ﺳﻨﺪ ﺍﻻﻧﺜﻰ ﺭﺟﻞ shosho_shosho

الحلقة44

ﺍﻟﺤﻠﻘﺔﺓ ‏[ 44 ‏]
ﻣﻦ ﺭﻭﺍﻳﺔ - - "<- # ﺳﻨــﺪ _ ﺍﻷﻧﺜــﻰ _ ﺭﺟــﻞ "
ﻣﺤﻤﻮﺩ ﻟﻤﺎ ﺷﺎﻑ ﻧﻮﺍﻝ ﻓﺮﺡ
ﻗﻌﺪﻧﺎ ﻧﺤﻜﻮ ﻟﺤﺪ ﻣﺎﻣﺤﻤﻮﺩ ﻗﻄﻌﻨﺎ ﺑﺼﻮﺕ ﺣﺎﺯﻡ ﺷﻮﻱ
ﻣﺤﻤﻮﺩ : ﺃﻣﻲ ﺑﻤﺎ ﺍﻧﻜﻢ ﻣﻮﺟﻮﺩﻳﻦ ﻛﻠﻜﻢ ﺍﻫﻨﻲ ﻧﺒﻲ ﻧﻘﻮﻝ ﺣﺎﺟﺔ
ﺍﺣﻨﻲ ﺷﻔﻨﺎﻟﻪ ﻭﻧﺴﺘﻨﻮ ﺷﻦ ﺑﻴﻘﻮﻝ
ﻣﺤﻤﻮﺩ : ﺍﻣﻲ ﺍﻧﻲ ﻧﺒﻲ ﻧﺨﻄﺐ ﻧﻮﺍﻝ ، ﻟﻮ ﻋﻤﺘﻲ ﻭﺍﻧﺘﻲ ﻣﻮﺍﻓﻘﻴﻦ ﺍﻧﻲ ﻧﺒﻴﻬﺎ ﻭﻋﺎﺟﺒﺘﻨﻲ ﻭﺭﺍﻳﺪﻫﺎ ﺑﺎﻟﺤﻼﻝ
ﻧﻮﺍﻝ
ﻋﻤﺘﻲ ﻭﻣﺎﻣﺎ
ﺍﻧﻲ ﺍﺑﺘﺴﻤﺖ
ﺭﺣﻤﺔ : ﻣﺴﻠﺴﻞ ﺗﺮﻛﻲ
ﻣﺤﻤﻮﺩ ﻓﻨﺺ ﻓﻲ ﺭﺣﻤﺔ ، ﺑﻌﺪﻫﺎ ﻗﻌﺪ ﻳﺸﻮﻑ ﻟﻮﺟﻮﻩ ﻋﻤﺘﻲ ﻭﻣﺎﻣﺎ
ﺍﻧﻲ ﺷﻔﺖ ﻟﻮﻟﻴﺪ ﺍﻟﻲ ﺷﺪ ﻳﺪﻱ ، ﺍﺑﺘﺴﻤﺘﻠﻪ
ﻣﺤﻤﻮﺩ : ﻫﺎ ﺷﻦ ﺭﺍﻳﻜﻢ
ﻣﻨﻰ : ﻃﺎﻟﻌﻴﻦ ﻟﺒﻌﺾ ﻳﺎﻣﺎﻣﺎ
ﻭﻓﺎﺀ : ﺍﻥ ﺷﺎﺀ ﺍﻟﻠﻪ ﺭﺑﻲ ﻳﻜﺘﺒﻠﻜﻢ ﻧﺼﻴﺐ ﻓﻲ ﺑﻌﺾ
ﻧﻮﺍﻝ ﻣﺼﺪﻭﻣﻪ ﻟﻔﺖ ﻭﻃﻠﻌﺖ ﻣﻦ ﺍﻟﺪﺍﺭ ﻭﻗﻠﺒﻬﺎ ﻳﺪﻕ ﺑﻘﻮﺓ
ﻋﻤﺘﻲ : ﻭﺍﻟﻠﻪ ﻣﻨﻲ ﺍﻧﻲ ﺍﻟﺤﻖ ﺻﺪﻣﺘﻨﻲ ﻭﻓﺮﺣﺘﻨﻲ ﻓﻲ ﻧﻔﺲ ﺍﻟﻮﻗﺖ ﻣﺎﻧﻠﻘﺎﺵ ﺯﻳﻬﺎ ، ﻟﻜﻦ ﻛﺎﻥ ﻗﻠﺘﻠﻲ ﻭﺩﺭﻧﺎﻫﺎ ﺑﺎﻷﺻﻮﻝ ، ﻭﺍﻻ ﺷﻦ ﺭﺍﻳﻚ ﻳﺎﻧﺎﺩﻳﻪ
ﻣﺎﻣﺎ ﺍﺑﺘﺴﻤﺖ : ﻫﻲ ﻟﻴﻪ ﻛﺎﻥ ﻣﻮﺍﻓﻘﻪ
ﻣﺤﻤﻮﺩ ﻗﺮﻳﺐ ﻃﺎﺭ ﻣﻦ ﺍﻟﻔﺮﺣﺔ
ﻣﻨﻰ : ﺭﻭﺭﻭﺭﻭﺭﻭﺭﻭﺭﻱ
ﻭﻟﻴﺪ : ﺗﻴﻴﻲ ﺍﺳﻜﺘﻲ ﻳﻨﻌﻦ ﺷﻜﻠﻚ
ﻣﻨﻰ : ﻫﻬﻬﻬﻬﻬﻬﻬﻪ ﺗﺤﻤﺴﺖ
ﺍﻧﻲ : ﻫﻬﻬﻬﻬﻬﻪ ﻣﺒﺮﻭﻭﻙ
ﻣﺤﻤﻮﺩ ﻳﺤﻚ ﺷﻌﺮﻩ ﻭﻳﻀﺤﻚ : ﺍﻟﻠﻪ ﻳﺒﺎﺭﻙ ﻓﻴﻚ
ﺭﺣﻤﺔ : ﻭﺍﻟﻠﻪ ﻣﺘﺄﺛﺮﻳﻦ ﺑﺎﻟﻤﺴﻠﺴﻼﺕ ﺭﺍﻧﺎ ﻓﻲ ﻟﻴﺒﻴﺎ ﻋﻠﻴﻚ ﺟﻮ ﺣﺎﻣﺾ ، ﻭﻟﻔﺖ ﻭﻃﻠﻌﺖ
ﻣﺤﻤﻮﺩ ﻗﺮﻥ ﺣﻮﺍﺟﺒﻪ
ﻭﻓﺎﺀ ﻓﻲ ﻣﺤﺎﻭﻟﺔ ﺗﻠﻄﻴﻒ ﺍﻟﺠﻮ : ﻭﻳﻦ ﺍﻟﻌﺮﻭﺳﺔ ﺑﺴﺲ ﺗﺤﺸﻤﺖ ﺷﻜﻠﻬﺎ
ﻣﺤﻤﻮﺩ : ﻫﻬﻬﻬﻬﻬﻪ
ﻣﺎﻣﺎ : ﻫﻬﻬﻬﻬﻪ ﻏﻴﺮ ﺭﺩ ﺑﺎﻟﻚ ﻋﻠﻴﻴﻬﺎ ﺑﺲ ﺑﻨﺘﻲ ﺍﻟﺼﻐﻴﺮﻩ ﻫﺎﺩﻱ
ﻋﻤﺘﻲ : ﻣﺎﺗﺨﺎﻓﻴﺶ ﻳﺎﻧﺎﺩﻳﺔ ﻧﺴﻴﺒﺔ ﻭﻧﻮﺍﻝ ﺍﻥ ﺷﺎﺀ ﺍﻟﻠﻪ ﺯﻱ ﺑﻨﻴﺎﺗﻲ
ﺍﻣﺎ ﺑﺮﺍ
ﻧﻮﺍﻝ ﻣﻘﻌﻤﺰﻩ ﻭﻣﺘﻮﺗﺮﺓ ﻭﻣﺶ ﻋﺎﺭﻓﻪ ﺷﻦ ﺍﻟﻲ ﺻﺎﻳﺮ ﺍﻟﺪﺍﺧﻞ ﻭﻫﻞ ﻣﺎﻣﺎ ﻭﻋﻤﺘﻲ ﻭﺍﻓﻘﻮ
ﺍﻣﺎ ﺭﺣﻤﺔ ﻟﻤﺎ ﻃﻠﻌﺖ ﺷﺎﻓﺖ ﻟﻨﻮﺍﻝ ﺗﻘﻮﻝ ﺩﺍﻳﺮﻩ ﺟﺮﻳﻤﻪ ﻭﻣﺎﻳﺨﻼﺵ ﺍﻷﻣﺮ ﻣﻦ ﺍﻟﺘﻠﻘﻴﺢ ﻭﺍﻣﺸﺖ ، ﻧﻮﺍﻝ ﻣﺎﺩﻭﺭﺗﺶ ﻭﻣﺎﺭﺩﺗﺶ ﻋﻠﻴﻬﺎ
ﺭﺣﻤﺔ ﻭﻫﻲ ﻣﺎﺷﻴﺔ ﻗﺎﺑﻠﻬﺎ ﻋﻤﺮ ، ﺍﻳﻮﺍ ﺍﻳﻮﺍ ﻋﻤﺮ ﺻﺎﺣﺐ ﻣﺤﻤﻮﺩ
ﺭﺣﻤﺔ ﻭﻗﻔﺖ ﻭﻗﻌﺪﺕ ﺗﺸﻮﻓﻠﻪ ﻭﻓﺮﺣﺎﻧﻪ ﻣﻦ ﺩﺍﺧﻞ
ﺍﻣﺎ ﻋﻤﺮ ﻓﻘﺪﻡ ﺑﻴﺴﻠﻢ ﻋﻠﻴﻬﺎ : ﺍﻧﺘﻲ ﺍﺧﺖ ﻣﺤﻤﻮﺩ ﺻﺢ ؟
ﺭﺣﻤﺔ ﺳﻠﻤﺖ ﻋﻠﻴﻪ : ﺍﻳﻪ ﺍﻧﻲ ، ﺍﻧﺖ ﻋﻤﺮ ﺻﺎﺣﺒﻪ
ﻋﻤﺮ : ﺑﺎﻟﻀﺒﻂ ، ﻛﻴﻒ ﺣﺎﻟﻪ ﻣﺤﻤﻮﺩ ﺗﻮﺍ
ﺭﺣﻤﺔ : ﻛﻮﻳﺲ ، ﻓﻲ ﻏﺮﻓﺘﻪ ﺍﻟﻌﺎﻳﻠﻪ ﻛﻠﻬﻢ ﻋﻨﺪﻩ
ﻋﻤﺮ : ﻣﺎﻓﻴﻬﺎﺵ ﻛﻴﻒ ﻧﺸﻮﻓﻪ
ﺭﺣﻤﺔ : ﻻﺗﻌﺎﻝ ﺗﻮ ﻧﻜﻠﻤﻬﻢ ، ﻭﺍﻣﺸﺖ ﻭﻫﻮ ﻭﺭﺍﻫﺎ
ﻣﺤﻤﻮﺩ ﺷﺎﻑ ﻟﻮﻟﻴﺪ : ﺍﻋﻄﻴﻨﺎ ﺭﺍﻳﻚ ﺑﺘﻮﻟﻲ ﻋﺪﻳﻠﻲ ﺗﻮﺍ ؟
ﺍﺣﻨﻲ : ﻫﻬﻬﻬﻬﻬﻬﻪ
ﻭﻟﻴﺪ : ﻣﺎﻃﻠﺒﺘﺶ ﺭﺍﻳﻲ ﺍﻧﺖ
ﻣﺤﻤﻮﺩ : ﻣﻠﺢ
ﻭﻟﻴﺪ : ﺭﺑﻲ ﻳﺒﺎﺭﻛﻠﻜﻢ ، ﺍﻧﻲ ﺑﻨﻮﺽ ﻟﺪﺍﺭﻱ ﻧﺘﺮﻳﺢ ﺷﻮﻳﺔ
ﺍﻧﻲ ﺷﺪﻳﺖ ﻳﺪﻩ : ﺑﺎﻩ ﺗﻌﺎﻝ ﻧﺴﺎﻋﺪﻙ
ﻧﺼﺖ ﺍﻧﻲ ﻭﻟﻴﺪ ﻭﻃﻠﻌﻨﺎ ، ﻃﻮﻝ ﺷﻔﻨﺎ ﻧﻮﺍﻝ
ﻭﻟﻴﺪ : ﻫﻬﻬﻬﻬﻬﻬﻬﻪ ﻣﻘﻌﻤﺰﻩ ﺍﺣﻨﻲ ﺗﻘﻮﻝ ﻭﺣﺪﺓ ﻣﻌﺎﻗﺒﻴﻨﻬﺎ
ﺍﻧﻲ : ﻫﻬﻬﻬﻬﻪ ﺗﺤﺸﻤﺖ ﻣﺴﻜﻴﻨﻪ
ﻧﻮﺍﻝ ﻭﻗﻔﺖ ﻭﺟﺘﻨﺎ : ﻓﻜﻮﻧﻲ ﻣﻦ ﺗﺴﻬﻮﻳﻜﻜﻢ ﻗﻮﻟﻮﻟﻲ ﺷﻦ ﻗﺎﻟﺖ ﻣﺎﻣﺎ ؟ ﻭﺍﻓﻘﺖ ؟
ﻭﻟﻴﺪ ﺷﺎﻓﻠﻲ : ﻣﺎﻧﻌﺮﻓﻮﻭﻭﺵ
ﺍﻧﻲ : ﻫﻬﻬﻬﻬﻪ ﺍﺑﺪﺍ
ﻧﻮﺍﻝ : ﻭﺍﺍﺍﺍﻙ ﺑﺎﺭﺭﺩﻳﻦ ﻏﻴﺮ ﻫﻴﺎ ﺑﺎﻟﻠﻪ ﻋﻠﻴﻜﻢ
ﺍﻧﻲ ﻛﻴﻒ ﺑﻨﺘﻜﻠﻢ ﺗﻠﻔﺘﺖ ﺷﻔﺖ ﺭﺣﻤﺔ ﺟﺎﻳﻪ ﻭﺟﻨﺒﻬﺎ ﺭﺍﺟﻞ ﻭﻛﺎﻧﻮ ﻣﺒﺘﺴﻤﻴﻦ ‏( ﺧﻔﺖ ﻳﺸﻮﻓﻬﺎ ﻭﻟﻴﺪ ‏) : ﻫﻲ ﻧﻤﺸﻮ ﻳﺎﻭﻟﻴﺪ ، ﻛﺎﻧﺖ ﺣﺠﺮﺓ ﻭﻟﻴﺪ ﺑﻌﻜﺲ ﺍﻻﺗﺠﺎﻩ ﺍﻟﻲ ﺟﺎﻳﻪ ﺑﻴﻪ ﺭﺣﻤﺔ ، ﻗﻌﺪﺕ ﻧﺠﺒﺪ ﻓﻴﻪ ﻣﻦ ﻳﺪﻩ
ﻧﻮﺍﻝ ﺭﻛﺰﺕ ﻋﻠﻴﺎ ﻭﺗﻠﻔﺖ ﻭﻳﻦ ﻣﺎﻧﻲ ﺷﻔﺖ
ﻭﻟﻴﺪ : ﺑﺎﻩ ﻳﺎﻧﻮﺳﻪ ﺧﻴﺮﻙ ، ﺧﻠﻲ ﻧﺘﺴﻬﻮﻛﻮ ﻋﻠﻲ ﻧﻮﺍﻝ
ﺍﻧﻲ : ﻻﻻ ﺧﻼﺹ ﻫﻴﺎ ، ﻭﻧﺸﻮﻑ ﻟﺮﺣﻤﺔ
ﺭﺣﻤﺔ ﺷﺎﻓﺖ ﻭﻟﻴﺪ ﻭﻗﻔﺖ
ﻋﻤﺮ : ﺧﻴﺮﻙ ، ﻭﺷﺎﻑ ﻭﻟﻴﺪ
ﻭﻓﻲ ﺍﻟﻠﺤﻈﺔ ﺍﻟﻲ ﺗﻜﻠﻢ ﻓﻴﻬﺎ ﻋﻤﺮ ﻭﻗﺎﻡ ﺭﺍﺳﻪ ﻭﺷﺎﻑ ﻭﻟﻴﺪ ، ﻭﻟﻴﺪ ﺗﻠﻔﺖ ﻭﺟﺖ ﻋﻴﻨﻪ ﻓﻲ ﻋﻴﻦ ﺭﺣﻤﺔ ﻭﻳﺸﻮﻑ ﻋﻤﺮ ﺟﻨﺒﻬﺎ ﺗﻜﻨﻄﻰ ﻭﻋﺾ ﻋﻠﻲ ﺷﺎﺭﺑﻪ ﺍﻟﻠﻮﻃﻲ ، ﻃﻠﻖ ﻳﺪﻱ ﻭﺍﻣﺸﻲ ﺟﻴﻬﺘﻬﻢ
ﻋﻤﺮ ﻗﺪﻡ ﻳﺒﻲ ﻳﺤﺎﻭﻝ ﻳﻮﺿﺢ ﺍﻟﻤﻮﻗﻒ : ﻛﻴﻒ ﺣﺎﻟﻚ ﻳﺎﻭﻟﻴﺪ ، ﺟﻴﺖ ﻗﺎﺑﻠﺘﻨﻲ ﺍﺧﺘﻚ ﺍﻣﺸﻲ ﺍﻣﺸﻲ ﺳﺎﻟﺘﻬﺎ ﻋﻠﻲ ﻣﺤﻤﻮﺩ ﻭﻫﻲ ﻗﺎﻟﺖ ..
ﻗﺎﻃﻌﻪ ﻭﻟﻴﺪ : ﺑﺎﺭﻙ ﺍﻟﻠﻪ ﻓﻴﻚ ﺍﻟﺤﻤﺪ ﻟﻠﻪ ﻣﺤﻤﻮﺩ ﻛﻮﻳﺲ ، ﺗﻘﺪﺭ ﺗﺨﺸﻠﻪ ﻓﻲ ﻏﺮﻓﺘﻪ ، ﻭﺷﺎﻑ ﻟﺮﺣﻤﺔ : ﺗﻌﺎﻝ ﻣﻌﺎﻱ ، ﻭﻟﻒ ﻭﻳﻤﺸﻲ ﺑﺤﺮﻛﺔ ﺳﺮﻳﻌﻪ ﺟﻬﺔ ﺩﺍﺭﻩ ، ﺍﻧﻲ ﻟﺤﻘﺘﻪ
ﺭﺣﻤﺔ ﺗﺮﻋﺶ ﻣﻦ ﺍﻟﺨﻮﻑ ، ﻭﺍﻣﺸﺖ ﻭﺭﺍﻩ
ﺍﻣﺎ ﻋﻤﺮ ﻓﻘﻌﺪ ﻭﺍﻗﻒ ﻣﺶ ﻋﺎﺭﻑ ﺷﻦ ﻳﺪﻳﺮ
ﺧﺶ ﻭﻟﻴﺪ ﺍﻟﺪﺍﺭ ، ﺧﺸﻴﺖ ﻭﺭﺍﻩ ﻭﺧﺸﺖ ﻭﺭﺍﻱ ﺭﺣﻤﺔ ﻉ ﻃﻮﻝ
ﻭﻟﻴﺪ ﻟﺮﺣﻤﺔ : ﺳﻜﺮﻱ ﺍﻟﺒﺎﺏ
ﺭﺣﻤﺔ ﺗﺮﻋﺶ ﻭﺍﻗﻔﻪ
ﺍﻧﻲ ﺳﻜﺮﺕ ﺍﻟﺒﺎﺏ ﻭﺟﻴﺖ ﺑﻨﺘﻜﻠﻢ ﻗﺎﺍﻃﻌﻨﻲ ﻭﻟﻴﺪ
ﻭﻟﻴﺪ : ﻣﺎﺗﺪﺧﻠﻴﺶ ﺍﻧﺘﻲ ، ﻗﻮﻟﻴﻠﻲ ﻳﺎﻫﺎﻧﻢ ﻋﻼﺵ ﻛﻨﺘﻲ ﻣﻌﺎﻩ ﻫﺬﺍ ﺍﻟﻲ ﺍﺳﻤﻪ ﻋﻤﺮ
ﺭﺣﻤﺔ : ﺍﻧﻲ ﻣﺎﻛﻨﺘﺶ ﻣﻌﺎﺍﻩ ﺍﻧﻲ
ﻗﺎﻃﻌﻬﺎ ﻭﻟﻴﺪ : ﻣﻦ ﻏﻴﺮﺭﺭﺭ ﻛﺬﺏ
ﺭﺣﻤﺔ : ﻭﺍﻟﻠﻪ ﻣﺎﻧﻜﺬﺏ ﻫﻮ ﺍﻟﻘﻴﺘﻪ ﺟﺎﻱ ﺍﺳﺎﻟﻨﻲ ﺍﻧﺘﻲ ﺍﺧﺖ ﻣﺤﻤﻮﺩ ﻗﻠﺘﻠﻪ ﺍﻳﻪ ، ﺑﻌﺪﻫﺎ ﻗﻠﺘﻠﻪ ﺍﻟﻌﺎﻳﻠﻪ ﻋﻨﺪﻩ ﺗﻮ ﻧﻜﻠﻤﻬﻢ ﺑﺎﺵ ﻳﻘﺪﺭ ﻳﺨﺸﻠﻪ ، ﻫﺬﺍ ﻫﻮ
ﻭﻟﻴﺪ ﻳﺸﻮﻓﻠﻬﺎ ﺑﻌﺼﺒﻴﻪ ﻭﺷﺎﺩ ﺍﻋﺼﺎﺑﻪ : ﺍﺧﺮﺭ ﻣﺮﺓ ﻳﺎﺭﺣﻤﺔ ﺍﺧﺮ ﻣﺮﺓ ﻭﺍﻻ ﺍﻗﺴﻢ ﺑﺎﻟﻠﻪ ﺗﻌﺮﻓﻲ ﺷﻦ ﻧﺪﻳﺮ ﻓﻴﻚ
ﺭﺣﻤﺔ ﺷﺎﻓﺘﻠﻲ ﻭﺣﺴﻴﺘﻪ ﺍﻏﺘﺎﺿﺖ ﻛﻴﻒ ﻳﻬﺰﺏ ﻓﻴﻬﺎ ﻛﺬﺍﺑﻲ
ﻭﻟﻴﺪ : ﺗﻮﺍ ﺗﻤﺸﻲ ﺗﻘﻌﻤﺰﻱ ﺟﻨﺐ ﺍﻣﻚ ﻭﺍﻫﻮ ﻧﺸﻮﻑ ﺗﺤﻮﺳﻲ ﺍﻫﻨﻲ ﻭﺍﻻ ﺍﻫﻨﻲ ﻓﻲ ﺍﻟﻤﺴﺘﺸﻔﻰ ﺍﻟﻠﻪ ﻣﺎﻳﺼﻴﺮ ﻃﻴﺐ
ﺭﺣﻤﺔ : ﺑﺎﻫﻲ ﻳﺎﻭﻟﻴﺪ ﺍﻧﻲ ﻣﺎﺩﺭﺕ ﺷﻲ ﻏﻠﻂ
ﻭﻟﻴﺪ : ﻻﻭﺍﻟﻠﻪ ﻧﺮﺍﺟﻴﻚ ﻟﻴﻦ ﺗﺪﻳﺮﻳﻪ ﺍﻟﻐﻠﻂ ﺍﻧﻲ ، ﺍﻧﻲ ﺍﻟﻲ ﺩﺭﺗﻪ ﻟﻤﺼﻠﺤﺘﻚ ﻓﺎﻫﻤﻪ ﻣﺶ ﻟﻤﺼﻠﺤﺘﻲ ﺍﻧﻲ ، ﻣﺶ ﻛﻞ ﺍﻟﻨﺎﺱ ﻛﻮﻳﺴﺔ ﻭﻣﺶ ﻛﻞ ﺣﺪ ﺗﻜﻠﻤﻴﻪ ، ﻭﻣﺶ ﻛﻞ ﺣﺪ ﺗﻮﻗﻔﻲ ﻋﻠﻴﻪ ، ﺑﺎﻫﻲ ؟
ﺭﺣﻤﺔ : ﺑﺎﻫﻲ
ﻭﻟﻴﺪ : ﺧﻠﻴﻜﻢ ﺍﻫﻨﻲ ﻣﺎﺗﻄﻠﻌﻮﺵ ، ﻭﻃﻠﻊ
ﺍﻧﻲ ﻗﻌﻤﺰﺕ ﻉ ﺍﻟﺼﺎﻟﻮﻥ
ﺭﺣﻤﺔ ﺗﺪﻭﺭ ﻓﻲ ﺍﻟﺪﺍﺭ ﺑﻌﺼﺒﻴﻪ
ﺍﻧﻲ ﺷﻔﺘﻠﻬﺎ
ﺭﺣﻤﺔ ﺗﻠﻔﺘﺘﻠﻲ : ﺧﻴﺮﻙ ﺗﺸﺒﺤﻴﻠﻲ ﻫﻜﻲ
ﺍﻧﻲ ﻳﺎﺍﻣﺎﻣﻲ : ﻧﺸﺒﺢ ﻋﺎﺩﻱ ﺍﻧﻲ
ﻭﻟﻴﺪ ﻟﻤﺎ ﻃﻠﻊ ﺍﻟﻘﻲ ﻋﻤﺮ ﻗﺎﻋﺪ ﻭﺍﻗﻒ ﻓﻲ ﻣﻜﺎﻧﻪ
ﻧﻮﺍﻝ ﻗﻌﺪﺕ ﻣﻘﻌﻤﺰﺓ ﻻﻋﺮﻓﺖ ﺗﺨﺶ ﻭﺍﻻ ﺗﻘﻌﺪ ﻭﻻﻗﺪﺭﺕ ﺗﺘﺤﺮﻙ
ﻭﻟﻴﺪ ﺟﻲ ﺟﻬﺔ ﻋﻤﺮ : ﺧﻠﻴﻚ ﺗﻮ ﻧﻜﻠﻢ ﺍﻟﻌﻴﻠﻪ ﻳﻄﻠﻌﻮ
ﻋﻤﺮ : ﻭﻟﻴﺪ ﻣﺎﺗﻔﻬﻤﺶ ﺍﻟﻤﻮﺿﻮﻉ ﻏﻠﻂ ﻭﺍﻟﻠﻪ ﻣﺠﺮﺩ ﺳﺎﻟﺘﻬﺎ ﺑﺲ ﻭﻗﺎﻟﺘﻠﻲ ﺍﻧﻪ ﺍﻟﻌﻴﻠﻪ ﻋﻨﺪﻩ
ﻭﻟﻴﺪ : ﺗﻤﺎﺍﻡ ﻳﺎﺑﺮﻭ ﻏﻴﺮ ﺭﺩ ﺑﺎﻟﻚ ﺑﺲ ﻣﺮﺓ ﺗﺎﻧﻴﻪ
ﻋﻤﺮ : ﻋﻴﺐ ﻳﺎﻭﻟﻴﺪ ﺍﺧﺘﻚ ﻫﻲ ﺍﺧﺘﻲ ﻭﺍﻟﻠﻪ ﻣﺎﻣﻘﺼﻮﺩﻩ
ﻭﻟﻴﺪ ﺣﻂ ﻳﺪﻩ ﻋﻠﻲ ﻛﺘﻒ ﻋﻤﺮ : ﻣﺎﺻﺎﺭ ﺷﻲ ، ﻭﺗﻠﻔﺖ ﻟﻨﻮﺍﻝ : ﺑﺮﻱ ﺧﺸﻲ ﻣﻌﺎﻫﻢ
ﻧﻮﺍﻝ ﻧﺎﺿﺖ ﻭﺟﺘﻨﺎ
ﻭﻟﻴﺪ ﺧﺶ ﻛﻠﻢ ﺍﻟﻲ ﻓﻲ ﺍﻟﺪﺍﺭ ﻭﻃﻠﻌﻮ ﻣﻦ ﻣﺤﻤﻮﺩ ﻭﺟﻮﻧﺎ ﻓﻲ ﺩﺍﺭ ﻭﻟﻴﺪ
ﺍﻧﻲ : ﻭﻟﻴﺪ ﻳﻠﻮﺩ ﻓﻲ ﺍﻟﻤﺴﺘﺸﻔﻰ ﻭﻣﺶ ﻣﺪﻭﺭ ﻭﻻﻛﺎﻧﻪ ﺑﻄﻨﻪ ﻣﺨﻴﻄﺔ ﺟﺪﻳﺪ
ﻋﻤﺘﻲ : ﺷﻦ ﺑﺘﺪﻳﺮﻟﻪ ﻫﻲ ﻣﺎﻳﺴﻤﻌﺶ ﻓﻲ ﺍﻟﻜﻼﻡ ﻳﺪﻳﺮ ﻣﺎﻓﻲ ﺭﺍﺳﻪ
ﺍﻧﻲ : ﻫﻮ ﻛﺎﻥ ﻋﺎﺩﻱ ﻳﺘﺤﺮﻙ ﺭﺍﻫﻮ ﻃﻠﻌﻮﻩ ﻣﻦ ﺍﻟﻤﺴﺘﺸﻔﻰ ﻟﻜﻦ ﺍﻟﺪﻛﺘﻮﺭ ﻣﺤﺬﺭﻩ ﻭﻗﺎﻟﻪ ﺭﺩ ﺑﺎﻟﻚ
ﻣﻨﻰ : ﺗﺘﻔﻜﺮﻱ ﻳﺎﻣﺎﻣﺎ ﻟﻤﺎ ﻭﻟﻴﺪ ﺻﻐﻴﺮ ﻫﻜﻲ ﻋﻤﺮﻩ ﻋﺸﺮﻩ ﺳﻨﻴﻦ ، ﺿﺮﺑﺎﺗﻪ ﺳﻴﺎﺭﻩ ﺍﻧﻜﺴﺮﺕ ﺭﺟﻠﻪ ، ﻛﺎﻥ ﻧﻘﻮﻟﻚ ﺍﻟﺮﺟﻞ ﻣﺠﺒﺴﺔ ﺍﻟﻘﻴﻨﺎﻩ ﺑﻴﻄﻠﻊ ﺑﻴﻤﺸﻲ ﻳﻠﻌﺐ ﻛﻮﺭﺓ ، ﻭﻳﻌﻜﺰ ﻭﻳﻘﺎﻭﻡ ﻭﻣﺶ ﻃﺎﻳﻖ ﻳﻘﻌﻤﺰ ﺳﺎﻋﻪ ﻋﻠﻲ ﺑﻌﻀﻬﺎ
ﻋﻤﺘﻲ : ﺍﻳﻪ ﻭﺍﻟﻠﻪ ، ﻭﺗﻘﻮﻟﻲ ﻛﻴﻒ ﺑﻴﻠﻌﺐ ﻭﻛﻴﻒ ﺑﻴﻮﻗﻒ ، ﻧﻘﻮﻟﻪ ﻛﻴﻒ ﺑﺘﻠﻌﺐ ﻗﻌﻤﺰ ﻳﻘﻮﻟﻲ ﺷﻲ ﺗﻮ ﻧﺪﺑﺮ ﺍﻧﻲ ﻣﺎﻧﻲ ﻗﺎﻋﺪﻫﺎ
ﻣﻨﻰ : ﻫﻬﻬﻬﻪ ﺭﺍﺳﻪ ﻣﺴﻜﺮ
ﺍﻧﻲ : ﻫﻬﻬﻬﻬﻬﻪ ﻫﻮ ﻣﻦ ﻧﺎﺣﻴﻪ ﺭﺍﺳﻪ ﻣﺴﻜﺮ ﻓﻤﺴﻜﺮ ، ﻋﻨﻴﺪ ﺑﻜﻞ
ﻋﻤﺘﻲ : ﻣﺎﺑﺎﺵ ﻳﺨﺶ ﻫﺪﺍﻛﺎ ﺍﻟﻴﻮﻡ ﻟﻴﻦ ﺟﻲ ﺑﻮﻩ ﺑﺎﺵ ﺧﺶ ، ﻛﺎﻧﻮ ﻳﺴﻤﻌﻮ ﻓﻲ ﻛﻼﻣﻪ ، ﺍﻟﻠﻪ ﻳﺮﺣﻤﻪ ﻭﻳﺴﺎﻣﺤﻪ
ﻣﻨﻰ ﺧﻨﻘﺘﻬﺎ ﺍﻟﻌﺒﺮﺓ : ﺑﻮﻱ ﻋﻠﻲ ﺭﻏﻢ ﻣﺎﻛﺎﻥ ﻭﺍﻋﺮ ﺑﺲ ﺣﻨﻴﻦ ﻋﻠﻴﻨﺎ ، ﻋﺎﺭﻓﻪ ﻳﺎﻣﺎﻣﺎ ﺑﻮ ﺻﻔﺎﺀ ﺻﺎﺣﺒﺘﻲ ﻟﻤﺎ ﺳﻤﻊ ﺑﻮﻓﺎﺓ ﺑﺎﺑﺎ ﻗﺎﻟﺖ ﻳﻮﻡ ﻛﺎﻣﻞ ﺣﺘﻰ ﺍﻟﻤﺎﻛﻠﺔ ﻣﺎﻳﺒﻲ ﻳﺎﻛﻞ ﺗﻐﺸﺶ ﻋﻠﻴﻪ
ﺍﻧﻲ ﺧﻨﻘﺘﻨﻲ ﺍﻟﻌﺒﺮﺓ ، ﺷﻔﺖ ﻟﻨﻮﺍﻝ ﺍﻟﻘﻴﺖ ﻋﻴﻮﻧﻬﺎ ﻣﻌﺒﻴﺎﺕ ﺩﻣﻮﻉ
ﻭﻓﺎﺀ : ﺣﻖ ﻭﺍﻟﻠﻪ ﻭﻓﺎﺓ ﻋﻤﻲ ﺃﺛﺮﺕ ﻓﻴﻨﺎ ﻫﻠﺒﺎ ، ﻛﺎﻥ ﻣﻌﺮﻭﻑ ﺑﻜﻠﻤﺘﻪ ﺍﻟﻲ ﻣﺎﺗﻮﻟﻴﺶ ﺍﺗﻨﻴﻦ ﺗﻮ ﺑﻮﻱ ﺍﻛﺒﺮ ﻣﻨﻪ ﻟﻜﻦ ﻛﺎﻥ ﻋﻤﻲ ﻣﺨﺘﺎﺭ ﻗﺎﻝ ﻛﻠﻤﺔ ﺑﻮﻱ ﻣﺎﻳﻮﻟﻴﺶ ﻋﻠﻴﻬﺎ
ﺭﺣﻤﺔ ﻗﻌﺪﺕ ﺗﺒﻜﻲ
ﻋﻤﺘﻲ ﺣﺘﻰ ﻫﻲ ﻗﻌﺪﺕ ﺗﺒﻜﻲ
ﻧﻮﺍﻝ ﺩﻣﻌﺘﻬﺎ ﻧﺰﻟﺖ ﻟﻔﺖ ﻭﻃﻠﻌﺖ ﺑﺴﺮﻋﻪ ﻣﻦ ﺍﻟﺪﺍﺭ
ﺍﻧﻲ ﻗﻌﻤﺰﺕ ﻉ ﺍﻟﻜﺮﺳﻲ ﻭﻗﻠﺒﻲ ﻣﻘﺒﻮﺽ ﻭﺩﻣﻮﻋﻲ ﺑﻴﻨﺰﻟﻮ ، ﺍﺍﻩ ﺍﻧﻲ ﻟﻮ ﻧﺤﻜﻲ ﺷﻦ ﻧﻘﻮﻝ ﻟﻮ ﻧﺤﻜﻲ ﻋﻠﻲ ﺑﺎﺑﺎ ﻭﻛﻴﻒ ﻛﺎﻥ ﻣﻌﺎﻧﺎ ﻛﻴﻒ ﺧﻠﻰ ﺁﺛﺮ ﻓﻲ ﻗﻠﻮﺑﻨﺎ ﻣﻦ ﺑﻌﺪﻩ ﻛﻴﻒ ﻣﻜﺎﻧﻪ ﺩﻳﻤﺎ ﻓﺎﺿﻲ ﻓﻲ ﺟﻤﻌﺘﻨﺎ ﻭﻟﻤﺘﻨﺎ ﺣﺘﻰ ﻟﻤﺎ ﻧﻘﻌﻤﺰﻭ ﻧﺎﻛﻠﻮ ﻣﻊ ﺑﻌﺾ ﻧﺸﻮﻓﻮ ﻟﻤﻜﺎﻧﻪ ، ﻛﻞ ﻭﺣﺪﺓ ﻓﻴﻨﺎ ﺗﺘﻈﺎﻫﺮ ﺑﺎﻟﻘﻮﺓ ﻗﺪﺍﻡ ﺍﻟﺜﺎﻧﻴﻪ ﻟﻜﻦ ﻣﻦ ﺩﺍﺧﻞ ﻓﻲ ﻏﺼﻪ ﻣﺴﺘﺤﻴﻞ ﺗﺘﺤﻮﻝ
<< ﺃﻛﺜﺮ ﺍﻟﺸﻮﻕ ﺃﻟﻤﺎً ، ﻫﻮ ﺇﺷﺘﻴﺎﻗﻨﺎ ﻷﺭﻭﺍﺡ ﺗﺤﺖ ﺍﻟﺘﺮﺍﺏ ، ﺭﺑﻲ ﺇﻥ ﻣﻜﺎﻥ ﺃﺑﻲ ﻭﻓﺮﺍﻏﻪ ﻓﻲ ﺣﻴﺎﺗﻨﺎ ﻛﺒﻴﺮ ، ﺃﻟﻬﻤﻨﺎ ﺻﺒﺮﻙ >>
ﻣﺎﻣﺎ ﻗﻌﺪﺕ ﺗﺒﻜﻲ
ﺍﻧﻲ ﺷﻔﺖ ﻟﻤﺎﻣﺎ ﻣﻌﺎﺵ ﻗﺪﺭﺕ ﻧﺘﺤﻤﻞ ، ﺗﻤﻨﻴﺖ ﻧﻘﺮﺏ ﻣﻨﻚ ﻭﻧﻘﻮﻳﻚ ﻳﺎﻣﺎﻣﺎ ﺯﻱ ﻛﻞ ﻣﺮﺓ ﻟﻜﻦ ﺍﻟﻤﺮﺓ ﻫﺎﺩﻱ ﻳﺎﻣﺎﻣﺎ ﺍﻧﻲ ﻣﺤﺘﺎﺟﺔ ﻣﻦ ﻳﺼﺒﺮﻧﻲ
ﻭﻗﻔﺖ ﻭﻃﻠﻌﺖ ﺑﺤﺮﻛﺎﺕ ﺳﺮﻳﻌﻪ ، ﺍﻟﻘﻴﺖ ﻧﻮﺍﻝ ﻣﻘﻌﻤﺰﺓ ﻉ ﺍﻟﻜﺮﺳﻲ ﻗﻌﻤﺰﺕ ﺟﻨﺒﻬﺎ
ﻧﻮﺍﻝ ﻣﻨﺰﻟﻪ ﺭﺍﺳﻬﺎ ﻭﺗﺒﻜﻲ : ﻋﻼﺵ ﻳﺎﻧﺴﻴﺒﺔ
ﺍﻧﻲ ﺩﻣﻌﺘﻲ ﻧﺰﻟﺖ : ﺭﺑﻲ ﻛﺎﺗﺐ ﻫﻜﻲ ، ﻣﻜﺘﻮﺑﻠﻨﺎ ﻧﻜﻮﻧﻮ ﻳﺘﺎﻣﻰ ، ﻣﻜﺘﻮﺑﻠﻨﺎ ﻧﻘﻌﺪﻭ ﺑﻼ ﺳﻨﺪ ، ﻣﺎﻋﻠﻴﻨﺎ ﺍﻻ ﺍﻟﺼﺒﺮ ﻭﺍﻟﺮﺿﺎ ﺑﺎﻟﻘﻀﺎﺀ ﻭﺍﻟﻘﺪﺭ
ﻧﻮﺍﻝ : ﻧﺴﻴﺒﺔ ﺍﻧﻲ ﻧﺒﻲ ﺑﺎﺑﺎ ، ﺑﺎﺑﺎ ﺍﻟﺤﻨﻮﻥ ، ﻧﺒﻲ ﺑﺎﺑﺎ ﺍﻟﻲ ﻣﺎﻳﺮﺿﺎﺵ ﻓﻴﻨﺎ ﺩﻗﻪ ﺍﻟﺸﻮﻛﺔ ، ﺗﺘﻔﻜﺮﻱ ﻳﺎﻧﺴﻴﺒﺔ ، ﻟﻤﺎ ﻣﺎﻣﺎ ﺗﻜﺸﺦ ﻋﻠﻴﻨﺎ ﺣﺘﻰ ﺷﻮﻳﺔ ﻳﻘﻮﻟﻠﻬﺎ ﻣﻌﺎﺵ ﺗﻜﺸﺨﻲ ﻋﻠﻲ ﺑﻨﺎﺗﻲ ، ﻧﺒﻲ ﺣﻀﻦ ﺑﺎﺑﺎ ﻧﺒﻲ ﺣﻨﺎﻥ ﻭﻋﻄﻒ ﺑﺎﺑﺎ ﺍﺣﻨﻲ ﻣﺤﺘﺎﺟﻴﻦ ﺑﺎﺑﺎ ﻳﺎﻧﺴﻴﺒﺔ ، ﻗﻌﺪﺕ ﺗﻤﺴﺢ ﻓﻲ ﺩﻣﻮﻋﻬﺎ ﻭﺗﺘﻜﻠﻢ : ﻋﺎﺭﻓﻪ ﻳﺎﻧﺴﻴﺒﺔ ﻟﻮ ﺑﺎﺑﺎ ﻋﺎﻳﺶ ﺗﻮﺍ ﻟﻜﺎﻥ ﻓﺮﺣﺎﻧﻠﻚ ﺍﻧﻚ ﻣﺘﺰﻭﺟﺔ ﺭﺍﺟﻞ ﺯﻱ ﻭﻟﻴﺪ ، ﻭﺍﻻ ﺗﻮﺍ ﻣﺤﻤﻮﺩ ﻟﻜﺎﻥ ﺍﻣﺸﻲ ﻃﻠﺒﻨﻲ ﻣﻨﻪ ﻭﻗﺎﻟﻪ ﻧﺒﻲ ﺑﻨﺘﻚ ﻳﺎﻋﻤﻲ ﻋﺒﺪ ﺍﻟﻌﻈﻴﻢ ﺗﺨﻴﻠﻲ ﻳﺎﻧﻮﺳﻪ ﺍﻟﻠﻪ ﻣﺤﻠﻰ ﻓﺮﺣﺔ ﺑﺎﺑﺎ ﺑﻌﺪﻳﻦ
ﺍﻧﻲ ﻧﺒﻜﻲ : ﻧﻮﺍﻝ ﺧﻼﺹ ﺑﺎﻟﻠﻪ ﻋﻠﻴﻚ
ﻧﻮﺍﻝ ﻭﻗﻔﺖ : ﺑﻨﻤﺸﻲ ﻟﻠﺤﻤﺎﻡ ، ﻭﺍﻣﺸﺖ
ﺍﻧﻲ ﺣﻄﻴﺖ ﻭﺟﻬﻲ ﺑﻴﻦ ﻳﺪﻳﺎ ﻭﺍﻧﻬﺮﺕ ﺑﻜﻲ
ﻭﻟﻴﺪ ﻃﻠﻊ ﻣﻦ ﺩﺍﺭ ﻣﺤﻤﻮﺩ ﻳﺘﻠﻔﺖ ﻳﺸﻮﻓﻨﻲ ﺧﺎﻑ ، ﻭﻗﺪﻡ ﻳﻤﺸﻲ ﺑﺴﺮﻋﻪ ﻭﺣﺎﻁ ﻳﺪﻩ ﻋﻠﻲ ﺑﻄﻨﻪ : ﻧﻮﺳﻪ
ﺍﻧﻲ ﺳﻤﻌﺖ ﺻﻮﺗﻪ ، ﻣﺤﺘﺎﺟﺔ ﻟﺤﻀﻨﻪ ﻣﺤﺘﺎﺟﺎﺗﻪ ﻳﺨﻔﻒ ﻣﻦ ﺣﺰﻧﻲ ، ﻗﻤﺖ ﺭﺍﺳﻲ ﺷﻔﺖ ﻟﻮﺟﻬﻪ ﺍﻟﺨﺎﻳﻒ ﻋﻠﻴﺎ ، ﻧﻀﺖ ﺑﺴﺮﻋﻪ ﻭﺍﺿﺒﻄﺘﻪ ، ﻭﻗﻌﺪﺕ ﻧﺒﻜﻲ ﺑﺼﻮﺕ ﻭﺑﺎﻟﻘﻮﺓ
ﻭﻟﻴﺪ ﺣﻂ ﻳﺪﻳﻪ ﻭﺭﺍ ﻇﻬﺮﻱ : ﺷﻦ ﺻﺎﺭ ﺑﺲ ﻧﻮﺳﻪ ، ﺍﻫﺪﻱ ﻣﺎﺗﺨﻮﻓﻴﻨﻴﺶ ﺷﻦ ﺻﺎﺭ ؟
ﺍﻧﻲ ﻣﻀﺒﻄﺎﺗﻪ ﺑﺎﻟﻘﻮﻩ ، ﻭﺣﺎﻃﻪ ﺭﺍﺳﻲ ﻋﻠﻲ ﻛﺘﻔﻪ ﻭﻧﺒﻜﻲ
ﻭﻟﻴﺪ ﺣﺎﻭﻝ ﻳﺒﺎﻋﺪﻧﻲ ﻳﺒﻲ ﻳﻔﻬﻢ ﺧﺎﻑ ﻣﻦ ﻫﺎﻟﺒﻜﻲ ﻛﻠﻪ : ﻧﻮﺳﻪ ﺍﻫﺪﻱ ﺧﻼﺹ ﺣﺒﻴﺒﺘﻲ ، ﻭﻗﻌﺪ ﻳﻤﺴﺢ ﻋﻠﻲ ﻇﻬﺮﻱ
<< ﻳﻮﺟﺪ ﺑﺤﻀﻨﻚ ﻃﺎﻗﻪ ﻟﻢ ﺃﻓﻬﻤﻬﺎ ﻟﺤﺪ ﺍﻵﻥ ﻃﺎﻗﻪ ﺗﺠﺬﺏ ﺃﺣﺰﺍﻧﻲ ﻭﺗﺨﻔﻒ ﻣﻨﻬﺎ >>
ﺑﻌﺪ ﻫﺪﻳﺖ ﺷﻮﻳﺔ ﻃﻠﻘﺖ ﻭﻟﻴﺪ ﻭﻭﺧﺮﺕ
ﻭﻟﻴﺪ ﺷﺪ ﻭﺟﻬﻲ ﺑﻴﻦ ﻳﺪﻳﻪ
ﺍﻧﻲ ﻗﺎﻋﺪﻳﻦ ﺩﻣﻮﻋﻲ ﻳﻨﺰﻟﻮ
ﻭﻟﻴﺪ ﻳﻤﺴﺢ ﻓﻲ ﺩﻣﻮﻋﻲ : ﻟﻴﺶ ﺑﺲ ﻳﺎﺣﺒﻴﺒﺘﻲ ﻛﻞ ﻫﺎﻟﺪﻣﻮﻉ
ﺍﻧﻲ ﻛﻴﻒ ﺑﻨﺒﺪﺃ ﻧﺒﻜﻲ ﻣﻦ ﺟﺪﻳﺪ
ﻭﻟﻴﺪ ﺍﺟﺒﺪﻧﻲ ﺍﺿﺒﻄﻨﻲ ﺑﻘﻮﻩ
ﺣﻄﻴﺖ ﺭﺍﺳﻲ ﻋﻠﻲ ﺻﺪﺭﻩ
ﻭﻟﻴﺪ : ﺧﻼﺹ ﻳﺎﺭﻭﺣﻲ ﻋﻼﺵ ﻫﺎﻟﺪﻣﻴﻌﺎﺕ ﻳﺎﺑﻜﺎﻳﻪ
ﺍﻧﻲ ﻗﻌﺪﺕ ﻧﻀﺤﻚ ﻭﻧﺒﻜﻲ
ﻭﻟﻴﺪ ﻭﺧﺮﻧﻲ ﻣﻦ ﻋﻠﻴﻪ : ﻫﻬﻬﻪ ﺗﺒﻲ ﺻﻮﺭﺓ ﻭﺍﻧﺘﻲ ﻫﻜﻲ ﺗﻀﺤﻜﻲ ﻭﺗﺒﻜﻲ ﺯﻱ ﺍﻟﻤﺠﻨﻮﻧﻪ
ﺍﻧﻲ ﻗﻌﺪﺕ ﻧﻤﺴﺢ ﻓﻲ ﺩﻣﻮﻋﻲ ﻭﺿﺮﺑﺘﻪ ﻋﻠﻲ ﻛﺘﻔﻪ ﺑﺎﻟﺨﻔﻴﻒ : ﻫﻬﻬﻪ ﺑﺎﺭﺩ
ﻭﻟﻴﺪ : ﻫﻬﻬﻬﻪ ﺑﻜﺎﻳﻪ ، ﺗﻌﺎﻟﻲ ﻗﻌﻤﺰﻱ ، ﻭﺟﺒﺪﻧﻲ ﻣﻦ ﻳﺪﻱ ﻭﻗﻌﻤﺰﻧﻲ ﻉ ﺍﻟﻜﺮﺳﻲ ﻭﻗﻌﻤﺰ ﺟﻨﺒﻲ
ﻭﻟﻴﺪ ﺷﺎﺩ ﻳﺪﻱ : ﺍﺣﻜﻲ ﺣﺒﻴﺒﺘﻲ ﺧﻮﻓﺘﻴﻨﻲ ﺷﻦ ﺻﺎﻳﺮ ؟
ﺍﻧﻲ ﺑﺤﺰﻥ : ﺗﺬﻛﺮﺕ ﺑﺎﺑﺎ ﻭﻗﻌﺪﺕ ﻧﻮﺍﻝ ﺗﻘﻮﻝ ﻓﻲ ﻛﻼﻡ ﺧﻠﺘﻨﻲ ﻧﺒﻜﻲ ، ﻭﺗﻨﻬﺪﺕ : ﻣﻜﺎﻧﻪ ﻳﺎﻭﻟﻴﺪ ﻓﺎﺿﻲ
ﻭﻟﻴﺪ ﺣﻂ ﻳﺪﻩ ﻋﻠﻲ ﻛﺘﻔﻲ ﻭﺟﺒﺪﻧﻲ ﻟﻴﻪ ﺍﺿﺒﻄﻨﻲ ، ﺣﺘﻰ ﻫﻮ ﺧﻨﻘﺎﺗﻪ ﺍﻟﻌﺒﺮﻩ
،،،،،،،،،،
ﺑﻌﺪ ﺷﻬﺮ
# ﻳﺘﺒﻊ