الكبيره ٢ بقلم / لولو_محمد

الحلقه ٦٣

((((((( الكبيره ٢))))))))
#لولو_محمد
الحلقه ٦٣
منصور / هتقول و لا لا
جوزيف / هتعمل ايه لما تعرف ... هتقتله ؟!! هتصدقني ؟!! مش يمكن بكدب و بوقع بينكوا ؟!! هتصدقنى ؟!! هتقتل اخوك عشان
منصور يشد جوزيف من هدومه عليه بعنف و جوزيف ما بيقاومش
منصور / اخويا ما يعملهاش
جوزيف / اسف اسف هههههههههه ... انا كنت فاكركوا كلكوا هنا اخوات فى بعض اصل نجاه مفهمانى ان شعاركوا انا و اخويا على ابن عمى و انا و ابن عمى على الغريب ... و انا هنا الغريب ... فالطبيعي تكدبنى و تصدقه هو
منصور يزق جوزيف و جوزيف هادى جدا
جوزيف / عاوز تعرف هو مين بجد ؟ جاهز يعني للحقيقة ؟
منصور يبصله بحزن
جوزيف / مش سهل انك تنسي اللى حصل بس سهل انك تتجاهله و تكمل حياتك لا انت غلطت و لا مراتك غلطتت تضايق نفسك ليه
منصور / و انت هتفهم منين صحيح
جوزيف / انا ما افهمش ... بس انا لو مكانك ما اوقفش الدنيا على موقف اهبل زى ده ... دا فى ناس بيحصل معاها اسوء من كدا بكتير ولا كان حاجه حصلت ... تعرف ... دول اللى بيوصلوا و الناس ما بتجرؤش تبص عليهم حتى ... تلاقي البت من دول واقفه بالبكيني على البحر و لو فكرت تبص بعينك تبقي انت اللى منحرف و متحرش و التانيه متغطيه من فوق لتحت و لو الهوا بس طير ديل العبايه يتقال و يحط عليها و ليه مش لابسه بنطلون تحت و ايه اللى خرجها من البيت اصلا فى الجو ده و ليه معهاش حد يسترها و ليه عايشه و بتتنفس اساسا مش عشان دى صح و دى غلط ... عشان صاحبه البكيني مقتنعه انها ما غلطتش و ان هو الغلطان انه بص و اللى الهوا طير عبايتها ارتبكت و اللى بيتهز فى دنيتنا يا منصور الناس بتركبه
منصور/ انت بتتكلم فى حاجه تانيه خالص ... انا عارف ان ياسمينا ست الكل و هى عارفه بس فى حد
جوزيف / مكانش حد واحد كانوا ربع مليون
منصور يضرب كف على كف و يلف حوالين نفسه يحاول يهدى
جوزيف / على كوكب عدد سكانه مليارات ما يعتبروش عدد اصلا و ماتوا كلهم اللى طياره وقعت بيه و اللى سفينه غرقت بيه و اللى اتقطع و اتباع خرده و اللى و اللى ... انت ليك ايه من كل ده موقف من سنين ليه لسه موقف حياتك عنده
منصور / شاهين صح ؟؟ هو شاهين صح ؟؟
.....................
جوزيف يبتسم
منصور / ما ترد هو و لا لا
جوزيف / سرايا طويله عريضه فيها بدل الراجل ميه اشمعن اخترت شاهين اكيد مش من فراغ ... عمل حاجه و لا عشان الفيديو اللى اتسرب
منصور / انا اللى بسأل هنا
جوزيف / و انا جاوبت
منصور / انت ما قولتش حاجه
جوزيف / انت اللى ما بتسمعش ... بلغهم انى مروح
منصور / استنى هنا بكلمك
جوزيف / انا قولت كل حاجه يا منصور ... اهدى و انسي و ركز فى اللى جاى لان اللى فات بالنسباله هزار ... مراتك فى حضنك ما تفكرش فى حاجه تانيه غير انك تحافظ عليها و بس ..  نقطه ضعفك واضحه للكل ... و لو انت وقعت اخوك هيقع و لو اخوك وقع البلد كلها هتقع و الكلام ده مش المفروض اقولهولك اصلا ... يلا سلام
جوزيف يمشي و منصور متابعه
......................
فى الجبل
صابر / ايه ياعم دا انا قولت هرتاح منك لبعد الفرح
شاكر / ترتاح من مين ... على قلبك
صابر / فى قلبي ... ها احكيلى انبسطتوا
شاكر / الحمد لله ... بصراحه لا ... ما ارتاحتش ... بس تمام الكل مبسوط فانا مبسوط
صابر / ما بتفكرش ساعات انت ليه كدا ... ليه ما دام الكل مبسوط انت مبسوط ... او امتى هيجي يوم و هيبقي الكل مبسوط عشان انت مبسوط مش العكس
شاكر / ايه يا عم الكلام الكبير ده الحياه ابسط من كدا بكتير و بعدين ما انا مبسوط فعلا الحمد لله فى ايه مالك
صابر / متاكد
شاكر / جدا ... يا عم احنا فى فيض من النعم
صابر/ و نعم بالله الرضا مطلوب بس
شاكر / ما فيهاش بس يا صاحبى ما فيهاش بس ... الف حمد و شكر ليك يا رب على كل اللى تكتبهولنا
صابر / الف حمد و شكر ليك يا رب ... احكيلى بقي الفرح كان عامل ايه
شاكر / عادى أفراح البندر العاديه دى قاعه كبيره و الكل بيرقص و دى جى شغال هبد و رزع و زغاريط و بنات على شباب و ايه هيصه
صابر / طب ما دام الدنيا حلوه كدا ما شبكتلكش واحده فى ايدك كدا خطف ليه و انت راجع
شاكر / ايه يا عم هو سلق بيض و بعدين انا لو هدور على زوجه و ام لعيالي مش هدور وسط سواريهات و مكياج و الجو ده
صابر / على رايك كله فايك نقيها من عزا اضمن
الاتنين بيضحكوا
شاكر / لا هروح و لا هنقى هى هتجيلى لحد عندى هنا كمان
صابر  / هنا فى الجبل !!
شاكر / اه هنا ما لكش فيه
صابر / اه صح صح هتيجي و فى تاكس
شاكر / تاكس ملاكى ان شالله تنزل عليا من السما حتى ما لكش فيه
الاتنين يضحكوا جامد
............................
فى الأهرامات
ناس كتير واقفين تحت و فى كاميرات فى كل مكان و مراسلين بيغطوا الحدث و امن و جيش و شرطه بيامنوا المكان و فى شاشات عرض عملاقه فى كل مكان طيارات كتير معديه بيفط واحده مكتوب عليها (جاهزين ) و التانيه مكتوب عليها ( يلا ) طيارات كتير تطير ورا بعض و بنات كتير ينطوا ببراشوتات و الكاميرات بتصور و الناس بتسقف و البنات بيعملوا عرض فى السما و قنابل دخان ملون و الناس كلها منبهره و القنوات كلها بتزيع و الناس بتصور البنات يفتحوا البراشوتات و ينزلوا واحده ورا التانيه يفكوا البراشوت و يقلعوا الجامب سوت لابسين توبات حمالات و هوت شورت و يسيبوا شعرهم و يجروا على اوتوبيس دورين مفتوح من فوق يطلعوا فوق و يشاوروا للناس باى من فوق و يحدفولهم بوس و الناس بتهلل و تسقف الباص يمشي و الأمن يحاوطه من كل مكان لحد ما يطلع على الطريق وسط زحام شديد و البنات فوق الباص مولعين شماريخ و صواريخ دخان و بيصرخوا بشكل حماسي و بيتفاعلوا مع الناس اللى عماله تزمر فى العربيات و تحتفل و الباص مش عارف يتحرك من كتر الزحمه
.................................
فى اوضه شاهين
شاهين قاعد و ماسك تابلت نص الشاشه من فوق كاميره و النص التانى ايكونات تحكم و الشاشه بتعرض صوره للتورقه فى السرايا و بعدين يفضل يحركه لحد ما يدخل اوضه منصور
منصور / المشكله ان نفس الكلام و مش قادرين يفهموا ان مش ده اللى انا محتاج اسمعه خالص
ياسمينا / انت ليه ناسي ان فى ربنا هيحاسب الكل فى الاخر
منصور / أعوذ بالله انا يا ياسمينا !!!
ياسمينا / انت فاهم قصدى ... منصور انا ما غلطتش و لا انت قصرت يبقي الباقي مش دورنا
منصور / قلبي بيقولى ان فى حاجه غلط
ياسمينا / يعني ناوى تفضل فى الدوامه دى كتير... منصور انت بتتاكل من جوه
منصور / عارف
ياسمينا / و ليه ساكت
منصور / عشان متكتف و مفيش فى ايدي حاجه اعملها
ياسمينا/ فى انك ترتاح عشان تعرف تعيش يا منصور انت حياتك مضغوطه بما فيه الكفايه مش حمل ضغط كبير زى ده تحطه فوق كتافك لا هيخليك تستمتع باللحظات القليله اللى فى حياتك اللى بتفضي فيهم و لا بتخليك برده مركز فى شغلك بالشكل الكافى
منصور / الكافى !!
ياسمينا / ايه قولت حاجه غلط ؟!
منصور / لا بس مصطلح جديد على لسانك بس
ياسمينا/ و انت بقي حافظ كل مصطلحاتى !!!
منصور / انا حافظ كل تفاصيلك يا ياسو انا ما عنديش أغلى منك اركز فى تفاصيلها
ياسمينا / دا كان زمان
منصور / ايه الكلام اللى يزعل دا بقي و انا قصرت فى ايه
ياسمينا / امتحنك ؟
منصور/ جاهز
ياسمينا / تقدر تقولى اخر تاتو رسمته كان فين و ايه ؟
منصور / كان كريزتين صغيرين على كتفك
ياسمينا / شوفت غلط
منصور يتعدل فى قعدته
منصور / اوعى
ياسمينا / قلب ... بس مش هقولك فين
منصور يقوم يقفل الباب بالمفتاح
منصور / و انا بحب اكتشف بنفسي
ياسمينا تضحك منصور يروح يشغل جهاز صغير على الكومدينو الصوره تلغوش عند شاهين يضايق و يحدف التاب على السرير و يروح يفتح الخزنه و يطلع مفتاح من ميداليه المفاتيح و يفتح درج صغير جواها و يطلع الموبايل القديم
شاهين / انا هروح البر التانى النهرده ... يعني ايه بكره ... بقول النهرده يعني .... الو الو ... و ماله ليكوا روقه
حد يحاول يفتح الباب شاهين يعين الحاجه بسرعه
صوت وفاء / شاهين شاهين انت جوه ... قافل ليه
شاهين يروح يفتح الباب
وفاء / فى حاجه و لا ايه قافل على روحك بالمفتاح ليه
شاهين / مفيش عادى تعالى عامله ايه
وفاء / الحمد لله بخير طول ما انت بخير
شاهين يدخل وفاء و يقفل الباب بالمفتاح
شاهين / كنت بفكر اخدك معايا نغير جو كام يوم فى اى حته
وفاء / بجد يا شاهين احلف قول و الله بجد
شاهين / تحبى تروحى السيرك الجديد
وفاء/ اسكت اما سماح كانت بتتفرج على عرض الافتتاح كان ايه نار نار يا شاهين و الناس كانت موت فوق بعض دا بيقولوا التذاكر كلها كومبليت من قبل حتى ما الجماعه بتوع السيرك يوصلوا مصر اساسا
شاهين / لا ما تقلقيش من الموضوع ده هقدر اجيب لو عاوزه
وفاء / بس امى كدا هتزعل دى كانت عاوزه تروح خالص
شاهين / اه طب ما احنا مش لازم نقول كل حاجه
وفاء / و لما تسالني اقولها ايه ما لو عرفت انى كذبت عليه
شاهين / انتى ما تعرفيش حاجه انتى مسافره مع جوزك و لو عرفت انتى اتفاجئتى زيك زيها
وفاء / تمام بس امتى
شاهين / انا هحجز لينا جناح فى فندق خمس نجوم و انتى بقي دلعى نفسك كدا خلينا نقضي يومين حلوين
وفاء / اعمل ايه يعني
شاهين يبص الناحيه التانيه و هو مضايق
شاهين / ولا حاجه قومى قومى
وفاء / طب قولى بس انت عاوزنى اعمل ايه و انا و الله هعمل انا عوزاك علاطول مبسوط انا بس مش ببقى عارفه انت عاوز ايه بالظبط
شاهين / ما انا مش المفروض اقولك تدلعيني ازاى المفروض انتى تبقي طول الوقت جاهزه ادخل عليكي مضايق تفاجئيني يبقي علاطول عندك جديد كريزه هنا قلب هنا و انا ادور يا وفاء
وفاء / ما انا عملت كل ده قبل كدا
شاهين / و هو عملتى الحاجه مره خلاص مره و اتنين و تلاته و بعدين ما ينفعش تيجي تقوليلى شوفت انا رسمت ايه تخليني انا اكتشف
وفاء / حاضر هاخد بالى و الله و بعدين هو انا هعرف الحاجات دى منين يا شاهين بس ... بس و الله بحاول و عاوزاك علاطول مرضي هو انا عندى اغلى منك
شاهين / تمام ... انا خارج دلوقت و هرجع متأخر اما نشوف
وفاء / تمام عنيا حاضر
شاهين / هرتب حوار السفر و اكلمك فى التليفون
وفاء / حاضر
شاهين يهز راسها و يروح يفتح الباب وفاء تمسك ايده
وفاء / انا بحبك يا شاهين
شاهين يحضنها و يبوس راسها و يفتح الباب و يمشي
......................
فى شقه نور
عبد العزيز / انا مش عاوزك تكون زعلان منى بس
ناصر / أبدا و الله بالعكس انا اللى اسف جدا و معاك كل الحق طبعا
عبد العزيز / تمام ... هقوم استعجل الاكل 
ناصر يبتسم بحرج عبد العزيز يمشي و نور تدخل تقف على الباب ناصر يبص ليها و يبتسم
نور / زعلان ؟
ناصر / نهائى ... لعله خير
نور / نعوضها بعد كتب الكتاب
ناصر / على فكره انا فعلا حاولت الاقى تذكره او اتنين زياده للعرض ده او ابدلهم ما قدرتش الاقى خالص و حاولت فعلا احجز تذاكر لعرض تانى ما فيش خالص
نور/ ما لناش نصيب و بعدين دا سيرك يعني مش حوار
ناصر/ على رايك ... ما تيجى تقعدى واقفه بعيد ليه كدا
نور تروح تقعد
ناصر / جهزتوا كل حاجه ؟
نور/ ايوه قفلنا الشنط النهرده الصبح
ناصر / كويس ... مش ناقصكوا اى حاجه ؟
نور/ لا خالص الحمد لله
ناصر / الحمد لله
نور / انا هقوم اساعد ماما فى المطبخ
ناصر / تمام
نور تقوم تروح ناحيه الباب
ناصر / بقولك ايه
نور تبصله
ناصر / ما تقولى لماما تطفى على الاكل ده و نلبس نلف شويه بالعربيه نروح فى اى حته
نور / ما اعتقدش هتوافق ... ممكن بعد الاكل
ناصر / تمام ... شوفى كدا يمكن توافق
نور / هو انت مضايق من القعاد فى البيت هنا ؟
ناصر / أبدا... انا بس عاوز افسحك ... عاوزك مبسوطه مش اكتر و انا كنت معشمك نخرج و حاسك مضايقه
نور / لا ما تقلقش ما انت كدا كدا هتعوضهالى النهرده بقي بكره بعده بعد كتب الكتاب بعد الفرح هنروح من بعض فين ؟! انت خلاص ادبست
ناصر / احلى تدبيسه
نور / من قلبك ؟!
ناصر / عندك شك ؟!
نور تبتسم و تمشي و ناصر متابعها
.........................
فى شارع البلد
العيال بتلعب كوره فى الشارع و جوزيف بيلعب وسطهم و كارم قاعد على العربيه بيتفرج و العيال كل شويه تنادي له بالخواجه الخواجه جوزيف بشوط الكوره فى كارم
كارم / ايه يا عم ده فتح الجون هناك
جوزيف /  انزل اللعب
كارم / لا تشكر مش سكتى
جوزيف / انت الخسران ... اللعبوا اللعبوا شوط يا محمد شوط انا هنا
العيال تلعب و هى بتضحك عيل يشوط الكوره لجوزيف تانى ينطقها و يشوطها فى كارم كارم يفاديها تيجي فى ضهر شاب واقف مع صحابه
الشاب / ايه ياض منك له عميتوا و لا ايه
كارم / لا مؤاخذه حقك علينا ... عندى دى حقك عليا
الشاب / تمام يا سي كارم
الشاب يلف و يقف يتكلم تانى مع صحابه كارم يروح يدى الكوره لجوزيف
كارم / احنا بنلعب فى الشارع و الشارع ليه حرمه
جوزيف / الشارع ملكيه عامه
كارم / يعني ملكهم زى ما هو ملكك و من حقهم يستنفعوا بيه زى ما من حقك بالظبط
جوزيف / تمام
كارم / مش كفايا لعب بقي
جوزيف / لا انا مبسوط عاوز تروح انت طريقك اخضر
كارم / بس ممكن فى الوقت ده نتعلم اى حاجه نتمرن على اى حاجه
جوزيف / ما انا بتمرن اهو بحرك عضلات جسمى كلها و بمارس مهارات التوافق و المناوره بلس انى بحسن مهارات التواصل و المالتى تاسك كل ده و انا بستمتع
كارم / و حد يقدر عليك كمل اما نشوف اخرتها
بنات يعدوا الشباب يبصوا عليهم و جوزيف متابع الشاب اللى الكوره جت فى ضهره يسقف و يتكلم بصوت عالى و هو باصص على البنات
الشاب / حلاوه القشطه و هى سايحه على المربى
البنات تبص الشاب يبص لصحابه يضحكوا البنات يبصولهم من فوق لتحت و يمشوا و جوزيف يبعد كارم فى جنب
جوزيف / فى بقي تمرينه جامده اوى الكوره هتعلمهالك
كارم / ايه دى
جوزيف / النشان ... بص دى
جوزيف يحدف الكوره لفوق و ينط يشوطها بعزم قوته فى ضهر الشاب
جوزيف/ جوووووووووون ... تعرف تعملها دى
الشاب / انت عبيط ياله و لا انت ايه حكايتك بالظبط
كارم / ليه كدا يا يونس
الشباب يتلموا حوالين كارم و جوزيف
كارم / حقكوا عليا انا ما كانش يقصد
جوزيف / لا قاصد
كارم / يونس
جوزيف / خد انت جنب بس ... قاصد يا قشطه و اقولك حاجه اللى فاتت كمان انا اللى شوطتها
شاب ٢ / مستحلى نفسك يعني عشان فى حما أبن الكبير و لا ايه
جوزيف / اعتبره مش موجود اخرك ايه
كارم / يونس !!
جوزيف / يا عم قولتلك اركن على جنب روح استنانى فى العربيه
كارم / يا عم بلاش استفزاز انت بتعمل كدا ليه  .. حقكوا عليا يا رجاله خلاص و الله مش هتتكرر هاخده و امشي
جوزيف / مش ماشي ... و تعال ياض اتخانق معايا
كارم / يا عم استهدى بالله انت ايه اللى جرالك فيك ايه
شاب ١ / و انا هنولهالك
كارم / يا جدعان مش كدا دا مهما كان ضيف عندنا
شاب ٢ / ضيف يحترم نفسه
جوزيف / مش لما تبقوا انتوا محترمين الاول
كارم / ما تزودهاش بقي الله
جوزيف / لا مش محترمين انا بقولك
شاب ٣ / احنا لحد دلوقت ساكتين عشانك يا سي كارم
جوزيف / لا ما تسكوتش ياله ما تسكوتش ... سقفلى ياله سقفلى ... و لا انت بتسقف للبنات بس
شاب ١ / ابعد بقي كدا يا سي كارم بالله عليك مش عاوزينك تتاخد فى الرجلين
كارم / طب عشان خاطرى و الله هقول لابويا على كل ده بس عدوا اليوم
جوزيف / دا عشان هو خايف عليكوا انتوا على فكره
كارم / ما تسكت بقي يا اخى اسكت
جوزيف / تؤ ... و ابعد يا كارم
كارم / لاخر مره بطلبها منك اركب العربيه خلينا نمشي
جوزيف / تؤ
شاب ٤ / احنا هنسكتله لحد امتى مين ده اصلا و ماله متفرعن كدا ليه
جوزيف / ما تسكتش
كارم / اقسم بالله ما هدخلك فى حاجه
جوزيف / ياعم انت حايشني انا عنهم انت بتقول ايه
شاب ١ / دا انت مش عامل احترام لحد بقي
جوزيف / و لا لسبت
كارم / طب عشان خاطرى انا يا يونس لمها
جوزيف / اماطه الاذى عن الطريق صدقه
عربيه تدخل و ينزل مختار
مختار / ابنى اللى تاعبني... خير
كارم / انجدنى
جوزيف / العيال دى قاعدين هنا يعاكسوا البنات  .. يرضيك ؟!
مختار / صحيح الكلام ده يا رجاله ؟!
شاب ٢ / دا عيل كداب و عمال يجر شكلنا من الصبح و حاجه فى منتهى الاستفزاز و قله الادب
جوزيف / دا انا !! طب عن اذنك انت بس يا ميخ.. تار بيه
مختار يكتم الضحك و هو بيحوش جوزيف انه يقرب من الولد
مختار / لا عندى دى بعد اذنك انا جيت انا هتعامل
جوزيف / و انا مؤدب و بسمع الكلام
مختار / حبيبي ... شايف الكاميره اللى هناك دى .. و دى ... و دى ... و دى
الشباب يبصوا حواليهم
مختار / دول اللى باينين لعنيا فى غيرهم حالا نفرغهم و نشوف اللى حصل و لو فى حريم هنبعت نجيبهم و نجيب اهاليهم
شاب ١ / و انا موافق
مختار / حلو اوى ... اتكلوا بقي على الله كلكوا كدا و انا الموضوع ده بقي بتاعى
الشباب / تمام يا كبير تمام
الشباب يمشوا
مختار / تعال عاوزك
جوزيف / عاكسهم و قالهم حلاوه القشطه و هى سايحه على المربى و سقف بايده كدا
مختار / طب و انا اقدر اعمل ايه
جوزيف / انا اقدر ... اماطه الاذى عن الطريق صدقه و من امن العقاب اساء الادب
مختار يتنهد
جوزيف / انا ما اعرفش البنات و اضايقت انت بقي تعرفهم ... من البلد اللى انت بتحميها
مختار / اضايقت ليه
جوزيف / عشان امايا جايه و هى بتتغذى على اللى زى دول
مختار / تقصد ايه
جوزيف / انا قولت اكتر من اللازم ... اى حد هيقل أدبه هيموت ... و مش هتلاقوله حتى جثه تصلوا عليها و تدفنوها ... كارم تيجي نروح الجبل
كارم / انا زعلان منك
جوزيف / هصالحك تعال
جوزيف يروح ياخد كارم تحت باطه و يروحوا ناحيه العربيه و مختار واقف بيتابع و مضايق يطلع التليفون يتصل بحد
.....................
فى عربيه شاهين
شاهين قاعد و قافل اللوك و التكييف و ماسك التابلت و بيتابع الكاميره ياسمينا بتسرح شعرها و تيا قاعده جنبها
تيا / لا انا عاوزه اصبغ شعرى ... تيته بطه قالت عادى
ياسمينا / يا قلبي الحاجات دى مش كلها مفيده
تيا / هو انا بصبغ كل يوم بليز بقي
ياسمينا / تمام هعملهولك انا بس مش النهرده عشان ضهرى واجعنى اوى و مش قادره
تيا / طب ما تيته بطه تعملهولى و خلاص
ياسمينا / هى تيته بطه قادره يعني للوقفه دى و انتى يا قلبي شعرك طويل و تقيل اللهم بارك يعني و بعدين انا ما قولتش مش هعمله انا هعمله بس مش النهرده ... اقولك سبيني دلوقت افرد ضهرى شويه و هناديكي اعملهولك الحاجه فى الحمام اصلا مش هنتعب فى حاجه هخلطهم و اعملهملك
تيا / اوك ماشي
تيا تقوم و تمشي
ياسمينا / اقفلى الباب وراكى
تيا تطلع بره و تقفل الباب ياسمينا تفرد ضهرها على السرير و تمسك الموبايل و تتصل
ياسمينا / حبيب قلبي عامل ايه  ... تمام يا روحى انا بس بسأل هتتاخر و لا لا عشان تيا عوزانى اصبغ ليها شعرها و انا مش قادره دلوقت فقولت اريح شويه و بعدين اقوم اعملهولها ... طب اخد راحتى بقي ... قلبي انت ... اه بليز لو تجيب ليا شويه حلويات من اللى بحبها دى ... مش عارفه و الله اول مره ابقي كدا بموت على السكر بشكر مش طبيعي ... هبقي اعمل دايت لما اولد ... لا مش هتعصب عليك ههههههههههه ... لا يا راجل ... انت قاعد لوحدك شكلك .... اتلم ... اعتبر ده وعد ههههههههه ماشي ماشي يا اسماعيل بيه هههههه سلام سلام
ياسمينا تقفل و تشد مخده و تحطها تحت ضهرها من تحت و تنام
ياسمينا / يا ربى على وجع الضهر مش ممكن
حد يخبط على شباك العربيه شاهين يتخض و يقفل و يفتح الشباك
راجل / عربيه الحاج عرفان وصلت احمل ؟؟
شاهين / و انت محتاج اذنى فى كل عربيه مفيش دفتر قدامك مكتوب فيه كل حاجه
الراجل/ يعني ببلغك يا سيد الناس
شاهين / حمل ايوه ... انا ماشي ورايا كام مشوار و راجع باذن الله على طول على الله ما تبهدلوش الدنيا على ما ارجع
الراجل / تمام يا سيد الناس ما يكونش عندك فكر
شاهين يبتسم و يقفل الشباك و يسوق
.......................
فى اوضه نجاه
مهره بتكوى هدوم هند تفتح الباب بشويش تشوفها تبتسم و تدخل
هند / قاعده لوحدك ليه ما نزلتيش ليه
مهره / هكوى شويه الهدوم دول و انزل علاطول
هند / دى هدوم نوجه ما كوتهاش ليه قبل ما تنزل
مهره / انا اللى كنت لبساهم اخر مره
هند / طب سيبي الهبل ده و تعالى عاوزه اتكلم معاكى شويه
مهره توقف المكوه و تروح تقعد جنب هند على السرير
هند/ طمنيني بقي عامله ايه و ناقصك حاجه هنا او فى اى حاجه او اى حد مضايقك؟!
مهره / خالص بالعكس الكل بيعاملنى حلو جدا و كل حاجه فوق الممتازه ربنا يبارك ليكوا كلكوا
هند / امال نجاه بتقول ليه انك عاوزه تمشي؟
مهره / انا تقلت عليكوا اوى و بعدين انا ليا بيت و اقدر اشتغل و اشيل نفسي كدا ما ينفعش
هند/ حتى لو ده اللى احنا عاوزينه عاوزينك تفضلى وسطينا ؟
مهره / ما ينفعش
هند / ليه بس ... طب لو على الشغل سهله
مهره / و دراستي و تمريني و بيتي ... انا حياتى فى مصر
هند / طب انتى ايه رايك فى عمران
مهره / ربنا يباركلك فيه ما اقدرش اقول عنه غير كل خير
هند / يعني لو اتقدملك
مهره / لو سمحتى يا طنط ... انا مش عاوزه احراج اكتر من كدا... انا اسفه ... عمران مفيهوش غلطه و مليون بنت تتمناه ... بس ... انا بجد مش عاوزه اتكلم فى الموضوع ده لو سمحتى
هند / انا بتكلم يعني انكوا تقضوا الكام شهر الفاضلين فى مصر و بعدين
مهره تبص الناحيه التانيه و تحاول تكتم دموعها و هى بتهز رجليها تقوم و تدخل الحمام و تقفل عليها الباب بالمفتاح هند تقوم تخبط على الباب بالراحه
هند / مهره ... مهره ..   طب حقك عليا ما تزعليش ... حقك عليا يا بنتى سامحيني انا و الله حبيتك زى ولادى بالظبط... و حتى عمك مختار و الله معتبرك من بناته ... حقك عليا انا غلطانه ... ابوس ايدك يا بنتى ما تعيطي فى الحمام انا اسفه ما قصدتش اجى عليكي و لا اضايقك ... طب انا همشي... همشي خالص و اطلعى من الحمام ... حقك عليا يا بنتى
هند تطلع بره الاوضه و تقفل الباب وراها و تطلع الموبايل
هند / ايوه يا مختار انا عكيت الدنيا خالص ... و الله ما عارفه بايني كبرت و خرفت البت سابتني و جريت تعيط فى الحمام ... هكون قولت ايه بس دا انا ما لحقتش اقول حاجه ... يعني اولع فى نفسي يا مختار دا كلامك يعني ... ماشي تعال وريني يا خويا انت هتعمل ايه مستنياك
هند تقفل
هند / كنت هتعمل ايه يعني هو كل حاجه هند هند هند دى ايه النكد ده
فاطمه تعدى تشوف هند بتكلم نفسها و تفرك
فاطمه / مين اللى مزعل المز
هند / ابوس ايدك سبيني فى اللى انا فيه انا عفاريت الدنيا كلها بتتنطت فى وشي
صوت مفتاح باب اوضه نجاه بيقفل هند تتنهد
فاطمه / للدرجادى هو الحوار بخصوص العروسه الجديده و لا ايه
هند / بقولك ايه يا ست بطه انا مش قادره اهدى عليا عشان اقسم بالله جايبه جاز
فاطمه / طب تعالى تعالى احكيلى عملت فيكي ايه البت الوحشه دى و انا املصلك ودانها
هند / عاوزه تطلق و ترجع تعيش لوحدها فى مصر
فاطمه / حقها هو اللى حصل ده ينفع اصلا انا عارفه عقل مختار كان فين وقت ما دبس ابنه التدبيسه دى
هند / اسكتى يا بطه اسكتى البت تسمع هى مش ناقصه
فاطمه / يا بنتى ما انا بتكلم عليها هى ... هو عمران زينه الشباب و كل حاجه بس القلب و ما يهوى يا هند ايه احنا اختارنالك و دبسناكى ايه مش من حقها تدلل كدا و ترفض و تختار شريك حياتها ... ايه بيفكروا ازاى
هند / ماشي دا كان وضع و اتفرض عليهم نصلحه بقي
فاطمه / مظبوط ... نصلحه بأننا نهد كل العك ده و نبدا على نضافة ابنك لو ليه شوق فيها يروح و يجي يطلب ودها و يقدم السبت و الحد و جميع ايام الاسبوع لحد ما ينول الرضا
هند / و دا هيحصل و هى فى بيت لوحدها لا حد بيودها و لا حد بيسأل عنها
فاطمه / و احنا روحنا فين ... بصي اهدى انتى بس كدا و باذن الله هى هتتحل لوحدها ... بت انا رجلى وجعتني تعالى نروح اوضتى نشرب فنجانين قهوه من البن بتاعى و نتكلم على رواقه
هند / معاكى ربنا دا انا ورايا هم ما يتلم
فاطمه / انتى الخسرانة
هند تضحك و تمشي فاطمه تتنهد و تخبط على باب مهره مهره ما تردش
فاطمه / افتحى يا مهره انا خالتك ام عباده ... افتحى انا عارفه انك جوه افتحى عاوزه اتكلم معاكى كلمتين... افتحى يا بت انا قد امك ما توقفتيش على الباب
مهره تفتح عنيها حمره و وشها مندى من الدموع فاطمه تدخل و تقعد على السرير
فاطمه / عيله طويله عريضه تسد عين الشمس اللهم بارك كلها شايله الهم و متنكده تسأليهم من كبيرهم لصغيرهم مالكوا يقولوا مهره زعلانه و ناويه تمشي و انا يا اختى ما ليش فى النكد انا من يومى ست فرفوشه ما استحملش ... قولت لا بقي ... لااااا بقي و انا هسكت دا انا ام الكبير ... ما يغركيش انى صغيره انا جوزونى اربعتاشر سنه بس ايه يا بت يا مهره ... يااااه على ايامك يا سي شاكر ... الله يرحمه ... كان راجل أيه و حنيه ايه و دلع ايه دا انا جسمي ما عرفش العيا و لا المرض الا اما سابنى و راح للى احسن منى و منك ... قهرتى عليه خدت شبابى و صحتى ... الحزن بيعيي زى ما انتى شايفه
مهره / سلامتك
فاطمه / الله يسلمك ..  انا بقي ما بستحملش اشوف حد زعلان ما استحملش اشوف حد مضايق اجرى عليه و اشوف ماله ... بس انا مش هسالك مالك انا عارفه مالك ... انا جايه و جيبالك الحل
مهره/ و هو فى حل للى انا فيه ده !!
فاطمه / طبعا ..  هو فى داء الا و له دواء
مهره / طب و ايه الحل انجديني
فاطمه / خراب يا دنيا عمار يا دماغى
مهره / ايه !! ازاى ؟!
فاطمه / هى مش خربت خالص خلاص ما تحاوليش تصلحيها اركنيها كدا بعبلها على جنب و خدى نفسك و اهدى خااااااالص لحد ما ربك يفرجها
مهره/ ازاى
فاطمه / انا اصلا ما كانش عاجبنى الواد عمران ده ليكي ما ينفعش ... الست ما ينفعش تتجوز واحد هى غلبته و انتى علمتى عليه فى المسابقه اياها دا انا كنت مسكهاله طالع نازل و هو يبصلى و يضحك ... ما عندوش دم
مهره / دى روح رياضيه
فاطمه / سيبك منه و انا اجوزك سيد سيده
مهره تضحك / حضرتك بتقولى ايه بس
فاطمه / اسمعى منى تكسبي
مهره / انا ما بفكرش اصلا فى موضوع الجواز ده خالص ... اصلا ما ينفعش خالص دلوقت ... زى ما حضرتك قولتى خربت و لازم اركن كل حاجه و اخد نفسي و ابدء من الصفر
فاطمه / حلو اوى و انا هشاركك
مهره / فى ايه ؟!
فاطمه / ما اعرفش شوفى هتعملى ايه و انا معاكى ... بصي انتى شغفك فى الخيل خلاص اشتغليها احنا فى الصعيد العيل بينزل من بطن امه يرضع بقين و ينط على الفرسه يتعلم ازاى يركب و يرقص و ينط و يجرى ... علمى العيال الصغيره فى الاسطبل و طلعى خياله كبار زيك كدا
مهره/ انا ما ينفعش اعيش فى البلد هنا
.......................