الكبيره ٢ بقلم / لولو_محمد

الحلقه ٩١

(((((((( الكبيره ٢)))))))))
#لولو_محمد
الحلقه ٩١
جوزيف / مش هتستفيد حاجه من الحوار ده
جابر / مش فارقه
جوزيف / امال بتعمله ليه ؟
جابر / فارق معاك فى حاجه؟!
جوزيف / بالعكس كل ما كان شكلك وحش كل ما كان شكلى قدامها حلو
جوزيف يبتسم باستفزاز
جابر / راجل لراجل كدا انت ايه اخرك يعني ناوى على ايه عاوز ايه
جوزيف / حرفيا ... مش عاوز حاجه و لا ناوى على اى حاجه
جابر / مش مصدقك
جوزيف / و لو حلفت لك برده مش هتصدقنى بس دى الحقيقه كل حاجه فى ثانيه اتلخبطت و ما اعتقدش انى هقدر ارتب ورقي بسرعه فسايبها على الله زى ما بتقولوا
جابر / و ايه علاقه نجاه بالكلام ده
جوزيف / ايه ده !! انت كنت بتسأل عن نجاه من الأول؟
جابر يهز راسه
جوزيف/ من راجل لراجل ؟!
جابر يبص الناحيه التانيه و يرجع يبص له و يهز راسه بابتسامه مصطنعه
جوزيف / عجبانى
...........................
الابتسامه تروح من وش جابر و يظهر غضب مكتوم
جوزيف / داخله دماغى و دى حاجه عمرها ما حصلت يمكن على مدار حياتى البنت الوحيده اللى فرقت معايا كانت امايا ... الوحيده اللى حياتها كانت اهم من حياتى ... و حاليا نجاه ... احساسين مختلفين تماما عن بعض و الاتنين عمرى ما حسيت زيهم
جابر / و ناوى على ايه باحساسك الجميل اوى ده
جوزيف / و لا حاجه ... ملتزم بحدودى و الأختيار فى الاول و الاخر ليها هى
جابر / ايه اكتر لون نجاه بتحبه
جوزيف / غوامق غالبا الكحلى
جابر / ايه اكتر اكله نجاه بتحبها
جوزيف / محشي ؟!
جابر / البنفسجي بدرجاته خصوصا الموف الفاتح ... و بتاكل كل الاكل بس اللى ما بتقدرش تقوله لا الباميه البايته
جوزيف / بنعيش و نتعلم
جابر يهز راسه و يمشي جوزيف يطلع الموبايل و يكتب رقم و يتصل
نجاه / السلام عليكم
جوزيف / انا يونس كنت عاوز أسألك فى حاجه
نجاه / طب رد السلام الأول
جوزيف / و عليكم ... الاول ايه اكتر اكله بتحبيها
نجاه / بحب كل الاكل ليه ؟
جوزيف / اكتر اكله اكله ما تقدريش تقولى لا ليها
نجاه / هو فى ايه
جوزيف / ما تجاوبي و خلاص ايه العيله المتعبه دى
نجاه / عادى يعني بحب ال ... كل حاجه و الله باكل حاجه
جوزيف / طب محشي و لا باميه
نجاه تضحك
جوزيف/ بتكلم جد بتحبى مين اكتر
نجاه / لو قدامى الاتنين هاكل من الاتنين انت غريب جدا
جوزيف / طب لو الباميه بايته
نجاه / دى العشق دى ... بحبها اوى ... هو الحوار ده اخره ايه مش فاهمه
جوزيف / محشي و لا باميه بايته
نجاه / باميه بايته طبعا هى ما تتاكلش الا بايته اساسا
جوزيف / اكتر لون بتحبيه ايه
نجاه / الموف ليه ؟
جوزيف / امال مش بتلبسيه خالص ليه
نجاه / مين قالك معظم بيجاماتى موف على فكره او درجات البنفسجي عموما بس بحب الغوامق بره البيت عشان تلم و مش ملفته
جوزيف / تمام
نجاه / انت فين ؟
جوزيف / فى شقه فى مكان ما فى البلد
نجاه / صوتك كويس يعني ... أتحسنت الحمد لله ... احنا فى الجبل لو قادر تعال
جوزيف / جاى ... سلام
نجاه / سلام
جوزيف يقفل و يتنهد
جوزيف / بنعيش و نتعلم عادى يعني ... هو سي جابر بيشوف بيجاماتها ؟!!! تمام تمام
جوزيف يدخل الاوضه يغير هدومه
...................
فى الجبل
مهره و نجاه و محمد طايرين بالخيل مهره تسبق و الهوا يخبط وشها تفتح ايديها و تطير مع الفرسه تفتكر تمرينها و بطولاتها و تشجيع الداده بتاعتها ليها تفتكر احلامها و حياتها الدموع تنزل من عنيها و الفرسه بتجرى ايديها تنزل و توقف الفرسه و تنزل من عليها و تقعد فى الارض محمد و نجاه يحصلوها و ينزلوا
نجاه / ايوه بقي طيرى يا عصفوره طيرى بالمومبيلا
محمد / هو فى حاجه و لا ايه !!
نجاه / مهره انتى بتعيطي
نجاه تروح تحضن مهره منهاره من العياط
نجاه / و الله حرام عليكي نفسك يا مهره حرام عليكي نفسك دا انا قولت الخيل هو اللى هيقدر يخرجك من اللى انتى فيه و يفرحك يقوم يعمل فيكي كدا !!
محمد / لتكون وقعت و لا حاجه
نجاه / وقعت امتى دا احنا وراها من ساعتها لولاش بس فرستها عفيه شويه
محمد يقعد فى الارض تحت ضل واحده من الفرسات
محمد / دلوقت فرستها عفيه ما كانتش ملك ستهم يعني
نجاه / الفارس ليه دور كبير برده و لا ايه يا مهره
مهره بتعيط فى صمت نجاه تمسح وشها و تبص لمحمد و تهز راسها لا و تتنهد
نجاه / ما هو لو العياط هيخفف وجعك كنت قولت عيطى و كنت عيطت معاكى بس اكيد ربنا حطك فى الابتلاء الشديد ده لسبب اكيد انتى برده قده و اكيد العياط و الحزن طول الوقت هيسوء حالتك و صوتك اللى وحشنى ده ممكن ما نسمعوش تانى خالص
محمد / سبيها يا نجاه و اسكتى شويه
نجاه تبص لمحمد و تمسح دموع مهره
نجاه / حقك راجع من كل اللى اذوكى ... و الله ليرجع اضعاف ... تمام عيطى و فكى عن نفسك
تليفون محمد يرن
محمد / دى رحمه هقوم اشوفها عاوزه ايه
محمد يروح بعيد شويه و عينه عليهم
محمد / قلبي السلام عليكم
رحمه / هو انت روحت معاهم الجبل صحيح ؟
محمد / يعني بامن المكان و اشوف لو محتاجين حاجه ... انتى ما جيتيش ليه صحيح
رحمه / ما حدش قالى اجى ... و كنت فكراك هتيجي تاكل لحد ما ماما بطه قالت لى انك مش جاى و اكل انا و ما اجوعش نفسي على الفاضي ... انت ليه ما قولتليش
محمد / حقك عليا و الله اصلهم قالولى هات الخيل روحت لقيت الفرسه نجمه بتولد فاتلخمنا بس الحمد لله يعنى
صمت
محمد / تحبى تيجي اكلم حد يجيبك ؟
رحمه / لو كانوا عاوزيني كانوا قالولى اجى انا مش مستخبيه يعني
محمد / اكيد الموضوع مش كدا و لعلمك يعني الجو هنا فعلا مش لطيف
رحمه / مش فارقه يا محمد انا بس كنت بتاكد انك مش جاى عشان اكل
محمد / كلى و انا هجيب لك حاجه حلوه و انا جاى
رحمه / مش عاوزه حاجه ... عن اذنك ... سلام
محمد يتنهد و يحط الموبايل فى جيبه
محمد / نرجع الخيمه يا مهره
نجاه تبص لمحمد يروح يقف جنب الفرسه بتاعته و باين عليه انه مضايق
نجاه / مهره حبيبتي
مهره تقوم و تمسح دموعها و تمسك السرج و تسحب الفرس و تمشي و نجاه و محمد يعملوا زيها
………………………
فى الخيمه
جوزيف يدخل الكل يستغرب مختار يقوم يسلم عليه
مختار / انت جيت ازاى لوحدك و انت تعبان كدا تعال اقعد
جوزيف / السلام عليكم
عباده / و عليكم السلام خير انت مش المفروض تعبان
جوزيف / خفيت لما شوفت حضرتك
عباده / طب كويس ما دام مش تعبان بيتهيألي تقف زى الرجاله
جوزيف / ما حضرتك قاعد يعني و لا 
مختار / يقصد فى الحراسه الرجاله اللى بتحرس بره
جوزيف / و المفروض افهمها لوحدى يعني
مختار / تعال انا عاوزك
مختار ياخد جوزيف و يمشوا
عباده / جوزك هينقطنى
هند / ما تدخلنيش بينكوا
خديجه / بس انت ما كنتش تقصد كلام مختار انت كنت بترمى من تحت لتحت هو انا هتوه عنك
عباده يبص لها و يبص الناحيه التانيه
خديجه / انا بقول كفايا كدا و نروح
هند / لو قمنا دلوقت هيتقال عشان هو جه
عباده / ما عشان هو جه ما احنا كنا زى القشطه على المربى لحد ما هو شرف
خديجه / مش كانت سمنه على عسل باين ههههه انت جعان و لا ايه اطلع لك ساندوتش
عباده / طلعى اهى اى حاجه الواحد يعض فيها و يطلع فيها غله بدل ما هيقوم يرتكب جنايه دلوقت
خديجه تفتح شنطه و تطلع منها سندوتشات
…………………………
فى جنب
صابر / يا عم بص لنفسك قال جاى تقولى انا ارتاح
جوزيف / انا غلطان يا عم دا انتوا بلد خساره فيها الكلمه الحلوه
شاكر / بس انت فعلا باين عليك التعب جدا و جرحك لسه طازه عنه كتير
جوزيف / وأخد مسكن قوى و بعدين اللى زيي لو ارتاح يموت دى حاجه انا مش واخد عليها
مختار / حاسس بيك
جوزيف / اشك ... ما علينا ... هى نجاه فين
صابر و شاكر يبصوا لبعض
مختار / بتسأل عنها ليه خير
جوزيف / كنت اصلا جاى اسالها عن حاجه و هروح عشان مش قادر و الجو هنا قفيل و ما يشجعش
مختار / ما كنت سألت اى حد فينا فى التليفون و وفرت على نفسك المشوار ... عموما خير اسال عاوز تعرف ايه ؟
جوزيف يبص لشاكر و صابر متابعينه
جوزيف / بعدين بعدين
صابر / هروح ابص على الرجاله
شاكر / جاى معاك
صابر و شاكر يمشوا
مختار/ اتوزعوا اتكلم
جوزيف / هو جابر بيشوف نجاه بلبس البيت
مختار / حدد المقصود بلبس البيت فى لبس بيت كتير الحريم بيتحركوا بيه فى السرايا عبايات استقبال ملونه و اسدالات و عبايات بيتي اشكال و اللوان اكيد مش طول الوقت لابسين لبس خروج يعني
جوزيف / اقصد بجامات
مختار / اكيد لا طبعا ايه اللى بتقوله ده الحاجات دى ما بينطلعش بيها بره اوضهم اصلا الا لو تحت اسدال
جوزيف / طب فسر لى كدا ازاى هو عارف اللوانهم
مختار / لانه بيكون معاها و هى بتشتريهم مثلا ؟! او يكون هو اللى جايبهم ليها هدايا مثلا هو عشان عارف لون البجامه يبقي شافها لبساها جابر متربي مع نجاه فى بيت واحد و ملازمها طول الوقت يعني طبيعي جدا يبقي عارف معلومه زى دى
جوزيف / متاكد ؟
مختار / هو ايه اللى متاكد !! يا ابنى مستحيل و لا جابر و لا غيره و لا انا شخصيا ان ما كانش ابوها او اخوها اللى غالبا هم نفسهم ما شافوش حاجه زى دى غير صدفه او كل فين و فين مفيش دكر فى السرايا كلها عنده احتمال واحد فى المليون يكون شاف حاجه زى دى
جوزيف / انا قولت كدا برده
مختار / قولت ايه بقي ؟
جوزيف/ ما قولتش ما تاخدش فى بالك
مختار يتنهد
مختار / حضرتك قومت من السرير و ضربت المشوار ده عشان تسأل سؤال زى ده !!! ليه اصلا ؟؟ ليه ؟؟ فارق معاك فى ايه ؟؟
جوزيف / مش فارق انا بس مش عاوز الشيطان يدخل بينا ... حاجه زى كدا
مختار / انا عاوز اقولك حاجه كابن و الله و ربنا يعلم انت بالنسبالى ايه انت فرصتك وسطينا احسن بكتير كل ما بعدت عن نجاه و شلتها من دماغك و كل ما بعدت عنها اكتر قربت مننا احنا اكتر
جوزيف / انا عاوز اقولك حاجه كصديق و ربنا يعلم برده انت بالنسبالى ايه ... انا وسطكوا و بساعدكوا بس عشانها
مختار / ياض ما تبقاش مستفز ياله حريمنا خط أحمر
جوزيف / و انا عملت ايه
مختار / ما دى المصيبه انت اصلا مش فاهم و لا حاسس باللى بتعمله و مهما حاولنا نديك أعذار و نقول غريب خواجه اى بدع اى نيله كل اللى بيدافع عنك بيتحط عليه برده لان مفيش هنا الكلام ده
جوزيف / اللى هو ايه بقي ايه الكلام ده اللى عامل ليكوا حوار و تاعبكوا كلكوا اوى كدا غير نفسيه جابر بيه
مختار / جابر بره الموضوع ده خالص احنا ما عندناش تعامل بين الحريم و الرجاله
جوزيف / نجاه كان ليها انتيم كدا فى الكليه تعرف اسمه
مختار / ما اسموش انتيم اسمه زميل
جوزيف / اسمه مصطفى ... منعتوه يتعامل معاها ؟
مختار / كان فى تحفظات و حدود للتعامل و اكيد كان فى سبب للتعامل اصلا انت بقي ايه وضعك
جوزيف / ايوه انا نفسي اعرف انا ايه وضعى
مختار / انت عاوز ايه يا يونس
جوزيف يفكر و يبص حواليه و مش بيرد مختار يتنهد
مختار/ انا عاوز اكون صريح معاك... انا مصدقك... هم لا ... انا ممكن اطلع غلطان عادى انت نفسك طلبت مننا ما نثقش فيك
جوزيف / حصل
مختار / طيب
جوزيف / هو ايه اللى طيب
مختار / خليهم يثقوا فيك خليهم يطمنوا انك فعلا صادق انك يونس مش جوزيف خليهم
جوزيف / و ليه انا اللى اخليهم
مختار/ لأنك أنت اللى اذيتهم
جوزيف / و كنت اقدر اكمل و كنت اقدر اعمل اكتر و لسه اقدر و ما كملتش و ما عملتش عاوزين ايه اكتر من كدا
مختار/ يعني صبرت خمس سنين عشان تخطف البت و مش قادر تصبر سنه على الاقل الناس تقرب منك و تعرفك على حقيقتك
جوزيف / انا صبرت على ما خفت انا كان اقدر اخطفها قبل كدا بكتير
مختار / بس قدرت تصبر اصبر
جوزيف / هو ده الكلام اللى بتقوله لجابر تسكته بيه و تصبره على الهبل اللى هو فيه
مختار / و انت مالك و مال جابر انت حاجه و هو حاجه
جوزيف / لا وضح معلش عشان الجمله دى بالذات ليها الف معنى
مختار / لا وضح انت تقصد ايه بكلامك عن جابر بالظبط عشان مش كل سكك الكلام هتودى لنهاية حلوه
جوزيف / بالظبط كدا نبقي فاهمين بعض ... قبل كدا كنت صريح معاك و قولت لك فى مشاعر جوايا و انها وحشانى دلوقت برده صريح معاك و بقولك انها بقت اكتر من مجرد مشاعر
مختار / و عشان كدا بالظبط مفيش اختلاط عشان الهبل ده
جوزيف / ما هواش هبل انا مش صغير انا شوفت بنات نجاه بالنسبالهم غفر انا واحد لف الدنيا و شاف حاجات انت فى عمرك كله ما شوفتهاش و لا هتشوفها تفتكر مش هقدر أميز انا بحس بايه ناحيه كل واحده بشوفها
مختار باصص له و ساكت
جوزيف/ جابر بيقول ان لازم عباده يوافق
مختار / انت اتكلمت مع جابر فى الكلام ده !!
جوزيف / و مستعد اتكلم مع عباده
مختار / اوعى ... يونس صدقنى موقفك دلوقت مش كويس اصبر احسن
جوزيف / ماشي اصبر ... بس اصبر و انا عارف ان لصبري اخر اصبر و انا عارف انك ما بتشتغلنيش عشان تستغلنى و فى الاخر
مختار / اولا الموضوع ده مش فى ايدي كنت نفعت جابر
جوزيف / و دى نقطه تانيه بعد ما اصبر هيزعلوا جابر و يختارونى
مختار / الحاجات دى نصيب و القرار الاول ليها هى بشرط موافقه عباده لازم الاتنين يوافقوا يا يونس نجاه مش موافقه على جابر فكلنا راينا فى الزباله
جوزيف / ما تسالها يمكن توافق عليا
مختار / مش دلوقت
جوزيف / ليه
مختار / لان فعلا لازم عباده يوافق دا جواز مش لعبه ... مش انت برده بتتكلم فى جواز و لا
جوزيف / هو انا اهبل ما اكيد جواز انا صريح معاك لأقصى حد
مختار / ما انت برده كنت صريح زمان و قولت ان خطتك من الاول انك تخلف منها و دى اول جمله هتتقال لما تتكلم مع اى حد فى الموضوع ده الكل هيرفض لأنهم خايفين منك عشان كدا قولت لك اقفل على السيره دى و ما تفتحهاش غير لما وضعك و نظرتهم ليك تتغير
جوزيف / و دا مش هيحصل عمرهم ما هيقبلونى
مختار / دوام الحال من المحال ما حدش فينا معصوم و كلنا عملنا بلاوي
جوزيف / ما فيهمش ربع اللى عملته
مختار / و لا عشره حتى احنا جنبك تلامذه بس القاعده واحده اصبر ... كان مين يصدق اصلا انك تقف و تتكلم معايا فى الكلام ده و اسمعك من الاصل و اهو حصل اصبر
جوزيف ساكت
مختار/ اوعدنى انك مش هتفتح الموضوع ده مع اى حد تانى و لو جابر اتكلم قول انك كنت بتستفزه كالعاده
جوزيف / اكدب ؟
مختار / دا مش كدب دا عشان ما تقومش حرب ... بس انت بجح اوى رايح تقول لجابر الكلام ده ... و هو سكت لك كدا عادى ... اقسم بالله الواد ده جبل
جوزيف / مش قليل مش هنكر
مختار / لا و غلاوه ابوك عندى دا كتير و كتير اوى كمان دا ربايه ايدي و يعجبك دا احنا اللى ملجمينه
جوزيف يبتسم بسخريه
مختار / انا بحب جابر و بحبك ... بس بحب نجاه اكتر و اى كان اللى هى هتختاره انا هقف معاه بس توعدني دلوقت انك هتنسي الحكايه دى خالص ... مؤقتا
جوزيف / اوعدك انى مش هتكلم فيها ... مؤقتا ... و مش هنساها
مختار يبتسم
جوزيف / انا عاوز اقول لك حاجه بعيد عن اى حاجه
مختار / قول سامعك
جوزيف / من يوم ما وعيت على الدنيا و اى حد كويس بيتعامل معايا او بيحتك بيا بيتاذى و غالبا بيموت
مختار / تقصد انى هموت ؟! طب ما انا كدا كدا ميت ... بس وقتها انت عمرك ما هتنسانى ... و هو الانسان ايه غير سيره طيبه الناس تترحم عليها كل ما تفتكره
جوزيف يبتسم نجاه ترجع هى و مهره و محمد و يدخلوا الخيمه
…………………….
فى الخيمه
محمد يوشوش هند
محمد / يعني ما قولتولهاش خالص !! طب ليه ياما
هند / هى اشتكت لك ؟! زعلت يعني ؟!
محمد / و انتى مش عارفه رحمه يعني لا هتشتكى و لا تتكلم طبعا انا اللى بسأل عادى اصلى استغربت لما جيت و ما لقيتهاش
هند / هو فى حاجه يا محمد ؟!
محمد / مفيش حاجه يا أمى انا كنت بسأل بس
هند / طب انا لما هروح هقعد اتكلم معاها بس احنا طالعين عشان نفسيه مهره و الله قولت يمكن البت وسط الخيل تنطق و لا ... و اديك شوفت بعينك راجعه عامله ازاى
محمد / هو انا مش فاهم حاجه و مش من حقى اسأل بس ... مفيش حاجه تمام تمام
هند / بالله عليك يا محمد انا يعني هعمل حاجه قصدى بيها اضايق رحمه ... دى فى غلاوتك و يمكن اكتر و ربنا يهديها و يهدى سرها على طول كدا نسمه بس صدقنى انا المرادى كنت بفكر فى مهره بس
محمد / تمام ما قولتش حاجه
هند / و بعدين امتى اصلا رحمه كان ليها فى الجبل و الخيل و الكلام ده ما هى طول الوقت قاعده مع بطه هتسيبها دلوقت و تيجي لمجرد ان مهره جايه
محمد/ يا امى رحمه ما اتكلمتش انا اللى بسأل ليه ما جاتش
هند / نسيت اقولها و بعدين احنا فيها كلمها لو عاوزه تيجي ادينا قاعدين ... مع ان شكلنا هنمشي البت ما فصلتش عياط من ساعه ما رجعت متاكد ان مفيش اى حاجه حصلت
محمد/ اقسم بالله ابدا هو زى ما قولت لحضرتك كدا
هند / على العموم انا برده لما هروح هقعد معاها و اراضيها
محمد / تمام عن اذنك اروح اقف مع الرجاله
هند تهز راسها محمد يقوم
..................
فى الناحيه التانيه من الخيمه
خديجه / قلبي بيتقطع عليها اوى يا عباده صغيره و ما عملتش اى حاجه تستاهل عليها تعيش كل ده
عباده / مفيش حد يستاهل يعيش اللى هى عاشته بس اللى راح مش قليل
خديجه / و هى دموع الدنيا كلها تعوض اللى راح ... بس هيفيد بايه بس
عباده / اهى على الاقل بتفك عن روحها ... مختار اصلا كان مستغرب هدوئها من ساعه ما رجعت من المستشفي اهى لما تطلع اللى جواها ترتاح ... حتى لو شويه
خديجه / طب مفيش اى حاجه نقدر نعلمها
عباده / و الله ما اعرف انا قولت للرجاله يعملوا يافطه على الاسطبل مدرسه مهره للفروسيه للأطفال بس هتعلمهم ازاى و هى ما بتنطقش بس
خديجه / هتنطق ان شاء الله هى بس محتاجه وقت و انتوا الحمد لله لقيتوا الدكتور و هتبداو على طول بأذن الله
عباده / قومى قومى اتكلمى معاها و طبطبى عليها و خديها فى حضنك و انا هطلع ابص على الرجاله خصوصا اللى ما يتسمى
خديجه / هو ايه اللى جابه ده صحيح هو مش عيان
عباده / و دا بنخلص منه أبدا
عباده يقوم خديجه تتنهد و تقوم تروح تاخد مهره من حضن نجاه تحضنها و تطبطب عليها مهره تمسح دموعها اللى بتنزل غيرها
خديجه / عارفه عمك عباده قالى ايه دلوقت ... قالى الرجاله بيعلقوا يافطه مدرسه مهره لتعليم الخيل للعيال الصغيره ... و عمك عبد الله كمان شاف لك دكتور ابن حلال شاطر هيبدأ معاكى العلاج عشان صوتك الحلو ده يرجع يرن من تانى ... و كل حاجه بتهون يا بنتى المهم انك بخير
مهره تنهار من العياط خديجه تبص لنجاه هند تدخل
هند / وسعى وسعى كدا ... انا بس عاوزه أسألك سؤال واحد ... اللى بتعمليه فى نفسك ده هيفيدك بحاجه يا بنتى ارضي بقضاء ربنا و اصبري و احتسبى اقسم بالله هيفاجئك برحمته و عوضه
مهره تبص لهند
هند / يا بنتى انا لما اتجوزت عمك كنت هموت على ضفر عيل و حملت و سقطت مرتين و فى المرتين كنت هموت اقسم بالله و هنا بتكلم حرفيا كنت هموت هموت و لحقوني فى اخر لحظه عشان بس ليا عمر اعيش و اجيب الاربع شحوطه دول فى قفا بعض ... لا و عمك قال ايه كان عاوز بنت قولتله روح اتجوز
مهره تبتسم بحزن
هند / انا متاكده ان ربنا شايل ليكي حاجه حلوه اوى ما تتخيليهاش و بكره تقولى هند قالت
مهره تهز راسها
نجاه / انتى عارفه انتى ايه اللى ممكن يفرق معاكى بجد ... يا ستى بطه يا البت ياسو ... ترقعنا اتنين نيولوك يجيبوا أجلنا
خديجه / الملافظ يا حيوانه
هند / و الله ان كانت دى تعبانه و ان كانت دى تعبانه بس انا اقدر
خديجه / ابوس رجلك ارحمى العيال كفايا شعرى و اللون الغريب اللى بليتيني بيه
هند / يا قلبك الأسود يا شيخه انتى هتفضلى تعايريني لامتى دا انتى اللى يعملك حاجه يستاهل بعد كدا ... على فكره بقي الصبغه هى اللى كانت وحشه
خديجه / امال
هند / خديجه بقولك ايه ... و لا على ايه لينا بيت
نجاه / بحب مناغشتكوا اوى
................
فى مضيفه الجوارحه
شاهين / انا جهزت كل حاجه فى المخزن القبلى واقى رصاص من احسن الأنواع و سلاح و نظارات ليليه و ايربودز مش محتاج بس غير كام درون يستكشفوا قبلينا
منصور / انت برده مصمم
شاهين / يا ابنى انا متاكد ان فى مصيبه تحت
منصور / بس يونس قال بلاش
شاهين / امال هيقول ايه يعني و من امتى بناخد كلام يونس جد ما كلنا عارفين انه منهم
منصور / الدرون موجود سهله ايه تانى
شاهين / هى الكلاب اللى فى الشيلتر عند شاكر ما فيهاش كلاب مدربه
منصور / انت بتفكر فى ايه ما الدرون هيقوم بالواجب
شاهين / اهو بفكر معاك بصوت عالى
منصور / مش عارف اسالهولك لو تحب
شاهين / لا ما لوش لازمه الدرون كفايا ... انت هتبقي فى الشركه وقتها مش كدا
منصور / عاوزنى معاك
شاهين / لا مش الفكره بس بطمن انك فى ضهرى بس
منصور / لا ما تقلقش اقل مهندس فى الشركه يقدر يشغل الدرون مليون الميه توكل انت على الله بس و لو يا سيدي محتاجنى معاك انا مش هتاخر اكيد
شاهين / ما اتحرمش منك انت اللى فيهم و الله المهم طمنى هى مراتك مش هتفقس بقي
منصور / هانت اهى ادعيلها لحسن انت عارف الأواخر دى صعبه ازاى
شاهين / ربنا يقومها لك بالسلامه
منصور / امين
....................
فى جنب
جوزيف قاعد لوحده نجاه تروح له
نجاه / السلام عليكم
جوزيف يبتسم
جوزيف / و عليكم السلام ازيك
نجاه / الحمد لله ... انت عملت ايه فى الناس بتوع المركز
جوزيف / خدوا علقه موت و سبتهم بعد ما اخدت ضمانات ان عمرهم ما هيفتحوا بقهم تانى و حاليا معظمهم بيحاول يسيب البلد بس لو بتسألى عن الحيوان اللى عمل كدا ما فرطتش فيه سايبهولك كنت متأكد انك هتحتاجيه
نجاه / احتاجه فى ايه يعني
جوزيف/ تفتكرى لو هى واجهته و نزلت فيه تلطيش و يا مجرم و يا حقير مش هتنطق
نجاه تبتسم على تمثيله المفتعل
نجاه / تفتكر بجد هتتكلم ؟
جوزيف / اجيبهولك نحاول ؟
نجاه / و أكرم ؟
جوزيف/ دا حبيبي ما افرطش فيه ابدا و صدقيني ده لمصلحته عشان لو شم الشارع فى واحده بتحبك اوى هتلقطه
نجاه / امايا ؟!
جوزيف يهز راسه اه
جوزيف / اصلها بتعشق النوع ده من الرجاله ... تقدرى تقولى عقده طفوله
نجاه ملامحها قرف جوزيف يسكت
نجاه / بس اكيد بناته قالبين عليه الدنيا
جوزيف / اتصل بيهم و قال لهم انه اتعرف على واحده و قرر يكمل معاها حياته بعيد عن ضغوطات الشغل و القرف
نجاه / تمام ... طب و الحيوان بتاع المركز اهله مش قالبين عليه الدنيا ما راحوش للناس اللى كانوا معاه و روحوا يسالوا عليه
جوزيف / حصل و كلو مترتب و متستف و معروف هيتقال ايه
نجاه / الواحد ممكن يختفي كدا فجاه و ما يلاقيش اللى يدور عليه
جوزيف / يااااااه دا موضوع عادى جدا و بيحصل فى كل مكان و كل وقت و بعدين دا مش شغل هواه يعني دا بيتم بسيستم و فى ناس بتنضف وراكى طول الوقت
نجاه/ مستحيل تتكشف يعني
جوزيف / انتى معايا و لا معاه ؟!
نجاه/ ما هو لو اتكشفت هتتاذى
جوزيف / و انتوا لو اتكشفتوا هتعملوا ايه ؟
نجاه / احنا ما بنعملش حاجه غلط
جوزيف/ طب احلفى كدا
نجاه / انا هتكلم مع بابا فى الموضوع ده
عباده يدخل
عباده / موضوع ايه ؟ خير
جوزيف / على فكره انا كنت فى حالى و هى اللى جت اتكلمت معايا انا مش رامى نفسي عليها يعني عشان ما تتكلمش
عباده و نجاه يبصوله و نجاه مصدومه عباده يبص لنجاه
عباده / خير يا نجاه
نجاه / يونس محتفظ بالراجل اللى اغتصب مهره و بيقترح انها تواجهه و ان ده ممكن يفرق و يخليها تنطق
عباده / ممكن ... روحى ساعدى امك تلم الحاجه عشان نروح ... و انت كمان بيتهيألي ليك علاج يا دوب تروح تاخده
جوزيف يبتسم و يهز راسه حاضر عباده يروح ورا نجاه ناحيه الخيمه و جوزيف متابعهم
………………….
فى اوضه محمد
رحمه / هو انا قولت لك تقولها
محمد / انا بس سألتها
رحمه / ما انا لو عاوزه اسالها ما كنت سألتها بنفسي
محمد / لا حول و لا قوه الا بالله انتى مش كنتى زعلانه
رحمه / ما انا زعلانه فعلا
محمد / افندم!!
رحمه / يا محمد كل السنين دى و ما فهمتنيش
محمد / طب معلش خديني على قد عقلى و فهميني انتى
رحمه / انا ما اقدرش اطلب منها تعاملني زى مهره و لا اشتكى لان هيتقال ان دى غيره سلايف و انا مش كدا
محمد / مهره اصلا مش سلفتك عمران و مهره مطلقين و هى ليها ظروفها و باذن الله تتحل و تروح لحالها فاى معامله مميزه بتاخدها دا لو بتاخدها فهى من باب الشفقه مش اكتر و لو عاوزه تعرفى مكانتك عندها شوفى الفرق بين معاملتها ليكي و بين معاملتها لنور اهى دى سلفتك اللى بجد
رحمه / انا مالى بيهم انا مش بقارن نفسي بحد
محمد / يارب انا تعبت
رحمه / خلاص يا محمد خلاص لو سمحت اقفل الموضوع ده
محمد / لا مش هقفله و لازم افهم انتى ايه مشكلتك بالظبط
رحمه / مفيش مشكله
محمد / لا فى
رحمه / قولت ما فيش هو انت هتعمل مشكله بالعافيه
الباب يخبط محمد و رحمه يبصوا لبعض و محمد يروح يفتح الباب يلاقي هند
محمد / ازيك يا ماما خير
هند/ ممكن ادخل؟
رحمه تجرى تفتح الباب
رحمه / طبعا يا ماما اتفضلى طبعا حضرتك بتستاذنى ازاى بس
هند / تسلمى … انتى زعلانه منى يا رحمه
..........................