طوق نجاة

الفصل19

#طوق_نجاة
الفصل19
عمر..اه
انا..عليش وكيف عرفت
عمر ..وردة من لما انت خشيت حياتها وهي فرحانة ونست الزعل ولون عيونها الرصاصي معاش شفته لكن اليوم شفته وحضنتني وبكت
انا..والله مانعلم بحاجة حتى كلمتني عادي لما قالتلي نروح بيك
عمر ..حكت معاك وهي مطبسة راسها صح
انا
قعدت نذكر فعلا كلمتني ومطبسة راسها كانها تتفادى فيا
عمر..صح كلامي
انا..صح بس متأكد اني مادرتش ليها حاجة غير اني وعدتها نرفعها لمكان ولهيت في الشغل وماصارش
عمر..عمي احمد وردة عقلها كبير ومستحيل تكون زعلانه بسبب شئ زي هذا لكن اكيد حاجة كبيرة اللي مزعلتها
اناومندهش من كلام عمر كيف عيل صغير يحكي معاي تقول راجل لكن خطرت عليا كلمة وردة لما قالت عمر كبر قبل وقته بسبب حمايته ليها
انا..حاضر عموري والله نروح ونشوفها كنها واذا زعلانة مني انراضيها واذا من حد اخرى ناخذلها حقها كون هاني
عمر.. وردة حبيبتي نظلمت واجد وفرحت عشان لقيتك كويس معاها فارجوك حافظ عليها
انا ..حاضر وكون مطمن 
قديش وجعني كلام عمر وكيف هو خايف على اخته وفعلا على صغر سنه لكنه سند ليها صح لكن زعمك شنو مزعلك ياوردتي
......
وردة ..امي  تبي حاجة مني
امي ..كنك بنيتي فيك حاجة
وردة.. لا يا امي غير نحس في روحي تاعبة شوي نبي نرقد
امي..مع اني حاسة مش هذا السبب لكن عدي بنيتي ارتاحي
وردة..تصبحي على خير يا امي
وردة
طلعت من دار امي رقية وانا مش عارف شنو بندير والله شنو بنقول لاني مازالت مش عارفة مصيري انا مانبي منه شئ عادي يتزوج ويعيش حياته طالما مش قادر يعيشها معاي غير يخليني على ذمته مانبي شئ منه مانبيش نرجع لحوش راجل امي مانبيش نرجع للاهانات والضرب والجوع وقلة القيمة تقول شغالة عندهم ومانبيش نخلي امي رقية اللي تهتم بيا وتحن عليا ونرجع لامي اللي ماتندري عليا حية او ميتة
انا احسن حاجة انديرها نرقد طالما صلاة معفية منها اليوم والحمدلله ان احمد مش منقص حاجة عليا حتى من حاجاتي هذي موفرها ليا يارب ماتحرمني من اللي انا فيه انا من يوم ماتزوجت احمد وانا حامدة شاكرة يارب ماتحرمني من الراحة اللي انا فيها حتى لو بيتزوج ثانية وثالثة ورابعة وخشيت غيرت دبشي وشكلي من التخميم رقدت مانندري على شئ
انا
وصلت عمر وروحت وانا نفكر في كلامه وزعمك شنو اللي مزعل وردتي وخشيت على امي واستغربت الحوش هادي لان الوقت هذا وردة تكون مع امي وصوت ضحكهن يجيب من الباب الخارجي
انا..السلام عليكم
امي..وعليكم السلام
انا..وين وردة غريبة مش حذاك
امي..قالت مريضة شوي بترقد
انا بلهفة ..كنها يا امي سيبتها مافيها شئ
امي ..اهدى ياولدي قالت تاعبة بس
انا..به عن اذنك يا امي بنشوفها ونطمن عليها
امي..عدي ياحبيبي ربي يهديك ويريح قلبك
انا..تصبحي على خير وبست راسها وطلعت وجيت لجناحنا ولقيت الاضاءة هادية وجيت جيهة السرير لقيتها راقدة تلمست جبينها مالقيتش عندها حرارة ارتحت فتحت الدرج لقيت كيس مفتوح عرفت انها مريضة خشيت دوشت على السريع وخشيت تحت البطانية وجبدتها لحضني ورقدت وانا نفكر شنو مزعلها
وجاء الصبح واستغربت اني مشيت صليت الفجر وما انتبهتش عليا والصبح انا نضت قبلها ومشيت لامي زي العادة صبحت عليها هيا الاولى وجيت نوعي في وردة  
انا..وردة وردة وردتي نوضي وقت على الجامعة
وردة بنوم ..معليش احمد مش قادرة نمشي
انا بخوف..كنك وردتي تشكي من حاجة نرفعك نعاينك
وردة..لا يا احمد مافيش حاجة تخوف عادي مرض صبايا غير شكلها متعبتني واجد
انا..به تاخذي في حاجة مسكن اي حاجة
او حاجة ساخنة
وردة ..ماتعبش روحك وماتعطلش روحك على الجامعة تو عمتي عايشة نكلمها واديره ليا واكيد تلقاها جهزتلك قهوتك وسامحني ماقدرتش انوض
انا شديت ايدها..وردتي معاش تتأسفي وارتاحي واحسن حاجة اليوم محاضراتي الاثنين
وردة..ربي يعاونك ورجعت رقدت
انا
ماقدرتش الحق نطلع للكلية من غيرها وخفت حتى نضعف ونصبي مع ريم لو شفتها وتكون اهانة ليها لو حد حكاها لوردة احسن حاجة نقعد حتى انا لان بالي مش حيرتاح وهي بعيدة وعارفها مريضة ومشيت شور المطبخ
انا..عمتي عايشة وين العسل
عمتي عايشة ..شنو تبيه
انا..بندير فطور لوردة
عمتي عايشة ..تو انديرلها وانديرلك تو تعطل على جامعتك واهي قهوتك واتية
انا..مانيش ماشي ومسيب وردة هكي حالها عقلي نش حيهنيني عليها
عمتي عايشة ..اللي يريحك اهو العسل
انا..امي فطرت
عمتي عايشة ..اه من بدري فطرت انا وياها
انا..صحة وعافية
وسخنت الحليب وحطيت عليه كاشيك عسل ودرت ليها توست  بالجبنة والهريسة لاحظت انها تحبه حتى على الصبح  وتحب اي حاجة فيها جبنة وسخنت بريوش ليها ولي ومشيت للجناح
انا..وردتي هيا نوضي افطري
وردة ..به تو نفطر انت وقت على جامعتك
انا..مانيش ماشي
وردة..عليش
انا..حيقعد عقلي عندك ومش حنعطي محاضراتي بضمير فاحسن حل نقعد  وهيا حنفطر انا وياك هنا
وردة..به نغسل وجهي بس
وفطرت انا ووردة وحسيتها مرتاحة وفرحت انها رايقة وقلت ممكن امس من الضغط النفسي  فمرات تكون لخبطت نفسيتها ولاحظتها حتى في الشهور الاولى انها اتعب فيها جسديا ونفسيا تبدا تبي ترقد وبس
وردة..شكرا يا احمد على الفطور الحق كنت نحس في روحي جعانة
انا..صحة وعافية على قلبك يارب
وردة بتردد..احمد
انا..كنك وردتي
وردة ..ممكن نمشي لحوش عمتي فاطمة
انا..انتي تاعبة وردة وعارفك لما تطلعي تزيدي تتعبي فوتي هاليومين وبعدين عدي
وردة..به ممكن نكلم روان تجيني
انا..وردة هذا حوشك ليش نحس فيك كل مرة حد بيجيك  تقولي فيها كانك تستاذني وردة هذا حوشك افهمي
وردة بصوت واطي..حاضر يا احمد
انا..كلميها وامتى ماتبي تجيك تجيك وفي اي وقت وهيا تو تمددي وارتاحي
وردة..حاضر
تمددت وهو غطاني زين ورفع السفرة
والحق انقني كنت جعانة امس ماكليتش زين على الغذاء استغربت موقف احمد والعشاء اصلا اللقمات اللي كليتهن جمر ينزلن في جوفي بعد اللي سمعته وحمدت ربي ان وائل هنا بيش تعشينا منفصلين كنهدا راه احمد ركز على وكالي
انا
طلعت سفرة الفطور وخشيت اطمنت على وردة راقدة ومشيت شور امي
امي..كنها وردة يا احمد
انا..مرض عادي يا امي
امي..انا هذا عارفاته لكن وردة مش تمام يا احمد من امس لما روحت مع عبير وهيا جوها مش تمام وبعدها لهت شوي مع هاني وهيام وتغير جوها لكن بعدها مش عارفة شنو اللي صارلها تغيرت واجد وكأن حاجة ضايقتها او بمعنى اصح كأنها خايفة
انا باستغراب..خايفة وكيف عرفتي يا امي
امي..صح انا عميا لكن ربي عوضي بحاجات ثانيا واهمهم نحس بلي نحبهم في اصغر حاجة تصيرلهم زيك انت تفكر في خطوة تبي تخطيها ومش عارف كيف بدير وخايف انك بخطوتك هذي انك تظلم حد معاك صح
انا..صح يا امي
امي..ومانيش قايلتلك قولي لاني عارفاتك لما تبي تو تجي وتقولي لكن الاهم تو وردة يا ولدي
انا..حاضر يا امي تو نوض انوضها ونطلع انا وياها للمنتزه او لمطعم ونحكي معاها
امي ..تمام حتى تغير جو
انا
جيت لوردة لقيتها واعية لكن قاعدة في فراشها
انا..صح النوم
وردة..سلمك
انا..وردة كلمتي روان
وردة..لا مازال
انا..به شنو رايك لو نطلع انا وياك تغيري جو
وردة ..به
انا..وردة كنك 
وردة بتردد.. مافيش
انا مسكت ايدها .. في ياوردة متأكد ان فيه
وردة ..مش نحن بنطلعو
انا..اه
وردة..خلاص تو نحكيلك لما نطلعو
انا..تمام هيا نوضي غير دبشك مابين انا غيرت
وردة ..حاضر
وغيرت دبشي وطلعت سخنت السيارة وخليتها بيش تغير براحتها
وردة
قعدت نغير في دبشي وانا خذيت قراري اني لازم نعرف على اي بر نرسى بنقوله اني نعلم حتى لو زعل مني عشان سمعتهم لكن لازم يعلم ويقولي شنو بيدير فيا
انا
شفتها وهيا جاية وجهها ماعليشي شئ وليش تحط عليه وهو اصفى من الحليب فعلا كانت وردة بمعنى وردة شوي اهتمام طلع جمالها كله كانت لابسة سروال جينز ازرق وعليه فانيليا طويلة لتحت الركبة بواجد سماوية وفوق منها كبوط اسود طويل بكل و محرمة مخربشة بين الابيض والسماوي والازرق طالعة فعلا زي الحورية ظلم بوها لما سماها وردة كان يسميها ملاك والله حورية
وردة..السلام عليكم
انا..وعليكم السلام
وردة ..ان شاءالله ماعطلتش عليك
انا..وردتي تعطل براحتها وانا ماليا الا نستنى بكل روقان
وردة بخجل..شكرا وشكرا على اللبس الجديد اللي جبته ليا على السمستر الجديد
انا..وردة معاش تقولي هكي انتي مراتي افهمي الكلمة هذي
وردة.. فاهمة بس
انا..بس شنو
وردة.. لما نوصلو تو نقولك
ومشينا واخترت منتزه على خاطر هادي وفي الشتاء يكون شبه فاضي  ومشينا وقمعزنا على الطاولة وطلبت ليا نسكافيه وهي كابتشينو
انا..هي احكيلي بس شنو
وردة وبتوتر واضح ..احمد بدون ما نلف عليك وندور انا سمعتك انت ووائل
انا..شنووووو 
#حياة