طوق نجاة

الفصل9

#طوق_نجاة
الفصل9
وردة بصدمة
روان .. ياهكي الهدايا يابلاش
وردة..روان انتي فيش تقولي مستحيل نقبلها
روان .. عليش يابنتي هو راجلك 
وردة .. مازال ياروان مازال لما يكون حنقبل منه اي شئ لكن تو صعب
روان ..ربي يهديك شنو بديري
وردة ..بنرجعه له بكرة واذا اصر عليها انقوله يدسها ليا عنده نين نكون في حوشه
روان .. حرة ياستي
................
جاء ثاني يوم وتجهز كل واحد منا انا ووردة وروان وجينا للجامعة وطبعا وردة طلبت مني اني مانحكيش  على الخطوبة لحد نين تنقرا الفاتحة
انا
جيت للجامعة وعقلي ودماغي منفخ من التفكير وفرحان ان ريم السمستر هذا موقفة لانها مسافرة برا بيش ماتصعبش عليا وضعي واللي محيرني انا اكثر انسان واثق في روحه لدرجة واجد يقولولي مغرور ليش من يوم ماقررت نتزوج وردة وانا تميت متردد ومش عارف روحي شنو نبي وخشيت للمحاضرة الثانية لان الاولى ماعنديش وطبعا روان ووردة معاش قمعزن في جيهتن المعتادة بعد ماعرفو اني نراقب فيهن وكملت المحاضرة وخشيت للمكتب وشوي الباب
يدق
انا..تفضل
وردة..السلام عليكم استاذ احمد
انا بضيق ..وعليكم السلام شنو قلنا ياوردة
وردة..معليش في الجامعة خليني نقول هكي اريح
انا..قدام الطلبة عادي لكن بينا لا
وردة ..حاضر يا اااحمد
انا..تفضلي تبي حاجة راجل امك دارلك حاجة
وردة بسرعة .. لا مادارلي شئ لكن جيت بنقولك
انا
شفتها كيف متوترة وهي تحكي وبعدها فطنت ليها تمد ليا في الكيس اللي مديته ليها امس
انا..كنك ترجعيلي في هديتي
وردة.. تو مانقدرش نقبلها الحق
انا..ليش
وردة.. الهدية هذي غالية انا لو عندي حقها تسدني مصروف السنة والسنة الجاية وصعب اني نقبلها تو
انا.. بس انا جبتها للي بتكون مراتي
وردة بخجل .. انت قلتها بتكون مراتي
انا..وردة مازالن يومين
وردة بجدية.. هو صح الاعمار بيد الله لكن مافيش ضمان اني انا في اليومين هذين مانموتش وربي يرفع امانته وبعدين ياخذه راجل امي يبيعه وياريته بيصرف حقه على عزاي انقول عادي هو حيصرفهن على كاسه
انا.. عليك تفكير ياوردة
وردة .. اللي انا عايشة فيه خلاني نفكر لابعد مايتخيله عقلك
انا..بس هكي انا نزعل انك رديتي اول هدية مني ليك
وردة بخجل .. كله ولازعلك به عندي اقتراح شنو رايك تخلي هديتك اللي انا قبلتها بصدق عندك يعني ادسها ليا لعند مانكون في حوشك هكي اريح لي
انا
وبعد ما اتأكدت انها مصرة على رايها وصعب تغيره
انا..خلاص ياوردة حندسه لك عندي تمام هكي
وردة بفرحة ..تمام وشكرا ليك
انا..العفو ومعاش تشكريني ياوردة
اه على فكرة يوم السبت بتجي امي وعبير وعمتي بيباركن ليك فحبيت انخبرك
وردة ..مرحبتين بيهمن نستأذن تو
انا..تفضلي
مشت وردة وانا رديت سرحت في عيونها خشت عليا وكان لونهن عسلي فاتح وبعد ماقبلت برايها تغيرن وتمن خضر ياربي شنو سر اللون الاخضر هذا وليش تتغير عيونها  في اوقات معينة
.............
طبعا الايام مشت ووردة تحت مساعدة روان تمت تهتم ببشرتها وجاء يوم الجمعة ونقريت الفاتحة وتمت وردة زوجتي زوجة  احمد عبدالرحمن على سنة الله ورسوله وبعثت ليها  رسالة  نبارك  ليها وفرحت وردة بالرسالة واهتمامي بيها وطبعا طلعت عبير هيا وعمتي وخذو حاجات حلوة لوردة وطبعا طلبت منهم اني بنشوفها  لما بنجي نروح بيهن
وجو لحوش وردة ولبست وردة قفطان من روان حلو اسود قصير طوله لتحت الركبة وكمه ربع ورقبتة بشكل دائري مما ابرز طول رقبتها الجميل وشعرها ظفراته ليها روان بطريقة الظفرة الفرنسية بس واسعة باينة كانها تسريحة واللي ساعد في جمال الظفرة غزارة شعر وردة وبعض من الخصلات اللي على خدودها زادتها جمال بانت امراءة فاتنة الجمال بجسمها الممتلئ في الاماكن الصح اللي انا ماشفتهنش  لتو وطلعت وردة عليهم بعد السلام والمباركات والزغرودة الحلوة من عبير
وردة ..عليش متعبين روحكم
عمتي عفاف ..مافيهاش تعب ياوردة وهذا حقك اصلا لان نحن مش حنديرو بيان على خاطر العرس اتفقو امس احمد وعمك محمد انه بيكون بعد اسبوعين فقلنا على الاقل نجيبولك هدية بسيطة
عبير ..وطبعا احمد لما بيجي بيروح بينا قال يبي يشوفك ويبي يلبسك الدبلة بروحه
وردة بخجل ..عادي كان خلها للعرس
عبير .. لا احمد قال ماتخشش الجامعة الا والدبلة في ايدها خصوصا اليوم قال انه في الجامعة منزلين مباركة ليكم
وردة بصدمة.. في لوحة الاعلانات منو اللي نزلها زعمك
عمتي عفاف باستغراب ..شنو وردة ماتبيش حد يعرف انك مرت ولدنا احمد ولا شنو
وردة فطنت لروحها ..لا والله ياعمتي ماقصدي احمد يشرف اي بنت ترتبط بيه لكن الفاتحة كانت عشاء رجاله بس يعني مش فرح عشان يعرفو اللي في الكلية
عبير بضحكة .. ماهو اساتذة ودكاترة الكلية امس كانو معزومين على العشاء واكيد واحد منهم نزل المباركة
وردة ..اه فهمت تو
وبعد الهدرزة والضحك حست بيهن وردة بالجو الحلو كانها بين اهلها رغم انهم مش اهلها
وردة ..خسارة لو جت معاكم عمتي رقية
عبير ..قبل بتجي لكن ميس بنت عمتي مريضة شوي وراقدة فقالت مانقدروش نسيبوها كلنا مع احمد وعمتي عايشة
وردة باستغراب ..مع احمد
عمتي عفاف .. احمد عيونه ميس رغم ان عمرها ثلاثة شهور الا انها عقله مستحيل يمر يوم مايشوفهاش ولو فيديو وهو اللي سمها
عبير ..احمد عقله الصغار كان تشوفيه مع التوأم فيش ايدير
وردة وتهاني ..ان شاءالله لاباس عليها
وجيت  ورنيت على عبير وكانت وردة تبي تلبس بشت لكن عبير اصرت عليها تطلع ليا هكي بالذات مع كلام امها انه هو راجلها وحلالها
خذت وردة سفرة الضيافة من روان وطلعت بيها وهي مرتبكة وخدودها رايحات كيف الطمام من الحشم
وردة ..السلام عليكم
انا ..
كنت نبربش في فوني نستنى فيها بعد ماطلع محمد من حذاي ورفعت راسي لما قالت السلام معاش عرفت ننطق والله شنو نقول اصلا الحروف راحن مع اللي نشوف فيه جمال خارق طاغي من الاخير جسم متناسق مسطح ومليان في الاماكن الصح وبطن ممسوحة قفطان كان راسم جسمها بالتفصيل ورقبتها الطويلة البيضاء والعرق النابض الواضح فيها
سيقان قمة التناسق ومع الكعب اللي مش متخيل انها في يوم تعرف تمشي بيه خشت بكل اناقة ورشاقة ومشية معتدلة فحمدت ربي واجد انها تلبس في محرمة تغطي في نص جسمها استنو شوي شعرها حي عليا حي عبير وعفاف وامي ماعرفنش يوصفن جمال شعرها هكي
وردة .. احمد وينك
انا فطنت لروحي .. قاعد وعليكم السلام
كيف حال ياوردة ومبارك علينا
وردة بخجل .. الله يبارك فيك
انا.. وين كنتي داسة الجمال هذا
وردة بخجل والوجه كله تما احمر.. عادي مش للدرجة هذي يعني مش جميلة واجد
انا
هذي فيش تقول انا مش جميلة واجد اكيد مرايتهم مغبشة او مكسرة نين مش شايفة جمالها ياعندها ضعف نظر
انا بهدوء عكس التوتر اللي جواي من شكلها وزايد عليها الحشم اللي عندها ونبرة الصوت اللي تحكي بيها بسبب الحشم
انا .. وردة شنو لون عيونك بالزبط
وردة بصدمة .. اه
#حياة