طوق نجاة

الفصل32

#طوق_نجاة
الفصل32
ريم ..لا ماتخافش ماتخافيش ماقربنيش معقولة هو مش انسان جاهل عارف ان عندي عذر
ريم
انا كنت نحكي مع رامي وحسيت بخطوات احمد على الدروج فدرت روحي كأني نحكي مع امي
انا ..السلام عليكم
ريم ..وعليكم السلام
هيا سلام تو يا ماما احمد جاء
انا..كنها امك
ريم .. تسئل ان صار حاجة بينا او لا وانا قلت ليها اني عندي عذر
انا ..اه في البداية توقعتك تحكي مع حد ثاني
وحسيت بوجه ريم كيف تغير لكن درت روحي مش مركز
ريم .. من بنحكي معاه في الوقت هذا الا ماما ماهو ماحصلتش فرصة امبدري تسئلني
انا..اه
وجيت جيهة tv وقعدت نتفرج
ريم .. احمد ممكن نسئلك
انا..تفضلي
ريم ..هي وردة تعلم ان زواجنا مؤقت
انا..لا
ريم ..به شنو العذر اللي قايله ليها عشان تنزل ترقد معاها بدون انا مانزعل
انا..امس قلت ليها انك تاعبة ورقدتي بدري واليوم اكيد بنقوللها ان عندك عذر
ريم ..اه وبه وبعدين
انا..يسهل الله هي المشكلة مش في وردة وردة طيوبة واي حاجة نقوللها تقتنع بيها
ريم..امنا وين المشكلة
انا..فيا لاني مانقدرش نرقد بعيد عليها
ريم
حسيت بحاجة غريبة كنوع من الحسد او الغيرة من حبه لوردة ولمعة عيونه اللي تبدا في عيونه وهو يحكي عليها والله وردة اللي سبحان الله واول مرة انشوف حالة زي هذي الا عندها عيونها عسليات فاتحات صافيات ولما تشوف احمد سبحان الله كيف يتغيرن للون الاخضر لدرجة كان خاطري نسئلها وغرت واجد لما شفت نظرة الغيرة في عيون احمد عليها من هيثم وانا حبيبي اللي نموت فيه رضى اني اندير عملية اجهاض ونخسر بيبي قطعة منه عشان خطته ماتفشلش ومعاها رضى اني نتزوج راجل غيره ومش متخيل مرات الراجل هذا يضعف ويطالب بحقه الشرعي بما اني مراته غير احمد يحب وردة واحمد راجل بطبعه الاخلاص
انا..ريم وين رحتي
ريم ..قاعدة احمد تحب وردة انت
انا..بدون ماتزعلي
ريم ..وليش نزعل صح انا نحبك لكن كل شئ بالاكراه الا الحب
انا..نعشقها مش نحبها انا اصلا وصلت لاخر مراحل الحب معاها
ريم ..شنو فيها من ميزات خلنك تتبدل من حبي لحبها
انا..تعرفي ياريم وبكل صراحة انا شكلي ماحبيتكش ممكن كان اللي نحس بيه اعجاب ناحيتك لاني لو كنت نحبك صح كنت مستحيل نتزوج مرا غيرك لاني مؤمن بالقلب يحمل وحدة بس ولما كلمتك واتصلت بيك كان من باب شعوري بالذنب اني عشمتك وخفت ربي يرده في بنت ليا ربي يرزقني بيها واللي زادني منظرك كيف ذابلة وتاعبة
ريم .. بس ماقلتش شنو اللي حببك في وردة
انا.. البساطة مافيش تصنع طفلة واحيانا واجدة نحس اني باتها مش راجلها خصوصا مع فرق العمر بينا وغير انها متحملة مسؤلية نفسها وعزيزة نفس رغم حالتي المادية المرتاحة عمرها ماطلبت مني حاجة نجيبها ليها رغم انها لو طلبت شنو كنت حنجيبه ليها والحشم عندها واجد مرات يضايق فيا لانه حتى معاي تتحشم لكن لما تتعامل بيه مع غيري نفرح واجد ملتزمة بصلاتها وقراية قرآنها وتحب حاجات واجد هادية ومجنونة في نفس الوقت 
ريم
نسمع فيه وهو يحكي عليها بكل حب فعلا تحسرت على روحي واني طاوعت حبيبي لكن خلاص تو معاش ينفع الكلام
ريم ..ربي يخليها ليك
انا..امين يارب
ريم ..احمد تقدر تنزل ليها مش لازم تستناني نين نرقد
انا..مانبيش وردة تحس بشئ بينا
ريم ..بس غريبة رغم حبك ماقلتش ليها علي بينا لانها اكيد هيا غيرانة
انا..اكيد ومضايقة واجد امس لدرجة انها رقدت مع امي
ريم ..به ليش ماقلتش ليها
انا..اختبار لحبي وحبها
ريم ..كيف
انا.. لما شفتها كيف وافقت بدون اي نقاش او اعتراض خفت انها ماتحبنيش فقلت ان هذا احسن حل يا يخليها تحبني يا تبتعد عني لكن يوم الفاتحة فاجأتني وهيا ادافع عن حقها بس فهمتني اني ماتبينيش نطلع عيل او ماعنديش كلمة قدام اهلك وقدامك
ريم .. وان شاءالله تنجحو في الاختبار هذا
انا..ان شاءالله
ريم ..به انزل يا احمد وقول ليها اني قلت ليك اعدل بينا من البداية وبالذات بما اني عندي عذر وخليها هكي ليلة تنزل ليها بدري وليلة لا
انا..يعني مش حتضايقي تقعدي بروحك
ريم.. لا تو نكسد على النت
انا ..به
وفعلا تقول ماصدقت نزلت لوردتي لحبي واول ماخشيت عليها انفجعت وهيا كانت طالعة من الحمام لابسة كبوط الحمام القصير وشعرها المسدول والمندي من الدوش  منظرها لا يقاوم وبدون اي رد عليها جيتها وخذيتها لحضني ومن حضني لسريرنا نغوص معاها في بحر الشهد اللي مهما غصت فيه مستحيل نشبع منه
وبعد وقت وهيا في حضني ونلعب بشعرها المبلول
وردة بصوت واطي ..حبيبي كيف نزلت بدري هكي حرام تو تزعل ريم
انا..شنو ماتبنيش امنا
وردة حطت صبعها على فمي ..هشش ماتقولش هكي حبيبي انا عمري مانستغنى عليك حتى لو متزوج غيري ثلاثة انا نحبك ونموت فيك بس عشان انا مرا زيها لاني لو مكانها كنت متت من الزعل والقهر
انا.. اطمني ياقلبي ريم هيا اللي قالتلي ننزل واني نعدل بينكن من تو
وردة..بس هيا عروسة
انا..هيا اللي اصرت غير انها عندها عذر هذا ليش اصرت ومن اليوم الليلة عندك وبكرة عندها عشان مايزعل حد تمام هكي
وردة بنبرة حزن حاوالت ماتبينهاش..تمام ياحبيبي
انا
فطنت بيها وماكان في ايدي شئ نطمنها بيه غير اني نقول في خاطري  اصبري ياوردتي
وردة ..حبيبي شنو رايك اندير كابتشينو ليا ونسكافيه ليك لاني دايرة كيكة ايس كريم فروالة وقبل نعطيها لك بكرة لكن نحن فيها
انا بفرح ..يمي تمام نستنى هيا مابين اصفحت الفيس
وردة ..تمام
وطلعت وردة وانا فتحت الفيس واول حاجة طلعلي منشور منزلاته ريم بتاعت عزومة اليوم والهدايا الذهب اللي جايتها من اهلي واهلها وخطرت عليا وردة لما قررت انها تبتعد على الفيس بسبب التفاهات هذي وبدون مراعاة لشعور ناس ماعندهاش حاجة حتى بسيطة
وردة ..هيا حبيبي صبي
انا..تعرفي حبيبي كل ماتقوليها قلبي ينبض بقوة كأني اول مرة نسمعها
وردة بحب.. عشان طالعة من القلب
ومشت ليلتي من احلى الليالي زيها زي كل ليلة من لما تمت وردة زوجتي شرعا
ومشن الايام عادي ودرنا اسبوع لريم وتحت الحاح وردة لان عادتنا العروس تمشي عند اهلها ومشت معاها عبير وعمتي عفاف لكن وردة انا ماخليتهاش على خاطر ماعنديش ضمان في هيثم ان مايستغلش الفرصة ويضايق وردة حتى ولو بنظراته نغار عليها بدرجة كبيرة وروحنا من اهل ريم وركبت مع ريم وانا حامق
انا..مهما انكان ماتسمحيش لنفسك حتى لو اللي بينا مؤقت لكن اسماك مراتي فاهمة والله نفهمها ليك
ريم ..والله يا احمد انت عارف ان رامي متربي معاي
انا..مش لدرجة السلام بالخد قبل مادخلنيش بيك كيف يسلم عليك لكن تو لا اسمك مرات احمد عبدالرحمن يبقى تحافظي على اسم الراجل اللي شايلتيه
ونزلت حامق مانفرز في شئ جيت لراحتي وهدوئي وسكينتي وطول عرفت اني مش تمام وجيت اتكيت على رجليها وقعدت تلعب بشعري زي كل مرة
وردة
حسيت بيه وخصوصا اننا كلنا سمعنا صوت باب الشقة اللي فوق كيف اسكر بقوة ولاني اول مرة نمر بموقف زي هذا فأمي طلبت مني نخش لداري ولو جاني مانحاولش نتكلم معاه وبالفعل مادرت شئ شديت المصحف وقعدت نقرا خش عليا وحط راسه على رجليا وقعدت نلعب بايد على شعرها والثانية نقرا بصوت مسموع ليه بيش يهداء وفعلا ماطقش نص ساعة حتى رقد غطيته وخذيته في حضني ورقدت معاه وفطنت على الفجر رفعت راسي لقيت روحي انا اللي في حضنه ونايض وقاعد يتفرج عليا
وردة..امتى نضت حبيبي
انا..من ساعة هكي
وردة..ليش مانوضنتيش
انا..قلت نشبع عيني من ملاكي اللي راقد حذاي
وردة بخجل..هيا نوض  نتوضو ونصلو
انا
صلينا الفجر وقرينا قرآن هذي وردة السكينة والطمأنينة ومشن الايام وجاء يوم غريب من اول مانضت وانا نحس في حاجة مش تمام ومشيت للجامعة وبعدها عديت للمزرعة لقيت وائل حصل في الخدمة فقررت نلتفت ليه بالذات سادني عشت دور العريس قدام الناس اسبوعين ولهيت معاه في الخدمة
وردة
عمتي عايشة اليوم ماجتش لانها مريضة درت الغذاء ونزلت ريم حكت معانا شوي وتغذت وركبت واحمد اعتذر على الغذاء لان حاصل مع وائل وريم ركبت لشقتها وانا غيرت  دبشي ولبست سروال قطني قهوي ولبست عليه تشيرت طويل وواسع وكم بيج ولبست وشاح مخربش باللونين وطلعت لزرعاتي نهتم بيهن خصوصا اني الايام اللي فاتن انشغلت مع روان في تصاميم دبشها ومشاوير الخياطة واحمد مامنعنيش اني نطلع معاها وعطاني مبلغ كبير بيش نعطيه لروان هدية مع اني اعترضت على كبر المبلغ لكن قالي مايجي شئ قدام اهتمامهم بيا وحفاظهم عليا وانا قاعدة نجمع في النجم اللي قلعته و حطيته في السطل حسيت بحد وراي وتوقعته احمد ولما التفت نين السطل طاح مني
وردة بصدمة ..انت ............. 
#حياة