طفلة ولكن

الجزء الثانى١(هروب)

نكمل
فتح الدكتور الباب ودخل
الدكتور بعصبيه : ايه دا فين البنت
دخل يوسف وإبراهيم على صوت الدكتور
يوسف : ايه اللى جرى
الدكتور : معرفش البنت دى راحت فين
وفى الوقت دا عبد القادر جه
عبد القادر وهو بينهج بتعب : فين اسيا
ابراهيم : انت اللى اخدتها يا ابوى
عبد القادر : واخدها ليه هو كان ايه اللى هيحصلها يعنى
ابراهيم بصوت عالى: اسيا بتى انا وانا اللى هتصرف معاها
عبد القادر بقوة: اسيا حفيدتى وانت عارف كويس انا اقدر اعمل فيك ايه فاحسنلك تبعد عنها اهى هربت وخلصت منك ومن قرفكوا
ولا تكون صدقت أنها بتك بجد
ابراهيم : ماشي يا ابوى بس خليك عارف انى هلاقيها واللى حوصل زمان مش هيتكرر تانى ابدا
عند همس
كانت همس بتزق كرسي بعجل بسرعه وعلى الكرسى دا كانت اسيا نايمة ووصلت للباب الخلفى من المستشفى وخرجت بسرعه واول ما شافها السواق اللى تبع عبد القادر نزل بسرعه وساعدها يدخلوا اسيا وركبت همس جنبها والعربية مشيت ووقتها همس فعلا قدرت تاخد نفسها وبدأت تفتكر اللى حصل من شوية
فلاش باك
همس أول ما دخلت اوضة اسيا راحت بسرعه فتحت دولابها وطلعت عبايه من بتوع اسيا ولبستها لاسيا وجابت الكرسي المتحرك وحطت اسيا عليه بس لما جات تخرج سمعت صوت الدكتور بيقرب
وفجأة افتكرت كلام حسام لما كان بيحكيلها عن حادثة حصلت زمان فى المستشفى
حسام بحماس : عارفه الطابق بتاع الشخصيات المهمة دا فى يوم كان فى راجل مهم اوى جه هنا وكان فى الطابق دا وفجأة هجم على المكان دا ناس مسلحين كانوا عاوزين ياخدوا الراجل دا بس يومها قدروا يهربوا عارفه ازاى
همس بملل وتعب : ها
حسام بصوت واطى : طلع أن من تصميم الدور أن فى باب سري فى كل اوضة متغطى بلوحة لو فتحتيه يطلعك على سلم هروب بيوصل على الباب الخلفى للمستشفى
همس : وبعدين
حسام: هو ايه اللى بعدين
همس : انا قايمة يا حسام اكل ولا انام مش ناقصه وجع دماغ شكلك شفت فلم اكشن امبارح وأثر فيك سلام
نرجع لهمس بقى
همس : صح باب خلفى ورا لوحة وبدأت تبص حواليها لقت فى اربع لوح بسرعه بدأت تحرك فيهم حركت اول واحدة ولقت وراها حيطة وكذلك التانيه واول ما حركت التالته لقت باب مدهون بنفس لون الأوضة علشان ميبانش وهى بتفتحه لقت اوكرة الباب بتتحرك
همس : يالهوى
وبسرعه فتحت الباب ونزلت وبسرعه مشيت مع اسيا وخرجت بره لحد ما وصلت للباب
خلص الفلاش باك
اما عن اسر صاحب اسد
كان فى الطيارة وكان فى مضيفة طيران جميلة بتمر من جنبه
اسر : هاى
المضيفه. بابتسامة : هاى
اسر: حلوة اوى السلسلة اللى انتى لبساها
المضيفه بمياعة: لو عجبتك خدها
اسر: طب ما تجيبيها
المضيفه : هى ايه
اسر : الرقم
وزى ما انتو شايفين هو دا اسر عايش بمزاجه مش مهتم بحاجه فى الدنيا وعلى الرغم من كدا فهو دكتور شاطر جدا فى مجاله وهو الجراحه
نروح لاسد
أول ما وصل المستشفى لقى الحرس بتوعه برا وواحد من الحرس قرب منه
الحارس : البنت اختفت من المستشفى
اسد بغضب : شوف كل اللى شغالين فى المستشفى موجودين ولا لأ
ورقم اوضتها كام
الحارس :٥٢٣
راح اسد ناحيه اوضتها وراح الحارس بسرعه يشوف اللى شغالين فى المستشفى
بعد نص ساعه كان همس وآسيا وصلوا
السواق : بصي يا دكتورة الشقه فى الدور الرابع
همس : هو انت عرفت منين أن انا دكتورة
السواق : عبد القادر باشا قالى
همس : هو انت معاه من زمان
السواق :من يوم ما وعيت على الدنيا عشت معاه فى الصعيد وجيت معاه هنا بعد موت الست هانم الله يرحمها
همس : طب معلشي ممكن تساعدنى اطلع اسيا
السواق : الست اسيا دى انا اشيلها فوق راسي لو الدنيا ماشلتهاش
وفعلا طلعوا اسيا الأوضة ونيموها فى السرير وطلعوا يتكلموا برا
السواق وهو بيديها مسدس: اتفضلى يا دكتورة عبد القادر باشا قالى اديهولك
همس بخوف : ليه
السواق : متخافيش دا بس علشان لو أهلها جم هو كدا كدا مفيهوش طلقات بس علشان تهوشي بيه لو عرفوا يوصلوا هنا
اخدت همس المسدس وحطته فى شنطتها وسألت السواق: هى اسيا طيبه ؟
السواق :طيبه بس دى احن بنت على الأرض طالعه لمامتها
همس :مامتها دا انا عمرى ما شفت فى قسوة مامتها
السواق : لا اللى فى المستشفى دى ماكنتش مامتها اللى بجد يعنى مش هيا اللى خلفتها
وقبل ما يكمل كلامه سمعوا صوت صريخ اسيا جوه الاوضه فقاموا بسرعه واول ما همس فتحت باب الأوضة انصدمت
استوب

يا ترى همس انصدمت من ايه ؟؟
وايه حكايه ام اسيا؟؟

بالنسبه للناس اللى بتسأل القصه هتكمل امتى
انا بكتب فى أوقات فراغى ومش حاطه ايام معينه انشر فيها لو فى تفاعل فدا معناه أن فى ناس عايزة اكمل فبكمل ولو مفيش فبوقف علشان ميكونش تضييع وقت