طوق نجاة

الفصل10

#طوق_نجاة
الفصل10
وردة بصدمة..اه
انا..شنو لون عيونك
وردة
هذا خيره كان يحكي على جمالي وفجاءة طول وهو ساكت وبعدها يسئلني شنو لون عيوني خيره هذا
وردة ..لون عيوني الاساسي عسليات فاتحات
انا..لكن تو نشوف فيهن اخضر ومرة شفتهن رصاصي بلون الفضة الفاتح
وردة باستغراب ..مركز معاي واجد
انا..مش مسئلة تركيز بس لون عيونك جذاب ومستحيل حد ماينتبهش ليه
وفي خاطري شكلي بنلبسك نقاب بسببهن عشان مايشوفهنش حد الا انا
وردة ..لون عيوني يتغير بحالتي المزاجية في الجديات والضحك والعادي لونهن عسلي فاتح هذا ليش قلت ليك الاساسي ولما نبكي او نزعل او نضايق او نخاف يتغيرن للرصاصي وبالنسبة للاخضر خليها للايام تو تعرف ليش يتغير
انا..مع ان فضولي قاتلني لكن عادي نصبر والايام بينا طويلة
وبدون اي كلام شديت ايد وردة وانتفضت هيا بشدتي
انا..وردة انتي مراتي مش نشد ايدك بس نقدر اندير اي شئ
طبعا وانا نحكي في كلامي هذا قاعد نتفرج على وجه وردة اللي راح احمر من الحشم ومبتش ترفعه وحسيت برعشة ايدها بين ايديا طلعت من جيبي علبة فيها الدبل
ولبست ليها دبلتها كانت عادية سادة ومعاها محبس مزين بحجر كريم لونه اخضر زي لون عيونها اللي نشوف فيه تو ومديت ليها دبلتي الفضة اللي بلون عيونها اللي رغم حلاوته لكن نتمنى مانشوفهن وهيا على ذمتي
انا..شنو ماتبيش تلبسيني دبلتي
وردة .. ما انتبهتش
خذيت منه الدبلة ولبسته له وانا كلي على بعضي نرعش وفجاءة حسيت النفس انقطع عندي احمد باسني على جبيني بوسة طولت ثواني لكن حسيت بيها روحي انسحبت مني
انا
بعد  بستها على جبينها ورغم ان كان خاطري نبوسها على شفايفها اللي زي حبات الفراولة معبيات باغراء لكن قلت خليها تاخذ علي بالشوي وحولت منها الا انها مازالت مسكرة عيونها وشادة نفسها
انا بضحكة.. وردة تنفسي
وفعلا تنفست وفتحت عيونها وانا نبيها تحول الحشم
انا..هذي بوسة على الجبين امنا كان على شفايفك شنو درتي
وردة .......
انا
عرفت انها وصلت حدها من الحشم فخفيت عليها وشديت ايدها ولبست ليها انسيال بسيط عبارة عن قلب محطوط بين زوز ايدين ومنقوش عليه اسمي واسمها وتاريخ الفاتحة ومعاها ساعة بماركة معروفة 
وردة ..شكرا الدبلة كانت سادة واجد عليا هكي
انا..شنو قلنا على شكرا هذي انا راجلك ومعقولة تتخيلي ان احمد عبدالرحمن يجيب لمرته دبلة بس وردة كنك تقول مش عارفة مكانتي
وردة.. لا والله لكن عارفة ظروف زواجك بيا
انا ..قصيت عليها الكلام
وردة معاش تقولي هكي انا لما قررت اني نتزوجك بعقلي ممكن قلبي مازال لكن يجيه وقت ويوافق لان مش معقول حد يشوف ادبك واحترامك وجمالك ومايحبكش غير نبي وقت بيش نعرفك ونحبك من قلبي فمعاش تقولي هكي فاهمة
وردة ..فاهمة
انا..وردة
ناديتها التفت ليا خذيت ليها صورة ليش درت هكي مش عارف وطبعا ردت تحشمت من جديد
انا..وردة طبعا بكرة بتجي للجامعة وحتى قدام الطلبة بتناديني احمد فاهمة
وردة ..بس
انا..مش بس انا راجلك راجلك
وردة ..حاضر خصوصا بكرة المحاضرتبن انت
انا..وهذا ليش نبهتك
وردة..حاضر هي نستاذن تو وصبت
انا صبيت وجيت قدامها وشديت اكتوفها  انا.. وردة عمرك ماتفكري انك حتنضلمي معاي او تخافي مني او من معاملتي انا قبل كل شئ نخاف من ربي فنبيك ديمة تكوني قوية بيا ومعاي
وردة
رفعت عيوني فيه وحطيت عيني لاول مرة في عينه ورحت في عيونه قهويات داكنات بدرجة تهبل ورموش سود وكثيفات وماقي عين تقول مرسوم سبحان الله وخشم متناسق لاكبير ولاصغير وفم رجولي وبشرة قمحية تهبل زي البرونزاش اللي يديرو فيه الممثلاث ولحية معبية بلونها الاسود وانيقة مش مشعثة
وردة.. انا عمري ماحسيت بامان في حياتي بعد مامات بابا لكن من يوم ماخشيت حياتي وانا بديت نحس بيه لما قلت ليك انت طوق نجاتي لاني فعلا كنت كاني نغرق وانت اللي جيت نقدتني فكيف بنفكر حتى مجرد التفكير انك يجيك يوم وتظلمني
انا
نسمع في كلامها وسارح في صفا اللون الاخضر في عيونها ونراجي فيه يتغير لكن هي تحكي وهو يزيد يوضح وقديش عجبني كلامها
انا..شكرا على ثقتك بيا
وردة بضحكة تقلد فيا ..مش قلنا معش تشكري
انا
سارح في ضحكتها رغم انها خجولة الضحكة لكن تهبل قديش زادتها حلاوة لاني اول مرة نشوفها تضحك استنو شوي عشان تكمل عليا بالمرة فيها نقرة زين لكن مابانتش نين ضحكت ماهو كان ناقصني انا شكله النقاب جاي جاي   
انابعد فطنت لروحي ..هههه تردي فيها لي توا
وردة ..اه
انا..باهي هيا ناديلي هلي وغيري قفطانك قبل مايجي راجل امك
وردة ..حاضر اصلا مستحيل يشوفني هكي
انا .. وشعرك لو يتغطى قدامه احسن
وردة..عمره ماشافه شعري شنو حتى لونه
انا..تمام هكي وكلها اسبوعين وتكوني في حوشي ان شاءالله وطبعا تفاصيل العرس تو نحكيها لك بكرة لما تطلعي معاي بعد الجامعة
وردة ..برواحنا
انا..لا معانا عبير واذا تبي تعزمي روان عادي على الاقل تلهى هيا وعبير
وردة..حاضر تو نشوف بس قلت لعمي محمد
انا..اكيد
وردة ..هيا سلام تو
انا..سلام وديري بالك على روحك
وردة ..ان شاءالله
خشيت للحوش وانا فرحانة واجد حتى لو يبيني بعقله لكن اكيد حيجي يوم وقلبه يحبني شكرا ياربي بعد الظلم اللي شفته كافيتني باحمد شكرا ليك يارب
ونادت وردة على اهل احمد وبعد السلام روحو وقعدت روان وتهاني ووردة يشوفو شنو جابو ليها
روان ..ماشاءالله شكلهن حاجات واجدة
تهاني ..هيا افتحن الاكياس خلوني نشوف وطبعا وردة حمدت ربها واجد ان جسم امها مش زي جسمها كنهدا خذت اللي جابوه ليها كله
وردة ..الله عباية حلوة ومعاها محرمة كبيرة وكاملة بشنطة وحذاء ارضي بسيط
روان ..ذوقهن حلو
وردة
طبعا عجبتني العباية والمحرمة الزيتونية والحذاء زي لون المحرمة والشنطة والعباية سودا وبعدها فتحت الكيس الثاني لقيت فيه فستان بسيط وانيق وحلو من الشيفون طويل وكم لونه رصاصي وعليه ورد في نهاية الكم ونهاية الفستان بلون وردي ومعاه وشاح وردي وحذاء وشنطة رصاصيات والكيس الاخر مستلزمات ومستحضرات مكياج من ماركة ممتازة ومعروفة وكريمات للترطيب والعناية عجبتني حاجاتهم اللي جايبينهن
روان ..ترا وريني
وردة ..شنو اهو الاكياس حذاك كلهن
روان ..لا ايديك ياحلوة
وردة ..هاكي ايدي
روان ..يهبل محبس الدبلة مش عادي وحي الانسيال هذا اكيد توصية لان عمره ماقابلني بصراحة ذواق حتى الساعة ماركة محترمة سلمه جياب
وردة ..الله يسلمك
روان ..احكيلي شنو صار معاك في المربوعة
وردة ..حكت ليها كل شئ
روان ..يهبل هالاحمد والله ماتخيلته هكي
وردة بخجل ..اصلا قالها ليا لما قلت ليه طلباتي قالي مش معناها متزوجك لاسباب يكون زواجنا على ورق تذكري لما قالها وشكله هكي من بدايتها يبي حقوقه كاملة
روان..اصلا هو لما ياخذ حقوقه يزيد يربطك بيه اكثر واكيد الحب يجي بينكم وبالذات مع بيبي
وردة بشرود..ان شاءالله
اه على فكرة شنو بتمشي معاي بكرة
روان ..بالنسبة ليا اكيد لكن لازم نسئل فاطمة وعطية
وردة ..تمام
#حياة