(((((( الكبيره ٢))))))
#لولو_محمد
الحلقه ٤١
فارس / معلش يا عمى اصله لسه واخد طريحه من اللى قلبك يحبها
ناصر / انت اللى غفلتنى
عمران / هيبقي يقولك المره الجايه الضربه جايه منين و يعدلك واحد اتنين تلاته
ناصر / يا عم خليه يفرح مره من نفسه الجيات اكتر
مختار / انا فى الجنينه
مختار يمشي و يسيبهم
ناصر / شكله مش مظبوط
فارس / و احنا ايه فى حياتنا مظبوط بس انا طالع استحمى
عمران / ياريت
فارس / ياض هتغابى عليك
عمران / انت فاكرنى ناصر و لا ايه
ناصر / الله انت هتحلو و لا ايه
عمران/ انا حلو من يومى
عمران يلعب لناصر حواجبه ناصر يقوم يجرى وراه عمران يطلع السلم يجرى و ناصر وراه و فارس يجرى وراهم و هم التلاته بيضحكوا
……………………
فى طياره خاصه
وفاء قاعده حاطه ايدها على خدها و دياب متابعها و مبتسم
وفاء / و الله كنت عارفه
دياب ما يقدرش يمسك نفسه و يضحك
وفاء / طب ما كنت جيتلى دوغري ليه تعشمنى بس
دياب / و انا عمرى وعدتك بحاجه و خلفت
وفاء تبصله
دياب / باذن الله نخلص و نطلع نقضي يومين حلوين
وفاء / اهى نخلص دى قفلت الكلام كله
دياب / حقك عليا بس العيون علينا كتير
وفاء / ماشي يا دياب انت ادرى بالصح
دياب/ يا بت و الله هفسحك ما تخافيش
وفاء / خلاص يا دياب تمام هو انا قولت حاجه ربنا بس يعدى النهرده على خير
دياب / هيعدى باذن الله و بعدين مركبك طياره خاصه و لا بتاعه نجوم السيما و انا و انت و لا حد تالتنا و فارقه معاكى يعنى رايحين مصر من اسكندريه هننزل مصر و نكملها برى ايه بطولك الفسحه يا ستي
وفاء / ما تشتغلنيش يا دياب انت ما كنتش واثق فيا مش اكتر بس هعديها
دياب/ لا واثق فيكي بس فرحتك بالسفريه كان لازم تبقي طبيعيه لو قولتلك احنا مسافرين ليه التوتر كان هيبان عليكي
وفاء / هو فى خاين فى السرايا يا دياب؟؟ و فى الحريم كمان !!ازاى يعني ؟! انا مش قادره افهمك مين اصلا شافني فى الكام ساعه دول دول يتعدوا على الصوابع
دياب/ و الحريم من طبعها اللت و العجن يعني الخبر زمانه وصلهم فى اسكندريه ذات نفسها
وفاء / يا سلام !!
دياب / العالم بقي قريه صغيره
وفاء / اجلطنى كمان يا سيد الرجاله اجلطنى
دياب يضحك وفاء تتنهد
وفاء / ربنا يعديها على خير اقسم بالله لاخد حقى منك تالت و متلت انا بقولك اهو
دياب / و انا كلى ليكي يا قمر
وفاء/ بجد مضايقه اوى
وفاء تبص لدياب مبتسم
وفاء / هتعوضنى
دياب يهز راسه تبتسم و تهز راسها
.........................
على سطح فيلا نجاه
نجاه واقفه عينها على البوابه جابر يدخل
جابر / مش جايلك نوم و لا ايه
نجاه/ كلكوا نمتوا بدرى اوى
جابر / و ادينا صحينا .. بس واضح ان المحروس لسه ما جاش
نجاه / خلينا ننزل عشان ما نسمعش كلمتين تانين ما لهمش عازه
جابر / هننزل بس فى كلمتين فى زورى تسمعيهم منى احسن من غيرى
نجاه / خير
جابر / الخواجه اللى فتحناله بيتنا و اكل معانا عيش و ملح بيلف يلف و يرجع لاصله بيروح من وقت للتاني يبع اللى عرفه و اللى وصله للجماعة اياهم
نجاه / ما احنا متفقين انه يفضل منيمهم و مفهمهم ان الخطه شغاله
جابر / انتى عارفه هو فين دلوقت
نجاه / مانيش امه عشان اتتبع خط سيره يا جابر يروح و لا يجي هو مش صغير
جابر / يعني انتى مش واقفه هنا مستنياه
نجاه / بجد يا جابر!! انا اللى بيتقالى الكلام ده ؟ تسلم يا ابن عمى ... عن اذنك
جابر / استنى انا بكلمك
نجاه / و انا الكلام عندى خلص اتكلم مع نفسك وسع و لعلمك انا مش مسمحاك ما هو مش كل واحد فى ام البيت ده هيجي يرميني بكلمتين انا مش هفيه و لا على راسي باطحه عشان عيني تتكسر و اقبل بالإهانات دى كلها
جابر / يعني انتى مش مستنياه ؟
نجاه تغل فى نفسها و تسيبه و تمشي و جابر متابعها و مضايق يروح وراها
.............................
فى الجبل
شاكر واقف وسط رجاله صابر بيتابع بنظاره ميدان ليليه صابر يدخل
صابر / فى اى حركه غريبه ؟
شاكر / نهائى الدنيا أمان
صابر / مش كان اولى تروح معاهم انت عارف ان هيحصل عوق
شاكر / انا ما اتعودتش ازاحم مطرح ما بيحطونى بقول امين
صابر / و دا عيب كبير اوى مش يمكن تقدر تعمل حاجه احسن لو اتحطيت فى مكان تانى
شاكر / و يمكن اخربها مين عارف هههههههه
صابر/ شيطانى سعات بيوسوسلى كدا يقولى ان اللى يخلى ابن مختار الزيني البكرى الكمل اللى ما بتطلعش منه العيبه يسيب سرايته و عزه و ماله و يجيلى هنا المكان اللى ما بيبعتوش فيه غير اللى ناقصه تدريب او ربايه حاجه من اتنين
شاكر / الا و هم
صابر / ههههههههه الأولى أنهم عينهم على مكانى
شاكر / و انت فى حد يقدر يحل مكانك ؟
صابر / لا
شاكر / يبقي مش ده ايه بقي السبب التانى
صابر / انك سهتون و عملت مصيبه سوده
شاكر/ ما يمشيش معاك انى مش لاقي نفسي معاهم و انى هنا بكيفي يعني
صابر / تمشي اصل انا برده ما افتكرش هقدر الاقي نفسي بعيد عن الجبل
شاكر / ما انكرش برده انى بحاول اتعلم منك كتير
صابر / و انا ما اتاخرش عن الرجاله اللى بجد ... عملت ايه فى حكايه التلاوه
شاكر / انا هروح اتمم على الرجاله تابع انت بقي الدنيا هنا
شاكر يدى لصابر النضاره و يمشي و صابر واقف بيضحك
.....................
فى الهول تحت
نجاه / بجد و الله طب كتر خيركوا انكوا افتكرتوا تقولولى
مختار / كل واحد عرف فى الوقت اللى المفروض يعرف فيه
نجاه / مش حقيقي انتوا مش واثقين فيا و بتقولولى دلوقت مضطرين عشان كلكوا هتسيبونى لوحدى و تمشوا
فارس/ لوحدك ايه دا فى جيش فى الجنينه و لا الحرس الجمهوري بذاته
نجاه / انا عاوزه اجى معاكوا
فارس / ما هى ظاطت
نجاه / انا ما بكليمكش انت
مختار/ مش هينفع يا نجاه
نجاه / و انا مش هقعد هنا لوحدى استناكوا معلش انا من حقى اجى معاكوا
مختار/ نجاه... احنا محتاجينك هنا ... هاتى الحلق و الخاتم و السلسله
نجاه / مش فاهمه
جابر / هنسيب الحلق و الخاتم و السلسه فى اوضتك بس انتى هتكونى فى مكان تانى
نجاه / هاجى معاكوا ؟
فارس/ يخربيت ام الغباء
عمران / ما تهدى على نفسك يا عم فى ايه مالك
مختار / لا مش هتيجي هتبقي فى مكان أمان اكتر من الفيلا و من انك تيجي معانا
نجاه / مكان ايه ده
جابر / تعالى
جابر يروح الجيم و الكل وراه ينزلوا تحت يشيلوا بلاطات الفوم فى باب سرى فى الارض بشاشه اسمارت
نجاه / ايه ده انتوا كلكوا كنتوا عارفين بالمكان ده
جابر / لا انا اللى عامل المكان ده و عامل زيه فى بيتي فى البلد خزنه امان الجزء ده و هو بيتبنى ما دخلتش فيه غير اكتر عمال بثق فيهم يعني مفيش حد يعرف عنه حاجه غير القريبين بس
كارم / و اقسم بالله انا ما كنت اعرف انه موجود اصلا قبل النهرده
مختار / الطالعه دى جابر اللى مخطط لها بس بصراحه عجبنى المكان و الفكره
نجاه / اللى انا لسه مش فهماها
مختار يمد ايده
مختار / الحلق و الخاتم و السلسله و الموبايل لو سمحتى
نجاه تلف و كارم يغطيها و تمد ايدها تحت الحجاب تقلع الحلق و السلسله و الخاتم و تحطهم فى ايد كارم و تديله الموبايل من جيبها يمد ايده بيهم لمختار
مختار/ حطهم فى اوضتها فوق
كارم يهز راسه و يمشي
نجاه / ممكن بقي افهم ايه اللى بيحصل
جابر / تعالى ورايا
نجاه / دا يوم ما يعلم بيه الا ربنا انا طهقت
جابر ينزل على سلم حديد يدخل اوضه مصفحه فيها باب اوكرديون صغير حدا و كنبه و تلاجه ميني بار و شاشه تليفزيون كبيره نجاه تنزل وراه و وراهم مختار
جابر / دى شاشات مراقبه لكل الكاميرات اللى فى الفيلا عشان تشوفى بعينك ان كان فى غدر هيحصل فى غيابنا و لا لا بما انك المفروض هتكونى لوحدك فى البيت
نجاه / تقصد ايه
جابر / المكان ده بيفتح بالبصمة و ما تقلقيش هنبرمجه دلوقت انه يفتح من جوه ببصمة ايدك تحطيها على الشاشه هيتعمل لها سكان و الهيدروليك هيشتغل و الباب هيفتح لوحده
نجاه / قولى بقي ان عمران ما كانش يعرف بالمكان
صوت عمران من فوق
عمران / كنت بعملها لبيت جابر ما كنتش اعرف انه طبقها هنا كمان ... على فكره انت حاسبتنى على باب واحد بس
مختار يضحك
مختار/ فى هنا حمام صغير و فى نظام تهويه ما تقلقيش و كمان فى تلاجه فيها اكل و شرب لحد ما نرجع
نجاه / ما تطولوا احسن هو انتوا هتعملوا ايه ليه كل ده
جابر / انا مش واثق فى جوزيف و زى ما هو بيتحرك من ورانا احنا كمان كان لازم نتحرك من وراه
نجاه / برده مش فاهمه
مختار / هتفهمى كل حاجه لما نرجع باذن الله
جابر / المهم مهما حصل ما تفتحيش الباب ده لو وقفوا على رأسهم دا لو عرفوا المكان ده اصلا مش هيعرفوا يفتحوا الباب من بره الباب هيتفتح بس ببصمه ايدك انتى و احنا باذن الله مش هنتاخر عليكي
نجاه تبص لمختار
مختار / باذن الله مش هيحصل حاجه و هينجح فى الاختبار
نجاه / اختبار ايه بس انا مش فاهمه حاجه و مش هينفع تمشوا و تسيبونى كدا لحد ما ترجعوا
مختار/ المكان الموبوء اللى يونس كان عاوزك تروحيه و اللى بيروحه كل شويه فى السر احنا قرينا فتحته
نجاه / بالبساطه دى
مختار/ دى لعبتنا من سنين بقي المهم اننا هنبقي مطمنين عليكي هنا لحد ما نرجع
جابر / لما الباب يتقفل مفيش نت و لا شبكه هنا بس انا حطيت لك هنا كام كتاب من بتوعك و مصحف تتسلى لحد ما نرجع
نجاه / انا بجد مش طيقاكوا كلكوا ... و زعلانه من حضرتك جدا
مختار / دا لمصلحتك
جابر يجيب تابلت
جابر / حطى ايدك هنا
نجاه تبصله جابر يهز راسه تحط ايدها التابلت يعمل سكان الباب ينور اخضر فوق و يزمر
جابر / تمام حطي ايدك فوق على الشاشه الباب هيترفع لوحده
نجاه تهز راسها مختار يطلع السلم و جابر يطلع وراه نجاه تبص على الشاشه تشوف فى واحده من الكاميرات الشباب واقفين بيقفلوا عليها الاوضه و يرصوا البلاطات تانى فارس يشاورلها باى نجاه تنفخ و تروح تقعد فى جنب
نجاه / ماشي يا جابر ليك روقه ماشي
.........................
فى الفندق عند رزق
رجاله لابسين من شركه الغاز مع رجاله تانين لابسين شرطه يدخلوا الفندق و يروحوا ناحيه الاستقبال
راجل ١ / من فضلك جالنا بلاغات كتير عن تسريب غاز فى الفندق و معانا قرار إخلاء للمكان للفحص و المعاينه
الاستقبال / ازاى الكلام ده حضرتك
راجل ٢ / زى الناس ايه الصعب فى الموضوع... اقولك روح نادي لنا مدير الفندق ده احسن ما تضيعش وقتنا
موظفين الاستقبال يبصوا لبعض واحد يروح يتكلم فى التليفون
راجل ١ / شوفوا شغلكوا يا رجاله
الاستقبال ٢ / هستاذنك تستنى شويه لحد ما
الرجاله تتحرك و ما تسمعلوش
راجل ١ / انا معاك هنا اهو ما تقلقش نادي لنا بس مدير المكان
موظف الاستقبال يقفل سماعه التليفون و يبص لزميله و يهز راسه ايوه
راجل ٢ / ما الحكايه سهله اهى امال معقدها ليه بقي
..........................
فى الصحرا
امين واقف مع راجل بيتكلم عربى مكسر و شاهين واقف فى جنب بيراقب الطريق و محمد واقف الناحيه التانيه و منصور بيتمم على شنطه صغيره فيها شرايح صغيره بيحطها على جهاز معين فى ايده و يرجع يحطها فى الشنطه تانى و فى رجاله كتير حواليهم
الراجل / زى ما طلبت بالظبط ميكروشيب اضافيه لكل سلاح بس زى ما قولت مهما برمجتها عمرها ما هتبقي زى الاصلى بنت بلدها ابدا
منصور يقفل الشنطه
منصور / لا ما تقلقش من النحيادى مش اول مره
امين / و الله لو عليا ما استغناش عن القديم اصلي و ما بيجليش و لا بيحتاج لشريحة و لا برمجه و لا حد يقدر يتحكم فيه من بره
الراجل / نظريه المؤامره دى بتكلفكوا فلوس كتير اوى ما حدش يقدر يتحكم فى السلاح بتاعك يا مستر امين انت اللى بتدوس الزينات الشيب دى بس عشان تعلى من كفاءه الميكانيزم و تعلى دقه الايمينج بتاعك
شاهين / ما تكلمنا عربى يا خواجه
منصور / بيقولك بتخلى نشانك احسن ركز فى دورك افيدلك
شاهين يهز راسه دبانه تضايقه
شاهين / ما هى ناقصه امك
الدبانه تقف قصاد شاهين على بعد خطوه على مستوى عينه شاهين يجي يهشها تناور و ترجع تقف فى مكانها و هى طايره يستغرب يحاول يهشها تانى تكرر نفس الحركه تطير فى اتجاه و ترجع تقف مكانها شاهين يبص على منصور بيسلم الراجل الفلوس يطلع الموبايل و يفتح الكاميرات الدبانه تطير فى اتجاه شاهين يزوم يشوف خيال حد بعيد يزوم اكتر و اكتر لحد ما يشوف ابيك واقفه مبتسمه و هى بتلعب فى الموبايل ترفع عينها و تغمزله شاهين ملامحه تقلب
...................
فى الفندق عند رزق
جوزيف و الرجاله منهم بابلو بيخلوا المكان و يكبوا جاز على الاجهزه
بابلو / الا انت لما تروح هتقولهم كنت فين
جوزيف / هم عارفين انى هنا و الا ما كانوش جم انجز مش وقت كلام
بابلو / دا على اساس انهم جهزوا كل ده فى الكام ساعه دول
جوزيف يرمى الجركن فى الارض
جوزيف / و دى غلطتى انا يعني و لا غلطتك انك سايب دورك الاصلى و عمال تحرق شغلى و تعبى من غير اى سبب زى حوار كارم كان ايه وقته دلوقت اصلا
بابلو / الغلطه كانت غلطتك من البدايه انك خرجت العصفوره من القفص و رجعتها بيتها بس ما تقلقش ساعه زمن و هكون صلحت الغلطه دى
جوزيف / و ناوى تعمل كدا ازاى بقي
رزق يدخل
رزق / خلصوا نقل السياح لفنادق تانيه يعني ما عادش فى وقت
بابلو / تمام يبقي لازم نتحرك
بابلو يجي يمشي جوزيف يمنعه
جوزيف / انا ما بهزرش
بابلو / هو رزق ما قالكش و لا ايه ؟؟ انت ما قولتلوش يا رزق
جوزيف يبص لرزق
رزق / انا كنت فاكركوا متفقين
جوزيف / انا خلقى ضيق !!!
بابلو / سابوها لوحدها و من غير غفر كمان يبقي اللى يتبتر على النعمه تزول من وشه و احنا اولى بيها ما دام ما بيحافظوش عليها
جوزيف / مستحيل يعملوا كدا اكيد مش هناك
بابلو يطلع موبايله و فى نقطه زرقه فى الفيلا
بابلو / دا اللوكايشن بتاعها دلوقت
بابلو يطلع فيديو
بابلو / و دى لحظه خروجهم و ركوبهم العربيات كلهم وشوشهم منوره فى الكاميره و عددهم مطابق لعدد الأجسام اللى فى العربيات و نوجه مش معاهم
جوزيف يبص لرزق
رزق / ما تبصليش يا ملك انا ما كنتش اعرف ان الحوار ده براك
بابلو / ما تقلقش يا رزق دا بعلم المجلس و موافقته و تمويله و كدا كدا الرجاله زمانهم وصلوا عندها اصلا يعني خلصت
جوزيف يسيب المكان و يجرى بابلو ينادى عليه
بابلو / مش هتلحقها قولتلك استناها معانا احسن هيخلصوا و يجيبوهالنا
رزق / هو الحوار على ايه انا مش فاهم حاجه
بابلو / اتحرك يا رزق قبل ما يوصلولنا هنا اتحرك يا حبيبي اتحرك
رزق / هو الحوار ده بجد طلع بره الملك
بابلو / ملك ايه و وزير ايه ما تعملوش قيمه اوى كدا انت ما تعرفوش قدى انا اللى مربيه و معلمه كل حاجه
رزق / بس زعله وحش و لدعته و القبر
بابلو/ دا لو طلع من اللى جرى عليه عايش دا انا باعت للسنيوره جيش
بابلو يبتسم و يضرب رزق بالكف على بطنه و يمشي رزق يمشي وراه و الرجاله تولع فى الاوضه و تمشي وراهم
.....................
عند شاهين
شاهين يبص على الرجاله و يرجع يبص فى الموبايل تانى يلاقي ابيك ماسكه يافطه مكتوب "الشيبس بايظه" تبدل اليافطه "جرب واحده" تبدل اليافطه "كسبت بونط" تبدل اليافطه "علمت على منصور" تبدل اليافطه "اخلص هيمشوا" شاهين ينتبه و يبص يلاقي الراجل بيسلم على امين
شاهين / استنوا استنوا ... انا مش مرتاح
منصور/ شاهين !!
الراجل / مش مرتاح ليه بس انتوا مش تممتوا على كل حاجه احنا ما ينفعش نستنى اكتر من كدا البوليس ممكن يقبض علينا كلنا
شاهين / جرب واحده يا منصور
منصور / جربتها و اخرس بقي
شاهين / جربها فى السلاح جربها عملى بجد يا جدع
منصور يبدا يتعصب امين يلاحظ ارتباك الراجل
امين / جربها يا منصور مش هنخسر حاجه و لا ايه يا باشا
الراجل / انا مش فاضي يا مسيو انتوا بقالكوا ساعه بتعاينوا و تعدوا دا مش اسلوب شغل النهار طلع و احنا واقفين
شاهين / مالك عرقت كدا ليه الجو حلو و الدنيا تراوه
الراجل/ انت مين اصلا و ايه دخلك بالشغل انت جاى تحرس و بس
منصور يحس ان فى حاجه غلط يروح يشد سلاح من الصندوق
الراجل / الشيب مش متبرمجه اكيد مش هتشتغل
منصور / ما تقلقش هبرمجها
الراجل / و انا هستنى اما تبرمجها و انا واقف لااا خدوا فلوسكوا انا ماشي
منصور يشاور للرجاله براسه كلهم يرفعوا سلاحهم رجاله الراجل كمان يرفعوا سلاحهم شاهين يرفع سلاحه و هو مش ثابت مكانه
منصور / مش هتاخد دقيقه
الراجل/ بين البياع و المشترى يفتح الله خد فلوسك اهى انا مش هبيع
منصور يحط الشريحه فى الجهاز تانى و يدوس زرار
الراجل / انا بحذرك انت كدا
الجهاز يطلع ايرور منصور يبص الناحيه التانيه
منصور / تمام يا خواجه خد حاجتك اهى
منصور يرمى الشرايح تحت رجلين الراجل و يروح يشد منه شنطه الفلوس
منصور / بين البايع و الشارى يفتح الله ... لم زبالتك و امشي
الراجل يشاور لراجل تانى يروح يركب العربيه و يسوقها و يمشي و رجالته ينسحبوا كلهم
محمد / يعني ايه كدا الطالعه باظت
منصور / الاسلحه دى من غير الشرايح سلاح علينا مش لينا لو الكودات بتاعتها وقعت فى ايدين اللى ما يتسموش سهل يتحكم فى سلاحك و يخليه يفرقع فى وشك انت
امين / قولت ماله السلاح القديم
منصور / الحديث بينشن لوحده زى ما بيقولوا يعني ان كنت بالقديم بتجيب عشره من عشرين الجديد هتجيب تلاتين
شاهين / طب و العمل
امين / لازم نمشي لما نرجع السرايا نتكلم .. الحمد لله عدت على خير يلا يلا
الكل يركب العربيات و يمشوا
........................
فى عماره فاروق
وفاء و دياب قاعدين بيراقبوا اجهزه كتير قدامهم كلها كاميرات مراقبه و فى اتنين رجاله تانين شغالين معاهم و مختار واقف ورا واحد منهم بيتابع
وفاء / امان خلى الرجاله تتحرك
دياب / تمام ... احمد ... امشي ورا يونس اعرفلى خط سيره رايح فين
احمد / تمام يا رياسه
وفاء/ مفيش اى حركه فى محيط الفندق
دياب / وسعى دايره البحث
وفاء/ تمام
مختار/ طلع درونز اكتر
الشاب / مفيش انا بعتهم كلهم
مختار/ يعني ايه الكلام ده ... انتوا جايين تهرجوا هنا و لا ايه ... فى ايه يا دياب
دياب / انا مش فاهم هم اصلا بيهجموا على البيت ليه من أساسه دا لو عندهم بربع جنيه تكنولوجيا هيقدروا يعرفوا ان ما فيش حد فى الفيلا خالص
مختار / هو انت تقدر تعرف
دياب / الاوضه اللى نجاه فيها عازله فمش ظهرالى فى الصوره الحراريه ... اهو البيت فاضل مفيهوش بشر و لا حيوانات حتى مفيش اى جسم بيطلع حراره جوه المكان ... الأجسام الحمره كلها بره اهو اللى هو هم احنا مفيش حد خالص هم مكملين دخول ليه بقي هم هجموا من الاساس ليه اصلا
مختار يبص لوفاء مركزه فى شغلها يرجع يبص للمهندس و يتابع معاه
دياب / اهم حاجه تكونوا ضامنين المفاجاه اللى سى جابر بنى عليها خطته كلها ... و الله و كبر و بقي بيخبى علينا ما شاء الله عليه
مختار يرجع يبص بقلق لدياب اللى شغال و مركز مختار يتنهد و يتابع الشاشه باهتمام
.......................
فى الطريق
جوزيف طاير بالموتوسيكل و مثبت الموبايل فى حامل قدامه و فى اشاره بمكان نجاه فى الفيلا يحاول يتصل بجابر غير متاح يحاول يتصل بمختار غير متاح يحاول يتصل بعمران عربيه تزنق عليه يتقلب بالموتوسيكل و الموتوسيكل يتزحلق لحد تقاطع عربيه تشوطه و الناس تتلم تقوم جوزيف يقوم و هو ماسك جنبه يقلع الخوزه و يجرى على الموتوسيكل باظ يجيب الموبايل منه و يشوط الموتوسيكل بغضب يشوف عيل بتاع دليفرى سايق موتوسيكل يجرى يقف قدامه و يديله من جيبه جنيه دهب
جوزيف / هرجعهولك هرجعهولك
جوزيف يخطف الموتوسيكل و يطير و الشاب بيقلب الجنيه الدهب فى ايده و فى حاله صدمه
.........................
فى الفندق عند رزق
الرجاله بتنزل السلم لابسين ماسكات غاز يوصلوا للحلبه و يشوفوا الدخان خارج من المكتب واحد يروح يفتح الباب النار شديده ما يقدروش يقربوا واحد يقلع الماسك يطلع جابر يمسك لاسيلكى
جابر/ كانوا عارفين اننا جايين و نضفوا مكانهم
صوت مختار فى اللاسلكي / المداخل و المخارج كلها تحت عنينا ياما هم لسه عندك ياما فى مخرج سرى لازم تلاقيه
جابر يبص لواحد تانى يقلع الماسك همام
همام / ما جابونيش اكتر من كدا ما تبصليش
جابر يبص للباقيين
جابر / تمام هنقلب المكان لحد ما نلاقيهم او نعرف هربوا منين عشان نقدر نلاقى خيط جديد نمشي وراه يوصلنا ليهم
صوت مختار/ انت ضامن البتاعه اللى حطينا فيها نجاه ؟
الكل يقلع ماسكاته و ينتبه
صوت مختار / زى ما قولت بيهاجموا الفيلا
كارم / انا هرجع لها
جابر / مش هتلحقها كدا كدا مش هيلاقوا حاجه و هيمشوا هى فى أمان
جابر يبص لعمران
عمران / عمرهم ما هيقدروا يفتحوا الباب اطمن
همام / خلونا ننجز قبل ما يفلتوا مننا و يبقي كانك يا ابو زيد ما غازيت
الكل يلبس الماسكات و ينتشروا فى المكان
.........................
فى فيلا نجاه
نجاه بتتابع الكاميرات على الشاشه و فى ضرب نار عنيف فى الجنينه بين رجاله و درونز
نجاه / كل دول جايين عشانى .. ليه جايين تقبضوا على موسوليني يا ولاد الحرام
الرجاله تقدر تدخل الفيلا و ينتشروا فيها
نجاه / و البتاعه دى امان و لا هبقي روحت فطيس فى اختراع من بتوع الباشمهندس عمران بيه
نجاه تضرب كف على كف و عينها تايهه بين الكاميرات الرجاله فى كل حته يخطف عينها انفجار فى الجنينه تكبر الصوره يطلع جوزيف داخل الفيلا و بيحدف كوين بينفجر فى الكل
نجاه / يونس !!!
جوزيف يدخل الفيلا يطلع مسدسين و يقتل اللى يقابله و يروح ناحيه السلم نجاه تبص فوق الرجاله بيزرعوا قنابل
نجاه / هيهدوا المكان فوق روسنا ... هفضل هنا لحد ما يدفنونى بالحيا و لا ايه
نجاه تطلع و قبل ما تحط ايدها على الباب تلمس جسمها معهاش سلاح ترجع تبص على الكاميره فى رجاله فى الجيم
نجاه / هعمل ايه ... اعمل ايه .. ادعى عليك يا جابر و لا انيل ايه
نجاه تقلب فى الكاميرات جوزيف طالع السلم بيجرى على اوضتها و اللى بيقابله بيقتله
نجاه / ما تطلعش فوق ما تطلعش القنابل فوق انا تحت هنا انا تحت ما تطلعش فوق بقولك ما تطلعش
فجاه شاشه فى الدور اللى فوق تسود و تشوف جوزيف بيتنطر يتخبط فى الحيطه و يقع فى الارض فى شاشه تانيه و كاميرات الادوار اللى فوق تشوش و تسود واحده ورا التانيه
نجاه / يونس !!!
نجاه تشوف الرجاله اللى فى الجيم و الدور اللى تحت ينسحبوا بشكل عشوائي بره الفيلا نجاه تجرى تفتح الباب و تطلع أصوات انفجارات واحد ورا التانى و هى بتتحرك بحذر لحد ما تطلع الهول تشوف واحد ميت فى الارض و جنبه مسدس تجرى تجيبه و لسه بتقف تحس بمسدس فى راسها من ورا و حد واقف وراها
الراجل / دوختينا يا قطه ... اتحركى قبل ما تطربق فوق دماغك
.......................
فى طريق
جابر و وراه الرجاله ماشيين فى ممر ضيق يلاقوا سلم يطلعوا و هم مركزين و مسكين سلاحهم يلاقوا باب جابر يقف فى جنب و يضرب كالون الباب الباب يتفتح يلاقوا نفسهم فى الشارع جانبى ضيق جدا جابر يبص فوق حواليه
عمران / مفيش اى كاميرات
جابر / انتوا امشوا من هنا و احنا هنمشي من هنا خلونا نشوف البتاع ده بيوصل على فين
همام / ركب الايربودز هنا فى الشارع هتلاقى شبكه
كارم /الاول نطمن على نجاه قبل اى حاجه اى حد يقدر يكمل من هنا
جابر / مفيش مخلوق هيقدر يمس نجاه جوه الاوضه دى تستحمل انفجار نووى عمرهم ما هيقدروا يفتحوها ابدا
همام / اتصل اطمن برده و احنا هنتحرك عشان ما نضيعش وقت
جابر يحط الايربود فى ودنه و يدوس الزرار
جابر / ايوه يا خالى احنا وصلنا للشارع دياب حدد مكانا و لا لا
كارم / اساله عن نجاه
جابر / نجاه عامله ايه طمنى بعد اذنك ... ايه فجروا الفيلا !!!
الكل يبص لبعضه
جابر / احنا كمان جايين خلى دياب يفرغ الكاميرات و يستلمها اليكتروني كدا كدا مش هنحصلهم خلينا نلحقها هى
جابر يشيل الايربود
جابر / هنمشي للطريق العموامى و هيقابلونا بالعربيات نطير على الفيلا
كارم / يا ريتنى فضلت معاها
عمران / يا ابنى ما تقلقش اقسم بالله طول ما هى فى الاوضه عمرهم ما هيقدروا يلمسوا منها شعره واحده حتى
………………………..
فى عربيه منصور
امين راكب جنب منصور سايق شايل الهم و محمد راكب ورا جنب شاهين
محمد / لا بس الشهاده لله دماغ صاحيه الا كانت فين الحلاوه دى يا شاهين من زمان مخبيها يعني
شاهين / و انا كنت اتحطيت فى موقف صح و قولت لا
امين / الحمد لله كنا هنخسر جامد اوى فى الغلطه دى
محمد / بس انا مش فاهم هو مش يونس قال لجابر انه ضامن الراجل ده
منصور / و انت ضامن سي زفت ده اوى كدا
امين / ممكن يكون عمل كل ده عشان يحرج جابر ما هو اللى متفق مع الراجل
منصور / كل حاجه ممكن بس احنا برده خسرنا جامد خسرنا وقت و فلوس السلاح ده لو هنجيبه من اى حته تانيه هنجيبه اغلى من الرقم ده بكتير و برده مش مضمون
محمد / بس احنا الطلقه مننا عمرها ما بتخيب ابدا ايه لزمته السلاح ده يعني انا اقولك اه للناس التانين يحتاجوه انما احنا نصيب عين الصقر فى السما يبقي لزمته ايه
منصور / لازم دايما تطور من نفسك و يبقي معاك أحدث حاجه يا محمد
محمد / منك نستفيد ... يبقي المفروض نشتغل بقي على الميكروروبوتس دى ... سمعت عنها يا شاهين دى شبه الحشره و حجم الحشره بس هى فى الاصل روبوت دول حقنوا منصور بالبى كاى بواحده شبه النحله فاكر يا منصور
منصور / و سي زفت بيقول ما لهاش اى حاجه مضاده
محمد / ستاره الهوا ما تنفعش مش دى بتمنع الحشرات عشان مش بيقدروا يطيروا جواها اهى بالظبط اكيد الروبوتات دى مش خارقه يعني بحجمها ده عشان يقدروا يطيروا تحتها
امين / طب و برا السرايا هتحمى روحك ازاى هتمشي بستاره الهوا فوق راسك و لا ايه
محمد / جرا ايه يا عمى و انا ابو العريف و لا ايه اكيد مش انا اللى هحل كل العقد حليت واحده ادى الفرصه لغيرى بقي و لا ايه يا شاهين
شاهين / و لا ايه يا محمد
محمد / مالك يا عم بهز معاك مش انت اللى انقذت الليله النهرده و لا ايه
شاهين / اهدى شويه يا محمد اهدى انت جايب الطاقه دى كلها منين اهدى
امين و منصور يبصوا لبعض منصور يركز فى السواقه و شاهين باصص من الشباك و سرحان بيفكر
………………………..
أنت تقرأ
الكبيره ٢ بقلم / لولو_محمد
Humorالحرب لسه مستمره و الحقيقه مسيرها فى يوم تظهر النور و كل واحد لازم يختار طريقه
