الكبيره ٢ بقلم / لولو_محمد

الحلقه ٤٠

((((((( الكبيره ٢)))))))
#لولو_محمد
الحلقه ٤٠
بياتريس / انا مش هشرب حاجه فى البتاع ده
مهره / هنكبهم التلاته بس كان لازم نطلب خلونا فى موضوعنا ... انتوا متاكدين ان باباكوا هو احسن هديه لماما
بياتريس / داااااه يا بنتى دول كانوا اسعد زوجين فى الدنيا
مهره / مش على كلام باباكى دول انفصلوا فى ثانيه ما حدش فيهم بكى على التانى لحظه
بياتريس / ايجو مش اكتر اسالينى انا مامى منهاره من غيره و هو مستحيل يكون قادر يعيش حياته طبيعي
مهره تبص لصوفيا
صوفيا / ما تبصليش اى كان الوضع قبل كدا اكيد احسن من دلوقت تمام ؟
مهره / ليه احسن ؟ لو الاتنين مش مبسوطين مع بعض و أسعد و هم منفصلين خلاص
بياتريس/ انتى اللى  بتقولى كدا انتى عوزانا نبقي فى اسره مفككه
مهره / اكيد لا و اقسم بالله كلمته كتير جدا انا عيطت جدا لما قالى انه ناوى على الطلاق عيطت و انهرت و اترجيته قالى انى انانيه و ما تهمنيش سعادته
صوفيا / امتى الكلام ده
مهره/ فى تركيا
صوفيا / و سكتى ؟
مهره/ هقول ايه بس ..  كان عندى امل بس ما فيش فايده نفذ اللى فى دماغه
بياتريس / اخر كلام انتى مش معانا يعني
.........................
صوفيا / اهدى يا باتى من فضلك خلينا نتكلم ..  خلينا نحاول
مهره / هيعملوا ايه ؟
صوفيا / هنكلمهم انا هكلم ماما و انتى كلمى بابا و بياتريس هترتب جو رومانسي و مود حلو ليهم قبل العيد ميلاد ايه رايك
مهره / تمام انا هكلم ماما
صوفيا / انتى بتتفقى مع بابا اكتر انتى اقرب واحده فينا ليه
مهره / هقوله ايه ارجوك رجع ماما لا مش حساها حتى ماما اصلا مش عارفه اقولها ايه ارجعى لواحد طلقك
بياتريس / قولت انك مش معانا انا قولت حسيتك على فكره
مهره / حطى نفسك مكانى هقول لماما و لا هقول لباباكوا ايه
بياتريس / شوفتى شوفتى باباكوا مش بابا و دادى زى ما كنتى بتقولى ايه قله الاصل دى
مهره تبص لاختها و تسكت
صوفيا / ما تزعليش منها انتى عارفه انها مدب كدا
بياتريس / على فكره انا زعلانه منك جدا اصلا
مهره / انا ايه المطلوب منى غير انى اضطر اتعامل مع بابكوا لانى مش هقدر 
بياتريس / و لا اى حاجه احنا ما كناش مستنين منك حاجه اصلا يلا يا صوفى
بياتريس تقوم
صوفيا/ مالك يا مهره فيكي حاجه مش مظبوطه انتى عمرك ما كنتى كدا
بياتريس / عمرها ايه احنا اصلا ما نعرفهاش دا هم الكام سنه اللى جت عاشت فيهم معانا و قالولنا دى اختكوا و بابا احتواها و بقي بيعاملها كأنها بنته لحد ما أطلقوا خلاص رمتنا كلنا
مهره عنيها تتملى بالدموع بياتريس تسيب الكافيه و تطلع بره
صوفيا / بابى عمره ما قرا انسان غلط و كان بيحبك اوى و لسه بيحبك يعني انتى مش وحشه و هى على فكره مش شيفاكى وحشه هى بس مش قادره تفهم التغير الرهيب اللى حصلك احنا حياتنا اتلخبطت بين يوم و ليله و انتى اول واحده نطيتي من المركب طبيعي تزعل
الوايتر يدخل يحط المجات
صوفيا / شكرا
الوايتر يمشي
مهره / انا مش هقدر اساعدكوا انا اسفه انا هقوم أحاسب و امشي عن اذنك
صوفيا / استنى انا ما خلصتش كلامى
مهره/ مفيش كلام يتقال انا انسانه وحشه و قليله الاصل و ما استاهلش
صوفيا / هى ما تقصدش
مهره / لا دى الحقيقه مش كلامها انا كدا فعلا
صوفيا / ما حدش بيقول على نفسه كدا انا عاوزه اعرف ليه بتقولى كدا ؟ فى ايه؟
مهره تبص الناحيه التانيه
صوفيا / دا آخر كلام عندك يعني ؟
مهره ما تردش صوفيا تمشي مهره تشاور للوايتر يجيب الحساب
.............................
على سلم فيلا نجاه
جابر قاعد على السلم نجاه تطلع من اوضتها تيجي تنزل تشوفه تستغرب تروح تقعد جنبه يبصلها و يبتسم
جابر / صح النوم
نجاه / صح بدنك انت قاعد كدا ليه
جابر / عادى
نجاه/ لا مش عادى اصل دا مش مكان قعاد الكراسي و الاوض ما خلصتش عشان تقعد هنا
جابر / عادى و الله
نجاه / هتخبى عنى ... خلاص بقي فى بينا أسرار... ماشي خليك فاكر هتلف تلف و ترجعلى
جابر / ما ليش غيرك فعلا
نجاه تبتسم
نجاه / انت فى حاجه مضيقاك ؟ ... بغض النظر عن كل اللى بيحصل يعني بس يا راجل انت هتنخ بدرى كدا و لا ايه ياما دقت على الراس طبول ... تيجي ايه دى فى زلزال اتنين و تسعين
جابر يضحك
جابر / و انتى تعرفى ايه عن زلزال اتنين و تسعين انتى
نجاه / يا راجل دا افيه دا انت قفيل اوى ... انسي انسي شكلك مش متابع كارتون
جابر / لا و انتى اللى متابعه اوى
نجاه / هو انا لاقيه وقت اخش الحمام يا راجل دا تلاقيني لقطه من البت ياسمينا و لا اى حد من العالم الرايقه اللى فى حياتنا الا قولى يا جابر ... احنا ليه ما طلعناش رايقين زيهم يعني عندك عم امين مثلا ... مش اخوك الكبير بس غيرك خالص هو واخد قراره و مجاور الكبير انما انت زيي عينك عليها
جابر / انا عيني مش عليها انا مش لاقى اللى احسن منى يشيلها عنى
نجاه / يا جامد انت يا خطر ياللى مفيش اجمد منه
جابر يضحك و يبص الناحيه التانيه
نجاه/ مش هتقولى بقي انت قاعد كدا ليه
جابر / مستنيكي تصحى
نجاه / يا جدع قول كلام غير ده دا الباب فى الباب كنت فضلت فى اوضتك و سبت الباب مفتوح عادى يعني
جابر / ما تبقيش سخيفه بقي
نجاه / ماشي هخليني انا الكبيره ... انا جعانه قوم بينا نشوف حاجه ناكلها و لا نشوف هنطلب حاجه و لا هنعمل ايه اليوم انضرب خالص و هيسحب فى ديله يومين تلاته لحد ما اظبط نومتى تانى
جابر / انا مش مبسوط يا نجاه مش مرتاح و الواد ده موجود
نجاه / يونس برده ... عمل حاجه جديده
جابر/ و الله مجرد ريحته بتقفل صدرى
نجاه / ما افتكرش انى شميتله ريحه وحشه بالعكس بيهتم بنفسه و شكله جدا و علاطول مسرح
جابر / ما تتلمى يا اختى جرا ايه فى ايه
نجاه / فى ايه يا جابر انا برد على كلامك
جابر / ما ترديش ... ايه الهم ده
جابر يبص الناحيه التانيه
نجاه / طب هو عمل حاجه طيب
جابر يبصلها و يهز راسه لا فى صمت
نجاه / هو وجوده وسطينا غريب احنا متعودين على بعض و هو غريب برده بس
جابر / ما بسش ما بسش كلمه الحق ظهرت ما بسش هو لا مننا و لا من توبنا و لو على ابوه اللى طالعين بيه السما عشانه عمره ما خطى السرايا و لا يعرف لون عتبتها حتى اشمعن ده حاشرينه وسطينا اوى كدا
نجاه/ عشان محتاجينه
جابر / ما شوفنالوش اى اماره لحد دلوقت يعني بالعكس عارف كل حاجه و مدكن قال ايه عشان لازم نقع فى افخاخه و ربنا ما فى فخ غيره و بكره تقولى جابر قال دا واد سهن بعيون زرقه انا عارفه
نجاه تضحك فى طلوع مختار وراه جوزيف
مختار / ما تضحكونا معاكوا ... ايه القاعده الحلوه دى يا جابر
نجاه و جابر يقفوا
جوزيف / لا دا العادى هم بس بيفتكروا ربنا لما بيكلمونى انا ... انا هسبقك على فوق 
جوزيف يطلع و يسيبهم
مختار / مبسوطين دلوقت جبتوا لنفسكوا الكلام و ارتاحتوا ... سبتوا ايه للعيال الصغيره
نجاه / لقيته مضايق قعدت معاه
مختار / يتفلق يا اختى ... و انت
جابر/ خلاص يا خالى خلاص تمام وصلت مش محتاجه تزود
مختار / و لا ان زودت لا هى الاولى و لا هتبقي الاخيره ربنا يرحمنا جميعا الواحد زمان ما كانش يتسجرى بس يرفع عينه فى عين بنت عمه كنا بنشوفهم على السلم نتخشب فى جنب عينا فى الارض لحد ما يعدوا انما يوم عن يوم بتتجراو و عنيكوا بتوسع ... عارفين الصح من الغلط و الحلال من الحرام و مع كدا برده سايبين روحكوا و مسحوبين كدا ما لكوش وقفه
نجاه / احنا ما كناش بنعمل حاجه و لا بنتكلم فى حاجه و الموقف ده غصب عنى بيحصل مع الكل اعمل ايه و كلام يونس اللى حصل رد على موقف حضرتك ما تعرفوش
مختار / دخوله اوضتك عشان يهزر و جابر اتكلم معاه و زعقله و بعدين جابر كلامه معاكى فى اوضتك و يونس شافكوا فردها احنا بنبقي فى فرشتنا و اخباركوا بتوصلنا عادى احنا مش سايبنكوا هنا لوحدكوا
نجاه / يعني حضرتك فاهم الموقف احنا ...
جابر / مين حكالك انا ما حكيتش حاجه و الموقف ما كانش معانا
مختار / المكان غرقان كاميرات و كل صغيره و كبيره بتتسجل ان ما كانتش  عادى تبقي حرارى بس عارفين مين دخل اوضه مين و عمل ايه و لما بتحصل حاجه ما نفهمهاش بنتصل نسأل
نجاه / و ما دام جابر ما حكاش و ما حدش كلمنى
مختار / هو حكى لما بنساله بيجاوب عادى على فكره ما بيخبيش
جابر / و انا يعني اللى بخبى و لا المفروض ان كل ما موقف يحصل معايا اتصل اعيط ليكوا يعني
نجاه / جابر
جابر /ايه !! ايه !! انتوا بتحابوله كدا ليه ... على فكره بقي ده مش رشيد و مش معنى انك كنت بتحب ابوه انك لازم تحبه
مختار / مش هحبه اكتر منكوا حتى لو كان رشيد نفسه انا كلامى معاكوا مش محابيه لحد قد ما هو خوف عليكوا ... هى ما بتحبكش او على الاقل مش الحب اللى انت ...
نجاه / ايه اللى وصل الكلام لهنا اصلا
مختار / عشان هو بيحبك و قعاده معاكى و ضحكه على ضحكك و غيرته عليكي كل ده بسبب انه بيحبك و عاوز يتجوزك و انتى رفضاه بس برده هو مش هيهدى و لا يسكت و لا ينسي
نجاه / مع احترامي لحضرتك انت دخلت الدنيا فى بعض و بوظتها و الموضوع ما كانش محتاج كل ده و لا يستاهل كل ده و حتى لو كنت عمى و بحبك و بحترمك انا مش مسمحاك ... عن اذنكوا
نجاه تمشي ترجع اوضتها و هى متعصبه و ترزع الباب وراها جوزيف ينزل من فوق يسند على الحيطه و يبصلهم جابر يبصله
جابر / عن اذنكوا
جابر ينزل تحت
مختار / تعال وريني كنت عاوز توريني ايه على السطح
جوزيف / انت اذكى من كدا ... دا انت حتى لسه قايلها الفيلا مردومه كاميرات
جوزيف يعدى مختار و ينزل مختار يبتسم و يبص على باب اوضه نجاه و يتنهد
.........................
فى الشركه
وفاء / انا خلصت السيستم المضروب اللى انت طلبته اكسيست الكاميرات و سبت ديد بوينتس علمتلك عليها دا غير الحوارى الضيقه مسحتها خالص من السيستم يعني ما اعتقدش بقي هتلاقي حاجه احسن من كدا
دياب / تسلم ايدك هبص عليه بعدين
وفاء / هو مش ده اللي انت كافى نفسك عليه طول الوقت انا و الرجاله خلصناه اهوه فى ايه تانى
دياب / منصور
وفاء / لا قول كلام تانى بقي انتوا كلكوا أكدتوا ان الفيديو مضروب و انا بنفسي اتاكدت و شاهين رجع و اعتزر و كل الكلام ده فين المشكله بقي
دياب / ان منصور برده مش مصدق ان الفيديو مضروب بيقول مفيش دخان من غير نار
وفاء / ماشي انا مش هقول لا شاهين ليه مواقف غريبه بس ... اعتقد حتى لو كان حقيقي الفيديو ده عدى عليه سنين يا دياب و كان صغير يعني ... دا فرضا لو كان حقيقي فعلا... انا مش عارفه اقولك ايه بصراحه
دياب / ما تقوليش
وفاء / سكت ... اقولك حاجه
دياب يبصلها و يضحك
وفاء/ ايه بقي ... طب و الله فكره كويسه مش وحشه اسمعها انت بس
دياب /  و انتى عمرك جيه من وراكى فكره وحشه اشجيني قولى
وفاء / خلى منصور ياخد ياسمينا و يسافروا كام يوم يغيروا جو فى اى حته و يبعدوا عن جو السرايا و البلد و الحوارات اللى عايشين فيها دى
دياب / شايفه ان ده وقت مناسب
وفاء / جدا معلش يعني ايه حاليا منصور يقدر يعمله ما نقدرش احنا نعمله بداله ايه يعنى مش هنشيل الراجل كام يوم
دياب / نشيله ما نشيلوش ليه
وفاء / كلمه انت بس و صدقنى ما هيصدقك
دياب يهز راسه و يبصلها
دياب / و انتى ما نفسكيش انتى راخره فى كام يوم
وفاء / اقسم بالله نفسي ... بس يعني مش مستعجله الله يعينك برده حملك تقيل
دياب / طب تصدقى انا كدا كدا كنت عاوز اروح لهمام اسكندريه ايه رايك تيجي معايا منها شغل و منها فسحه
وفاء / موافقه طبعا هو ايه اللى ايه رايك ... دا انا شنطه هدومى جاهزه كمان
دياب يضحك
دياب / للدرجادى !!
وفاء / بالله عليك يا شيخ مش صبرت كتير اوى
دياب / دا انتى خللتى و الله يا بنتى ... خلاص جهزى نفسك بجد و انا هعمل كام مكالمه و نسافر النهرده على طول
وفاء / النهرده النهرده !! بجد يا دياب !! يا فرج الله ... حيث كدا بقي اظبطلى بقي اذن فى الكام ساعه اللى هزوغهم دول
دياب يضحك تبوسه من خده و تمشي دياب يضحك  
دياب / الكاميرات يا بت
وفاء / مش هتغلب يا خويا سلام
وفاء تمشي و دياب لسه بيضحك يفتح اللاب و يشتغل و كل شويه يضحك
دياب / و الله كنت مستلمها عاقله مش عارف ايه اللى جرالها ... بس و الله عسل
........................
فى عربيه مختار على النيل
مختار / انا بحب البحر اوى اى مايه نيل بحر بحب اقف ابص على المايه كدا
صمت و نجاه مش بتبصله مختار يبصلها
مختار / كبرت و خرفت خلاص انا
نجاه تبصله باستغراب
مختار / ما عدتش عارف بقول ايه و لا لمين ... الكل زعلان منى
نجاه / ليه بتقول كدا
مختار يتنهد و يبص قدامه
مختار / جيلنا غير جيلكوا حياتنا كانت اسهل انا عارف صحيح عندكوا تكنولوجيا ما عشناهاش بس حياتنا كانت ابسط زى ما حياه اهلى كانت ابسط من حياتى الله يرحمه ناصر كان راسي و عاقل و الكلمه ما تطلعش الا بحساب يحكم بين بلد الكل يطلع متراضي الصح صح و الغلط غلط ... هو الصح صح و الغلط غلط يا نجاه؟
نجاه / ما عدتش عارفه
مختار / و لا انا
مختار و نجاه يتنهدوا
نجاه / على فكره انا مش زعلانه من حضرتك انت غالى اوى عليا حضرتك فى مقام ابويا تمام دا انت اللى مربينى انا بس عزت عليا نفسي ... الكل بيلومنى انا على كل حاجه ... على النفس ... انا عارفه اقسم بالله عارفه بس مش عارفه انفذ ... طب اقولك حاجه
مختار/ قولى
نجاه / بنفس المبدا مش قاعدتى مع حضرتك فى العربيه دلوقت دى تعتبر خلوه برده
مختار يضحك
نجاه / طب اعمل ايه اتعامل ازاى و لا احبس نفسي و لا اروح فين و اجى منين انا تعبت و اتخنقت ما انا مش همشي بمحرم فى جيبي طول الوقت احنا عايشين فى بيت واحد و بنتقابل و بنتكلم و بنضحك و نهزر مواقف و بنتحط فيها مفيش وراها اى حاجه و لا بتبقى مرتبينها حتى 
مختار يتنهد
مختار / معاكى حق
نجاه / يعني انا مش بجرى وراهم و لا اتمحك فيهم و لا هم الطرق بتجمعنا و بنتكلم كلمتين مع حفظ المسافات و بتنفض و كل واحد بيروح لحال سبيله انا مش عارفه انا بغلط فى ايه انا بسمع كلام يسم البدن و الأسوء منه انى خايفه يكون صح و انى بعصى ربنا انا مش ببقي قصدى اعمل حاجه حرام و لا استجرى اعملها بكيفي اقسم بالله و ربنا شاهد عليا انا بقالى فتره طويله اوى تايهه
مختار / بسبب يونس
نجاه / يونس بيفتح عيني على حاجات كتير ... يعني علاقتى بجابر مثلا ما هى طول عمرها كدا و بخصوص خطوبته ليا و رفضي ليه ؟ الحوار ده بقاله سنين و مفيش حاجه اتغيرت و لا عمركوا وجهتولى كلمه ايه اللى جد  .. اللى جد ان نفس المواقف او يمكن أقل منها من اللى كانت بتحصل مع جابر بتتكرر مع يونس صح مش كدا  انا عارفه ان يونس و جابر ناقر و نقير طول الوقت و فارس ظايط وسطيهم بس انا بحاول اللطف الدنيا يعني بجد بيستفزوه جامد و هو ساكت و ما بيردش مع انه يقدر
مختار / لا و هو مقصر ما شاء الله طب لعلمك بقي يونس بتاعك ده
نجاه / ما تقولش بتاعك
مختار / بتاعى انا يا ستى ما تاخديهاش على صدرك اوى كدا ... سي زفت ده ... هو اللى قالى عاوز يوريني حاجه على السطح و جابنى اشوفكوا يعني ما شاء الله عليه ما بيضيعش فرصه الموقف حصل فى مينت لقطه فى كاميره من الكاميرات بطريقته اللى ما حدش بيقدر عليه فيها دى شقلبنى و جابنى اشوفكوا لانه عارف انى مش هسكت و اكيد هدى لكل واحد فيكوا كلمتين فى جنابه ... و حصل... شوفتكوا و هزقتكوا
نجاه و مختار يبصوا لبعض
نجاه / و حضرتك عرفت منين
مختار  / قال يا روح عمك نزل و هو منشكح اوى و قالى انت اذكى من كدا دا الفيلا مردومه كاميرات و سابنى و مشي بعد ما لبسنى العمه ابن ابوه ... نتعامل مع الكائن ده ازاى... على فكره احنا الاتنين الوحيدين اللى عندنا امل ان ربنا يهديه و يكون فى صفنا فعلا الباقي كلهم مستنينه يغلط عشان يثبتولنا ان ديل الكلب عمره ما هيتعدل ... هيبقي شكلنا زباله اوى وقتها
نجاه / انا قلبي مصدقه و انا قلبي عمره ما
مختار  / ما ايه ؟ سكتى
نجاه/ افتكرت اميره ... او امايا اصل قلبي كان متعلق بيها اوى و طلعت حماره فى الاخر
مختار / تصدقيني لو قولتلك ان لسه قلبي متعلق بيها و بحاول الاقيلها اى عذر
نجاه / معقول !! بعد كل ده .. دا هى اللى
مختار / ما حدش فينا كبير على الغلط عندها كام سنه هى ملعوب فى دماغها زى ما اتلعب فى دماغه ... يونس ... بياخدوهم صغيرين و يشكلوهم على كيفهم ..  ما حدش عارف شافت ايه و لا عملوا فيها ايه ..  اذا كان الدكر ... ربنا يهدى الجميع
نجاه / يونس دايما فى وسط كلامه بيسأل فى نفس النقطه و انا مش بعرف ارد الرد الصح
مختار/ بيسأل عن ايه ؟
نجاه / ليه ربنا رحيم و مع كدا فى ناس بتتعذب منين ربنا بيحبنا و منين فى مجلس و معسكر و الحاجات اللى عاشها دى مش سهل تقنع شخص زيه بالروحانيات بتاعتنا دى لازم كلام هو يفهمه لانه بيحسب كل حاجه بعقله و انا مش اهل انى اجاوب على اسالته الكتير
مختار/ اولا كدا خدى بالك ان الطريق ده اتجاهين يعني تعملى حسابك ان و انتى بتحاولى تسحبيه و نيتك صافيه و قلبك ابيض كدا ممكن جدا انتى اللى تتسحبى و الشك يدخل قلبك و يزعزع عقيدتك انتى خصوصا انه ذكى جدا و مش سهل
نجاه / مستحيل انا
مختار/ دا اولا ... ثانيا بقي يونس مش بيحسب كل حاجه بعقله بالعكس هو بيحاول يتظاهر انه ماسك زمام أمور حياته كلها و انه مسستم نفسه و مرتب أوراقه و ثابت بس دا قدامنا انما الحقيقه بحس انه غلبان و تايهه بيحول يدور على ايجابات لمليون سؤال جواه
نجاه / بحس بكدا برده خصوصا ان كل ثوابته اتاثرت فجاه يعني كان عارف هو مين و فجاه طلع واحد تانى و ما بقاش عارف مين حبيبه من عدوه
مختار / لا هو كان عارف
نجاه/ كان عارف انه يونس !!
مختار / ايوه ... بدليل انك اول ما قولتى اسم رشيد و يونس اتلخبط لانه عارف الاسمين دول بس مش فاكر اسامى مين بحكم سنه الصغير اللى اتخطف فيه ... و عارف ان اللى بيعمله غلط و ان المجلس اشرار بس هو كان مستسهل يقف فى صف الطرف الاقوى عشان يضمن لنفسه الامان و الحمايه
نجاه / و احنا هنقدر نوفرهمله ؟
مختار / ما اعتقدش ... و ما اعتقدش انه مش عارف حاجه زى دى ... هو عارف و مدرك كويس اننا الطرف الأضعف و دا مخلى ابوكى شاكك انه يكون مستمر لسه فى خطته و أنه يجندك
نجاه/ و سابنى معاه عادى !!
مختار / جرا ايه يا بت دا انتى نجاه بنت عباده الزيني ... عيل زي ده هيقدر عليكى و بعدين احنا حواليكي يعنى عمرنا ما هنغفل عنك يعني
نجاه / تمام
مختار / بخصوص لسؤال يونس عن حكمه ربنا فى توزيع الأرزاق
نجاه تنتبه
مختار / اولا كدا حكمه ربنا دى حاجه ما يفهمهاش و لا يستوعبها غيره سبحانه و تعالى بس ربنا قال مثلا .. و هو الذى جعلكم خلائف الارض و رفع بعضكم فوق بعض درجات ليبلوكم فيما اتاكم ان ربك سريع العقاب و انه لغفور رحيم ... صدق الله العظيم
نجاه / ما هو بيسأل هنا اشمعن ده اخد ده و ده اخد ده على اساس ايه التوزيع دى ... ايوه انا فهمه ان كلو هيتجازى فى الاخر سواء الغنى استغل غناه ده فى الخير و طلع حق ربنا و ساعد الفقرا و لا استغله فى شر و قهر و ظلم للناس و هل حمد ربنا و لا استكبر ايوه انا فاهمه ده و هل الفقير حمد و رضا و سعى و لا استسهل طريق الحرام انا فاهمه ده و فاهمه ان كل الناس فى الاخر اتساوت فى الرزق واحد اخد فلوس واحد خد اولاد واحد اخد صحه واحد اخد كله و ما اخدش بركه انا فاهمه ان الرزق مش كلو حاجات ملموسة انا مستوعبه كل الكلام ده كويس بس هو السؤال دايما بيكون اشمعن التقسيمة دى فاهمنى
مختار / ما اللى ما يعرفش يقول عدس و على راى سيدنا عمر رضي الله عنه لما قال ... لو عرضت الاقدار على الإنسان لاختار القدر الذي اختاره الله له ... يعني ما يمكن الشخص اللى انت شايفه مرتاح ده تكون شيلته اتقل من شيلتك اللى تاعبه ضهرك دى بس هو راضي و حامد و مش مبين فهمانى ؟
نجاه / ايوه بيقول برده ما دام ربنا عارف مين هيدخل الجنه و مين هيدخل النار و يقدر يهدينا كلنا و قادر على كل شئ ليه ما هداناش كلنا و خلاص
مختار/ بصي هو السؤال ده اجتهادى بس اعتقد انه ورد فى عقولنا كلنا و كلنا جه علينا وقت و سألناه لروحنا و كل واحد وصل لاجابه تريحه ممكن تكون نفس الاجابه او ممكن تكون غيرها... فانا هجاوب من منظورى انا لأن زى ما قولتلك حكمه ربنا عقلنا الصغير ده ما يستوعبهاش احنا كائنات حقيره جدا و قدراتها محدوده مقارنه بمعجزات الكون الواسع ده
نجاه / فاهمه
مختار / الشيطان لما عصا ربنا و رفض انه يسجد لسيدنا ادم ربنا طرده من رحمته فالشيطان طلب من ربنا ياجل عذابه ليوم البعث عشان يغوى بنى ادم و ربنا اداله الاذن بده فمن هنا كان فى زى اتفاق ان ربنا هيصبر و هيشوف مين الشيطان هيقدر يغويه و مين هيطلب الهدايه من ربنا و يعمل صالحا و كدا يعني ... المهم ان ايوه ربنا عارف كل واحد فينا هيختار ايه فى الاخر و عارف مصيره بس القرارت اللى احنا هناخدها دى قراراتنا احنا و مع كدا ربنا غفور رحيم يعني سبحان الله الشيطان غلط غلطه واحده يتيمه ما فيهاش رجعه بس احنا بقي بنغلط و نتوب و نغلط و نتوب و ربنا بيرحمنا و يغفرلنا و نرجع نغلط و نتوب و نغلط و نتوب لا و مش بس كدا دا نعم العبد انه اواب سبحان الله
نجاه / بس يمكن ده لان الشيطان عمره ما استغفر بالعكس كابر و  عند و بدل ما يقول مثلا رحمتك يا رب انا غلطت و توبت لا قاله انظرنى و كابر و قاله انا هغويهم و ادخلهم النار هم كمان معايا
مختار / ممكن ... تعرفى ربنا وزع الأرزاق منا مسلمين و منا لا اه احنا نبان خدناها على طبق من دهب بس فى مننا حافظوا على النعمه و اطاعوا ربنا فعلا و مننا اللى ضيعوها و بقوا بطاقه بس عكسنا بقي الاجانب مثلا سبحان الله ما اخدوش الطبق اللى من دهب بتاعنا بس سعو و فكروا و تاملوا فى معجزات ربنا و سالوا و اتعلموا فربنا هداهم لأنهم عاوزين الهدايه لكن انا هعند و اقفل مخى خلاص دا قرارك اه ربنا عارف انت هتختار تسعى للهدايه و لا هتكابر بس القرار كان قرارك و بيديك فرص كتير جدا دا ربنا خلى التامل بس و السعى ده عباده هو يعنى سيدنا إبراهيم عليه السلام عرف ان ربنا موجود ازاى ... من التامل ... و وقتها ما كانتش موجوده معظم المعجزات اللى موجوده دلوقت يعني ربنا هداه اقلهم تتابع الشمس و القمر تخيلى بقي دلوقت احنا عارفين ان فى فضاء و مجرات و الاعجازات القرانيه الكتير جدا و تركيب الذره و الخليه و جسم الإنسان و الوظائف بتاعته اللى شغاله بقدره مستحيل تكون جت صدفه بس اللى عاوز يفهم بقي فهمتي
نجاه / فهمت
مختار/ هتعرفى تردى عليه لما يسألك تانى ؟
نجاه / انا عاوزه اروح اشترى حاجه ممكن تيجي معايا
مختار / دا احنا تحت امر الهانم هو احنا نطول نروح نعمل شوبينج مع القمر قوليلى بس القمر نفسه فى ايه و هوا اكون طاير اجيبهولك
نجاه تضحك و تغطى وشها
مختار / انا بصالحك اهو
نجاه / ماشي ... يلا بينا
مختار/ يلا
مختار يسوق و نجاه مبسوطه
.........................
فى جنينه الجوارحه
مغاورى واقف مع رجاله شاهين يروح يقف وسطيهم و هو محرج
مغاورى / تمام يا رجاله روحوا ارتاحوا انتوا دلوقت و نتقابل فى معادنا فى الفجرية
الرجاله تمشي
شاهين / انا عاوز اطلع مع الرجاله الطالعه دى يابا لو سمحت
مغاورى/ خليك انت النوبادى
شاهين / يابا كبرنى وسط الرجاله اشرفك
مغاورى / و الله نفسي بس خايف
شاهين يبص فى الارض و يهز راسه و يجي يمشي مغاورى يمنعه شاهين يبصله
مغاورى / جهز نفسك و اطلع ... بس وسط الرجاله
شاهين يتنهد و يهز راسه و يمشي
مغاورى / اعمل معاه ايه بس يا ربى اعمل ايه
عربيه منصور تدخل مغاورى يتعدل فى وقفته العربيه تركن و منصور ينزل منها
منصور / السلام عليكم يا خالى خير واقف لوحدك ليه كدا
مغاورى/ كنت مع الرجاله و لسه ماشيين ..  رتبت كل حاجه ؟
منصور / ايوه تممت على كل حاجه و باذن الله كل حاجه هتمشى زى ما خططنا بالظبط
مغاورى / خد اخوك معاك
منصور / ازاى دا انا لسه
مغاورى / شاهين اخوك الصغير شاهين ... خده معاك ... هيسمع كلامك و هيمشي على شورتك
منصور / تمام
مغاورى يبتسم و يطبطب على ضهر منصور
........................
فى فيلا نجاه
مختار يركن العربيه و ينزل منها و نجاه تنزل شايله شنطه هدايا كبيره و هى مبسوطه يدخلوا مفيش حد
نجاه / ايه الصمت المريب ده
مختار / العربيات بره هتلاقيهم هنا و لا هنا ... يا أهل الدار ... السلام عليكم... هم فين صحيح ايه الهدوء ده
نجاه / انا هروح اشوف يونس يمكن يكون فى اوضته
مختار/ هرنلهم على التليفون
نجاه تروح ناحيه اوضه جوزيف تخبط مفيش صوت تخبط تانى مفيش رد تبص يمين و شمال تعلق الكيس على الاوكره من بعيد من غير ما تلمسها و تشد الشنطه لتحت الباب يتفتح نجاه تضحك تزق الباب بطرف رجلها بالراحه مفيش حد تستغرب
نجاه / ايه ده
نجاه تسيب الشنطه مكانها و ترجع لمختار بيتكلم فى الفون
مختار / تمام مستنيكوا سلام
نجاه / يونس مش فى اوضته
مختار / بيقولوا خرج اخد موتوسيكل عمران و خرج بعدينا بشويه و قبل ما تسالي ما قالش رايح فين ... دلوقت يرجع
نجاه / تمام
جابر و الشباب يطلعوا من الجيم تحت
مختار/ عاش اجمد وحوش بس ايه هو الصوت ما بيوصلش تحت
جابر/ معلش نظام العزل فلوسه حلال
مختار / كنت عاوزك تعال
نجاه / انا هدخل اعملنا حاجه ناكلها حد عاوز ياكل حاجه معينه
فارس / و احنا المفروض نستناكى هتلاقى عندك جوه فراخ مشويه و سلطات سخنى و كلى
مختار / اعمليلى معاكى كبايه شاي تقيله يا نوجه ربنا يسترك
نجاه / عنيا يا عمى
نجاه تروح المطبخ
مختار / انت بتعاملها كدا ليه يا تحش انت دى اختك الكبيره و ليها حق عليك
فارس / الكبير كبير بأفعاله انما دلع الحريم ده ما يمشيش معايا
كارم / هو بس مبدأ ما قدرش على الحمار
فارس / يا جدع ما تسخنيش انت راخر بترجعوا تجيبوا الغلط عليا
كارم / على اساس انك تقدر عليه اساسا
فارس / شكله ملا دماغك انت كمان جرا ايه يا كارم مالك بتحاميله كدا ليه
مختار / ما اروح اركب الزحاليق انا بقي ما دام شايفيني صغير اوى كدا دا ان كنتوا شايفينى اساسا
كارم / و الله يا عمى احنا فى الهم ده من يوم ما جينا و كلمناه كذا مره و هو على يدك كدا
مختار يبص لجابر
جابر / للاسف حصل
مختار / و انت ايه رايك يا جابر ... انت شايف ان نجاه و يونس يعني ... او نجاه عموما بتتصرف غلط
جابر / الغلط على اللى بيبدأ بالغلط يا خالى نجاه متربيه و عارفه ربنا كويس و بتحط حدود للكل الدور و الباقي على اللى دايس الكل بالجزمه و لا همه
مختار / و انت يا عمران ايه رايك فى يونس
عمران / ما ليش راى
مختار/ ليه ما لكش مخ
عمران / ليا بس ... انا ... انا اصلا مش فاهم احنا هنا بنعمل ايه انا جاى عشان مرتبط بحاجات و كنت عايش هنا اساسا و بنزل البلد زيارات فانا عارف انا بعمل هنا ايه ... كلكوا بقي و لا مؤاخذه جايين هنا ليه ... تمرين ؟ .. هو فين
جابر/ نفس كلامى جرنا و سحبنا لحد هنا عشان يبقي قريب من حبايبه و يعرف يخلع كل شويه و يروحوا يتقابلوا و يكمل خطته و شغله و احنا كلنا متعطلين عن اشغالنا لا و كمان رابطنا و مكتفنا عنه و مشيلنا جميله كمان
فارس / العيب على اللى مدياله ريق حلو و مركباه علينا
مختار / العيب على اللى بيعيب فى لحمه بالباطل اتكلم عن اختك عدل بدل ما اعدلك
فارس / كفايا دلع فيها بقي يا عمى الحريم ما بتجيش بالطريقه دى
جابر / و عاوزها تيجي ازاى يا ابن عباده الزيني
فارس / ايوه أبن عباده مش احسن ما ابقي ابن حرام
مختار/ انت عاوز ايه ياض انت مش عامل احترام لحد و سايق العوج اقسم بالله لولا ان ورايا فيلم الليله لكنت علقتك على باب الفيلا لحد ما يبانلك صاحب اتعدل
فارس / يا عمى ما هو
مختار / ماهواش اطلع اتشطف و ارتاح ... عرفتهم هيعملوا ايه
عمران / و جاهزين
مختار / تمام ... تعال معايا يا جابر نراجع الدنيا هتمشي ازاى و نتمم على باقي الجماعه
جابر / كلو تمام و مترتب و باذن الله مش هقصر رقبتك يا خالى ... بس كان فى حاجه عاوز اكلم حضرتك فيها
مختار / تمام تعال
نجاه تدخل شايله الشاى
نجاه / اتفضل يا عمى ... ما اجيبلكش لقمه الاول انا سخنت خلاص
مختار / تسلمى يا ست البنات روحى كلى انتى و ارتاحى دلوقت و انا هخلص كام حاجه مع جابر و هبقي اجى اكمل كلام معاكى
نجاه / تمام .. حد هياكل معايا ؟
كارم / انا كلت بس هاجى افتح نفسك
نجاه / تعال
كارم و نجاه يروحوا المطبخ و جابر ياخد مختار فى جنب يفرجه على فيديو مختار يطفيه و يهز راسه
جابر / عارف يعنى
مختار / احنا مش هنعمل اللى انت هريتنا زن عليه اهدى بقي
جابر / تمام يا خالى عن اذنك هروح اشيك على كام حاجه كدا
مختار يهز راسه جابر يمشي
مختار / ايه يا ناصر قاعد فى ركن لوحدك ليه
فارس / معلش يا عمى اصله لسه واخد طريحه من اللى قلبك يحبها
ناصر / انت اللى غفلتنى
عمران / هيبقي يقولك المره الجايه الضربه جايه منين و يعدلك واحد اتنين تلاته
ناصر / يا عم خليه يفرح مره من نفسه الجيات اكتر
مختار / انا فى الجنينه
مختار يمشي و يسيبهم
ناصر / شكله مش مظبوط
فارس / و احنا ايه فى حياتنا مظبوط بس انا طالع استحمى
عمران / ياريت
فارس / ياض هتغابى عليك
عمران / انت فاكرنى ناصر و لا ايه
ناصر / الله انت هتحلو و لا ايه
عمران/ انا حلو من يومى
عمران يلعب لناصر حواجبه ناصر يقوم يجرى وراه عمران يطلع السلم يجرى و ناصر وراه و فارس يجرى وراهم و هم التلاته بيضحكوا
……………………