وقتها كان عبدالعزيز على وشك أنه يطلع وكانت جواهر واقفة جنبه بعبايتها ونقابها هي وأم فهد
ويسمعون صوت طلال الغاضب يتعالى.. جايهم من فوق بوضوح.. ومخلوق محلق ينزل السلم بسرعة هائلة كأن أقدامه لا تلمس الارض من السرعة...
ماحد من الموجودين أنتبه لشيء لحد ماصارت نورة عندهم وترمي نفسها بعنف على صدر عبدالعزيز وهي تبكي بهستيرية...
عبدالعزيز أنفجع من المره اللي رمت نفسها عليه..
حاول يخلص نفسه... بس ماقدر ونورة لاصقة فيه مثل الكلاليب..
طلال كان يبي يشدها من شعرها لولا إن جواهر أشرت له يتركها..
جواهر ميلت على أذن عبدالعزيز وقالت له بهمس: أحضنها ياعبدالعزيز..
نورة في غيابك كانت بتستخف.. وهذي أول مرة تبكي من غيابك.. كانت كاتمة كل هالدموع لرجعتك.. أحضنها
وقتها عبدالعزيز كان قلبه يذوب من بكاها الهستيري على صدره.. لكن إيديه كانت مثبته بجنوبه من إحساسه بالخجل والحرج..
لما قالت له جواهر (أحضنها) تحررت مشاعره العذبة.. وحضن نورة برقة..
الحركة اللي خلت نورة تبكي بهستيرية أكبر..
نورة لما خلصت طاقة البكاء المخزنة عندها.. رجع لها عقلها
وشافت نفسها في حضن عبدالعزيز..
حست إنها بتموت من الخجل والحرج والفشيلة.. ووجهها يقلب لونه لأحمر دموي..
فلتت عبدالعزيز بخجل قاتل
ورجعت تركض لفوق بنفس السرعة اللي نزلت فيها.. في الوقت اللي كان طلال يبي يطلع وراها..
لولا إن جواهر اللي كانت دايما أختهم الكبيرة حلفت على طلال مايقول لها شيء: طلال يا أخوي.. نورة مرت عبدالعزيز.. وهي ماسوت شيء حرام.. وإحنا كلنا كنا موجودين.. والله العظيم ماتقول لها شيء
كفاية إحساسها بالحرج.. أنا حاسة فيها..
طلال رجع يطلع مع عبدالعزيز اللي كان ميت من الحرج وراحوا للمجلس عند أبو فهد..
في الوقت اللي ام فهد تقول لروحها: (زين يانوير دواج عندي ياقليلة الحيا.. جواهر حلفت على طلال هوب علي)
لما وصلوا الشباب للمجلس..
عبدالعزيز قعد جنب خاله..
وقال له باحترام: يبه طال عمرك في الطاعة.. أنت عارف الظرف اللي احنا فيه.. واختفاء ابو عبدالعزيز اللي ماندري وش صار عليه..
أنا أدري أنه مالي وجه أأجل عرسي.. بس أنت شايف الظروف.. مانقدر نسوي عرس.. وعبدالله ماندري حي وإلا ميت
أبو فهد بنبرته الواثقة المتزنة: اسمعني يا أبوك
أنت صار لك متملك نورة أكثر من سنة ونص
موعد العرس الأول تكنسل يوم توفت أختي الله يغفر لها
والموعد الثاني إن شاء الله نكنسله عشان غيبة عبدالله.. الله يرجعه لنا بالسلامة
لكن ماراح نحدد موعد ثالث لأن نورة الليلة بتروح لبيتك
ماطال مسخ يا أبوك.. ونورة مرتك أول وتالي "
