هناك
الشباب يضحكوا و يكتموها لحد ما يوصلوا لاوضه التانى يفتح الباب
شاب ٢ / خشي برجلك اليمين يا قمر
مهره / لا ناديلى مروان عشان انا عاوزه انام مش قادره افتح عيني
شاب ١ يزقها لجوه و هى مش قادره تقاوم تقع فى الارض الشباب يدخلوا التانى يحط الكارت الاوضه تنور
مهره / مروان فين ؟!
شاب ٣ / كلنا عشان خاطرك نبقي مروان
........................
شاب ١ يجي يقفل الباب عمران يحط رجله
شاب ١ / هى زريبه يا جدع انت و لا انت عبيط و لا حكايه امك ايه بالظبط
مروان يزق الباب و يضرب الشاب بالرجل فى بطنه ينطره يجوا يضربوه يكومهم فى الارض فى ثوانى و يبص لمهره
مهره / ما شوفتش مروان
مهره تنام يجرى عليها يحاول يفوقها ما بتفوقش
عمران / مهره مهره فوقى مهره
عمران يشيلها و يمشي و العيال فى الارض بتتلوى من الالم
.......................
فى فيلا اكرم
اكرم نازل من فوق بيجرى على صوت زعيق على و كارمن
على / عشان انتى امها و مسؤله عنها
كارمن/ و انت ايه خيال مئاته
اكرم / فى ايه فى ايه
على / اتفضل يا بيه اتفضل شوف الصور اللى مبعوتالى بعد نص الليل الهانم سهرانه فى ديسكوا و بتشرب خمره كمان
اكرم / مين دى اللى بتشرب خمره ؟؟ مهره !!! مستحيل طبعا
على / اتفضل شوف بنفسك الهانم واقفه فين و مع مين بتصل بيها ما حدش بيرد طبعا و هى هتسمعنى ازاى
اكرم / هو مروان فين
اكرم يحاول يتصل بمروان
على / و ماله مروان بيها هو خلفها و نسيها و لا ايه
كارمن / عادى هيكون ابن مين يعني
على / اسمعى يا كارمن انا استحملتك انتى و بنتك كتير اوى انا قولتلك نزليها انتى اللى صممتى تقرفينا كلنا بيها شيلى قرفك بعد كدا انا اى حد هيسالنى عنها من اللحظه دى ما اعرفهاش و متبرى منها انتى بقي المفروض تقعدى تفكرى لما الصور دى تنزل على النت هتطلعى تبررى فشلك كام ازاى انا ماشي
على يمشي
كارمن / عاجبك كدا
اكرم مشغول فى التليفون
اكرم / ما بيردش هو كمان ... اقسم بالله ما هعدى اللى حصل ده على خير ابدا
اكرم يطلع يجرى على فوق
كارمن / دى ما بقيتش عيشه دى
.......................
فى المستشفي
عمران / دى عمرها ما شربت سجاره مخدرات ازاى بس حضرتك متاكد انها مش مجرد سكرانه يعني شويه خمره و كدا
الدكتور / يا سيدي ما التحليل فى ايدك هو انا اللى بقول و بعدين دا ده افظع حضرتك بتقول أن ممكن حد يكون حطلها حاجه فى العصير يا ترى بقي المخدر ده حطه ليه كان ناوى يعمل ايه دى جريمه يا حضرت و لازم محضر
عمران / لا لا محضر ايه و حكومه و سين و جيم و صحافه دى بنت و ليها سمعه برده و انا اوعد حضرتك أن الموقف ده مش هيتكرر ابدا و مش هيتسكت عليه بس نخرجها هى خالص من القصه دى
تليفون الدكتور يرن و هو بيتكلم
الدكتور/ مع احترامي لحضرتك انت اصلا مش ذو صفه انك تتكلم معايا اهلها اللى يقرروا حاجه زى دى ... الو مين معايا ... اهلا و سهلا اهلا اهلا بحضرتك ... لا غنى عن التعريف طبعا يا فندم ... دا شرف كبير جدا جنابك ... ايه !!
الدكتور يبص لعمران
الدكتور / بس حضرتك ... التحليل طلع ... خلاص يا فندم اللى تشوفه حضرتك... عربيه اسعاف مجهزه يا فندم ... حضرتك تؤمر ... طبعا طبعا فى حفظ الله سعادتك فى حفظ الله يا فندم مع السلامه مع السلامه
الدكتور يقفل
الدكتور / هى مين البت دى بالظبط
عمران / بنت ناس و آلله
الدكتور / ناس بس !! بص انا اساسا كنت جاى هنا اقضي السنتين بتوعى من غير مشاكل و امشي و فاضلى فيهم شهرين فيفوتوا زى ما يفوتوا و لا ايه
عمران / و الله انت بتفهم 
الدكتور / البت عندك تخلص المحلول اللى فى ايدها خدها و امشي و ما دام ما حدش هيسال انا ما شوفتهاش اصلا و لو عاوز تاخدها بالمحلول براحتك انا ما جيتش النهرده اساسا ... قولتلى البت دى بنت مين ... بنت اللى بنته انا مالى
عمران يبتسم
الدكتور / بقولك ايه هو اهل البت دى ما يعرفوليش واسطه تنقلنى اى مستشفي فى حلوان
عمران / حضرتك من حلوان !!
الدكتور / ايوه و بضرب المشوار ده اربع تيام رايح جاى يعني فى الاخر بتصفصف على ما فيش
عمران/ نشوفلك حد عنينا
الدكتور / انا هديك رقمى لو احتجت اى حاجه كلمنى و باجى اكشف فى البيت و تحت امرك فى اى وقت
عمران / ما تقلقش موضوعك عندى
الدكتور يبص على مهره نايمه
الدكتور/ و الله انا اول ما شوفتها قولت بنت ناس ... هم بيبانوا اصلهم
......................
فى الجيم تحت عند نجاه
نجاه بتتمرن بعنف شديد عباده يدخل يقف يتابعها من بعيد
عباده / الحمد لله انى مش عدوك دا انا كنت هزعل جامد
نجاه تتخض
نجاه / يا ربى يابا ما حسيتش بيك بس
عباده / اللى مضيق خلقك ... فى ايه مالك اول مره اشوفك كدا
نجاه / عادى بتمرن مفيش حاجه
عباده / تمام
نجاه/ خير ... حضرتك كنت محتاجنى فى حاجه؟
عباده / ايوه ... حصل حاجه كدا ... و عمك مختار نازل مصر لو تحبى تروحى معاه
نجاه تتخض
نجاه / حاجه ايه دى ... خير حد جراله حاجه دا احنا لسه واصلين اكيد حاجه كبيره خير فى ايه ؟
عباده/ مش عارف اقول ايه لانى مش فاهم ازاى ده حصل اصلا بس ... مهره لحقوها الحمد لله و كان فى دمها مخدرات
نجاه / مستحيل طبعا دى رياضيه و بتعرف ربنا مستحيل لو شوفت بعيني مش هصدق
عباده/ يمكن نفسيتها كانت متأثره بالموضوع اللى قالتلك عليه
نجاه/ مش ممكن ابدا مهره قويه و متدينه و عمرها ما تضعف بالشكل ده انا لازم اروح اطمن عليها حالا
عباده / كنت متاكد عشان كدا طلبت من كارم ينزل معاكى بصراحه حسيت ان فارس مش هيريحك و خليت امك تحطلك غيارين نضاف فى شنطه
نجاه / انا هطلع اغير عن اذن حضرتك
نجاه تطلع تجرى و عباده بيتنهد و يضرب كف على كف تليفونه يرن
عباده / السلام عليكم ايه الاخبار
منصور / مروان ظهر بيقول وقع فى الحمام و حد سرق المحفظه و الموبايل
عباده / فى كاميرات هناك
منصور / ما فيش فى الحمام اكيد بس هو فعلا طول الوقت ده كان فى الحمام فعلا و موبايله مقفول لما يفتح هحاول احدد مكانه
عباده / تمام و مهره فين دلوقت
منصور / اول ما فاقت عمران اخدها بيت مامتها و هى رفضت تدخل و صممت فوصلها بيتها
عباده / ما راحتش لابوها ليه
منصور / فى حد بعتله صور ليها و هى سكرانه و بتطوح فشتمها و قفل السكه فى وشها
عباده / يعني البت لوحدها دلوقت دا اللى انت بتتصل بيا تقوله يعني
منصور / طب اعمل ايه طيب انا ببلغ حضرتك باللى حصل
عباده/ طب عمران ما عرضش ياخدها عند فاروق طيب
منصور / ما اعرفش هكلمه اساله
عباده / و كلم فاروق خليه يطلب من الجماعه يروحوا يخلوهم جنبها مش عاوزها لوحدها فى الظروف دى يا منصور
......................
فى شركه مقاولات كبيره فى البلد
جابر قاعد لوحده و طافى النور و فاتح اللاب يسمع صوت تليفون بره يستغرب و يطنش و يكمل شغل التليفون يرن تانى يطنش التليفون يرن تالت ينفخ و يقوم يطلع بره و يقيد النور و يروح يرد يكون الخط فصل يحط السماعه يرن يرد فى ساعتها
جابر / السلام عليكم
دياب / انت عندك بتعمل ايه و فين موبايلك
جابر / طب رد السلام حتى
دياب / و عليكم يا سيدي الرجاله راجعه مصر مع نجاه و خالك هتطلع معاهم و لا ايه
جابر / لا
دياب / لا !!
جابر / ايوه لا فيها ايه يعني هو انا ايه مكنه دا انا بقالى قرن ما عتبتش شركتى لما نسيت مكان مكتبى ابعتوا غيرى مش واقفه عليا يعني
دياب / اه !! طب انت موبايلك فين ؟ قافله ليه؟
جابر / روحت نمت صحيت لقيته فاصل حطيته فى الشاحن و نزلت
دياب / ما عاكش بور بنك
جابر / من كتر المكالمات اللى بتجيلى عليه يعني بناقص امه اديكوا لما احتاجتوا توصلولى ما غلبتوش يعني
دياب / انت كويس يا جابر
جابر / اه الحمد لله زى الفل فى حاجه انت يا دياب
دياب / لا بس مستغربك انت حتى ما عندكش فضول تعرف ايه اللى حصل هيخليهم يرجعوا بالسرعه دى
جابر/ ما تلخص يا دياب انا مصدع و ما اعرفش مكان حاجه هنا فمش عارف اعمل لنفسي قهوه فانجز و لو عندك كلمتين قولهم
دياب / هو الحوار بخصوص مهره ... حد حطلها حاجه فى العصير بس عدت على خير الحمد لله
جابر / طب الحمد لله هبقي اكلم خالى يوصل ليها سلامى الحمد لله ما طلعتش حاجه محتاجانى يعني انا لا دكتور و لا ليا فى التكنولوجيا يعني لا هعالجها و لا هقدر اعرف مين اللى عمل كدا
دياب/ انت بجد !! جابر انت كويس
جابر / ايوه يا دياب كويس... بقولك ايه انت ضيعت وقت كتير اوى روح شوف شغلك و ظبط الجماعه و بعدين لما تبقي تفضي فى المشمش ابقي كلمنى نتقابل نشرب حاجه سوا
دياب / تمام ... سلام
جابر يقفل السكه و يروح يكمل شغل و هو بيتنهد
.......................
فى فيلا على
مروان / دا بدل ما تقولى نعمل تحاليل نطمن عليك و نشوف الإغماء ده حصل ازاى
على / اقسم بالله ما هتخطى خطوه جوه البيت الا اما اتاكد انك نضيف و اقسم بالله تانى لو طلعت رجعت للقرف بتاعك يا مروان اقسم بالله لاطلع على المحامى و اكتب كل ما املك باسم اختك و اسيبك فى الدنيا دى ملط انت فاهم و لا لا
مروان / مش اول مره نقف الوقفه دى و تاخدنى و تطلع على المعمل و تتاكد انى بطلت و انى نضيف و فى الاخر بتطبطب على ضهرى و تقولى ما تزعلش انا بعمل كدا من خوفى عليك ... تمام اتفضل نطلع على المعمل انا ما بعملش اى حاجه اخاف منها مع العلم انى مش هاجى معاك عشان الفلوس أو الورث او اى كلام من ده انا هاجى عشان ابرء نفسي من ان اى حد يفتكر ان ليا اى دخل باللى حصل لمهره ... مهره دى اختى و زيها زى ايلين بالظبط
على / اتفضل قدامى
مروان/ اتفضل
على يروح يركب العربيه و مروان يركب جنبه
.......................
فى شقه مهره
مهره / يا ستي انا ما طلبتش منك حاجه سبيني لوحدى
كارمن / ما انا سبتك لوحدك ايه اللى حصل جبتيلى الكلام و فضحتني و خليتى عيني فى الارض انا قدمتلك كل حاجه قدمتلك كل حاجه و فى الاخر اخدت ايه قوليلى انتى قدمتيلى ايه
مهره/ انا المفروض اقدملك ايه اصلا انا ما طلبتش منك حاجه انا عمرى ما طلبت منكوا حاجه و لا استنيت منكوا حاجه انا بس كل اللى عوزاه تسيبونى اعيش سيبوني اعيش
كارمن / و انتى فاكره السهر و الشرب و المخدرات دى عيشه انتى مش حاسه بالكارثه اللى كانت هتحصل انتى ربنا نجاكى انتى مستوعبه القرف اللى حطيتينا كلنا فيه
مهره / كانى عملت كدا بمزاجى بدل ما تحاسبيني كدا روحى دورى مين حطلى القرف ده فى العصير روحى اتشطرى عليهم
كارمن / و ايه اللى وداكى هناك اصلا
مهره / هناك فين فى فندق مع اخويا ما احنا ياما روحنا فنادق و دخلنا النيت كلوب بتاعهم و اتفرجنا على الأجانب بيرقصوا و سقفنا لهم و انبسطنا و مشينا قوليلى مره واحده حصل فيها كدا قوليلى مره واحده قولتيلى ايه اللى وداكى هناك
كارمن/ كنتى معايا او مع بابا اكرم
مهره / ما هواش بابا ما هواش ابويا
كارمن / انضف من ابوكى مليون مره اكرم عمره ما كان هيرمى بنته و يديها ضهره زى ما ابوكى طول عمره بيعمل و اللى جيناته مسيطره على دمك اكرم قدم ليكي كل حاجه و انتى ناكره للجميل
مهره / ما سالتيش نفسك ليه ؟
كارمن / عشان هو راجل محترم يعرف ربنا ... و اوعى تفتكرى ان طلاقنا هيسمح لك توقعى بينا
مهره / طب انتى عارفه هو اصلا طلقك ليه
كارمن / بسببك
مهره تستغرب
كارمن / عشان انتى دخلتى حياتنا ايه مش واخده بالك و لا ايه ... اكرم طلقنى عشان انتى عماله تحطينا فى مشاكل بهرموناتك بتقلبات مزاجك اللى ما حدش فاهمها و لا حد قادر يستحملها اكرم طلقنى عشان فى يوم زى ده ما يبقاش ملزم ناحيتك باى حاجه عشان كان قاريكي و قارى القرف اللى هتشوفه من ورا دلع و قله أدبك
صمت
كارمن / انا كنت سمعت الكلام من الاول و اخدت الحبايتين و ارتحت و ريحت كل اللى حواليا
مهره بصوت مكسور  / حبايتين ايه
كارمن / بتوع الإجهاض انتى اكتر حاجه ندمانه عليها فى حياتى اكتر حتى من جوازى من ابوكى شوفتى انتى وصلتيني لايه وصلتيني انى بقيت بتمنى موتك عشان اخلص من القرف اللى ما بيخلصش من ورا دلعك
مهره بعياط / يا ريتك كنتى خدتيهم
كارمن / انا هعد من واحد لتلاته تكونى سبقانى على العربيه تروحى معايا ياما هعمل زى ابوكى بالظبط و هعتبر نفسي اخدت الحبايه فعلا و انك ما جيتيش الدنيا اصلا و حتى لو جتلى صورك ملط مش هجرى عليكي فاهمه و لا لا ... واحد
مهره / ما اقدرش اكون فى بيت اكرم فيه
كارمن / صدقيني هو حاليا اللى المفروض يقول الكلام ده المفروض يقول ما ينفعش بناتى يكونوا فى بيت مع واحده زيك مش انتى اللى تتكلمى
مهره / ليه ؟؟ انا اللى بدخل اوض الرجاله و هم نايمين و اتحرش بيهم
كارمن / اخرسي يا كلبه
مهره/ اكرم طلقك عشان عاوز يتجوزنى
كارمن تلطشها بالقلم الاتنين يصرخوا فى وش بعض
كارمن / القرف اللى بتبلبعيه لحس مخك يا عديم الربايه
مهره / ما هو قالى انك مش هتصدقيني لما جيت اقولك انه مستعد يبيعكوا و اسافر معاه امريكا نعيش هناك انا و هو بس
كارمن / اخرسي بقولك اخرسي
مهره / قالى ما حدش هيصدقك قالى ما لكيش حد قالى انى مش فارقه مع حد و معاه حق
كارمن / انا بكرهك
مهره / و انا كمان بكرهك بكرهك اطلعى بره اطلعى بره اطلعى بره امشي
كارمن تتف عليها و تمشي و مهره تروح ترزع الباب وراها و تمسك دماغها من الصداع تروح تفتح الدرج و تاخد مسكن
مهره / دماغى هتنفجر ضغطى عالى هموت ربنا ينتقم لى منكوا حسبي الله و نعم الوكيل فيكوا انتوا ايه انتوا ايه
مهره تصرخ و تقع فى الارض و هى منهاره
.......................
فى معمل تحاليل
الفنى يدخل شايل علبه العينه فى ايده فى دكتور شغال جوه يديهاله و يوشوشه الدكتور يهز راسه و يروح يبدل العلبه بعلبه تانيه و يدى التانيه للفنى الفنى ياخدها و يطلع بره يعدى من قدام مروان و على و يغمز لمروان مروان يبتسم من تحت لتحت و يتنهد
مروان / عمرك ما هتقبلنى صح غلطت غلطه لازم افضل ادفع تمنها العمر كله مش كدا
على / انا عمرى ما استخسرت فيك حاجه
مروان/ و انا عمرى ما كنت قاصد ازعل حضرتك انا بس عمرى ما حسيت ان حضرتك فخور بيا و لو مره واحده بس مهما عملت حضرتك شايفنى وحش لمجرد انى بمشى ورا شغفى
على / طول ما انت محاوط نفسك بالعيال البايظه اللى بيستغلوك دول
مروان / بيستغلونى ايه بس يا بابا ما كل واحد فيهم ليه حياته و شغله و الحمد لله كلهم ناجحين يعني
على / انا و انت مفهومنا مختلف عن كلمه ناجحين دى
مروان / تمام يا بابا اللى حضرتك تشوفه
على / بخصوص مهره
مروان / و الله عاوز اروح اطمن عليها
على / انا مش عاوزك تقرب منها تانى و لا يكون ليك اى دخل بيها مش كل ما هتعمل مصيبه هيقولولى ما هى كانت مع ابنك
مروان يبص لعلى باستغراب
مروان / ايه !!
على / انا قولت كلمه خلاص انا مش هشيل شيله حد تانى
مروان / حضرتك تقصد مين بالحد التانى ده هى ليها اب تانى غيرك
على / يووووه ما توجعش قلبي معاك انا قايم اشوف هنلطع هنا لامتى انا مش فاضي للمسخره دى
على يقوم
مروان / ما هى مسخره فعلا
..................
فى العربيه بتاعه نجاه
كارم سايق و مختار جنبه و نجاه قاعده ورا مضايقه و كل شويه بتبص فى الموبايل
نجاه / هو لسه كتير
كارم/ هانت
نجاه / طب هم ما لقيوش موبايلها يا عمى
مختار / بيقولوا حاجتها كانت كامله على الترابيزه و مروان استلمها بس مروان لسه ما راحش لحد دلوقت البيت عندها
نجاه / ازاى يعني سايبينها لوحدها كدا كان عمران طلعها من المستشفي ليه بقي هو اى هبل و خلاص
مختار يلف يبصلها تتعدل و تبص من الشباك
مختار/ اكيد ما كانش عارف ان اهلها هيتصرفوا بالطريقه دى
نجاه / اهلها اه طبعا اهلها
مختار / تمام احنا رايحين ليها اهو
نجاه / انا و الله كنت حاسه و الله العظيم كنت حاسه و هى كانت حاسه و قالتلى و انا
كارم / انتى ما اتكلمتيش
نجاه / لا اتكلمت طلبت منك و من بابا
مختار / انهم يضيعوا وقت و مجهود فى حاجه كانوا يقدروا
نجاه / تسجيل كلامى مع مهره موجود
مختار / انتى فكرانا ايه سايكوا فكرانا بنسجلكوا كل مكالماتكوا و بنتسنط على كل كلمه بتتقال من بقكوا دا احنا محتاجين جيش يتابع و يارشف بقي عندك كلمه او معلومه قوليها
نجاه / انا وعدتها مش هقول لحد
مختار / يبقي دا قرارك ما تلوميش حد عليه
نجاه تعيط
كارم / احنا ما قصرناش يا نجاه دا احنا حتى عملنا حجز فى الفندق عشان نقدر ندخل لان ممنوع الدخول غير للنزلاء بس كنا هنعمل ايه اكتر من كدا
نجاه / كلفتكوا معلش
مختار يسمع صوتها يلف يبص
مختار / ممكن اعرف انتى بتعيطى ليه انتى كمان دلوقت على فكره البنت دى غاليه جدا عندى زيك بالظبط و اقسملك بالله يا نجاه انى حاليا فى اقصي مراحل ثباتى الانفعالى انى اروح اهد الدنيا على دماغ اللى فيها
نجاه / ما تتعبش نفسك انا كدا كدا ههدها
كارم / و انا معاكى ما تقلقيش بس ممكن افهم طيب انا بهد ليه يعني من باب انى ابقي عارف انا داخل على ايه طيب
نجاه / مهره بتقول ان اكرم اتحرش بيها
اكرم / نعم !! مش ممكن دا راجل محترم جدا و بزياده كمان
مختار / ما هى التصرفات دى ما بتجيش غير من المحترمين بزياده دول
نجاه / يعني حضرتك مصدقني
مختار / مصدق مهره ما دام قالتلك تبقي صادقه
اكرم / ازاى بس دا جوز امها يعني فى مقام ابوها
نجاه / قالها يتجوزوا مدنى فى امريكا و هى خافت تتكلم و هربت عاشت فى بيتها و كلنا عارفين ان هو اللى كرى عليها العيال اياهم و انه  راجل مش تمام و أن كان فى تعاون بينه و بين يونس ايام الشقاوه
مختار/ ايام ايه !!
نجاه / انا بتكلم جد يا عمى
مختار / كملى
نجاه / و طبعا من يوم البلطجيه مروان ظهر فى حياه مهره بس هى لقت رساله من اكرم بيقوله فيها انه موافق بس ما تعرفش موافق علي ايه خصوصا ان مروان هو الوحيد اللى مهره حكتله على اللى اكرم عمله و سبحان الله هو اللى كان معاها الفتره اللى فاتت و هو اللى كان معاها فى الفندق
كارم / دا اخوها اخوها يعني اخوها يعني آخر واحد على الكوكب هياذيها
مختار / كان شمام و انصلح حاله
كارم / دى اخته طب حتى لو اكرم ابن كلب على اساس انها بنت مراته مش بنته انما مروان دا اخوها يا جدعان اخوها
نجاه / ما على الزفت ده ابوها و كارمن حلمبوحه امها ايه يا ابنى ما تفوق بقي احنا فى غابه
مختار/ هعمل كام تليفون يمكن اوصل لحاجه
نجاه / مروان عس على مروان هتوصل صدقنى
مختار/ تمام اهدى
كارم / هى الدنيا جرا فيها ايه
....................
فى شقه شحته
جوزيف بيلم حاجته فى شنطه
شحته / يعني مش هنروح البلد دى خلاص فكست
جوزيف / مش هيرجعوا بالسرعه دى الا لو اكيد فى حاجه حصلت ... بس برده مش قادر أعرف هى ايه ما فيش اى حاجه حصلت من عندنا و لا لاى حد فيهم رجوعهم بالسرعة دى مقلق
شحته / يمكن ما قدرتش على البت مش بتقول كانت زعلانه فى كل الصور
جوزيف / بعد اللى حصل فى البنزينه كان الأولى يحموها اكتر مش يرجعوا بيها ... عشان تصدقني لما اقولك اغبيه
شحته / يعنى أبلغ الجماعه و اللغى حجوزات القطر و احجز على مصر
جوزيف / انت هتلغى فعلا بس مش هتعمل اى حاجه جديده الا اما اعرف فى ايه و ارتب الخطه الجديده و ما تقلقش فلوس الجماعه ماشيه زى ما اتفقنا و هتتحول على حسابك اول بأول
شحته / انا مش بتكلم عن الفلوس يا جو انا بتكلم عليك انت
جوزيف / بص انا اللى مطمنى ان جابر ما رجعش معاهم و ان همام و رجالته هنا على وضعهم ما حدش منهم اتحرك يبقي الموضوع مافيهوش خطوره بس ... فى حاجه غلط فاهمنى
شحته/ طب اجى انا معاك ائمن ضهرك ؟
جوزيف يحط الشنطه على ضهره
جوزيف / خليك هنا طبيعي مع الرجاله و لو فى جديد هبلغك … سلام
شحته / سلام
……………………
قدام شقه مهره
نجاه بتضرب الجرس ما حدش بيفتح و واضح ان الدنيا ضلمه
مختار / انت متأكد انها جوه يا ابنى
عمران / احنا قدام البيت من ساعه ما دخلت ما غفلناش
مختار ينفخ و يطلع التليفون يتصل بعلى يرد
على / الو
مختار / السلام عليكم ازى حضرتك يا دكتور على عامل ايه يا رب تكون بخير
على / الحمد لله يا باشمهندس الحمد لله
مختار/ الف حمد و شكر كنت بتصل بحضرتك بخصوص مهره
على / ابوس ايدك ما تجبليش سيره البنت دى انا بجد على اعصابى و مش قادر اتحمل اى حاجه زياده
مختار / هو الله يعينك طبعا بس ..  مهره ما بتفتحش الباب
على / طبيعي واحده زى دى هتفتح الباب و تواجه الناس بانهى وش يعني و لعلمك انا اخدت مروان حللت له النهرده و طلع نضيف الحمد لله و منعته خالص يختلط بالبنت المنحله دى
مختار / طب وحد الله بس كدا عشان انا متاكد ان الموضوع
على / احنا كلنا غلبنا معاها انا و امها و اكرم بيه البنت عنيده جدا و ما لهاش كبير و حاجه تقرف انا بس مش عارف انا عملت ايه فى حياتى عشان ربنا يبتلينى ببلوه زى دى
مختار يقفل السكه و يحاول يلم نفسه
مختار / حد يفش الباب ده دقيقتين و ابقي جوه
نجاه / قالك ايه
مختار / اتحرك يا ابنى
راجل من ورا يدخل و يحاول يفتح الباب الباب يتفتح نجاه تدخل تجرى تلاقى مهره واقعه فى الارض فاقده الوعى
نجاه / الاسعاف حد يطلب الاسعاف بسرعه
مختار يدخل يلاقي نجاه حاضنه مهره و بتحاول تفوقها
نجاه / مهره حبيبتي فوقى انا جيت مهره قومى يا قلبى قومى بقي
نجاه تجس النبض و الدموع تنزل من عنيها
نجاه / النبض ضعيف اوى مش حاسه بيه  ... مهره حبيبتي قومى
مختار يوطى يشيلها من حضن نجاه و يتحرك بيها و الكل بيجرى وراه
............................
فى فيلا اكرم
اكرم يفتح باب اوضه كارمن عامله ماسك و مولعه شمع و ممدده على شيزلونج
كارمن / انت ازاى تفتح الباب كدا انت ناسي اننا مطلقين و لا ايه
اكرم / و انتى ناسيه ان ليكي بنت مرميه فى الشارع
كارمن / اعتبرها ماتت على الاقل بالنسبالك
اكرم / ازاى يعني مش فاهم
كارمن تنفخ و تقوم تقعد
كارمن / عشان هى ... مش البنت المتربيه المحترمه اللى انت كنت محتويها تحت باطك و محموق لها طول الوقت انا ما اعرفش مين دى بس حقيقي انا من ساعه ما اتكلمت معاها و رجعت و انا لغيت كل مواعدى و زى ما انت شايف بحاول بكل الطرق أنى اهدى و اتمالك اعصابى فمن فضلك اطلع بره
اكرم / دى بنتك ... بنتك يا كارمن و اللى ما لهاش خير فى ضناها ما لهاش خير فى حد
كارمن / لا هى بنتى و لا هى ربايتي دى بت من الشارع قدرى الأسود انها بس شايله اسمى انما دى انا رمياها لابوها من سنين و مع كدا شايله قرفها كله تخيل بقي ترد الجميل ازاى
اكرم / انهى جميل هو بين الام و بنتها فى جمايل
كارمن / دى بتتهمك يا اكرم انك اتحرشت بيها بعد كل اللى انت عملته عشانها شوفت الكره و الغل وصل بيها لايه
اكرم / و انتى عملتى ايه لما قالت ليكي كدا
كارمن / اديتها على وشها و تفيت عليها و مشيت طبعا هى فاكره اننا لمجرد اننا اطلقنا انى ما هصدق امسك فى الكلام الأهبل ده
اكرم / و الله انا اللى مش مصدق ... على العموم خليكي اعملى ماسكات و ميديتايشن و اهدى و روقى أعصابك من التوتر عشان بشرتك و شعرك دول أهم حاجه اى حاجه تانيه فى الدنيا تتعوض
كارمن / انت بتالس عليا
اكرم يقفل الباب و يمشي
....................
فى مستشفي
نجاه / انسحاب ايه هى مش المفروض كانت فى المستشفي التانيه ما اعرفش ... هو اعراض الانسحاب دى بتبقي من جرعه واحده اصل هى فى حد حطلها حاجه فى العصير دا اللى اقصده
الدكتور / لا حضرتك هى مش اقل من تلت اربع جرعات على الاقل
نجاه / ايوه ما انا بقول لحضرتك انها
الدكتور/ انا اللى بقول لحضرتك انها واخده مش اقل من تلت او اربع جرعات
نجاه / لا حضرتك اكيد غلطان
مختار/ تمام يا نجاه ثوانى خلينا نشوف حل
نجاه / لا هو غلطان انا لسه كنت معاها من يومين اخدت الجرعات دى كلها امتى انا مش فاهمه ... ثوانى ثوانى انا من ساعه ما سبتها و هى بتشتكى من صداع و نوم و دوخه ... حد كان بيحط ليها الجرعات دى من غير ما تعرف
الدكتور / ممكن حالات كتير اوى بتدمن بالطريقه دى
نجاه / لا لا هى مش مدمنه دا يعني ... ممكن
مختار / نجاه ... اهدى لو سمحتى و خلينا نشوف حل
نجاه/ مهره مش مدمنه يا عمى
مختار / اهدى لو سمحتى عشان نقدر نحل و يا ريت تطلعى بره
نجاه تبصله و تطلع بره
مختار/ ايه اللى نقدر نعمله دلوقت
.....................
فى سرايا الزنايته
جابر يدخل يركن العربيه و ينزل يلاقي عباده واقف مع رجاله
عباده / جابر !!
جابر يبتسم و يروح له
جابر / السلام عليكم يا رجاله
عباده / تمام يا رجاله كل واحد يشوف اللى وراه يلا
الكل يمشي و يفضل جابر و عباده
عباده / احلام نقلت ليك كل حاجتك و فضت اوضتك القديمه
جابر / كويس تسلم ايدها تعبتها
عباده/ انت ... كل ده كنت فى الشركه
جابر/ اهو نومى اتلخبط شويه قولت اروح اشوف الدنيا ماشيه ازاى و فتحت الملفات اشتغل فيها لحد ما الموظفين جم و ظبطت معاهم الدنيا و الحمد لله يعني الشغل زى الساعه ما فيهوش اى مشاكل
عباده / كويس عقبالك
جابر يضحك بعدم فهم
عباده / لما تبقي زى الشغل ما عندكش مشاكل
جابر / الحمد لله انا زى الفل ما عنديش اى مشاكل
عباده / تمام ... هتعمل ايه دلوقت ايه دنيتك يعني
جابر / و الله انا كلت بره مع الناس فى الشركه و ممكن ادخل الجم شويه و بعدين على المران شويه و بعدين اروح انام يعني هتك على نفسي كدا عشان اظبط نومى تانى
عباده / تمام يا حبيبي لو احتجت اى حاجه انت عارف انا فين
جابر يبتسم و يروح بيته يدخل و يقفل الباب يروح الاوضه الرئيسيه يلاقي هدومه كلها محطوطه يطلع غيار و يجي يروح الحمام يلاقي موبايله على التسريحه و جنبه الشاحن ياخد نفس و يفضل واقف باصصله و متردد ياخد نفس و يروح يفتح الموبايل يلاقي سيل من الرسائل
جابر / ايه يعنى الدنيا طارت يعني لما الموبايل اتقفل كام ساعه ايه كل ده
جابر يفر فى الرسايل يلاقي رساله من نجاه يقف عندها و يدوس عليها حذف يطلعله رساله تأكيد و قبل ما يدوس اوك يدوس كنسل و يفتح الرساله
/////////////
نجاه / انا بقالى كتير متردده ان ابعت الرساله دى و لحد دلوقت مش عارفه اكتب فيها ايه بس انا مش قادره اتحمل فكره انك زعلان منى انا مش عارفه انا ضايقتكوا كلكوا ازاى كدا و يمكن انى مش عارفه ده يضايقكوا اكتر بس اقسم بالله ما عندى اغلى منكوا كلكوا و يا سيدي خليني انا الكبيره المرادى و هقولك حقك عليا ما تزعلش منى
///////////////
جابر يرمى الغيار من على كتفه و يطير يركب العربيه و يمشي و عباده متابعه من التراس و مبتسم
..............................