طوق نجاة

الفصل 1

#طوق_نجاة
الفصل 1
نضت زي كل يوم جهزت روحي بيش نمشي للجامعة لان عندي المحاضرة الاولى طلعت من داري او جناحي الصغير بعد ماصليت فرضي ومشيت للدار امي ربي يعطيها الصحة
انا..صباح الخير يا اغلى ام في الدنيا
امي ..صباح معطر بذكر الرحمن وحافظك ويصونك ياولدي
انا.. امين يارب كيف حالك ياامي اليوم
امي .. الحمدلله يا ولدي زي كل يوم  شنو بيجد عليا
انا..غير يهديك ربي يا يمي واديري العملية وتهنيني
امي .. انا رضيت بنصيبي يا ولدي والحمدلله على كل حال
انا..ربي يهديك يا امي تبي حاجة انا بنعدي للجامعة عندي محاضرة اولى
امي .. غريبة يا احمد قبل انت ماعندكش محاضرات الصبح
انا.. ايه ماهو في معيد واخذ اجازة زواج وبنمسك بداله منهج السنة
امي.. اه ربي يعاونك يا احمد ونفرح بيك حتى انت عريس
انا بشرود .. ان شاءالله يا امي
هي مع السلامة تو
امي .. في حفظ الله
وطلعت من دار امي وكلمت عمتي عايشة اللي تعتني بامي ودايرة بالها منها ومن الحوش 
انا.. مانوصيكش عليها ياعمتي
عمتي عايشة .. كون مطمن يا احمد
انا.. مع السلامة
عمتي عايشة .. قهوتك يا احمد جهزتها لك وحطيتها في كبايتك المعتادة تلقاها على المدخل
انا.. شكرا ياعمتي عمرك ماتنسيها
وطلعت وخذيت قهوتي بدون حبة سكر وولعت سيارتي وماشي للجامعة نجو نعرفكم بيا قبل
انا احمد معيد في جامعة العلوم ندرس في مادة الرياضيات والجبر فالجبر عشقي عمري 29 سنة تخرجت من الجامعة وطول حضرت ماجستير لاني شاطر واجد في القراية اصحابي ملقبيني الدحيح وقبل كنت بنكمل دكتوارة لولا الحادث اللي صار لامي وباتي
مات باتي الله يرحمه وامي انعمت معاش تشوف ومع ان عمليتها صعبة شوي لكن نتيجتها مضمونة الا انها مصرة ماتبيش اديرها وكانها بعد باتي  الله يرحمه معاش تبي تشوف حد نحب وحدة بس مازالت ما اعترفت ليها بمشاعري لاني خايف ماترضاش بامي فبنحاول نقيس نبضها قبل لان امي قبل كل شئ وماعنديش خوت الا اخت وحدة بس اسمها عبير ومتزوجة وعندها ولد وبنت توأم تعاني هيا وياهم واطباعي وشكلي تعرفوهن لقدام
..................
نضت الصبح وغسلت وجهي وبعد الصلاة وقراية جزء من القران زي كل يوم لبست عبايتي اللي ليا سنتين نلبس فيها وهذي السنة الثالثة وحطيت محرمتي البيج تعتبر جديدة هدتها ليا روان محرمة كبيرة وساترة نص جسمي من فوق  والحمدلله على كل حال وحطيت مذكراتي في شنطتي وطلعت نقالي اللي ملصق بلصقة بيش مايتفترشش مني واتصلت برفيقتي الوحيدة اللي ماعندي غيرها وجارتي غير في شارع ثاني لكن في نفس الحي 
وردة..السلام عليكم
روان .. وعليكم السلام
وردة.. واتية انتي وين
روان .. هي اطلعي وقدمي لنهاية الشارع فكيني من هالمعفن ماخاطري نصبح عليه
وردة.. حاضر حتى انا نضت بدري وجهزت روحي بيش نطلع قبل ماينوض حسبي الله عليه
وطلعت من الحوش وحمدت ربي انه مافطنش بيا
خلوني نعرفكم بيا
انا وردة  بنت يتيمة الاب وامي بعد مافكت عدتها طول تزوجت محمد جارنا وانا مازالت في اولى ثانوي ورغم ان حالته المادية كويسة لكن ماتهناش نين صرف فلوسي كلها بيش نقعد تحت رحمته هو بس وامي كانت انانية مافكرتش فيا وحتى لما تزوجت مافيش حد لا من عمامي ولاخوالي رضى اني نقعد عنده وبعدها امي حملت وجابت وانا تميت المربية والشغالة وكل شئ بس الحمدلله رغم الظلم اللي انا فيه ماوقفتش قرايتي ونخدم مع عمتي فاطمة ام صديقتي روان في الحلويات دايرة معمل صغير في حوشها تخدم فيه بيش تساعد على المعيشة وانا بيش نلقى مانصرف على قرايتي ولانهم يقاسمو فيا في كل قرش مش لانهم مستحقين لكن على قولة راجل امي الفلوس تفسد البنت واللي يفضلي يادوب يكفي شيتاتي والكتابات اللي نستحق ليهن في قرايتي  يعني حتى عباية جديدة ماعنديش بيش نشريها وحتى رصيد لولا روان راه ليها وقت شفرتي مسكرة وبايعتها الشركة وطبعا عمي محمد راجل امي صاحب كاس وجنونه ماتطلعش غير عليا اني شكلي شنو وطبعي شنو وحياتي تعرفوها لقدام
.............
وصلنا للكلية اللي تعتبر منفسي الوحيد هو وحوش عمتي فاطمة لدرجة حتى ماعنديش محاضرة نجي نقعد فيها ونقرا في المحاضرات او في المكتبة نقرا في اي كتب ثانيه نثقف منها طالما حتى التلفزيون مانقدرش نقعد عليه لان في الحوش مع الشغل اللي كله فوق راسي والراحة مانشوفش فيها غير في حوش عمتي فاطمة حتى ماعندهاش طلبيات نمشي نقعد نريح في عظامي من شغل الحوش وحوسة خوتي اللي ماتكمل توأم عمر وعامر عمرهم  ستة سنوات وياسمين اصغر وحدة اربع سنوات طبعا عمر رغم صغر سنه الا انه يحبني واجد ويدافع عليا قدام بوه لما بيجي يضربني ومرات واجدة يرحم فيا بوه بسببه خشينا للمحاضرة الاولى
شاب الاول  .. تعرفو الاستاذ علي خذا اجازة وبيجنا مكانه الاستاذ احمد عبدالرحمن  اللي يعطي فينا في محاضرة الجبر وتو المحاضرة هذي
الشاب الثاني .. ياساتر معناها بنصبحو في وجه ثلاث ايام في الاسبوع غير الاربع محاضرات الظهر في الاسبوع
الشاب الاول .. لكن الحق ينقال صح هو مايعرف يضحك وصعب في التعامل لكن انقنه يشرح وبالك نطلعو من المادة هذي خير من علي اللي مانفهمو منه في شئ وماتنساش احمد لقبه الدحيح دلالة على شطارته واكيد نحن المستفيدين
وردة.. روان سمعتي اللي بيعطينا بدل الاستاذ على الاستاذ احمد
روان .. فرحانة عاد انتي
وردة .. اكيد استاذ شاطر وشرحه واضح ويعطي بضمير
روان .. عندك حق لكن الحق صعب واجد
وردة.. شنو دخلنا بيه صعب والله ساهل المهم انه يعطي صح
روان ..صح اهو خش
....................
انا .. صباح الخير
الطلبة ردو صباح الخير الا وحدة ردت وعليكم السلام
ضحكت في خاطري لاني عرفت من هيا وردة عبدالعزيز الاولى على دفعتها والدحيحة زيي في القراية
انا.. طبعا من اليوم بنعطيكم المادة بدل الاستاذ علي هيا نبدو في المحاضرة
بسم الله
شرحت المحاضرة وطبعا وردة قمة الاهتمام والمشاركة معاي وكملت المحاضرة وخذيت الحضور والغياب وطلعت
روان .. والله اول مرة نفهم المادة هذي
وردة .. اصلا الاستاذ احمد شرحه سلس وواضح ومايصعبش في الامور
روان .. هي نطلعو نفطرو قبل المحاضرة الثانية
وردة.. افطري انتي انا درت فطور قبل مانجي
روان .. بالله فكينا من الجو اللي اديري فيه نحن خوات عارفاتك لافطرتي ولاسو
وردة.. مانبيش نثقل الحق عليك مش ساد رصيدي وحاجاتي الخاصة ومعاها فطور واجد هكي
روان.. انتي حبيبة والله اعلم لو بيدنا ماخليناك الا عندنا ورباك باتي زينا حسبي الله علي كان السبب في اللي صايرلك
وردة .. ربي ماينسى حد ولو بعد حين
واكيد ربي يختبر فيا فالحمدلله
روان هيا نطلعو
وطلعت وردة وروان للكافتيريا وطبعا زي المعتاد وردة اختارت ارخص حاجة عشان ماتكلفش على صاحبتها اكثر
وجن قمعزن في مكانهن المعتاد تنفس فيه وردة لروان بعيد عن اهل روان اللي من كثر مايهتمو بوردة مايعطوش فيها مجال تقعد مع روان بروحها
روان .. لازم كل مرة تاخذي ارخص حاجة
وردة .. والله ماهو مهم حبيبة المهم حاجة تعبي البطن سوى كانت بيتزا او طرف جبنة او حتى كسرت خبزة ودهنت زيت او خبزة يابسة منقعة  في شاهي المهم حاجة تعبي البطن
روان .. في حياتي على قد مانشوف في امهات قاسيات ماشفتش زي امك
وردة .. امي مش قاسية امي انانية ربي يهديها ويصلح حالها ماتفكرش الا في رروحها بس ورضى عمي محمد راجلها وانا اخر همها وحتى عمر وعامر وياسمين لولا خوفها من عمي محمد راه تعاملت معاهم زي ماتتعامل معاي وحتى باتي حي كان هو الحنين هو اللي يهتم بكل حاجة بيا سماني وردة عشان تبدا حياتي زي الورد ومايحسباش ان الموت قريب منه ويخلي حياتي سودا كي سواد الليل والمفروض سماني ليل لو كان يعرف لكن لا اعتراض الله يرحمه
روان .. الله يرحمه
وردة.. تعرفي المشكلة وين
روان .. وين
وردة .. مش في عمي محمد اللي مايجيشي يوم ومايضربنيش والله اني ناكل في وجبة وحدة في اليوم اللي هيا الغذاء عشان هو مش قاعد ومش عشان بيوفر حق وكالي لا عشان مايبيش يشوف خلقتي قدامه الا وانا نخدم وبس ولا انهم يقسمو معاي في الفلوس اللي نحصل فيهن من خدمتي مع عمتي فاطمة  بحجة ان كثرت الفلوس تفسد البنت لا
روان .. ها في حاجة احرف من هكي
وردة .. اه في انك تسمعي امك وهيا تأن وتوآه وهيا راقدة مع راجلها بدون اعتبار ان في بنت بالغة معاهم في الحوش وكله كوم والدار اللي مايسكروش فيها بيش الصوت يكون واضح حتى لو سكرت دارنا انا وخوتي 
روان .. معقولة لهدرجة مافيش حشم
وردة .. ومازال تخيلي امس ماقدرتش نوض للحمام (حشاكم)
روان .. عليش
وردة.. لان راجل امي ماقدرش يصبر نين يوصل للدار بيش يرقد مع امي فرقد معاها في الصالة لاقدرت نطلع والصوت حتى مع القطن في وداني ومازال واضح في اكثر من هكي
وفضفضت وردة لروان بما تعانيه من امها وراجلها ولكن ما انتبهوش ليا وانا نسمع فيهن وبدون مانندري حسيت بدمعة نزلت من عيني 
وردة .. هيا نمشو للمحاضرة الثانية بدت بيش نطلعو بسرعة لان عمتي فاطمة عندها طلبية تورتة عرس وعارفتيها قديش تبي وقت وشغل
روان .. هي
مشن لمحاضرتهن وبدون انتباه لي وانا نراقب فيهن ونسمع في كلامهن وانا مصدوم من اللي سمعته وقررت ان نطلع  لحوشي والاوراق نراجعهن في الحوش
#حياة