طوق نجاة

الفصل 7

#طوق_نجاة
الفصل7
تجهزت وردة وبعد اهتمام روان بيها كويس وعاونتها في الضيافة اللي استغربت ان محمد مابخلش في شئ وجابها كاملة وجو اهلي  وجت امي وعبير وعمتي عفاف وبعد السلام والترحيب سئلو على وردة خشت وردة عليهم وهيا لابسة فستان طويل اخضر زيتوني عاكس على لون عيونها راسم تفاصيل جسمها ومستشورة شعرها وطالقاته على طوله شعرها ناعم لكن فيها كسرات ومعبي واجد وطوله لنهاية خصرها وحاطة كريمة بحيث تفتح لون بشرتها بيش تبقى متناسقة مع لون ايديها لان الفستان كان نص كم ومن المكياج اكتفت برسم على العين ليزيد من كبرها وروج لونه هادي
وردة .. السلام عليكم
الجميع .. وعليكم السلام
عبير ..بسم الله ماشاءالله انا عبير اخت احمد الوحيدة
وردة ..اهلين بيك
عمتي عفاف .. وانا عمة احمد الوحيدة حظك جيتي في عيلة العنصر الانثوي فيها طرف واحد في كل عيلة
وردة ..اهلين بيك وربي يحفظك
امي ..وانا ام احمد تعالي يابنتي انتي عارفتيني مانشوفش تعالي احذاي
جت وردة احذا امي وقعدت تهدرز معاها بحشم امي تسئل وهيا ترد وطبعا انا منبههة انها ماتحكيش اي حاجة على حياتها الا العادي وطبعا انا متفق معاهن لما بنجي نروح بيهن بنشوف وردة
وفعلا قعدت في المربوعة وشوي وخشت عليا شايلة في ايدها سفرة قهوة
وردة بحشم ..السلام عليكم
انا .. وعليكم الس....
انا تخيلت كل شئ الا نشوف وردة الانثى المهتمة بنفسها لابسة تقريبا فستان زيتوني لكن لابسة عليه بشت واسع واجد مش مبين تفاصيل جسمها ووشاح مبين جمتها من قدام ولونها قهوي  بلون حبات البندق سبحان الله في غرابة اللون زي غرابة لون عيونها   والباقي كان تحت البشت لما جت قمعزت فطنت ليه من حاشية الوشاح لكن ماعرفتش طوله كيف بشرتها رايقة وواضح انها مهتمة بروحها وكيف طالعة حلوة ومع زيادة تفاصيل في اللبس تطلع انثى طاغية لكن استنو شوي عيونها شنو لونهن تو خضر لونهن معاش عرفت هنا عسليات فاتحات والله خضر والله رصاصيات بلون الفضة ورموشها تقول مظلة فوق عيونها تبارك الله وبعدين فطنت لروحي
انا..وعليكم السلام
كيف حالك اليوم
وردة..بخير الحمدلله
انا..معاش قرب منك راجل امك
وردة بفرحة ..لا حتى بكلمة
انا..تمام كويس ولو بس فكر اتصلي بيا بس وبعدين يوم الجمعة بتكون الفاتحة والعرس مش حيطول بعدها  
وردة .. استاذ احمد
انا..استاذ شنو ياوردة وانا بنكون راجلك
وردة
حسيت الكلمة حلوة قديش فيها امان وحماية
وردة ..اسفة استا قصدي اااحمد
انا..ايوه
وردة .. به ليش ماخليتش الفاتحة مع العرس وخلاص
انا.. وردة بنحكي اللي عندي مرة وحدة طبعا فيا طبعين في ناس تشوف فيها ميزة وناس تشوف فيها عيب وطبعا الطبعين هذين غير الواعر والعصبي
وردة ..شنو يا است  يا احمد
انا..جرئ اكثر ماعقلك يتخيل واللي نحطها في راسي نوصللها
وردة .. اه
انا..شنو اه
وردة ..ماعندي مانقول انا حاليا انت طوق نجاتي وبتكون حامي عرضي اطباعك ايش ماكانت تكون انا بنتحملها
انا..تمام وطبعا مانحبش نعاود كلامي واجد
وردة ..تمام
انا.. وبالنسبة ليش الفاتحة والعرس ما انديرهنش مع بعض السبب وماتزعليش مني لما تكوني مرتي بعقد قران ماحد يقدر يتكلم وفي نفس الوقت انا نبي نجهزك عارف ان ماحد حيشقى بيك فنبي ناخذك وتطلعي معاي وتاخذي بتاتك بدون اي قيود ومايصيرش الكلام هذا الا وانتي على ذمتي وطبعا وهو الاهم نبي نتعرف عليك اكثر انا مانعرفش غير الجانب المظلم في حياتك فنبي نعرف الجانب الضاوي
وردة .. من يوم ما مات بابا وانا ماعندي جانب ضاوي لكن حاضر اللي انت تقول عليه موافقة
انا.. متفقين باذن الله واول حاجة هذي هدية بسيطة
وردة بحشم ..شكرا عليش امتعب روحك
انا.. هذي مش من قدرك حاجة بسيطة
وردة ..بارك الله فيك وكبر الله بقدرك
انا..وردة كم مقاسك
وردةبصدمة..ها
انا..مقاس كم تلبسي شنو ها 
وردة ..نلبس 38/40
انا بصوت عالي .. شنوووو
وردة بخوف ..  والله مانكذب عليك
انا..هدييي وردة مش قصدي نخوفك لكن شكلك مايوحيش انك تلبسي المقاس هذا
وردة .. ماهو العباية اللي نلبس فيها اكبر من مقاسي بواجد بيش ماتبينش جسمي
انا مش فاطن لروحي ..اي جسم بتبينه وانتي تلبسي بالمقاس هذا
وردة انصدمت
انا..قصدي انتي ضعيفة واجد شكلك
وردة ..اه
خش راجل ام وردة
محمد.. شنو مازالتو ماكملتو دوة
انا..كملت بنطلع اطلعي وردة كلمي هلي
وردة..حاضر
وطلعت وردة كلمتلي هلي وطلعت للسيارة نستنى فيهم وانا مستغرب من روحي كنك يا احمد هكي معقولة في حاجة في قلبك شورها والله شكل عيونها بيهبلوك اللي كل مرة بلون لكن معقولة شكلها بس مافيشي حاجة حلوة غير عيون طالما تلبس ثمانية وثلاثين معناها معندهاش اي مقومات الانثى بكل رغم انها حتى ببشتها الواسع بانت انثى بمعنى الكلمة ووووه مش عارف دماغي بينفجر شنو درت في روحي كلا انا
طلعو اهلي وروحنا وقلت ليهم ماتحكوش شئ نين نوصلو للحوش لان دماغي يوجع فيا ونبي نسمع كلامكم بروق
......
روان..شنو الكيس اللي في ايديك
وردة..هدية جابها ليا احمد
روان..اااايه بدينا نقولو احمد بدون استاذ
وردة بخجل..كان تشوفي منظري وهو يعارك فيا اني نقوله استاذ وماطلعت مني احمد الا بعد وين
روان..يابختك بيه هي افتحي الهدية
وردة بصدمة .....
#حياة