الكبيره ٢ بقلم / لولو_محمد

الحلقه ٩٢

((((((( الكبيره ٢)))))))
#لولو_محمد
الحلقه ٩٢
محمد / مهره اصلا مش سلفتك عمران و مهره مطلقين و هى ليها ظروفها و باذن الله تتحل و تروح لحالها فاى معامله مميزه بتاخدها دا لو بتاخدها فهى من باب الشفقه مش اكتر و لو عاوزه تعرفى مكانتك عندها شوفى الفرق بين معاملتها ليكي و بين معاملتها لنور اهى دى سلفتك اللى بجد
رحمه / انا مالى بيهم انا مش بقارن نفسي بحد
محمد / يارب انا تعبت
رحمه / خلاص يا محمد خلاص لو سمحت اقفل الموضوع ده
محمد / لا مش هقفله و لازم افهم انتى ايه مشكلتك بالظبط
رحمه / مفيش مشكله
محمد / لا فى
رحمه / قولت ما فيش هو انت هتعمل مشكله بالعافيه
الباب يخبط محمد و رحمه يبصوا لبعض و محمد يروح يفتح الباب يلاقي هند
محمد / ازيك يا ماما خير
هند/ ممكن ادخل؟
رحمه تجرى تفتح الباب
رحمه / طبعا يا ماما اتفضلى طبعا حضرتك بتستاذنى ازاى بس
هند / تسلمى … انتى زعلانه منى يا رحمه
..........................
رحمه / ابدا ايه الكلام ده بس دا حضرتك اللى مربيانى
هند / انا عارفه انى ما قولتلكيش على حوار الجبل بس انا كنت فاكره انك مش بتحبى الجو ده و الله مش قصدى اتجاهلك و لا حاجه
رحمه / عارفه و الله و فعلا انا ما بحبش الجبل و الصحرا و الجو ده و بعدين انا اصلا ما كنتش فاضيه حضرتك على يدك انا طول اليوم بجرى ورا العيال و من هنا لهنا
هند / على العموم يا قلبي لو حصل اى سوء تفاهم فى اى وقت انتى عارفه انتى بالنسبالى ايه صح
رحمه / طبعا اكيد
هند تحضن رحمه و تمشي و محمد يقفل الباب
رحمه / عاجبك كدا انا عمرى ما هتكلم معاك فى اى حاجه ابدا
محمد / نعم !!! يعني بقيت انا الكخه فى الاخر … اقولك حاجه انتى صح ما تتكلميش معايا تانى ... حلو كدا
رحمه / حلو
محمد / حلو ؟! طب ما دام حلو بقي انا مش قاعد لك فيها خالص
محمد يمشي و يرزع الباب وراه و ينزل السلم و هو بيبرطم و جابر و شاكر طالعين
محمد / على الجواز و على الحريم و على الجنان و على الهرمونات و على كل كليله
شاكر / مالك يا محمد انت بتكلم نفسك
محمد / خليك فى حالك يا عم خليك فى حالك
محمد ينزل
جابر / سيبه سيبه دلوقت يهدى و يرجع من نفسه انت مش عارفه يعني
شاكر / عارفه و عشان كدا مستغربه
جابر / البيوت ياما بيحصل فيها اديله خمس دقايق و هتلاقيه راجع
محمد يطلع جابر و شاكر يبصوله باستغراب و ماسكين نفسهم يضحكوا
محمد / بص ما تزعلش انا كنت متعصب
جابر / و هديت دلوقت
محمد / ان شاء الله ... تصبحوا على خير
محمد يعدى و يروح اوضته
جابر / شوفت بقي الجواز حلو ازاى اتخانقوا و ما استحملش يبعد عنها دقيقه
شاكر/ عقبالك
جابر /  ربنا يهديها طلعت روحى
شاكر يضحك
جابر / طب انا عارف العطله منين انت بقي ايه كل الحريم اللى فى الدنيا دى مفيش واحده قدرت تلفت انتباهك مره
شاكر / يا عم هى الدنيا كلها واقفه على جوازى لما يجى النصيب هتجوز اهدوا انتوا بس عنى 
جابر / هدينا ربنا يصلح لك الحال
نجاه تدخل و تطلع السلم جابر يشوفها يستغرب
جابر / خير كنتى فين
نجاه / كنت فين ايه فى الجنينه عادى يعني انتوا واقفين على السلم كدا ليه ؟
شاكر / مش واقف طالع انام تصبحوا على خير
جابر / و انت من اهله
نجاه / ما جيتش ليه الجبل كنت فكراك هتيجي
جابر / سمعت ان يونس جه
نجاه / اه جه و مش عارفه ليه حسيته مش مظبوط ... هو فى حاجه حصلت ؟
جابر / ما اعرفش ... ما سالتيهوش ليه ؟
نجاه / و اسأله ليه انا مالى اكيد لو فى حاجه عاوز يقولها هيقولها ما بحبش اتطفل على حد
جابر / خير ما عملتى ... اطلعى انتى ارتاحى و ما تفكريش فى حاجه و هو اكيد لو عاوز يقولك حاجه هيقول
نجاه / انت كمان مش مظبوط
جابر / ازاى يعني ؟!
نجاه / انا حفظاك ... انت فيك حاجه ؟
جابر يبتسم
نجاه / انت فى حاجه مضيقاك صح ؟!
جابر / ينفع اشوفك و اضايق برده
نجاه / لا يا شيخ .. اقولك حاجه اتفلق
نجاه تطلع جرى و جابر بيضحك و بيتابعها
.....................
فى شقه جوزيف
جوزيف بياخد علاج تليفونه يرن يرد
جوزيف / السلام عليكم .. فرحنى
شحته / داخلين على البلد
جوزيف / تمام روح على اللوكيشن اللى عندك دايركت هتلاقيني مستنيك
شحته / حصل
جوزيف يقفل و يتصل
جوزيف / السلام عليكم ... صحيتك
مختار / و عليكم السلام خير
جوزيف / الامانه فى الطريق تحب تستلمها بنفسك و لا يسيبها فى المخزن لحد ما ربنا يفرجها
صمت
جوزيف/ تمام هروح انا استلم و لما تقرر ابقي تعال
مختار / هى هتستحمل المواجهه دى ؟
جوزيف / اكيد هتبقي صعبه عليها بس هترتاح بعدين و هتقدر تعيش
مختار/ انت دايما باصص على الحاجه من بعيد اوى
جوزيف / مش وحش دا كتير بيخليك تشوف الصوره كامله
مختار / بس التفاصيل دايما مهمه و بتفرق
جوزيف / كل شئ جايز
مختار / تمام اسبقنى و انا هجيبها و احصلك
............................
فى اوضه محمد
محمد نايم و واخد رحمه فى حضنه و الاتنين صاحيين
محمد / ما انا ما كانش ينفع اعرف ان فى حاجه ضايقتك و اسكت و بعدين
رحمه / خلاص يا محمد انسي بقي و غير الموضوع انا مش مضايقه خلاص
محمد / انا بحبك يا رحمه و زعلك بيضايقني
رحمه / و انا كمان و الله يا محمد بحبك ... دا انت اللى ليا فى الدنيا ... هو حوار تافه و كبر و كان ممكن يتعالج بطريقه احسن من دى
محمد / ادينا بنتعلم ما احنا صغيرين برده اكيد هنغلط عادى و نتعلم امال عايشين ليه
رحمه / ربنا يديك الصحه و طوله العمر
محمد يبوس راسها و يبص فى الموبايل
محمد / انا هتنفخ بكره فى الشغل
رحمه / ما انت اللى مش عاوز تنام
محمد / مش جايلى نوم اعمل ايه
رحمه / طب ما ينفعش تاخد بكره اجازه
محمد / و الله على حسب المزاج العام حوالينا فهيقفشوا بس لو كلمتى انتى ابويا
رحمه / لا يا خويا المره اللى فاتت قالى ما تكرريهاش
محمد / ما كل مره بيقولك كدا و بيوافق انتى عارفه كويس انه ما بيقدرش يرفض لك طلب
رحمه / و ربنا ابوك دا ما فى أطيب منه
محمد / و انا قولت انه شرير هو بس شديد شويه
رحمه / يا اخى اتقى الله دا مدلعك اخر دلع
محمد / صح حصل
رحمه / انا بتكلم جد
محمد / يا بنتى ابوس ايدك خليني ساكت
رحمه / حتى لو بيشد عليك ... عشان شايفك راجل و تقدر تستحمل .. على العموم هقوله ... بس تاخدنى تفسحنى و تجبلي حاجه حلوه
محمد / بس كدا دا انتى تؤمري امر كدا 
رحمه / ها هتنام و لا انزل اعملك رغيفين حواوشي تفطر بيهم قبل الفجر
محمد / يا بت ارحمي كرشي ابويا بينفخنى
رحمه تضحك
محمد / هو على قد ما العرض مغرى بس خليكي جنبى دلوقت اشبع منك حبه و بعدين نبقي نشوف حكايه الاكل دى بعدين
رحمه / خليني هو انا هلاقي احلى من كدا ... بقولك يا محمد كنت عاوزه أسألك عن حاجه شغلانى 
محمد / خير
رحمه / هى مهره مالها
محمد / و الله ما اعرف بس شكلها واجهت اهلها و ما صدقوهاش فجالها صدمه عصبيه او حاجه فى الرنج ده
رحمه / كله جايز ... هى هتفضل هنا على طول ؟
محمد / ما اعرفش و مش فارق معايا بصراحه اصلها فى الاول و الاخر بت غلبانه لا بتهش و لا بتنش خليها لحد ما ربنا يفرجها
رحمه / بس هى مش كدا السنه هتروح عليها
محمد / تعوضها ما احنا ياما عوضنا جرا ايه يعني
رحمه / على رأيك ... ربنا يشفيها ... تفتكر لما تخف هتمشي و لا هتفضل قاعده معانا هنا برده
محمد / انتى شاغله نفسك بيها ليه
رحمه / فضول ... بتكلم معاك و خلاص
محمد / اكبرى يا رحمه و ما تشغليش دماغك بالتفاهات دى
رحمه / لا يا حبيبي مش هكبر عاوز تكبر اكبر لوحدك
رحمه تدلع فى حضنه و هو بيضحك
محمد / يمين بالله ما باين لها نوم
رحمه تبصله 
محمد / يبقي نستغل وقتنا فى حاجه مفيده
رحمه تضحك
......................
فى اوضه شاكر
شاكر عمال يتقلب فى السرير يتنهد و يقوم يلبس و ينزل يروح ناحيه العربيه يلاقي مختار واقف بيتكلم مع عباده يستغرب
شاكر/ خير فى حاجه حصلت و لا ايه
مختار / خير انت على فين السعادى
شاكر / مفيش ما جاليش نوم شكل جتتى خدت على نومه الجبل
مختار/ امك هتزعل كدا
شاكر / صحيت بدرى و روحت شغلى و هاجى بالليل اتعشا معاكوا هتعديها
مختار/ اعمل اللى يريحك
عباده / بص هو كلنا بنحب الجبل بس انت حبك للجبل زياده الجبل مفيهوش ميزه دا حياته خشنه و صعبه ايه اللى عاجبك فيه
شاكر / و الله قاعده الرجاله ما يتشبع منها
عباده / و احنا مش رجاله و لا ايه ما تقعد معانا يا جدع
شاكر / على راسي و الله هو فى زيكوا برده
مختار / سيبه مكان ما يرتاح
شاكر / تسلم يابا ... عن اذنكوا
شاكر يركب عربيته و يمشي
عباده / هو ايه حكايته الواد ده
مختار/ زعلان منى
عباده / و دا كلام ده فى حد يزعل من ابوه
مختار / تقلتها معاه حبتين .. خليه على راحته
عباده / و ما دام انت عارف انك غلطان
مختار / انا ما غلطتش انا لازم اشد عليهم امال اسيبهم يبوظوا ايه هستنى اما تخرب و اقعد على تلها و اقول يا ريتني يزعل شويه مفيهاش حاجه بكره يكبر و يفهم انى بعمل كل حاجه عشان خاطرهم انا ما بحبش قدهم
عباده/ ربنا يهديهم ما حدش هيعدل عليك فى تربيه عيالك بس برده عيالك بقوا رجاله و مش هتمشيهم على كيفك
مختار/ و انا كنت غصبته على حاجه ما هو رايح الجبل اهو مع انى نبهته ان امه هتزعل قال ايه ؟؟ هيكدب عليها و سكت و سبته يدورها زى ما يدورها المهم ما يغلطش
عباده / ما حدش ما بيغلطش احنا بشر ... ما علينا ... نرجع لموضوعنا ... انا خايف على البت
مختار / اقسم بالله من ساعه ما كلمنى و انا النومه طارت من عيني بتخيل فى كل السيناريوهات
عباده / بس لو ظبطت ... هيكسب بونط ابن ال ...
مختار / لا و هو البونط دى فارقه معاه اوى بصراحه الواد جامد و اللى ينكر يبقي ما بيشوفش دا اجمد من ابوه
عباده/ مش اجمد مننا
مختار / مش هجادلك انت ليك عذرك بس هو تاب و اتغير ما تخليش شيطانك يعميك
عباده / لو بنتك لو نجاه بنتك
مختار / بنتى هى بنتى
عباده / تجازف بيها يا مختار ما يمكن بيكدب ما يمكن بيمثل بيكمل اللى كان ناوى يعمله بس بدل ما كان غصب و هيرميهالنا احنا نتاويها و نغسل عارنا و نبوظ له خطته يبقي بمباركتنا نصحى الصبح نلاقيه اختفى بالواد و لا يمكن الأسوء كمان ربنا وحده اللى يعلم
مختار / انت بقيت برانويا
عباده / تضمنه يعني تضمنه انه اتغير بجد و ان كل ده مش خطه
مختار/ انت اساسا مسبق الأحداث سيب الايام تثبتلك انه كويس
عباده / الايام ما بتعملش حاجه غير انها بتجمعهم و تقربهم من بعض هو انا تلميذ مش فاهم
مختار يبص لعباده باستغراب
مختار/ هو كلمك فى حاجه ... او هى يعني
عباده / لا ... بس فى حاجات بتتحس العيون بتفضح... هيرمى روحه فى النار ليه و يخلي جابر يهربها
مختار / كان ممكن يهربها هو و يخلى جابر يماطل بداله و كان جابر هيقبل
عباده / بس ساعتها هو ما كانش رجع لجابر
مختار / و يمكن جابر نفسه ما كانش هيقدر عليهم زى ما يونس قدر و كان مات جوه و حتى لو يونس رجع كان لا قدر الله لقاه جثه الاحتمالات مفتوحه إلى المالانهايه ما تفكرش فيها سبها تمشي زى ما هى متقدره و مكتوبه
عباده / دى نجاه يا مختار
مختار / هتبقي احن عليها من اللى خلقها ... مش هتشوف الا اللى فى نصيبها و بعدين بنتك مش صغيره مش هتقدر تمنعها تحبه لو هو نصيبها
عباده / ما لناش حكم على القلوب صح بس عندى تعيش عانس طول عمرها و لا اشمش خلفتها و لا انها تتجوز الملحد ده و تشيل منه
مختار / مسلم
عباده يبص الناحيه التانيه
مختار / استغفر ... يونس مسلم و بيصلى الفرض بوقته و بيدرس دينه كويس و بيطبقه و بيسأل فى كل صغيره و كبيره و عامل مجهود انت ما لكش انك تكفره يا عباده استغفر
عباده / استغفر الله العظيم ... انت فاهم قصدى ... بس ربنا وحده اللى عارف ان كان بجد و لا تمثيل ايه ما شوفناش قد ما شوفنا يعني و لا ايه... ما اقدرش اجازف ببنتى الوحيده
مختار يبص الناحيه التانيه و يهز راسه
عباده/ انا تعبت
مختار / انت اللى تاعب نفسك
عباده يبص له و يبتسم بسخريه و يسكت
مختار / سيبها على الله هو الوحيد اللى قادر يحل كل اللعبكه دى
عباده / ما كله على الله بس لما هقف قدامه هقوله ايه كنت متواكل عليك
مختار / كنت متوكل عليك
عباده/ انت ما بتتعبش صح ما بتزهقش انت عمرك ما هتتغير ابدا
مختار / انت عاوز ايه يا عباده
عباده / عاوز الجدع ده يبعد عن بنتى
مختار / لا حول و لا قوه الا بالله
عباده / يمين بالله يا مختار
مختار / ما تحلفش عليا ما تحلفش مش هيحصل غير اللى نجاه عوزاه فوفر كل الهرى ده و ما تسبقش بالكلام و تفضل تعيد و تزيد و تحرق جاز انت مش بتقول تعبت ما تريح و تستريح يا ابنى دا انت مرار طافح بصحيح
عباده يبص لمختار و يفكر ثوانى
عباده / مش هيحصل الا اللى انا عاوزه ..  ما خلفتهاش و كبرتها عشان فى الاخر تكسرني مش هيحصل
مختار / معاك حق انت اللى خلفتها و انت اللى كبرتها و انت الوحيد اللى من حقه يكسرها انا هطلع اصحيهم خلينا نخلص
مختار يمشي عباده يرد عليه بصوت عالى
عباده / انا بحميها مش بكسرها
مختار / انت صح ... انت دايما صح
مختار يدخل السرايا و عباده متابعه بنظره حزن و خوف
........................
فى مخزن
دياب و شحته و رجاله واقفين و قدامهم شاب مربوط و بيعيط
دياب / هو ده بقي
شحته / هو
دياب / يعني دكتور و شكلك محترم و طلعت ابن ناس ... كان ناقصك ايه بجد ناقصك ايه عشان تعمل القرف ده ... ما تتجوز يا اخى و تعف نفسك
جوزيف يدخل
جوزيف / من امن العقاب اساء الادب اشتغل فى مكان موبوء و شاف الموضوع بيتكرر قدام عينه و مفيش حساب اول ما الفرصه جت تحت رجله داس
دياب / عامل ايه دلوقت
جوزيف / الحمد لله بخير
شحته / سلامتك ... ايه اللى حصل
جوزيف / شويه شقاوه قديمه بس ما تخافش على اخوك عمر الشقي بقي و انا مفيش فى شقاوتى
دياب / ما تعتمدش على حظك اوى
جوزيف / حظ !! مين جاب سيره الحظ
شحته / طب انت كدا تؤمرني باى حاجه تانى و لا اتكل انا على الله
دياب / حاف كدا ؟!
شحته / لا يا باشا ما تقلقش الحساب واصل و بزياده دا كفايا اننا نخدم الباشا بتاعنا
جوزيف / شحته ده اصله ابن بلد و يعجبك
دياب/ لا ما هو عاجبنى من زمان
شحته / حبيبي
.................  
فى جنينه الجوارحه
شاهين بيتكلم فى التليفون
شاهين / و لا كانى سمعت حاجه
امايا/ يبقي هتفضل طول عمرك على الرف احشر مناخيرك و اجبرهم يعرفوك حتى اللى مخبينه على ابوك
شاهين/ ما تبقيش غبيه انا ايه اللى هيوديني هناك و عرفت منين ما اكيد حد قالى
امايا / مش هتغلب انا بعت لك اللوكيشن و انت تتشقلب و تروح تطب عليهم
شاهين / و انا ايه اللى هيوديني هناك اصلا
امايا / هفكر لك فى كل حاجه حاضر ...اتصل بدياب و شوفه فين و قوله انك محتاج تتكلم معاه ضرورى و اخترع اى سبب
شاهين/ و لو قالى انه جايلى
امايا / زن لحد ما تعرف كان فين السعادى و هو مش هيغلب معاك
شاهين / دياب !! انتى يا بنتى حد مسلطك عليا
امايا / اخلص يا شاهين و لا تحب اتصل بابوك و اصحيه و اديله المعلومه على الجاهز و اخليه هو اللى يطب على دياب و يعرف انه بيتصرف من وراه و اسحب البوينت دى من تحت رجليك
شاهين / انا عندى تعملى كدا اهون
امايا / و انت هتبقي كسبت ايه يا حمار ما تفوق لنفسك بقي
شاهين / بقولك ايه انت لا عاوز ابقي الكبير و لا يفرق معايا انتى عارفه انى عاوز حاجه واحده بس و بصراحه فى الموضوع ده ما شوفتش منك اماره يعنى
امايا / امال الميكروروبتس اللى بتصورهالك و تكيف نفسك بيها كل ليله دى تقول عليها ايه ... ااااه انت الفرجه ما عادتش بتكفيك انت عاوز اكتر ... عاوزنى اقتل منصور
شاهين / انتى و زوقك
امايا / بسيطه ... اقنعه ينزل معاك النفق
شاهين / حبيبك قال للكبير ما ننزلش
امايا / حبيبي مش عاوز ينام مع مرات ابن عمته... انت خدت من وقتى كتير... سلام
.............
فى المخزن
مهره واقفه قدام الشاب المربوط بتعيط جوزيف يديها مسدس مختار يشده من ايدها و يبص له
مختار/ انت بتعمل ايه ؟
جوزيف / بنجز
مختار / ممكن تروح تقعد ترتاح بعيد بعد اذنك
نجاه / امال احنا جاين ليه ... دى هتك عرض و عقوبتها الإعدام
مختار / و هى قد انها تنفذ الحكم بنفسها
نجاه / مهره هتعملى ايه
مهره بتبص له و بتعيط فى صمت
نجاه / مهره
مهره تبص لكل اللى حواليها باصين ليها دياب و جوزيف و نجاه و مختار و عباده و ترجع تبص للشاب جوزيف يسحب مسدس و يضرب طلقه فى دماغ الشاب يقتله الكل ينتبه نجاه تاخد مهره فى حضنها
مختار / انا جبت جاز منك انت ايه ما بتهداش
جوزيف / انا بنجز بس
مختار / مهره ... انتى كويسه يا بنتى
مهره قاعده فى الارض فى حضن نجاه بتعيط
نجاه / اللى عمل فيكي كدا خد جزائه خلاص اللى عمل فيكي كدا عمره ما هيقدر يعمل كدا فى اى حد تانى
نجاه تبص لكل اللى حواليها و تسند مهره و يطلعوا بره
عباده / تمام ... مفيش اى تقدم حصل الحمد لله على كل حال على الله بقي منظر الراجل و هو بيتقتل قدام عنيها ما يعملهاش تروما فوق التروما اللى عندها اصلا
جوزيف / كل شئ وراد ... خلصنا الحمد لله نروح نلحق اول صف عشان نصلى الفجر جماعه ... و لا هنفضل واقفين نبص لبعض كدا كتير
مختار / خف
جوزيف / حاضر
مختار / هروحهم انا ... عن اذنكوا
عباده / انا جاى معاك
مختار و عباده يمشوا
دياب / انت عملت الصح
جوزيف / شكرا ... اخيرا حد بيفهم فى العيله دى
دياب يسيب جوزيف و يمشي
......................
فى الكليه عند عمران
عمران رايح ناحيه الموتوسيكل بتاعه يلاقى ايلين سانده عليه
عمران / بعد اذنك
ايلين / انت عارف انا مين
عمران/ عارف ... بعد اذنك توسعى عشان امشي
ايلين / مش قبل ما تصلح القرف اللى انت عملته ... و لا كنت فاكر انى مش هقدر اوصل لك
عمران يتعدل و يتنهد
عمران/ اممم اولا صوتك ما يعلاش ثانيا انا مفيش بيني و بينك اى تعامل تمام فوسعى كدا بالزوق بعد اذنك
ايلين / و ان ما وسعتش
عمران / هسيبك تولعى بيه و همشي و هبعت حد ياخده و خليكي بقي كدا واقفه لو ده هيريحك
ايلين / انت هتيجي معايا بالزوق تشرح للؤى خطيبي كل حاجه انت فاهم و لا اقسم بالله افضحك فى كل حته انت و الحيوانه بتاعتك انت لو فاكرنى هسكت على الكلام اللى طلعته عليا تبقي غلطان انا اقدر انسفك انت فاهم و لا لا
عمران / امممم لا مش فاهم حقيقي مش فاهم ... كلام ايه اللى طلعته عليكى و انا اول مره اشوفك اصلا
ايلين / حلو اوى اثبت بقي على الكلمتين دول و قولهم لخطيبي و يا ريت زى ما لفيت على الدكاتره و قولت لهم انك متجوزنى عرفى تلف تانى تصلح اللى عملته بدل اقسم بالله
عمران / ما تهددينيش انا ما عملتش حاجه و لا قولت لحد حاجه و لا عندى اى فكره عن الكلام ده من اساسه
ايلين/ مفيش فايده يعني الزوق مش جايب نتيجه
عمران / و لا العافيه هتجيب معايا برده لانى ما عملتش اصلا حاجه و لا ليا اى علاقه بيكي من أصله
ايلين / حلو اوى كل المطلوب منك تقول الجملتين دول لكل الناس و اولهم خطيبي لو سمحت
عمران / حاضر عن اذنك بقي
ايلين / هو ايه اللى حاضر انت بتنيمنى و لا ايه
عمران / يا ستى هروح له و اقابله و اقوله كل حاجه عاوزه اى حاجه تانى
ايلين / دلوقت
عمران / لا دلوقت مش قادر هروح انام و ارتاح
ايلين / ترتاح ايه و زفت ايه هى سمعه الناس لعبه
عمران / بالظبط بالظبط سبحان الله بالظبط سمعه الناس مش لعبه و شرفهم مش لعبه و نفسيتهم مش لعبه و الحقيقه انا مش عارف انتى عملتى ايه فى حياتك يخليكي تشيلى وساخه اخوكى و ابوكى ... بس عشان ابرى زمتى من ناحيتك هروح لخطيبك و احكيله كل حاجه بس و انا بحكيله انى ما ليش علاقه بيكي هحكيله اخوكى و ابوكى عملوا ايه فى اختك اتفقنا
ايلين / ااااه و الله كنت عارفه ان كلبه الشوارع دى هى اللى ورا القرف دا كله يا ريت تقولها
عمران / اللى بتقولى عليها كلبه دى انضف منك و من عيلتك كلها و يا ريت تبعدى عن طريقي عشان انا ليا وش تانى وحش اوى و لحد دلوقت مراعى انك حرمه
ايلين / حرمه !!!
عمران يزقها بايده بالراحه تقاوم ينشف عليها تبعد يركب و يمشي و هى واقفه بتفرك
.......................
فى اوضه مروان
مروان بيحضر شنطته على يدخل
على / صحيح اللى سمعته ده ؟
مروان يرتبك و يحاول يلم نفسه
مروان / سمعت ايه حضرتك
على / انت مسافر بالى تصور الفيديو كليب اللى مضيت عليه غصب عن ارادتى
مروان / لا هو الموضوع مش كدا بس هى كانت فرصه و هم قالوا هيتكفلوا بكل المصاريف فقولت اجرب يعني فلحت فلحت ما فلحتش ما خسرتش حاجه دة فرصه العمر ... بابا اوعدك أن دى اخر مره لو ما فلحتش هنسي حوار الغنا و الشهره ده خالص و ابقي تحت امرك و مكان ما هتحطنى هشتغل بس الفرصه دى بس دا باب اتفتح لى من السما من غير اى مجهود و باذن الله أنجح و اكسر الدنيا و اثبت لك انى كنت مظلوم فى كل الحاجات الوحشه اللى حصلت منى زمان عشان خاطرى مش هقدر اسافر و انت زعلان منى
على / و انت بقي عندك كام سنه عشان تبقي لسه فاكر ان السما بتحدف فرص من غير مقابل
مروان / هخسر ايه قولى بس هخسر ايه
على / يا ابنى هى الحاجات دى بتحصل كدا فجاه مش الاول بيبقي فى مراحل بتروح تصور على طول مفيش كلمات اللحان بروفات تسجيل
مروان / يا بابا كل الحاجات دى احنا مخلصينها زمان المرادى بس هننفذ
على / صحيح ... صاحبك ظهر تانى
مروان / صاحبى مين
على / رامى... مش كان اهله قالبين عليه الدنيا ... كلمونى و قالولى انه رجع
مروان / بجد !! فرحتنى جدا انا لازم اروح ازوره و اطمن عليه و اعرف كان مستخبى فين الفتره دى كلها
على / يا ريت ... يمكن لما يشوفك يهدى و يتكلم ... راجع عنده انهيار عصبي و قاطع الكلام و اى حد بيحاول يلمسه بيصرخ و يخبط راسه فى الحيط لحد ما يقع و يغم عليه
مروان يبلع ريقه
مروان / ازاى يعني!! ايه الكلام ده
على / انت تعرف حاجه عن الموضوع ده يا مروان
مروان / اعرف ايه بس يا بابا انا ما كلمتوش من زمان يعني ... ما اعرفش حاجه
على / تمام ... هى اختك روحت ؟
مروان / ما اعرفش
على / هكلمها اطمن عليها
على يجي يمشي
مروان/ حضرتك زعلان منى ؟
على يبص لمروان و يهز راسه لا مروان يبتسم بسعاده و حماس
...................
فى اوضه نجاه
نجاه واقفه فى البلكونه بتتكلم فى التليفون
نجاه / و هتروح له فعلا
عمران/ اه طبعا هروح له بس فعلا هقوله القصه من طقطق لسلام عليكم
نجاه / مش مرتاحه للموضوع
عمران / كبرى دماغك ... اخبار مهره ايه
نجاه / قاعده بتقرا قرآن و تعيط
عمران / طب ما تفتحى فيديو كول
نجاه / خير ؟!
عمران / هتكلم معاها
نجاه / بلاش يا عمران ... اكيد هتضايق عشان اختها هى مش زيهم
عمران / لا لا لا انا هتكلم فى حاجه تانيه خالص يا ستي كلميها و لو رفضت تمام انا معاكى على الخط اهو
نجاه / تمام
نجاه تروح ناحيه مهره
نجاه / عمران عاوز يتكلم معاكى فيديو كول ايه رايك
مهره تهز راسها نجاه تفتح الفيديو كول
عمران/ ازيك
مهره تبتسم
عمران يوريها كرنيه
عمران / كنت مروح تعبان فدخلت من تخريمه كدا قال يعني بختصر السكه و توهت لقيت نفسي قدام المركز ده قولت يمكن ربنا بعتني هنا لسبب و دخلت و شوفت ناس كتير من كل الأعمار بيتعلموا لغه الإشاره و سجلت
نجاه تشد التليفون
نجاه / لغه اشاره ايه يا ابنى ارحمنى بكره تتكلم و تبقي زى الفل انت يائس كدا ليه
عمران / و لا يائس و لا حاجه احنا هنخسر حاجه ادينا بنتعلم حاجه مفيده و بكره لما ربنا يشفيها بالسلامه و تتكلم نبقي نشوف هنعمل ايه
نجاه / بس انت يا ذكى مش ناسي حاجه ؟
عمران / ايه ؟
........................