#طوق_نجاة
الفصل8
انا.. تو احكولي شربت قهوتي ودماغي صفا
عبير..باين انها طيوبة وعيونها يهبلو
انا..شعرها شنو ياعبير
عبير فهمت عليا شنو نبي لكن هذي عبير كان ماماطلت ماتبقاش عبير
عبير..قهوي داكن قهوي بدرجة غريبة وناعمة بطريقة حلوة
انا..عبير اخلصي عارفتيني على شنو نسئل
عبير ..اه طوله طول لوين ياعمتي عفاف ماركزتش عليه
عمتي عفاف ..كيف ماركزتيش عليه وهو ينادي ويقول انا طولي لعند هنا بلون القهوي الداكن زي لون البندق
انا..ما اطحونيش بينكن
عبير ..قصدك عمرك ماشفته
انا..وين بنشوفه وهيا محرمتها تغطي في نص جسمها
عبير ..ههههه قصدك حتى تفاصيل جسمها ماتعرفها
انا..قصدك هيا عندها تفاصيل
عمتي عفاف ..تحشم انت وياهها امكم قاعدة
امي ..طوله يا احمد لنهاية خصرها
انا..كيف عرفتي يا امي
امي ..انا امك ماتسئلنيش سؤال زي هذا لكن انريحك ونقولك لما قمعزت احذاي طوله لنهاية قمعيزتها وشكل جسمها حلو وشكلها طويلة حسيت بيه من مكان طلوع صوتها يعني انت توصلك قبل كتفك بشوي
انا..صح يا امي هيا طولها يجي تحت كتفي بشوي
عبير..والله يا امي طلعتي مانك ساهلة
امي.. ربي خذا عيوني لكن عطاني حاجات واجدة
عمتي عفاف.. ربي يهنيك بيها يا احمد شكلها بنية على حالها رغم ان حوشهم اثاثه ممتاز وواضح انه مصروف عليه وحتى امها لابسة قفطان واضح انه سعره مش رخيص لكن هيا العكس تمام بسيطة وهادية ماتقولش تهاني امها نهائي ربي يعطيك على قد نيتك حمودي تستاهل وحدة زيها
انا
سرحت في كلام عمتي وانا نعرف عمتي عندها نظرة في البني ادام اصلا اصريت انها تكون مع امي وعبير لاني نثق واجد في رايها طبعا خلوني نحكيلكم على عمتي عفاف عمتي عفاف اخت باتي الوحيدة باتي ماعنداش خوت ولاد وهي مش كبيرة في السن اكبر مني بخمس سنين وعندها بنوتة تهبل سميتها انا ميس وفيها شبه مني واجد ورغم ان عمرها ثلاث شهور لكن مستحيل يمر عليا يوم مانمشيش نشوفها
عمتي عفاف.. وين رحت حمودي
انا..قاعد عمتي نتوكل على الله ونكمل طريقي
امي.. وانت بكل ثقة
انا.. معناها بنقرا الفاتحة الجمعة تلحقو تنسقو عشاء
عمتي عفاف .. مع الفلوس حمودي مافيش صعب بكرة نطلعو نتفقو مع المرا اللي نتعاملو معاها في مناسباتنا ونشوفو قديش تبي من كل حاجة ونجيبوهن ليها يوم الخميس ويوم الجمعة يجي جاهز وواتي
عبير ..صح ياعمتو تطيبها يهبل
انا..ربي يخليك ياعمتي وانتي مسهلة كل حاجة
عمتي عفاف..ان شاءالله ربي يباركلك فيها يارب كم راجل بيش اندير حسابنا كم مقعد بدير المرا
انا..مش عارف ياعمتي انا الاساتذة والدكاترة اللي معاي في الجامعة واكيد المهندسين اللي في المزرعة وطبعا بنرفعو عشاء اكيد للعمال وراجل امها مانندريش عليه بيكلم عمامها وخوالها او لا لاني مانعلمش العلاقة بينهم مقطوعة او لا
عمتي عفاف..خلاص تأكد منه وقولي
انا.. الله يحفظك لنا يارب ياعمتي ويحفظلك ويحفظلي ميوس
امي وعبير وعمتي ..امين يارب
خشيت للداري وتمددت على السرير ونفكر وخذاني التفكير زعمك يجيني يوم ونحبها وليش مانحبها وهيا قمة الاحترام والادب لكن اكيد حياتي مش حتكون ساهلة لان قديش صعب على المرا انها تتزوج وهيا حاسة بروحها مكسورة
انا..خشي ياعبير
عبير ..كيف عرفت اني انا اللي اندق
انا.. اول شئ مافيش حد يجي لجناحي الا انتي بالذات ان عمتي عايشة مش قاعدة وعمتي عفاف تخش من غير ما ادق وثانيا عطرك ريحته مميزة خطرها على العطر نبي اسم عطر يكون كويس بنهديه لوردة
عبير .. ليش
انا..كيف ليش لاني عمري ماشميت عليها عطر
عبير.. اكيد مستحيل تشم عليها ريحة لان طالما تقول ان محرمتها مغطية نص جسمها كيف بدير ريحة قوية وعارف انه مكروه
انا.. صح عندك حق
عبير..حاضر تو نقولك على اسم عطر هادي وفي نفس الوقت حلو
انا.. تمام
عبير .. انت تحبها
انا..كنك انتي ووائل نفس السؤال
عبير..اهتمامك هكي يقول
انا.. ممكن معجب وممكن اهتمام لكن حب مش عارف
عبير ..ربي يهنيك يارب
على فكرة هيا لون عيونها شنو
انا..عليش سئلتي
عبير ..اصلا استغربت حاجة
انا نضت قمعزت وقلت بالك عبير عندها تفسير للون عيونها اللي ملخبطني
انا..شنو اللي مستغربتيه
عبير.. اول ماخشت علينا لون عيونها عسلي فاتح يهبل وصافي وتمام التمام لعند ما انت رنيت عليا وقلت لوردة اطلعي احمد يبي يحكي معاك تغير لون عيونها للاخضر لدرجة حكيت عيوني قلت بالك نتخايل لكن قاعدات خضر لعند ماطلعت منك
انا.. ونزيدك استغراب وانا مرة شفتهن رصاصيات زي الفضة بدرجة مش عادية
عبير..والله
انا..زي مانقولك
عبير ..بالك عيون وردة اللي تعتبر من العيون العسلية النادرة
انا باهتمام.. كيف
عبير .. وانا في سنة ثانية خذينا محاضرة على العيون وكان من ضمنها الالوان النادرة للعين وان في لون عيون يتغير على حسب احساس الشخص بس قالو ان هذي دراسة مش مؤكدة وقريت عليها حتى في النت لكن يشرحو وبعدها يقولو انها مش مؤكدة لكن شكلها وردة اكدت الدراسة قولي لما شفتها رصاصي بلون الفضة شنو كان وضعها
انا بشرود.. تبكي
عبير .. شنو
انا بعد مافطنت لروحي .. مرة كان راجل امها شكله ضاربها ضربة ماكنة وياروحي هيا كابرت على الوجع لكن لما طلعت من المحاضرة جت لمكانها المعتاد وقعدت تبكي في البداية مانتبهتش لكن لما رفعت وجهها بيش تمسح عيونها انتبهت لحاجتين ان عيونهن لونهن رصاصي وانا سنتين نشوف فيهن عسلي فاتح نين استغربت
عبير ..ياروحي عليها فعلا الاب عزوة الله يرحم باتي وباتها
انا..امين يارب
عبير .. وثاني حاجة شنو
انا.. شنو ثاني حاجة
عبير .. انت قلت انك انتبهت لحاجتين الاولى لون عيونها والثاني شنو
انا بضحكة .. لون بشرتها انه ابيض مش قمحي داكن زي وجهها عرفت انه من صهد الشمس
عبير .. مع ان نحن طلعت لينا وجه ابيض زي ايديها اكيد استعملت كريم
انا.. عبورة قوليلي حاجة وردة تلبس ليها سنتين بنفس العباية وهذي الثالثة ونبي نهديها عباية بحيث تغير ومش عارف كيف وطبعا مش حنرضى تقعد بنفس العباية وهيا على ذمتي
عبير.. ليش خايف ماتقبلهاش
انا.. ايه لاني اصلا هديتها هدية ويستر الله من ردة فعلها صح هيا ظروفها تاعبة بس عزيزة نفس واجد
عبير .. عندي الحل
انا..شنو
عبير .. انت مش بتقرا فاتحة يوم الجمعة نحن يوم السبت نمشولها على اساس بنباركو لكنتنا ونرفعو ليها شوية حاجات يعني لبس ومستلزمات ومكياج حاجات زي هكي وهي هكي حتقبلها بدون ماتحس انك تصدق عليها وفي نفس الوقت هيا مرتك
انا.. والله صح ليك جبتيها
عبير ..تمام بكل معناها بكرة دير حسابك نخلولاك الصغار ونطلع انا وعمتي
انا.. ماهو الحضانة بتعاتكم لكن ادللي
عبير..ياسلام على اساس ماشية ناخذ لروحي
انا.. على اساس مانشدش فيهم لما انتي ادوري انتي ووائل
عبير باست على راسي .. ربي يحفظك ليا ياخيي وباتي يارب
انا..ويحفظك لي هيا عاد وانتي عجباتك القعدة
عبير.. اخص مصلحجي
انا.. عبير تصبحي على خير
عبير .. كيف ماتبيش تتعشى
انا.. لا ماعنديش نية
عبير .. براحتك هي سلام
انا
طلعت عبير ورجعت للتفكير اللي مايبيش يفارق دماغي وصورة ريم اللي ماتفارقش عقلي وكيف اني بنتخلى على وحدة كنت نحلم ايام وليالي امتى يجي اليوم وتكون حلالي وتو انا بتكون حلالي وحدة ثانية لكن هذي امي ينباع على سباها كل شئ
#حياة
YOU ARE READING
طوق نجاة
Randomعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
