طوق نجاة

الفصل34

#طوق_نجاة
الفصل34
الدكتور ..طمن بالك مافيش حاجة خطيرة
انا..شنو صارلها وليش ماوعتش لما قعدت انوض فيها 
الدكتور ..اطمن هيا بس من الطيحة حصلت فتحة في راسها سببت ليها نزيف دم واجد وخيطنا الجرح
انا بوجع .. جرح كبير
الدكتور..15 غرزة صح كبير بس ماتخافش وطبعا كسر في ايدها والتواء في رجلها بس
انا بخوف ..بس شنو
الدكتور .. لانها نزفت واجد من الجرح والفترة بين الجرح واسعافكم ليها تعتبر طويلة فاطرينا نزيدوها دم وهذا السبب انها مافاقتش لما حاولت تفوقها 
انا بتنهيدة .. الحمدلله يارب المهم حالها كويس تو
الدكتور ..حالها تمام بس اليوم لازم تبات هنا
انا..تمام يادكتور
الدكتور.. ياريت تشوفو الحسابات
انا..اكيد يا دكتور شكرا لتعبك
الدكتور ..واجبي
انا..نقدر نشوفها تو
الدكتور.. هيا حاجة نص ساعة ثانية وتكون فاقت
انا..شكرا للمرة الثانية
وائل..ها يا احمد شنو قالك الدكتور
انا .. كسر في ايدها والتواء في رجلها وفجخة في راسها 15 غرزة
وائل.. لا اله الا الله
انا .. الحمدلله على كل حال غير هيا شنو ركبها للدروج وشنو ادير فوق حتى ريم مش قاعدة بيش نقول ممكن نادتها
وائل..تو توعى واسئلها
انا..بنقولك بالله عدي للحوش وجيب دبش لوردة  ولي تو نكلم عبير تجهزه لك لان دبشها كله غارق بالدم  ودبشي تما زيه وجيب فلوس معاك المصحة تبي فلوس اكيد على الحساب ونحن جينا نجارو بدون حاجة
وائل..تمام انا تحتي تقريبا 300 استنى هاك حطهن نين نجيب فلوس من عبير
انا..تمام
واتصلت بعبير وطلع وائل
عبير.. ها طمني وردة كنها
انا..اطمني ياعبير وطمني امي وردة كويسة وبكرة بنروح بيها
عبير ..شنو صار معاها
انا..عبير والله ماعندي جهد نحكي تو وائل في الطريق تو يحكيلك بس بنقولك
عبير ..نعم
انا..خشي جناحي وجيبي توتة مستورة  و عباية والله نقولك بشت ومالية واسعة تحت منه عشان ايدها بتكون مجبسة وسروال ولبسة ليا دبشي كله دم وخشي لدار المكتب افتحي واحد من الادراج تلقي فيه فلوس خوذي منهن الف والله اثنين وعطيهن لوائل
عبير ..حاضر
انا..هيا سلام بنخش لوردة
عبير..نجي نقعد معاها وانت تروح
انا..وامي وصغارك من بيهم ياعبير حتى عمتي عايشة مش قاعدة وردي بالك تتصلي بعمتي عفاف تفجعيها في هالليل خليها لبكرة نكون روحت انا ووردة
عبير .. ان شاءالله رد بالك على روحك
وخشيت لوردة لقيتهم مركبين ليها كيس الدم ووجها كيف شاحب وباهت ومع هذا كله كأنها ملاك راقد طبعا هذي حوريتي اكيد بتكون زي الملاك  وانتبهت لايدها المجبسة ومشيت ايدي عليها ورجلها الملفوفة برباط وفطنت لشعرها المفتوح وحسيت بنار ركبت جواي ان الدكتور كان يتفرج على شعرها لميته ليها بدون مانضغط جيهت الجرح لانه كان من الجنب الجرح جيهت وذنها وشوي فطنت بيها فاقت
انا..وردتي حبيبتي حمدلله على السلامة
وردة بصوت واطي ومتقطع .. انـ ا
وووينـ شنوووو صـ ار
انا..اس حبيبتي انتي بخير شوي اصابات لكن انتي بخير
وردة بصوت هادي ..الحمدلله الحمدلله الحمدلله
انا..على كل حال حبيبي طمنيني كيف صار معاك هكي
فتحت وردة عيونها وشفت اللون الرصاصي اللي ليا وووواجد ماشفته خفت عليها وخفت ان تكون حاجة كبيرة صايرة ليها
وردة بتوتر ..انا شفت حركة حذا الدروج فقلت نشوفها ولما ركبت نطت عليا قطوسة فجعتني ومعاش نندري على شئ
انا..حمدلله على سلامتك ياقلبي ونور عيني
مع ان قلبي حاسس اني في شئ ثاني لكن خوفي عليها لما كان مغمي عليها وتو مفتحة عيونها خلاني مانفكر في شئ الا انها تتنفس حذاي
وردة..الله يسلمك
وجاء وائل وجاب الدبش والفلوس وعشاء وساعدت وردة بعد ماكمل كيس الدم في تغيير دبشها وغيرت انا دبشي وتوضيت وصليت وتعشيت انا وياها مع انه مهناك عشاء كليناه لكن اهو حاجة تسند وبعدها هيا رقدت من المسكن اللي عطوه ليها وركبو ليها تغذية وقال الدكتور ان جسمها ضعيف محتاج تغذية واستغربت وخطرت عليا ريم وفي الوقت اللي خطرت عليا على رنة فوني لقيتها هيا طلعت من الحجرة
ريم..اهلين
انا..وعليكم السلام اهلين بيك
ريم..قلت مادورتنيش قلت ندورك
انا..والله مافضيت انا في المصحة
ريم بانفعال مزيف.. خير في حاجة فيك انت حاجة والله عمتي صارلتها حاجة
انا..مافينا شئ انا وامي لكن وردة
ريم بعصبية وتوتر..كنها وردة
اناوانتبهت لتوترها وعصبيتها.. وردة لقيتها طايحة على دروج شقتنا من برا
ريم ..وشنو صارلها
انا.. كسر في ايدها والتواء في رجلها وفجخة في راسها
ريم من غير نية ..حمدلله على سلامتها
انا..الله يسلمك وهي تو سلام نبي نخش نقعد حذا وردة
ريم ..تصبح على خير
انا..وانتي من اهل الخير
..........
رامي.. عليش تو الاتصال بيه
ريم ..بنطمن شنو صار ليها
رامي.. هذي مش في حسابنا بكل انك اديري هكي
ريم بعصبية .. حتى انا ماتخيلتش روحي اندير هكي لكن بس لما تخيلت انك طولت ماركبتش ليا وانت تتمقل فيها معاش قدرت انشد اعصابي
رامي وشد ايدين ريم .. وانتي تتخيلي مهما كانت جميلة تقدر تحرك شعرة في قلبي يا ريم انتي حياتي كلها ولولا اللي نبوه من احمد راك تو مرتي قدام الناس كلها مش علاقة بالدرقة 
ريم .. هانت ونفتكو منه
رامي.. تعرفي لولا ماتتصليش بيا اول ماينزل كنت نموت فيها وانا بس عقلي يتخيل انك ممكن تكوني راقدة معاه
ريم ..ومستحيل نخلي حد يقربني
رامي..ماهو لما اصريتي انك اديري العملية خفت تضعفي
ريم ..درتها احتياط وانت راجل وعارف الراجل لما يبي حاجة مايمنعه شئ
رامي..صح كلامك بس خفت انك فعلا حبيته
ريم ..انا في قلبي مافيش الا انت وغير بس نفتك من قصة احمد وتشوف بروحك اني قاعدة زي ما انا والعملية اللي درتها قاعدة
رامي..عارف ياقلبي لاني تأكدت من احمد ان مستحيل يقربك لان احمد راجل عاشق لمرته حتى لما عاركك عشان سلمت عليك بالخد ماخفتش منه
ريم ..ليش
رامي..لان في الاخير احمد راجل شرقي ومستحيل يرضى حتى لو زواجكم مؤقت على نفسه ان مرته تسلم على راجل ثاني بالخد انا لو مكانه كنت دفنته
ريم .. تحبني يا رامي
رامي..ومازالتي تسئلي والله عندك شك
ريم .. اه شكيت لاني سئلت مرة احمد كيف يحب وردة وكيف حكالي كيف يغير عليها شكيت وانت رضيت اني نتزوج راجل ثاني ونمثل عليه الحب
رامي.. ريم انا مش نغار انا نولع وانتي كل ليلة في حوشه وحتى انا عارف ان مابينكم شئ وحتى لما قلتي ليا عاركك على لبسك المكشوف فرحت واجد لاني اصلا مش راضي عليه لكن الحاجة الوحيدة اللي خلتني نتحمل كل هذا هو المشروع اللي بنديروه الثروة اللي بتكبر وتكبر وتكفينا عمرنا كله لعند صغار صغارنا
ريم .. يارب بس تو مش عارفة شنو اندير
كيف بنخليه يوقعهن وهو تو معاش بيتحرك من حذا وردة
رامي ..خليني نفكر في حل المهم تحاولي كيف وردة تسامحك وماتخبرش احمد
ريم ..انا متأكدة انها ماحكتش ليه شئ
رامي ..كيف عرفتي
ريم .. لانه لو حكت راه احمد ماكلمنيش عادي راه ولع فيا
رامي..صح ماتنسيش بكرة نوضي بدري وامشي للحوش على خاطر ضرتك طبعا وبلغي عمي وامك انهم يجو العشية
ريم..انت وين بتبات تو
رامي..بنعدي لجناحي
ريم ..مانكش بايت هنا
رامي..انبات هنا مانضمنش روحي ياروحي
ريم ..به تصبح على خير
رامي باسها على جبينها..وانتي من اهل الخير
.......………….................
وجاء ثاني يوم وروحت انا ووردة وحضنتها امي وهيا تبكي وقعدت نهدي فيها
وردة ..والله مافيا حاجة خطيرة يا امي كنهدا ماطلوعنيش
امي..والله قلبي ولعت فيه النار
وردة .. ماهو يا امي لو رضيتي ودرتي العملية كنهدا ماقعدتش الوقت هذا كله وانا ننزف وماحد يندري عليا
امي بحزن ..حقك عليا يابنتي احمد
انا..نعم يا يا امي
#حياة