طفلة ولكن

الجزء الخامس والعشرون (شفاء)

نكمل
اسد بغضب :اما انا فمش مسامح
وضغط على الزناد وفى لحظة انطلقت الرصاصة من مسدس اسد واستقرت فى رجل ابراهيم اللى ارتد لورا ووقع فى الارض
يوسف بصدمة :ابويا
فتحية :ياللهوى أجري هات دكتور يا يوسف بسرعة
خرج يوسف بسرعة يجيب دكتور اما اسيا فضلت واقفة فى مكانها ومصدومة وأسد قرب من ابراهيم ووطى لحد ما بقى فى مستواه واتكلم بصوت زى فحيح التعابين جمب ابراهيم اللى واقع وبينزف وجنبه فتحية بتصوت
اسد : الطلقة دى مكانها الوحيد هى دماغك بس احمد ربنا أن اسيا واقفة وصدقنى باقى حقها وحق امها وأبوها هاخده منك تالت ومتلت
وقام مشي وسحب اسيا وراه وهى فعلا مشيت معاه بس من غير ما تفهم اى حاجه كانت بتتحرك كأن روحها اتسحبت منها وعينيها عمالة تدمع جامد وخرجوا هما الاتنين وخلاها تركب العربية وهى بتتحرك بتلقائية تامة
اسد بقلق :اسيا انتى كويسة
لا رد
اسد :اسيا بصيلي انتى كويسة
لا رد
اسد مد أيده وحرك وشها بايده علشان تبصله بس اتصدم من منظرها وشها كله احمر وعينيها بتدمع وملامحها جامدة ولون عينيها عمال يتبدل بسرعة من الاحمر للازرق للاخضر فمسك التليفون بسرعة واتصل على اسر
اسر :الو فى ايه يا اسد انا...
قاطعه اسد :اسر اديني همس بسرعة
اسر بقلق :فى ايه
اسد بغضب :بقولك اديني همس اخلص
اسر :حاضر حاضر
وقام بسرعة يدور على همس وسمع صوتهم فى اوضة اريا ففتح الباب بسرعة
جنة بخوف:فى ايه
اسر :معلش انا اسف بس اسد عايز همس ضرورة
واداها التليفون
همس :الو
اسد :همس اسيا يا همس
همس بقلق:مالها فى ايه
اسد :لون عينيها عمال يتبدل ووشها شاحب شفايفها بيضا ومش بتنطق
همس بخوف :ليه ايه اللى حصل
اسد بتوتر :مش مهم اللى حصل انا مش عارف اتصرف انا بعيد جدا عن اى مستشفى اعمل ايه
همس بقلق :تعمل ايه تعمل ايه اه صح دكتور شوقي اتصل بدكتور شوقي
اسد :مش معايا الرقم
همس :انا معايا الرقم استنى هضيفه للمكالمة وبعد دقيقتين تقريبا رد دكتور شوقى
شوقي:الو
همس :الو معايا الدكتور شوقي؟
شوقي :اه اتفضلي
همس :انا همس دكتورة فى نفس مستشفي حضرتك هو حضرتك فاكر حالة اسمها اسيا كانت حامل وعندها انفصام فى الشخصية جاتلك من حوالى اسبوعين المستشفى وانا كنت معاها
شوقي بتذكر :اه فاكراها مالها
اسد : اسيا معايا دلوقتى وتعبانة جدا مش بتنطق ولون عينيها عمال يتغير من احمر لازرق لاخضر وانا مش عارف اتصرف وبعيد عن المستشفى جدا
شوقي :هى باصة لحاجه معينة أو لما بتكلمها بتبصلك
اسد :لا باصة للفراغ قدامها وبتنحرك معايا لما بحركها
شوقي: هي تعرضت لصدمه
اسد : اه اتحطت في موقف خوفها جدا
شوقي :غالبا اللى بيحصل دلوقتى هو أن التلت شخصيات بتتصارع
اسد :بتتصارع على ايه انها تخرج
شوقي :لا أنها تستخبى كل شخصية أهميتها أنها تحمى التانية فى لحظة خوفها وفى اللحظة دى التلت شخصيات خايفين ومش عايزيين يخرجوا
اسد :طب اعمل ايه
شوقي:خليها تحس بأمان
اسد :ازاى يعنى
شوقي :خليها تبقى جنب شخص بتحبه شخص متحسش بالخوف وهو موجود وتعالى فورا على المستشفى
اسد :ماشي
وقفل المكالمة وبص لاسيا بقلق
اسد لنفسه : الامان هى مبتحسش بالأمان غير جنب همس اعمل ايه دلوقتى
وافتخر كلام لي لي لما قالت إنها بتفتكر اخواتها لما تسمع صوت نبضات القلب
فقرب منها بهدوء وحضنها وخلى رأسها على قلبه
اسد :اسيا انا جنبك متخافيش انتى مش محتاجه حد يحميكي انا هحميكي
اما اسيا فغمضت عينيها بهدوء وراحت فى عالم تانى
(فى عقل اسيا
إلينا ولي لي كانوا واقفين قصاد بعض وما بينهم زى ازاز شفاف وآسيا قاعدة فى ركن ضامة نفسها جامد وبتترعش
إلينا : لي لي خلاص كفاية سيبني اخرج
لي لي :لا مينفعش انتى لازم تفضلي هنا
إلينا :لا انتى ولا اسيا هتعرفوا تعملوا حاجه سيبيني اخرج اسيا خلاص مش هتستحمل
لي لي :انتى لو خرجتي هتكملي انتقامك
إلينا :دا كان اتفاقنا من الاول أنى احميهم وبالمقابل اخد انتقامي بجسمك
لي لي :مكنتش اعرف انك هتبقى وحش انا اللى صنعتك يا الينا وانا اللى لازم احمي اسيا منك
إلينا :اسيا مجرد شخصية تانية انتى صنعتيها امحي شخصيتها وانا هحميكي
لي لي : مستحيل يا الينا مستحيل انتى اللى لازم تختفي
إلينا :انا هاخد حقي يا لي لي هاخد حقي بمزاجك أو غصب عنك اسيا فوقي
اسيا برعشة :اسكتوا بقى انا مش عايزة حد ولا حاجه انا عايزة اختفي
إلينا : لي لي هى اللى المفروض تختفي كل شوية تصنعي شخصية واول ما تزهقى منها تحبسيها
لي لي : انتي اللى خالفتي الاتفاق يا الينا وكان لازم تفضلي هنا
فجأة إلينا بدأت تكسر الازاز بكل قوتها ولي لي وآسيا بدأوا يصرخوا
اسد :اسيا انا جنبك متخافيش انتى مش محتاجه حد يحميكي انا هحميكي )
فى الفيلا وتحديدا فى اوضة حسام فتح تليفونه وبدأ يبص فى الصور اللى صورها من كمبيوتر اسد لحد ما وصل لخمس اسماء ورا بعض الاب ريحان والام روان ومكتوب جنبهم غرقوا فى البحر وتم العثور على جثثهم والأطفال زياد ريحان وحسام ريحان وجنة ريحان لم يتم العثور على جثثهم
وقلب فى باقي الورق لقى ورق تانى مكتوب فيه قائمة بأسماء الأشخاص اللى اتبعتوا للمنظمة ولقى اسمه هو وجنة ما بينهم وفى ورقة تانية لقى قائمة بأسماء أشخاص هربوا من المنظمة واماكنهم حاليا وكتير منهم كان محطوط شرطة فى خانه المكان وكان فى ورق كمان لاشخاص تم العثور عليهم فى نفس المنطقة بعد فترة ولقى اسم زياد ريحان ما بينهم ومكتوب جنبه تم العثور عليه بواسطة قارب صغير ونقل للمنظمة بعد فترة وهرب اثناء حادثة المطر والقمر
حسام بصدمة :زياد يبقى اخونا
وقام بسرعة نزل تحت لقى زياد بيدخل الفيلا وقف شوية يبصله
زياد :حسام شيل الحاجات دى معايا مالك واقف كدا ليه حسام بكلمك
حسام بتوتر :هات مفتاح العربية
زياد :ليه انت رايح فى حتة
حسام :ها اه هروح اجيب حاجه
زياد وهو بيديله المفتاح :تمام متتأخرش ومتعديش جنب اى حتة فيها كاميرات مراقبة لأن برنامج تشويش الكاميرات مع اسد
حسام : ماشي
وخرج جري على برا وركب العربية ومشي بيها باعلى سرعة
حسام بغضب :ازاى كان عايش وانا معرفتش الاقيه كان قصادي طول الوقت ومحستش بيه
وقف العربية لما لقى بحر اسكندرية بقى جنبه فنزل من العربية وقرب من البحر ومكنش في اى حد على البحر
حسام وهو بيعيط : اسف اسف يا زياد اسف يا بابا اسف يا ماما اسف يا جنة كان المفروض احميه بس لا هاخد حقكوا كلكوا والله لاخد حقكوا اااااااه
وقعد يصرخ بأعلى صوت يمكن ناره تهدى شوية
فى الفيلا زياد قرر يروح يبص فى الورق وراح لمكتب اسد وفتح الكمبيوتر وقعد يدور على الملف لحد ما لقاه وبدأ يدور فيه بس قاطعه صوت همس
همس بقلق :زياد هو اسد مكلمكش؟
زياد :لا هو فى حاجه حصلت
همس :كلمنى علشان اسيا تعبت وبعدين بطل يرد ومش عارفة اعمل ايه
زياد:طب فين اسر والباقى
همس :قاعدين فوق بيحاولوا يوصلوله انا طالعة أشوفه رد ولا ايه
زياد :استني انا جاي معاكي
وطلعوا هما الاتنين وساب الكمبيوتر مفتوح ودخلوا لقوا اسر واريا وجنة وجاسر اللى صحي من الصوت وهادي وسلمى فى الاوضة
همس :ها رد؟
هادي :لا
همس بقلق : انا مش عارفة مبيردش ليه
اسر بمقاطعه : رد
همس جريت وسحبت التليفون من ايد اسر وفتحت الاسبيكر
همس بسرعة :الو اسد اسيا فين وعاملة ايه عرفت تتصرف ولا ودتها مستشفى هى فين ما تنطق
اسد :حد يسكت اللى بتتكلم دى
جاسر :معلش يا اسد هى خايفة على اسيا
اسد :اسيا بقت كويسة ودلوقتى احنا فى المستشفى
اسر :مستشفى ايه
اسد :مستشفى الامل
همس :انت لحقت توصل القاهرة
اسد :اه لسه واصلين
همس :تمام خلى بالك من اسيا
زياد :ومتنساش تشغل البرنامج اللى بيشوش على الكاميرات
اسد :تمام سلام
وقفل ودخل الاوضة اللى كانت اسيا نايمة فيها وجمبها الدكتور وممرضة
الدكتور :حضرتك معاك اول اشعة عملتها بعد ما دراعها ورجليها اتكسروا
اسد: لا مش معايا بس هى عملت الاشعة هنا وغالبا هيكون في نسخة
الدكتور : تمام حضرتك دلوقتى تنزل تحت للاستقبال تقولهم على اسمها ومعلوماتها وهم هيطلعولك الاشعة القديمة والممرضة دلوقتى هتاخدها تعملها اشعة جديدة ونقارن ما بينهم نشوف ايه اللى حصل
اسد : ماشي بس لو فاقت حد يعرفني علطول
الدكتور : تمام
الممرضة حركت اسيا بالترولى اللى نايمة عليه لاوضة الاشعة واسد خرج علشان يجيب الاشعة القديمة بس لقى دكتور شوقي بيتصل بيه
اسد : الو
شوقي : ايوا يا استاذ اسد انت فين دلوقتى
اسد : انا وصلت المستشفى واسيا معايا هى نامت فجأة واحنا فى العربية وجبتها على المستشفى هى بتعمل اشعة دلوقتى
شوقى : طب لو ينفع تيجيلي مكتبي على ما تخلص هى الاشعة
اسد : تمام انا جايلك
وقفل معاه وراحله المكتب
شوقي: اهلا يا استاذ اسد
اسد بجمود :اهلا ياريت بسرعة علشان اسيا لوحدها
شوقي :تمام اتفضل اقعد
بعد ما اسد قعد
شوقي :انا عايز اعرف ايه اللى حصل من يوم ما مشيتوا من عندى
اسد: احنا مشينا من هنا ونقلنا مكان تانى بعيد واسيا كانت طبيعية جدا لحد ما عرفت خبر وفاة والدها وظهرت شخصية جديدة عرفنا أن اسمها إلينا بس شخصية عنيفة جدا
شوقي :شخصية بتدافع عن اسيا بردو
اسد :بالعكس إلينا بتكره اسيا ولي لي وشايفة أن اسيا ضعيفة ودايما لما بتظهر بتختفي بعدها بفترة قصيرة وبتتألم دايما قبل ما تختفي وشخصية اسيا ترجع
شوقي :اللى فهمتوا من كلامك أن اسيا ولي لي مش حابين وجود إلينا على الرغم أنهم متفقين مع بعض
اسد :بالظبط بس اللى انا مش فاهمة ليه اسيا تخلق شخصية جديدة مش هي خلاص خلقت شخصية لي لي علشان يحموا بعض ليه بقى تخلق شخصية تكون بتكرهها بالطريقة دى
شوقي :اللاوعي عند البشر معقد جدا وصعب نفهمه كل اللى احنا بنعمله كدكاترة نفسيين أننا نتعامل كأننا المريض وبمنطقه وبمنطق اسيا غالبا لما حصلتلها الصدمة الأولى خلقت شخصية لي لي ولما حصلتلها الصدمة التانية خلقت شخصية إلينا
اسد :وايه هي الصدمة الأولى والثانية
شوقي :المفروض انا اللى أسأل السؤال دا انا معرفش حاجه عن اللى حصلها قبل كدا علشان اعرف ايه الصدمات اللى حصلتلها
اسد لنفسه : دا على أساس أن انا اللى اعرف ايه اللى حصلها
شوقي :انا عايز اشوفها يمكن اقدر أفسر ظهور شخصية إلينا
اسد :اه صحيح دا انا نسيت كنت المفروض اروح اجيب الأشعة القديمة
شوقي : تمام انا هاجي معاك وبعدين نروح لها
وخرجوا هما الاتنين راحوا جابوا الأشعة
فى الفيلا حسام رجع البيت بس كان حاسس ان هموم الدنيا فوق كتافه كان مفكر انه لما يلاقي زياد هيرتاح بس بعد ما عرف عن اللى حصل لزياد في غيابه حس أن دا كله كان بسببه كان لازم يحميه بس للاسف فشل
قاطع تفكيره صوت عالى من فوق فطلع يشوف في ايه واول ما دخل الاوضة لقى اسر وهمس عماليه يزعقوا مع بعض واريا وزياد وسلمى قاعدة بتعيط وهادي بيحاول يسكتهم ويهدي سلمى وجاسر واقف فى جنب بيتفرج
حسام بزعيق :بس اسكتوا اخرسوا
كله سكت وبصله
هادي بغضب :الحمدلله انك جيت يا حسام اسف انا ماشي انا قولت أننا هاجي هنا علشان تحموني انا واختى دول طلعوا مجانين انا ماشي وراح لبس شنطته وشال سلمى وشنطتها
حسام :تصدقوا انكوا مخليني مش عارف أقوله انت غلطان ما انتوا فعلا مجانين فين اسد يشوف المهزلة دى
هادي :مع اسيا في القاهرة لأن اسيا تعبت ووداها مستشفى الامل عند دكتور شوقي
حسام :طب وهي عاملة ايه دلوقتى
جاسر ببرود :كان بيكلمنا من شوية وقال إنها كويسة
حسام بغضب :اسكت يا جاسر ببرودك دا
جاسر ببرود :هو انا كنت عملت ايه
حسام بغيظ :انت هتجنني بقى سايبهم يتخانقوا بالطريقة دى وهادي هو اللى بيفرق ما بينهم
جاسر :وانا اعملهم ايه هما اللى زى العيال ومن أقل كلمة بيمسكوا في بعض
حسام :واقدر اعرف اتخانقتوا ليه
هادي : علشان اسد وآسيا
حسام: ليه مالهم
جاسر : همس شايفة أن اسد انانى ومش مهتم غير بنفسه واسر شايف أن كل المشاكل اللى جت لاسد كانت بسبب همس واسيا
حسام : تانى نفس الموضوع ما اسد قالكوا مليون مرة أن محدش سبب حاجه لوحدوا وان كلنا بنساعد بعض
اسر وهو بيشاور على همس :هى اللى بدأت
همس :لا والله مش انت اللى قلت أننا اصل المشاكل وأن اسد كان عايش مرتاح قبل ما نظهر في حياته
حسام :اسكتوا خلاص طب وزياد واريا اتخانقوا ليه دا انا كنت بقول أنهم عاقلين
هادي : اريا دخلت في الكلام مع همس وقالت إن اسد مش فارق معاه اى حد مننا فزياد اتعصب وقالها أن هى اللى مش بيفرق معاها حد
حسام :مش عارف اقولكوا ايه بجد كل واحد يروح على اوضته
جاسر :هو احنا عيالك في ايه
حسام بغضب :جاسر امشي من قدامى بدل ما اعمل حاجه اندم عليها
جاسر :خلاص يا عم اديني ماشي انت هترعبنا ليه
وخرج راح لأوضته وبعده خرج اسر وزياد
جاسر :هادي معلش روح شوف جنة وقولها متنساش معاد الدوا بتاعها
هادي :حاضر
واخد سلمى وراحوا لاوضة جنة
حسام لهمس واريا :وانتوا الاتنين اهدوا كدا وبلاش جنون كفاية خناقات احنا مش ناقصين
وخرج وسابهم
في الصعيد وتحديدا قدام اوضة العمليات
يوسف : ها يا دكتور
الدكتور : احنا طلعنا الرصاصة بس المكان اللى اتضربت فيه كان صعب
يوسف :يعني ايه
الدكتور :للاسف الرصاصة هتسيب اثر
فتحية :طب هو هيخرج امتى
الدكتور:احنا هننقله اوضة عادية دلوقتى واول ما يفوق نبقى نشوف موضوع الخروج دا
يوسف: ماشي شكرا يا دكتور
الدكتور : العفو دا واجبي وبالمناسبة اكيد المستشفى بلغت الشرطة لأن دا ضرب نارى
يوسف :ماشي
وبعد شوية جه ضابط وقرب من يوسف وفتحية
الظابط : انت ابن المصاب مش كدا
يوسف :اه انا يوسف ابراهيم
الظابط :بتتهم حد ياللى حصل لوالدك
فتحية :اه يا باشا بنتهم اس....
قاطعها يوسف :لا مش بنتهم حد احنا مشوفناش مين اللى ضرب الطلقة
الظابط بشك :متأكد كدا المحضر هيتقفل على أنه ضد مجهول
يوسف بقوة:اه متأكد
الظابط : لما والدك يفوق هنيجي ناخد أقواله
يوسف :تحت امرك يا باشا
ومشي الظابط وساب يوسف وفتحية
فتحية :اقدر اعرف ليه متهمتش اسد
يوسف :اسد مش غبي علشان يسيب وراه أى دليل وبعدين من امتى والحكومة هى اللى بتاخدلنا حقنا
نسيبهم ونروح عند اسد في المستشفى
راح اسد وشوقي لاوضة اسيا بعد ما اخدوا معاهم الأشعة لقوا اسيا نايمة وجنبها الدكتور والممرضة
اسد للدكتور: الاشعة اهى
الدكتور: تمام واحنا عملنلها الأشعة ونتيجتها هتطلع كمان شوية
وفى الوقت دا دخل ممرض ومعاه الأشعة الجديدة
الدكتور :اهى طلعت
واخد الأشعة فتحها وبص فيها وبعدين فتح الأشعة القديمة وفضل يبص باستغراب
الدكتور :هى الأشعة القديمة دى من امتى
اسد : التاريخ مكتوب عندك
الدكتور :مستحيل اكيد في حاجه غلط
اسد : هو في ايه
الدكتور :مستحيل الاشعتين دول يبقوا لنفس الشخص بالتاريخ اللى مكتوب عليهم دا
اسد :انا مش فاهم حاجه
شوقي : دكتور ممكن تفسر كلامك
الدكتور وهو بيوريه الأشعة القديمة : الاشعة بتاعتها القديمة باين فيها كسر في رجليها ودراعها اليمين وكسر بالمنظر دا عايز على الأقل شهرين علشان العظام تلتئم
وبعدين ساب الأشعة القديمة ومسك الجديدة
الدكتور:ودى الأشعة الجديدة العظام ملتئمة فيها كأنها متكسرتش اصلا وعايز تقولي أن دا حصل فى اقل من شهر
شوقي :فعلا حاجه غريبة ممكن الأشعة القديمة تكون اتبدلت
الممرضة :دى حاجه شبه مستحيلة انا فاكر الحالة دى ويوم ما جت كانت المستشفى كلها مهتمة بيها وانا اللى رحت معاها وهى بتعمل الأشعة ومفيش حد عمل أشعة اصلا فى اليوم دا غيرها انا متأكدة أن الأشعة دى بتاعتها وان التاريخ سليم مية في المية
شوقي:ممكن الأشعة الجديدة هى اللى فيها غلط
الدكتور:خلاص انا هعيد الاشعة وهفضل متابع معاها علشان اتأكد أن الأشعة سليمة
اسد : ماشي
فى الفيلا هادي راح يطمن على جنة ومعاه سلمى بس ملقهاش في اوضتها فنزل تحت لقاها قاعدة فى الجنينة وسرحانة خالص وبترسم على لوحة كبيرة
هادي :جنة
جنة بخضة:ايه
هادي :اسف مكنش قصدي اخضك
جنة :لا عادي في حاجه؟
هادي : حسام بعتي اطمن عليكي
جنة :انا كويسة تعال اقعد
راح هادي وسلمى قعدوا جنبها
سلمى وهى بتشاور على الرسمة :بحر
هادي : واو هو انتى اللى راسمة الرسمة دى؟
جنة :اه
هادي :رسمك حلو اوى ينفع ترسمينى
جنة:بس انا مش برسم ناس
هادي: اه بترسمي اماكن يعني
جنة :اه وبرسم أشخاص كمان
هادي :ازاى مش بترسمي ناس وبترسمي أشخاص
جنة : قصدي انى مش برسم الملامح بتاعت البشر برسم شخصياتهم ممكن شخص يبقى بحر ممكن شخص يبقى نار وهكذا
هادي :طب وانا
جنة:اول ما ابدأ ارسمك هعرف
هادي :طب ممكن ترسميني
جنة بابتسامة :ماشي
نسيبهم ونروح عند حسام اللى اول ما خرج من عند همس واريا افتكر الملف اللى على لابتوب اسد لازم يمسحه قبل ما زياد يشوفه فراح على مكتب اسد ودخل بص على اللابتوب لقى الملف مفتوح فنقله على فلاشة وحذفه بسرعة وحذف كل النسخ الموجودة من الملف دا وهو بيدعي أن زياد ميكونش شافه
فى المنظمة
الكينج بغضب: ايه الاستهبال دا يعني ايه اللى بيحصل دا هو انا شغال معايا عيال مين اللى عمل كدا
الريس3 بخوف : الأسد هو اللى ورا الموضوع
الكينج :يومك قرب اوي يا اسد
قاطعهم دخول حارس
الريس5: انت ازاى يا حيوان تقاطعنا وازاى تدخل المكان دا اصلا
الكينج :استنى مش انت الحارس اللى قلت انك شفت إلينا
الحارس وهو بيقرب من الكينج ويركع:اه انا... اسف بس مكنتش هعرف اقابلك غير كدا
الكينج:وعايز ايه بقى
الحارس :انت قولتلى أن لو كلامي طلع غلط هتخلى موتى يحكوا ويتحاكوا عن بشاعته لسنين
الكينج: كويس انك عارف
الحارس :وانا جاي اثبتلك أن كلامي حقيقة وإن اللى انا شفتها هى إلينا فعلا
الكينج:وهتثبتلي ازاى
الحارس : احنا دايما بنركب كاميرا صغيرة في هدومنا علشان نصور العمليات اللى بنعملها بس انا الكاميرا بتاعتي اتكسرت وكنت مفكر انها مش هتشتغل بس عرفت اطلع منها اللى اتصور
وفتح تليفونه وشغل الفيديو كانت الصورة مش واضحة بس الصوت نقي جدا وهو صوت اسيا وهى بتقول مظنش انك هتكمل اللى بتعمله دا وصورة عينيها وهى بلون الدم ووراها صورة همس
الكينج فضل باصص للتليفون بصدمة ومش بيتكلم حتى بعد ما الفيديو وقف
الريس4:كينج كينج انت معانا؟
الكينج :ها
الريس5: في حاجه يا كينج انت فجأة سرحت وبطلت ترد
الكينج :لا مفيش الاجتماع خلص
وخرج بسرعة ووراه المساعد بتاعه وبسرعة راح ناحية العربية وركب ورا والمساعد بدأ يسوق
المساعد :هنروح فين
الكينج :امشي بس
وبعد شوية
الكينج : وقف وانزل من العربية وقول للحراس محدش يجي ورايا
المساعد :بس
الكينج بغضب :بقولك اقف
المساعد بخوف :حاضر
ووقف بسرعة ونزل من العربية وشاور لعربيات الحراسة أن محدش يجي وراه
أما الكينج فنزل ركب مكان السواق وساق بسرعة جدا لحد ما وصل جنب بحر اسكندرية ونزل وقف قصاد البحر
الكينج لنفسه : طلعوا عايشين إلينا اكيد راجعة تنتقم بس انا هدفعهم التمن على كل حاجه هخليهم كلهم تحت التراب هقتلهم
ورجع ركب العربية وراح عند مكان ايناس اللى كان مربطها جامد وسايبها من غير اكل او ماية حتى
ايناس بألم :ياريتني كنت مت قبل ما اشوفك
الكينج:ياريت مكنش زمانى مخدوع فيكي
ايناس ببكاء :سيبني في حالى بقى
الكينج :تانى هتبدأي تمثيل ما تبطلي بقى دموع التماسيح دى انا اخر واحد ممكن يشفق عليكي أو تصعبي عليه
ايناس :انت عايز ايه مني هتفضل تعذبني كدا لحد امتى
الكينج : لحد ما تموتى هنا وارميكي للكلاب ياكلوا لحمك وبعدها الوعد اللى بنا هيكون انتهى وهقتل بناتك وكاميليا
ايناس بصريخ:انت كداب انت اصلا متعرفش مكانهم
الكينج :لحد اخر مرة كنت فيها هنا كنت كداب بس دلوقتى لا انا خلاص عرفت مكانهم
وبدأ يخرج من الاوضة
ايناس وهى بتحاول تفك نفسها وبتصرخ:لا لا استنى لا بلاش عيالي سيبهم لا هما ملهمش ذنب لا
وقعدت تصرخ حتى بعد ما الكينج خرج لحد ما انهارت ووقعت في الأرض
فى المستشفى في اوضة اسيا
الدكتور : الأشعة الجديدة خلصت
شوقى :طب وايه النتيجة
الدكتور وهو بيبص في الأشعة :نفس النتيجة ازاى فى حاجه غلط اكيد
الممرضة :دكتور دا تحليل الدم وبردو في حاجه غلط فيه
اسد :ما تفهمني بقى
الدكتور : فى حاجه بتحصل غلط فيها عضمها التئم في وقت قصير جدا وكمان تحليل الدم في حاجه غريبة
اسد :حاجه ايه
الدكتور:في مادة غريبة موجودة في دمها انا مش فاهم ايه اللى بيحصل ومش قادر أفسر اي حاجه من دى الصراحة
اسد :هو مش انت دكتور والمفروض تكون فاهم الكلام دا ولا انا جيت مكان غلط
الدكتور: انا عمري ما عدت عليا حالة زى دى انا هفكلها الجبس مبدأيا لأن مفيش فايدة منه حاليا هضمها خلاص التئم
وفك الجبس هو والممرضة وبعد ما خلص
الدكتور: انا فكيت الجبس بس بردو مينفعش تتحرك جامد لأن انا لسه مش فاهم ايه اللى حصل
قاطعهم اسيا وهى بتأن وبتمتم بصوت واطي فاسد قرب منها
اسد :اسيا فوقي انتى سمعانى
اسيا مردتش وفضلت تتكلم بصوت واطي كلام مش مفهوم
فاسد نزل لمستواها علشان يسمع هى بتقول ايه
اسيا بألم :وقف إلينا انا مش قادرة استحمل
وفجأة اسيا فتحت عينيها جامد وعينيها لونها احمر ومسكت فى رقبة اسد اللى للحظة اتصدم ومعرفش يتحرك
اسيا (الينا) :انا مش هقف ابدا
اسد فاق وبسرعة فك ايديها من على رقبتها وبعد بسرعة
اسد :إلينا
اسيا :كويس انك بقيت تعرفني علطول وبالمناسبة تسلم على اللى عملته فى ابراهيم كان مدايقني من زمان
شوقي :إلينا اهدي
اسيا ببرود وهى بتقف:ليه شايفني بصرخ
شوقي:انا مش قصدي انا بس عايز اساعدك
اسيا : مش كانت بنتك اولى تساعدها
شوقي فضل للحظة مصدوم ومش عارف يرد لان فعلا بنته اتخطفت من خمس سنين واختفت وهو لسه بيدور عليه
الدكتور :دكتور شوقي انت كويس
شوقي بأوهام:اه انا كويس
اسد :إلينا كفاية بقى
اسيا :انا معملتش حاجه انتوا اللي مش قادرين تسمعوا حقيقتكوا كلكوا كدابين
قاطعهم دخول ممرضة بتجري
الممرضة :دكتور لازم تيجي حالا
الدكتور :في ايه
الممرضة :في مصابة برا جت فى حادثة وبتنزف جامد ودكتور مراد قالنا ننادى عليك بسرعة وحضرتك كمان يا دكتور شوقي لأن البنت منهارة
خرجت الممرضة ووراها الدكتورين والممرضة اللى كانت معاهم وسابوا اسد واسيا
اسيا:انا عايزة اخرج من هنا
اسد :طب استني لما الدكتور يجي انتى لسه فاكة الجبس
اسيا :وانا بقولك انى مخنوقه وعايزة اخرج من هنا وحالا
وقامت فاسد راح علشان يسندها
اسيا :انا كويسة ومش محتاجه حد يساعدني وخرجت من الاوضة وأسد وراها ونزلوا للطابق اللى تحت وهو طابق الطوارئ ومشيوا شوية بس سمعوا صوت صريخ وصوت دكتور شوقي كمان ولقوا دكاترة كتير محاوطة سرير
وعلى السرير كانت بنت عمرها حوالى 16 سنة وشها مليان كدمات وكل هدومها دم وجنبها سرير عليها واحد في جروح في وشه بس مش كتير وقريب منه ظابط واقف بيتكلم في التليفون والممرضات عمالين يجروا بسرعة لدرجة أن فى واحدة خبطت فى اسيا جامد وكانت هتقع بس اسد مسكها قبل ما تقع
اسد الممرضة :هو في ايه بيحصل
الممرضة بأسى :حادثة اغتصاب البنت دى اتخطفت امبارح من بيتها وانهاردة حاولت تهرب من اللى كان خاطفها بس للاسف اتخبطت بعربية وكمان اللى خطفها اتخبط معاها واللى خبطوها جابوها بسرعة على هنا كان مغمى عليها بس فاقت وعمالة تصرخ بهستيرية ومش عارفين يسيطروا عليها واللى خطفها مغمى عليه والبوليس معاه
شوقي بصوت عالى :حقنة***** بسرعة
الممرضة سابت اسد وجريت تجيب حقنة المهدئ
اما اسد فبص لاسيا لقاها ثابتة فى مكانها وشكلها 1مرعوبة بس لون عينيها لسه احمر
اسد :إلينا مالك
اسيا وقعت في الأرض وبدأ ترجع لورا بجسمها وحضنت رجليها بايديها وهى مرعوبة وبدأت تصرخ برعب
في الفيلا عند همس واريا كانوا بيتكلموا وفجأة همس سكتت وحطت ايديها على قلبها بألم
اريا :في ايه يا همس
همس بوجع:اسيا ااااه اسيا فيها حاجه
فى المستشفى اسد راح يشوف دكتور واسيا بدأت تهدى شوية بس لسه قاعدة فى الارض ولسه صوت صريخ البنت مالى المستشفى وكله مشغول ومحدش اخد باله من الخاطف اللى فاق وقام استغل ان الظابط بيتكلم في التليفون ولبس جاكيت وكاب وغطا وشه كويس وبدأ يخرج من المستشفى والشخص الوحيد اللى كان شايف كل اللى بيحصل دا هي إلينا اللى قامت وسحبت مقص من علبة اسعافات اولية وجريت ناحية الخاطف وغرزت المقص فى ضهره بكل قوتهاوفجأة الخاطف لف وكتفها جامد وطلع مسدس كان مخبيه في هدومه وحطه على دماغها

استوب
ايه اللى هيحصل لآسيا ؟وليه إلينا خافت كدا؟
ازاى اسيا عضمها التئم بالسرعة دى؟
ايه سر كره الكينج لايناس وبناته؟وايه علاقته باسيا؟
يوسف هياخد حق ابراهيم ازاى؟
ازاى زياد يبقى اخو حسام؟ وايه الأسرار اللى حسام مخبيها؟
------------------------------------
سؤال وجواب
---:ليه بتكدب وبتخبي الحقيقة ؟
حسام:ساعات الكدب بيبقى ارحم بكتير من الحقيقة
-----------------------------------