(((((( الكبيره ٢ ))))))
#لولو_محمد
الحلقه ٢٩
اكرم / انا عمرى ما هاذيها انا بس كنت عاوزها تروح ... انا و والدتها اطلقنا و اتخانقنا و من ساعتها و هى كرهانى خصوصا انها مقتنعه انها السبب فى الطلاق ده
جابر / ليه
اكرم / خلافات عائليه بتحصل بس انا و كارمن العلاقه بينا ما كانتش كويسه من فتره و انا اتكلمت مع مهره فى قرار الطلاق اكتر من مره و كانت فى كل مره بتنهار و تحاول تقنعنى اغير رايي بس مفيش فايده كان لازم ننفصل بادب قبل ما العلاقه بينا تتحول لكره و نخسر بعض
عمران / بس الرعب اللى شافته
اكرم / انا نبهت عليهم ان ما حدش يلمسها ... لو اختك تسيبها تعيش فى شقه لوحدها كدا ... انا مش عاوز اقولك انا مهره بالنسبالى زى بناتى و اكتر و فى الاخر مضطر اسيبها تضيع بين اب جاحد و ام انانيه مهمله .. دا حتى اخوها اللى رايح جاى معاها و فجاه افتكر ان له اخت ده اساسا محشش و دخل مركز علاج الإدمان مرتين
عمران يبص لجابر
اكرم / طبعا المعلومه دى مش اى حد يعرفها و ارجو انها متتسربش لان هيتعرف انها خرجت عن طريقي
جابر / هو كل الحوار اللى دار بينا كانه ما تمش بس نصيحه لوجه الله ما تكررهاش انت اصلك ما تعرفش انت كريت مين على بنتك ... زى ما سعادتك بتقول طبعا
...............................
اكرم / مهره اغلى عندى من حياتى بس اعمل ايه قولى اعمل ايه ... مهره مش زى البنات اللى اتربوا عندكوا دى نتيجه نزوه واحد حب تلميذته و لما حملت اتنكرلها و التانيه رمتها و عشان يريحوا ضميرهم جابوا لها مربيه مقيمه معاها و اشترولها شقه و خصصلها مصروف من خزنه الشركه ما فكرش يزوده من يوم ما اتولدت الداده كانت بتتصل بيه عشان يزود و يقول حاضر و يطنش فتتصل بكارمن و الشهاده لله ما كانتش بتتاخر ابدا اصل الموضوع ديته ايه شويه فكه ... مهره واخده على الفقر اه مشتركه فى نادى غالى و بتتمرن بس مصاريفها و لبسها و حياتها كلها بسيطه جدا عشان كدا مش هيفرق معاها ترجع للفقر و تسيب رفاهيات كارمن و على الدسوقى انتوا فاهمين انا بقول ايه مهره تقدر تعيش و تتاقلم لان دى حياتها اصلا فكان لازم افكرها ان الداده ماتت و انها بقت مطمع ما كانش قدامى حل تانى ... امها لما عرفت مثلا عملت ايه قولولى ... كتر الف خيرها راحت ركبت لها باب حديد و طلعت تصوت و تعيط على كل القنوات عشان ده اللى هى عايشه عشانه اصلا ... و ابوها بقي ... اتحداك انه يكون سال عنها من ساعه ما سابها على باب القسم ... دا انا سمعت انه جاب لها من هدوم الشغاله يسترها بيها بعد ما نزلت ببجامتها فى الشارع ... انتوا متخيلين البيت فيه مراته و بنته تقريبا فى نفس عمرها و جسمها و لبس مهره هدوم الخدامه ... راجل ابن كلب حرفيا
جابر / انا مقدر انفعالك بس برده مش ده الحل
اكرم / حل اهبل من واحد عاجز اعمل ايه يعني ... انت يا عمران
عمران يبص له
اكرم / ليه بعت رجاله تراقبها و تحميها و هى ما تخصكش
عمران / خفت ان هجوم تركيا يتكرر
اكرم / بصفتك ايه
عمران يبص لجابر
اكرم / تصرف انسانى من واحد ما يعرفهاش و لا عاشرها مهما كان اللى بينكوا علاقه سطحيه مش زى اللى بينى و بينها ... ايوه اللى بينى و بينها عمره كام سنه بس ... بس حياتى و حياتها فيهم اتغيرت ... خطفت قلبى و ملت عليا حياتى حبيتها و بقولها قدام الدنيا بحالها بحبها
جابر / تمام يا باشا
اكرم / انا مستعد اعمل مروان حاجه عشان مهره ... اى حاجه ... مهره ملهاش حد حرفيا و كل اللى حواليها ديابه و كلاب ... انا تعبت
عمران / طب ما تحاول تتكلم معاها
اكرم / دى بتتجنن لو سمعت اسمى حتى بتكرهنى ... بقولكوا كل ما كنت افاتحها فى موضوع الطلاق كانت بتصرخ و تتجنن و لما نفذت فعلا انهارت و بهدلت الدنيا
جابر / انا متاكد انها هتاخد وقتها و تهدى و باذن الله كل حاجه تتصلح
اكرم / اتمنى ... انا عرضت عليها انها تسافر معايا امريكا و تبعد عن كل الوش ده بس هى رفضت بسبب الحساسيات اللى ممكن تحصل بينها و بين والدتها بس انا مش ناوى اكمل فى مصر الصراحه انا ناوى اصفى شغلى هنا و اهاجر و فعلا عرضت على مهره تيجي معايا
عمران/ اكيد رفضت
اكرم / للاسف
جابر / طبيعي موقفها حساس
اكرم / ما علينا انت طمنى ايه الاخبار رجعت التمرين و لا لسه
عمران / رجعت الحمد لله و قابلت مهره كمان
اكرم / كلمها هى بتحترمك و بتعزك
عمران / هحاول بس ما اعتقدش ان رايي ممكن يفرق فى حاجه
اكرم / انا مستعد اعمل اى حاجه و ادفع اى مبلغ بس مهره تعقل و ترجع بيتها
عمران يهز راسه و يبص لجابر يقوموا يقفوا اكرم يقف
.......................
فى المطبخ عند نجاه
نجاه واقفه بتغسل المواعين جوزيف يدخل يسند على الباب و يخبط بالراحه
نجاه / خير عاوز حاجه ؟
جوزيف / انتى حاولتى تدخلى اوضتى ليه
نجاه تتحرج و تلم نفسها
نجاه / غلطه ... الفضول خدنى و اتعلمت الدرس
جوزيف / الشوك بتبقي مره واحده لو كنتى جربتى تانى كان الباب فتح بس فى العادى ما حدش بيكررها زيك كدا ما كررتيهاش
نجاه / الحمد لله انى ما جربتش تانى
جوزيف / ليه
نجاه / عشان حرام
جوزيف / بس انا ما كنتش جوه يعني مش هنبقي لوحدينا يعني ... ايه ده ما احنا لوحدينا دلوقت اهو
نجاه تتنهد و تغسل ايدها و تبصله
نجاه / دخول بيوت الناس من غير اذنهم حرام ... انا ما كنتش هسرق بس كنت هتجسس حتى لو مش هقول لحد انى اعرف حاجات انت مش عاوزنى اعرفها بالطريقه دى اسمها تجسس غلط تمام ؟
جوزيف / مش يمكن كنتى تلاقى دليل على خيانتى ؟
نجاه / انت مش خاين
جوزيف يبتسم
جوزيف / عرفتى منين
نجاه / انت خاين ؟؟
جوزيف يضحك
جوزيف / لو خاين هقولك يعني انتى ازاى بالبراءه دى
نجاه / انت خاين ؟
جوزيف / لا
نجاه / و انا مصدقاك
جوزيف / افرضي بكدب
نجاه / هقتلك ... بسيطه يعني
جوزيف يضحك
نجاه / انا اقدر على فكره ما يغركش ان كيدهن عظيم
جوزيف / و انا هعترفلك بحاجه ... انا يشرفنى انى لما اموت اموت على ايدك انتى صدقيني ما فيش حاجه هتريحني و تسعدنى اكتر
نجاه / ايه الرد ده !! ما علينا
جوزيف / مش عاوز اتفهم غلط بس انتى ليكي عندى مكانه خاصه
نجاه / اشمعن
جوزيف / الموضوع قديم ... اعتبريها تراكمات واحده واحده لقيت الدنيا كدا ... يعني مفيش سبب اقدر احط ايدي عليه
نجاه / قديم ايه دا انت كنت مطلع عين اهلى
جوزيف يضحك
جوزيف / اصلهم قالولى ان القط ما بيحبش الا خناقه
نجاه / ما تقولش ... بقولك ايه انا الوقفه دى مضيقانى
جوزيف / الوقفه و لا الحوار اللى اتفتح
نجاه / حوار ايه
جوزيف / حوار القط
نجاه / مش فاهمه
جوزيف / دا انتى زيني اصلي ... انا داخل انام
نجاه / تصبح على خير
جوزيف يروح يفتح باب الاوضه و يدخل و يقفل الباب تانى نجاه تتنهد و تكمل غسيل مواعين مختار يدخل
مختار / ما تعمليلنا اتنين شاى و تحصليني على الجنينه
نجاه / حاضر
مختار يبتسم و يطلع يبص على اوضه جوزيف و يمشي نجاه تملا الكاتل و تعلق عليه
.......................
فى شقه مهره
مهره / تعبتك معايا اوى اليومين اللى فاتوا
مروان / بالعكس استمتعت ... ها ما حكيتليش عن الشغل
مهره / حكيتلك ... قولتلك كان كويس هى بس مديره مكتبه اللى عصبيه بس ما تقلقش انا هعرف اظبطها
مروان / ايوه انا مالى بالكلام ده انا بسال عن التفاصيل يعني عملتى ايه اتكلمتوا فى ايه كدا يعني
مهره / نتكلم ايه دى روحها فى مناخيرها
مروان/ ما تولع تندعق بجاز انا مالى بامها انا بتكلم عنك انتى و رامى
مهره / مفيش رحب بيا طبعا و وصي سهيله عليا و تمام خلاص كدا فضلت انا بقي معاها تتخلق عليا شويه تزعق شويه تتنطت شويه و انا و لا كان فى حد قدامى
مروان / تمام ... انا بطمن عليكي بس
مهره / انا تمام ما تقلقش ... بقولك صحيح
مروان / اؤمرى
مهره/ كنت بفكر بما ان ماما اطلقت ارجع اقعد معاهم تانى .. بدل ما انا مشحطاطاك كدا
مروان / ما تتحججيش بيا اعملى اللى يريحك و اللى انتى شيفاه صح
مهره / طب انت رايك ايه ... انا مشيت من هناك عشان ما اكونش مع اللى اسمه اكرم ده فى حته واحده
مروان / ليه
مهره / كدا
مروان / ممكن تثقى فيا على فكره ... ايه اللى حصل ... و ليه بقيتي بتتعصبى لما بتسمعى اسمه اوى كدا ... دا انتوا كنتوا زى الكنجارو اللى شايل ابنه معاه فى كل حته
مهره عنيها تتملى دموع و تبص فى الارض مروان يقرب و ياخدها فى حضنه تعيط على اخرها
مروان / للدرجادى
مهره / انا بكرهه ... انا بجد ... بكرهه
مروان / كل ده عشان طلق مامتك ... معلش يعني عملتلك ايه مامتك ... ما هى زى ابويا يعني الاتنين ما يتخيروش عن بعض
مهره تخرج من حضن مروان و تيجي تمشي يمسك ايدها
مروان / مهره لو سمحتى .. احنا بنتكلم ... احكيلى ايه اللى حصل
مهره / انا كنت بحبه اوى و بحترمه و بقدسه لو اقدر اقول كدا يعني ... كنت عايشه عمرى كله خايفه من الناس عشان ما ليش اب يحميني او
مهره تبص لمروان
مهره/ مفيش راجل معانا ... مهما قولت انى ... قويه و بواجه و شجاعه و مش محتاجه لحد ... الناس كلها ... بتطمع ... او بتستهون ... يعني ... انا وقتها ما كانش فارق معايا ما كنتش معترفه ... عادى ... لحد ما دخل حياتى و قرب منى و حسيت بالفرق ... قد ايه كنت محتاجه الاحساس ده ... قد ايه كنت محتاجه اب
مهره تنهار مروان يطبطب عليها
مهره / بس طلع مش ابويا ... و طلع مش شايفني بنته ... و طلع ان فعلا اللى ما لهاش راجل يقف ليها فى حياتها مطمع
مروان / انتى بتقولى ايه
مهره / جالى اوضتى و قالى انه بيحبنى ... كنت فكراه بيقول يعنى ... زى بنته و كدا ... فوجئت بيه بيقولى انه عاوز يتجوزنى
مروان / ازاى يعني انتى ما تجوزيلوش اصلا
مهره / ما هو ... الدين مش مهم عنده اصلا... احنا هنسافر امريكا و نتجوز مدنى و نعيش هناك عادى ما حدش بيدق على التفاهات دى هناك
مروان/ و انتى رديتي قولتى ايه
مهره / انهرت هقول ايه يعني ... صدمه عمرى و وجع قلبي ... احساس اليتم و اهلى عايشين ... خفت و هربت من البيت ... ما قدرتش اوجه ماما ... خفت ما تصدقنيش ... و خفت اخواتى يعرفوا يتصدموا بابوهم ... خفت ما حدش يصدقنى ... ما حدش هيصدقنى اصلا
مروان / انا مصدقك
مهره تبصله
مروان / انا اسف ... انا اسف بجد
مهره / انا داخله انام ... عن اذنك
مهره تقوم تروح اوضتها و مروان قاعد مكانه
مروان / دا كدا كل حاجه اتغيرت يا اكرم بيه يا صردى
......................
فى الجنينه عند نجاه
نجاه / بس هو ليه حركات برده مش سهل يعني
مختار / زي وقفه المطبخ دى ؟
نجاه / انا كنت اقصد انه يجبرهم برده يروحوا المكان اياه بالحداقه كان ممكن يبعت الفويسات عادى ليهم او من غير خالص كان هيقول اللى عرفه و كنا هنصدقه عادى ... لا و خلاهم يروحوا بكيفهم هم اللى يقولوا احنا هنجيلك مع انهم امتى كانوا بيقولوا عمرنا ما نروح هناك
مختار / لا عمرهم ما هياخدوكى هناك تفرق
نجاه/ بس و الله ليه حاجات كويسه برده مش هنكرها عليه كفايا انه بيحاول
مختار يبتسم
نجاه / ايه !!
مختار / بخصوص الحوار اللى دار بينكوا فى المطبخ
نجاه / على فكره و الله بحاول اتجنبه و عارفه اننا ما ينفعش نبقي لوحدينا فى مكان بس اعمل ايه ما احنا فى بيت واحد و بعدين هو بيحترم المسافه اللى بينا و بيحترمنى على فكره و دا مش جديد هو علاطول بيراعى ده ... حتى و انا فى تركيا كان بيهتم اوى بحجابى و مواعيد صلاتى
مختار يبتسم تانى و يبص الناحيه التانيه
نجاه / ايه يا عمى !!
مختار / ما فيش يا قطه عمك
نجاه تستغرب مختار يضحك
مختار / دا انتى زيني اصلى
نجاه / هو فى ايه بجد
مختار/ انتى عارفه ليه الاختلاط حرام
نجاه / اعتقد عشان نمنع الشيطان يدخل و يجرنا لسكه مش صح
مختار / مش بس كدا ... بس عشان الفطره ليها احكامها يعني بنت جميله رشيقه و شاب بعنين زرق و عضلات دمه خفيف و جامد نفيخه
نجاه / لا لا لا لا مش سكتى عنين زرقه ايه و عضلات ايه ما انا متحاطه بالرجاله طول عمرى و طول بعرض بشنبات اللهم اكبر عليهم يهدوا الحيطه و يبنوها يعني ما ريلتش على ولا واحد منهم يعني فى ايه يا عمى الكلام ده دا انا نوجه ربايه ايديكوا
مختار / و حد يقدر يقول تلت كلمه على نوجه ... هو بس انا كنت فى سنك فى يوم من الايام و كانت ساكنه جنبى بت قمر
نجاه تبتسم اوى مختار يكمل
مختار / كنت بغض بصرى و فى حالى و الطرق كانت بتتقابل ... اقول لروحى اتلم عيب دى جارتك ما تبصلهاش و لا تفكر فيها ... دى مش من توبك و لا تعرف حاجه عن خطوره حياتك اتلم ... بس كل ما كنت احاول اللمها كانت تفرط منى اكتر لحد ما رفعت رايه و قولت بااااااااس دى حرب خسرانه انا عاوزها و بحبها
نجاه / ربنا يخليكوا لبعض
مختار/ الحب ما لوش كبير يا نجاه و مش حرام و لا جريمه
نجاه / انا لو فكرت فى الجواز هتجوز جابر لانى اكيد مش هلاقى احسن منه يصونى ما تقلقش عليا
مختار / انا ما جبتش سيره الجواز انا بتكلم عن الحب
نجاه تستغرب
مختار / ناصر حب اميره... ما اتجوزها... مش شرط الحب ينتهى بالجواز... مش شرط ابدا
نجاه / مفيش حب من غير جواز يعني ناصر... انا لا ... انا مش هحب غير الانسان اللى هتجوزه
مختار / مين بيجي الاول الحب و لا الجواز
نجاه / الجواز مراحل يا عمى فى خطوبه و فى كتب كتاب و فى فرح .. ناصر نفسه ... اه ممكن يكون الموضوع بدء اعجاب بس هو اتقدم و حصل قبول و المشاعر دى واحده واحده
مختار / واحده واحده ايه بس دا جابر ميت فى هواكى و ما فيش ريق حلو واحد و مع كدا مفيش اى حاجه بتتغير بالعكس مشاعره بتزيد... و عذابه كمان بيزيد
نجاه تحزن
مختار / زمان كانت البنات مقفول عليهم اوى فالحوارات دى ما كانتش موجوده و ما كناش بنشوفها كتير دلوقت حتى العيال الصغيره بيتكلموا فى الحب و الجواز و الكراش و المكراشي
نجاه / انا مش صغيره
مختار/ و حلوه و ذكيه و تتحبى و مليون من يتمنى منك بصه
نجاه/ بس انا مش هبص ليونس
مختار/ ليه مش راجل
نجاه/ مش فى دماغى الموضوع اصلا .. يعني ... انا ... هو انا بارده ؟؟
مختار يضحك
نجاه / ايه بقي !! و الله بجد بسال ... يادى الاحراج
مختار / و لا إحراج و لا حاجه بالعكس اتكلمى و اسالى و افهمى ... و لا يا ستى انتى مش بارده انتى لسه نصيبك ماجاش
نجاه / ساعات بحس انه مش هيجي
مختار / اعوذ بالله ليه كدا بس
نجاه / مش عارفه ... على راى امى كل اللى فى سنى شايلين عيالهم و الاصغر منى كمان ... انا اللى ... عارف يا عمى انا لو فكرت فى كل الاسباب اللى رفضت عشانهم العرسان ... و اولهم جابر جابر مثلا انا كل مره باجل او برفض بيبقي بحجه شكل و وقتها الموضوع بيبقي مقنع و لما السبب بيروح بيطلع سبب تانى مقنع اكتر منه ... انا مش بتاعه جواز ... حياتنا
مختار / حياتنا زى الفل و كل اللى حواليكي عايشين نفس حياتك و اتجوزوا و خلفوا عادى
نجاه / طب هى دى الحياه اللى عوزاها لعيالى يا عمى
مختار / دا سبب جديد لنج... ايه ده !!
نجاه / انا من حقى
مختار / يا بنتى الحياه لازم تستمر و الحياه من سئ لاسوء لحد ما الساعه تقوم على شرار القوم ... بس لازم يفضل ناس تجاهد ليوم الدين يا بنتى
نجاه تفكر
مختار / ابويا و جدى و جد جدى حياتهم كانت خطر برده صحيح الاعداء مختلفين و المشاكل برده كانت مختلفه بس ... الزيني من يوم ما وعيوا على الدنيا و هم ولاد موته بنخرج من بيتنا ما نعرفش هنرجع و لا لا ... اقولك حاجه ... دا سر قوتنا ... ما لناش مالكه ... ما بنخافش ... بس شكلك ... مش زيني اوى برده ... مع ان الجوارحه برده و الله ولاد موته و يمكن بغباوه عننا كمان ... امال انتى الخوف اللى جواكى ده ... يكون عشان حرمه
نجاه و مختار يضحكوا
مختار / سيبك انتى وقت الجد حريمنا بيبقوا وحوش
نجاه تبتسم
مختار / لو ربنا كاتبلك حاجه هتشوفيها فسبيها على الله
نجاه / ما انا سيباها
مختار / المهم نرجع لموضوعنا
نجاه / موضوع ايه
مختار / القط
نجاه / قط ايه
مختار / اطلعى نامى يا بت اطلعى نامى
نجاه / هو ايه حكايه القطط معاكوا النهرده انا مش فاهمه ... القط ما بيحبش الا خناقه ... هو انا القط
مختار يضحك بصوت عالى و مش قادر يمسك نفسه
نجاه / يووووه بقي و الله ما فاهمه
مختار / انتى عسل يا بت اقسم بالله عسل
نجاه / انا القط ... احبه يعني ... هو خناقى يعني فحبه و كدا ... دا كان قصده ... كان بيضايقني عشان احبه ... دا اهبل
مختار / ذكى
نجاه / يا سلام
مختار/ اصله بيعرف يضرب و يلاقي ... بيهتم بمواعيد صلاتك و بيحاول .. عشان خاطرى
نجاه تعوج بقها بعدم فهم
مختار / مش انتى اللى قولتيله جرب عشان خاطرى و نزل فى ساعتها صلى و بيحاول من ساعتها ... هو اكيد مش عشان خاطرى انا ... انتى عارفه اننا بنسمع مكالماتكوا صح ؟
نجاه / ايوه بس عمرى ما فكرت فيها كدا ... انا قولتله عشان خاطر نفسك
مختار ينفخ
نجاه / انا مش فاهمه حاجه خالص
مختار/ بكره تفهمى
نجاه تبصله مبتسم تتنهد و تعوج بقها و تبص الناحيه التانيه مختار يضحك
نجاه / ايه بقي الله !!!
مختار يضحك اكتر نجاه تقوم تدخل جوه يتنهد و هو بيتابعها
........................
فى بيت عبد الهادى
نسمه بتساعده يلبس و الاتنين مضايقين
نسمه / كنت ارتاح شويه كمان مستعجل على ايه
عبد الهادى / اتاخرت كتير اوى يا نسمه
نسمه / انا عارفه انك موجوع ... بس بالله عليك ... فكر فيا و فى العيال... بلاش انا مش مهم ... عيالك صغيرين و محتاجينك
عبد الهادى يتنهد
نسمه / الخلافات اللى فاتت بين امى و اهلى انا اخترتك و قاطعتهم كلهم انا و هى و العيال ما لناش غيرك ... عشان خاطرنا فكر تانى
عبد الهادى / خايفه عليا
نسمه / باقيلى مين اخاف عليه يعني
عبد الهادى / تفتكرى هو ليه ما اتجوزش لحد دلوقت
نسمه / انا مال امى بيه انا ... عبد الهادى ما تدخلش الشيطان بينا تانى انا تعبت
عبد الهادى / و انا كمان تعبت و عشان كدا هنهى كل حاجه بقي
نسمه / هتنهيني انا كمان ... يا اخى ارحم ضعفنا بقي دا انا بقولك ما لناش غيرك ... يا سيدي انت تقوم بيه و برجالته كلهم ... الحكومه مش هتسكت
عبد الهادى / سكتوا على اخويا عادى
نسمه/ انتوا اللى سكتوهم يا عبده
عبد الهادى / ما حصلش هو بس جاب واحد اداله قرشين و شال بداله و انا هعمل زيه
نسمه / طب القرشين دول ولادك مش اولى بيهم يا سيد الناس ... طب اقولك حاجه ... اقولك حاجه ... ما دام كدا كدا هتدفع ما ينفذ هو بعيد عنك
عبد الهادى / نارى مش هتبرد
نسمه / و لا حتى ده هيطفى نارك و الله
ام رعد تدخل
الست / لبست يا عبده و لا اجى اساعدك
عبد الهادى / لبست و نازل اهو يا امى
نسمه / ابوس ايدك ياما عقليه
الست / و هو كان مجنون و لا ايه يا بت انتى ما تحسني ملافظك الله
نسمه / حقكوا عليا اقصد هديه اقصد خليه يرجع عن اللى فى دماغه
الست / و الله شكله ما كانش كلام اهبل و بحق و حقيقي
نسمه / هو ايه ده يا امى
الست / اللى بينك و بين ابن المطاريد
نسمه / حسبي الله و نعم الوكيل حسبي الله و نعم الوكيل
نسمه تسيب الاوضه و تطلع بره
الست / مش مستنيه منك حاجه ما انت علاطول بتسكت و تعديلها
عبد الهادى / عن اذنك ياما
عبد الهادى يمشي و الست واقفه رافعه راسها بكبر
.........................
فى الجيم تحت
جوزيف بيمرن كارم و مختار واقف بيحكم بينهم و يساعد كارم و نجاه واقفه مع عمران فى جنب بيتكلموا
عمران / ما انا مش قادر اسكت و مش قادر اتكلم
نجاه / معاك حق البنت صعبانه عليا اوى ... بس انت شوفت اخوها شكله ابن ناس يمكن كانت مرحله فى حياته لما كان صغير و اتغير و فاق لنفسه
عمران / ممكن تتكلمى معاها
نجاه / ما انا كلمتها
عمران / يا ستى ما تقوليلهاش اى حاجه من اللى عرفناها اسالى عنها اخرجى معاها صاحبيها انتوا بنات زى بعض انما انا موقفى محرج
نجاه / اكيد طبعا ليه لا
عمران / تسلمى
جوزيف / تلاميذ اخر ديسك فى الفصل ناويين يشتغلوا معانا و لا هيقضوها رغى بس
عمران يتنهد و يقومله نجاه تتابع بابتسامه
.................
فى فيلا اكرم
مهره خارجه من السرايا و اكرم بيجرى وراها يمسك ايدها تشد نفسها بعنف
اكرم / استنى هنا بكلمك
مهره / انا جيت بس عشان كنت فكراك مشيت لما طلقت امى مش فاهمه انت ازاى عايش هنا بعد اللى حصل
اكرم / دا بيتي لو نسيتي و بعدين امك لسه فى عدتى و ممكن اردها عادى
مهره / عن اذنك
مهره تيجي تمشي اكرم يمنعها تانى
اكرم / لو سمحتى اسمعيني
مهره / مفيش كلام بينا و يا ريت ما تستفزنيش اكتر من كدا عشان ما اقلش منك و افضحك
اكرم / اعمليها
مهره / دا انت بجح بقي
اكرم / تمام يا ستي تمام انا اتسرعت و غلطت انا اسف خلاص
مهره / انت بصيتلى بنظره ما ينفعش تبصلى بيها هو ايه اللى خلاص ... اللى اتكسر عمره ما هيتصلح
اكرم / ما فيش حاجه اتكسرت و مفيش حاجه حصلت اعتبرينى ما قولتش حاجه
مهره / انت حقير و ابن كلب ... اعتبرنى ما قولتش حاجه
اكرم / تمام كانه ما حصلش
مهره / عادى يعني بجد
اكرم / انا كبير كفايا انى اتفهم رد فعلك
مهره / لا انت مش كبير و لا حاجه انت تنح
اكرم / ممكن لو سمحتى نقعد و نتكلم
مهره / مفيش كلام بينا و المكان اللى هتكون فيه انا مش هعتبه و همشي لو حاولت تمنعنى اقسم بالله لاصوت و افضحك
اكرم / ما قولتلك اعمليها ... ما حدش هيصدقك اصلا ... مش هيكدبوا اكرم الصردى و يصدقوا واحده اهلها نفسهم مستنكرين منها ... انتى نسيتي و لا ايه ؟؟ انا اللى دخلتك البيت ده ... فى الوقت اللى ابوكى رفض يدخلك بيته ... ما حدش هيصدقك ... ساكته ليه ؟؟ ما تصرخى ما تفضحيني و تجرى ... شوفى امك اللى انا طلقتها هتقف جنبك و لا لا .. هتصدقك و لا لا ... فوقى يا مهره ... انتى ما لكيش غيرى
مهره عنيها تتملى دموع اكرم يتكلم بثقه اكتر
اكرم / حتى اخوكى اللى ظهر فجاه ده ... مش بجد ... مش حقيقي ... كان فين السنين اللى فاتت ... فجاه افتكر ان ليه اخت ؟ .. انتى عارفه ليه اصلا ابوكى بيعامله كدا ... ما فيش حد بيعامل ابنه الكبير كدا الا لو ما كانش متبرى منه و من عمايله السوده ... بكره لما تشوفيه على حقيقته انتى اللى هتجيلى ... و ما تقلقيش بابى هيبقي علاطول مفتوحلك
مهره تمشي اكرم ما يمنعهاش و يفضل متابعها و هى ماشيه بتعيط و منهاره و عماله تمسح فى دموعها و وشها
..................
فى شونه الجوارحه
مندوب توصيل يدخل يكلم واحد يشاورله على مكتب قاعد عليه شاهين يروحله
المندوب/ السلام عليكم حضرتك شاهين مغاورى الجارحى؟
شاهين / اؤمر يا ابن عمى خير
المندوب / حضرتك جايلك اوردر مدفوع التكاليف
شاهين / اوردر !! وريني خير
المندوب / استاذن حضرتك تمضيلى وصل الاستلام
شاهين / و ماله وريني
شاهين يشوف الوصل يقراه و يمضي و يستلم بوكس صغير يفتحه يلاقي فيه موبايل يبص للمندوب باستغراب
المندوب / استاذن حضرتك
شاهين / استنى يا عم انا مش فاهم حاجه
المندوب / حضرتك انا مجرد مندوب توصيل بعتانى الشركه
شاهين / ايوه ما انا لازم افهم مين اللى باعت الاوردر ده و لا مؤاخذه
المندوب / حضرتك بيانات المرسل و رقم موبايله مكتوب فى صوره الوصل اللى مع حضرتك تقدر تكلمه بنفسك و تفهم منه كل حاجه
شاهين / ماشي نكلمه
المندوب / استاذن حضرتك امشي عشان معايا اوردرات تانيه
شاهين / اتفضل بس لو احتجتك هجيبك
المندوب / هو فى ايه بالظبط حضرتك بتتكلم معايا كدا ليه اصلا
راجل / فى حاجه يا كبير
شاهين / ما فيش ... حقك عليا يا باشا اتفضل شوف اللى وراك
المندوب يمشي و هو بينفخ ثوانى و الموبايل يرن فى البوكس رقم خاص شاهين يستغرب و يرد
شاهين / السلام عليكم
امايا / لقيت نفسي بفكر فيك قولت لازم اكلمك
شاهين / و انتى مين بقي ان شاء الله
امايا / امايا ايه ما سمعتش عنى
شاهين / الاسم مش غريب بس مش واخد بالى ... اميره !!
امايا / سميني زى ما تسميني ... انا عارفه ان تليفونك متراقب قولت ابعتلك واحد نضيف تقدر تكلمنى منه اصلى للاسف ما قدرتش اجيب رقم تليفونك التانى اللى انت بتتفرج منه على فيديوهات ياسمينا
شاهين / انتى بتقولى ايه يا بت انتى اقسم بالله
امايا / ما تخافش سرك فى بير
شاهين / سر ايه انتى هتكدبى الكدبه و تصدقها ياسمينا دى اختى الكبيره
امايا/ الموبايل اللى فى ايدك عليه فيديو اتفرج عليه هتنبسط اوى و هكلمك تانى سلام يا شوشتى
الخط يتقطع شاهين يبص على الرجاله شغالين و منهم واحد عينه عليه
شاهين / فى حاجه يا عامر ما تشوف شغلك
عامر يشيل شكاره و يطلع بره تليفون شاهين فى جيبه يرن يطلعه ابوه يرد
شاهين / السلام عليكم
مغاورى / خير فى حاجه حصلت عندك
شاهين / ليه هو جواسيسك اللى عايشين بس يراقبونى ما لحقوش يحكوا لحضرتك كل حاجه
مغاورى / اتكلم بادب
شاهين / طلبت موبايل من النت طلع مفتوح و مستعمل المندوب قالى انه ما لوش دعوه و اتواصل مع الشركه و هكلمهم يغيروه
مغاورى/ الموبايل الجديد جايلك بشريحته ؟؟
شاهين / ما قولت لحضرتك مستعمل اول ما فتحته صاحبته رنت هرجعهولها طبعا و اطلع عين الشركه بنت النصابه دى ما تشغلش بالك بيا يا كبير انا هتصرف
مغاورى / و انت بتطلب موبايل جديد ليه ما
شاهين / هو فى ايه يابا هو انا صغير على الكلام ده ... كنت هديه لتيا عشان اعتزر عن اللى حصل امبارح مبسوط كدا
مغاورى / انا مش براقبك انا بطمن عليك
شاهين / تسلم يا سيد الناس
مغاورى / خد بالك من نفسك سلام
مغاورى يقفل شاهين ينفخ و يقعد يبص حواليه يلاقى عامر بيتابعه من بعيد ينفخ و ياخد الموبايلين فى جيبه و يمشي يركب عربيته و يقفل عليه الباب و يطلع موبايل امايا و يفتحه يلاقي جواه فيديوهات كتير سوده منها واحد لوشه يشغله يلاقيه ليه و هو بيتفرج على فيديو ياسمينا و صوت ياسمينا و ضحك البنات فى الخلفيه
///////////////