طوق نجاة

الفصل 11

#طوق_نجاة
الفصل11
وجاء يوم جديد ولبست وردة العباية الجديدة والمحرمة الزيتونية اللي اضافت لمسة حلوة على جمالها والشنطة الجديدة والحذاء الجديد وطلعت لصاحبتها
وردة..السلام عليكم
روان..وعليكم السلام
ماشاءالله اللون طالع عليك يهبل مع اني للحظة قلت تو تلبسي عبايتك الاولى
وردة .. عليش بنلبس عبايتي الاولى وانا لو عندي بيش نشري عباية كنت سيبتها قديش ليا سادها سنتين وانا نلبس فيها واهي بداية السنة هذي وانا انجي بيها وبعدين انا تو مرت احمد عبدالرحمن
روان.. ايوة ايوة
وردة..بالعقل اصلا معقولة نلبس عبايتي القديمة ونخليهم يتهزو عليه في الجامعة اكيد لا لان زي ماهو بيحافظ عليا حتى انا بنحافظ عليه حتى لو على حساب نفسي وكرامتي لان اللي داره ليا احمد مادارش حد قبل ولا حد يقدر ايديره يكفي انه من يوم ماتكلم مع عمي محمد عليا وهو معاش مد ايده عليا ولاعاد هزبني صح الوكال قاعد انه مايبيش يشوف وجهي الا وانا نخدم في الحوش لكن عادي كله يهون قدام ضربه والله حتى عمر هاليومين وجه نور من كثر ماراق وحس روحه انه مرتاح عليا
روان.. سبحان الله عمر هذا عمره 6 سنين لكن فعله فعل راجل كيف داير باله منك تخيلي لما خشيتي على احمد اول مرة قعد واقف برا لكن امس مادارهاش فلما سئلته قالي المرة الاولى لانه اسمه خطيب بس لكن تو راجلها يقدر حتى من غير فرح ياخذها طالما دار اشهار وعزم على الفاتحة عمامها وخوالها تعرفي نين انصدمت فيه
وردة.. ماهو ياروحي بسببي كبر قبل عمره ربي يحفظه ويحفظ عامر  وياسمين وماتطلع زي امي
روان .. امين  هيا وصلنا انزلي شوفي احمد قاعد عند الباب
وردة.. زعمك يستنى فيا
روان ..مش زعمك اكيد يستنى فيك اولا لانك مرته وثانيا عمره ماوقف في فم الباب هيا مانعطلوش عليه
انا
كنت نستنى فيها وانا متمني من كل قلبي انها تكون لابسة العباية الجديدة مع اني حتى لو لابسة العباية القديمة كنت مش حنتكلم لكن شفتها وطالعة تهبل واللون الزيتوني طالع عليها مش عادي وعاكس على عيونها اللي لونهن تما اخضر رغم اني شفته اول مانزلت عسلي خاطري نعرف اخضر ليش يتغير هيا نخلو الايام بينا ونعرف الاخضر ليش يتغير وحمدت ربي انها لبست العباية الجديدة وفعلا قديش كانت مظلومة قديش وجها رايح ناشط مش ذابل قديش باين عليها انها مرتاحة الحمدلله يارب اني قدرت نغير حاجة من حياتها ويارب قدرني اني مانقصرش معاها
وردة وروان ..السلام عليكم
انا..وعليكم السلام
عطلتو والله انا اللي جاي بدري
روان .. انت يااستاذ جاي بدري زي المعتاد
انا.. صح هيا نخشو للمحاضرة دقايق وتبدا
روان ..نسبقكم على المدرج
انا..تمام كيف حالك ياوردة
وردة..كويسة الحمدلله كيف حالك انت
انا..لما شفتك تميت في اخيار الخير
وردة بخجل .. الحمدلله
انا..هيا وخشي للمحاضرة معاي وماتقعديش للخلف واجد
وردة ..حاضر
وخشينا للمدرج مع بعض وطبعا الطلبة كلها تمت تبارك لنا وبعدها قمعزت وردة بحذا روان مش بعيد عليا وفرحت انها سمعت الكلام وعطيت المحاضرة بضمير زي المعتاد وكملت المحاضرة وجيت احذا وردة وروان
انا..شنو روان بتمشي معانا
روان..ان شاءالله كلمت امي وباتي وقالولي باه
انا..تمام بعد المحاضرة الثانية وائل بيجيب عبير ونطلعو مع بعض روان تركب معاك عبير ووردة تركب معاي والله في اعتراض وردة
وردة بصوت واطي.. اللي تشوفه
انا..تمام وطلعت
انا
نازال ونفكر شنو قصتي خيرني نتصرف هكي معقولة قلبي تغير من ناحيتها بالسرعة هذي ممكن لان من يشوف طيبتها وخجلها اللي يهبل وخدودها لما ينحمرو مايحبهاش يارب قدرني ومانظلمها يارب في يوم وطبعا عطيت المحاضرة الثانية ولقيت وائل وعبير يستنو فيا في المكتب وشوي وخشت وردة وروان وطلعنا وائل طلع للمزرعة وعبير ركبت مع روان وانا ركبت معاي وردة
انا..تحبي تسمعي اغاني
وردة ..اه
انا..غريبة
وردة..ليش غريبة عشان طريقة لبسي انا محجبة مش ملتزمة وصح مواظبة على قراية القران والحمدلله مايفوتش فيا وقت والفجر حاضر لكن مازال فيا جانب يهوى متع الدنيا وديمةندعي  ان ربي ان شاءالله يهديني ويقويني على متاع الدنيا
انا باعجاب .. ان شاءالله اجمعين
شنو تحبي تسمعي
وردة.. لاي حد ماعنديش حد معين
انا.. كيف غريبة يعني ماعندكش فنان اوفنانة تحبي تسمعيهم ديمة
وردة.. لا والله انا نحب نسمع الاغنية السمحة كلامها سمح مثلا او لحنها حلو عادي تلقاني نسمع لام كلثوم وبعدها تلقاني نسمع اغنية راب او مروكو عجبتني يعني نسمع ماتحب وذني تسمعه
انا..ههههه فعلا غريبة وشنو تحبي ثاني
وردة بفرحة .. نحب التكنولوجيا اي شئ متعلق بيها نحب الاجهزة الجديدة والكمبيوترات اي شئ الكتروني
انا..طالما هكي ليش رديتي هديتي
وردة .. انت عارف شنو جايبلي
انا..اكيد عارف
وردة..انت جايبلي ايفون 8 مافيش في الجامعة عنده منه الا انت والدكتور زياد فتخيل انا ام عباية اللي نلبس فيها سنتين وخشيت في الثالثة لما نغير فوني المفترش وملصق بلصقة بايفون ومرة وحدة حتجيبلي كلام انا مانقدرش نتحمله لكن لما نكون في حوشك فحيكون الامر طبيعي بحكم انك عندك نفس الجهاز
انا
وهي تحكي وجعتني لهدرجة هيا مستقلة بروحها تهيا تجيب في الاول على الدفعة كلها والسنة الثانية مع مرتبة الشرف جابتها حرام يكون تفكير الناس هكي فيها لكن كلامها صح الناس ماليها الا الظاهر ماتعلم بشنو القلوب
انا.. تمام كلام منطقي وبه شنو تحبي ثاني
وردة..نحب نقرا
انا..ماهو عارف يابنتي انتي تجيبي في الاول
وردة.. لا مقصدش القرايا ان قصدت الاطلاع والثقافات الثانية تعرف لما نجي للجامعة ماعنديش محاضرات هاربة من الحوش والهم اللي فيه نمشي للمكتبة ونبدا نقرا في كتب ما تخطر في بالك روايات تاريخ ثقافة علوم اداب اي شئ
انا..ماشاءالله به شنو نوع الروايات اللي تحبيها
وردة ..نحب الروايات البوليسية بالدرجة الاولى وبعدها الرومانسية
انا..عندك علم حتى انا نحب الروايات واكثرهن البوليسية
وردة .. معناها اكيد قاري لاجاثا كريستي صح
انا..واجد قاري ليها
وردة.. انا ممكن قريت ليها عشرة او اكثر شوي ليها لان في الكلية مافيش ليها روايات واللي عندي شراهن ليا بابا الله يرحمه
انا..الله يرحمه ولايهمك عندي مكتبة في جناحي فيه تقريبا جميع روايات اجاثا كريستي المترجمة كلها
وردة بفرح طفولي .. والله الله ياربي معناها بنقرا رواياتها كلهن ياسلام
انا
انتبهت ليها وقديش هيا فرحانة زي الطفلة اللي تفرح بقفطان وردي منفوخ الله قديش هيا حلوة ونقرة الزين اللي تبان مع ضحكتها كل شئ فيها غريب عيونها اللي يتغير لونها نقرة الزين اللي ماتبانش الا لما تضحك رغم ان نقرة الزين تكون باينة في الانسان بدون اي شئ ولما يتكلم او يضحك تزيد توضح لكن هيا لا نقرة الزين عندها زي الغمازات ماتبانش الا لما تضحك سبحان الله
وردة.. وين رحت احمد
انا..قاعد هي وصلنا
ونزلنا وخشينا لمطعم ولاني مش عارف شنو تحب فاخترت مطعم مشاوي
انا..هي شنو تطلبو
وردة..اللي تختاروه ماعنديش شئ معين
انا..هذا مطعم مشاوي فيه دجاج ولحم سمك اللي تبيه
عبير .. جربي السمك عندهم يهبل
وردة.. انا نحبه السمك ونحب انطيبه اكثر حاجة بابا الله يرحمه هو اللي علمني تنظيفه وتطيبه باشكال واجدة
انا بضحكة ..معناها تمام بكل
وردة..تمام شنو مافهمتش
عبير بفرحة ..احمد مخروم سمك
وردة بخجل.. ولايهمك احلى سمك تاكله
انا..تسلمي وانتي روان شنو تبي
روان ..بما انكم رسيتو على السمك حتى انا نحبه اختارولي زيكم
انا ..تمام
وجاء الغذاء وتغذينا ورغم ان السمك يهبل لكن قعدت نتخيل لما وردة بطيبه كيف بيكون طعمته وكملنا الغذاء وطلبنا قهوة
عبير.. نمشو انا وراون نقعدو على الطاولة الثانية نشربو قهوتنا ونخلوكم برواحكم تحكو
انا.. شكرا عبورة
وخذت عبير وروان طاولة قريبة منا وقعدت نحكي انا ورودة
انا..قوليلي كيف عرفتي ان قهوتي سادة
وردة بخجل .. ذقت قهوتك مرة في سنة اولى
انا باستغراب ..كيف
وردة ..سنة اولى كنت اكثر حياة من تو كنت مازالت ماذقت مرار راجل امي كانت في روح مشاغبة وانت ديمة مشهور بمقك الازرق وعشقك للون اصلا فكنا مركزين معاك ومرة خشيت للمدرج وانا كنت قاعدة لقدام حطيت على الطاولة فونك ومق القهوة ودخانك ومفاتيحك فدق الباب طلعت تشوف فيه لكن طولت شوي وصار نقار بيني وبين روان فقلت ليها نقدر وفعلا ذقتها ولقيتها مرة سادة
وكان مش غالطة تحب حتى النسكافيه البلاك بس معدلة تشرب فيها صح
انا.. طلعتي مش هوينة
وردة بضحكة ..كانت ايام
انا.. ان شاءالله ترجع زي قبل وترجعي زي قبل واحسن بس كيف عرفتي نحب النسكافيه البلاك
وردة.. شميت ريحتها خطمت مرة من حذاك
انا.. عندك حاسة شم قوية
وردة.. لا بس لان نعشق الكابتشينو فنحب اي حاجة من مكوناته وغير ذلك بابا الله يرحمه كان يحب يشرب النسكافيه البلاك
انا..به كيف عرفتي انها معدلة مش سادة
وردة ..ريحتها لان لما تكون من غير سكر تكون ريحتها اقوى لكن لما تكون معدلة او سكر زيادة تكون ريحتها اهدى
انا..خبرة صار
وردة .. تعرف انا عندي طاقة كبيرة لفعل كل شئ لكن ماعنديش وين نطلعها زي حبي للرسم والتصميم نطلع فيه في تورتات معمل عمتي فاطمة ونحب نزرع الورد واي حاجة تتعلق بالزرع نحبها لكن ماعنديش وين نطلع الحب هذا الا في اربع اصيصات حاطتهن في المطبخ اللي نشتغلو فيه طلبيات المعمل
انا..ماشاءالله
وردة..به انت تقريبا عرفت واجد عليا لكن انا مانعرف شئ عليك غير انك واعر وعصبي وقاسي شوي وجرئ لابعد حد ولما تحط حاجة في راسك اديرها وتحب القهوة العربية سادة والنسكافيه بلاك معدلة  وتحب السمك وتحب الروايات البوليسية شنو ثاني
انا بسرحان..نحب لون عيونك
وردة بخجل .. بس
انا فطنت لروحي بنغير الموضوع .. طبعا نحب اللون الازرق والابيض ونحب التكونلوجيا زيك ونحب امي وعندي فوق كل شئ
وردة..ربي يحفظها لك
انا..امين يارب
به شنو تكرهي حكينا على الحب بس
وردة .. نكره الكذب
#حياة