#طوق_نجاة
الفصل29
وصلت للحوش وسلمت على امي وخشيت لوردتي في المطبخ وشفتها كيف رايحة تهبل لابسة قفطان قصير ومن غير كمام لونه رصاصي ومش ضيق واجد على جسمها بس مبين تفاصيله وما قدرتش نشد روحي وجيت ضميتها من الخلف وحطيت راسي على كتفها
وردة.. اهلين حبيبي
انا..اهلين ياروحي
وردة..حول تو تخش عمتي عايشة
انا..وكان
وردة..انتحشم
لفيت وردة شوري وبستها بوسة طويلة وبعدت عليها وجبيني على جبينها
انا..وردتي انتي مرتي وحبيبتي نبوسك ونضمك في كل مكان في الحوش وعمتي عايشة وامي وعبير عمرهم ماحيضيقو من تصرفاتي لانهم عارفيني كويس وعارفينك
وردة بصوت واطي ..بس انا نتحشم
انا.. بالشوي تو يحول الحشم
وردة..به خليني نكمل الغذاء
انا..مع اني خاطري نتغذاك انتي لكن هي كل شئ الا الغذاء عند امي
وردة.. هههه الحمدلله انه عند امي مهم كنهدا عديت فيها
انا بغمزة .. ماتفرحيش واجد بعد الغذاء بنحلي بيك
وطلعت وسيبت وردتي وانا مرتاح ان قراري نكمل مع وردة ونفوت ريم حتى لو بنتزوجها مؤقت لكن مستحيل نقرب مرا الا وردتي بس لاني مانقدرش نفكر اني نقرب غيرها
ومشن الايام بسرعة وانا عايش في احلى نعيم مع وردتي دهوير وطلوع وغوص في الشهد وجاء اليوم اللي تمنيت انه مايجيش قراية الفاتحة وبكرة فرح ريم وطبعا ريم عزمت وردة وعبير وامي وعمتي عفاف عشان نحن ماناش دايرين شئ فقالت عمتي عفاف نحن نمشو نرفعو الذهب ونحطو الحنة ونطلعو وانا عجبني كلام عمتي واتفقن انهن يلبسن عربي خصوصا ان وردة مالبستش عربي بكل لان مادرناش ليها اسبوع بسبب ان سافرنا وطبعا يوم الفاتحة اليوم
وردة..جهزت ليك البدلة حبيبي
انا..بدلة شنو
وردة..شنو بدلة شنو اللي بتمشي بيها اليوم
انا..وين بنمشي انا قاعد واصلا بنمشي للمزرعة انا وياك قبل غير عبير قالت انها بتجي حناية بتحنيك انتي وهيا
وردة..اه عشان بكرة لكن ما ادوخنيش حبيبي اليوم مش فاتحتك
انا..اه
وردة..به يعني مش بتمشي
انا..لا
وردة..يوووه فهمني خوذني على قد عقلي وفهمني
انا..ياحبيبتي انا قراية الفاتحة مش شرط انكون انا موجود يمكن يكون اي حد وكيلي ويقرا الفاتحة بدالي انا وكيل نفسي في قراية فاتحتك انتي بس
وردة بفرحة ..اه من بيكون وكيلك امنا
انا..راجل عمتي او وائل واحد منهم قلت ليهم يكون وكيلي
وردة..به ريم مش حتزعل
انا..لا ومايهمش
وردة..عيب حبيبي تو تزعل
انا..وردة المثالية اللي انتي فيها راه ماتنفعش في وقتنا هذا لازم تكوني انانية ولو شوي
وردة..ومن قالك اني مثالية انا نبيك ليا بروحي ونبيك تكون ديمة معاي ونبيك ماتفكرش في حد الا فيا انا بس وماتهتم بحد الا بيا بس وانانية اه انانية وانا فرحانة لما ماطلعتش مع ريم شريتو الدبش زيي او اخترت الفيلو ليها وحتى الذهب لما قلت لعبير تختاره هيا وعمتي عفاف حتى من الدبلة اه فرحانة واجد وانت ماتبيش تكون وكيل نفسك في فاتحتك عليها وانك تبي تقضي اليوم هذا معاي لكن في الاخير هيا مرا زيي زيها واكيد حيأثر فيها انك ماتكونش معاها في يوم زي هذا
انا
فرحان واجد وانا نسمع فيها لاني ديمة كنت خايف ان وردة مازالت تتعامل معاي كأني طوق نجاة ليها بس لكن بكلامها هذا اطمنت فعلا انها حبتني زي ماحبيتها الحمد والشكر ليك يارب
انا..ربي يخليك ياوردتي صح هيا بتكون مرتي لكن في القلب مافيش الا انتي
وردة ..وكيف بيكون العدل لان ربي امرك بالعدل انت تعرف حديث الرسول عليه الف صلاة وسلام ( من كان له زوجتان فمال الى إحداهما جاء يوم القيامة وشقه مائل) وانا مانرضاش ليك هكي لانك ماتستاهلش
اناابتسمت ليها على طيبتها وخوفها عليا من عقاب ربي.. ربي يقول (ولن تستطيعو أن تعدلوا بين النساء ولو حرصتم ) فكيف ربي بيعاقبني وهو الذي قرر ان العدل مستحيل
وردة ..صح كيف حتى انا قريتها الاية هذي واستغربت وقلت كيف ربي شرع التعدد ويتعهد بالعقاب لمن لايعدل وفي نفس الوقت ربي يقول استحالة ان تعدلو
انا..العدل المقصود هنا ياوردتي فيما املكه يعني يوم عندها ويوم عندك زي مانجيب ليك انجيب ليها يعني العدل المادي لكن العدل اللي ربي قال مستحيل هو العدل القلبي اللي مستحيل حد يقدر يتحكم فيه الرسول عليه الف صلاة وسلام كان يحب السيدة عائشة اكثر من بقية زوجاته لكنه كان يعدل بينهن في المعاملة لكن كان دائما الدعاء عليه صلاة وسلام (اللهم إن هذا قسمي فيما أملك فلا تلمني فيما تملك ولا املك )ويعني قلبه
وردة ..عليه الف صلاة وسلام ونعم بالله ليه حكمة في كل شئ
انا..لما يكون قلبي معاك مافيش اثم عليا لكن الاثم لما نفرق بينكن في المعاملة
وردة..ربي يحفظك ويهنيك يارب
انا..وبعدين حنتصل بيها لما تنقرا الفاتحة ونبارك ليها وبنقولك حاجة وردتي
وردة .. شنو
انا.. انا من السنة اللي فاتت كنت واهم اني نحب ريم وكنت خايف انها ماتتقبلش وضع امي ولما سافرت وماحضرتش السمستر بتاع السنة هذي كنت فاتحتها في موضوعنا لكن تغيرت افكاري كلها ولما قررت نتزوجك كان بقناعة صح مش بقلبي في الاول لكن بعد ما روحنا من لندن اني نتم زواجي معاك اللي صار ريم بعتت ليا رسالة وانها ماتخيلتش اني تزوجت غيرها وكلام زي هذا شعرني بالذنب لكن بعدها معاش قدرت لانكمل زواجي معاك او نتزوجها وباي حجة بنقولك بنتزوج عليك وانا اصلا وقتها ماتميتيش زوجتي فعليا قعدت في حيرة وبعدها لقيت روحي نميل ليك واجد وبعدها بديت نحبك ولما اعترفتي بحبك لي هذاك الوقت عرفت روحي نعشقك مش نحبك
لكن ريم تمت مسؤلية وشعور بالذنب ولما قررت اني نصارحها حاولت تنتحر وانا مستحيل نقدر نكمل معاك لو صارلها حاجة من شعور بالذنب اني سبب في اللي صارلها فياريت تكوني فاهمة ياحبيبتي ان في القلب مافي الا انتي وريم زوجة لشعور بالذنب
انا
متعجب فعلا من نفسي معقولة عشان مانطلعش عيل نوجع وردتي هكي لا مش عشان نطلع عيل لكن ريم حاولت تنتحر ولو صارلها حاجة كنت نعيش عمري كله بالذنب واني سبب موتها لقدر الله وانها دارت هكي عشان ماتقدرتش تتحمل كلام الناس واكيد انا مش حنرضى سمعتها تتشوه بسببي حتى لو على حساب نفسي ووردة ويكون زواج مؤقت لان في الاخير بيرد على بنتي لو ربي رزقني بيها
وبعدها بلغني وائل ان الفاتحة انقرت وعمي محمد راجل عمتي عفاف هو وكيلي فكنت بنتصل بريم لكن ماقدرتش وبعتت ليها رسالة وخلاص انباركلها فيها
.........
ريم ..شفت يا رامي حتى اتصال ماكلفش روحه ايديره بعتلي رسالة مباركة وخلاص
رامي .. اولا انتي متصلة بيا على خاطر هذي وانا نسحابك مرايفة عليا بالذات ليا يومين ماشفتكش
ريم ..ماهو بنفهمك اني كيف نقدر اندير اللي نقدر عليه وهو يعامل فيا هكي
رامي..لو ماقدرتيش اديري حاجة من المتفقين عليها يبقى انديرو الخطة ب
ريم..شنو الخطة ب
رامي.. وردة
ريم ..وردة شنو علاقاتها
رامي ..وردة مفتاح احمد
ريم بصدمة .......
#حياة
أنت تقرأ
طوق نجاة
Randomعندما تعتقد انك طوق نجاة لها ولكن تكتشف في الاخير انها هي من كانت طوق نجاتك رواية باللهجة الليبية لصديقتي حياة احمد
