طوق نجاة

الفصل37

#طوق_نجاة
الفصل 37
طلع من عندي ياسين وانا في دنيا ثانية معقولة في ناس واطية للدرجة هذي في ناس حقيرة هكي وهه شنو وانا اللي كان ضميري يأنب فيا على خاطرها ووجعت وردتي بسببها يارب كيف اندير يارب وامي وبكرة سفرنا شنو اندير ومافيش قدامي الا رفيقي وائل واتصلت بيه
انا..السلام عليكم
وائل..وعليكم السلام
انا..وين انت
وائل..في الطريق جايكم كنت نجيب في باقي الدبش لان عبير قررت فترة غايبكم نقضوها في حوشكم
انا..تمام بكل نستنى فيك
وائل.. كنك يا احمد في حاجة
انا..تجي ونحكيلك كل شئ
وائل..هي تمام قريب نوصل
وسكرت ومابيتش نطلع من المربوعة وانا نتخبط بأي وجه بنقابل وردة وهي كانت حتضيع مني بسببي انا كيف مابحتش مادورتش وبعدين طبيعتي انا عمرها ماكانت وحدة زي ريم تناسبني انا من عيلة محافظة مش متزمتين دينيا لكن نخافو ربي ونحطو فيه قدام كل تصرافتنا وهي من عيلة نحن نقولو عليها منحلة من طريقة لبسها وتبرجها الزايد رغم انها مش مستحقة ليه وتماديها في علاقتها مع ولد عمها لدرجة انها كانت تسافر هيا وياه بروحهم واهلها عندهم عادي والله خوها من بنت لبنت مش عارف انا وين كان عقلي حتى قبل ماوردة تكون في حياتي المفروض ماتكونش ريم اختياري ومعاها واهم نفسي اني نحبها كيف نحبها ونسيت انها هي من بدت في مشاغلتي وخلتني نتعلق بيها كيف انعميت ونسيت هذين امي العمية قالتها ليا انها وهم وانا المفتح انضحك عليا لكن الصبر بس وخش عليا وائل
وائل..السلام عليكم
انا..وعليكم السلام
وائل..خشيت للحوش قالولي انك في المربوعة معاك ضيف
انا..ايه كان وعدى
وائل..منو وكنك انت اصلا تقول تايه شنو صاير معاك والضيف هذا شنو يبي منك
انا..تو نحكيلك وحكيت ليه الكلام اللي قاله ليا ياسين
وائل بصدمة ..معقولة هكي
انابعصبية ..تخيل انا احمد عبدالرحمن تلعب عليه وحدة نحطها في سوق النسوان المحترمات ماتسوى حاجة
وائل.. هدي بالك يا احمد وفكر بعقل شنو تبي ادير
انا.. والله عقلي وقف من الصدمة ومازالت مش عارف وبكرة بنسافرو ومانقدرش انأجل نخاف امي تغير رايها
وائل..عدي يا احمد وسافر وريح بالك وانا حندبر الامور كلها
انا.. راحة البال يجيبها ربي لكن هذا اللي بنديره تو نسافر وبعد ما نروح يسهل الله واه يا وائل دير بالك على عبير وصغارك مرات يدرولهم حاجة وانا مركب كاميرات في الحوش وعلى السور وفي كل مكان تقريبا
وائل..شنو امتى صار
انا..من فترة ومش عارف ليش فكرت فيهن لكن المهم تقدر تربطهن بحسابك على النت وتفتحن من اي مكان انت فيه تشوف شنو صاير في الحوش خصوصا انت تقضي معظم نهارك في المزرعة جناحي ودار عبير بس مافيهنش كاميرات لكن حتى من دار امي فيها فخلي عبير ديمة ترقد الصغار في دار امي مش دارها ودارها خليها ليك وليها بس من غير الصغار
وائل ..تمام يا احمد كون هاني وانا ان شاءالله حنزيد انشوف الموضوع اكثر ونفكر في حل بس
انا..بس شنو
وائل..ريم مش بتسافر معاك
انا..ايه
وائل..به شنو بدير
انا..قبل اذا كنت مصر انها تسافر معاي 50% تو مصر 100%
وائل..عليش في شنو تفكر
انا..بنقهرها زي ماقهرتني وبعد مانروح نعرف كيف اندير فيها
وائل..كيف
انا..هي ماتحبنيش لكن في الاخير هيا مرا وتغار
وائل..اكيد كل مرا تغار ممكن من مرا لمرا درجة الغيرة تختلف لكن كل مرا تغار
انا..وهذا اللي بنديره ومنها نعوض وردتي على اي وجع كانت فيه بسبب زواجي من ريم
وائل..بس وردة راضية
انا..راضية لكن كانت تنحرق بنار الغيرة وكانت تبين للناس انها راضية لكن في داخلها نار ماعرفتهاش الا لما قالي الدكتور ان بنيتها ضعيفة بسبب قلت التغذية
وائل..غريبة مع ان مايبانش بكل ان وردة انها كانت تغار عليك
انا..لانها في البداية كان واضح ليها اني ماقربتش ريم لكن يوم
حكيت لوائل على قصة السرير وكيف وردة شعرت هذاك اليوم
وائل..بس حرام عليك انك ماريحتش بالها
انا..لاني كنت غبي وتحت تفكير بنختبر حبها ليا مع اني لما شفت حسرتها على فقدت حملها المفروض عرفت ان حبنا مايستحقش اختبار
وائل بصدمة .. وردة كانت حامل
انا بحزن ..ايه والطيحة كانت سبب في الاجهاض لانه كان كيف متكون كيس حمل
وائل..قدر الله وماشاء فعل
انا..الحمدلله
وائل..ربي يعوضكم خير والعمر قدامكم
انا ..اصلا مانيش مروح من فرنسا الا وفي حمل جديد
وائل بفرحة..ايوه يا واثق
انا بحب..نحبها يا وائل واجد
وائل بمكر ..منو ريم
انا وخبطته على صدره ..ريم يامعفن
وائل..عطك كسرة هذي ايد متأكد تي تقول بالة خبطتني مش عارف وردة الهشة كيف ماتنكسرش بين ايديك
انا..هههههه لانها وردتي نتعامل معاها مايتناسب بيها
وائل.. وانا شنو امنا تشوف فيا تبن تدلفني ببالة ايدك تقول بتعطيها لبقرة (حاشكم) عندنا
انا..ههههههه لكل مقام مقال
وائل..به به تو يبان ليك
انا..هي نخشو نكملو حكينا جو رايفت على وردتي
وائل ..ههههه محلاك وانت احمد الحبيب
...............
ريم ..ايوه اصر اني نسافر معاهم
رامي ..به كيف بديري
ريم ..مابندير شئ بنعتبرها رحلة وتغيرت جو
رامي .. والله لولا زواجي معبي اختام ولازم اندير جديد كنت سافرت وراك
ريم ..الله غالب حبيبي وهيا هانت زي ما انت قلت بتنفذ مخططك بعد مانروحو
رامي ..اكيد
ريم .. بس بدون اذية تخويف بس
رامي ..اصلا انا الحاجة الوحيدة اللي مستحيل انديرها اني نحط ذنب رقبة في رقبتي فمتخافيش تخويف بس
ريم ..تمام هي سكر امنا وخليني نجهز شنتطي
رامي..مش طيارتكم بكرة في الليل
ريم ..ايه
رامي ..حتى الصبح تقدري اتجهزيها خليك معاي تو لاني مرايف عليك واجد
ريم ..تمام
وقضت ريم الوقت كله وهي تحكي مع رامي غافلين ان اصلا اي زوجة تكلم رجل غير زوجها يعتبر حرام ولكن هما شنو عرفهم الحرام والحلال 
.........
انا..وردتي جهزتي الشناطي بروحك ان شاءالله
وردة..لا حبيبي عاونتني عبير وجهزت حتى شنطة امي لكن ريم مش عارفة
انا..اكيد جهزتها واذا ماجهزتهاش تو حتجهزها الصبح لان الطيارة بالليل
وردة بتردد ..احمد
انا..نعم
وردة على نفس التردد ..كيف بكون حجز المقاعد والفندق
انا..وعليش مترددة في سؤالك هذا واجد
وردة ......
انا..مايستحقش الحشم حبيبتي بسيط الموضوع لان حجزنا في الدرجة الاولى في نظام كرسي وفي نظام اثنين فانا وانتي مع بعض وريم وامي مع بعض
وردة ..بس امي مش واخدة على ريم زيي
انا..امي ترقد في الطيارة تأخذ في حبوب لانها ماتتحملش الطيارة
وبعدين قلت بمكر ...والله تبيني نقعد انا وريم مع بعض
وردة بسرعة .. لا حتى هكي كويس
انا..ههههههه نحبك وانتي غيرتك واضحة
وردة بخجل.. به والفندق
انا..اول مانوصلو بندخلو امي المستشفى طول وبعدين حجزت جناحين انا وانتي جناح عرايس وامي وريم جناح بغرفتين مع اني حسب ماقال الدكتور ان ممكن نرجعو بعد عملية امي لان الدكتور قال هي مش حتطلع من المستشفى الا وهيا بكامل عافيتها
وردة .. يارب تنجح عمليتها وتفتح من جديد
انا..يارب
وردة ..بس مش هكي حتزعل ريم بدل مايكون جناح العرايس ليها هيا
انا بحدة .. لا ريم عمرها ماكانت ولاحتكون عروسي
وردة .. كيف يا احمد وانت وهيا مازالتو ماسكرتوش  شهرين
انا..وردة ممكن معاش تتدخلي في موضوع ريم وشعورك بالشفقة ناحيتها تنسيه
وردة ..مش شفقة يا احمد هذا خوف من ربي
انا..وانا عارف شنو اندير وعارف ربي كويس ممكن ياوردة
وردة ..حاضر ياحبيبي
وجيت خذيت وردة في حضني كأني نعتذر ليها على كل لحظة عاشتها معاي وانا على ذمتي ريم
وردة
حسيت ان احمد مش تمام وبالذات حاجة شور ريم كيف ينقلب عصبي زعمك عرف بريم شنو دارتلي لا ما اعتقدتش كنهدا راه قلب الدنيا لاني انا واثقة في حب احمد ليا مستحيل يعلم بلي دارته ليا ريم ويسكت
انا
خذيت وردة للسرير ورقدنا ونضنا ثاني يوم و مشى الوقت وجهزنا اروحنا وطلعنا للمطار انا ووردة وريم في سيارتي ووائل وعبير وامي في سيارة وائل وانا متجاهل ريم تمام وحتى جو اهلها للمطار يسلمو عليها وشفت عيون هيثم اللي بتاكل وردتي فسيبتهم وخذيت وردتي وطلعت من احذاهم
وردة ..تو يزعلو اهل ريم
انا..يزعلو والله ينفلقو اخر همي ناقصني غير الخرا هيثم اللي مايتحشم ولايعرف حرمات  ولاغض بصر
وردة ..شنو تحكي احمد
انا ..ماتركزيش
واعلنو على موعد رحلتنا وركبنا وطبعا كانت صدمة ريم واضحة لما لقت روحها بتقمعز مع امي لانها توقعت ان وردة هيا اللي بتقمعز مع امي وعطيت لامي حبة المهدي اللي بتخليها راقدة من قبل مانركبو الطيارة بيش ماركبت الطيارة تكون رقدت وفعلا امي رقدت حتى قبل ماتقلع الطيارة واطمنت عليها وربطت ليها الحزام وبدون اي كلمة موجهة لريم جيت قمعزت احذا وردتي وانا حاضن ايدها بايديا ونحكي معاها عشان عارفها مازالت تخاف من الطيارة قاعدة ومرة مرة نشوف في ريم تغلي وتوجه في نظرات انا فاهمهن كويس بالذات لما نضحك انا ووردة
انا..خطرها مرة سمعت روان تحكي على نوادرك وقالت على المكرونة شنو قصتها المكرونة
وردة بفرحة .. هذا ياسيدي زعميتني بنتعلم التطييب وبنوري فلاحتي لبابا ومعاه ولد عمي ايمن
انا..ولد عمك ايمن
وردة ..اه
انا ..تصدقي انا مانعرفش حاجة على عمامك اكثر من عمك عبد العظيم لان هو اللي شفته في الفاتحة
وردة بحسرة ..اصلا هذا احسن عمامي
انا..به ليش ماخذاكش عنده طالما هو احسنهم
وردة ..كان بوده لكن مافيهاش كيف ياخذني عنده وهو اب لسبعة اولاد ذكور يعني سبعة رجالة في حوش واحد وانا مش محرمة عليهم ولا اخت واحد منهم حتى بالرضاعة ولما تزوجت امي جاء وقالها ليا واللي يحل ليهم انهم يتزوجوني ثلاثة لكن الكبير متزوج بصغاره والثاني عاقد قرانها والثالث خاطب والاربعة الاخرين اصغر مني اللي ايمن اكبرهم اصغر مني بسنة وكان اقرب واحد ليا
انا..بس مشفتاش بكل وكيف هو اقرب واحد ليك ولحد الان مافكرش يطمن عليك او حتى يزورك ويتعرف عليا
وردة بحسرة ..ايمن مسافر او هارب كاحسن تعبير
انا باستغراب ..من شنو هارب
وردة ..ايمن من صغر سنه وهو يحب بنت جيرانهم وديمة يحكيلي عليها ولما وصل لسن 16 سنة اعترفلها بحبه وطلعت حتى هيا ماتشوفش في الدنيا الا هو وفعلا قضو مع بعض اطهر وانظف علاقة حب ولما وصل لعمر 18 صارح عمي لانه مايبيش يحبها في الظلام يبي حبه ليها في النور ورغم اعتراض عمي على صغر سنه وخصوصا ان البنت يتيمة الام فطاوع ولده وعدى خطبها ليه والحمدلله ان بوها كان يحب ايمن واجد فرحب برجولته رغم صغر سنه واتفق هو وبوها ان الفترة هذي بس قراية فاتحة بينهم لعند مايسكر العشرين سنة يعقدو القران وفرح ايمن وشهد واجد بموافقة اهلهم ولكن للاسف للقدر كلمة اخرى يكتشفو ان شهد بعد فترة بسيط انها مصابة بسرطان واخطر انواعه وماطولتش حتى و ربي رفع امانته وايمن قريب مات وراها فقرر انه معاش يقعد في مكان هيا مش فيه ونقل اوراقه وقرايته وسافر لفرنسا لان عنده اهل صاحبه منتقلين ومستقرين غادي سهلو عليه الاجراءات وانتقل وعايش غادي وطبعا الكلام هذا قبل ماتتزوجني بحوالي اسبوع بس لما سافر فهذا ليش ماتعرفتش عليه
انا..الفقد واعر وبالذات لما يكون الموت هو السبب
وردة بحزن ..فعلا لتو انا قاعد يوجع فيا فراق بابا
انا..الله يرحمه ويرحم باتي
وردة ..امين
انا ومحاولة لتغيير جو الحزن اللي خيم علينا ..به ياستي ماحكيتيش ليا على المكرونة
وردة ورجعت ضحكتها ..حكايتي مع المكرونة حكايات مرة طيبت مكرونة لاول مرة وكلمت ايمن عشان يشوف مهارتي في التطييب وحطيت المكرونة ليهم وطبعا اللي صار ان المكرونة قاعدة تتقرمش واللحم طايب نين مهبز فضحكو عليا واجد فقلت ليهم عادي فوتو المكرونة وخلوكم مع اللحم وطبعا بعد وصلة الضحك بين ايمن وبابا عليا سئلني شنو درت فقلت ليه ديمة نسمع ان المكرونة ماتاخذش وقت على النار فحطيتها شوي في الطبيخة وبعدين صفيتها ورجعت الطبيخة نين طاب اللحم وبعدين حطيت المكرونة اللي صفيتها في الصونية وصبيت الطبيخة وقدمتها وطبعا انا كملت كلامي من هنا وبابا وايمن بدون مبالغة ساعة ممكن وهما يضحكو عليا
وردة
انا كملت كلامي من هنا ولقيت احمد من الضحك لدرجة مش قادر يتنفس فضحت لضحكه لانه امس واليوم متوتر واجد وخايف على امه
انا ..ههههه خلاص ياوردة بجديات مكرونة شنو اللي درتيها ليهم
وردة بثقة ..امبكبكة
انا..هههههه سميها اي حاجة الا امبكبكة
وردة بضحكة ..ماهو بعدين عرفت ان المبكبكة مش هكي بكل
انا..يعطيك الهنا جنابي خلاص لكن الحمدلله تو ماشاءالله عليك
وردة..اصلا ماتعلمتش التطييب الا بعد عدد لاباس به من النكبات الغير عادية وكنت ديمة نحول في الكارثة لضحكة
انا..زي شنو مثلا درتي فيهن كوارث غير المبكبكة اللي تمت حاجة ثانية بكل
وردة بضحكة ..ايه واجد البراك اللي درته من غير رز ومرة درته برز بس بدون خضرة زعميتني بنجدد فيه والله المكرونة المبوخة اللي قعدت ساعتين في الكسكاس بدون ماتتغير واكتشفت بعدها اني لازم نبللها بزيت وامية والله العصبان اللي درت روحي بنجدد فيه درت بدل الرز المصري رز بسمتي طبعا هذي اكبر وصمة عار في حق التطييب والله الباسطي اول ماتعلمته كثرت فيه الدقيق وجاء يابس لدرجة لو نحذف بيه يهودي ينطق الشهادتين
انا ..ههههههه خلاص ياوردة معاش قادر تو عرفت صوت ضحك امي العالي اللي مانسمعش فيه الا لما تكون معاكي الحمدلله اننا في الدرجة الاولى كنهدا راه الطيارة كلها تتفرج عليا من كثر الضحك
ووصلنا ورفعنا طول امي للمستشفى وعلى طول تمو اجراءات دخولها وان العملية بكرة في الليل بعد اجراء الفحوصات والتحاليل والتأكد من كل شئ قديش ماهما ناس عمليين ماعندهمش حاجة تتوخر لو عندنا نفس الانضباط  اللي عندهم لكانت بلادنا احسن بلاد وبعد ما اطمنا على امي اللي طبعا ريم قررت انها تستنى في الجنينة بتاعت المستشفى بدون اهمية لامي ووردة اللي مافارقتها نين اطمنت عليها وهي في سريرها وروحنا وجينا للفندق وطبعا الصدمة الثانية اللي نصدمتها ريم ان جناح العرايس ليا ولوردتي وهيا جناح ثاني
ريم ..كيف انت ووردة جناح عرايس وانا اللي عروس جناح عادي
انا..وردة ايدها مازالت مجبسة منو بعتني بيها غيري
ريم باعتراض ..بس مش جناح عرايس
انا بمكر ..ليش الاعتراض والله نسيتي زواجنا مؤقت والله تبيه يكون حقيقي ماعنديش مانع على فكرة
ريم بخوف لانها فهمت مغزى كلامي.. لا مش قصدي بس لو يعرف حد حيفهم كل شئ
انا باستهزاء..حد يعرف زي منو وبعدين انا طول مامعاي وردتي وانا نحس في روحي عريس جديد هيا تفضلي لجناحك واه ماتنسيش انك مازالتي على ذمتي طلوع منه بدون اذن ماتفكريش
ريم ..شنو بتحبسني مثلا
انا..ريم على جناحك تو المساعد يوريه ليك ومعاهن شناطيك وبنظرة غل تعرفي تتكلمي انجليزي والله نخلي وردة تساعدك راهي تحكي فرنسي بطلاقة
ريم ..لا نعرف انجليزي وحتى فرنسي نفهم فيه شوي
انا..به تمام وفرتي على وردتي دور المترجم
وركبت ريم وطبعا نحن لان في فندق سياحي فاكيد جميع العاملين يفهمو انجليزي حتى ولو مش لغتهم الام لان معظم الزائرين يتقنو الانجليزي او يفهمو فيه وركبت انا ووردتي لجناحنا وخذينا دوش ورغم تعب السفر لكن ماقدرناش نرقدو كويس ونومنا كله متقلب بسبب القلق على امي  وفي الاخير رقدنا من التعب 
وردة ..نوض يا احمد نوض
انا بنوم ..كنك ياوردة شنو في
وردة ..المستشفى اتصلو 
#حياة